Arini 2

ARINI.. (2)

Ziaktu: Toni Râlte

Lawmi thattu chu han dap chiam mah se; Police lam pawh an lu a hai ţan ta hle. A tu amah chu an inpuang duh der si lo. A thattu khan a haw hle a nih a rinawm, a thih dan rapthlak tak avang khan. Phuba lakna te pawh a nih duh hmel viau e. 

Ruatfela te nupa pawh a sarhu lai a la ni bawk a, an la hlim dun ve zel e. Ruatfela tak hi chuan englaimahin Arini a theihnghilh ngai lo. Mitthi tawh thik ngawt thu awm hek suh, Siampuii pawhin Arini hming lama Ruatfela a ţawngvaih chang pawn a haw ngam lem lo. Tin, a thil tih ruk, a thuruk chu an hriatchhuah a hlau ve em em bawk nen. Chuvang chuan nupa nun an hman dun lai te hian a rukin a rai tak tak theih nan a ţawngţai ţhin. 

"I ni maw?! I ni tak tak em? Ka nau" Nancy chu a khur hlawk hlawk a ni ber. A mitmeng lian tawh sa chu a zau belh kâwk kâwk bawk. A hmaa ding, hmai dâng bai leh cher ţhiak mai, mitmeng ngui zet chu a melh tlawk tlawk a. Ani lahin ţawng tum bik hek suh. Zan dar 11 a pel fel tawh a, a kawngka rawn kiktu avangin mut chhuak tak chungin a va hawng kha a nia. A pasal a zin lai a ni a, a fate erawh an muhil tawh thung. 

"Arin" aw khur der derin a ti leh sap a. 

"Ú.. Khawngaihin" a rawn ti tham chhal a. A aw chu a ri chang chang a ni. 

"Engtin nge? Hei hi engtin" Nancy chuan bangbo zetin a ti leh mial mial a. A nau tharauin a rawn tlawh zawk te hi a ni mai lo maw? Mahse, a hlau chhete lo va, thlarau pawh ni raw sek sek, a nau hmel a hmuh leh vang chuan a chhungrilah phurna nasa tak a piang nghal a ni. 

Sofaah chuan a kuai thu a. Chhuat lam a bih ran mai. Tuisik a va laksak a, a lo in khawlh khawlh a. 

"Ka pa te ka bia ang aw" a ti leh a. Arini chuan a lu a lo thing nar nar thung. 

"Ti suh. Hre rih lo se ka duh. Ka nu a inthunun thei lo vang. Nakinah ka la hriattir dawn tho. Tuna ka duh chu, khawi hmunah emaw mi dangin min hriat theih lohna hmuna min thukru turin ka duh che a ni. A bikin Ruatfela hian ka la dam tih a hre tur a ni lo" Arini chuan hah hmel zet hian a ti khalh khalh a. 

'Mahse, engvangin? Ani pawh nangmah vangin mangang reng rengin a awm asin. Nupui erawh a nei tawh" a lo ti chuai raih a. 

"Ka hria.. An inneih ni pawh khan ka rawn kal alawm.. Kha kha ka duhthusam a ni. Hlim taka hmeichhe tha tak nena nun bul a tan hi a tha.. A phú ve tawh em em e" sehchilh lek lek hian Arini chuan a ti a. 

"Ti nge bihruk kher a ngaih? Ka pa te lawm dan tur i ngaihtuah lo em ni? " 

"Ka biru rei dawn hleinem. Ni rei lote bak a ngai lo. Ka hun hman zel dan tur ngaihtuah ka duh a ni. Tin, ka hmel hi kan thlak lo a nih chuan, jailah ka tan leh a ngai dawn a" Arini chuan a ú melh kiau chung chuan a ti a. Nancy pawh a bu nghat nghat. Ni dawn tak e, Arini a la dama mi ã a ni tawh lo tih an hriat chuan jail lamah bawk a liam thlak a ngai leh dawn. A phal tawh lo, a nau hian zalênna a hmu ngei tur a ni. 

