Escape 13

ESCAPE… (13)

Ziaktu: Toni Rãlte

Pu Zaia motor liamna chu a pe sun mai si a. Driver tan hai chi ni hek lo, an zuk thlir a. Motor chu an zu hmu ta ngei a. Police hrilhin police lamin hma an rawn la ta a. Pu Zaia chu a lu a thi nasa viau mai. A bak hliam dang a nei hran lo. Amah chu mi hriat hlawh a ni ve bawk a, tu nge a nih an hre vat mai. A nupui fanaute an khawngaihthlak, an hrilhhai takzet a ni. Police lam ten an han bia a, a kalna tur a sawi lo va, nimin chawhnu lamah a chhuak tih chauh an sawi thei. Tu nge a hmuh dawn tih vel engmah an hre bawk si lo. A phone an check lahin rinhlelh tur an awm bawk si lo. Police lam lu pawh a hai hle. Postmortem result a lo chhuah chuan, an buai zual. A kawchhungah tur chak tak hmuh a ni tlat. Chuti a nih chuan motor accident vanga thi a ni lo ve thei tlat! Thah ni ta se tuin nge that ta ang? A thih vanga hlawkna tel tur tu nge ni ta ang.. Inspector Sangliana lu pawh hai tak a ni. A mi um mek, a chhui mek thiltih bawk a ni ang em tih a ngaihtuah a. Mahse, kha mihring kha chuan silai a hmang thin tlat. Tun tuma Pu Zaia thih dan hi chu tur hmanga thah a ni si. Kha mihring kha a ni lo ve thei tho. Zoram khawvela pa lar leh mi hriat hlawh tak tak panga lai an thi ta.. Mipui pawh an fimkhurin sumdawng lian ho phei chu an meng kar tawh mai. Sawrkar leh police demna a nasa a, chhui chhuak thei miau hek lo le.. 

Zoi te pawh a rukin an inbuatsaih ve reng a. Lawmsanga te lam hian an hria ang tih a hlauhawm ta ber mai. A thawi tham pawhin an sawi ngam lo reng bawk a. Pu Liantawna erawh amah veh rengtu dah that a nih takah chuan a thaw huai mai. Pu Zaia thih thu an hriat rualin Sapliana'n a lo call nghal a. 

"I dah thattir em ni! " tiin. 

"Aih, mahse, a thi hi pawi ka ti lem lo" tiin a lo chhang thung. Sapliana tana beihna hmanrua siamsak a tum tawh lo bur a ni. Jerome-a pawhin a pu thih thu chu a lo hre ve a. A phi ruai mai. Amah bail chhuak tur berin chutia a thihsan leh si chuan engtin lêk nge a awm tak ang ni. A tanpuite bulah, "Ka pu a nia. Ka hnathawhna.. Thah a nih ngei ka ring, inhnamhnawih tur awm mi pawh ka ring dik ngei ang" a lo ti a niawm a. Chu chu warden beng a lo thleng a, an ngaihven ta riau mai. Police lamin Jeromea chu an zu kawm ta a. Ani lah a hlauthawng insawi âwk laklawh bawk si chu a kha a chih a, a lo sawi ta kher kher chu a inchhir kher mai. Mahse, thiam taka an han dâwp an han dâwp takah chuan, "Ni e, thudik ka sawi mai ang e. Amah ka pu ber a awm ta lo bawk a. Ni e, Pu Liantâwna that tur khan amah ka pu khan min ruai a ni. Nuai hnih lai min pek a tiam avangin ka nep zo ta ngang lo va, kan khawsak a harsa ve nen. Ka tih theih mai ka ring a. Mahse, tikhan ka hlawhchham ta kha a nia. Tuna ka pu thattu te hi Pu Liantâwna te thuihhruai emaw amah Pu Liantâwna hian tu emaw a ruai a ni maithei.. Tu nge tih erawh ka hre hauh lo" a ti ta nge nge a. Police lam chuan mak an ti viau, "Engvangin nge i pu chuan Liantâwna chu thah a duh a? " tih zawhna an han zawh chuan, "Ka hre bik lo. Zawhna zawt tam lo turin ka pu khan min ti sia, ka rin danin sumdawnna velah inerna emaw intihthiam lohna an nei a ni maithei" a ti a. 

