Escape 10

ESCAPE… (10)

Ziaktu: Toni Râlte

Pu Liantâwna chanchin chiang lehzuala a va zawh takah chuan, Zomuansangi pa ngei a ni tih leh tuna a nupui nena an fa erawh a ni lo tih te thlengin a hre ta a. A ngaihtuahna chu a buai ve khawp mai. Zoi pa chuan a fanu chu a hmangaih miah loh pasal nei turin a tir lui kha a nia, a fanu chu a hmangaih ang em? A pa hi chân ta se Zoi dinhmun a khirh sawt ang em? A nuhrawn leh a faten an do rawn mai ang em? Thil tam tak a ngaihtuah a ngai. Zep thu a cheng lo, ni dangah chuan a target hi awlsam takin a chingfel mai thin a. Khawngaihna leh tîmna a nei ngai lo. Mi dang tana hnawksak a thianfai angah a inngaih tlat avangin. Mahse, Pu Liantâwna chuan danglamna a nei tlat a ni. Zoi pa a ni tlat! Zoi hi a lo duh ve viau tawh zawk em mawni le?! A tirtupa lahin a tur sek bawk si. Chumi zan chuan a muhil lo tihtheih a ni. A taksa pawh a chau ve deuh. A tuk nilengin a chhuak lo. Chawhnu lamah amah tirtu chu biain, "He hna hi chu ka thawk lo mai teh ang. Ka hmelhriat nen inzawmna an nei a. Thil a kal khaw lo palh ang e" tiin a pha ta a. A rawn lungawi tehchiam lo hle. 

"Anih chuan, i aiawh tur ka zawng tho ang. Kan kawng erawh min dal lo vang che" a rawn ti ta a. Ephraime chu a rum nghut.. "Ka lo thlir ang" a ti ta ringawt a. 

Pu Liantâwna te chhungkua erawh chuan buaina neuh neuh an nei chho ti mai ang. Zoi a lo let leh tak avangin pu Sapliana te chuan an rawn nawr leh ţan tawh a. A chhan pawh Lawmsanga hmanhmawh ching chen vang a ni. Zoi chu chân mai a hlau a ni ber e. Zoi lah in a dawngsawng tha duh der si lo, chutak chuan Lawmsanga a run em em a; inneih vata a thuhnuaia dah theih a chak tawh a ni. A chapona chuan Zoi a huattir a, a langah duh awm leh dawhthei tak angin lang mah se; a chhungrilah erawh Zoi nen an indo kal reng tho. Chutiang boruak inmûng avang tehhrep chuan inneih a hmanhmawh hle a ni ber. 

"Zoi, Lawmsanga palai te chu zaninah an rawn leng leh dawn a. Mualpho takin min siam tawh suh ang che.. Thutlukna ka siam tawh dawn a nia" Pu Liantawna chuan a ti ram hmak hmak a. 

A chaw bar lai thulhin, a kham hmak. A kut sil pah chuan, "I thu thu le.. Mahse, neih ka tum lo tih hi ka thutawp a ni e" a ti ta hmiah a. 

An naupang ber Thari chuan, "Ú, U Lawmsanga te chu a fel fel nen, ti nge i duh loh tlat a? " a lo ti hliai a. 

"Hehe.. Nei daih mai ta che. Fel i tih chuan" Ngeiawm zeta nui chungin Zoi chuan a ti nghat a. Thari a tûm nghal bar mai. An nuţa pa erawh engmah a sawi ve lem lo. Pu Liantawna chuan melh râm râm chungin, "I chaltlai reuh mang e. I lo let leh atang hian i zia i hloh tlat.. Khuahkhirh deuh i ngai a nih hi" a ti bul hmuk a. An nu erawh a ngawi reng. 

Zoi chu a room lamah a kal nghal a, khumah chuan thu hnawkin a pa tumruhzia leh Lawmsanga hmel ngeiawm tak chu a mitthla zut zut mai. Bed sheet chu a tham ngawt ngawt a, "Ka nei nguar ang" a ti sap a. Ephraime lah a reh tlawk tlawk mai si. He pa hian a bum chiang a ni. A haw theih nan lem a lo chang der mai mai a nih kha. Eng pawh chu nise Lawmsanga chu a nei duh chuang lo. Pasal neih a la duh loh chu thuhran, Lawmsang kher kher chu a duh hlawl lo a ni ber e. Ephraime nen chuan inhmu tawh dawn lo pawh nise, mipa dang tu emaw a lungdamna thlap a la tawng em emin a ring a ni. Mahse, vawi khat tala hmuha a bula awm a chak a ni. 

