Escape 15

ESCAPE.. (15)

Ziaktu: Toni Râlte

In a thlen rualin a roomah lutin kawngka a kalh nghal hmak. Hrilhhai taka lo melh rengtu Zoi pawh a besawm hman tawh lo. A room-a pindan thuhrûkah lut lehin, Ali a be nghal. Buaina a tawh thu a hrilh a. Ali chuan puih a ngai dawn em tih a zawt a, "Keimaha hmachhawn ka tum phawt ang.. " tiin a lo chhang a. Chumi zawhah chhuar pakhat chu hawngin a melh vang vang a. A bu ta nghut nghut mai. Rei tak pindan rûka awm lovin a chhuak a. A room atang pawh chuan a chhuak zui nghal. Zoi a hmuh chuan a hmel tidanglamin hlim hmel a pu lui a. 

"Ka rin aia hmain ka rawn haw leh sia" a ti a. Chîktu tan chuan mawlhtu a nei tih hai rual a ni lo. 

"Nia" a lo ti hmiah. A lungawi vak lo sa nen. Ephraime danglam thut thut chu ngaia neih harsa a ti a ni. A ngei tlat! 

Sangliana chuan Zoliana thianpa number chu chhui tum teh mah se; a in off tlat si a. Tihngaihna a awm tlat lo. Tu hminga book nge tih chhui an tum lahin, black-a a lei a nih vangin Airtel lama thawk hminga book a lo ni a. Ani lah chu nu tling a ni bawk si. Engpawhnise, a sawi ang khan naktukah chuan a rawn hmu êm ang chu maw.. Engkim a chiang tawh mai ang chu. Tun tum zet zawng a che fuh ve tawh turah ngaiin a phur sùrh mai. A thlawk chhuak leh phurh si ang tih a hlau ru hle tho naa, chet chhiat a hlau khawp mai. Lawmsanga te pafa lah chuan an rawn zar buai sek lehnghal. Pu Liantawna thurawn ang khan lo tawng tuitam vak a tum lem lo. 

"Pasal a um a, a um a nih chuan umzui chi niin a lang lo. Va manin va hruai haw pawh ni ila; amah a ţan ve tlat si chuan keini tan chet lak vak ngaihna a awm chuang lo" tiin a lo chhang hmiah mai. Zomuani erawh biak pawh theih a duh viau thung mai. Sapliana erawh a lungawi lem lo, Police ho chhan dan leh an ngaihthah dan han en chuan, eng emaw thil inphum rú a awm a nih a ring. Liantâwna a inrawlh a nih a ring. Zawh dawt a hreh ve bawk si. Amah Liantawna lam atanga thâwn chi niin a hria. A ruka veh deuh chi -ah a ngai. 

Pu Liantawna te chhungkua erawh sawi fiah hleitheih loh hian an thaw huai hlawm a. Mahse, Sapliana te thawm erawh an ngaichang ru reng thung. Zoi pawh an be tam duh rih lo. Sapliana te lamin a rukin an phone call te an lo chhui ang tih an hlau. Zoi naute erawh thil a nihna tak an la hrilh chuang lo, Hlimi phei chuan a ú chu a ngei riau zawk a. "Vawi hnih ngawt a tlan bo tawh a nia. A tiang lo e, a zak lo mawni le" a ti náng nang reng a. Pi Lawmi'n a mitmeiin a khap vat zawk. Mi dang erawh chuan eng an sawi ve vak lo thung. 

"I awmdan hi ka hrethiam hauh lo a nia. Ti nge i danglam thut thut a? " Zoi chuan a ti ta thâwr a. Ephraime chu a lo thaw hawk ringawt. 

"Ka pu te ka han tlawh a,. " a ti zawi sup. 

"Chu chu eng atan? " a lo ti nghek. 

