Escape 14

ESCAPE.. (14)

Ziaktu: Toni Râlte

(Adds hi min clicks sak ve hram ru aw..) 

Ephraime pawh a inmet fai vang a. Phurna mak takin a tuam vel mek a ni. Hector ri rak rak chu a chhaih pah a. Thil a kal sual loh hram a beisei. Engtik laiin nge Zoi hian a nunah pawimawhna thuk tak a lo chan tih a hrethiam tawh bik lo, amah vang chauhin a pa hna a thawhsak a. A nupui a la nihtir dawn zui! Mahse, hetah tak hian a tîm deuh thin. Zoi chuan pasalah a duh ve tak tak ang em? Nge a buaina atanga inchhan chhuah tir a tum mai chauh zawk.. Risk sang tak an la dun tih a hai lo va, Zoi rinna tihchhiatsak a duh lo bawk. A phone ri ral ral chu la in, "Zothan, vawiin chu chhuak ang hmiang, min lo chhuahpui teh a.. Chhuahpui tur ka nei lo va" Jenny chuan a rawn ti lâng lâng a. 

"Khai aw! Ka hman remchang tlat lo. Kalna tur ka nei a. A pawi hle mai. Ni dangah aw" a ti dam thlup a. Jenny thaw halh chu a hre thei. 

"Ka lo ti lutuk deuh che a nih chuan tihpalh aw..ka rilru hi ka sawi thiam lo" Jenny chuan a rawn ti leh halh a. Ephraime chuan a khawngaih ve deuh. Ani akara lo vei ve em emtu chu na taka siam kher tul a ti hran lo. 

"Aa.. Englo ania.. Pawi ka ti, nupui ka nei dawn a" a ti ta tawp a. A reh tlawk tlawk mai. A ri khep a. Phone a dah tih a hria.. 

Khatia a tih mai loh chuan, Zoi thiannu a ni bawk si. Buaina a la awm a ring tlat. Tunah pawh buaina chuan a la hmuak maithei a ni. Zoi a call zui nghal a, "I tha em? " a ti nghut a. 

"Tha a ni mai. Nang? " a rawn ti zangkhai vah a. 

"Ka tha e. Dar 3 a nih kha" a ti leh sak. Zoi chuan, "Ka hria e" a rawn ti sap a. An inbe zo der. Sawi tur an hre vak lo a nih hmel. 

Pu Zaia thihna leh mi dang pali te thihna pawh chhui chhunzawm zel a la ni naa, hma an sawn maawh kher mai. Fiahna an hmu thei der si lo. Rinhlelh man te chu an nei naa, a tu amahin ka that ti duh hek lo. Thil a buaichuar leh zo ta. Mahse, Police ho tan kawl a eng ve ţan dawn nge ni, chung boruak leng vel karah tu emaw kamtam satliah sawi nge ni dawn ni, Mi lian hoin Proffessional killer an ruai thin tih thu lengvak a awm ta mauh mai. Sangliana rin dan a la dik zel. He tualthattu hi mi satliah leh naran ringawt a ni lo ang tih a ring thiam daih tawh. A chet lak dan leh man hleihtheih loha a che fuh thei zel chu a vawikhatna mai mai a ni lo tih a chiang, chuta karah an chaldarah zel silaia kah an ni bawk nen. Pu Zaia erawh thu dang ni se. Chu Killer chu engtin nge an zawn hmuh theih ang? Chu tak chu buaina a tling. Aizawla mi lian leh thiltithei deuh te profile a la khawm chho ţan ta a. Dik tak chuan an sumdawnna dik tak hriat si loha mi lian hi an lo kuh ţún tawh a. Sangliana pawn mak a ti angreng. Pawisawi lo anga lang, a ruka Proffessional killer ruai duh tho si tur ang mi te chu thliar leh a ngai dawn a. Thluak hman a ngai nasa khawp ang le. 

Ephraime pawh chawhnu dar 1 bawr velah a inkhalh chhuak a. Restaurant-ah inhnawh puarin muangmarin a che ta phawt. Zoi pawh a insiam ve malh malh a, a nuin a lo pui bawk. Ken awlsam deuh tur bak a keng lem lo. A naute erawh a pain hrilh a phal lo. Rilru dawih an ni a, eng emaw a kal sual phah ang tih a hlau. Tikhan engmah hre loin awm ve tawp se, nakina Sapliana thinrim hunah pawh tih vak ngaihna a awm dawn lo zawk a ni. Dar 3 a ri dawn hnai tihah mak takin Lawmsanga leh a thianpa Vansanga te an rawn lang nawlh mai le! Chhei! An ni hian an lo hre ru tihna em ni dawn le. Pu Liantawna a phi buai angreng hle. Zoi erawh a dam thlup thung. Pi Lawmi pawh chuan danglamna awm vak loin a lo be sawk sawk a. 

"Hei Vana hi saw lai building hralh an tum saw ka kawhmuh a, a rawn en vel alawm mawle" Lawmsanga chuan a ti a. Vansanga chu pathlawi hausa ve tak a ni. Thlahte atanga inrochun hausakna a ni thung. Zoi chuan thingpui a lumsak a, 

"A la tlai chhe lo bawk a. Zoi, Vana hoin mo kawr vel chu kan va en zuai dawn em niang? Jenny call ila" Lawmsanga chuan a ti ham ham a. A hmain chhuanlam a lo siam tawh vangin tunah a sawm leh chu a nia! Zoi chu a rilru a buai ru hle. 

"A tlai laklawh tawh em mai. Naktuk nileng ka hman dawn alawm. Jenny pawh ka lo bia ang. Naktukah ti mai ang hmiang" awki ngaihnobei angreng takin a ti a. 

"Chhuanlam i siam reng a. Dawr neitute pawh an zahawm alawm le" lungawi hmel vak lo chuan a ti hluk a. 