Nilaini zing ni chhuak chu a ţang ţha at at ngei mai. Pu Liantâwna pawh zin turin a inpeih fel ta. A sumdawnna peng pakhat enfela a thawhpuite nena meeting pawimawh tak nei turin khawchhak lamah a zin dawn a ni. An nu Pi Lawmi chuan, "Zan hnih maw inriah dawn? " a ti sap a. 

"Aw rei rial loh hram kan tum ang. Zomuansangi saw lo en ngun deuh ang che" a ti bung nghut a. 

"Pu Sapliana te chu engtik nge rawn len an tum? " Pi Lawmi chuan a lo ti a. 

"Ka zin leh dawn sia, kar thar lamah inngaichang turin ka hrilh leh kha" Pu Tâwna chuan a lo ti a. Veranda thleng an nu chuan a va thlah a, an invai liam ta a. 

Nilenga an tlan hnuah thim hmulah an tum ram an thleng ve hram. Pu Liantawna chu a motor chuang fuh lo deuh nge a chau nghulh mai. Hotel pakhatah innghatin, a driver nen chuan room hran ve ve an book thung. A driver hi Opa niin tawng tam lo tak, rinawm tlut si a ni roh a. Pu Tâwna pawh hian a ring tawk hle. A in bualfai zawhah zanriah ei turin Dining hall- lamah an chhuk thla a. Arsa buhchiar tui titaka an ei lai chuan, mipa pali hi an rawn lut ve a. Pu Liantâwna te piah lawka dawhkanah chuan an thu ve nghal a. An rui deuh nge an awki a ring viau. Pu Tâwna leh Opa pawn chaw ei titui tawk chu an lem ve ngei kha..puar taka an ei hnuah an room lamah ngawi rengin an chho leh nghal. 

"Ka pu, ka thiannu ka va tlawh lawk dawn aw.. Kan zin remchang bawk a" Opa chuan a ti a. 

"Aw le.. Mahse, rei lutuk lo la. Chhuah thut te ka ngaih takin" a lo ti a. A ei puar deuh nge mut hle hle a chak viau. A khumah thuin a thawhpuite ho a be kual a, a tuka an meetingna hmun tur leh a hun tur te an sawiho a. Fimkhur taka chet a ngaih vangin meetingna tur hmun pawh an thlang uluk hle. A nupui a biak leh te te hnuah tukverh hawngin a dak vang vang a. A hun kal tawh leh he sumdawnna tenawm tak bul an tan dan te a ngaihtuah kai a. 

A hmingin sawrkar hna thawk mah se; dik tak chuan eirukna tel lo chuan thla bi hlawh ringawt hi zawng a beitham lu deuh a ni. Zoi nuin a boralsan hnu phei kha chuan amah leh amah a inkhawngaihna leh rethei intihna chuan a rawn luah chho ţan kha a nia. Khatia awmze nei lo va a tal vel mai mai lai khan, a hmelhriat ngai pawh ni lo hnen atangin sawmna a dawng a. Sumdawnna hlawk tham tak, mahse, a ruka kalpui ngai si kha. Engtin nge kha pa Pu Sapliana khan khatiang sumdawnnaah khan a rawn sawm ngawt theih tih a ngaihtuah hian mak a la ti fó! A rin danin Pu Sapliana nupui te nen hian office hmun khatah an thawk ho a, a nun talho leh awmze nei lo tak chu Pu Sapliana nupui chuan lo hrethiamin an pa bulah a sawi a nih a ring. Khata tang khan Pu Sapliana leh ani chu then hran hleihtheih loh khawpin an inkawp chho ta kha a nia. A tirah ralthuam an tawlh ru a, ralthuam chu man mai awlsam a nih avangin an thlak a. No 4 lamah an pakai ta kha a nia. Duhàm hian chinlem a nei lo a ni ber mai. No 4 ringawt pawh chu an duhkhawp lo ta thuai a! A phênah human traffiking an kalpui zui leh ta kha a nia! Pu Liantaŵna a hna atanga pension dilin, langsar takin Aizawl laili takah inphen nan sumdawnna a hawng thar a. An thil zawrh te chu damkhawchhuahna tham a tling teuh lo. Nupui a nei a, Lawmi lah sumdawnna kawnga puibawmtu tha lutuk a lo ni lehzel a! A langaha Kohhran leh khawtlang tana tangkai tak anga langin, lang lo lamah sum thianghlim lo an hui lut malh malh thung. Heng zawng zawng bultumtu chu Pu Sapliana a ni a, chuvangin Pu Sapliana hian thunun theihna riau a nei tlat a tin ni.. A fapa Lawmsanga nupui atana Zomuansangi a thlang hi Pu Liantawna hian pawi a ti ru ve tho. A nupui hmasa laka a fa neihchhun Zoi chuan a duhzawng tak pasalah nei se a duh ru ve lutuk.. Mahse, Zoi hriatpui miah si lo va Pu Saptawna'n a vauna hi palzam chi a ni hlek lo thung. 