"Anih chuan, rem ka ruat ang a, hnial miah suh ang che. Ka pasal thianpa Dr Ramesh kan pan a ngai ang. Zaninah ka bia ang a, naktuk chawhnuah kan chhuak nghal dawn nia.. A tha em? " a ti ta mawlh mawlh a. Arini pawh chuan a ú chu a ringtawk tih hriat takin a lo bu ve nghat. 

"Mahse, i hmel kan thlak hmain ka pa ten an hmu ve phawt tur che a ni" Nancy chuan a ti ta a. A phone a ban a, a pa number a dial nghal bawk. Arini tan hnial ngaihna a awm tawh lo. Nancy chuan, "Aw ka pa, tlai deuh tawh mah se, a pawimawh tawpkhawk a. Ka nu nen lo phei lawk ta che u" a ti lang lang a. Arini erawh che chang lo vin a thu ngawi reng. Kar loah an kawngka chu a rawn inhawng a. Pu Thanga leh Pi Mali te chu an rawn inzui lut ta. 

Ngawi renga lo thu, Arini hmel an hmuh rual chuan Pi Mali chu a rak thawt a, a tlu dawn ta mai. Pu Thanga chuan a pawm vat a, Nancy pawn a lo kuah ve bawk. Pu Thanga mitmengah chuan mak tihna te, hlauhna te, lawmna te a inlar chhawk zut zut mai. Thi tawha an ngaih an fanu ngei mai kha nungdamin an hmachhawn leh ta si a! Mihring pangngai tan chuan awlsam taka dawnsawn a harsa ve khawp ang le.. 

"I ni tak tak em? " Pu Thanga chuan a ti hluai a. Arini chu rawn ding chhuakin a bianga mittui luang chungin, "Pa" a ti chhuak thei ţãwk. Pu Thanga nen chuan an inpawm ta chawt a. Patling meuh pawn a mittui a dang zo lo, Arini vanga a tawrhna zawng zawng te avangin dem chi a ni bik lo. Arini thi anga an ngaih lai khan ama mawhphurhna angah a ngai a, a inthiam lo em em reng a. An nu lakah pawh a inthlahrung ngawih ngawih zel a ni. Tunah a fanu chu a la dam tih a hmuin a hre ta a, patling tan pawh rawl chhuaha ţah hawm hawmna tham a tling hial ang. Pi Mali pawh a rawn fim ţan a, eng a sawi thei lo a ţap zawih zawih ringawt mai. A fanu chu a pawm a, a biang, a hnar leh chalah te chuan a fawp dan dan a. A lawm tih hai rual a ni lo. An boruak sáhâwk zual a ziaawm deuh hnuah, Nancy chuan Arini hmel thlak a ngaih thu te chu fiah tawi takin a han sawifiah a. Pu Thanga pawh chuan a hrethiam kher mai. A fanu chu chân nawn a duh tawh lo. Jail-a a nun hmantir leh ai chuan, Arini hmel chu hmel dang daih pawh nise a pawiti lo nasa. Zawhna tam tak an nei naa, inzawh hun ni chiaha an hriat loh vangin chumi zan chuan thlamuang taka Arini a mutthilh theih nan hun thawl an siamsak ta zawk a.. Nancy kutah an innghat pumhlum ta. 

"U Ruatfel, U Ruatfel" tia rawn sawi nawk nawktu a nupui chu a melh hû a. 

"I rum nasa lutuk a, i mumang a fuh lo aniang ka tia" inthlahrun hmel tak hian Siampuii chuan a ti a. 

"Nia, mumang mak deuh ka lo nei a.. Mu tawh rawh. A tha vek e" a lo ti ve mai a. Ngawi reng chuan an mu leh ta a. A mumang tehreng chu! Ni e, damdawiin niawm takah hian Arini hi khum sei puiah a lo mu a, Doctor pahnih hian a hmai vun chu an lo hihsak a, na ti hmel erawh a pu lo. "Khawih tawh suh u, ka hmangaih a nih kha" tiin a lo au tuar tuar a. Hre awmin an awm si lo. Rapthlak ti zetin a lo thlir tlawk tlawk a nih kha.. Arini hi ngai viau e ti lo chuan a mumangah hian a hmu khãt angreng a. A hmuh ve chhunah lah maksak deuh deuhin a hmu thin. Mitthi ni tur chuan a thinlung tak hian a phal thei ngang lo a ni. Tihtheih erawh a nei tawh si lo. 