Pi Lawmi chuan a fanu chu rawn chhan vatin, "Kei leh a pa hi chaw kan ei chhuak dawn sia, Ei rawng a bawl a ngai sia.. Chuvang a nih kha" tiin. Lawmsanga pawh chuan a nawr na ngam ta bik lo va. Thingpui an in lai chuan, Zoi phone chu a rawn ri ta ral ral mai le.. Zoi chuan a pickup rualin thlang lam bathlarah a chhuahpui nghal. 

"Aw" a ti mawl tawp. 

"In in chhak taxi stand-ah khan ka awm. I inpeih em? " Ephraime aw chuan a rawn ti a. 

"Tunah chuan ka hman tlat lo. Hei kan pa tur te an lo leng a. Bakah tlaiah rawngbawl ka ngai dawn bawk nen" Lawmsanga te hriat phak ngei tur chuan a ti ta a. Lawmsanga pawh a khi suk mai. Ephraime chuan a lo man thiam hle. 

"Okay, min lo call mai rawh aw" a rawn ti a. An inbiakna an titawp ta a. 

Inti tatu zetin, Lawmsanga chuan, "Tu nge a? " a lo ti hú a. Lehlam hawia ner sak chungin, "Ka thiannu, phaia awm a lo haw a. Kan thiannu ve tho va tlawh ang a rawn ti a nih kha.. " a ti tha ve mai. Vansanga zawk chuan hawn a rawt ta hlauh a. Chuti ni lo phei se chuan, Zoi nu leh pate chhuah thleng nghah a tum niin a lang. Zoi lah chuan a lo chelh duh bik lem lo va. An chhuak ta a. Zoi a thaw huai mai. 5 minute vel hnuah, Zoi chuan Ephraime chu callin, "Ka rawn chhuah chhoh leh si chuan min hmuh chuan a felhlel ang. Lo chhuk mai ta che" a ti ta tawp a. Ephraime pawh chuan pawi a lo ti lem lo. A rawn tlan thla ta a. Loh theih lohin Zoi nu leh pate a hmuh a ngai dawn ta a ni. In chhung a luh rual chuan an lo ding thap. Pu Liantawna chuan a melh ngun kher mai. Pi Lawmi erawh chuan sang a tiin a rin aiin a hmel tha a ti bawk. Zoi chuan inhmelhriattirna neiin an inchibai a. 

"Muangchang vak lo ila.. " Ephraime chuan a ti sup a. Zoi pawh a insiam lawk vek tawh avangin a bag nen an inak chhuak ta a. Tihian, Zanah Pu Liantâwna ten Zoi pasal um thu chu Pu Sapliana te an va hrilh mai dawn a ni. Engtin tak ngai ang maw. An invai liam ta. Thenkhawm khawveng inkhar khip vek an ni hlawm bawk a, kawnga mi kal vel tih loh chuan an hmu lem lo. Vung takin ramhnuai lam an pan ta nghal a. 

"Hectora a tha em? " Zoi chuan a ti sap a. 

"Tun lai chu a harh tha lo, a ngai che aniang" a lo ti zauh a. Zoi chuan nui chungin, "Keipawn ka ngai alawm" a ti ve vat. A hma ai zel chuan an inpawhin an innel sawt ve ta viau e. 

"E taka! Jenny hian a hriatchhuah hunah engtin tak ngai ang maw? " Zoi chuan a ti leh hlut a. Ephraime a rum nghut. "Tukinah nupui ka neih tur thu ka hrilh " a ti a. 

"Maw?! I hrilh maw?! Engtin? " hlauhthwwn hmel zet hian a lo ti a. 

"Thi mai tur hmel kha pu lo teh. I hming ka sawi lo" a lo ti nghut. 

Zoi a thaw huai mai. An tlan zel a. Dar 5 bawr velah Ephraime in chu an thleng ta a. Hector pawh a rawn vir leh tar tar mai. Zoi chu a khi sak mai. 

"I lo dam em? Ka naute" tiin a zut thuak thuak a. A ngur ve chhar chhar mai. In chhungah an lut a. Engkim chu a kalsan lai ang tho kha a la ni. Khawih danglam a la ni lo. Mahni in thleng ta ang maiin a inngai a. Nun bul an tanna tur a ni thung si a. Engtin zel nge nun an hman dawn tih erawh a hrethiam lo. Ephraime kutah a innghat deuh tawp mai a ni. 

"Zanriah chu hmanhmawh lovang aw" Ephraime chuan a ti a. Zoi a lo bu nghat. A ril a tam hran lo bawk nen. Inbual fai saa kal an ni bawk a, inbual pawh an inbual leh lem lo. A thawmhnaw chu Study roomah a dah a. Muangmarin ei rawng an bawl dun a. A nu te nen an inbe pah. An inbiak zawhah a sim card chu phawiin sim card dang a vuah nghal a. Lawmsanga te biak pawh theiha awm kha a duh lo bur. Zawn hmuh awlsamna chance a siamsak duh lo bur a ni tawp.

Pu Zoliana chu an nuin a rawn ko lang lang a. "Police an lo kal.. An be duh che" tiin. Pu Rualkhuma thihna chungchangah khan zawhna tlem azawng an zawt tawh naa, an la duhkhawp lo a ni mahna le.. Hlauhthawnna a nei hran lo. Ama tawka confi ve tak kha a nia. A va chhuah chuan Inspector Sangliana leh a thuihhruai te chu an lo thu thap a.  

"Eng nge ni ta? " tiin an hma zawnah chuan a va thu ve a. 

"Hei kan rawn kawm leh lawk dawn che a ni. Pu Rualkhuma thihna kal zelah.. Pu Rualkhuma thih hma ni 2-ah khan Hotel pakhatah mi pakhat nen in inhmu tih kan lo hria a; kha mi hnu maiah Pu Rualkhuma chu thah a ni ta kha a nia. A nih chuan, kha hotela i hmuh kha tu nge a nih tih leh engvanga hmu nge i nih tih min hrilh thei ang em? " thunei awka deuh si, ngenna ni deuh roh bawk si chuan a ti dap dap a. 

A chil a lem khawlh. Chung chen chen an lo hriat a ring lo asin mawle.. 

