Escape 12

ESCAPE.. (12)

Ziaktu: Toni Râlte

(Adds kha min click sak ve thin em? 😢

"In in chhakah ka awm tawh e. Lo chhuak rawh" Ephraime chuan Zovi chu biain a hrilh a. Phone a dah nghal. Chawhma dar 12 bawr vel chiah a ni. Kar loah Zovi pawh chu inchei uchuak si lo, hmuh nuam takin a rawn chhuak a. A confi hah hah hle. Epharime carah chuan lutin, "Ramhnuaia kal kher a ngai lo vang. Lunch kan ei mai dawn nia" Zoi chuan a ti a. Ramhnuai in chu hmu chak viau mah se; hun an khawhral rei deuh dawna a hriat vang a ni. Ephraime pawh chu a bu nghut a. Aizawl tlak lam veng pakhata Restaurant lar zet lam an pan zui nghal. Inbe miah lo chuan an tlan mawp mawp a, Traffic jamah an tang rei leh hle. Ephraime chu a rum hrâwk a, "Hei vang hian alawm ramhnuai ka thlan. Khawpui ţawp lutuk leh plan awm lo lutuk mai" a ti chhuak hawk a. Zoi pawh chuan dik a ti ve reng. Kawngpui a zau tawk loh chu thuhran, motor a tam tawh si, park-na tur pawh an indaih tawh lo lam a ni a. Chuta chhapah kawngpui hrul maiah building an la hung ta dah a. Thaw a ti ippik zual. Aizawl hi a bul atanga rem that a chakawm ngawt mai. Dar 1 dawnah an tum ram an thleng ve hram. Cabin bookin an lut nghal a. A nuam in a thianghlim hle. Waiter fel tak leh zangkhai vahin a rawn zui lut nghal a. An eitur an order zawhah tui sik in in an han inthlahdul leh a. Ephraime chuan Zoi chu a en ngun ngang mai. Zoi chuan mak a ti deuh nge ni, "Dik lo a awm em ni? " tiin a va melh kâwk a. A lo nui hawk, "I mawi" a lo ti thawp sup. 

"Le.. Eng tiang chiaha pawimawh nge ni ta le? " Ephraime chuan a ti dam thlup a. Zoi chuan a kawrchung chu a hlip leh te te a, a kut chu fela taka dawhkan chunga suih atin, "Ka pa nen thil tam tak kan sawi dun a ni. I hriat ve ngei ngei a ngaiin ka hria a" a ti ta a. Ephraime chuan a lo buk khum zauh. Zoi chuan a pa nen an inbiak dan zawng zawng, a pa sumdawnna thlengin a hrilh fai ta leng mai. A pa sumdawnna kha a sawi tel loh chuan an tana Pu Sapliana hnawksakzia kha a rinhlelhawm dawn si a. A sawi laklawh laiin Eitur an rawn dah a, ei pahin a sawi zel a. Ephraime pawn a ngaithla uluk khawp mai. 

"Tichuan, ka bialpa anga ka sawi miau si che avangin ka rawn be ta che a ni. I hrethiam ang tiraw? Eng kawng nge ka zawh ang tih ka hrethiam lo a ni" tiin a tawp a khar ta a. 

Ephraime chu a ngawi vung vung mai. Mahse, a ngaihtuahna a hmang tih erawh hai rual a ni lo. Chutah zoi lam chu rawn hawi lehin, "I pa duhdan chu kan zahsak mai a tha ang. Ka bulah i himin ka ring. Mahse, ramhnuaiah rei tak chhung i khawsa thei ang em? " a ti ta a. Zoi chu a hrilhhai letling, a rin dan chuan, Ephraima chuan inneih a duh loh thu leh an buainaa inhnamhnawih a duh loh thu a sawi a ring a. Chutihrualin puih dan kawng a hriat a beisei tho bawk. Mahse, a rin loh ang takin inneihna lam a hawi ta tlat! 