Ni e, Pu Zaia khan Jeromea bulah engmah a sawi lo tak tak a. Dah that ka duh tih bak chu.. Jerome lahin a zawt ngam bik bawk lo nen. Engkim chu a buai ta nuai mai. Police lam chuan rang taka chet lain, Pu Liantâwna chu an va hruai a. Thana lamah kalpuiin thu an han zawt vel ta a. 

"Nang pawn i lo zêp reng a. Jerome kha nangmah that tura rawih a ni reng si a. Kan bulah tikhan i zêp a. A chhan tha tak a awm ngei tur a ni"an ti a. Pu Liantâwna a meng phawk ngang mai. 

"Ka hre reng reng hleinem. Amah khan a sawi si lo va.. Tu chuan nge min thah duh ang? " a lo ti mai si! Police lam lahin nawr vak chi niin an hre bawk si lo. Evidence an nei lem bawk si lo nen, Pu Liantawna han rinhlelh ngawt pawh chu tiin an chhuah leh ta phawt a. Mahse, a rukin enthlak hna an thawk tho ang. 

"Kha mihring in atang kha chuan a hla deuh naa, Pu Zaia kha engvangin nge khalam kawngah khan a kal le.. Kha pa hmu tur khan a ni thei ang em aw" tiin Sangliana chu a phun sup sup a. Ephraime chu enthla fo mah se, han rinhlelhawmin a awm duh reng reng si lo. Zoi nen restaurant-a an inhmuh te kha an hre vek. An inngaizawng tak tak angah an ngai nghe nghe. Mahse, Sangliana rilru chhungril takah Ephraime chu a thi thei lo, rinhlelh turin awm lo mah se, a ringhlel tlat! Nge a beidawng hlawhchham hian Ephraime nen engkim a hmehbel zawk.. A la chhui chhuak ve em em ang chu. 

"Zo, vawiin chu ka pa thlan kan tlawh dawn a. Lo kal ve ta che" Jenny msg chu a chhiar a. Kal ve a tha khawp ang. A ruang takngial pawh a kil bawk si lo. 

"Aw le.. Ka lo kal ang. Min lo nghak la" tiin a reply a. A tihtur ang angte a tih zawhah a insiam zui nghal. Police ten a pa an rawn hruai ringawt kha mak a la ti fo mai. Pu Zaia thihna chungchangah a ni kher bawk si. A pa hian an hriat ve lohin kua a lo hreuh tak tak em mawni dawn ni. Tualthattu anga a pa a mitthla chuan a ţap lo chauh zel. Mi pali rawng taka thattu hi man chhuak se, hremna na tak pe se a duh ve ngawih ngawih. Ephraime te kha an la ringhlel zui! Mahse, Zoi chuan rinhlelhna tlem nei mah se, a rinna a tam zawk awm e. An inchenchilh dawn bawk a, a rinhlelhawm leh awm loh chu a lang thuai ang chu maw.. 

"Hello.. " pu Liantâwna aw chu a fiah hle. 

Ephraime chuan, "Aw eng nge ni ta? " a rawn ti a. 

"Police ten thu min zawt a. Hriat ruk an nei a niawm e. Mahse, ka ţang tlang thei a. I sulhnu i thup fel maw? " Pu Liantawna chuan a ti a. 

"Aw engmah rinhlelh tur a awm lo ve" a lo ti khauh. 

"Mamawhna che ka la nei leh maithei a. I number hi ka delete rih lo aw" inpawh deuh niawm takin a ti a. Ephraime pawh chuan, "A tha alawm.. Mahse, fimkhur ang che" a rawn ti a. An inbiakna an titawp ta a. 

Jenny te in a va thlen chuan an lo inpeih deuh vek tawh a. Inlenpawh tawn reng an ni bawk a, Jenny nu leh a naute pawn an lo lawm hle. Rei pawh thu loin thlanmual lam an pan zui ta nghal a. Pu Rualkhuma thlan chu a fai hle. Han tihbelh leh chei em em pawh a ngai lo. An nu chu a inhnit faih faih a. A thihna a la rei loh bakah nupa inngeih leh inzui ve chawt, titi dun seuh seuh thin an ni bawk a. An pa tello hringnun chu a tan a harsa ve bawk a ni. A fate erawh an ţap lem lo. Thla te an han la a, thing hlim hnuaiah Jenny leh Zoi chu an thu thluang diai a. 

