Arini

ARINI… 

(Khawngaih takin Adds kha min lo click sak ve hram r'u aw) 

Ziaktu : Toni Râlte

"I ngam chuan min khawih rawh. Thih chilh che ka hreh dawn hlek lo ania" chu aw fiak ţhak neitu chu a ding khawng lah a. Amah hmachhawntu hmeichhe lian leh thau lam, hâng ren run, lu kawlh tul mai chuan khi sûng chungin a pan hnai zel thung. 

"Rawn kal tawh suh.. Zawngi" a hma aia ring mah chuan a ti leh a. Mahse, hnung lam zawnga a kalna lamah a petek ta hlauh mai. Bang thlang lamah chuan a va intauh chawrh a. Nâ lutuk erawh a ni lo. Chutia a lu a tuai vat vat lai chuan an ward kawngka chu rawn inhawngin, hmeichhe pali an rawn lut a. An vai mai chuan an rawn pan ţham ţham mai. 

"Khawngaihin ti suh u" a aw chu a hriat theih chang chang a ni. Mahse, an pawisa lo kher mai. Pakhat chuan a rawn man bet a, mi dang pawh chuan a au bengchhen loh nan a ka an lo hup bawk. Chhuatah kawmawl inphahah chuan hnuk thlain a zangthal zawngin an muttir a, a tal aih aih naa, hmeichhe pali chu a hneh ngang lo a ni. Chutah leh a thawmhnaw chu an hlihsak bawrh bawrh a, a tira amah rawn beisei hmasa bertu, lukawlh tûl mai chuan nui chungin a rawn khawih ţan ta a. Chu hun thim tak, jail a tan atanga kum 2-naah chuan, a hmeichhiatna chu tihbawrhbansakin a awm leh ta! Chu pawh a hmeichhiatpui lak atang ngeiin. Arini chuan a damchhungin pawngsual vawi hnih a tawk ta chu a nia! A damkhawchhuak zo tawh kher dawn em ni? 

A pa leh a û ten theihtawp chhuaha bail chhuah tumin hma la mah se; kum 3 tal a tan phawt a ngai tlat si a. A nu phei chu a â lo chauh tawh a ni. Amah phei chuan, "Tum buai duh tawh lo mai rawh u. A hrehawm loh e" a ti zawk thin. Mahse, a nu leh pate fanu duat, la naupang tak chu jail tang mi tawrawt leh paurau tak tak kara a chen reng chu hmuh hrehawm ber a ni tlat si a! Ruatfela pawhin Arini pa te chu a thlawp reng a, a hna lamah a buai chhoh tak avangin Arini pawh duh angin a kan tam thei lo. A zuk kan ve apiangin an hun tlemte neih chu a hlim thei ang bera hman an tum ve thin. Vawi tam tak, "Min nghak duh suh. Ka lo chhuah paw'n ka nei duh dawn chuang lo che. Nupui nei rawh" Arini chuan a ti fô! Mahse, Ruatfela mipa rilru lian a kai chhuak zawk a, bansan a hnêkin, "Kum 20 pawh tâng dawn mah la, ka nghak dawn tho che" a ti ve tlat si! Chuti na nã na chu Arini pawn a hnar lui thei bik lo. A lo hmangaih ve em em bawk si. Kum khat a tan ve meuh chuan ngaiah a nei chho ve deuh mai tawh a, tin, thiante pawh a nei ve ta bawk nen. Warder thenkhat zingah amah duhsaka duattu an lo awm bawk a. A rilru thim leh ngui lutuk pawh a kiam chho ve hret hret a ni. Mahse, vanduaina chuan a kal kan leh ta chuang lo. Tlai khat chu hmeichhe pakhat lian leh hang ve tak, patil tih hriat zet hi jail-ah chuan a rawn lut ve nawlh mai a. Boruak a nei nghal hat, lo tang ve dangte nen chuan an inhre thain, "I inah i rawn haw lrh tawh a ni maw? " an lo ti sap sap a. Ani lah a uang zawk mah emaw tih turin a nui ang huah huah a. A lo táng fo tawh a ni tih a lang reng mai. Arini hmel a hmuh rual chuan, kawh chat pahin, "Ka chanpual" a ti thum chhak a. Arini chuan a lo râp zawk. A thiante ho lah chuan, "Ani hi a tihtlak ber ang, a duat pawh kan duat" an la ti zui. Arini chuan sap ho jail mitthlain thil thleng ve fo chu Mizoramah ngei pawh a thleng ve ta a ni tih a hai lo va, chu nu Lawmi an tih mai lak atang chuan a theih ang angin a inthiarfihlim a ngai tih a hria. Lam tang a ngah hmel bakah a leng halh mai bawk si. A hnua a hriat leh danin a hma chuan pasal te pawh a lo nei ve a niawm e. A pasal zu ngawlvei a vih hlum avangin kum 10 dawn jail-ah a tãng a, a lal pawh a lal hman khawp mai. Mahse, vanneihthlak takin a chhuak ta hlauh a, mahse, a nun a chhe laklawh nge zu leh ruihhlo dang tawlhru lehin man a tawk leh ta zeuh zeuh a. Jail chu a in ang mai a ni ta a ni. Tun tuma a tan chhan erawh a ruihhlo tawlh rukpui a lo sawisa pek a niawm e. A chung a rip viau maithei a ni. 