"Nupa kan ni ang maw? Nge lem kan chang dawn? " a ti he hâw a. 

"Zoi, mipa leh hmeichhia tuma dipdal loha khawsa dun chu rei tak an inhlat theih i ring em ni? Mahse, khawih lo tur chea min duh chuan ka thei tho ang" a lo ti daih. A awmzia chu Ephraime hian nupui atan pawh a duh tihna. A chhungril lawm veng veng vang chuan a zak deuh. Jenny a hrechhuak vang vang bawk. 

"Okay, i remruatna ang apiang ka pawm e. Keimah vanga buaina i tawh theih dan te ngaihtuah lawk vek la, kawng dang i thlang a nih pawhin demna che ka nei lo a nia" Puitling takin a ti a. 

"Kei leh Hectora ringawt chuan ka in khu kan luahlum zo lo va" awmze nei zetin a lo ti thung. Zoi pawh a khi sak mai. 

A uang chak tlat, "Jenny khan a atchilh che sia.. Ka inhmelhriattir ngam dawn miah lo che u a nia aw" a ti sar sar a. Ephraime pawh a khi ve suk mai. "In zia a inang lo deuh e tih thuah lo chuan nang aiin a hmeltha zawk" a ti ve sak. Zoi a tûm nghal bâr. An intawn tirh ai ngawt kha chuan an innelin an inpawh ve ta khawp mai. 

"Chuan, kan inah i rawn kawi lut ve zuai thei ang tiraw? Ka pa nen inhmu ve hrim hrim ula" Zoi chuan a ti a. Mahse, Ephraime chuan a lu a thinsan. 

"Ni rih lo ve. Ka thlah haw che ang a, Sawtah Bawngkawnah ka thianpa hlui va hmuh lawk ka ngai a. Hun dangah i pa chu kan hmu dawn nia.. Chuan, a hun ka rawn sawiah lo inpeih la, thawmhnaw te pawh lo siamsa vek la.. Ramhnuaiah ka bulah i cheng ve ang.. a tha em? " a ti zung zung a. Zoi pawh chuan a lo hnial lem lo. A pa nen erawh inhmu ve hram se a duh hle. A nawr na ngam meuh si lo va. 

A rilru kil khatah Zoi pa chu hmuh tha a ti ve reng. Mahse, amah ruaitu a ni tih a hriat kar avangin nakinah buaina thlentu a la ni zawk ang tih hlauin la hmuh loh law law a duh zawk a ni. A client te nen hian an inhmuh loh a tam zawk mah awm e. Phone atanga indawr theih a nih chuan, Ephraime pawn a thlang zawk zel thin. Mahse, amah ai maha man chhuah hlau zawk a client te an nih thin vangin man chhuah lamah chuan buaina a nei ve vak lo. Eitur an ei zawhah an chhuak zui nghal a. An sawi tawh angin Zoi a thlah zawhah Bawngkawn lama kal tur ang deuh chuan a tlan a. Zoi hmuh phak lohna atangin a target thar ber thli thlai turin Dawrpui lam a pan ta a. A chenna building a thlen chuan chet lak a har dawn tih a hai lo. A chhan pawh a lun mah mah tlat. Idea a haihchham lem lo bawk a, Hector chaw a leisak zawhah lungmuangin a inkhalh haw leh ta a. 

Zoi pawn a pa bulah Ephraime nen an inbiak dan leh an thil tum te chu a hrilh seuh seuh a. A pa pawh a thlamuan hmel ta deuh. Ephraime chu hmuh ve a chak thu te a sawi ve luam a. Pi Lawmi pawh a rawn lut ve a, engkim hre sa ve tho a ni bawk a, a fahrawn mahnise, rei tak lo chengho tawh na nâ na chu inlainatna leh induhsakna chin a lo awm lo thei lo bawk nen, Zoi te thutlukna pawh chu a pawmpui ve hle. 