"I fanu leh ka fapa hi an innei lo a nih chuan, i chhungkaw innghahna i hriat kha.. Pentui hmanga ka thai zeuh chuan, nang chu ral sa i ni" tiin. Chu chu a tithei tih a hai der si lo. Chuvang ania Zoi lakah nunrawn chhuaha a nawrluih hram hram ni. 

Kawngka ri rak a hriat vangin a hawi let vat. Nichin lawka chaw rawn ei ve mi pali zinga pakhat a palian ber kha a lo ni a! A ding a, "Eng nge ni ta? " a ti nghut a. A hmelhriat pawh ni hlei lo chu inleng atan a duh fahran lo a ni. 

"Remchang ka rawn zawng mawle.. I hun tawp a hnai tih ka rawn hrilh che" tih leh kawngka kalh a rual nghal a. A rawn hawi let leh chuan a kawnga a pai silai chuan Pu Liantawna chalah a tin nghal zat. Thil chu a thleng rang deuh bawk a, Pu Tâwna pawh a hamhaih viau mai. An sumdawnna vang hian inrikrâpna hi a tan a mikhual lem lo naa, amah beia a chal dara silaia tintu erawh a la tawng ngai bik lo a ni. 

"Eng nge i duh? " a ti sehchilh nawk nawk a. 

"Nangmah hi mawle.. I thih a ngai" tih pahin a rawn hnaih nghal ruak a. Pu Liantawna a tawlh hnung det. 

"Tu tirh nge i nih? " a thluak a rawn fim tan ta aniang e. 

"Tu emaw tan i hnawksak hle a ni" tih chu a chhanna hmuh chhun a ni. 

"Tu nge? " a ti nawn leh sak! 

Chu paliana chu a ţhen sûng a. Pu Liantawna pawh che deuh hrutin khumah chuan a thu titih a. Chu pa lah chuan kap tang e a ti lem hlei lo. Tihhlauhthawn a duh vang hrim hrim pawh a ni mahna. Pu Liantawna chuan a kut chu hnunglama dahin a phone chu a dap kual dan dan a. 

"Hei, pu-a, i kut kha phar rawh. Tanpuitu tur che an awm lo" tih pahin a nak nemah silai chuan a rawn nawr sawk a. Chu tak chu remchanga hmangin silai chu Pu Liantawna chuan lo pawt kawiin na zetin a pawt sawk a. Chu paliana chuan silai a ken vangin a lo thlamuang viau ni tur a ni, chuti thuta Pu Liantawna che chuan a tihamhaih a, chet lak mai nachang a hre lo, rei erawh a ni lo. A hriat chhuah rualin a silai cheng chu a hmet kau ta rap a. Mahse, silai chuan bang a va kap khi sut ringawt. Astray sailungvara siam lian vak lo chu chuhin a theihtawpa nain Pu Liantawna chuan paliana bekah chuan a chhu ta a. Mahse, ani pawh a vanduai hman. Paliana silai mu siper a dawng ve hman tlat! Paliana chuan a tluk rualin a silai chu a vawihnih nan a kap leh thâwr a, chu silaimu siper chuan Pu Liantawna dul chu su phei thuakin a sa nghal zawk mai. Thisen a rawn lum puat nghal. Paliana erawh a beka astray-a a chhutna vang chuan chhuatah a let hawl a. Silai pawh a lek kang zo tawh lo. A na ve ngang a ni mahna. Pu Liantawna chuan thei leh thei loin a phone chu a hmet eng a, Opa numberah dial nghalin, "Beih ka tawk.. Puih ka ngai" a ti hrãwk a. A khuh nghal bur bur. Opa pawh chuan a hrethiam a ni chêk ang. Phone a dah rualin hmanhmawh baklêngin hotel lam a rawn pan ta nghal a. 