"Ka sumdawnpui nen kan inhmu. Ani kha phai lama ka bungrua lo supply-a lo lakhawmtu a nia.. A tukah khan a haw leh nghal a ni" a ti ta ngawt a. Sangliana chuan a melh ngun nasa mai si. Dâwt a sawi a ni tih chiang takin a hre tlat! 

"Kha hotel manager kha chuan rei pawh in inbiak loh thu kha a sawi a. A rawn chhuak leh nghal mai niin a sawi. Tin, cctv an siam ni ber kherin in inhmu bawk a. A hmaa hotel i va book dawn khan cctv an neih leh neih loh te i zawt thlap a. A chhan tha tak a awm ngeiin ka ring tlat a ni.. " Sangliana chuan a han ti leh tê tê a. 

"Aw ni e, Cctv an neih leh neih loh ka zawh chhan zawk chu ka thianpa hian a chahsak thei a, aman engkim a fit thei bawk a. A remchang em a ka tia nih kha. Zawhna dang a la awm em? " a lo ti ve mai a. Thil awihawm tak zawng a va ni lo tak. Mahse, pa zahawm, hausa leh mi hriat hlawh, lang lo lama sum thianghlim lo chelek nasa em em ni si, mi nawlpuiin an do ngam loh ni tho bawk si a ni a. Thu han zawha han dawp kual vel chu a chi ber loh. Mahse, Pu Zoliana atang hian eng emaw tak chu an la hmu chhuak ngei ang tih a beisei tlat a ni. Pu Rualkhuma kha sawi tawh angin journalist a ni a, Pu Zoliana sum hman dan leh a sumdawnna tenawm tak te a phawrh lan vangin Pu Zoliana kha a hmingchhe ta hrep kha a nia, case file hialin an case a kal mek laiin Pu Rualkhuma kha a thi ta mai si a. Tihngaihna awm hek lo, a hrechiang leh evidence nei tha ber Pu Rualkhuma a thih miau chuan Pu Zoliana chu do let ngam an awm mang lo. Ukil thiam tak ruaiin tunah hian a case a fel thawkhat tawh a. Lungmuanga a awm laiin tiang hian Police lamin an rawn thual leh ta si. A che chhia ang tih chu a hlau hle. 

"I thianpa thlalak chu min pe thei ang em? A biak pawh theihna tur number nen" tiin an zawt leh ta khauh. 

"Ngawi teh, Inspector, ka thianpa hian police nen inhnim hnaih a duhin ka ring lo. Tin, chutianga mi pravacy sawi sak ngawt chi a ni lo bawk. Amah ka lo be phawt ang e" a ti ta a. Tlem chuan a mangang ta deuh. 

"Tunah khawiah nge a awm le?" tiin an zawt leh a. 

"Shillongah" a ti ban chat. Zoliana hmel han enin bawhzui chi nia an hriat avangin nawr vak phawt aiin enthlak hna thawh a fuh zawk ang tih a ring aniang e. 

"A nih leh le.. Kan kal ang e. I thianpa chu i lo biak ngei ka beisei' a ti nghut a. An chhuak zui nghal. Zoliana a hamhaih takzet a ni. A rang arangin an pindanah a lut nghal a, kawngka a kalh nghal rap. 

A sim card pakhat zawk, a sumdawnpui te leh a nupui bakin an hriatpui loh hmang chuan Amosa number chu a hmet chhuak ta a. A ring ral ţêp tihin a rawn chhang hram. 

"Buaina kan tawk tlat ma.. Police in min unzui. Tunah khan min rawn hmu zo chiah, i number min dil a ni" a aw te chu a khur lek lek mai. Ephraime chu a thaw hawk a. Zoi hmuh lohin a room lamah a lut zauh a, "Number pakhat ka lo thawn che ang a. Chu chu i pe dawn nia. Ka hming pawh Amos a nih thu i sawi tlang law law dawn nia" a ti zawi sup a. Zoliana pawh a thlamuang tan ta deuh. An inbiak zawhah drawer-a phone a dah thuhruk kha phawrhin a on nghal a. He number hi a nu pa Pu Thanliana chauh lo chuan an hre lo. Zoliana number dah lutin msg a va thawn nghal bawk a. "Hei hi pe rawh" tiin. Chu number chu an chhui paw'n a black-a a lei a nih avangin hun la ngah dawnin a inhria a ni. A official number an neih chuan an chhui chhuak nghal dawn si a. Tlemin a rilru a buai ve ta deuh. Sangliana chu a mitthlaah a rawn lang a, pa lian ve tawk tak, inringtawk ve tak kha a ni a. Beidawn mai mai a tum dawnin a lang lo. Zoi lah a bulah a awm tawh si. Zoi'n rinhlelhna a neih a thiang lo bur! Dan chêp a la ni dawn tlatin a inhria a. A vawi khat nan Zomuansangi a puih vangin a inchhir ta hial mai. Ni e, eizawnna leh inngaihzawnna a lo kal duntir pek a! Harsatna a rawn thlen tlat si. Zoi hi awm loin intawng lo nise, a duh tawkin chet a la thei ang a, mi dang khawngaihna pawh a nei hek lo vang. Zoi vangin a ngaihtuahna tam tak kha a paih then tawh a. Mi tha thisen chhuah kha a hreh ve hle tawh a nih kha.. Nge tunah hian a sum kawlsa hi a tam thawkhat tho bawk a, a bansan tawh mai dawn? Bansan mah se; phuba lak tur a la nei tlat lai hian a tibuai ve bawk a ni. 

"Ephraime.. Ephraime" kawngka a rawn kik dat dat a. 

Phone chu thukru leh vatin, a va hawnsak a. "Chaw ei ka siam a" a ti sep a. 

"Umm ka lo kal" tih leh inzui phei an rual nghal a. Zoi chawhmeh siam ngei mai a han ei leh thei chu a nuam a ti veng veng mai. A rilru erawh a insual leh fô thin. 