"Zo, awii enteh, ka hmu asin. Zothanpuia kha. Mahse, ka be hman lo va.. Awiii ka puakdarh leh vek" Jenny chuan a rawn ti hliam hliam a. Khawlaiah Ephraime tlan lai a lo hmu ni ngei tur a ni. Zoi chuan insangmar ţeuh chungin, "A ni maw? Nuam awm bik ve" a ti ve luam a. Sawi tur dang a hre vak lo. An thiltum hi Jenny hian hre phei se chuan an damchhungin an inthianthat leh theih pawh a ring tawh lo hial. Mahse, Jenny aiin a hmasa tlat! Jennyin thudik a hriat hun tur a ngaihtuah chang chuan a táwt up up zel. 

"Chuan, Lawmsanga ka hmu bawk a, naktuk zanah palai an lo leng leh dawn a ni maw? " a rawn ti leh a. Zoi a ner sawk. 

"A niang. Ka hre ve miah lo.. " a ti ringawt a. 

"Zo, enteh, I rilru chu ka hrethiam tho na chungin, Lawmsanga hi nei mai teh. Ka khawngaih tawh letling, a duh dan che hi a khawngaihthlak em mai" thutak angreng fe hian Jenny chuan a rawn ti a. 

"Khawngaih duh suh. Lem a chang mai mai alawm. A thuhnuaia min daha min kaihkual a duh vang alawm hetia min zar chhen" a inrin hmain Zoi chuan a lo ti nghal bawrh bawrh. Lawmsanga hmel a mitthla zawng ringawt pawn a mur uai uai thei. Chutiang em ema mipa a huat leh a ten hi an la awm ngai lo. 

"Mahse, hei chen a tider peih dawn mi? A duh ve tak tak chein ka hria kei chuan.. Bakah i pa ten an duhpui bawk che sia.. Mi hausa nu nih chiah i hmabak tawh aw. Kawrfual erawh ka duhdanin ka thuitir ang" uang zetin Jenny chuan a rawn ti lar lar a. 

"Thuitir rawh.. I ha nguar ang" a lo ti ve nghek. An nuih har har hnuah an inbiakna chu an titawp ta a. Zoi chuan a pa te rooma va dah luh pahin, "Naktuk zanah Pu Sapliana palai te an lo leng dawn a ni maw? " a ti a. 

"Nia, min rawn biak tak kha mawle.. Engpawhnise, ngaihngam takin awm phawt rawh" a pa chuan a lo ti var a. Zoi pawh a thêp suai suai mai. Inbual turin bathroomah a lut ta daih a. 

"Mama pa, kei chu a.. Zomuani hian a duh ngang loh chuan mama nena sawirem ţalh pawh hi thil tha ber a ni dawn mawni le ka ti.. Amah Zoi pawh a zahawm alawm le" Pu Sapliana nupui Pi Teremi chuan a ti chuar chuar a. 