Manager leh thawktu dang te nen tang kawpin Pu Liantawna room kawngkhar chu an nêk hawng thei ta hram a. An va luh chuan paliana kha lo tho chhuak tawhin Pu Liantawna lam a lo pan mek a, ani Pu Liantawna lah a pum dawm chungin a lo bawkvak titih a. Opa chuan paliana chu a beka chhuih zawtin a silai pawh khum hnuaiah a pet lensak lawp. A pu chu rang takin a va bawihsawm ta nghal a. Thisen a hloh hnem chuan damkhawchhuahna chance a tlem tial tial tih hriain, a rang thei ang berin damdawiin hnai berah an tlanpui ta nghal a. Paliana thiante pawh rawn lut vein an thianpa chu an bawihsawm nghal a. Manager chuan police lam a lo be fel diam tawh a, an ni pawh an rawn thleng rang ngei mai. Paliana chu kutkawl buntirin station lamah an hruai ta hnu hnu a. 

Opa chuan a pite leh a pu thawhpui a hriat ve ho te be kualin a puin chetsualna a tawh dan chu a dam thei ang berin a hrilh hlawm a. Doctor te an fel a, an che zung zung a. Ngaihtuahawm a ni hran lo. A thawhpuite erawh an tang hrû ngei ang. An thawhpui pakhatin beihna a tawk a nih chuan, an ni pawh an him bik kher lo thei. Chu tak chu an fimkhurna tur a ni. 

A hnar kaitu ber Pu Sapliana chuan thutlukna a rawn siam ta vat reng a. "Heti hi kan nih rih avangin meeting chu cancel ni rawh se. Tumah nangmahni chauhin chhuak lo bawk ula.. Mit len reng ang che u" tiin. Veh mek nih hahthlakzia an hrethiam dawn ţan a. Pu Lawmi leh Zoi pawh a zan azanin a pa awmna lamah an inkhalh chho ve ta nghal a. An inbe tam lo kher mai. 

"Engvangin nge ka pa chuan beihna a tawh ngawt le? Thil dik lo hmanga eizawng pawh a ni si lo" Zoi'n a tih chuan, Pi Lawmi a lo îp deuh. Zoi hian an sumdawnna enkawlpui chang nei mah se; a phêna thil awm hi a hre ve tlat lo atin ni. A pain sumdawnna thianghlim lo a khawih tih hria se engtin tak ngai ang maw?! 

"Aizawl miliante hi chu an iner ru ţhâm a. I pa pawh er tham a ni ve tawh aniang e". Pi Lawmi chuan a ti ve mai a. 

"Tun hnaiah mi pali thah an ni tawh a. A thattu lah an la zawng hmu zo si lo. Khang mite thattu tho khan ami le ka pa hi bei le.. " Zoi chuan chhanna dawn inring lem lo chungin a ti niah niah a. 

"Ka ring lo. A chhan chu i pa chu a thi ve hleinem.. Khang mi te thattu kha chuan an nunna a la lo ngai si lo va" Pi Lawmi chuan a lo ti nghat. An ngaihtuahna ve ve kawm chungin an ngawi dun ta vang vang a. 

Damdawiin an thlen chuan zing dar 9 a ri thuak tawh a ni. Pu Liantawna chu a lo muhil a. An rin aia thaa an han hmuh avangin an thaw huai mai. Police lam pawh an rawn lang ţan a, amah Pu Liantawna a muhil rih si a, a driver chu thu an zawtfiah a. Ani chuan a puin a rawn call thu bak sawi tur a hre meuh lo. Room kha an va lipse tawh a. Silai pawh kha an va hmu nghe nghe. Mi thah tum (attempt to murder) case a awrh dawn chu a nia! A chung a rip viau maithei a ni. Dar 11 velah Pu Liantawna pawh a rawn harh ta a. Inspector chuan a han zawt ţan a. 

"Engvanga thah tum che nge a nih ang? A hmain buaina in lo nei tawh nge? " tih zawhna chu.. 

"Nei hauh lo. A zurui lungpuam, sum duh kha a ni maithei. Min thah duhna rilru tak tak a put pawh ka ring lem lo, kei kha ka che ve ta phut bawk si nen, loh theih lohin silai a hmet puak a niang" tiin a lo chhang! Tirtu a nei tih a sawi chuan a dinhmun pawh a derthawn bakah a mualpho thei tih a hre ve kar tlat! Chuvang chuan chu paliana pawh chuan a tirtu hming nen lam a lo inpuang ang tih a hlau ru hle zawk. An sumdawnna hi police lamin an hriat chhuah vaih chuan paliana chan ang tho kha a chan tur a nih bakah Zoram khawvelin an chirhtheh ang a, a damkhachhuak zo tawhin a ring lo a ni. Mahse, a dam fel huna thah tumtu te chhui erawh a tum tho. An sumdawnna hrula kal ve te an ni ang tih a hai lo va; zawn chhuah pawh a huphurhawm hranin a ring lo. An chet hmaa chet lak vat a ngai tih nen lam a hre chiang. Pu Sapliana nen khunkhan taka an sawi dun a ngai dawn a ni. 