Inveng reng rengin Arini chu khawsa mah se; hun remchang zawng ta ngar ngar chu tikhan an ward-ah ngei a neih zawng zawng chhuhsakin a awm leh ta a. A tukah warder a hrilh a, mahse, amah duata duhsaktu warder te pawh chuan chu hmeichhe lak atang chuan an chhan thei lo nge an ngam lo. A hnua a hriat leh danin pawn lam atangin thamna a lo pe a niawm e. Sum avangin Arini zahawmna chu an venhimsak duh lo a nih chu! Tenawm hlawm hian.. A nu ten an rawn kan chuan thil awmzia a sawi ta ngei a. A rang a rangin hotu liante bulah an zualko ta nghal. Mahse, Magistrate te lamin jail lam hotute an zuk dawr chuan, "Chhuah a duh a, a chhuanlam mai mai a nih chu.. Engmah thil danglam a thleng lo" an lo ti tlat si! Ruatfela pawh a lungawi lo kher mai. Chuta china thla chanve a kal leh meuh chuan, Arini mizia chu a danglam chho ta. 

Tuman an be ţawng zo ta mang lo va, court tura an hruai niah pawh a chhungte takngial paw'n an be ţawng zo lo. A meng kuau a, a tu amah chu hria awmin a awm lo. An tih leh an sawi ang ang chuan a awm tawp mai a ni. A chhungte chuan lainat takin an thlir ngawih ngawih ringawt mai a ni. Jail-ah a let leh a, chumi zana Lawmi leh a thianten khawih an tum leh chu an rak ta nuai nuai mai. Warden te an rawn lut ta nghal a, Arini chu chhuatah a kut dinglam thi hnu chung leh meng kuau chungin a lo mu reng mai.. A tirah a thi emaw an ti hial hman a, mahse, a mar a la phu ve det det tih an hriat rualin rang takin Damdawiinah an phur chhuak ta a ni. Hetia Arini awm chhan chu jail tang hmeichhia zawng zawngin an hria, mahse, tuman an ka an âng ngam lo. Lainat tawk awm mah se;amah anga tawrhna hmachhawn ve an hlau tlat a ni. 

Hetih lai mek hian Ruatfela te chhungkua kha Tanhril-ah an insawn thla tawh a. Nancy khan Resort kha Ruatfela kutah a dah pumhlum ti mai ang, engkim a khawih vek tawh. Ama pualin motor a lei ve ta bawk a, Mampuii pawh a nunphung a pangngai vek tawh a. Bialpa tha tak a nei ve ta bawk. Berhpuia leh Puipuia te lah lehkha an thiam zêk a. An chhungkua chu hausa le lu lo mah se; an hlim ve ta viau mai. Thenzawla a pa hotel hralhna bakah an in hmun hralhna te pawh khawih chet lohin a la awm ve zel a. Nakinah a naute mamawha hman atan tiin Ruatfela hian rilru nei takin a dah tha ve a ni. Arini dinhmun tha lo chuan a tibuai ve khawp mai. Pu Thanga koh angin hmanhmawh takin Damdawiin lamah a tlan chho ve ta kha a nia. Arini hmel a hmuh rualin a tliak hnãwp a ni ber e. Ni e, mi pangngai hmel a pu mawlh lo a ni. 

"Arin.. Arin.. " tiin a kut a vuan a. A lo melh kuau ringawt. Vawi tam mutthilhna damdawia an jection tawh chung paw'n a muhil duh miah lo. Doctor te chuan enkawl ngaihna vak an hre lo. Psycho ward lama awm tur a ni naa, tunah ward pangngaiah an la dah rih a ni. 

"A kut thi nasa lutuk kha chu hmanraw hriam tak eng emaw hmanga a zai vang a nih kha.. " Doctorin Pu Thanga a hrilh mawlh mawlh a. 

"Anih a tha chhuak leh thei ang em? " 

"Thil mak hi kan beisei thiang alawm. Ka pu, chhel takin awm rawh u, nakinah Psychiatrist lam ten an han kawm ang a, an ni lamin chanchin an hrilh thei ang che u. Ka sawi ve theih awmchhun chu hlauhna nasa takin a thluak a luhchilh tlat a, tin, rilru hahdam lo leh thlamuang lo rng renga a awm vangte pawhin a ngaihtuahna fim a bo a ni. Mahse, Pathian kuta innghah hi a finthlak a nia" Doctor chuan a ti leh ta dap dap a. 

Ruatfela erawh Arini bulah a awm tlat a. Zun zung takngial pawhin a chhuahsan lo tihtheih a ni. Arini hmel dang bai leh a mitmeng buai nuaih chu a lainatawm ngawih ngawih a ni. 

"Complaint kan thehlut ngei tur a ni. A tha chhuak tawh lo a nih phei chuan ka lung a dam ngai lo vang" Ruatfela chuan zaidam tak, ti tak em em si hian a ti sup a. Pu Thanga pawh a bu nghut mai. 

"Hetianga ka fanu duatlai siamtu hian a phutawk hremna chu a hmu ngei ngei tur a ni. Naktukah Warden ka bia ang.. " a ti chang rût a. Arini nu erawh a meng sen râm a, eng han sawi thei pawn a lang lo. 

