Escape 16

ESCAPE.. (16)

Ziaktu: Toni Rãlte

Zanriah an kil dun lai chuan Zoi chu a hawi chhuak ngam mang lo a ni. Ephraime chu a hlau nge a zah tih hriat va ni suh. Ni e, mi panga thattu nena chaw hlui kil dun chu tu tan mah a nawm a rinawm loh tawp mai. 

"Eng nge i ngaihtuah? " Ephraime chuan a ti nghut a. 

"Ka.. Ih, jenny ka lo ngaihtuah a. Hre ta se, tiang vel hi" dâwt sawi a thiam lohzia a mitmeng chuan a hril vek si. Tam pawh ei loin a kham ta ringawt. A ril chu a ţam reng, mahse, a ei lui thei ngang lo a ni. Ephraime erawh a ei tui viau thung. Ei khamah an intihfel zawhah living roomah an thu dun leh ran a. Zoi chuan tul hlei lo khawih tur a dap sek reng a, zahzel a mamawh ngang a niang e. 

"Zin chu i duh lo maw? " Ephraime chuan a ti a. 

"Duh chu duh e, mahse, khaw nge kan zin ang? "

"Khawchhak tlang dung fan khi ka chãk a. Camera keng bawk ila" a lo ti teh daih a. Zoi'n mak a lo ti leh tawh. 

"Teh daih chuan, a nuam viau ang" a lo ti ve mai a. 

"Chumi hmain court-ah kalin kan innei thei alawm" a mita rawn melh chung chuan a ti a. Zoi a hamhaih ru takzet, a hnungzâng te chu a thlan dup mai. 

"Ka hrethiam bik lo. I tih dan dan" a ti chuai raih a. Tualthattu nen engtin nge an inneih theih ang? Engtikah emaw an la man ngei awm si a. Ni e, ani pawh hian engvangin nge police a hrilh mai loh ang? A laichin leh a mi ngainat te thattu hi a hum ang maw?! 

"Zoi" a aw chu a fiah kher mai. A phu zawk a, a va melh hâw.. 

"I ngaihtuahna i lenkual tir nasa deuh a nih kha.. Ka lo hawn atang khan i la pangngai miah lo. Kan sawi dun thei ang chu" a rawn ti dam thlup a. Zoi'n a lo hlau hle zawk. 

"Aa.. Dik tak chuan, kan awmdan hi ka ngaihtuah a, ka beisei ang a ni lo lutuk a. Ka thinrim miah chuang lo nain, ka inchhir deuh a" a ti ta tawp a. 

"Lawmsanga neih chu i duh leh si tihna em ni? " ti el aw lek lek hian a rawn ti a. A nui bawk. 

"A teuh lo. Lawmsanga neih ai chuan thih ka duh zawk" a lo ti tân tãn. 

"A nih chuan, ka buaina ka chingfel thawkhat a, hmabak pakhat chiah ka nei tawh a. Chumi chu naktuk lamah chinfel ka tum ang a, tichuan, kan pahnih khawvel chu a bul kan ţan dawn nia. A tha em? " zaidam zet hian a ti a. Zoi tan Aih tia lo chhan a harsatzia a hre lo tawp ang. Aih tiin chhang ta se, a chhan hriat a tum ang a. Zoi hian eng chhuanlam nge a hman chuan ang. Amah ngeiin amah ru turin ngen hmingpu si loin a talbuai dan a hrilh a, Ephraimea'n a mawhphurhnaa ngaiin puih a tum a, a zui ta a nia.. Chutah chuan ama mawhphurhna leh thiam lohna pawh a awm ve tho. 

"Ni e.. Inchingfel vat la" a ti a. A aw chu a khur deuh. Thup theih a duh kher mai. Zan dar 9 a ri dawn hnai, Hector a rawn bauh ta lauh lauh a. Ephraime a phâwk nghal hrâ mai. Parda keuin pawn lam chu a va thlêk a. 

"Tu tak ni ang maw? " a ti sup a. 

"Eng nge? " Zoi'n a lo ti hluai. 

"Motor a rawn tlan lut. Gate ka kalh emaw ka tia" Ephraime chuan a ti a. Motor thawm chu an hre nghal. Garage kawtah chuan a ding a. Zoi chu hlauthawng takin Ephraime hnungah a ding ngawi reng ringawt. Kar loah an kawngka kik ri an hre zui nghal a. Ephraime chuan mitmeiin Zoi chu rooma lut turin a hrilh a, thuawih takin a lut ve mai. Kawngka chu a va hawng a. Lawmsanga te pafa nen an inhmachhawn ta ran mai. 

"Khawiah nge Zomuani" Lawmsanga chu Ephraime melh ran chung chuan a ti chang fak a. Ephraime chu a khi sak. "Tu nge i nih? " a ti thawp sup. 

"A pasal hual ka nih hi. Nang hian i lo ru bo khanglang a, thil pawi a thlen hmain rawn dah let vat mai rawh le" chapo zetin Lawmsanga chuan a ti a. Sapliana chu intivei takin Ephraime nêk ţâwlh ţãwlh chungin in chhungah a rawn lut a. A hawi kual ruai mai. 

"Khaw nge i thuhruk" a ti ram hmak a. 

"Hmun him takah a awm" Ephraime lah chuan ngeiawm chhuah a chak tlat si. An pafa vertherzia leh talbuaizia a hmuh chuan a nuih a za. 

Silai kaw hmawr vawt raihin a bekah a rawn nawr ta a. A rin loh lamin an che ve tlat! Mahse, hlauhna chhetemah a nei lo. Hetiang mi tlawm leh chapo ve si hnenah Zoi a hlan lul lo vang. 

"Ti khan i sawi duh tawh em? " Lawmsanga chuan a ti fiak thak a. 