Chanchinthar atangin Zomuansangi pain tawhsual a tawk a ni tih leh a nunna eraeh an chhan hman thu te a lo hmu ve a. A chek hlak. A aiawha an rawih chu a hmantlak vak lo a nih dawn hi. Call a dawng nghal zat. 

"Hello"

"I lo hmu maw? Hei vang hian alawm nang ang professional ka mamawh ni. Kha kan zawng khawi khan engmah a chinfel theih chai loh kha… ka hna hi thawk mai rawh.. " rawn titu chu a hrechiang khawp mai. Mahse, chutimaia hmin theih a ni lo. 

"Bansan zawk la, sumdawnnaah theihtawp chhuah zawk la i che fuh zawk ang. I chekkawi te an inpuan phei chuan, i kut phuar a ni dawn asin" Ephraime chuan duhsak takin a lo ti a. A rawn thaw ri hrâwih. 

"He mihring Liantawna a dam chhung chuan ka sum hnar hian kang chat hun a nei dawn. Ka chanpual ngei ngei pawh min laksak hreh lotu hi ka zuah reng chhan tur ka hre lo" a rawn ti chang rãt a. 

"A nih chuan nangmah ngeiin thawk mai rawh. Kei chuan he thilah hian ka kut ka sil ka tih kha" a ti ve nghut. Zoi avang liau liau a ni reng si a. Ni e, kha hmeichhia, dawhthei lo leh induhtawk ve tak avang khan Ephraime hian a hna a tikhaihlak ve tlat! Thil thleng ngai lo a ni. 

Police lam te chuan an mi man thar, Jerome inti chu an han kawm vel a. A zu rui a reh tawh bawk a, a ngaihtuahna a fim tan ta bawk nen. Thudik sawi chu a tum bik hauh lo mai. 

"Sum ka mamawh a. Han neih mai tur a awm remchang lo nen, Pu Liantawna kha sumdawng hausa a ni tih ka hria a. Chuvangin tikhan ka vau mai a ni e". Tih chu a inpuanna awmchhun a ni. Tirtu a nei tih leh a tirtu hming a sawi vaih chuan, a nunna thlenga a tawrh theih bakah a laina te chenin an tuar thei tih hrethiam lo khawpa thluak khawro a ni bik lo a ni. Police lam chuan hmunpui lamah an thawn ta nge nge a.. Hremna a hmuh tho chu a ngai. 

Inspector Sangliana chuan Jerome hmel a hmuh rual chuan a thil tih te ngaihtuahin phurna riau a nei a. Pu Rosiama, Pu Rinawma, Pu Rualkhuma leh Tv Hmingzuala te thattu-a puh thluk theih a inbeisei nge.. Jerome chu dãwp chhuah a tum khawp mai. 

"Khang mi pali i thah khan eng hlawkna nge i neih le? I che mawi thei viau lehnghal a. Mahse, hei ka kutah i awm ta chu a nia. Misual te hian vanneih chang nei mah se; an vannei kumkhua ngai lo reng a ni" tiin a han chhimbudawi kual vel a. 

Jerome chu a ngaihna hre lo zetin a hawi hú ringawt! 

"I sawi awmzia ka hre hauh lo" a ti tawi tãk a. 

"Hriat kher a ngai hleinem. Khang mi pali i thah chhan kha sawi la a tawk a ni mai. I inpuan phawt chuan i hremna hmuh tur ka tihnepsak thei che a nia" Sangliana chuan a ti leh a. Jerome chu a melh kar mai. 

"Sir, tumah ka that lo. Pu Liantawna kha thah ka tum lo, vau ringawt ka tum. Mahse, ka rui a, a han chet takah kha chuan ka che ve ta mai a ni" Jerome chuan dawih aw zet hian a ti a. 

Sangliana chu a nui huk. Chutah Jerome sam buk zeta kuai dah vah pah chuan, "Khatin pawisawi lo angin ţang der vel suh. Engkim ka hre vek tawh. Nang hi mi that tura rawih theih i ni a, chuvangin khang mi pali pawh kha i that a ni" a ti ţeng chhuai a. Jerome erawh mak tihnain a khat thung. 