A tukah Psycho ward lamah an sawn ta a. Engmah a la sawi ta chuang lo. Doctor ten ţawngtir tum teh mah se; hre lo ang hmiahin a awm a ni. Doctor rual pawh an beidawng ţan ta. Arini chu ven ngaiin a awm chho tan lehnghal. Amah leh amah intihnat a tum chho a, a sam te a kek vak vak a, awrawl chhuah miah si loin a ban te a elh ngat ngat a. Awmpuitu tel lo chuan nurse ringawt chuan an vil reng hman si lo. Pu Thanga erawh chuan a sawi tawh angin warden biain, complaint a thehlut ta hmiah a. A kal zela magistrate te beng a thlen vaih chuan, Warden te tan thlengin a pawi thei dawn tih a lang reng mai. Chuvang chuan warden pawh chuan a lo ngaizam mai thei ta bik lo va, action lak mai loh chu tihtheih a nei ta lo. 

"A tawk e.. A tha vek e.. Arin, i tha dawn alawm.. Hlauh tur engmah a awm lo ania" Ruatfela chuan Arini kuah bet tlat chung chuan a ti mawlh mawlh a. A sam a keh nasat theih êm vangin mipa sam angin a sam chu an tansak hlawk a. Mahse, thil dangah a pakai leh tho, a bula awm te tihnat lamah a ţuan chho leh ta a. Nurse lungno deuh phei chuan an hnaih tha ngam meuh lo. Court lamin a dinhmun an hre ta a. Pu Thanga complaint pawh bawhzui a ni dawn ta bawk. Lawmi chung pawh a rip sawt turah ngai ang. Court lamin ngun taka an ngaihtuah hnuah, Arini chu rilru buai, mi â a nih tawh avangin, Court chuan a chhuah lailawk ang a, a dinhmun a pangngai hunah ngaihtuah that leh nise tiin. Ni e, Arini chu mi â dahna hmunah dah a ni dawn ta. Ruatfela chuan phal lo teh mah se; Arini chu mi pangngai bula khawsa thei chi ziazang a ni si lo va. Nancy nen an pahnihin Shillong lamah an phur thla ta vung vung mai. Kalkawng tluanin Arini chu a kuah vawng vawng mai. A chang chuan Arini hian a hre ve deuh ni ten a hre thin, a melh leh vung vung thin danah hian. Mahse, a han biak lumlam lahin a ngawi leh hmuk zel si. Shillongah Assylum-ah chuan an dah lut ta poh a. A that chhuah theih nana tawngtai mai loh chu tihtheih a awm ta lo. Kha chen Jail-ah a tãng a. A rawn chhuah ve chhunah mi ã mai a ni ta si. Ruatfela thin hi a so thin. Arini lo khawihtu Lawmi an tih chu a rawn chhuah hun huna rulh let a tum kher mai. 

"Mama, i nau hian nau a kêng em mawni aw ka ti.. A awmdam hi a dik miah lo" Ruatfela chuan a nu chu a melh hû ringawt. 

"Tun hnaiah Arini vangin i buai si a, i ngaihtuah chang lo a ni maithei. Mahse, a nu ka ni a, a dik tlat lo" a ti leh a. 

"Kawm la a tha lo maw? Zaninah" Ruatfela chuan a ti sap a. A farnu neihchhun ni tawh Mampuii chuan nau a lo pai reng a nih chuan, a nghawng ve deuh chu a ring. Inneih hmaa sex hmang lo tur khan a hrilh ngun ve viau si a. A bialpa Vanlala hi misual chu a ni miah lo naa, eizawnna ngel nghet tak tak a la nei bik lo lai hian a ngaihtuahna a luah. A nu leh Mampuii chu zanriah ei khamah an titi ta ngei a, a inthup rei tawh vang nge Mampuii pawh a puak pawp a ni ber e. Zep nei miah lovin a nau pai chu thla thum lai a nih tawh thu thlengin a sawi ta vek a. A nu rilru chu na teh mah se; a fanu a ni miau a, hauh vak a sâwt tawh lo tih a hai lo. Ruatfela pawh chanchin an hrilh ve ta vat a. Pawi a tiin a farnu pawh a kam khat ve hlak nghe nghe. Chutiang a lo nih takah chuan Vanlala te hnena sâwn man ţhing tur chuan, An resort asst. Manager leh driver te chu an tir ta ngawt a. Vanlala te hi venghluia khawsa niin, an khawsa thei ve viau mai. Vanlala nu leh pa te leh chhungkhat te chu an han inrawn hnuah palai kan lo tir ang e tiin thu an inhawntir ta a. Amah Vanlala duhdan pawh a ni hrim bawk nen. Ani hi an unau pathum zinga naupangber niin û nula pahnih a nei a, an upa ber hi LDC niin a nau chiah hian MC -ah cosmetic dawr changtlung tak a nei ve bawk. An senior ve tan tawh bawk a, an inchawm zo ve viau. Amah Vanlala ber hi zirna a chawlhsan tawh bawk si, ruihhloah chuan fihlim mah se, eizawnna a nei lo ber chu a buaithlakna a ni. A pa chuan, "Nupui te i nei ve dawn anih chuan bazara kan dawr an luah saw khar ila sumdawng mai rawh" a ti ta a. Sumdawnna lam tui lem lo mah se, nupui fanau neih chuan sum thawh chhuah a ngai miau si, a hnial ngam ta lo a ni. 