An pa lah chu a tumruh hmel ngang mai si. "I hrethiam lo a ni. A la duh chhawm ve mai ang. Zomuansangi saw kan mo a nih ngei ngei a ngai. A pa kan thunun theihna tur hmanrua a nia, chuvang chuan neih ngei a ngai tlat a ni" Pu Sapliana chuan a ti nghut nghut a. Pi Teremi hian an pa sumdawnna hi a hriatpui ve vek tho a, mahse, tun hnaia mihring ruboa an kál an la thin erawh bansan turin a ti fó! Manchhuahna chance a sang em a tin ni. Nu hmeltha leh hleitling zuah mai a ni a, inchei uluk thei tak, zahawm taka inthuam thin a ni. An veng chhung leh Kohhranah pawh a tlangtla reng a. An hausa bawk nen, nihna leh chanvo hi a nei malh malh reng mai. Tin, amah hi a dam thlup a, thu han zaizap te hi a thiam riau a. An pa Pu Sapliana mawi lohna leh thinramna pawh mawi takin a khuhbosak thiam, chuvangin Sapliana pawh hi mi ten an hmu pangngai chho ta reng a ni. Sapliana chanchin pawh hi a chhuia chhui tham a tling hial. A tlangval lai chuan an veng chhunga misual leh tawrawt ber, pawisak nei lo, insual hrata sawi a ni thin. Chhungkaw rethei tak atanga lo chawr chhuak niin, a pain nuthlawi a fansan ta dah a! A nu hoin a farnu pahnihte nen rethei takin an khawsa ho a. Sapliana lah a tal duhdah nasa si a, a farnu te pawh a dim chuang lo. A nu chu a rilru hah leh taksa hah vang ni maw rei pawh a dam ta lo reng a. A farnu ten pasal an nei ta bawk. Zalen takin a duh duh danin a tal chho a, jail-ah vawi thum a tãng tawh nghe nghe. Mahse, Chutia tal mai mai chu thil tha ber a ni lo tih leh a damkhawchhuah nan eng emaw tih ve a ngai tih hriain, hna a hmuh ang ang te a han thawk ve lawp lawp a. Rui chunga thawh chang nei ta na nâ na chu a thawhna ten an ban chang a tam hle. Hetia a inhlawhna lamah hian vawi khat chu khawchhak mi pakhat nen an intawng ta hlawl a. Amah anga mal tlat ve tho chu lo niin, Sapliana inah a rawn khawsa zui ve a. Tichuan, an thil hriat ang angte inshare tawnin, sumdawnna hlawk zawk leh nawmsak pui theih awm te chu an melh tan ta a. A thianpa chuan khawchhak lama damdawi lak awlsamzia leh tawlhruk hlawkzia te a han sawi takah chuan, chu thil ti tur chuan an inhmin titih ta a. 

Engtin tin emaw vawi khat chu an hlawhtlinpui ta hlauh a. A hlawk miau si a. Zawngchhang loh phal chi ni nghal lo chuan

. tichuan, a aia thuk zawkin an kal ta zel a. Ralthuam lamah pakai lehin nun bul chu an tan leh ta a ni. Kum khat erh awrh an chet hnuah a thianpa chu chin hriat lohin a bo ta hmak mai a. Rinhlelh thilah Sapliana pawh an man nghe nghe. Mahse, a ţang ve tlat si.. Evidence awm ta lo chu an chhuah leh ta ngawt a. Kar khat hnu velah a thianpa ruang chu lui kawr pakhatah tuiin a len chhuah ni maw.. Tui chim chin siah an chhar ta ringawt mai a ni. A thin hnuah vihna hnuhma a awm kalh mai. Sapliana chuan a tuar viau nghe nghe. A thattu an la manchhuak ta lo chu a nia! Mahse, an vengte chuan rin ruk dan an nei ru vek. Sapliana thah a nih lohna chhan tur an hre miah lo. Pawisak a neih lohzia leh an sumdawnna kawngah a hlawk zawk nan chuan a thianpa pawh a phatsan duh ang tih chu an rin dan a ni. An sumdawnna erawh an hre fuh mai thei lo. Damdawi tawlh ru a nih chu an ring fur nain, vawi khat mah man a la tawk lo a ni. Tlangval nupui nei rual fe a nih tawh hnuah Teremi nen hian intawngin, Teremi hian a hmangaih ve tlat mai a. A chhungte remti lo chung chung a nei lui a. An tuithlar titih hman hial a ni. Mahse, thisena inzawm na nâ na chu fa te a neih hnuah an insuihkhawm thar leh ta tho va. Sapliana lah chuan a nun a sim hmak emaw tih turin that a chhuah ve nasa mai a. An makpa chu a tirah duh lo viau mah se; sum leh paiah chuan a vurtu ber a lo ni ta zawk a. Teremi chhungte lam chuan an pawm hmin chiang ta hle a ni. Teremi hi a fing bawk a, a pasal zia a hrechiang bawk nen, enkawl dan a thiam hle. A hliahkhuh zung zung a ni ber e. Chu chu Sapliana chanchin tlangpui a ni. An nu zara pangngai chho, mi zah kai ve a ni chauh zawk. Mahse, a ze hlui a nuna bet tlat tawh kha chu chuti maiin a reh hlen dawn lo. Khatia inneih dawn aruaia Zoi a han bo ta mai te kha a thinrim em em a. Zai a dawh hram hram zawk a ni. Amah ngeiin Zoi chu zawn chhuaha khawlaia hnuh hawn hawn a chak takzet. A fapa hian a duh ve hluam hluam bawk si a. Mahse, hmanni lawka a fapa nen an inbiak khan a rilru ang chiah a fapain a lo pu tih a hriat khan a thaw huai mai. Lawmsanga'n, "Ka pa, Zomuansangi hi chuti tehluain ka duh hran hleinem. Khatia min hnawla a tlanbo vel atang phei kha chuan huatna hlirin ka khat tawh. Mahse, neih ngei ka duh. Ka thuhnuaiah awm se; ka duh duh dana nghaisak ka châk a ni.. Ka nupui a nih tawh miau chuan a tan chet lak a rem dawn si lo va, phuba lak nan ka nupui a nih a ngai" a ti a nih kha. Chu ngei chu Sapliana rilru pawh a ni. Mahse, Zoi a mo nihtir a duhna chhan ber erawh a pa Pu Liantâwna kut phuar a duh vang a ni. Liantawna hi a lian chak a, rilru a nei riau bawk nen, thuihhruai lah a ngah ve phian bawk a. Nakinah kawng dangah pensanin ama pualin sumdawnna a la kalpui ang tih a hlau lawk tlat! Engtik lai pawha Liantâwna boss nih a duhna chuan Sapliana rilru a hruai khawlo zo tawh a. Zomuani chu hmanraw tha ber tur a ni tih a hai lo. Kan Zomuansangi hi hmanrua mai mai ni tur chuan a duhawm hret a ni. 