"I hrethiam ngai lo vang. Hrilhfiah kher che hi ka tum lo ve.. I awm awm khan awm ve tawp rawh" Ephraime chuan a lo ti chang fak. Zoi lah lungawi tawh lo sa nen, "Hetianga danglam chiam tur chuan min tlanpui loh mai tur.. Min tihlauthawng vek alawm.. I awmdan hian" a lo ti ve sak a. Rum zetin an inmelh bawk. 

"Zoi, ka mimal nun hi hriatchian tum vak lo la i tan a tha a ni mai. Chuan, hawn i duh a nih chuan i tan kawngka a inhawng reng e" Ephraime aw chu a thúk hle. A hlauhawm ru riau bawk. 

"Ka haw lo vang, tu nge i nih chiah hi ka la hrechhuak ang. Zothanpuia nge Ephraimea i ni tih pawh" Zoi chuan luhlul zetin a lo ti khauh. A sawi zawh rual rualin Ephraime chu a vir nghal zawk. Zoi chu a lamah pawt dâwrhin chiang lutuk takin an inmelh ta reng a. 

"Tu nge ka nih tih hi chu hriatchhuah tum lo mai rawh.. Chu chu i tan a tha zawk aw" nem tak, a phêna nunrâwnna tel si hian a ti zawi raih a. Zoi chu a thlah a, ngawi rengin a pindanah a lut ta daih a. Zoi erawh a ding reng ringawt. A luhlulna erawh a nasa sauh zawk. A mimal nun hriatsak a duh loh danah thup a nei chiang a ni. A pute a han tlawh a, chuvang ringawt chuan a danglam thei lo. Thil pangngai a ni. A rawn haw tirha a mitmeng thim raih leh buaina leh mawlhtu nei niawm taka a lang te kha.. He pa hi tu nge a nih chiah le?! 

Zoi chuan amahin zanriah pawh a ei. Ephraime chu a rawn chhuak duh si lo va, a ko duh bik der si lo. Amahin a ei hmiah. A ei khama a tihfel zawhah living roomah phone khawihin a thu a, biak tur em em a nei lo. Video te a en kual vel mai mai. Dar 8 pelhah Ephraime chu a rawn chhuak ve hlawl a. An inbe chuang lo. Amahin chaw ei a va insiam khut khut a, ei pawh a ei rei hran lo. Zoi chuan a melh duh lo lui tlat! Engah nge a biak ngawt ang? A mamawh hleinem. Chhunah a mutthilh a vangin a mut lah chu a chhuak thei miah lo lehnghal. Ephraime erawh chaw eikhamah a roomah a inkhung leh nghal tawh. Heti hi chuan Study rooma a riah mai a ngai ang. An boruak chu a nuam lo viau naa, an luhlul dun em vang nge pawi ti awm pawn an awm lo. Zoi pawh a inphihfai a. Phur fahran loin mu turin a inbuatsaih ta a. A mut a chhuak lo kher mai. A piah mai pindana mu chu a ngaihtuah neuh neuh a. An inruk dawn zana a suangtuahna te chu an kal bo zo tawh. A beisei angin engmah a thleng lo tawp a ni mai. A lo suangtuah leh duhthusamah chuan nupa angin an awm ve ang a, Ephraime hian dimdawih takin a enkawl ang a, chhun leh zanah khawi dangah chhuak lovin an inawm ve heuh heuh ang a, chuta tang chuan inngainatna leh innelna nen nun bul an tan ve turah a ngai a. Mahse, a letling vek thung si.. 