An ti nek nek a, tluangtêin Mampuii te pawh chu an innei ta a. Ruatfela pawn a farnu chu a thlah ropui ve viau, Pu Thanga te lamin an pui ve nasa bawk a. Chhungkhat maia awm an ni tawh a, Arini vang chauhin. Engkimah an inpuitawn tawh tihtheih a ni.. Mampui'n pasal a han neih takah chuan a nu upa ve tawh lam tana chet reng chu a harsat ve tawh si avangin a nu remti vak lo chungin Resort lama pui pah thei tur nula a ruai ta a. Champhai lam mi niin, nula viak tha leh hmel pawh chhe lo tak, zirna lamah pawh pawl 12 pass a ni ve a. Mampuii nen an inrual khat vel awm e. A nu leh pa an inthen vangin a pa nu leh pa a pi leh pute bulah a khawsa thin a, a nu leh pate chuan kawppui dang an nei ve ve tawh a ni. An khawsak a harsat chhoh bakah a patea nupuiin a ngeih lutuk loh vangin Aizawla a nuteii te chhung a rawn bel ve ta chawt a. A nu leh pate ve ve hi belh hleihtheih lohin an khawsa ve ve bawk si a, a lainatawm riau. Chuta chhapah a nuteii pasal chu zu ngawlvei a lo ni si. Chutia a rawn awm ve ngawt chu huphurhna chin a nei ta thuai a, Siampuii chuan dawra inhlawhna te a'n zawng ve lawp lawp a. Hlawh a beitham si. Tihian, Ruatfela hnuaiah an ina chen ve nghala thla khata singkhat hlawh bawk chu a pawm chiang hle. Lawm takin a zui hmiah mai a ni. A chanchin dik tak Ruatfela ten an hriat hnu phei chuan an khawngaih lehzual a, fanu leh farnu ang thawthangin a awm theih phah ta a ni. 

Chutiang chuan hun chu a kal ve beuh beuh reng a. Ruatfela leh Nancy chuan thla hnih danah Arini chu an zuk kan thin. Hma a sawn lo va, a tlahniam lem lo bawk. Thil erawh a ei tha ve nge, a taksa cher chhe lutuk kha chu a zia ta deuh e. Hmuh pawh a nuam ta deuh. Kum hial a vei ta,. Mampuii paw'n fapa duhawm tak a nei ta bawk a. An pa pawn a la duat tluang ve zel. Mahse, Mampui'n fa a neih atanga thla hnihna velah Vanlala ú chiah Veni chu a bialpain a rawn awmchilh ta tlat mai! A bialpa hi amah aia naupang zawk niin a bialpa chhungte lam hian zirna chhunzawm se an duh vangin Veni nen an inneih hi an remti chiah lo va, mahse, Veni chuan nau a lo pai ve si. An tlan dun ve tak naa, A bialpa Peka te chhung lamin an bengkhawn tha duh der si lo. Veni te in lamah an inawmchilh ta ngawt mai a ni. Veni hi sawi tawh angin kum 30 ral kai tawh a ni a, an upa ber Hruaii phei chu 35 a hawlh tawh. Mipa lam ngaihsak lo mi a ni thung a. An inah chuan a thu ber ang tih tur a ni. Mampuii pawn a hlau ber nghe nghe. Veni te nupa awm ve tak achinah chuan boruak neuh neuh sawi tur a awm chho ţan ta a. Veni pasal Peka chuan zu in a lo ching ve nen.. Vanlala nen chuan an inkhak ta zeuh zeuh a, Vanlala nen an inkhak ţumin Veni leh Hruaii chu Mampuii chungah an ţuan thung a. Mampuii nun pawh a chep sawt ta viau. Mahse, a nu leh a ú zilhna angin a vui ngai lo va, a pasal bulah takngial pawh engmah a sawi ngai lo. Tlai khat Peka leng rawn haw chuan zu rim a rawn nam haw leh a, an rualin chaw pawh a ei lo nghe nghe. Vanlala chuan a ú Veni bulah, "Ama thawhchhuah ten rui ve se la, nupui te thawhchhuahin a rui a, chuta karah min la tham lo em em zui a. Lo hrilh ve rawh" a ti thuphung a. 

A nu leh pate erawh hetiang boruakah hian an inrawlh ngai lo tihtheih a ni. Eng ang nu leh pa tak ni ang maw?! 

Veni chuan tûm bâr chungin, "Ka pasal ania, a thu thu aw. A la naupang a, lo hmumawh viau suh. In nuin a fuihpawrh leh tawh che mi? " a ti tân tãn a. 

"Kan nu hian engmah a sawi ngai lo. Kei in nuţa pawn zu far khat. Mah ka in loh laiin ani makpa chhungkhung lehnghalin hetia min pal fo hi ka duh lo" Vanlala chuan a lo ti ve hmiah.. Hruaii zawk chuan, "Vanlalnunmawi, he inah hian i thu lo ber.. Ka pa sum hmanga sumdawng i nih kha, engmah sawi ve suh. " a lo ti khauh mai. 

Vanlala thin thawk chu a ding phut a, "Ka hne ta. In sawi peih mai mai. Fapa awmchhun ka nih hi, ka nu leh pate chawmtu tur ka nih hi. Hetia a lal lo thei ang bera min ena kei aia in makpa thlavang in hauh ziah hi ka ning tawh e. Rilru ka siam fel tawh. Venhimi leh Peka te hi awmpui ula, keiin Mampuii chhungte ka awmpui ve thung ang e" a ti ta hmiah mai le.. Chutah zet zawng pa ber a inrawlh lo thei ta lo. 

