Escape 11

ESCAPE… (11)

Ziaktu: Toni Râlte

Zomuansangi chuan Ephraime msg chu a chhiar nawn leh thin a, a ner nâng mai. A chhungrilah sawifiah thiam theih miah lohin nâ a awm bawk. Ephraime hian a ti tak tak nge a tilui tih a hrethiam lo. Ti tak tak ta se, A thiantha ber nen inngaizawng ta se.. A ţhu hlawl mai. A hui pap a. 

"Khanglang chuan a! Ani ve mai mai hian min tina lo vang" tiin a phun sap a. A mu leh chawrh. Chunglam a melh vang vang a. A phone chu hmet eng lehin, "Tehreng mai. In inngaizawng nghalah ngai rawh. Ka pasal neih niah in lo kal dun dawn nia" tih thu chu type-in Ephraime chu a thawn ta a. Phone chu dahin a in lukhup ve hmak. 

Hectora bauh ri in a tiharh a. Zing dar 5 a ri chiah. A thawh than tawh vangin a harh nghal vâk mai. A tho a, khum a siam zui nghal. A thawmhnaw a thlak a, a tih fo danin exer la turin an inzui chhuak putu leh ta a. Thlan tla hliam khawpa an work out hnuah in lam panin an inzui phei leh a. Tui te lumin eirêl a buatsaih nghal a. Kar khat chhung vel inah a tawm dawn bawk a, chawhmeh pawh a fridge-ah a khat hnûr mai. A phone a en chuan a khi sak. Zovi msg avang chuan. Ama hriat tawk lekin, "I la na a nih kha.. Duhawm lutuk" a ti sup a. 

"Tehreng mai. Ka inah lo la hruai la a tha ang. Nang angin a virgin tawh awm si lo va, ka khawih chak riau" tiin a reply ve hmak. An chet dan chu a naupangchhia angreng. Mahse, a nuam reuh phian lawi si ang. Eirawng a bawl zawhah a inbual sar sar a.. Zing dar 8:30-ah tukthuan a ei a. Mahni chauh hi chuan ei tam a lo har ve bawk a ni. A ei tam fahran lo hle. 

Nileng deuhthawin lehkhabu a chhiar. A muhil zeuh zeuh bawk. 

Zomuansangi chu Ephraime msg vangin nilengin a mood a off thung. Jenny chu Ephraime nen an inbiak dan hrilh ta se, "Engtin nge a number i neih? " a lo ti dawn si. A rinhlelh a hlau a, ngaih loh lamah te pawh a lo ngai thei. Mahse, a thiannu ngawih ngawi chu a thîk tan der tawh. He inngaihzawnna kawng bumbohzia hi chu aw, thiante pawh min hmelmaktir fo a, laina min hlattir fo bawk. Mahse, sim a harsa fun bawk si. A pa pawh a zia sawt viau mai. 

"I pain biak lawk che a duh a. Va hmu lawk rawh" a nuin a rawn ti a. A pawimawh hmel kher mai. Lawmsanga chungchang bawk a nih a rin vangin a phur fahran lo hle. Mahse, khatia a pain tawhsual a tawh khan a pa a lo hmangaihzia erawh a hrechhuak. A hma chuan a nuhrawn vang pawhin do chang a nei thin.. Mahse, a pa khan thihsan ta se, a nunkhaw hman zel dan tur chu a tluan a ring vak lo. Chuvang chuan a tan chuan a pa chu a hlu takzet a ni. 

"Pa, min ko mi? " tiin khum bul chair-ah chuan a thu a. A pa chu a lo thu mu a, a hmel hmuh pawh a hahdamthlak hle. 

"Umm.. Thil kan sawi dun a ngai a ni.. " a lo ti sap a. 

"Sawi la" zangkhai thei ang berin a ti a. 

"Lawmsanga hi i nei duh ngang lo em ni? " tiin bul a tan phawt. 

Awlsam zetin, "Aw ka hmangaih theih tur mipa a ni lo" Zoi chuan a lo ti nghal hmiah. A pa chu a rum nghut a. Thinrim hmel erawh a pu lo. 

"Anih i bialpa chu eng ang mi nge? Sangliana sawi hmangah ramhnuaiah amah chiahin a awm niin ka lo hria a, chhungte a nei ve lo em ni? " a ti leh a. 

Zoi chuan a chil a lem khawlh. Ephraime nen an inbiakna te a ngaihtuah chhuak a, bialpa tia sawi chi a ni lul lo. Mahse, a pa te bulah chuan a bialpa anga a chhal a ngai tlat si a. 