Lawmsanga farnu a rawn haw a, tui a in khawlh khawlh hnuah, "Vawiin chu U Zoi leh mipa pakhat ka hmu a. Restaurant-ah an lo chawl ve a. Cabin an book sia, an inhuat loh hmel tawp" a ti ta sar sar a. Lawmsanga phone khawih lai pawh a tawp chat mai. 

"Mipa chu eng ang hmel pu nge? " a ti vat a. 

"Lian deuh mai, ngo lam, sam buk ve deuh. A hmel chhe lo.. Mahse, ka hmu chiang vak lo va" a lo ti niah niah a. 

"Aa.. A cousin a niang. A lo zin dawn a tih tak kha.. "Lawmsanga tlawm la chuan a ti a. Sapliana erawh a meng ralh ralh thung. Lawmsanga rilru pawh a nuam chiah lo. Zoi hi a hriat theih chinah mipa dang nen a hmuh awm pawh a la hre lo. A thian mipa te emaw an dawra thawk te emaw nena han inbiak lumlam vel te chu thuhran a nia. Heti taka inneih a duh loh chhan hi bialpa nghet a lo neih ruk reng vang a ni maithei tih ngaihtuahna chuan Lawmsanga chapona chu a khei ngawr ngawr a ni ber e. Mahse, engmah a sawi zui lo. 

"Hello, Pu Zai, ka tum dan ka thlak a. I hna kha ka thawhsak theih che ka ring. Tunah hian sum ka mamawh thut a.. Mahse, kan pahniha sawi dun leh thain ka hria" Ephraime aw chu a hniam ruih mai. Lehlam ami chuan, "A va lawmawm dawn ve aw. Jerome ai chuan i rintlak ngeiin ka ring. Mahse, tunah chuan a khirh maithei. In lamah an la inenkawl tlat mai a.. " a rawn ti a. 