"Zo, kha pa kha ka theihnghilh thei thlawt lo.. Mipa dang hi ka hmu nèp vek. Engtin nge ka tih dawn pawh ka hrethiam tawh lo" Jenny chuan a ti chuai raih a. 

A chil a lo lem khawlh. 

"I mak e, vawikhat chiah i la hmu ania. A awmna pawh i hre si lo.. Theihnghilh tum rawh. " a lo ti hlak hlak a. 

"Ka tum alawm. Biak loh te pawh ka tum thin. Mahse, phone ka khawih chuan ka rilruah a lo lang hmasa ber zel" a ti a. A thiantha ber a ni bawk a, zep loh chuan hrehawm a ti ru takzet. Fridayah Ephraime nen an tlan dun dawn tih hre ngat se chuan, Jenny hian a kidnap duh hial ang. Engtikah emaw Ephraime nen inneih tak taka an inneih phei chuan Jenny hian hriat hun a la nei ngei ngei dawn. Chumi hun mawlh chuan a kap run a, a huphurh takzet a ni. Kawng dang a nei bik si lo. 

Rei tawk fang thlana an awm hnuah hawn zai an rel ve ta a. Chaw eia an sawm tlat vangin Zoi pawh chuan a hnial ta bik lo va, a nute a phone a. Jenny nen salad an siam dun a, Ephraime bak sawi tur a hre lo chu a hne. Zothanpuia tih kha a hriat dan a ni thung. A mizo hming kha.. Chaw te hlim taka ei hoin eikhamah a thu khawmuang ve leh a. Jenny rooma thawmhnaw vel an inentir laiin Jenny nau Apuii chuan, " u Zo, U Lawmsanga a lo kal" a rawn ti a. A tâwt nghal up up mai. He mihring hian engvanga zuia nèk reng nge maw a nih le. A nupui tur anga a ngaih tawh vangin a tan bel chhung saah a ngai deuh tihna em mawni zawk ni.. A hne riau mai. Jenny te in a ni si a, han chhuah loh kha mawiin a hre si lo. Phur fahran lo chuan a chhuak ta a. Lawmsanga chu Jenny nu nen an lo titi luam a, a lo ţawng leh zawt zawt tawh. 

"Ka rawn kal a, he ta i awm thu an lo sawi a. Ka rawn hruai dawn che a" inti tatu deuhin a ti lung lung a. 

"Hruai ka ngai hleinem. Scooty ka keng reng alawm" Zoi chuan a lo ti deuh hmak a. 

"Scooty chu dah rih mai rawh. Naktukah i nau ten va lam mai rawh se.. Tun ang zanah chuan a tha lo" Lawmsanga chuan a la ti ta deuh deuh. Zoi chuan a ngei takzet. A duh loh loh a sawi chhuak ang tih hlauin ngawihah a ramtang ta daih a. Jenny lah chuan Zoi runluih nan ti niawm takin Lawmsanga chu a on thiam si, a be lumlam vak a, a nui leh har har thin. Zoi'n a va mitmei thin, ani lah a phur tulh tulh emaw tih tur a nia. Zoi run tawk a tling kher mai. Dar 8 bawr velah hawn a rawt ta tawp a. Intihbuai vel a peih loh vangin scooty pawh chu a dah ta mai. Kal kawngah Lawmsanga chu a tawng suam suam a. 

"Inneih kawr pawh naktuk chu va en leh ila a tha ang. Ka duh aiin an peih har" a ti a. 

"An peih ve vat mai ang. Va nawr chhen kha a tul lo" Zoi'n a lo ti a. 

"I phur tawh em? Mi hausa nu i ni ţêp tawh ania aw. I lal dawn sia.. " Lawmsanga pui roh chuan a ti leh a. 

Zoi chu a nui lui deuh chiam a. "Ti pawh hian nula hausa ka ni sa reng tawh alawm" A ti hmak a. Lawmsanga a dang titih. 

"Chuan kan inah chuan lal ka ni bawk" a ti leh ngat bawk. A sual thiam ve a nia. A pasal tur ni hlei lo laka phungthluk chiam kha ţul a ti lem lo. 