A nui hak hak. "Ti ta che, kap rawh. Min kah rualin Zoi nunna pawh i chhat tel tih hria la, keimah bak he khawvelah Zoi awmna hria an awm si lo va.. I nupui hual duhtak chu i hmu tawh dawn lo kumkhua a ni mai a" satliah zet hian a lo tihkhum hmiah. Lawmsanga thin a rim kher mai. Sapliana lah a lo sa ve phat bawk. 

"Tu nge ka nih i hre lo a niang maw? Aizawl khawpuiah kei anga pa hlauhawm hi an awm lo ania.. Min hmachhawn hi tupawn an hreh vek.. Zaidam kan chhuah lai hian rawn dahkir mai rawh" Sapliana chuan vei thuak thuak pahinna ti a. Study room te chu a va hawng a, Ephraime room pawh chu a hawng. Zoi kha study room lamah lutin pindan rúkah khan a biru daih tawh a ni. Zoi hmel reng reng an hmu si lo. 

"I hlauhawm vak lo aniang, thah tumtu che an awm lo em mai" Ephraime aw chu a hniam reih râwih hle mai. Awmze thúk tak erawh a nei tlat lawi si! Sapliana chapona chuan chutiang intham lohna chu a thei der lo va. Ephraime sama va ţham nawk pah chuan, "Khang mi panga te thih anga thih ve kher kha i duh em ni? " a ti sehchilh nawk nawk a. Ephraime chuan a hmel thlakin makti hmel a pu a. 

"Eheu! Khang mi panga te thattu kha i lo ni reng a ni maw? " a ti hluai a. Sapliana chu a khi vur vur a, "Tikhan ka hlauhawmzia i hrethiam tawh em? Chuvang chuan ka lakah chuan ngawhngawl chhuah a sâwt ve vak lo a nia" a ti thur thur a. 

Ephraime nuih chu a za kher mai. Mahse, a insûm hram hram a. Vaupung tina ve satliah pafa an ni tih a hai lo. A hlauh lohna a pung sawt. 

"Zoi chuan a duhthlannain alawm min zui" a ti sup a. 

Lawmsanga ngaithei lo chuan silaia va nawr leh sawk pah chuan, "Zakthei lo lutuk, nang hian i lo bum kual tih hriat reng. Khaw nge i dah.. Hun kan ngah lo a nia" a ti vin thak a. Zoi pawn a awmna hmun atangin an thusawi thenkhat chu a hre thei viai viai. Lawmsanga te pafa tawngkam chu a nerpui nasa hle. A lo tlanbosan lovang tih a hlau ngawih ngawih. Mahse, Ephraime nunna chuan a tawrh phah ang tih erawh a hlau ru ve tho. Tualthattu mahnise, an pafa chuan a hnehin a dawl zo kher bik lo thei. Ephraime a thih vaih chuan a chan chuan maian chan pawh a tluk dawn lo tih a hria.. He lai hmunah hian a tawm reng thei dawn lo bawk. A ngaihtuahna a vak kual nasa ngei mai. Chutah ri deuh ţhawk thawm a hre zui leh ta nghal. Mihring thinrim inhrosa thawmin a zui nghal bawk a, Zoi chuan a ka a hup tawp. A khur der der mai. 

Silai kawma a chhutna a bek veilam atang chuan thisen tharlam tak a lo chhuak siar siar a, chhuatah chuan a bawkkhup zawngin a mu a. Lawmsanga chuan a nakah a chhuih nghal zawt zawt bawk. A inrin loh lai taka a rawn chhut avang khan Ephraime lu chu a hai nghal chhawk a, Sapliana'n a fapa a lo pui ve bawk nen. Ephraime rilru erawh a fim kar thung. Chet lak hun a melh ran a, silai kengtu zawk an nih miau avang leh a silai va la tura a rooma luhna chance a neih lohzia a hria, silai keng lo nise, kut lawng pawn an ni pahnih chu a hlau bik hauh lo asin le. 

Study room a rawn inhawng a, Zomuansangi a rawn chhuak hlawl mai. 

"Khawih tawh suh u.. Duhtawk ru" a ti tuar. Lawmsanga te chuan an melh reng a. Zoi chu rawn kal hnaiin Ephraime chu a bawihsawm a, chutia na em em chu a ni lo. A bek a thi bakah a nak na chu a ni deuh mai. 

"Ti nge i lo chhuah? " a lo ti hrãwk a. 

"Keimah vangin tuman an tawrh a ngai lo" Zoi chuan a lo ti vat a. Ephraime kaihthawh a tum chu Lawmsanga'n a lo phih tho nghek a, a chhip samah kekin, "Mi tenawmnu, nang pawh hi ka chhuah dawn hauh lo che a nia" a ti ţeng chhuai a. A silai chuan Zoi nghawngah a tin nghal bawk. 

"I duh leh min that rawh.. Nang neih ai chuan thih ka duh zawk" Zoi aw chu a ring hran lo naa, a inringtawk kher mai. Sapliana chuan a rawn beng chawrh, Zoi a pai dawrh mai. Zoi an buaipui atalângin Ephraime lam an lo ngaihven vak lo aniang chu, A tho chhuak chu a tawlh hret hret a, a dinhmun siamrem te tèin a hnunglam atangin Sapliana chu a va rek bet a, khawi atanga a lak nge tih hriat loh chemte sei lem lo, hriam hmel zetin a nghawng chu a tinzawn nghal a. 

"I pa hrawk hrui ka zai chah hma ngeiin hmeichhia kha thlah rawh" a ti vawt raih a. A mitmeng chu a hlauhawm kher mai. Lawmsanga chu reivak lo a hamhaih hman a. Mahse, Zoi chu a tin leh nghal rap. 