Ephraime chuan a zial zuk lai pák khu tulh tulh chungin, "Chutak chu kan pahniha hmaichhana sawi dun ngai ka tih chu a ni. Kan inpuih tawn a ngai maithei.. Ka inah inhmu mai ang hmiang. Sawrkar uisathiam ten min veh ve reng si a, min hmuh dun zawngin a fel lo palh ang? " a ti zang vah a. 

Pu Zaia chuan, "Aw a tha mai alawm.. Pawisa pawh a cash-a i duh chuan ka rawn keng nghal thei tho a nia. I address lo sawi la" a rawn ti a. 

"Pawisa chu ka thawh zawhah le.. " tiin a in awmna lai leh a lo hmuahna tur hmun te chu a hrilh zui zat a. An titawp ta. Ephraime rilru a kal thui ve viau. Mi nunna hmangin a sumdawng a, thisen a chhuah tam poh leh sum a ngah. Mahse, a hlim tak tak ngai lo. A tir kha chuan pawisa a mamawh vang liau liau a ni a, a rei zel a, a nu ba rulh nan a eizawnna chu a la tangkai dawn tih a hre ta zel nen.. A duhdan tak chuan mizoram lama eizawn hi a tum bik lo, mahse, Shillonga officer pakhatin a thianpa mizo hnenah Ephraime card hi a lo pe hlauh a. Khata tang khan a inhnamhnawih lo thei ta lo a ni ber. A nu mizo a nih vang pawhin mizo thisen chhuah chu nuam a ti ngai hauh lo. Mahse, a nu bâ erawh rulhsak a la tum fan tho. Tunah pawh hian amah rawih tumtu hmasak zawk chal darah a silaimu a lut leh dawn chu a ni si a! Pu Zaia chu a tan mi hnawksak a ni lo. Zoi pa tan erawh nun tinuam lotu a ni miau si a. Zoi pa ni ta lo se, a thawh duh kher a ring lo. A tan Zoi chu a va pawimawh ta si êm.. Tin, Zoi pa tan hna a thawh loh chuan engtikah emaw Zoi chuan a pa a la sûn ngei ngei dawn tih a hria. A pa chu a tet lai bakin a hmu lo va, a awm leh awm lohin awmzia a awm lo. A nu erawh kha chu a kulhpui a ni a, a tan hmeichhe pakhat ni kumkhua tawh tur a ni. Chuvangin fate tana nu leh pa chân natzia a hre tawh.. A tana pawimawh Zoi'n a pa a chân tur chu a ngaingam meuh lo a ni ber. Jenny pawh kha a ruk tak chuan a zah! Ninawmin tibuai sek mah se;a pa thlarau a zahsakna avang pawhin tawngkam mawi lo takin a chhang let ngai lo.. Pu Rualkhuma a dah bo kha a eizawnna kawnga a la inthiam loh ber tum a ni hial awm e. Mahse, inchhir a sawt tawh si lo. A hming chuan Christian a ni, Catholic a ni a. Mahse, a tawngtai ngai lo! Sual puanna pawh a nei ngai hek lo. Biak inah hian a nu dam lai pawh khan a lut khat hle. A nu tak pawh kha a ni ve tho, in lamah hunserh an hmang nufa mai zel a. A nu kha chuan tawngtai a thlahthlam ngai lo. Ani erawh chuan tawngtai dan pawh a thiam lo va, Pathian hi a awm tak tak leh tak tak loh pawh a hrethiam lo. Bible a nei ve a, a chhiar ngai lo. Engvang ber nge tih hriat lohin Pathian chu a do ru tlat a ni. Ani pawhin a chhan a sawithiam chuang lo ang. A nu leh pa inneih loh vang nge, a nu retheih lutuk vang nge a thihsan vang.. Engmah a hrethiam lo. Mahse, Pathian hi a ngaina lo tih chiah a hria. 

Jenny msg chu a chhiar a, a awmdan a danglam hran lo. "Ka hmu leh châk che e.. Enteh maw, ka thiannu khan pasal a nei maithei a, mo thianah ka tang dawn sa a, lo kal ve rawh aw.. " a rawn ti a. Zoi chungchang a rawn sawi tih a hria. 