Jenny erawh Zothanpuia avangin a tal a tal a, nupui a nei dawn tih a hriatna khan nasa takin a nghawng a ni. A piantirh ata mipa vanga a nat vawi hnihna a ni. Jenny hi nula hlim thei leh mi ngainat ni mahse; vanduaina a nei ve a. A tleirawl chhuah ngaihzawng nen hian kum 7 tehmeuh an inngaizawng a. An veng a lo inang bawk nen, Kohhran khata lawi dun bawk. An hre vek tawh reng bawk a. An inneih loh reng tuman an ring lo. A bialpa Zosanga chu lehkhazirin hmun dangah a awm ta a. A zirna a zawh veleh laklawh pawh sawi lo va inneih an tum ve kha a nia. Mahse, thla 3 lek inhmu phak lo va an han awm takah chuan a bialpa a rin em em chuan, a lehkhazirpui mizo ve tho lakah sâwn a lo thlak reng a lo nia! Jennyin a hriata a tawrhzia kha a chhungten an la theihnghilh lo. Zoi pawh hian a buaipui nasa hman a ni. Kum khat dawn mumalin a khawsa lo tihtheih a ni a. Hetih lai zawng zawng hian a inhnem nan a pelhe ve ngei bawk. Zu nen, thla hnih khat dan lek lekah ngaihzawng a nei a. Ho takin a tal ve hman a ni. Mahse, a pa hnathawh a zahawm leh mi hriat te a nih vangin a kum hnihna kum chanve vel atangin kawng thar a zawh ve leh tan ta a. Zoi pawhin a pui nasa. Tihian hna pangngai tak te a thawk chho ta bawk a. Khang a chetpelhna te kha chu mi te pawn an sawi an sawi tawh bik lo. Ngaihzawng nghet erawh a nei thei tak tak tawh lo va. Zosanga tih lohah chuan Marova kha a nghet ve leh deuh a. Mahse, Zosanga angin a hmangaih tak tak thei lo. Chuvang chuan an kal thui tak tak hmain Marova chu a kalsan ta kha a nia. Marova hian rawn zar lehin rawn be fo mahse, hawi a tum tawh lem lo. A rilru nat leh tawrh tawhna te avanga mi dang nun tihchhiat ringawt chu a duh bik lo. Chuvangin thian angin a en lui hram hram a ni ber. Tichuan, rilru khawhar leh vakvai taka a hawi a hawi laiin Zothanpuia a tawng ta a. Amahah khan a bei nghal thlawp a ni ber.. Zothanpuia hian duh ve ni ngat se chuan; zah leh mualpho huamin a zui duan duan duh ang. Vawi khat hmaichhanah an inhmu a, vawi khat chauh hmaichhana an inbe chungin bansan harsa a ti takzet a ni. 

"I nupui nen in inthen hun ka lo nghak ang" tih thu hi Zothanpuia numberah chuan a thawn a. A phone chu dahin chunglam melhin a mu zangthal reng mai. 

Ni chhuak pawh a ţang ţha leh awt awt ngei mai. Zoi pawh zing lamah a mutthilh ve chauh avangin thawh a hai a. Mahse, eirawngbawl a ngai hran lo bawk a, a tihzia e. Ham bai bai chungin choka lam a pan a. Ephraime erawh a la reh. Vawiin chu pangngai taka engkim sawi dun tha a ti. Tlawm huamin a be hmasa zawk mai aniang chu. Chaw chhum a siam laiin Ephraime leh Hector an rawn haw a. Tuisik a in khalh khalh lai chuan, "Vawiinah i chhuak leh dawn maw? " Zoi'n a rawn ti a. 

"Chawhnuah" a ti nghut. Biak zui a va chakawm tawh loh chiang tak. Mahse, Zoi chu hmeichhe luhlul a ni tlat. 

"Chawhma lam chu thil pangngai takin sawi dun ang" nem thlap hian a ti a. 

"Sawi dun tur kan neih ka hre lo ve" leh hmak mai a! Vawm chawrh a chak ngei mai.

"A nih chuan i thutiam kha engmahlo mai a ni tihna a ni maw? Mipa emaw ka lo ti che a" Zoi'n a ti ve sak. 

"Ka thutiamah kan mimal nun inhriatsak tawn a tel ka hre lo ve" a lo ti leh hmiah. Hei chu a sawi dik tho. Mahse, innei ve ta se, inhmangaih dawn pawh nise, tu nge tih a hriatchian loh a hmangaih ringawt thei dawn em ni? 

"Nupa chu an inhrechiang thin" Zoi'n a ti a. 