"Ka pa i thlah loh chuan he uipui lu hi a darh nghal ang" a ti ve hluk a. An pali chuan an inhmachhawn tawn ran mai. Boruak chu a uapin pawn lamah thli erawh a thaw vuk vuk lawi a! Ephraime dawhtheihna in a tlin lo lek lek tawh, A chemte ken chuan Pu Sapliana nghawng dinglam chu a zai ta a. Thi si lo va siam phawt a tum a nih ber chu. A pa thisen chhuak a hmuh rualin Lawmsanga chuan Zoi chu kah tumin a silai cheng chu a vuan ta.. Chu second reiloteah chuan Ephraime special zia a rawn lang ta. A chemte ken a thlawk fua a, Lawmsanga nghawngah a va bur chat. Zoi pawn a tihtur hai lo takin a kun zauh a, silai a puak nghal ţhuai. Tukverh darthlalang a keh nghal chuai! Zomuansangi thih teuh ther ther zia tak chu aw.. Lawmsanga chuan a nghawnga chemte bur vu chu vuanin a pai awt awt a. Pu Sapliana'n a va kuah chawt. Ephraime chuan chet lak a tum tawh hran lo. Zoi chu a kai tho a, a thlaphanzia hriain a awmah a pawm bet a, a hnungzâng a chul ta heuh heuh a. Lawmsanga te pafa inbuaipui erawh an buai angreng hle. Chemte chu a pa chuan a phawisak a, thisen a rawn baw hawk. 

"A thi chhuak hi kan tihtawp a ngai.. Khawngaihin" Sapliana mi chapo aw chu a dawih aw ta hle mai. Zoi chuan a va melh a. Hmeichhe rilru no tihtakah nunna in a tawrh kher chu tul a ti bik lo aniang e. 

"Khawngaihin pui rawh" Ephraime melh chung chuan a ti sap a. Ephraime pawh chuan study roomah lut vutin, first aid box nen a rawn chhuak leh a. Zoi chu pein, Zoi chuan Lawmsanga te pafa chu a va buaipui a. Lawmsanga nghawng chu a lo thuk phian a, thisen a chhuak duh ngang mai. Damdawi nen, lapua nen an han inbuaipui zung zung a. Pu Sapliana nghawng erawh a thi ser ser chauh bawk a. Bandage in an tuam a, a zia mai. Hmelma ni si, nunna chhan nan an han thawkho leh ta chu a nia. Lawmsanga pawh an han bawihsawm takah chuan thisen chhuak pawh an titawp thei ta hram. Thutthlengah chuan a mu a, Zoi chuan nachhawkna a pe a. A muthlu lek lek mai. 

Ephraime chuan an inbuaipui fel hnuah, Pu Sapliana bulah, "Hetiang hi kan ni ta a, min hawnsan ula, vawikhatmah kan nunah rawn inrawlh tawh suh ang che u. A lehpekah chuan nunna kan inhloh tawh ang. Zoi hi ka nei dawn a, kan innei dawn. chu chu min hriatthiam ka beisei" a ti ta dap dap a. Lehlamah a fapa nunna chhanchhuaktu an ni ve miau si a, Sapliana chuan tlawm inti teh mah se, an thu chu hnial ngam chiah a ngai lo. 

"Ni e, kan rawn tibuai tawh lovang che u. Kan tan chuan a zahthlakin a tlawmthlak êm a tin ni" Aw khur lek lek hian a ti a. Lawmsanga erawh a chauh deuh vang nge a mu hle hle ringawt. 

"Tin, tuna thisen kan inchhuahna hi police beng in thlentir vaih chuan, I fapa hi i chân angah ngai nghal ang che" Ephraime chuan a ti leh nghut. Chu erawh a chhang tawh lo. Lawmsanga a ziaawm leh a harh deuh hnuah a pa chuan motor khalhin ramhnuai chu an chhuahsan ta a. Engtak ti zel ang maw? 

"I tha em? " Ephraime chuan a rawn chul thuak a. A lo îp chawih. 

"Ka tha e.. Nang zawk" tiin a melh a. Ephraime bek thi chu a dap a, hrukfaisakin damdawi a hnawih a. A thi chu a tawp tawh tho nain bandage in a tuam ve ta tho mai. Zan pawh a lo rei ve ta deuh a, mu turin an inpuahchah ta a. 

Room lamah inzui lutin ngawi rengin mutna an siam a. Insi miah loin chunglam melhin an mu ran mai. Zanina Ephraime chet dan zei lutuk te kha Zoi rilru tibuaitu a ni zawk. Eng ati nge mi nunna hmanga ei a zawn le? Hna dang thawh tur a nei lo tihna em ni ang? A hriat loh laiin a lo hui pap aniang, Ephraime chuan, "Engkim a tha vek alawm.. Hlauthawng tawh suh" a ti dam dap a. 

"Ka hlau tawh lo, mahse, an beidawn mai ka ring lo. Engtin emaw chet rawn la leh ta se.. " a lo ti tham chhal a. 

"Ka awm alawm.. Min ring thei ang" a aw chu a dam thlup mai. Mahse, Zoi timangangtu a ni zawk. A bula mu chu tualthattu a ni miau si a. A hria tih a hriat chhuah rualin a nunnain a tawrh ngei a ring bawk. Chuvang chuan Ephraime laka hel rih lo va, a duh dan anga awm rih phawt chu a tum a ni. Nakinah a talchhuah theih hunah a la tlanbosan thei mahna le.. Mahse, a rilru lehlamah chuan Ephraime hian a sim phawt chuan thupbo hlena an pahniha khawvel bultan theih a nih beiseina te a nei thul. Chutiang ngaihtuahna a neih lah chuan a inthiam lo bawk si. A pa ngei pawhin hria se engtin lêk nge a ngaih ang. Police hrilhin mantir a tum ngei ang le.. 