In an thleng a, an inzui lut a. Pi Lawmi chuan a lo be hlut. Pu Liantawna erawh a chhuak a nih hmel. An makpa ni dawn lo mah se; rinhlelh an kai loh nan Lawmsanga chungah chuan that an chhuah em em vek a ni. Zoi pawh hian sual chhuah chang nei mah se, a insum ve hram hram chang a tam mai. A hun a thlen hmaa Lawmsanga te beng a thlen vaih chuan Sapliana thinur an pal zawh a ring lo a ni. Ni 2 chiahin a dang ta bawk. A ngaihtuah chhuah chang chuan a phur a, a huphurh bawk. Fa te an la nei ve ngei ang a.. Tih te thlengin a ngaihtuah a ni. 

Lawmsanga chu rei a leng bik lo. Zoi pawh a thaw huai mai. Lawmsanga haw chu hmun danga peng buai loin a haw tlang nghal a. A nu te an lo la meng. A pa bula thut pahin, "Rinhlelh tur ka hre lo. Ka lakah that an chhuah em em vek. Zoi tak pawh saw a hel tawh lo niin ka hria. Mahse, a induhtawk ve êm a" a ti mawlh mawlh a. A pa chu a lo bu nghut nghut. 

" A that chu.. A hel reng kha ka ring lo reng a ni. He ina a lo lawi hunah a induhtawkna te chu a phai duak duak mai ang" a ti a. 

Lawmsanga nu chuan an pafaa melhin, "In rilru hi ka hrethiam lo. Kei chuan Zoi saw ka ngaina asin. A laka sual in chhuah vaih chuan a tan ka ding zel dawn" a lo ti bak hlar a. An pafa chuan an nui dun hawk hawk. 

"I nu rilru tha lutuk hi a khawngaihthlak zawk.. Zoi chu kan tiduhdah dawn reng reng lo. Ka tu min hrinsaktu tur a nia, ka duat viau ang" Sapliana chuan a ti a. A mitmeng erawh a verther hle. Zoi laka an thil ruahman erawh an pafa chauhin an hria.. 

Pu Zaia thihna an chhui dan te chu a lo chhiar ve vek a. Police lam hian an rawn la bekbawr lo va. An rawn lan vat erawh a ring. A chhan chu a in awmna lama accident tawk a ni miau a. Postmortem lo nise chuan engmah chhui tur a awm lo mai tur a nia. Inspector Sangliana khan a hre tawh si a, a rinhlelh zawng tak a lo ni sa bawk nen.. A chhui dawn nasa leh dawn tih a chiang. Chutia a inngaihtuah lai tak chuan a kawngka chu an rawn kik a. A va hawnsak chuan a rin ang ngeiin Sangliana leh constable pahnih an lo ding! An rawn lut a, an thut fel hnuah, "Kan lo kal chhan chu i hriat mai ka ring. Pu Zaihmingliana thihna chungchangah a ni" Sangliana chuan melh kar chungin a ti a. 

"Oh! Ka lo hre ve alawm.. Kha pa thihna kha. Mahse, kei min rawn kawm ta mai erawh ka hrethiam lo" Ephraime chuan a ti a. 

"Hriatthiam loh tur a awm em ni? I in kal kawngah accident a tawk a. Mipui hriatah postmortem result hi puan a ni ngai lo naa, Pu Zaia kha motor accident vang ni loin tur hmanga thah a nih hnuah accident anga lantir a ni tih kan hre tawh a ni" Sangliana chuan confi zetin a ti a. Ephraime chu a lo bu nghut.. 

"A nih chu mawle.. Chuan ka in nen a inhnaih deuh vangin rinhlelh ka ni ta mai a ni maw? Khi lai kawngpuiah khian motor tam tak an tlan ve fo asin.. " Ephraime chuan a ti ve leh khauh a. 

"Tu nge a hmuh a, khawiah nge a kal tih kan la hrechhuak thei lo va.. Tu emaw nen chuan an inhmu chiang a ni. Khami tlai Pu Zaia'n accident a tawh tlai leh zan khan khaw nge i awm le? " tiin a zawt ta a. 