Pu Thanga te nupa bakah Nancy te chuan Arini chu an thut hual ţhap a. Chawhnuah an thlawk thla dawn a. Chumi hmain Arini chunga thil thleng chu hriat phawt an duh a ni. Arini chuan a chil a lem khawlh a, chutah a chhungte chu melh kualin harsa tih hmel zet hian, "Ih, tunah pawh hian ka ţha em tih ka hre chiang chuang lo a" a ti hrâwk a. An lo bu nghat nghat. A thut dan chu siam remin hahdam deuh zawka a thut hnuah a chanchin chu a sawi ta a. 

"Pi Lawmi leh a thian ten min khawih tak fôah leh thuneitu te lamin engmah tih an tum tak si lohah chuan, ka inngaihtuah buai em em a. Vawi khat phei chu ka intihlum ţhelh a ni. Keimah nih kha ka duh lo va, ka inhaw thin. Ka hmel thatna te, ka taksa nalhna te chu ka haw ngawih ngawih a ni. Tichuan, zan khat chu thim zingah ka thu reng a. Tukverh bar kara thla eng lo lang chu ka thlir tlawk tlawk a. Chutah chuan mak deuh maiin ka taksa hi a hniam ruai ruai ka ti mai, ka zawi rawih rawih a. Ka luak a chhuakin ka chau em em bawk. Khum kilhna perek a hma atanga ka lo tah hriam ruk chu la chhuakin ka taksa chu ka sawisa ta a. Engtin chiah nge ka insawisak ka hre lo. A bak zawng zawng chu mumang ang ruaiin ka hria. Khawvel dang daihah hian ka lo awm a. Chutah chuan Pi Lawmi leh a thiante hi ka lo sawisa hrep thin. Nuam ka ti em em a, an thisen chhuak ka hmuh te chuan ka taksa hi a za chuai chuai thin niin ka hria. Nangmah ni hian ka ât dan chu in hre zawk ang. Tichuan, ni khat chu chawhnu lam ania damdawi chi khat hian min chiu a. Ka muhil ta a. Mumang ka nei ta a. Chu ka mumangah chuan ka nihna dik tak, ka hming, ka chhungkua leh thiante, kan in te engkim ka hmu vek mai. Ka muhil ka harh chuan, min uap rengtu boruak úp tak kha a lo awm tawh lo va. Arini ka ni a, Aizawl zarkawtah kan awm tih chiang takin ka hre ta a ni. Tin, Remruata ka thah dan te, Jail chhunga Pi Lawmi ten min sawisakna te kha fiah takin a rawn lang ta uar uar a. Ka â ta lo tih pawh ka hre bawk. Tichuan, ka awmna hmun chu mi â dahna a ni tih ka hre ta bawk. He lai hi ka awmna hmun tur a ni lo tih nen.. Ka ngaihtuahna ka hmang nasa a. Tlan chhuah ka tum ta a ni. Chhuah dil ta ila, phalsak ka nih loh chuan hrehawm takin ka awm reng dawn tih leh min lo chhuahtir ta se, mizoram jail-ah ka lut leh dawn tih ka chiang. Chuvang chuan kawng dang ka dap ta mai a ni. Zanriah ei hun hma si hian compound chhungah tho kan chhuak ve thei thin a. Chutah chuan ka chhuak a, vengtu te en lohna lamah ka tawlh hret hret. Chutih lai tak chuan bungraw phur a rawn tlan lut a. Chu chu remchangah ka hmang thei ta a ni. Bungrua vel an hlan thlak buai lai tak chuan gate in hawng saah chuan ka put ru ta zeuh a. Kalna tur lam ka hre lem lo, ka hmazawn kawngah ka kal ve tawp tawp mai a ni. Assylum ka hlat ve hle tawh tihin kawng peng ka pawh ta hlawl a. A bel lo lam nia ka hriatah chuan ka kal ta a. Mi pawh ka tawk lem lo, motor veivak a awm hek lo. A reh em em a ni. Khua a thim tawh a, mahse, kawng chu a la hmuh theih ruai ruai. Ka chau angreng viau. Ka lu te a rawn hai a, ka pai khut khut mai. Chutia ka petekna lamah side drainah ka tla ta a. A thuk lo bawk a, ka na lem lo. Chutah chuan hmeichhe ruang lo let reng ka hmu ta a ni. Ka rak tuar a, mahse, ngaihdan thar ka nei ta zawk a. Heta tang hian chhuakin Mizoram rawn lut pawh ni ila, Arini ka nih chhung chuan jail-ah nawr liam ka ni leh dawn tho tho tih ka hria. Chuvang chuan, Zoram mipui ten mitthi anga min ngaih theih nan chu hmeichhe ruang chu hman tangkai ka tum ta a ni. Vanneihthlak takin kan pumrua a lo inang hlauh a, a thihna a la rei lutuk lo nge rim pawh a nei rih lem lo. Rilru nuam vak lo chung chuan a thawmhnaw chu ka hlip a, ka inbel ta a. Ka thawmhnaw chu ka haktir ta bawk. A hmel a lan fiah chuan keimah ka ni lo tih an hre dawn si a, ngaihdam dil chungin chu hmeichhe hmai chu lungin ka chhu ta nghek nghek a. Mahse, buaina ka nei, a sam kha a sei tlat! Hmanrua ka nei si lo. Ka vak ka vak a, silai lo let reng ka hmu. A tangkai lo naa a hmaiah vawi hnih chu ka kap hram. A sam mawlh chu a ni. Chutia ka buai ruk em em lai chuan motor a rawn tlan a. Ka biru vat. Chumi hnuah hmalam panin ka kal a, kawng peng a lo awm leh a, chuta tanga hla vak loah chuan motel lian lem lo a lo awm a. Hmanrua ru tur chuan ka pan ta a. A reh hle. Kawngka chu a lo inkhar chip lo va, in chung lamah tawng thawm erawh ka hria. Zawitea lutin, dining hall-ah ka lut a, min hnungchhawn zawngin mipa pakhat hian eitur a lo siam mek a. Vanneihthlak takin thleng silna bul maiah chemte a lo awm a. Thawm dim takin ka va la a, chu pa chuan ear phone a vuah avangin ka thawm a hre lo tawp ang. Chemte nen chuan hmeichhe ruang awmna lam ka pan leh ta a. A sam chu ka sam chenin ka tansak ta a. Ka en vang vang hnuah keimah anga an ngaih hram theih nana tawngtai ru chungin ruang chu hmuh awlsam thei ang berin ka dah ta a. Ka kalsan ta a ni. 