"Eng nge i ngaihtuah vung vung a? " Zoi'n a rawn tih chuan a harh chhuak zawk. 

"Eng vak mah. Lawmsanga te buai dan tur vel mai mai" a ti tha ve mai a. Zoi chuan, "An hre tawh ngei awm sia.. A thinrim teh ang chu" ngeiawm lek lek hian a ti a. An nui dun tawp. Chaw pawh an ei tam ve khawp e. Ei khamah Zoi chuan a tifel leh vek a. Living roomah an thu dun.. Sawi tur mai erawh an hre lo. Eng emaw sawi tuma Zoi'n a ka a an lai takin a phone a rawn ri a. A pa a lo ni. 

"Kan Sapliana te chuan police an pun leh pek anih chu! Mahse, kei ka ngawih tlat chuan engmah an tithei chuang lo vang.. " a rawn ti a. 

"An thisen hi a va sang pafa tak.. Ka duhthlanna a ni a, min nawr bet thiang lo. Hlauthawng suh ka pa, min zawng hmu miah lo vang" a ti tân tân a. 

"Mahse, Sangliana khan Ephraime kha a hria a ni lawm ni? Ani pui hian a lo sawi vaih chuan, Ephraime thlengin a tuar thei dawn a nia. Sapliana pawisak neih lohzia i hriat tawh kha" a pa chuan a rawn ti leh a. 

"Nangmah Sangliana chu va hmuin va bia la, ka duhthlanna a nih thu leh min hum zawk turin va ngen tawp mai rawh. U Hminga vangin kan inhre tha ve a, ka lakah a sual lo vang" Zoi pawh hi rilru chak ve tak a ni. A pa pawh chuan ngaihdan tha tak niin a hria. An inbiakna an titawp ta a. 

"Ephraime, keimah vangin buaina tawk la, min hua ang em? " Zoi chuan a en kal mai. 

"Ka hre lo le.. Buaina hi ka duh lo khawp mai a. Chuvanga ramhnuaia khawsak pawh hi thlang ka ni. Engpawhnise, Lawmsanga nupui hi chu i ni ngai lo vang. Lungngai suh" A lo ti fiah kâk a. Zoi tan thu lawmawm a ni. Ephraime hian puih duhna tak tak rilru a pu niin a hria a, va duh huam huamin mipa dang angin duat hluak lo mah se;a bulah a him tlat si. Tunah veh leh zawn mek an ni na chungin Ephraime bula a awm chian him hliah hliahin a inhria a, chu ringawt pawh chu a hlu a ti. 

Pu Rualkhuma thihna an han thual leh tak avangin Police lam pawn an va tlawh leh a. Jenny leh a nuin an lo dawngsawng a. An han kamkeu tan a. Zoliana an kawm leh thu te, a rinhlelhawm riaua an hriat thu te leh chung thil te erawh la sawi darh lo turin an hrilh thung a. Jenny pawhin a pa thattu chu hriat vat a chak tawh thu a lo sawi ve luam a. 

"Han ngaihtuah vang vang ula, i pa khan hna huaisen tak a thawh vangin vauna emaw tun hnua ngaihbel leh theih tur thil eng emaw thleng a awm tawh em? " Sangliana chuan a ti a. An ngawih vang vang hnuah a nu chuan, "Zoliana khan vau chiah chu ni loin vawi hnih chu a rawn be tawh a. Case hi lakir turin a hrilh thin. Sum lam pawha vur a hnial loh thu te pawh a sawi. Mahse, kan pa khan a hnar fithla thak thin a.. Khami hnu kha chuan a beidawng ve ta a niang, a reh ta daih a. Mahse, tikhan a boral leh ta mai si.. A chang chuan Pu zoliana te thiltih te hi a ni thei mai ang em tih ka ngaihtuah fo mai. Han puh dawt dawn lahin finfiahna kan nei bawk si lo va. " A rawn ti ta nge nge a. An bu nghut nghut hlawm mai. Zoliana ngei chu an target tur a ni ta. He pa hian tu emaw chu ruaiin a thahtir a ni ngei ang. Mi dangte pawh kha tu te emawin he proffessional killer hi ruaiin an thahtir a ni ngei ang. An hnaih ve tial tial e. 

Sangliana chuan Jenny melhin, "Kha.. I thiannu lah chuan pasal a um leh ta daih sia, Lawmsanga te lamin FIR an rawn thehlut ngawt mai bawk a. A zia lo tak tak. A bialpa kha em ni a um le".. A ti sur sur a. Jenny a lo bangbo tawp! Engmah hre ve hek lo. Ni e, tlai atangin a buai ve tawp a. A nuteii damdawiin awm a va buaipui a, thimah a rawn haw ve chauh. Zoi chhungte bakah Lawmsanga te lam pawhin an rawn be miah lo chu mak a ti angreng. A kalna a hriat bik an rin loh vang a ni mahna le.. 

"A bialpa pawh ka hre ve hleinem. Lawmsanga neih kha a duh ve tak takah ka ngai tawh asin".. A lo ti a. 

Sangliana chuan, "A bo hmasak zawk khan a bialpa nen kan inhmachhawn alawm. Ramhnuaiah a cheng lehnghal.. Kha kha a um leh ta a nih ka ring. Chhungkaw buaina a nia, inrawlh vak ka tum lem lo, i lo hriatpui takin ka ti mai mai" a ti duah a. Jenny erawh a ngawi ngal ringawt. Zoi'n engmah a hrilh lo chu a lawm hauh lo. Heti khawp hian an inzui reiin thian tha tawp an ni ve a, engkim a chhia a tha an inhrilh hre vek zel kha a nia. Tuna a pawimawh ber laia hmaih a ni chu na a ti. Sangliana te hawn hnuah Zoi numberah a call a, a tlang thei hauh lo. Lungawi lo zetin Pu Liantawna number a hmet chhuak leh a. A dial leh ta a. 

"Aw.. Jenny" a rawn ti duai a. 