Rei ngial an indâwp hnuah pawh Jerome chuan engmah a sawi duh si loh avangin Sangliana pawh a beidawng ve ta deuh a niang.. Thinrim zetin a thu tau chawrh mai. He pa hi chu a ni lo aniang tih ngaihtuahna pawh a nei nghal. Darkar tam a liam hmain Jerome chuan tlawhtu a nei ta a. Rawn tlawhtu chu Dolly Enterprise neitu Pu Thanpuia a ni. Sangliana nen hian an inhre tha viau nghe nghe. 

"Jerome-a hi ka dawra thawk tlangval zuanzang tak a ni a, hetianga a che ta mai hi a mak ka ti hle a ni" a ti dap dap a.. Sangliana chuan chìk zawkin Jerome chanchin chu a han zawt a. Jerome chu a nu nena hmeithai niin farnu pakhat a nei bawk a. Khawsak harsa ve tak an ni a niawm e. Pu Thanpuia dawrah hian thla 8 dawn a thawk tawh a. Amah Pu Thanpuia pawn a duhsak ve hle thin. Mahse, hetianga a rin phak baka a che ta hi a mak hle tih bak sawi tur a awm lo. Bail theih lah a ni hek lo. Ukil te rawihsaka theihtawp chhuahpui mai loh chu Pu Thanpuia tan pawh tihngaihna a awm lo. 

A hawn hmain Jerome nen chuan an inbe ve zuai a.. 

"Sir, pawi ka ti lutuk. Hrehawm ka ti takzet" a lo ti khur dat dat a. 

Pu Thanpuia chuan mitmeng nelawm vak lo hian, "Ka thiam loh zawk a ni. I theih leh phak tawk chin ka lo hre lo va. Engpawhnise, a rang lama inlak chhuah kan tum dawn nia.. I hna hlen loh chu mi dangin an hlensak ang che" Vengtute hriat phak loh tur chuan a ti sup a. A kal zui nghal. 

"Hmeithai fa niin sum mamawh lo ni ila khatiang kha ka thlang lo tur" Jerome chuan beidawng zetin a ti a. A thaw halh mai. A dinhmun a chhiat leh retheih vang chauha a tih ngai loh thlang a ni tih a chiang viau mai. 

Pu Liantawna pawh a zia chho ve zel a, Aizawl lamah dimdawi takin an hawn thlak pui ta rih a. In lamah nurse ruaiin ni eng emaw ti chhung chu a inenkawl dawn a ni. Zoi tan chuan hun pek belh a nih vangin a lawmawm phian ta ve ang. Ephraime a ngaihtuah chhuah chang chuan a ngui rawih thin. Khatiang mipa induhtawk lutuk a lo ring ve ringawt kha mawl a inti takzet a ni. Damchhunga hmu tawh lo hlen tur anga a inngaihtuah erawh chuan a chhungril a ippik thin. 

"Hector, in lo nghak rawh aw. Vawiin chu mamawh ka han lam ang a, hun eng emaw ti chhung chu kan putuin kan in awm heuh heuh dawn nia" tiin a ui duat em em chu a be seuh seuh a. Hectora hi Shillong atanga a chhawm zel kha a ni a, an inputu rei ve ta viau mai. Gate chu uluk taka a kalh khap hnuah khawpui lam pan turin a inkhalh chhuak ta a. A sum khawl zat a hria a, chet lak vak a tum ta rih lo. Boruak dai deuh se, ruaitu a haihchham dawn chuang lo bawk a, tunah chuan sawrkar uisathiamte lak atanga inthiarfihlim leh fimkhur a ngai rih tlat a ni. 

Chawhmeh leh bawlhhlo thahnem tham tak a lam khawm zawh hnuin Restaurant changkang ve tak pakhatah inhnawh puar turin a lut ta a. A dai ruih mai. Thlang lam bera dawhkan chu a la awl avangin a pan ding nghal a. Waitress thianghlim takin a rawn dawngsawng vat bawk. A lum deuh avangin cold drinks a chah a, Italian chicken noodles a chah tel bawk. A nu duh ber chu a chhawm ve zel e. Eitur nghah pahin a phone a hmet nuap nuap a, a tan phone hi a tangkai nep angreng. Mipa dang anga hmeichhia tu te emaw biak nan a hmang kur ve dup bawk si lo. Lisa msg tlar thla tuar chu a seen satliah a. A clear nghal daih. He nu hi a haw hran lo, mahse, khamawm tih chang a nei thung. 