"A ni maw? Ni e, ka lo kal ang". Tih zawngin a reply. A thawntu tan hi chuan a tawi mah mah zel a ni. Mahse, Jenny chuan a biak thulh phah chuang lo. A lo reply ve zel avang hian beiseina a nei sang a ni mahna le.. Nula mawl tak a ni lo asin le aw. Duhna hian mit a tidelin bengte thlengin a tingawng thei a nih dawn hi. 

Zoi erawh a reh hmak. He nu mize mak leh induhtawk lutuk hian a hîp ve em em chu a nia! Jenny leh Lisa te anga mamawh huam huam anga a lang ngai lo chuan a ti hlu tlat a tin ni. Ephraime pawh chuan a be lem bik lo. Pu Zaia hi a chingfel phawt ang a, Zoi ruk bo hna a thawk leh dawn a ni. A suangtuah rual chuan mipa ta na nâ na chu a zauthau ve deuh. A inthing harh a, inbual turin a inbuatsaih ta daih. 

Lawmsanga palai te chu tha takin an lo dawngsawng a. Zoi erawh roomah a tawm daih. Lo thut ve kur kha thil mawi pawh va ni suh. An han sawi chho tan a, engkima inbe rem tawh sa an ni a, thil harsa a awm hran lo. A hun leh ni ruat that kha a ni mai. A rang thei ang bera tih Lawmsanga te lamin an duh bawk a, Pu Liantawna te pawn hnialna an nei bik lo. A hun atan thla thar ni 5 an ruat ta. Kar hnih chang chang hun an la nei tihna a nih chu. A hma khan a thuam chhawm tur an lo lei sa vek tawh bawk a, thil danga han inpuahchah chiamna tur a awm lem lo bawk a ni. Palai te pawh hlim takin an kir ta a. Zoi pawh a rawn chhuak ve nghal, a nuin an inneih hun atana an ruat hun chu a sawi a. 

"Ni teh se.. An hrilhhai leh ang chu aw" Zoi chuan a lo ti hlak. 

Pi Lawmi chuan, "Awii mahse, fimkhur hle teh u. An fing pafa si a, an lo mitmei ru reng tawh maithei che a nia. In kal dawn hunah pawh engtin emawa tih ve deuh chu a ngai ang aw" a lo ti a. A sawi dik reng. Sapliana zia an lo hre ve tawh si a. 

"Nia, a ngai. Amah Ephraimea'n a ngaihtuah thiam leh mai turah ngai ang" Zoi chuan a ti a. 

A nu bawk chuan, "A thlalak tal pawh i nei lo mawni le.. Mahni makpa tur hmel êm pawh la hmuh loh chu" tiin a nui deuh a. Zoi chuan, "Ka mawl ngawt mai. Hman zanah kan intithinrim a, kan thlalak zawng zawng ka delete vek alawm. Thinchhiat lutuk hi chu a pawi. Lungngai suh, kan inruk dawn niin in in hmuh theih dan tur rem kan ruat dawn nia" a ti sar sar a. Hniak phawi eih lo va dawt a sawi chu a inthlahrung ve reng. Tihngaihna awm hek lo le.. 

Pu Zaia car chu a rawn tlan tar tar a, Ephraime chuan a lo nghak ran mai. Pu Zaia pawh Ephraime a hmuh chuan a ding a. 

"I car chu hetah hian dah mai rawh. Ka carin kan chhuk mai dawn nia" Ephraime chuan a ti ta tlat a. A bangbo angreng viau. Thuawih takin a car chu a park tha a, Ephraime carah chuan a lut ta a. Ephraime in lam pan chuan kawngpui atang chuan peng thlain 2km dawn an tlan hnuah gate an pawh ta a. Pu Zaia chu a hawi nasa ngang mai. 