"Ka inah ka awm. Kar hmasa khan eitur leiin ka rawn chhuak a. Khami hnuah ka chhuak tawh lo. Ee.. Ka bialnu hmu turin ka rawn kal.. Enthlak ka ni tih ka hria a, chuvang chuan tawm rih ka duh a ni" Ephraime chuan zâmna tel miah loin a lo ti a. 

"Anih Pu Zaia hi i hre hrim hrim em? " 

"Hre ve chiah lo.. A thih khan ka hre ve a ni mai" a lo ti leh thliam. 

Sangliana te tan lah han zawh nghek nghek tur awm hek lo. Ringhlel viau dawn pawh nise, evidence an show thei dawn chuang si lo. Tihngaihna a vang ve hle. Rei pawh awm loin an chhuak leh ta mai a. Ephraime chuan ngaihnep hmel zetin a thlir liam.. 

"Nang tehlul khan min man lul lo vang e.. Min man dawn ai chuan awm loh ka thlang zawk" a ti sup a. Kawngka kharin in chhungah a lut ta a. Zanah study roomah tawm lehin phone thar hlak hi pawhdawh atangin a la chhuak a. Sim card thuin a'n hmet vel a. Number pakhat dah lutin, "Ka pu" tiin a save a. Chu number chu a dial nghal bawk. 

A ring ral ral a, a pick up har zèk mai. A tawpa tawpah patling aw ngei mai hian a rawn hello ta a. Chu aw a hriat rual chuan a thisen a lum zawk mai. A awmdan chu a hrethiam chiah lo. A sawi thiam lo a ni zawk. 

"Hello" a rawn ti nawn leh a. Ephraime chuan dam thluam hian, "I dam em? Ka pu" a ti a. 

"Aw dam e.. Tu nge aw" a aw chu a zangkhai phian mai. 

"I tupa " a ti tawi tâk a. Lehlam chu a reh deuh vang vang. 

"Tu ka tupa ber nge, Muana mi aw" a rawn ti a. 

"I fanu Mary fapa ka ni e" a ti zawi raih a. Lehlam chu a reh leh vang vang. 

"Fanu Mary ka nei lo" a rawn tih chuan Ephraime thinlung chu ţèk den ang maiin a nâ a ni. 

"Ni e, i duh loha i hnawl hnu i fanu Mary fapa ka ni" a ti hrâwk a. A thisen zâm te chu a pawng ţâwlh ţâwlh mai. 

"A nih chuan eng nge i duh? Pawisa maw? " a la rawn ti ta dah a. 'Ka nu i vanduai a ni. Hetiang putar sual lutuk fanu i lo ni hi" a ti rilru hial mai. 

"Pawisa chu nang aiin ka ngah. Engmah ka duh lo. Ka nu khan a thih dawnin nangmahni zawng chhuaka a bã rulhsak turin min ngen a. Reiloteah ka la rawn rulhsak ngei ang. Ka rulhdan erawh a dangdai deuh ang. A nih leh le.. Ka pu, lo inenkawl tha ang che" tih leh phone dah a rual nghal. A phone chu a off nghal hmak bawk. Putar biak nana a lei ve ngat kha a nia. 

A kut pahniha a bek dawm chungin a thu ngawi vang vang a. A chet lak dan tur a ngaihtuah pawh a ni mahna le.. A phone a rawn ri thut a, a phu zawk nghe nghe.. 

Jenny a lo la ni zui! A la lo ţep a ni. 

"Hello" a ti bung deuh hmuk a. 

"I va reh ve.. I buai ami? " a rawn ti har har a. 

"Buai chiah lo.. Eng nge ni ta? "

"Ka rawn be ve mai mai che. I ngaihawm em a.. Chuan, ka thiannu te kha thla lehah hian an innei dawn a. Thianah ka tang dawn a, lo kal ve ngei ngei rawh aw" a rawn ti teh daih a. Ephraime chu ri si loin a nui suk. 

"Tehreng mai. A va lawmpuiawm ve.. " a ti ve luam a. 

"Nia, an inhmeh ngawt ang.. "

"Nang pawh nei vat rawh" Ephraime chuan a ti a. 