"Pa Tâwn, ti nge engmah ka hriat ve loh.. Zomuani hi a va mak ve. Tunah police ka atangin ka hre ve chiah a. Nangni pawn engmah min hrilh lo va, ka lawm lo khawp mai" a ti nghal hlak hlak a. Hetianga tawng ngam tur a ni ve reng reng a. An inpawh tawn ve êm bawk a ni. 

"Aa.. Ngawi teh, keini pawn engmah kan hre bik lo a ni. Tlaia kan chaw ei chhuak kan haw khan a lo awm si lo va, a naute lahin a awmna an hre bawk si lo. A room kan luh chuan a thawmhnaw tam zawk a lo awm lo va, a tlan bo ta a ni tih kan hre ta chauh a ni. ". Inthiam lutuk lo aw deuh hian a rawn ti a. 

"Chu pawh nise, a bo tih in hriat tirh pawn min lo biak ve tur alawm. In timak lutuk" a lo ti leh nghek. 

"A ni ngawt mai. Kan han buai chho nen, tumah mi dang han hrilh nachang kan hre lo a ni. A pawi ngawt mai, i thiani chu.. Lawmsanga kha a nei ve duh tawh emaw ka lo tia sin".. A rawn ti dam leh thluam a. 

A hma aia nem zawkin, "Kei pawn chutiang chuan ka ngai alawm.. Engmah ka bulah a sawi ngai si lo va, Police lah khan bialpa a neih thu te a sawi a, ramhnuaia a chen thu te.. Chungte chu ka hre ve lo reng reng. Ti nge maw ka lakah a zêp tlat ni" a ti ve leh a. 

Pu Liantawna chuan, "Ni e, kei pawh nang meuh a hrilh hre lo che hi chu mak ka ti. Ka rin danin Lawmsanga te lam a hlauhthawnpui vang che te pawh a niang e.. " a rawn ti a. Jenny pawh chuan a ngaihtuah thiam ţan. 

Pu Liantawna chu a vei sek a, Inspector Sangliana a biak ngei ngei a ngai. A number a lo nei remchang mai si lo va, a dil kual leh rih. A tawpa tawpah a nei thei ta hlauh a. Eng sawi set set loin a call ta nghal. 

Zangkhai vahin, "Hello" a rawn ti a. 

"Keimah Pu Liantawna, Zomuansangi pa ka nia" tiin bul a han ţan a. Pu Zaia thihnaah an inhmachhawn tawh naa inpawh tak an ni hran lo. 

"Aw teh hlawl che chuan eng nge ni ta? " a rawn ti a. 

"Ka fanu chungchangah biakna tur che pawimawh tak ka nei a ni" awki hniam takin a han ti a. Sangliana pawhin a bengkhawn viau. 

"I hriat angin pasal nei mai tur a ni a. A hmain a lo tlanbo tawh bawk. Neihtir tawh lo mai tur ka nih laiin ka hma ka sial luatah ka sawirem leh a. Mahse, ka fanu rilru kha ka lo hneh thei hauh lo a lo nia. A rukin tum an lo nei a. A bialpa nen khan.. Tihian inneih dawn a ruaiah a vawi hnih nan min timualpho leh ta a ni. Kei chuan heti taka a pa min sawp retheih vang hian tuithlar hial ka duh a, mahse, ka han ngaihtiah chianin ka hma ka sial vanga ka fanu duat em em ka chân hlen tur chu ka phal si lo. Keimah vang vekin zah pawh zak zo loin tihian a awm leh chu a nia. Hrehawm pawh a ti ve em em ang tih ka ring. Lawmsanga te lamin FIR an thehlut tih ka hria a, mahse, a pa ka nih angin ka fanu hi ka hum ve duh a ni. A duhthlannaa kal a ni a, nang chuan bialpa a nei tih leh tu nge a bialpa tih i hre vek a. Mahse, khang i thu hriat kha Sapliana te beng hriata i sawi anih ngat chuan, ka fanu leh a bialpa nunna atan thleng hian a pawi thei maithei. 

Chu chu min hriatthiamsaka he thilah hian hma min laksak lo turin Zomuani pa ka nih angin ka ngen che a ni e" a han ti dap dap a. Sangliana pawh a hmin hneh angreng. Zoi kha a ngainat zawng tak a ni ve bawk nen.. Hum duhna a nei lian ve tho mai. A bialpa erawh a ruka an enthlak a la ni tlat a. He pa pawh hi a chetsualna eng emaw han sawia ngaihbel theih tur a awm hlek lo hi a fimkhur vang nge a lo fihlim reng zawk ni.. 

"Ka hrethiam alawm.. Ni e, Zoi chu a pawi ngawt mai. Kawng ka lo dap dawn nia" tiin a chhang ta a. Pu Liantawna pawh a thaw huai mai. Sapliana mitmeng verther zet a mitthla nghal a, tun tum zawng chhungril indona an tan tak tak dawn niin a lang. 

Zan dar 10 a pel vah tawh. Nupa tuak thar anga inru, la inkutsuih chiah lo te pahnih erawh an la thu ngawi kur mai. Ephraime chu a zâm nge sawi tur a bangbo chho ta riau a. Zoi tan lah han ţawng seuh seuhna chhan tur a vâng tawh si. An lai dun viau a nih hmel e. A tawpa tawpah a mipa zawk na nâ na chuan, "Mu tawh ila, i chau lutuk ang" a ti ta a. 

"Khaw nge ka mut dawn? " a lo ti ve tawp. Ephraime chu a ngawi dat a, Zoi chu thuk zeta rawn melh leh pahin, "Ka bulah" a ti sup a. A tho vut bawk. An inphihfai a, room lamah chuan an lut dun ta a. Zoi chu a inthlak sât sât a. Mut dawna inthlak hi a tihthan a ni hrim hrim a, pyzama leh tawnzau deh nuam tak a ha a. A mut chhiat theih em vang hian thawmhnaw themlem ha chi a ni lo tih a inhria. Kekawr zel a ha thin. Ephraime pawh a mu ngút a. Phone pawh an leklam lem lo. 