Zoi muhil thaw sâk sâk chu a melh tlawk tlawk a. He hmeichhia a nuna a lo luh china a danglam chakzia te a ngaihtuah a. Mahse, Zoi'n a nihna engkim a hre chhuak tih hai tur khawpa mi mawl a ni si lo. Chhunah khan Zoi mitmeng atang khan a nihna hrechhuakin a pindanah khan a lut tih a chiang vek tawh. Zoi lahin inthup a la tum ve ţang tang lawi a! A khawngaih hial zawk. A hre vek tih Zoi'n a hriat chuan kalbo a tum ang a, a tan thleng pawh a pawi thei tih a ngaihtuah kai vek. Chuvanga Zin khawthawn pawh rawt a ni. A lama a hip beh vat loh chuan he hmeichhia hi a tan mi hlauhawm a ni thei tlat! Chuvang chuan engkim a hre vek tih Zoi'n a hriat loh nana inthup hram hram chu a tihturah a ngai rih a ni. A nu thuchah tihlawhtlingin a pu Thanliana te chhungkaw hmaah a nu aiawhin ngaihdam a dil ang a. Sum tlem a zawng a pe bawk ang a, tichuan, a nunhlui kalsanin nunthar nen khawvel a hmachhawn tawh dawn a ni. Chu chu a rilru a ni a. Engvanga a tira a rilru A pu te chhungkaw thah mang kha phumbo ta daih nge a nih a inhre lo. A nihna takah chuan hmangaihtu a lo mamawh em vang a ni ngei ang. Khatiang taka amah ngainaa thlahleltu kha a la hmachhawn ngai lo va, an mitmenga hmangaihna lo zâm chhuak khan a phuba lak duhna thinlung kha a thiahsak vek a ni ngei ang. 

Sapliana te pafa pawh an ngui nghiai mai. An rin leh beisei anga thil thleng lo chuan tithinrim teh mah se; tih vak ngaihna an hre chuang bawk si lo. Kha pa, Zoi bialpa kha an rin aiin a lo hlauhawm daih si a. Chuta karah Zoi'n a duh em em bawk si. Tunah chuan Pu Liantawna chu an uite ni tura kaihkual theihna tur hmanrua an nei ta lo. Lawmsanga tan lah Zoi laka phuba lak theihna chance a awm ta lo bawk. A. Chapona erawh chuan na a ti vawng vawng a, kha pa laka a tlawmna khan nasa takin a nghaisa a ni ber e. A taksa natna chu eng thamah a ngai lo. 

"Pa, ka beidawng dawn lo. Kha pa khan a chenchilh reng dawn lo. Zomuani saw i hote i ruktir thei mai lo em ni? Kha mihring kha mangang ve reng reng rawh se" a la ti hram hram a. 

Sapliana erawh chuan ngaihtuahna dang daih a lo pu thung. Liantawna dah that.. Chu thil chuan Zoi pawh a ko haw ngei ang a, an duh angin thil a kal thei maithei asin. Mahse, amah chuan a dah tha duh lo, man a tawk dawn tlat! An chhungkaw hnih boruak avangin rinhlelh a kai thei dawn tlat si a. Tu chu nge a thahtir tak ang? A hnuaia thawk pawisak nei lem lo te chu a han ngaihtuah kual a. Liantawna lamtang an inphumru ve teuh tih a hre si. Tu nge rin ber tur a hrethiam ta hauh lo. Chutah hre chhuak thutin, a thianpa ti ila, a hmaa a lo puih ve tawh, Zoliana number a hmet chhuak ta a. 

"Thianpa Zo, i dam maw? " tiin a han vehthlem hmasa a. 

"Dam alawm.. In tluang zel maw?" a rawn ti a. 

"Tluang ve a ni mai a. Mahse, buaina ka nei deuh a. I puihna ka mamawh a ni" a ti a. 

"Eng nge ni ta, nang meuhin buaina i tawh tak? " Zoliana chuan a ti sur sur a. 

"Aa.. Tu emaw ka kawng daltu a awm a. Dah that ka duh deuh a. Chutiang atana rawih tur te hi i lo hre mial lo maw?tiin ka rawn tah awh tawp mai che a ni" a ti a. 

"A ni maw? A va zia lo ve aw. Ngawi teh, Pu Sap, tunah mai chuan ka va hre lo êm.. Tlem lai khan ka hria a, mahse, a thawk tawh lo in ka hria a.. " A rawn ti ban chat a. 

Sapliana a ngúk hruih.. "A va pawi em.. Han hria la chuan lawmman te pawh a awm tur a nia.. " a han ti khwwmawi a. 

"Ka lo ngaihvensak dawn che nia" Zoliana chuan a ti a. Phone a dah nghal bawk. Dik tak chuan Police hmel a hmuh fo tawh vangin Amos tihbuai leh chu a hreh tawh a ni. Engtin nge a va inchinfel lah a hre bawk si lo. Mahse, Sapliana mizia a hre chiang a, a puih phawt chuan a lawmman pek tur a tlem chhe lo vang tih a ring thiam. Duhâm reng renga khawsa Zoliana te ang tan hnar phal chi a ni lo. Amosa number chu a hmet chhuak leh ta nge nge a. A ring ral ţep tihin a rawn la a. 

"Hna i nei a. I thawk duh ang em? " a ti nghal thâwr a. 

"Nangma hna maw? "

"Ni chiah lo. Ka thianpa buaina a nia.. Lawmman a chhe lo vang" a ti nghal zat. 

"Tunah chuan pawimawh dang ka nei a. Tin, ka reh rih a ngai.. Ka inchingfel chauh a, buaina ka duh tawh rih lo" Ephraime chuan a ti bung nghut a. Zoliana tan nawr luih ngam chi a ni lo. 

Pu Liantâwna'n Lawmsanga te pafa chet dan a lo hriat chuan a hlauthawng nasa mai a. A chunga an tuan mai a hlau a ni ber. Pi Lawmi pawh a thlabar viau mai. Pu Liantâwna chuan a ngaihtuah a ngaihtuah hnuah kawng dang neiin a inhre ta lo va, tihtur pakhat chiah a nei ta.. A phone chu hmetin number pakhat chu a hmetchhuak ta a. 