Jenny chuan pangchang deuh hian, "Ka hmu zo ve lo alawm.. Nangni lahin min be tha duh bawk si lo" a ti nghar nghar a. Ephraime ten zawng tak a ni. Hmeichhia nih vanga inlak no leh tih deuh ngher ngher hi a ngai thei meuh lo. Lisa pawh hetiang mizia a nih vangin a hlat vang vang reng a nih kha. 

"Hei, inleng ka nei a.. Ka dah rih ang aw.. Nakinah kan inbe leh dawn nia" tiin chhuanlam a siam ta ngawt a. Phone a dah rual chuan a thaw hawk. "I thiannu pasal ka ni dawn tih hria la, min bia min be awm si lo va. A pawi khawp mai" a ti zawi raih a. 

Pu Thanliana chuan lo betu number chu a dial ngat ngat. A in off tlat tawh si, kha tlangval kha Mary fapa a ni tak tak ang em? Ni ta se chuan hmuh a duh. Pu Thanliana hi a fanu a tuithlar vangin dem leh sawiselna a tawk fo. An nu nen lah an inkar a zauh phah viau. An nu khan a thih hma khan, "Mami pa, Mary ka va ngai em.. A lo haw leh a nih chuan lawm takin lo pawm rawh aw" tiin a ngen a nih kha. A fanu Mary hi ani pawn englaimahin a theihnghilh ngai bik lo. Mahse, a luhlul laklawh tawh a, a tih tawh chu ti tlut chi a ni. Chuvangin a inlamlet duh lo. Ral khat atanga Mary chanchin a lo hriat te khan hrehawm a ti ve em em, a fapa nen an hmeithai dun tih te leh a rethei hle tih thlenga a hriat phei kha chuan a rilru a thlak ţhelh a nih kha. Shillong maia awm an ni a, zuk hruai dawn se thil harsa a ni lo. Mahse, Pastor aia Hnamdang thlanga amah tizaka mualphoa siamtu a fanu lakah chuan a tlawm thei thlawt lo a ni. A fapa anga insawi khan Mary chu a thi tawh niin a sawi a, engtia thi nge a nih anga, a hun tawp te engtin nge a hman tih a hre chak ngawih ngawih. 

"Rinrin, i nu va ko teh" tiin a tunu chu a tir a. An in bul lawkah an khawsa ve a. Engkima inpawh leh inban buai reng an ni ve. Rinrini nu, Mary chhang chiah Zuali chu a rawn lut a. 

"Min ko mi? Pa" tiin a bulah a va thu a. 

"Hei hemi number hian min lo bia a, Mary fapa angin a insawi a. I ú Mary thih tawh thu leh a thih dawna a fapa hnena a thuchah, a chhungte zawnchhuahsak tura a ngen thu te a rawn sawi a. Ka dial leh a, a in off tlat bawk sia" a ti chuar chuar a. Zuali a meng phawk hle. Rang takin chu number chu a han dial ve leh a. A tlang chuang lo. 

"Awii U Mary fapa chu ka va hmu ve chak em.. Aizawlah hian a awm tihna mawni le" a ti hlut a. 

"A nih hmel e. Ka la rawn tlawh chhuak ang che u a tih kha maw.. A rawn lang vat turah ngai ang" Pu Thanliana pawh chuan a lo ti ve a. 

"Awii nuam dawn e. Chuan pa, i tupa a ni a, a pa chu eng mi pawh nise, i thisen kal zel a ni tih hre reng rawh. I rilru kha thlak vek ang che" tiin Zuali chuan a pa chu a melh a. 

"Ni e, ka tum alawm. Ka fanu duat em em thin fapa chu ka tupa a ni tih ka pawm thlap e" a lo ti ve a. An pafa chuan an kut an invawnsak vawng vawng mai. 

Friday zing ni chhuak chu a ţang tha at at hle. Boruak nuam tak a ni. A harh rualin sana a en nghal a. Friday a ni tih a hriatna chuan a nuihtir sak. Vawiin hi a tan a pawimawh. Zangkhai taka tho chhuakin a intifai a. A zai pah rat rat bawk. A phur thak a ni ber mai. A chhungte pawh an rawn tho ve phak phak a. A nu chuan zawi sapin, "I mood a va fuh ve" a ti zauh a. An innuih ringawt.. 

(Tawk teh se..