"Aw.. Sumdawng a nia. Bungrua vel lam a khawih thin. A nu a boral tawh a, a pa hi chuan nupui a nei tawh a. A pi leh pute in atangin a indang ta a ni. Mi puitling tak a ni a, sum pawh a ngah viau ang".. A ti ta tawp a. Ephraime chanchin a hre thui viau lo si chuan dawt a sawitir lo thei lo. 

"A va rawn kal ngai lo ve".. A pa chuan a ti leh khauh. 

"Nia, Lawmsanga nen kan boruak vang hian nuam a ti bik lo va, a zah ve bawk che nen.. A lo kal hreh a ni" dawt var bawk a sawi leh ta. 

"Zovi, Lawmsanga nei la ka tih chhan hi an sum leh pai leh kan sumdawnna vang lam ai mahin thil dang inphum ru a awm vang zawk a ni. Chu chu loh theih loha ka sawi a ngai dawn ta a nih hi.. Ka fanu i ni a, i nu kha ka hmangaih em em.. Ka fa dangte ka hmangaih lo ni lovin nang hi chu ka tan i hlu zual bik a. I hreh chung chung leh i duh lo chung tirh luih che hi nuam ka ti reng reng lo. Ka khawngaih em em zawk che. I pa hi nunrawng lutuk tia min hriat loh nan ka thuruk ka hrilh dawn che a ni.. ". A pa chuan a han ti tè tê a. Zoi chuan a lo melh reng ringawt. A pa chu tar ta sawt hian a hria. 

A aw chu thian leh kharh kharhin, "Lawmsanga pa Pu Sapliana saw ka sumdawnpui a ni satliah lo va. Engkim bul tumtu leh a lú ber a ni. Amah avanga sumdawnna tenawm taka zuang lut ka ni. Tuna kan dawra bungraw zawrh te saw chu ka sumdawnna tenau leh ka inphenna mai mai a ni a, a pui ber zawk erawh a rûka kan sumdawnna hi a ni. Chu sumdawnna chu a tirah chuan ralthuam tawlh rûk a ni a. Kan duhâm zel a, no 4-ah kan kai chho a. A hlawkna kan tel fê chung pawhin duhâm hian chinlem a lo nei si lo va. Human traffiking lam thlengin kan inhnamhnawih chho a, mahse, tual erawh kan that ngai lo. An kal (kidney) hmangin kan sumdawng a nih deuh ber mai chu! Mahse, hei erawh kan kalpuina a la rei lutuk lo. A risk a sang ve bawk nen. Remchangah bak kan che chhuak meuh lo a ni. Hmanni ka zin pawh kha meeting pawimawh tak vang a nia, tun hnaiah kan sumdawnna hrûla kal ve pawl pakhat an awm a. Chung vel chingfel tur chuan meeting kan ko kha a nia. Khati kha ka ni leh ta si a. Heng ka sawi duah chhan chu Pu Sapliana nen a inkaihhnawih vek vang a ni. Lawmsanga'n a ngaizawng che tih a hriat rual khan neih che an duh thu leh sumdawnna lamah pawh kan inlungrual zel theihna hmanrua a nih a beisei thu a sawi a. Lawmsanga zia hi ka hrechiang ve bawk a, i duh kha ka ring lo reng a. Chuvang chuan aw pawh ka pawh duh lem lo. Mahse, Lawmsanga zek zawk hi a pa bulah zualkoin a nawr tlut tlut a niawm a. Pu Sapliana chuan min nawr ve ţan ta. An fapa neihchhun tan chuan a lo inhuam thui khawp mai a. 

A vau thlenga min vau tak vang ania, i thu pawh ngaichang lo va kan inrem tak. I nu hi chuan a hre ve a. A hlauthawng ve em em tho. Engkimah min daikhalh hneh si a, kan sumdawnna document thenkhat te chu evidence atana a hman tur thu te, pawisak a neih lohzia leh kan nunna thleng pawhin a tawrh theih thu te min chham khum reng takah chuan kei pawh ka hlauthawng a ni. Ngaihtuah teh, Kohhran leh khawtlangah pa rawn leh zahkai ka ni ve a. Rawngbawltu thlenga hlankai ka ni ve tawh nen, Pu Sapliana hi a duh ang takin che ta se hmingchhiat leh mualpho chu ka tuar thei mahna. Ka nupui fanau te thlenga in tuara in zak ve tur hi ka hmuh theih ka ring lo a ni. Chu chu ka buai rukna ber a ni. Khatia i tlan bo te kha zep nâk emaw ka lawm ru hial a, police pawh ka pun duh lawk lo nghe nghe. Mahse, Sapliana bawk chuan min nawr leh et et a. Police pun lo thei loin min siam leh ta a nih kha.. 