Ephraime chu Pu Zoliana nen an inbiak zawh khan a nâ theihnghilhin a thlan tihtlak hlek a duh avangin hector hruaiin an in piah lawka phaizawl hmun chu an pan a. A phone a keng lo bawk. Zoi'n khawih eng ang mah se, password a hre dawn chuang lo tih a hriat bakah a official numberah tu pawn rawn call se, tu number mah a save lo bawk a, hlauhthawn tur awma a hriat loh vang a ni. Zoi pawh rawngbawlin a buai ve hle a, Behlawi hnah tharlam zet chu thianin, bai turin a silfai a. A pa nen an inbiakna te a ngaihtuah let a. Ni e, Lawmsanga te pafa chet dan kha a han hrilh vek a ni. A pa chuan a rawn ngaihtuah hle anih kha.. Khawi hmunah emaw kal bo rih mai tur ten thu a rawn hial a, Ephraimea thu thu ni teh se.. 

Ephraime phone rawn ri ral ral chu buai inti tak chungin a va bih hram a, number hlang ringawt a nih vangin lak pawh a tum lem lo. Ephraimean a hriat leh phei chuan a thinrim leh vak ang tih a hlau ve bawk nen,.. Mahse, lo call tu number digit hnuhnung pathum chuan a mit a la riau. Tu emaw number a ang a ti! Ngun lehzuala a han bih chuan a pa number a ni tih a hai hauh lo. Ngaihthat lohna nei miah lovin phone call lo kal chu a pick up ta a. 

"Aw ka pa, Ephraime chu a work out lawk a. Nakinah lo be leh mai ta che" a ti nghal sar sar a. Lehlam chu a reh vawng vawng. 

"Hello, ka pa.. " a han ti leh a. Chutah Pu Liantâwna chuan harsa tih hmel zet hian, "Zoi,. " a rawn ti a. Zoi chuan, "Umm.. Ka tawng i hre thei em? " a ti lauh lauh a. A tawp hmuk.. 

"Signal a va nei chhe awm" a ti nghat a. Phone chu dahin eirawng a bawl zui leh daih. 

Pu Liantâwna erawh a phone chu chhuatah a thlauh bawl a. Khumah a thu nghal hnawk bawk. Maktihna leh chiâina chuan an bawhbuai luai luai a. Rilru fim a pu hleithei lo. A contact list chu a en tha leh a, "Amos' tia a save ngei kha a ni a call ni. Ni e, Pu Zaia thahsaktu pa, Proffessional Killer ngei kha. Chu Killer chu a fanu bula awm mek, a fanu bialpa anga a ngaih Ephraime hi maw lo ni! Engkim chuan a deng na lutuk a, awm dan tur reng a hre lo. Engtin nge hetiang hi a nih theih? Aih, a theih loh.. Ni lo, Ka fanu hetiang hi a ni thei lo tiin a phun mawlh mawlh a. A lu a thing nur nur bawk. Tunah khan Amosa biaka Sapliana dahtha tura ngen a tum a nih kha mawle.. Chu Amosa, a fanu bialpa ni bawk chuan, mi panga nunna a la tawh tih chiang takin a hria. Chu pa bulah a fanu a awm mek.. A tho thut a, a tihtur hre miah loin in a chhuahsan a, a hma zawn kawngah a tlan tawp tawp ringawt. Thlanin a bual a, a mitmengte chu a davâ vek. Ama hriat tawk lekin a phun mawlh mawlh bawk. Police a hrilh ang nge? Zoi a hrilh dawn? Police hrilh ta se, engtin nge Killer a ni tih a hriat an lo zawt ngei a nga. Pu Zaia thihna an chhui chhuak zui ang a, ani pawh a va him dawn si lo êm.. Zoi hrilh ta se, a fanu chuan Lawmsanga neih a hreh ngawih ngawih vangin a úm ve mek chu a ni bawk si a. A ţhawng dawn lutuk. A ât phah thei hial ang. 

Ephraime rawn haw chuan tui a in khawlh khawlh a. Zoi lah chuan ngaihtuah miah loin, "Ka pa in a lo call che a, signal a chhia nge a tawp leh daih" a ti a. A eisiam chu a chawk rawk rawk a. 

Ephraime chuan a phone chu hmetin, Pu Liantawna chuan a number pakhat zawkah a rawn call tih a hmu thei. A hum vang vang a, "Nih chu mawle.. A pawimawh aniang, nakinah ka call dawn nia. Ka'n inbual phawt ange" a ti a. Roomah lutin a phone chu a check leh ngat. Zoi chuan engmah ngaihthat lohna a nei lo vang, a chhan chu a pa tan Ephraime chu makpa a ni miau a. Bathroomah lutin Pu Liantâwna chu a call ta nghal a, vawi 3 a ring ral ţhak a ni. A vawi lina-ah a la ta hram. 

"Bawihi, thil tam tak a thleng a ni" a rawn ti hrâwk a. Ephraime a bia tih a hre lo a ni ngei ang. 

"Keimah Amos" a ti thum dút a. 

"Nang.. Nang khan ka fanu kha kut hmawr pawha i khawih a nih chuan, Police kutah i lut nghal ang" a ti bah nawk nawk a. Harhfim lo awphawi tih a hriat hliah hliah mai. 

Ephraime chu a khi suk a. 

"Pu Zaia thihna kha chhui chhuah a la ni ta lo reng em khah? " tiel rawngkai zet hian a ti a. 

Pu Liantawna chuan, "Zawnga.. Engvangin nge hetiang hi i tih? Ka fanu kha engvangin nge i bum? " a ti ta chiam a. 