"Keini chu nupa tak tak kan ni thei ngai chuang lo vang. Lawmsanga i neih lohna hmanrua nih ka duh hi lawm hle phawt la, zawhna nei tam tawh suh. A tha em? " Chu chu warning a ni tih Zoi chuan a hai lo. Ephraime chu a hlauhawm telh telh ni maiin a hria. Mahse, a kalbo thei ngawt si lo. 

Tukthuan pawh ngawi rengin an kil dun leh tak kha.. Zoi chu a chantawk leh phak takah lawm a tum mai aniang chu. Chutiang a nih loh chuan, a na mai mai dawn zawk a. Mahni a intihlim ve tawh mai ang chu. 

Chawhma chhung zawng Ephraime a inkhung bo leh a. Dar 1 rik hma deuhin bag lian lutuk lo nen a rawn chhuak leh a. Ngawi rengin a car a start a, a tlan liam leh chu a ni mai. Zoi chuan parda kar atangin a thlir reng a. A pasal dik tak ni lo mah se, vawi khatmah sex la hmang lo mahse; a chenpui a ni a. Lawmsanga lak atanga rubotu a ni. A lakah beiseina sang tak a nei ve asin. Ephraime hian buaina a tawk zawk em ni ang? A hriatpui ve loh buaina ril tak, sawi chhuah rem teuh si lo a lo tawk reng em ni? Zoi chu a harh zawk. Study roomah a lut a, Lehkhabu thenkhat chu a chinglet vek.. Mahse, Ephraime nena inlaichinna nei eng thil mah a hmu lo. Tîm dai chungin Ephraime roomah a lut a. A lo felfai leh thlarh. A hawi a hawi a, laptop chu a on a. Mahse, password a ngai! A ner sak. Drawer leh hmun biru deuh lai te chu a han dap chiam naa, a hmuh phakah engmah a awm lo. A beidawng ru hle. Khumah a thu hnawk a. Hmalam hawia a melh ngai a melh reng lai chuan, Dressing table chunga chabi danglam tak a mala let ngât chu a va hmu ta. A mit a la rang bawk a, hawisan eih loin a va ban chat. Eng chabi tak ni ang maw? A dangdai angreng a, a pawimawh viau aniang. Chu chabiin a hawn theih tur tala a zawng leh tan. A awm lo. 

"Huiham.. He ramhuaipa han fimkhur zia hi.. Ka ringhlel telh telh" a ti chhuak hial a! Khumah chuan zangthala muin khum thlang lam chu a zuk thlêk a. Banga painting nalh leh simple zet chu a melh hâw a. Study roomah pawh lehkhabu chhuar phênah kawngka rûk a awm tak kha mawle.. He roomah hi chuan, he painting lian angreng tak bak hi ngaihbel tur a hre hlawl lo. 

Muangchang leh fimkhur takin painting lam chu a pan ta ţhem ţhem a. 

Kawngpui a pawh hma deuhin a ding a. A bag chu hawngin hmanraw thenkhat chu a la chhuak a. Fimkhur taka a hmanna tura a han hman takah chuan a khi sak. "Ka hlawhchham thiang lo ka tih kha" a ma hriat tawkin a ti sup a. Thawveng ru takin kawngpui lam pawh turin a motor a tinung leh ta a. Aizawl khawpui a lut dawn tihin meizuin a ding leh zuai a. Pu Thanliana'n a lo call ve chiah bawk. Rei fe hnuah a la a, "I awmzia hi ka hrethiam lo. Engmah pawh sawi hmain i kal leh ta daih si a. Nizanah lah i call tlang leh theih miah bawk si loh. Chhungkua kan inkokhawm dawn a. Rawn tel hram la, kan va duh ve mawle" a rawn ti chuar chuar a. 