"A tawk e. A tawk, Mama, nang pawh i so leh phut thin. Peka hi a la nau deuh a, hriatthiamna nen kan en ve pawh a tha. Veni pawn lo kam khat ve bawk se, makpa chhungkhunga awm te chu inthlahrun a na thin a, a inthlahrung rilru hah vanga rui thin te pawh a ni mahna.. Khatiang inthen darh lam kha chu sawi tawh suh u" a ti ta thlup thlup a. An ngawi tlang ta. Khata tang phei kha chuan Mampuii chu a chêp zual, Vanlala laka ţuan ngam si lovin amah Mampuii an tâwng a. "Thingtlang nula" tih chu an ţawng el zinna ber pawl a ni. A fapa pawh chuan lawm leh chhaih a hlawh meuh lo. Hruaii hi chuan a dik a dawk thlu lovin Veni a ţan rum rut ringawt a. A nu lahin Hruaii hnung ngawt a zui bawk si. Peka chu an fuihpawrh zawk emaw tihturin a khawsa thiam riau lehnghal. 

Sumdawnna vangin Vanlala a zin a. Zan hnih lai a riak dawn lehnghal. Mampuii chuan a huphurh ru ngei mai. Zanriah an ei kham phat atangin nau paw chungin a tifel vek a. Tuman an khawihpui lo. Naute lah a lo ţap ve reng bawk si. Vanlala a awm hi chuan, Veni leh a nu hian an khawihpui ve thin. Mahse, zanin chu an chawl hmak mai. A intihfel zawhah nau a awi hlah hlah a, lak chhawktu nei nise inbual a duh tehlul nen, chhunah inbual hman lo khawpin a buai si. A inkhawngaih ru hle. An rooma nau a awih lai chuan, Hruaii aw hian, "Thingpui rawn lum rawh. Inleng ka nei" a rawn ti a. A ner sawk. Hnial ngam hek lo, phur lo zetin a va chhuak a, Hruaii chu an veng pathlawiin a lo thutpui khur mai. Thingpui chu a lum rak rak a, a pek fel zawhah roomah lutin an inawi leh a. Naute a muhil ta maw tihin dim takin a muttir a.. Inbual turin bathroomah a luhsan ta a. 

A inbual zo chu a meng phawk deuh. An room kawngka a lo inhawn deuh vang chuan.. Mahse, mak a ti rei lo. Peka hmel a hmuh rual chuan a tawlh hnung deuh a. Ani lah chu a rui tih a lang reng mai si. 

Sehchilh lek lek hian, "In pa a awm si lo va, i khua a har ang ka tia.. Zanin chu" tiin awmze nei zet hian a rawn melh a nih chu! Mampuii chuan hlauthawng takin, "Khawngaihin chhuak rawh" a lo ti tham chhal a. Peka a nui hawk. Khum mawng lamah chuan an indinchilh ta ran mai. Peka chuan Mampuii awmbawr vel chu chul thuak thuak pahin, "Veni ai chuan i nei tight zawk ang" a la ti zui! Mampuii thinin a tuar ngang lo va.. A beng ta ţhuai mai. A theihtawpa namin a nawr chhuak a. 

"Chhuak rawh.. I va tenawm ve.. " a ti bah nuai a. An thawm a ring tha bawk nen, mi dang pawh an rawn lang ve ta nghal a. Thil awmzia Mampuii'n a sawi hma chuan, Peka chuan, "In monu hian min beisei a, ka duh si lo va, min nam chhuak anih kha.. Remchang a zawng reng thin" a ti ta mai le.. Veni a rawn kal tawrh tawrh a, Mampuii biangah a beng ta ţhuai mai. A kek pah bawk. 

"Dawt a sawi anih hi. Amah zawkin alawm min beisei.. Ka thinrimin ka nam chhuak anih kha" a tih ţâwk ţâwk pawh chuan ngaihsak a hlawh lo. Pa ber lah a meeting daih si. Tichuan, chumi zan chuan Mampuii chu an hnawtchhuak ta a. A pasal lah Hruaii'n biain, "Ka rin ang ngeiin a mualpho ta e. A hma atanga ka rinhlelh ruk ang kha a thleng. Peka a lo beisei a. Hei kan kaltir ta mai e" tiin. Vanlala'n engmah a sawi ve hmain an off hmiah bawk. Mampuii chuan ţap pur chungin a ú a zuk bia a. Ruatfela chuan rang takin a han hruai ta nghal. In an thlena thudik a han sawi chuan, Ruatfela a ling ve phat, a nuin a lo khap zawk a. A farnu hian a vuivaina engmah a hrilh ngai loh vangin chutiang boruak an nei chu mak an ti tlang takzet a ni. Vanlala rawn haw hma chu engmah sawi loh an titlu ta rih a. Ani rilru lah hriat va ni hek suh. 

Vanlala rawn haw takah chuan a ú te thusawi chu awih harsa a tih êm vang leh an boruak neih tawhte a ngaihtuahin Mampuii biak phawt a thain a hria a. A rawn pan ta nal nal a. Mampuiin thudik a sawi takah chuan a awih thlap mai. A thin pawh a ur nangiang. Ruatfela'n khap lo na se chuan a makpa chu a nem chhuak duh hial ngei ang. Chutiang boruak lara chenho chu rem ţeuhin a lang ta si lo va, Vanlala pa te nen an han sawiho hnuah Tanhrilah Ruatfela te in piaha Nancy te in sak thar chu Vanlala te nupa chuan an luah ta a. A dawr erawh a la luah chhunzawm zel dawn thung. Chhungkaw boruak hi a lo danglam thei khawp mai. 