Zovi, inngaihtuah la, kei chuan i hmangaih miah loh leh i huat em em i damchhunga i pasal a ni tur hi ka duh bik lo. Chuvang chuan i bialpa nen plan fel tak nei u la, zawn hmuh mai theih lohna turah tlan dun mai r'u. He lam chu ka lo chingfel thei mai ang. Tin, ka chungah an ţuan thei lo bawk ang. I thu thu aw" Pu Liantâwna chu a khuh bawrh bawrh a. A ţawng nasa deuh nge a tui a hal hle ni tur a ni. A in khawlh khawlh mai. Zovi chuan a pa chu a melh tlawk tlawk ringawt! Chutiang taka a pa sumdawnna lo ţawp chu mak a ti takzet a ni. A rin phak bak a ni. Ni e, a chang chuan an sum ngah leh an awm thei lutuk chu rinhlelh chang a nei ve lek lek thin a nih kha. Mahse, Khaw pathumah sumdawnna an kalpui a, lian ve tur chu an nia lawm tiin a ngaihtuah mai zel. A pa a han inpuang ta chuan a tihrilhhai kan ti dawn nge, tawng mai nachang pawh a hre lo hial a ni. 

"Zovi, eng emaw tal sawi ve la" a pain a rawn tih takah chuan, "A.. Ih, a mak em mai" a lo ti bah nak a. A pa chu a zak nge a kun chhal a. 

"Englo, nia.. Lawmsanga hi chu ka nei duh ngang lo a ni. Ka bialpa chu ka lo be dawn nia. Keimah vanga kan chhungkua leh nangin in tawrh hi ka duh reng reng lo. Tihngaihna ngang a awm loh chuan ka nei mai ang" Tlema inringtawk deuh hlek hian a ti ta a. 

"Lawmsanga bulah i hlim ngai dawn si lo va" a pa chuan a lo ti khauh. 

"Hmeichhia chu kan inadjust thiam alawm.. Nitin zantin ka mutpui chu ka la hmangaih ve maithei asin" nui chungin Zovi chuan a ti a. 

"Engpawhnise, i bialpa chu be phawt rawh" a pain a tih chuan a bu nghat a. 

"Ka va be nghal ang e. Chuan dam vat rawh aw" tiin a nu dam laia a tih fo angin a pa biangah a chuk zeuh a. A chhuahsan ta a. A rilru erawh buai tak a ni. Ephraime chu a bialpa a ni lo phawt! Jenny lahin vei taktêin a vei mêk bawk. Ephraime lahin neih a tum hmel si loh. Eng nge a tih tak ang le.. Khumah a thu ran a. A phone a hum rauh rauh. A call tawp mai dawn nge eng chu nge a sawi chuan ang? A ina chen a dil rih ang nge.. Mahse, Pu Sapliana khan rawn zawngin Ephraime thlengin tuar dawn ta se.. Police lam lahin an lo ringhlel sa tawh bawk si. Amah vanga mi dangte nunna thlenga a derthawn chu a duh bik hauh lo. A pa hnenah pawisa dilin Shillongah chuan a chhuk law law zawk dawn em ni ang? Mahse, a pa chuan a bialpa chungchang a zawt leh ngei awm si a. Ngaihtuah tur a va tam tak. A insum thei ta ngang lo va. 

Ephraime number hmet chhuakin call a tum ut ut a, mahse, whatsappah a lut leh ta zawk a. 

"Inbiak kan ngai. A pawimawh" tih thu hi a hnutchhiah ta a. 