"Naktukah engtin nge? " Zoi chuan a ti sap a. 

Zangthal chungin, "Ka hre lo. Nghah tlawk tlawk a ngaih hmel. Inspector khan Lawmsanga te pafa a rawn hruai maithei bawk. I huaisen ve a ngai dawn a ni mai" a ti ta duah a. 

"Kha lamah chuan lungngai suh. Nang zawk hian i thu i sút ang tih a hlauhawm zawk" a lo ti ve salh. Ephraime a nui hawk hawk a, chutianga a nui chu Zoi tan a vawi khatna a ni. 

"Eng nge nuihzatthlak a? " a ti hlar a. 

"Kan awmdan hi.. Engkim hi a lai kual vel vek" a lo ti mai a. 

"I lai a nih zawk kha" confi zetin a lo tih khum. Ephraime chu in let thawkin Zoi mu zangthal chu a va kuah thawk a, hnai takah a zu bih nghal bawk. A mitmeng pawh a tak leh ran tawh. Zoi thinphu pawh a rawn rang nghal dawt dawt. 

Ephraime chuan a rawn fâwp ta a. A lo chhing tawp. Rei tawk fang a fawh hnuah a thlah a, "Nangmah zawk anih kha lai chu.. Tak tak ana.. Zoi, i inpeih hunah chauh ka che ang" a ti thawp sup a. A inthiarfihlim daih. Zoi chuan a lo ui rilru khawp mai. A sawi ngam der si lo. Engvanga hetia inla hrang leh zel nge maw a nih le.. A ît zawng a ni lo tak. Chu thu chuan a rawn vit sawk ni maiin a hria. Nui lui hakin, "Aw le.. Ka hrethiam alawm" tiin lehlam a hawi a, a ngawi ta vang vang a. 

Pu Sapliana mitmeng sen rûm chu an nu Teremi leh an fanu chuan an melh tha ve ngam meuh lo. Mut pawh a mu tha lo aniang tih tur a ni. Ni e, nizan maiah a monu tur a bo leh a! Police hnenah thlen mah se; Liantawna te lam ngawi hmak chuan a tilungawi lo takzet a ni. Inhnamhnawihna an nei ve a nih a ring ru hial. Mahse, chutia chet lak buan buan chi a ni lo tih a hai bik lo va, a sava note hual lai, a hmanrua ber tur a thlawh chhuah leh tak daihah chuan inhrikthlakna dang nei hek lo. A nupui leh a fanu chungah a ţuan a. Eng emaw an sawi ve hlekin a lo tawngkhum nek loh pawn meng ling hlar chungin a lo melh thin. Lawmsanga lah amah ai mahin a thinur a, a zak bawk. Tlangval chapo, thaw lian ve tak kha vawi hnih a tlawm ta. A mipatpui ten an nuihzat dan tur leh hmuhsit dan tur a ngaihtuah chang chuan a ha chang a thial bap bap thin. Tun dinhmunah Zoi leh a bialpa chu hmu se zawng a kap darh duh vek hial ang. Zomuansangi'n a bum hnehzia a hriatchian chuan mawl a inti lutuk a, a sam te chu a kek leh nget nget thin. Chet lak zel dan tur chu a pa kutah a dah tawp mai a ni. 

"Mama, A hmaa a bo khan amahin a lo haw leh mai kha a nia tiraw.. A lo haw veleh mai lawng maw? " Sapliana chuan a ti a. 

"Ka ring lo. A thawmhnaw a keng tam an ti tlat. Mizoram chhungah pawh hian a awm tawh kher lo maithei. Shillong emaw khu lai hnaivai deuhah a la chambang mahna le" a lo ti ram hmak a. 

"A nih chuan kan Police ten min puih theih dawn chu" a pa chuan a ti nghat. 

Lawmsanga chuan, "Mahse, ka pa, Zomuani pa te ngawi tlat hi ka ngaihdan a ni hauh lo ania. An fanu hi engkim an hriatpui te hi a ni zawk lo maw? " a ti ta chiah a. Sapliana ngaihdan chiah, "Chu chu lawm kei pawh ka buaina.. Keini zawkin FIR kan thehlut a nia. An fanu a nia, zawn tumna leh ngaihtuahna pawh an nei lo hian min tingaihtha lo" a lo ti ve bawrh bawrh. 

An pafa rilru verther leh hmasial tak chuan kawng awm thei an han dap ngial a. Zoi bialpa awm reng reng an hre lo chu a pawi ta a ni. Hmanni lawka Lawmsanga farnuin Zoi leh tlangval pakhat a hmuh nia kha tlangval kha a ni thei mai ang em tihte an ngaihtuah kai zel a. Engpawhnise, a bialpa pawh ni raw sek sek, mi nupui tur rubo anga lantir theih loh reng an inring lo. Sum an nei a, tu te emaw kâ pawh an hup leh mai aniang chu. Zoi laka phuba lak chu an tum nghet bur mai a ni. 

Zing dar 6 a ri ta. Zoi pawh a rawn zi ţelh ţelh a. A rin aiin a mutui. Khatia Ephraime laka a tihtauh khan a hriat loh karin a lo muhil daih a ni ngei ang. Ephraime erawh a lo tho daih tawh a. Ani pawh muhil thei tawh hek lo, a tho a, a zi ian ian mai. Room atanga chhuakin choka lama filter tui chu a va in khalh khalh a. Eirawngbawl vak a ngai rih lo. A thing chhuanlum a ni mai. A phone a hmet eng a. A nu leh pate number bakah Ephraime number bak a save lo va, a thianthaber Jenny erawh la biak pawh tho a tum. Tlanchhe nun hman chu sim card a hek dawn hle mai. Exer an la putu leh a ni maithei, an reh riau. A inphihfai hnuah a inthiar leh a. Ephraime roomah a inthiar.. Chutia a inthiar lai chuan a rawn hawng niawm tak a ni. Hector a bauh lauh lauh a, Zoi chuan thawm a nei duh hran lo. Roomah a rawn lut aniang, "Bathroomah i awm em ni? " a rawn ti lâwng lâwng a. 