Sawmpuii pawh a fel thar thar ngei mai. Nula tawng tam a ni lo naa, Ruatfela nu nen chuan an inkawmngeihin an sawi duhzawng a inang em em a. Pi Zuali chuan a ruk tak chuan fa mo a tan a awt ru hle. An zia an inhrechiang telh telh a, a fapa rilru hre mah se; Arini chu a that chhuah a ring tawh lo nen. A fapa chu a leng tar mai ang tihte pawh a hlau a, a rukin ama buai buaiin a buai ve thin khawp mai. Ruatfela erawh chuan Sawmpuii chu farnu ang riakin a en thung a, a thinlungah Arini a thi ngai eih lo. Mahse, ani lah that chhuah tik ni a nei mawlh si lo. A chang chuan a beidawng ve rum rum thin. Mahse, an hun hmasa lama Arini'n a tana a tihsak zozai te avang pawh khan phatsantu nih leh chu a duh hlawl tawh lo a ni. 

"U Ruatfel, ih maw, Champhaiah nangmah ang tawk a awm a. Kan tleirawl laiin kan star thei tawp" Sawmpuii chuan â deuh phiang phuang hian a ti a. A lo nui ringawt. 

"Chuan, ih, i bialnu chunga thil thlengte kha ka lo hre ve a. Pawi ka ti tawp. Ka khawngaih bawk sia, ka hmu ve chak e" a ti leh sar sar a. 

"A hmel tha a, a rilru pawh a tha. A that chhuah veleh ka inhmelhriattir dawn che u nia" Ruatfela chuan a lo ti ve vat. Sawmpuii mitmenga eng emaw lang zauh chu a hmu lo der tlat thung. Sawmpuii'n a ngaihsanzia leh mitmei hmuh nise hminsa a nihzia a hai bik lo va, chuvang chuan nau ang tak takin a en lui tlat a ni. 

"Ruatfel, Ruatfel, Arini a bo" Nancy thusawi avang chuan a thu chhuak hlawl mai. A lung a phu dawt dawt a, a puan sin chu hlimin, "Engtin? " a ti thei ţãwk! 

"Ka hre lo, hnathawk ten min lo bia a, mut dawna damdawi an va pe tur chu a lo awm lo tawp mai a ni" a rawn ti a. Rin aiin Nancy chu a intipachang thei. 

"Ka.. Ih, engtin nge niang? " Ruatfela chuan mit chhing sawk chungin a ti a

"Naktuk tlaiah kan chhuk dawn a. I duh chuan i rawn kal ve thei ang" a rawn ti leh a. 

"Ka rawn kal ve ngei ang" a ti nghet charh mai. 

A tlaivar chiang kher mai. Hmeichhia akara mi â lehnghal chu Shillong khawpuiah engtin nge a vahvaih tak ang? Tu ten emaw lo khawih ta se.. Ni lo.. A hmai a hup tlawk tlawk mai. "Lalpa, min hmangaih a nih chuan ani pawh i hmangaih ang. Ka duh i hria e" a ti chhuak hawk a. A mittui tla pawh chu zahah a la thei bik lo. 

A tukah Shillong lam an pan ta nghal. Kalkawngah pawh an inbe tam lo hlawm kher mai. An thleng a, Arini an dahna hmun an va pan nghal. A bo dan hria an awm lo. A dinhmun a la ngai reng thu leh mi â a la nihzia erawh an sawi. Chutak chu a chhungte tithlaphangtu a ni. Shillong khawpuiah zawnna bik pawh nei chuang lo va, an tal buai laiin, Assylum atangin call an dawng ta a. A lo dawngsawngtu Pu Thanga chu a ding chawt mai. 

"Ruang an chhar.. Hmeichhe ruang" a ti thei ţâwk! An vai mai chuan phawk takin an inmelh ţhap a. An mitmenga hlauhthawnna nasa lutuk chu mi hrang tan pawh hmuhhmaih rual a ni lo ve. Assylum lam chu an pan zui ta nghal a, Assylum atanga 2kms velah Gauhati lama kal tur nupa tuak that te'n ruang chu an hmu a lo ni. Kawng sir ti ila, hnimhnah zingah rem lo zetin a lo mu a niawm e. An va thlen erawh chuan an lo la chhuak tawh a, tha takin an lo zalh tawh. Vanduaithlak takin a hmai chu silaia kahna niawm takin a chik hrup a, tu nge a nih hriat theihna a awm hauh lo. Mahse, a thawmhnaw hak chu mi â dahnaa an hak thin thawmhnaw a ni tlat si! A pianzia leh lan dan atang chuan Arini a nih theihna lai a awm tlat! Nancy phei chuan, "Ka nau a ni" a ti hial hman. Ruatfela chiahin a ringhlel a ni. A sam pawh a hma ang thoin a kawlh a, kawlh han tih lemah mipa sam ang em em erawh a ni lem lo. A vun rawngah pawh Arini nen an inang êm a ni. Ruang chu tu nge a nih fiah theihna tur amahah engmah an hmuh miau loh vangin Arini angah ngaiin, a chhungte kha an lo ko a lo ni. An han rel mam mam a.. Arini ruang pawh lo ni ta tehreng se; Mizorama hawn ngaihna a awm lo va, a thisen a chhuah nasat vangin rim a nei ţan tawh bawk si. Shillong-a vui mai chu an rel ta a ni. Shillong-a mizo te an fakawm em em a, lainat takin an tuam hlawm a; engkimah an buaipui vek a ni. Ruatfela thinlung erawh a la hel fan a. Arini a nih rin lohna a nei tlat chuan beiseina a siamsak a nih hmel. Ruang chu vui liam a ni ta. Rinsangi, a khawvel damchhhunga a hlimna aia a hlim lohna tam zawk chu thlamuang takin chawl mawlh teh se.. 