Jenny chu an in chung zawlah a tei rak rak a. Boruak a nuamin ni pawh a tla lek lek tawh. A phone chu a en zauh zauh bawk. A duh ang chhanna a hmu thei lo chuan a tithinur ţeuh a. A ner leh nâng thin bawk. Kha pa vawikhat chiah a la hmuh khan a thinlung a ruksak a ni. Tiang em ema mipa vei hi a la nei ngai lo. Kum 30 a tling dawn tawh a, nula naupang tak a ni tawh bik lo. Ama tawkah confi leh induhtawk ve tak a ni. Ngaihzawng pawh a nei ve nual tawh. Nula thianghlim lah a ni tawh hek lo. Kha pa Zothanpuia a hmuh atang khan mipa dang reng reng chu an tla nghal vek ni maiin a hria. Va biak sek chu ninawm a ti ang tih a hlau ve si. A beisei ang he huin a rawn be tha ve vak bawk si lo va, mahse, a be chak ngawih ngawih tho si. Awmngaihna a hre mang lo. A pa an sún boruak a zia chho va, mahse, ani hi chu an unaua upa ber leh nu leh pa thachhang dawltu a ni bawk a. A pa thihna tuar bertu te zing ami a ni. Mahse, Zothanpuia vangin a pa a sún tih pawh a theihnghilh ta fo mai. Inbunruah vak a chak a, Zovi bula inhrikthlak a chak. Ani Zoi lah Lawmsanga vang leh a pa tawhsual tawh vangin a buai ve bawk si, a inthlahrung. 

A phone riin a tiphu zawk. Amah leh amah chu a innuih a. A phone a en chuan a ex Zorama a lo ni. Ner nâng chungin a pickup ve hram. 

"Nichin mai khan ka lo thleng a. Zanin chu ka lo leng dawn aw" ngam tlak zetin a rawn ti ham ham a. Zorama hi a bialpa tawhtea a duh ve ber leh an inthen hnu pawha a la biak ve awmchhun a ni a. Zothanpuia rawn lang lo se chuan bul an tan leh mahna. Mahse, hmakhalhtu a nei tawh tlat. Mumbai-ah a zin a, thil eng emaw tak a rawn hawn leh ngei pawh a ring. 

"Aw le.. I rawn tluang maw? " hawihhawm chhuahin a lo ti ve a. An tluan thu te sawia eng eng emaw an sawi luam hnuah phone chu a dah ta a. 

Whatsapp-ah lut nghalin Ephraime numberah bawk a lut leh ta. Sawi tur a hre lo hle. Mahse, "Chaw ei tui aw.. I reh si" tih thu a thawn a. Ni pawh a tla fel ve chiah, ani pawh chu in hnuai lamah a chhuk thla ve ta a. 

A hâm bai bai a. A lehkhabu chhiar vang ni maw a mit chu a thial urh mai. Eirel buatsaih turin a tho a. Zovi vangin buh pawh a ei a ei ve ta kha a nia. Zikhlum la chhuakin a chhum a, vawksa chu lian zet zeta chanin fry turin a sawngbawl bawk. Chu zawng chu a zanriah tur a ni. Mipa mahnia awm bawk tan chuan eirawngbawl seuh seuh chu a ninawm ve ngawt ang. Mahse, chaw nghei tih vel hi a duh vak lo. A ei chak vak loh paw'n ţam hnem tal tlem a ei thin. Zu hi a in nasa lutuk lo va, a nu thih hlimchhawn lai khan a tlan nasa. Tunah chuan chintawk a nei thiam ta deuh. Englai pawn a kawl reng tho naa a in reng lem lo. Zanin erawh a châk ve deuh nge zanriah ei hmain no hnih a in ve khiah a. Chaw ei titui tawk lek a ni bawk a, a rin aiin a ei tam. A lawm viau. A intihfel hnuah thut hahdam pahin a phone chu a han lek ve a. Whatsappa a luh chuan, Lisa, Jenny leh Zovi te msg a lo tlar thla ţhât mai. Zovi chu a seen hmasa ta ber. A pawimawh hmel hle, eng tak ni ang maw. 

"Naktukah ka rawn hruai ang che. Ka inah kan sawi dun thei ang" tih thuin a reply ve a.. Jenny msg pawh, "Ka eitui khawp mai.. Ka lawm e" tih thuin a reply. Lisa erawh seen pawh a seen sak duh lo. 