"I va remhre em.. He lai hmun nuam lutuk a in i han nei mai hi.. Tiang hi lawm ka duhthusam thin" a ti hlut nghe nghe. Ephraime chuan nel leh ngainat loh hram a tum ngar ngar. A khawngaih pawh a hlau tho. In chhungah an lut a, Living roomah inhmatawnin an thu ta a. 

"Englo ania.. Nangmah ngei hian Pu Liantawna chu biain, sumdawnna chungchang sawipui tum ta la.. Chet kan la thei maiin ka ring" tiin Ephraime chuan bul a tan a. 

"A dik viau mai. Inah sawn a tawm deuh tlut rih bawk sia tiraw.. I hna i thawh theih dawn phawt chuan kan be mai aniang chu" Pu Zaia pawh chuan a lo ti ve a. 

Pu Liantawna a tana a hnawksakzia leh an bungraw chah pawh a lo danchah zel thu te a sawi bawrh bawrh a. Ephraime chuan Pu Zaia titi bawrh bawrh a hmuh chuan, a tum dan a thlak ta. Silai hmanga thah chu a na mah mah dawnin a hria a. Hahdam taka a kal theihna tur ruahmanna a siam ta zawk a ni. 

"Coffee in ang aw" tih leh va chhuan a rual nghal a. Coffee tak ngek ngawk nen rawn pheiin a khi sâng mai. Pu Zaia pawh chuan tui ti zetin a lo dâwt khulh khulh a. A ţawng pah reng bawk. 

"Nakinah te pawh kan la inmamawh tawn zel ang a. I awm a, ka muang suai suai a nih hi" a ti huah huah a. Coffee a in zo, dawhkan chunga a va dah tur chu a ban chu a zawi thut nge no chu a thlauh ta a. "Aw khaih" tih paha chhar a zuk tum chu chhuatah a tlu zui nghal. Mutchhuah hmel lutuka meng diar diar chungin, "Eng nge awmzia? " harsa ti zetin a rawn ti a. No rawn chhar pah chuan, "Ka tihpalh.. A ţul tlat a ni" Ephraime chuan a ti sup a. Pu Zaia chu vawi khat rawn thaw leh hawkin muangchangin a maimichhing a. A zal ta riai riai mai. A mar a va dek a, a phu tawh lo. A awlsam viau naa.. Ephraime chu a insangmar ţeuh mai. Pu Zaia phone chu phawrhin, an inbiakna zawng zawng chu a delete ta vek a. Glove a bun vek bawk a, a kut hnu an hmu em lo vang chu. Khua a tlai tial tial a. Thimhmul awm velah Pu Zaia chu paw chhuakin carah a dah lut a, kawngpui thleng a han phur chho. Pu Zaia car chu hawngin Pu Zaia chu a dah lut a. Amah chuan car chu khalhin a inher pawp a. A in atanga hla ve tawk tak a thlen chuan a ding a, kawng thlang lam awih vut chu a zuk bih zuai a. Car chu tinung lehin a theihtawpa nain a nawr ta a. A rit kher mai. Mahse, tlema kawng chu a hniam deuh vangin a lir ve thei mai. Chutah awih pangah chuan a nawr liam thei ta. Kea a car awmna lam pan lehin a kal rei kher mai. A lo kal hla hman mah mah a ni. Zan dar 9 bawrah a in chu a thleng ve chauh. A thlan hluam a, a ril a tam kher mai. 

Dawhkana a phone chu lain number pakhat a dial a. 

"Hello" a rawn ti hniam raih a. 

"Ka zo fel e. " a ti thum chhak. Lehlam ami chuan, "A lawmawm e.. Pawisa ka rawn transfer nghal ang e" a ti a. An dah zui nghal. 

Zoi chuan a msg dawn chu muangchangin a hawng a. 

"Friday tlai dar 3-ah.. " tih chauh hi a lo ni. Mahse, a hrethiam tho. A khi sak a, "A tawpa tawpah chuan" a ti ta sap a. 

(Sunday a ni bawk a. Tlem deuh mai rawh se aw.