"Thianpa, dawhkan awl a awm mai si lo va, kan lo zawm ve thei che ang em? " hmeichhe aw tliang ral mai a hriat rual chuan a hawi chhuak vat. Ephraime meuh pawh a phu ve ţhelh a ni. Zomuansangi makti meng phar melh zauh chungin, "Tehreng mai.. " tia nui sak chungin Zoi bula ding a thiannu hleitling leh nalh ve tawk tak chu a melh zui ta daih a. Jenny leh Zoi chuan chair chu lain thuthmun an rem ta nghal a. Jenny hi kan hriat tawh angin Pu Rualkhuma fanu upa ber a ni. Zoi nen hian tette atanga inkawm, college thlenga kal dun zel an ni a, Jenny hi chu tunah Department pakhatah Clerk hna a thawk mek a, amah a inchawm hneh khawp mai. 

Ephraime chuan sawi tur a hre lo hle mai. A tum loh deuha Zoi a hmu leh si chuan a awmdan a theihnghilhtir lek lek a ni. Zoi lah pangngai hek suh, inhria anga awm duh si lo, in melh zeuh zeuh bansan thei chuang si lo chuan eitur an nghak ho ta ţhap a. Jenny chuan a bula thute awmdan chu chîk hek lo, Ephraime chu a hmel a hmuh phat atang khan a lo suangtuah thin mipa nen danglamna an awmin a hre lo. Aizawl khawpuiah chutianga mipa lian leh thahrui ngah hmel tak, mizo hmel aia hnam dang hmel pu lek lek, sual hmel ni hauh si lo va nunnem hmel pu chuang si lo, mipa dik tak tia pawm thlap theih an lo awm chu mak pawh a ti viau zawk. Ngaihzawng a nei fo a, tuna a bula thu mek erawh a danglam hlak a ni. 

Nula naupang zawk zawk a ni tawh lo bawk a. Ngawih reng ai chuan tiin, "Ţhianpa, mi nghah te i nei lo maw? " a'n ti te tê a. 

Ephraime chuan nui suk chungin, "Nei lem nang" a lo ti ve mai a. 

"Khawi vengah nge i awm a.. " ngampa anga lang duh hlek si lo hian a ti leh ta zel a. 

"Aa.. Aizawl khaw daiah ka awm daih.. " a lo ti thum leh chhak. A zawhna bak engmah a sawi belh lo. Zoi chu a lo insangmar nasa mai. 

"Nih chu a.. Aizawl i awmna a la rei lo em? Ka hmu ngai lo che ee" nelawm takin Jenny chuan a ti leh sar sar a. 

"Aw la rei chiah lo, bakah ka chhuak vak lo va.. Chuvang aniang min hmuh ngai loh" a lo ti ve leh thliam a. 

A eitur chah a lo thleng ta bawk a, ngawi rengin a sawngbawl a, riltam em em niawm takin a ei ta bawrh bawrh a. Zoi te thil chah pawh a rawn thleng ve vat, an ni pawh tawng em em lovin an ei a. Jenny chuan a thluak a hmang nasa ngang mai. He pa biakpawh theihna number hi neih ngei a duh takzet, a hîp tlat a ni. Mahni tawka nula chhe lo leh intodelh ve tak a ni bawk a. A pa lah Zoram nawlpuiin an hriat lar a ni bawk nen. Mahse, khatia a han boral ta thut erawh kha chu tun thlengin tawrh thiam harsa a la ti a ni. 

Ephraime chuan a ei zo ta a. Waitress chu a ko va, bill a siamtir a. A bula thu nula pahnihte eina man nen. Jenny chuan, "A ngai lo asin.. A va lawmawm dawn ve" a lo ti hlut a. Zoi erawh chuan rum zetin Ephraime chu a melh. Ngaipawimawh lo zetin a card a phawrhsan a. 