"Tunah chuan buaina dang ka nei rih a ni. Min lo hrethiam u la, keiman ka lo biak loh che u chuan, min lo call tawh suh u. Hun kan la ngah alawm. Ka buaina hi ka chingfel phawt ang" a ti dam thlap a. A thinrim lo. Mahse, tunah chuan a inhaikuak rih a ngai. A rin leh duh ai mahin a nu chhungte chu a ngaina dawnin a hre bawk a, inthiarfihlim a duh rih. Pu Thanliana pawn a hrethiam ani ngei ang, "Aw le, ka la dam lai ngei hian vawi khat tal chu kan inhmuh leh ka beisei ania" a rawn ti a. 

"Tehreng mai. Chu chu ka nu duhthusam a ni alawm" tiin a lo chhang. An inbiakna an titawp a. A tlan leh tur chiah chu a ding leh chawt! Ngawi rengin a indap a, a bag te chu enin, motor te chu a check zung zung a. Eng tak zawng ang maw? A mitmeng chu sawifiah thiam theih loh hian a de sar sar mai. Chabi a hloh! A pindan rûk, a ralthuam engkim, a eizawnna leh a nihna engkim awmna hmun hawnna chabi a hloh! Insehruh ţeuh chungin a inher nawk a, ramhnuai lam a pan leh ta. In thlen hmain a ding leh rih a. Ngun takin a in lang thei chin chu a thlir a. A hmanrua te chu dah tha lein zawi muangin a tlan phei a. Zoi'n chabi kha a lo hmu ang em? Hmu ta se, a hmanna a hria ang em? A ngaihtuahna chu buai tak a ni. Kawngka chu a inkalh a vangin a kik dat dat a. Rei vak loah Zoi'n a lo hawng. Hmel pangngai tak puin, "Ti nge? I va lo haw hma si ve" a lo ti a. Chhan pawh chhang lovin room lam a pansan nghal. Dressing table chunga chabi lo let ngât chu hmuin a khi sak a. A thaw huai mai. A la a, a ak ta zauh a. 

"Thil ka theihnghilh a. Ka rawn let leh. Ka kal leh nghal" tih leh chhuah a rual a. Zoi awmdan leh biak danah ngaihbel tur a hmuh miau loh vangin a ke pen te chu a zang haih haih hle. Mahse, a rilru peng pakhatah chuan, lem a chang ve pawh a ni thei. Min hlauh vang emaw remchang a zawn vang emaw pawhin tikhan pangngai a chhuah pawh a ni thei tih chu a ngaihtuah ve tho. Engpawhnise, Police station a pan phawt a ngai. Engkim a chinfel hunah Zoi chu a la buaipui mai ang chu. Police station a thlen chuan khua pawh a tlai ve ta rawih mai. An lo zi nak nak a, Sangliana thutna lam a pan nghal. Eng emawni hi a lo ziak malh malh a. 

"Sir, Pu Zoliana thianpa kha ka nia" tiin a va bekbawr ta a. Samgliana a rawn hawi rang kher mai. A hmaa ding pa chu pa sang leh lian tak mahnise, a sam chu a hnawk deuh niaih a. Hmuh a lo tum dan nena inpersan deuh ni turin hmuihmul leh khabe hmul a nei chhup bawk. A mitmeng chuan vai mitmeng a pawl deuh bawk. A inchei dan pawh a mizo tehchiam lo. 

"Lo thu rawh" a lo ti phawt a. A thut hnuah, "Pu Zoliana nen khan engtia inhria nge in nih? " tiin a bul a han tan a. 

"Kan sumdawnpui a nia. A bungrua vel hi ka supply sak thin" fel fai takin a ti a. A aw chu a sin lek lek. 

"A nih khami ni Hotela in inhmuh ni khan engvanga hotela inhmu kher nge in nih le? Inah pawh in inhmu thei tho awm sia " Sangliana chuan melh ran chungin a ti a. 