"I fanu hian thudik hria se, engkim, nang leh keia inbiak dan te.. Eng nge thleng tura i rin. Inthunun rawh. Sumdawnna leh mimal nun chu a hrang e" Ephraime aw chu a hniam hle. Zaidam tak a ni. 

Pu Liantawna erawh a sahal a ni ber mai. A motor steering chu a hmer ngawt ngawt a. 

"A nih chuan kan zêp kumkhua ang maw? " beidawn hmel zet hian a ti a. 

"Ka hre lo. Engvanga min rawn biak tum nge i nih rawn zawh che ka tum mai a ni" a lo ti khauh a. 

"Sapliana that turin mawle" a ti tuar.. Ephraime rin dan sa deuh a ni bawk a. Mak ti hmel a pu hran lo. 

Pu Liantawna bawk chuan, "Mahse, thil thlen dan hi a rapthlak em mai. Engtia awm tur nge ka hrethiam tawh lo" a ti bah nak a. 

"Tikhan awm tawp rawh. Buai chiam lo la, mahse, Sapliana leh a fapa lak atangin inthiarfihlim ang che. " a rawn ti vawt raih a. Chu aw chuan mi hneh theihna riau a nei nge mawni, Pu Liantawna chu a ngawi ta hle hle a. A fanu erawh a rilruah a lian takzet. A hmaa Amos nen an inbiak khan hmaichhanah an inhmu miah lo kha a nia. A makpa a ni ang tih rin ngaihna a hre miah lo a ni. Tunah mak takin inzawmna an lo nei leh ta si. Thil thlen dan chu film te pawh a ang lek lek mai. 

"Vawiinah i chhuak leh dawn maw? " Zoi chuan pangngai takin a ti a. Vawksa thithun a hmawm pah zauh bawk. A insangmar rei thawkhat bawk a. Inthunun chu ngaiah a nei chho tan tawh. Tal chhuah dan kawng erawh a dap ru reng thung. 

"Aw, chinfel tur thil ka la nei a" a lo ti ve mai a. 

"I pute chu maw? "

"Umm, an vaia min hmuh an duh a ni"

"An bulah i khawsa duh lo em ni? " a ti leh khauh a. Ephraime chuan a rawn melh zawk. 

"Chenpui ka neih tawh che hi.. Mi dang mamawhin min hria em ni? " a lo ti ve salh thung. Zoi chu a dang titih a. An inkara boruak alh hlep hlep, kang hluai tura la rinawm chuan a uap na lulai lutuk a, an chhungrila inthup an tum ve vena chuan hawihhawm a chhuahtir hlauh a. Polite takin an indawngsawng ta daih zawk a tih theih ang. A hma anga innelna leh inchhaih fiamna boruak kha chu vaivutah an thamral zo ta a ni mahna le.. Tukthuan an ei khamah Ephraime chu a insiam nghal malh malh a. Zoi erawh pawn lamah pangpar thenkhat la khawmin, pot a siam chawp a. Cheimawi a tum ve hle a nih hmel. A awm hlenna tur niin ring lo mah se; engmah ti lo va a awm chawrh chawrh chuan a â mai dawna a hriat vang a ni. Ephraime pawh dar 11 velah khawpui lam a pan ve ta a. Hectora nen chauh an awm dun leh ta rak rak mai. 

Hectora sa ruh thar a lak chhuah laiin Ephraime'n a rawn call a, "Lawmsanga ten chet lak an rawn tum leh mai thei a. Kan room khum pawhdawhah khan silai a awm. A mu a awm sa a, kha thil hmang khan i theihtawpin i lo hmachhawn dawn nia. Tin, eng emaw a thlen hlauh chuan min lo call theihnghilh suh ang che" a rawn ti a. Zoi erawh a chhing sawk. Silai tih thumal ringawt pawn a tha a tikhur thei hial. Silai hmanga a mi thah tawhte a mitthaah an rawn lang chuai chuai lehnghal. Mizoram chhung ringawtah a che lo maithei. Nunna engzat tak chhat tawh ang maw?! 

Dawr lian taka a pute thilpek tur a en kual laiin a hnunglam atanga rawn nem deuh sawkin, "Zothanpui" a rawn ti a. A lehhawi nâk chuan, Jenny a lo ding ran mai. A inchei nalh kher bawk a, hmuhnawm tak a ni. A nuih sen sen a. A hmel hi zawng a tha, a mizia hi tiin Ephraime chuan a lo ngaihtuah thung. 

"Eng nge i tih ve? " Jenny chuan a ti zung zung a. A kal chhan te a han sawi chuan, "Hawh, ka enpui ang che. ka hria alawm" tih pahin a kai nghal zat a, Dawr chhungah chuan an vak dun ta a. Jenny phur hmel chu a tai hlar mai. Eng ang pawn nupui nei raw sek sek, vawiin na nâ na chu ka ta a ni dawn ti niawm takin a kuah bet chial reng a. Inti tatu taka a bana kuah chial chu a inchhuang emaw tih mai turin a hawi lah mai a ni. A pute chhungkaw thilpek tur tam tham angreng tak chu motorah a hlang lut a. Jenny lah a bulah a lo ding ve reng bawk si.

"Tikhan khaw nge i kal dawn? " Ephraime chuan a ti a. 

"Ka zui dawn che. Vawiin chauh chu min hnial hlek suh" a lo ti hmiah. Nasa ti ru viau mah se; han hnar tâwng kha nuam a ti chiah si lo. Jenny lah chu motorah chuan a lo chuang lut vei hman tawh a. Chek hluk chungin a driver seatah chuan a thu lut ve zat a. 

"Khaw nge kan kal dawn? " a ti he hâw a. 

"I pute bulah ni lawm ni? " a lo ti si. 

"I lo kal ve dawn mi? " a lo ti leh hú a. 