"Nula hmeltha pahnih thil eipui a khât asin. Vawiin chu ka vanneih ni a nih dawn hi" Ephraime chuan a ti sup a. Bill chu a pe zo va, thawh mai tuma a insiamrem lai chuan, an piah lawka patling kum 50 bawr vel tur hian, Jenny chu rawn ko hlutin… 

"I pa case kal zel chu chinfel a la ni ta chuang lo a ni maw? Ka thim hi a rim em mai. Zoramin pa ropui kan chân ringawt chu a nia! A thattu hi man vat se, mipui hian chil hlum ila ka duh ania" a ti tâwn tâwn a. Jenny chuan zia lo tih hmel deuha chu pa melh chung chuan, "Aa.. Pa Ram, leh hluai thin a che. Insum rawh. A zahthlak. An chhui chhuak em em ang" a lo ti dam diai a. Ephraime mitmeng danglam deuh chu Zomuansangi chiahin a hmu! Mahse, ani lah chuan ngaihbel nachang a hre hlek lo vang. A thawh kan rual chuan Jenny chuan zah theih loh chhuahin, "Min lo hrethiam la, eitur tui tak min treat a. Kan lawm lutuk, nakinah biak pawh che pawh ka la duh maithei a. I number min pe phal em? " a ti ta tawp a. Ephraime chu lehlam hawiin a ner sawk. Nulain an dil miau chuan phal loh ţung kha mawiin a hre si lo. A wallet phawrhin a card a la a, a hming leh number a chuang vâ.. Dawhkanah chuan a dah a. Nui hmel pu chungin a chhuak ta a. Jenny chu a za sek mai. Zoi chuan card chu la vatin, Ephraime number chu a thinlung zawng zawngin a byheart nghal. 

"Kha.. I lerh si" tih pahin Jenny chu a va pe a. 

"Hm… ka chhuah dawn lo reng reng. A va man rem rem tak.. Awiij a hmelthatzia kha.. Ka tuiral" a ti hliam hliam a.. Zoi chu a langin nui mah se, a chhungrila khakna awm chu a hrechiang hle. Eitur an ei zawhah hmanhmawh takin an chhuak ta a.. An rilru erawh inang lo tak a ni. 

"Hector, i lo muthlu leh tawh ni maw? Pute hawn lai pawha harh thei hlei lo, i tar tawh a nih hi" Ephraimea'n a tih rual chuan, thatchhiat hmel zetin a lo meng luap luap a.. Bungrua te hlang thlain in chhungah a dah lut a. Zanriah ei a hmanhmawh lo bawk a, a inbual fai leh te te phawt. A faifuk rut rut a, Zoi hmel a mitthlaah a rawn lang zawk.. A khi suk a, "A thîk ve deuh mawni le" a ma hriat tham lekin a ti a. A lo thik anih chuan a lawm ru hle dawn tih a hria. 

Zanriah te a eikhama study rooma a inkhung laiin a ph a ri ral ral a. Number hriat loh a ni. 

"Hello"

"Hello, Zothanpuia mi? Ih.. Vawiina restaurant ami Jenny kha ka nia" a rawn ti nghal zung zung a. Ephraime phurna a reh nghal vek. Hmeichhiaah pawh hetianga ngampa deuh ang mize nei hi a ngainat loh ber an ni. 

"A ni maw.. I tha em? " te chu a ti khawmawi ve a. 

"Umm.. I kal hnu khan ka thiannu bulah ka sawi nasa tawp che a. Ka no hi lo save rawh aw.. Nakinah whatsappah ka rawn bia ang che" tih leh dah a rual nghal. A mitko san ak chungin phone chu a dah a. A hna a khawih zui nghal. 

Dar 10 bawr velah mu turin a intintuah a. A phone a han hmet eng chu kha nu Jenny number atang khan msg pahnih a dawng ran mai. 

"Ih maw.. Lo la leng ve rawh aw.. Inkawm a chakawm" tih leh

"I muhil tawh mi? Hmm.. Min van ngaihsak lo" tih hi. A nui tawp. He hmeichhia hi a nghal reuh zêk dawn a nih hi tih pahin a reply ve mai a. A mut tawh dawn thu leh a mangthana thu a type. 

A phone a dah dawn lai takin number hriat loh atang bawkin msg a dawng leh a. Teh fo a ti rilru chungin a hawng a. 

"Mipa i nih chuan thutiam i nei tih theihnghilh ngai suh" tih thu hi.. A dp a hmuh theih loh a, a hming dah dan a en vat. "Zoi" tih tawp a lo ni. Mahse, tu nge a nih tih a hrechiang ngang mai. A msg chu a chhiar nawn leh a.. A inngaihtuah fe hnuah, "I thiannu kha min lo biak teh aw" tiin a reply ta a. Zoi meng rum tur hmel a mitthla nghal, a khi suk a, phone chu dahin rizai a sin a. A maimichhing daih… 

(Ka ph hi a upa ve ta deuh nge, a muang tawp. Tih ran dan te hi a awm lo maw.. 😢