A nu chhungte tlawh chhuah pawh kar thar atanga ţan a tum kha a nia. Police lamin an enthlak deuh reng vangin tun tut tuta chet lak chu a hun rih lo tih a hria. Chuvangin amah rawih tumtu te pawh a lo hnar reng a. Chawlh hahdam a mamawh ve a ni. Zovi chuan eng thu tak sawi tur nei ang maw? A pa chungchang te a ni thei ang em? Nge an pahnih inkar lam ni zawk ang. Zovi hmel, a nui sen sen hmel chu a mitthla a. A khi suk. Nula hmelchhe tak zawng a ni lo chiang a ni. A mawngbawr khal leh chhing lah te, a hnute lian over lo, mahse, khalh tham ni si te kha.. A lu a thing nur nur a. "He nu te reuh hi" tiin a phun leh hluk. A nu dam laia a bialnu a duh ve em em, Amelia a ngaihtuah ta daih a. School khatah an lut ho a, Amelia chu amah aiin a pawl sang zawk. An schoolah chuan a lar hle a, a chhan chu an hausak leh hmelthat vang a ni. Ani pawhin a lo ralkhat star ve thin. Hmeichhe ria chum bat, ti nung leh vun nung sar mai a ni a. Biangsum a nei bawk. Nuih a duhin mi ngainat a hlawh em em a, an hausakna avanga han inlakna leh chapona a nei miah lo chuan híptu a ngahtir ve bawk a ni. Ţum khat canteen-a a chawlh laiin Amelia leh a thiante chu an lo lut ve a. Dawhkan awl a awm mai tawh si lo va, Ephraime chu an rawn zawm ve a. An titi siam siam a, Ephraime eraeh a ngawi reng thung. Amelia a va melh chuan a rawn melh ve kiau a, pawisawi lo tak a ni. An mit chu an la let rang ngei mai. Kha ngei kha an bultanna a lo ni. A tuk tuk lehah Amelia thiannu Dorisi'n a haw dawnin a rawn bia a. "Amelia nunah i lian hle" tih thu a sawi tel. Ani lawm lutuk leh hamhaih lutuk chuan chhan ngaihna a lo hre lo. Tichuan, number te an inneihsak tawn ta a. Phone kaltlangin an thinlung thu an puangchhuak ve thin a nih kha. Khatih lai kha chuan an la naupang bawk a, inngaihzawnna thianghlim tak a ni. An inngahzawn chhung khan vawi 2 chiah an infâwp ve. Amelia fawh nawmzia kha.. 

Thla hnih awrh an inzui hnuah Amelia chhung ten an lo hre ta a. A pa ngeiin rawn len chilhin, an chhungkaw dinhmun inthlauhzia leh an ni nen chuan inlaichinna an nei thei lo tih tlang takin a rawn hrilh ta a. Ephraime hi a nu anga luhlul ve tak a ni bawk a. An hausakna chhuanga rawm rap bettu hnenah chuan, "Ka pu, i fanu i thunun theih phawt chuan kei chu englai pawn ka kalsan thei e" tiin a lo chhang ngat a nih kha.. Ni e, Amelia chu kum laklawhah a zirna sawn sak niin hmuh tur a awm ngai ta lo. Tichuan, an tawp hlen ta. 

A lo muthlu sek nge ni a phone riin a tiharh a. Inthing nawk nawk chungin a la a. 

"Hello"

"Amos a ni em? " lehlam ami aw chu patling aw a ni. 

"Aw ni e"

"Hna min thawhsak turin ka duh che a ni" a rawn ti thum leh dút a. 

"Chawlh ka la rih asin.. "

"I hlawh thin let hnih ka pe ang che. "

Ephraime tan chuan hnar mai a har ve tlat! 

"Eng thil nge" a ti ta nge nge a. 

"Hmanni mai khan thah tuma min vehtu ka nei a. Mahse, ka damkhawchhuak thei hlauh a. Min thah tumtu kha pa rawn tirtu kha ka hre tawh a. Chu pa chu min dah thatsak la ka duh a ni" a rawn ti ta a. Ephraime a ding hluai. 

"A address?! " a ti nghut a. 

"Dawrpui, Zaihmingliana.. " 

Ephraime chuan, "Engtik hun nge i duh? " a ti leh a. 

"A hmanhmawh thei ang berin.. " a rawn ti leh. 

"Aw le.. Ka ac number chu ka rawn thawn ang che.. A rang lama chinfel ka lo tum ang" a ti a. An dah ta a. A ac number a va thawn nghal zat. Whatsappah chu number chu a zawng nghal a. Dp a nei lo va, a hming erawh a awm. 

A rindan chiah a ni. Zomuansangi pa a ni ngei e. Tin, a target pawh a hrechiang khawp mai. Hotel-a a mi hmuh, aw sin lam inche fel thlarh ngei kha.. 

"Ka che buai ang em aw.. " a ti nghut a. Hectora lo tlan tar tar chu pawmin, "I pu khawvel hi a zîm sâwt mang e.. Mahse, a pawi lo. Ka nu bâ ka tlak zawhah chuan engkim a tha vek mai ang" tiin a be seuh seuh a. 

(Type hi a har tawp)