"Enteh, i thiannu angin min sawi mai dawn alawm. I chhungte pawh ka hmu ve châk.. " a ti no ngher ngher a. Hmeichhia hian kan duhnaah chuan pawisak kan lo nei lo hle an tih hi a lo dik a nih dawn hi.. Tui lo zetin a tlan chhuak ta a. 

"Ka pute ina kal chu a hmanhmawhthlak hran hleinem.. I kal duhna sawi la, ka va thlah ang che" Ephraime chuan a ti a. Jenny a nui sak, "Lunch ei ila" a ti sep a. Nia, ril pawh a ţam ve ţan tawh reng mai. Ephraime pawh chuan lawm takin Jenny rawtna chu a lo pawm a. Jenny sawina lam an pan nghal. 

An eitur lo thlen hma chuan Jenny chuan thla a la sek a, Ephraime chuan a hmel chu ti common lo se a duh tehlul nen, "Statusah ka hmang dawn a nia.. " a la ti zui! Ngai lo han tih ţung lah chu a mipa tihchi vak si loh. 

"Kan nuin a lo hmu ang e" kha chu a ti ve. 

"Naa.. In nu in ka number a nei lo tawp ang" a la ti zui. Ephraime chuan a rilru te tein, "Engmah i hre hi he si lo va aw.. I lainatawm phian mai" a ti a. A langah erawh a nui ringawt. 

An eitur chah a lo thlen hnu chuan ngawi rengin an ei dun a, Jenny erawh a rawn tawng leh zauh thin. 

"Nupui chu nei lo mai la" te a ti thul.. Ephraime chu a duh ve ngang a niang e. 

An ei zawh dawn tawh lamah Restaurant-ah chuan Civil dress nen Inspector Sangliana leh a nupui te an rawn chawl lut ve khiah a. Jenny te piah lawkah an thu. A han hawi kual chuan Jenny chu a rawn hmu a, a bula thu a hmuh rual chuan makti hmel a pu nghal. Engin nge mawlh pawh a hre lo, Ephraime chu, "Thianpa" tiin a va au a. Muangchangin Ephraime chu a va hawi ve a. Jenny pawh a hawi ve. 

"Jenny pawh chu! Teh daih che u chuan.. E! Ka hrethiam leh si.. Enteh, Thianpa, Zoi khan min lo be pawp se ka duh hle mai. Lawmsanga te pafa lahin an zim reng sia" a ti ta mawlh mawlh a. A thusawi awmzia hrethiam chu a tirah Ephraime chauh a ni. Mahse, Jenny chuan a han ngaihtuah chiang deuh nge, phawk zetin, "Zoi a! Eng nge awmzia? Zomuansangi maw?! " tiin Sangliana leh Ephraime chu a melh tawn sek a. Sangliana nupui pawh hrilhhai fein a lo hawi ve hú tho. 

Sangliana chuan mak tih hmel zetin, "Ehe! I hre na nge? I hriat vangin in awm dun emaw tia.. Eng nge awmzia? " a la ti ta deuh deuh. Jenny a buai tawlh tawlh mai. 

"Eng nge hriat tur chu.. Eng nge awmzia? " a ti ta sek a. 

Sangliana chuan Ephraime a ngainat loh bakah a chhungril taka a rinhlelhna kha bo hek lo, tih el ve hrim hrim a duh nge hriat va ni suh. Jenny melh chung chuan, "I hmaa thu kha i thiannu Zomuansangi bialpa, Lawmsanga aia a thlan zawk chu a nih kha.. Hre awm tak i ni asin mawle" a ti ta a. Ephraime erawh chuan thil a ei mawlh mawlh tho, danglamna chhete mah a lantir lo. Chu tak chu a nia Sangliana rinhlelhna piantir thintu chu.. Mi pangngai, pawikhawih lo nise chuan chiâi ve deuha nuam lo ti hmel te pawh pu ve tur a nih laiin, a awmdan ngai reng chu dikin a hre thei lo a ni. Jenny erawh a ngawi tawp. Sawi tur a hre lo. Ephraime a melh, Sangliana a melh leh thul. A thu hriat khan a deng tluk tluk mai. Mak a tihzia chu a hmelah pawh a inlar chhuak hial mai. Tin, a khur ru der der tih pawh chîktu tan hai rual a ni lo. 

Ephraime chuan zaidam takin, "A dik alawm.. I thiannu kha ka nupui tur chu a ni. A ţhawng viau ang che tih ka hria.. Hrilh tur che kan nih reng laiin surprise che kan duh vang a nia" a ti ta a. Jenny erawh a kha a la chih tlat! Tawng a tum a, a hmui a chip leh tlat! Ephraime chuan waiter koin bill a siamtir a. A card a pe nghal bawk. Sangliana'n a mitmei ru reng tih a hai lo va, Jenny lam chu hawiin, "Kan thianpa tawng duh luatah vawiina surprise che kan tumna a flop ta sia.. Tirawh, ka thlah haw ang che" tiin a kut a va vuan a. Jenny chu a tih ang angin a awm tawp. Sangliana tawng tum zuau pawn a thulh leh daih. Ephraime mitmeng hriam hraih mai a hmuh chuan a lungawi tehchiam lo tih a hria. A sawi ang khan Jenny chu surprise an tum tak tak mawni dawn le. An inkai chhuak lai chu a thlir reng a, an nuin, "Nang pawh hi i tawng duh mah mah thin. Kha an ruahmanna i tichhe ringawt a nih kha.. Inthunun ve thin rawh" a la ti zui! Nuam chu a ti chiah bik lo a ni. 

Jenny te in lam panin an tlan vang vang a. An la tawng lo ve ve. An in thlen dawn kawng kualah Jenny chuan, "Khawvelah a mak ber ang" a rawn ti chhuak hlawl a! 