"Dik tak chuan sir, kan sumdawnnnaah hian a chang chuan inthlahdul changte kan nei ve thin a. Chutiang chu a awm a ngai alawm tiraw? Chuvang ania kha tah khan kan inhmuh. Amah khan ka awmpui tur hmeichhia rawn hruai min tiam a. Mahse, a nupuiin office thleng a rawn zui ve avang leh a nula biak khan rokhawlhna a neih leh tak si avangin kan duh angin kan awm thei ta lo a ni. Rei pawh kan awm lo. Inhmuh leh hun tur leh bungraw chungchang bak kan sawi lo" a ti ta dap dap a. Sangliana chuan awih hreh teh mahse, finfiahna a nei tlat si lo. 

"A nih tu nge i hming? " a ti leh hlawl. Zawhna hmasa ber tur a ni sia, a lo hamhaih ve bawk a niang e. 

"Sir, Ali tih hi min hriat lar dan ber a nia. Mizo hming pawh ka nei tho. Lalnunmawia a nia.. " a nui suk a. Sangliana chu tu emaw an deuh neiin a hria, mahse, tu nge a nih a hre mai thei lo. 

"Khawiah nge i chen? "

"Silchar leh Gauhati ka kar chhawk thin. Chutah chuan in ka nei ve ve" a lo ti awlsam êt a. 

"Aw le a tha e. Tunah chuan kal phawt la, mahse, ka rawn koh leh veleh che hmuh theihin i lo awm tur a ni. A chiang em? " chang khek khawk hian a ti a. Ali chu a bu nghut nghut a. Thuawih zetin a kal kiang ta a. Sangliana chu a chhan ber sawi tur hre lovin a thinur hlur ringawt. A pen te chu a hum thlan dup a, a hriat loh hlanin a a lo insangmar leh ţeuh thin. A beiseina lian ber a hmachhawn zo chiah a, khatiang vai tih hriat lutuk, a tawngkam engkima inringtawk em em kha tualthattua han puh ngawt mai chu fuhin a hre ngang si lo a ni. Zoliana zawk hi khawi kipah pawh zui ru se la a tha ang te a tih tak ngawt kha.. 

Kha Pindan rûk a luh atanga darkar tam a liam hnuah pawh a tiril ţham er ertu chu a la kiang hleithei lo va. Khawsik ser ser ang ten a inhre thul. Ephraime a rawn let leh lai kha chuan a chakna zawng zawng sawmkhawmin a lo hmachhawn a, a kal hnua a hahzia te kha.. Engkim a hriat chhuah tak avanga a manganna leh a ippik lutukna chuan engmah dang a ngaihtuahtir thei lo. Eng nge a tih ang tih pawh a hre lo. Police number hmetchhuak tur pawhin a chechang hleithei lo a ni ber mai. Ni e, kha painting a han lak thlak khan kawngka chu a lo awm ngei a. Chabi hmanga a han hawn chuan, tlan chhuah leh a tum hman hial. Mahse, a lut ta sa sa tiin light a on khep a. A eng ta uar mai. Karei! Darthlalang hmanga siam chhuarah chuan silai leh chemte bakah khaidiat te a lo inrem ţhap mai. A melh tlawk tlawk ringawt. Chutah dawhkan lian lutuk lo hmaa thlalak niawm tak intar fur lam chu a pan leh a. Ni e, mihring thlalak ngei an ni. A thenah chuan X a inziak a, X inziah lohna thlalak pawh a la awm nual. Chung lo in X tawh te chu hnai zawka a han bih chian meuh chuan, a khur hlawk hlawk mai. Zoram pumin titi bera an neih, mi pali rawng taka thah te thlalak kha a lo ni! A mi ngainat, a best friend pa Pu Rualkhuma ngei pawh a tel ve, a cousin a unaupa neihchhun ang hiala a lo neih thin Hmingzuala pawh a lang fiah kher asin. Thil awmzia chu kha pindan leh a chhunga thil awmte khan an hrilhfiah mawlh mawlh a ni ber e. Hmanni lawka thi Pu Zaia ngei pawh a tel ve. Kha pawh a thah tho maw lo ni le… 