Mizoram lama an thenrual te pawhin chanchin an lo hre ve lo thei lo va, an tawrhpui em em a ni. Pi Zuali te chhungkua pawhin Ruatfela an khawngaihna vang ringawt pawn mittui an seng nasa. Tihtheih leh kawng dang a awm miau si lo va le.. Arini chu mitthi anga sawi a ni ta. 

Thla thum dawn chu Ruatfela chuan ama remhriatnain a zawng kal reng tho. A beidawng duh miah lo chu a nu leh a naute ngei ngaihdan pawh a ni lo lek lek tawh zawk. Nancy te pawn bansana a thi tawh tih pawm mai turin vawi tam an ngen ta. Thla li dawn a ral hnu pawha hmasawnna a hmuh theih tak lohah chuan a rilruin ar bo a zawng ve ţan ta. A hma zawng aiin a na daih zawk. Sûn tak têa a sun ve takah chuan a puakkeh a ni ber e. A roomah a tawm tlawk tlawk a, A hna pawh a thawk hleithei lo. A asistant a fel em zawk a, an mualpho lo mai mai a ni. Pi Zuali chuan a fapa awm dan chu tha a ti lovin a lung a dam lo em em a, hauh chiam a sawtin a hre si lo va. Ngaihdan thar a nei ta a. Thil tha a ni ang em tih erawh a ngaihtuah rei ngang mai. Mahse, a fapa nun chhe zel chhan chhuah chu nu tihtur a ni miau a, a fapa chu a tan a hlu em em bawk si. Siampuii hian Ruatfela chu a duh ru em em tih a hai lo va, vawi hnih khat phei chu a fiam zuk zuk tawh nghe nghe. Tichuan, Siampuii chu a be ta nge nge a. 

"I U Ruatfela nun hi chhanchhuah i duh em? " a han ti tê tê a. 

"Tehreng mai. Ka khawngaih lutuk" a lo ti vat a. 

"A nih pasalah i duh em? " a ti tlang ta rawng a. Siampuii chu a meng phawk deuh, "Ti nge? " a ti hâ a. 

"I duh em? " a mita chiang taka en chung chuan a ti leh a. 

"Aw " a lo ti ve hmiah. 

"A nih chuan ka fapa hi kan chhanchhuah a ngai. A pa a vangin fahrah siam a duh lo bur tih ka chiang. Chuvang chuan a fa i pai chauhin kan chhanchhuak thei ang" Pi Zuali aw chu a fiah kekkawk hle. 

"Mahse.. Amah hian min duh ve hleinem" a buai rukna ber a sawi ta. 

"A duh ve kher rih che a ngai lo. A fa i pai phawt chuan a hmangaih em em ang che" 

"Mahse, engtin? Min hua ange"

"Naktuk zanah kan ruahmanna hi kan kalpui ang. Ka fapa ngei chu kan hrai rui ang a, tichuan, i mutpui ang" inring tawk zetin a lo ti leh hmiah. Siampuii chuan mak ti ru viau mah se, Ruatfela chu a duhin dam se a ti ve ngawih ngawih bawk si. Tin, fa hrinsak pawh a châk ngawih ngawih. Ruatfela nu ngeiin pawi a tih loh phawt ahnu tiin a inthiam chawp a. 

Pi Zuali remruatna ang chuan a tuk zanah a fapa eiturah damdawi a phul ta a. Ruatfela chu dar 8 vel atangin a muhil ta bawrh bawrh mai. Mahse, kha damdawi khan hna a thawk thei thoin an ring. Siampuii chu a roomah a lut ta zan zan a. Han chet mai dan tur a vân hle. Mahse, nula thianghlim a ni tawh bik lo va, Ruatfela a duhna chuan pawisak a neihtir ta lo. Duhtawka a khalh kual hnuah a mutpui thei ta. Ruatfela chu rum ţuah ţuah chungin a rawn meng diar diar a, maktih hmel zeta a chunga chetla mek Siampuii a melh lai chuan, "Ka hmangaih che" a rawn ti sar sar a. A rilru a fim chiah loh vang leh nawmna chuan a rawn tuam ve chiai chiai tho avang chuan engmah sawi chuang lovin Siampuii chu a lo pui ta a. Zankhuain an riak dun a ni. A tuka a bula mu Siampuii a hmuh chuan a rum nghut a, zan lam thil thleng chu a mang hriat ruai ruai. 

"Mak ve mawle" a ti sup a. Intifai turin a chhuak ta daih. A zan lehah erawh zu a in a, hei chu a duhthu ngei a ni. A rui tan viau tawh tihin Siampuii a rawn lut leh a, zei taka buaipuia a han chul sek takah chuan, "Mai maia" tiin a ngaih a sam a. Mipa a nihzia a lo lantir leh ta mai. A tuk zinga a rilru fim hnuah Arini vang chauhin a inchhir lehnghal. Siampuii chu hmeichhe enin a en thei chuang lo. A nu te chuan engmah an hre lo angah a ngai a, sawi kher pawh a tum bik lem lo. Harhfim taka zan hun a hman leh tak rih avangin Siampuii te chuan chet an la thei rih ta lo va, a kar leh nilai zanah duhthusamin Ruatfela a rui leh a, chu zan chu an hmang tangkai leh ta. Siampuii fel loh lai tak a lo ni bawk a. Beiseina an nei sang viau mai. 