"Mak vak em ni? Khamini kan inhmuh hmasak ber pawh khan engkim a thleng tawh. Zoi khan sawi a tum a, ka khap anih kha" a lo ti nghut thung. 

"Zoi chuan min lo va bum chiang ngai ve le. Ka thiantha ber anga awmin min lo phatsan reng a nih chu! Ka hua.. Ka haw lutuk" a ti ta chiam a. Ephraime chuan, "Nuam lo a tiin i lakah a inthlahrung hle asin. Mahse, a hmasa zawk tlat si a" a lo ti sup. 

Jenny te kawt zawn an thlen chuan a ding a. Thawk a lak halh hnuah, "Ka thianthaberin min bumna hi ka ngaidam thei ngai lo vang. Nang pawn hre rawh. Ka duh chu ka nei thin. Eng nge ka tihtheih in lo en dawn nia.. Ani pawh lo hrilh ang che. Kan inthian thatna a tawp tih hi" a ti nghat nghat a. A mittui a tla ţêp a ni. Ephraime erawh a ngawi reng. Jenny chu chhukin hawi let miah lo vin an in lam a pan ta a. 

Zoi chuan a thil hmuh chu awih harsa ti zetin a melh tlawk tlawk mai. Jenny leh Ephraime, hlim hmel pu taka Restaurant-a an thlalak dun, Jennyin statusa a rawn hmannchu a ni kan sawi ni. Jenny nen an han inhmu a maw? A pute inah a kal dawn emaw a ti kha a nia. Jenny msg a dawng zui nghal zat. 

"Bawih, awii a nawmzia hi.. Zothanpuia nen hun kan hmang dun a. Ka damchhunga ka hriatreng tawh tur a ni" tih thu chu. Zoi a ner nâwng mai. 

"Ka lawmpui che. Engtin nge in awm a? " tiin smiley a dah bawk a. A khur deuh. 

"Naaa.. I hriat ve reng kha.. Mipa leh hmeichhia te chu engtin nge an awm thin tihte chu" a rawn ti zuah zuah. 

"Chuan, in haw tawh mi? "

"Umm.. Min thlah haw chiah. A pute hmuhpuiah min sawm a. Ka zak deuh a, ka hnar a, titau chungin a kal tak kha" Jenny msg zet chuan a thinlung a tina pha ta tlat! Chhan ngaihna a hre ta mang lo. 

"I va sual ve, kalpui tur alawm" a ti tawp. Phone chu dahin a kal sawn ta daih a. Ni e, Jenny khan a duh em a, an lo inngaizawng ta nge nge a niang e.. A tha a lawm. A tha vek. A pa thattu a ni tih a hriatchhuah hunah chuan engtin tak awm ang maw?! 

A pute lo inpuahchah dan chuan a tihlim veng veng. A nu erawh a ngai thung. A nu khan heti tak hian a chhungten an ngai a ni tih hre hman se, lungmuang takin a thi tur.. A pu chuan a titipui seuh seuh a. Mary awm tak loh atanga an chhungkaw boruak inthlak nasatzia te, an ngaihzia te leh amah an hlauh vang chauha a nu leh a nau ten engmah an sawi ngam loh dan te. Amah ngei pawhin a ruka a tawrhzia leh a ngaih thinzia a hrilh keuh keuh a. A pu a huat rukna chu zawi zawiin an tawlhbo a ni ber. A chhungkua, a thisen zawmpui te ngei bula a han awm chu a dan a danzia leh a thlamuanzia a inhre thei. Hei hi chhungkua chu a ni ngei e. A thilpek te lah chu an lo lawm thiam em em a. A nu unau te pawh chu an ngainatawm em em vek a ni. 

"Ti nge i awmdan a va dik lo ve..zing atang khan i dik tawh lo" Pi Lawmi'n a tih lai chuan, Pu Liantawna chuan a phone a kheuh nuap nuap a. 

An nu pawh chhang ta lo chuan, "Hello, Pu Sap, thu pawimawh tak sawitur ka nei a ni" a ti a. Pi Lawmi'n hrilhhai zetin a lo melh kâwk. 

"Eng nge ni ta? " Pu Sapa aw chu a nem hliai mai. 

"Sumdawnna hi bansan ka duh a ni. Ka fanu min tihzah leh tihmualpho em avang hian sumdawnna kalpui zel turin ka chak tawh lo a ni. In zahawm em mai" Pu Liantawna chuan a ti a. 

"Ekhai! Chutiang zawngin ngai reng reng suh. I thiam loh a awm hleinem. Ngawi rawh. Zaninah inbiak kan ngai a nih chu.. " a rawn ti a. 

"Aw le.. Ka rawn kal dawn nge, i rawn kal dawn? " 

"Dawrah inhmu mai ang hmiang. Manager ka lo hrilh dawn nia" Pu Sapliana chuan a ti a. An inbiakna an titawp a. 

"Nangmahin va hmu reng reng suh. Thil tih chi a ni lo" an nuin a ti hlaih hlaih a. 

"Ka tawn tur ang ang tawng ila a tha a ni mai" a lo ti chuai raih a. 

" t so suh.. Zoi'n a rawn sawifiah vek tawh kha" Pi Lawmi awki a ring lek lek. 

"Ka hriat ang in hre ve hleinem.. Zanriah min va siam rawh. " an pa chuan a ti nghut a. A chhuak zui nghal. Pi Lawmi chuan mak ti zetin an pa chu a melh ta reng a. 

"Hector, i va reh ve.. Akhai! Kha tah i lo awm daih a ni maw? Khaw nge i pi? " Ephraime chuan hlim hmel takin a ti hlut a. Hectora'n a mei a hem vat vat. A eitur leisak chu a zuk pe a. Room atangin Zoi a lo chhuak a. An inhmatawn chiah, "I lo tha em? " Titu chu chiang kek kawka melhin, "Ka chhuak dawn" a ti fiah kâk a.