Ring zetin, "Aw" a va ti nghek. Eng nge a hriat pawh a hre lo. Ephraime chu a ngei ve ringawt. Nizan vang te kha a la ni mahna le.. A inthiar zawhah choka lam pan leh mai a tum lai takin Ephraime khum bula dawhkan pawhdawh atang chuan phone a rawn ri dút dút a. Ephraime lah a chhuak leh daih tawh si. Kalsan a tum zet a, mahse, eng nge a hriat pawh a hre lo. A va pan a, pawhdawh chu hawngin phone lo awm ngât chu a zuk ban a. Pu Thanliana tih hian a lo call a ni. A la ang nge la lo vang tih a ngaihtuah laiin a darah na zetin a rawn kuai her sawk a, mitmeng rum ula melh chungin a phone ken lai chu a chhuhsak nghal. Zoi a hamhaih vek. Ephraime chuan phone chu thlanglam bathlarah a chhuahpui a. Eng nge an sawi a hre lo. Chuti em ema Ephraime mitmeng rapthlak chu a la hmu ngai lo a ni. Engvanga thinrim vak nge a nih? Eng nge a tihsual? A phone a lo laksak ve a ni mai a. Mahse, pawhdawhah khan ti nge a dah? A phone hman thin nen khan a inang miah lo tih a hre chuak nghal bawk. Amahah ţhamtu eng emaw a awm mer mer a, a sawifiah thiam hauh si lo. Inthing harhin chokaah chuan a phei a. Eirawng a bawl tan ta a. Ephraime pawh an inbe zo ta nge a rawn lut a. A hmel chu a la tak ran mai. Zoi chuan a be hmasa ngam lo. An boruak chu nuam lo tak a ni. Tihian nupa ni turin an inpuahchah ve chu a ni sia. 

Dar 8 bawr velah tukthuan an ei daih!an inpeih tawh si a, tihtur awm hek lo le. Inbe miah loin an ei tluan thak bawk. An ei kham thil a sil laiin Zoi a insùm zo ta ngang lo va. 

"I eng pawi nge ka sawi a? " a ti ta a. Ephraime chu a la ngawi run mai. Ani hmeichhe induhtawk ve tak tan chuan tawrh har tak tur a ni. 

"Ka hawn i duh em ni? I buai tan der tawh a ni maw? Min pui chu.. Aw le a tha. Ka haw ang" a ti hmawk hmawk a. A thil sil lai dah sawk sawkin roomah a thawmhnaw a va khung a. Mahse, Ephraimean a rawn zui lut vut. 

"Ka phone kha khawih lo tur i ni asin" a ti dam thlup a. 

"Ka duh vanga khawih ka ni em ni? A lo ri sia, ka va en mai a nih kha. Eng thil pawi mah ka ti lo ve" a lo ti sak sak. 

Ephraime hmelah chuan inthiam lohna a lang ve zawk. A rei lo mai pawha.. Zoi hmaah tak ding chungin, "Haw suh. Dân kan zam ang a, chu chu inzawmsak kan tum ve ve ang. Vawiinah ka chhuah lawk a ngai dawn a. In i lo nghak dawn nia. Pawn lamah kawngka ka kalh hnan ang che. Buaina i tawh loh nan" a ti ta a. Zoi erawh a ngawi ran. A lungawi bik hlawl lo a ni. Han ân chiam chi niin a hre chiah si lo. Dar 9 velah Ephraime chu a chhuak ta a. A sawi ang takin Hectora nen in chhungah awmtirin kawngka a kalh hnan. Tupawh lo kal se, an awm tih an hre lo ang chu! Zoi erawh study roomah a tawm a, tihtur vâng a ti leh ngei mai. A hmaa Ephraimea'n a thuhrukna kha a zawng a. A hmu zo tawh lo, ni lo, a hmu thiam ve lo aniang. Khatiang pindan rúk a nei hrim hrim pawh kha a mak tawh sa nak alaiin, tukinah a phone dang vangin tiang boruak kha an nei leh ta chu a nia! Ephraime hi tu emaw tak zawng a ni ngei ang le. Mahse, Zoi chuan a ngaihtuah thiam si lo. A buai ru ve ngang mai. Jenny a be pawp ta a. 

"Ka thian, keimah Zoi" a tih rualin, Jenny chu a rawn ang nghal buan buan mai. Zoi chuan a hrethiam em em, ani pawh nise a vui ve viauin a ring a ni. Chuvang chuan dawhthei takin a lo ngaihthlaksak a. A in an thawl hnuah, "Mate, ka thiam loh a ni. Ka hlauhthawnpui vang che a nia, ka kalna tur leh chin te ka hrilh che chuan, Lawmsanga ten Police an dâwptir vak che ang a, loh theih lohin i sawi ang tih ka hlau a ni. Tunah chuan champhaiah ka awm a. Eng emaw chen chu ka biru rih dawn a ni. Boruak a daih deuh hunah ka lo kir leh ang. Min lo hrethiam hram hram teh" tiin a han hnem a. Thiantha ngang chu an inhnem dam ve leh mai. Jenny pawn Zoi ngaihtuahna chu awm a ti ve tho mai. 

"A nih bialpa vel te an sawi a. Chu nen chuan mi in tlan? " a rawn ti a. 

"Teh nang, kha chu ka lemchanna mai mai anih kha. Bialpa nei ila i hriat loh i ring em ni? " a lo ti vat. Jenny chuan a awih ve mai. Mahse, Sangliana thusawi te kha chu a hrilh tho va. Zoi chuan thiam takin a lo hnial thla vek. 

A number chu tumah hrilh lo turin a ti bawk a. Hei chu a zawm thei ngei ang. Tunah chuan titipui tur a nei ta bawk a.. A zia e. Ephraime lah eng chen nge a thang dawn a hre si lo. A pawimawh ngang aniang e. 