"Hetiang ringawt zawng a tha lo ve.. " tiin Ruatfela pawhin Arini vanga a tawrhna te chu hneh tumin a hmachhawn chho ve leh ţan a. Harsa erawh a ti khawp mai. A hna lamah pawh a buai chho ve leh ta deuh a, zu pawh a thlah leh ta rih. A nu hian engmah a sawi loh vangin a ngaih a tha lo lek lek zawk, mahse, a nu a ni a, a hrethiam ve aniang a ti rilru ve mai. Thla thar an kai a, Siampuii pawh a intest ta tlut tlut mai. Mahse, a vanduai asiamin a kua a la ruak tlat! Mahse, chutimaia harsa taka a lo hmachhawn a thamral tur chu a ngaingam si lo, Ruatfela lah a intichak tharin a hma anga tuar ngawih ngawih khan a awm tawh bik si lo. Mi dang tan a nung mai ang tih hlauhnain a khat a. Risk lain pregnancy test positive sa online-a an chah theih, a lem chu a chah ta tawp mai le.. Pi Zuali pawh a hrilh hre ngam lo. Tichuan, "Ka rai" tiin test kit chu Pi Zuali a hmuh ta a ni. 

Pi Zuali a lo lawm em em a. Tunah chuan mo neiin a fapa nun pawh a danglam chho dawn ta. A remruatna angin Siampuii chuan, Ruatfela hmuin kit chu a hmuhtir ve ta a. 

"I fa ka pai" tiin. Ruatfela chuan test kit chu a melh ngawt ngawt ringawt. Lawm tur nge lungngaih tur tih a hrethiam lo. A thinlungin a hriatchhuah hmasak ber chu Arini a ni. Sawi mai tur pawh a hre lo. A nu biak mai a tum ta a ni. Tichuan, Siampuii te nen an nufa nen an sawiho ta a. 

"I pa vangin in fahrah tawh a, nang hi chuan i fa hi pa i neihtir ngei tur a ni" tia a nuin a kar takah chuan duhthlan tur awmin a hre lo. 

"Arini chu a rawn let tawh dawn lo.. Nghah chhuah tik ni a awm dawn lo va, chhungkaw din hi a hun ve tawh a ni. Siampuii pawh a lainatawm alawm" Pi Zuali chuan a ti lehzel a. A dik a ni. Lo let tawh lo tur nghaka a damchhung hman ringawt chu eng nge maw a hlawkna ni ta ang le?! Siampuii chu a tan farnu ang chauh mahnise, a fa paitu a ni miau si a, hmeichhe ena en theih hunte pawh a la nei ve mahna.. Mahse, a inthlahrun êm vangin Nancy a be phawt. Nancy lah chuan a lo lawmpui em em thung si.. Tihtur pakhat chiah a nei ta. Siampuii hi a nei ngei tur a ni. 

Inneihna chu a hautak lo thei ang bera buatsaih a duh. Mi sawm vak pawh a tum hran lo. Sawm tur lah a hre hek lo. A nu lah a hlim si, Mampuii lah a lo lawm ve em em bawk. A khawvel thar tur chu ani pawhin hlimpui ngei a tum a ni. Hetih lai mek hian hmana Arini pawngsualtu Lawmi kha ama chenna inah ngei rapthlak taka thah a nih thu a lar hle. Jail atanga a chhuah atanga ni 4 ral zanah chiah a ruang hi hmuh a ni. A bathroom-ah a kawchhung zawng zawng hai chhuah niin a lu chu a bung bawk. Hmutu apiangin rapthlak an ti hle. Police lam pawhin chet an han la rap rap a, rinhlelhawm deuh tur pawh an man nghal nual. Mahse, an ni ngei em tih a chiang chuang lo. Ruatfela erawh chuan, "A phutawk chiah" tih bak a sawi lo. Arini, mi ã-a siamtu chu thih ţhaa a thih a ring lo rêng a ni. 

Siampuii nen chuan inhmatawna dingin Pastor chuan thu a chhamtir a. A thinlunga Arini hre reng chungin Ruatfela chuan a lo chham daih thung. Nancy te chhungkua bakah a thawhpui ten an rawn telpui thei a. Tam lo mah se, an hlim ve tho mai. Siampuii hlim hmel pawh a tai hlar mai. Thu an chham mek lai chuan Resort hungna thirlen thlanglam-a theihai kung lian tak phen atang chuan, hmeichhe pakhat dâng bil bel, cher zawr angreng tak leh sam boys cut hian mittui tling pam chungin a lo thlir ve ngawih ngawih mai. Tuman an hmu lo. 

"Ni e, kh kha a ngaih vang alawm thla eng emaw zat ka bihruk a, kum khat chuang mi â anga ka khawsak ni.. Mipa tha ber leh thianghlim, ka mi ngaihsan tan hian kei hmeichhe tenawm leh bawlhhlawh, mipa leh hmeichhiain an pawngsual hnu, vawi hnih tual that tawhtu hi ka phal hlawl lo a ni e. Hlim reng ang che.. " tia a phun sep sep thawm chu a dinna hmuna hnahthel te chauh lo chuan an hre lo vang. A bianga mittui luang chu hruin a inher a. 

"A tel lovin khawvel ka hmachhawn leh dawn ta. Mahse, hei hi ka duhthlanna a ni" a ti leh sap a. Ramhnuai lamah chuan a liamthla ta nghal a. 

Engtin awm zel ang maw?! Zawhna a va tam ëm…