A thidang mai dawna a hriat avangin engmah khawih danglam miah loin a chhuahsan a. Chabi pawh a awmna ngaiah a dah leh. A uak tuar tuar a, luah chhuah tur erawh a nei hauh lo. A thinlung chu chemte zum taka vih ang maiin a na a ni. Ephraime, a chenpui, Lawmsanga lak atanga rubotu ngei chu Proffesional killer maw a lo nih le?! Khang mi te thata nunrawn chhuahtu kha amah maw lo ni.. Chung thil chuan Zomuansangi thluak te chu ei zawh tum ang hrimin an rawn nêk tuau tuau a ni ber mai. Ni a tla ţèp tihah pawh khawsak a la rel thei lo. Mahse, a ding hluai a. Hetianga chiâi taka a awm chuan, engkim a hria tih Ephraime hian a hre ngei dawn a. A nunna a zuahsak hauh lo vang. Chuvang chuan pangngai takin a hmachhawn tur a ni.. Tiin a infuih a. Khur ru der der chungin khawsak chu a rel ta a. Vawksa a fry tawp a, Thlai hnah a bai leh tawp bawk. Chubak an ei vak chuang lo. Chaw chhum a siam lai takin Ephraime a rawn haw ta a. A lungphu chu a thlawk chhuak mai dawnin a hria.. A hnungchhawn zawngin a awm lui tlat a. 

"Zoi" a aw chu a ring hran lo. Zoi bengah erawh ring tak a ni. 

Muangchanga inherin a va melh a, "Umm" a ti hrâwk. 

"Zin i duh em? Entirnan, honeymoon hman te? " phur zetin a rawn ti a. Zoi chuan hamhaih hmel zetin, "Ka.. Ih, kan innei si lo va" a lo ti bah nuaih. 

"Mizo inneih dan ang khera inneih a ngai dawn a ni maw? A tha alawm.. " tiin a rawn nuih hawk a. A room lam a pan zui nghal. Inneih maw! Rapthlak ti zetin a hmai a hup a. A lu a thing nar nar. Tualthattu nen an innei ang maw?! Mahse, engkimah a awk tawh tih a hai lo. Ni e, tal chhuak mah se, he Ephraime hian rawn zawng chhuakin a ka a an hma ngeiin a hnuk a chhahsak lo vang tih tu nge sawi thei?!

"Sir, nang hian hma i la duh si lo va. Keimah ngeiin ka nupui hual chu ka zawng a nge.. Eng nge ka tihtheih i lo en dawn nia" Lawmsanga mitmeng alh phat chu Sangliana chuan a melh zauh ringawt. He mi te pafa hian an zar buai zing riau. Chuvang chuan a nih nih ni teh se tiin, Pu Liantawna ngenna kha hnawlin, "A bialpa address ka hrilh che ang a, felfai takin in inbe dawn nia.. " a ti ta a. 

Lawmsanga leh pu Sapliana an inmelh zawk. Sangliana address pek chu ngun taka an en hnuah, "Kal ang" tih leh chhuah an rual nghal a. Motora an chuan hnuah, "Silai i keng maw? " Sapliana'n a ti sup. 

"Keng e. Ramhnuaia a khawsa hi kan tan vanneihna a ni e. Tuman a ruang an hmu dawn si lo va" Lawmsanga chuan a lo ti hap. 

. "mahse, Inspector khan kan kal tih a hria" a pa chuan a lo ti hrâwk a. 

Lawmsanga chuan a ngaihtuahna tawi zet chu a nuihpui hawk hawk. 

"Chuti chu tu emaw zawk zawkin hliam kan tawrh ve a ngai dawn anih chu.. In ven nana mi nunna lak chu dan pawn a hrethiam alawm" a ti leh ta a. Sapliana pawh a meng verther leh sawt. 

"Liantâwna pawh saw kan zuah hauh lo vang. A fanute hi chingfel ila, a hun thleng ve rawh se" a ti vawt raih a.