Chu building awngrawp ve tawh lam kawtah chuan a ding vang vang a. In lian ve tawk tak, mahse, hlui tawh lam a ni. A pen chhat chhat a. Kawngkapui rinawm hmel tlet tlawt zet chu a kik ta koh koh a. Rei vak loah a ri rak a, a rawn inhawng nghal. Nu tling pui tia sawi theih chiah lo, nu la valai tak hmeltha angreng tak hian a rawn hawng a. An inmelh dun vang vang mai. Chutah chu nu chu harh chhuak thut niawm takin, "Lo lut rawh. Eng nge i duh tak? " a ti sawk sawk a. Ephraime chu a pen lut ta. 

Thuthmun te a han rem fel hnu chuan, "Pu Thanliana a awm em le? " a ti zawi raih a. Ngun lehzualin chu nu chuan a rawn thlek he haw a. "U Mary fapa chu i ni em? I ni tiraw? " tih leh rawn hnaih a rual nghal. Lo inven deuh pahin, "Ka nu chu Mary chu a ni ngei alawm" a lo ti dam thluam a. 

"Ka pa, pa.. Hmanhmawhin lo kal vat teh. U Mary fapa a lo kal" tiin a au nghal chul a. Pindan pakhat kawngka chu lo inhawngin, putar la chak hmel tak, inchei zahawm tak hi a rawn chhuak ta a. Ephraime chu a rawn melh nghal vang vang. 

"Mary thisen ngei a nih hi" a ti sup a. Ephraime chu dingin, "Ka pu, i dam maw? " tih leh chibai turin a kut a phar chhuak a. A pu mitah tak chuan a melh kal mai. 

"Ka dam e. A tawpa tawpah chuan kan inhmu ta e" Pu Thanliana chuan a ti thâm ţuak a. Nu lo awm ve kha kawkin, "Ani hi i nu nau i nuteii a nih hi. Kan in bul maiah hian an pa nen an rawn awm ve a. Mahse, a nauin pasal a neih leh tak si avangin keimah chauha min awmtir phal loin min rawn awmpui leh ta a ni.. An pa erawh hnathawkin a chhuak a, a fate pawh school an kal a niawm e. Thu teh" tiin a tupa chu a be mawlh mawlh a. A mitmeng nung sara phurna lo lang chu Ephraime chuan a hmuh hmaih lo chiang kher mai. 

"Ka nu khan a thih dawn khan min chah nasa êm a. I hnena ngaihdam dil turin.. " a ti a, a hnuk a ulh nge a chil a lem khawlh. Khuma a nu cher kiam mai mu kha a mitthlaah a lo lang a. 

"Mizoram hi a ngai thin em em a, tin, a mizopui te pawh a ngai thin. Mahse, hnam dang fa a pai avangin tumah a hmuin a kawm tha ve ngam ngai lo. Nang lahin ngaihdam a hnèkin anchhia i la lawh ulh ulh reng a. Ka nu khan a dam lai nun rei lote kha keimah vang chauha hlim lui chungin a hmang thin asin.. Ka pu, ka nu kha i hmangaih lo em ni? " Ephraime chu a puak keh ta a ni ber ang chu. Pu Thanliana chuan a kut a hum nasa ngei mai. A tupa ngeiin a nu chanchin an sawi takah chuan dawt a ni lo tih a chiang si.. 

"I nu kha ka hmangaih asin, ka hmangaih em vanga huaa tuithlar ka ni bawk asin" a ti khur dat dat a. 

A nuteiin thingpui a rawn pe a. A lo la ve mai. 

"U Mary i chhun a, i hmel tha lutuk, ka fapa ve tho i nia. I nu ang chiahin min en rawh aw. Ka u kha ka ngai thin lutuk asin.. " a ti ve mawlh mawlh a. A mitmengah tihderna reng a awm lo. Ephraime chu a hamhaih lek lek zawk a ni. Chutiang taka a nu an lo hmangaih leh ngai si chu.. 

"A nih chuan bawiha, i hming pawh kan la hre si lo va" a pu chuan a rawn ti a. 

"Ephraime Zothanpuia ka ni e.. Ka nu phuah a nia" a lo ti ve mai a. A tum angin thil a kal lo. Ani chuan a nu duh dan ang loa ba rulh a duh a, a pu ten a nu laka an ba kha rulhtir ngei a tum kha a nia. Mahse, thisena inzawmna hi a lo chak deuh nge… a nu pa a pu leh a nuteii te hmel a hmuh khan a buai tlat! A rilru ngaihtuahna thenkhatah erawh tlawm a la tum mai bik lo. A phone a rawn ri leh tlat! He numberah hian Pu Thanliana number bak a save lo. E ni dawn tak.. Zoliana a pek tak kha. A pu leh a nuteii te mitmei pahin, "Hello" a ti a. 

Lehlam ami chuan, "Khaw nge i awm le? Thu zawh fiah che kan va duh ve. Police station atangin a nia" a rawn ti ta. 

"Nakinah ka rawn bia ang che. " tih leh dah a rual nghal. A ding a. A pu te chu melhin, "Ka kal a ngai. Ka rawn hmu leh ang che u.. " tih leh chhuah a rual nghal a ni mai. An hrilhhai kher asin le.. 

Motora a thut hnuin rawn betu number chu a hmetchhuak leh a, "Tunah chuan Mizoramah ka awm lo va, Silcharah ka awm mek. A hmanhmawhthlak em? " zangkhai thei ang berin a ti a. 

Chang fak hian, "Tualthah thubuai a ni e. Tichuan, i hrethiam tawh em? " a rawn ti a. Ephraime chuan, "Naktukah ka rawn haw ang" tiin phone a dah nghal. A number an chhui a rin vangin a switch off nghal bawk. Buaina a tawk ve ta hlek hlek e. Hun a nei tlem ngang bawk si. A ngaihtuahna chu a vak nasa khawp mai. Mahse, chuti maia tlawm chi a ni lo. Heng zawng zawng huam hian alawm hna a thawh le.. 

Ramhnuai lam panin chak takin a tlan liam ta vawn vawn a.. 

(Muah 😍