Pawisa ka nei lo va. Neih engmah ka nei lo. Ka ril a tam a, ka chau viau tawh. Ka kal zel tak hnuah motor pakhat lo tlan chu ka phar ta tawp a. Pitar leh a fapa niawm tak an ni. Min phur ve ta a. Ka chhungten min hnawhchhuah thu te sawiin eitur ka dil ta tawp a. Chips an lo nei hlauh a, chu chuan ka taksa chau lutuk pawh a tiziaawm ta deuh. Pitar chuan min khawngaih deuh nge chumi zan chuan an inah ka riak ta nghe nghe. A tukah pawh ka la awm a. Inhlawhna an neih leh neih loh te zawtin an in bul maia chuktuah huan angreng an neih chu tifaitu an mamawh thu an sawi ta a. Tichuan, ka thawk ta a ni. Pitari chu hmeithai hausa angreng tak a ni a, a felin min duat ta viau. A fanu ram danga awm thawmhnaw te min haktir a, an hnenah chuan heta ka lo chhoh hma kha chu ka khawsa ta a ni. A fapa chuan nupui nei tawhin an inthen a niawm e. A faten an rawn tlawh zeuh zeuh thin. Ka tan a hnawksak lem lo, khawpuiah hnathawkin nitin a kal bawk a. Pitari nen chuan in kan nghak thin. A changin pitari thiante an rawn kalin chaw te an eikhawm ve thin. Mizo ka ni tih ka sawi lo va, mizo tawng ka hmang ngai hek lo. Tichuan, ka pawisa neih ve te ka khawl zel a. Zoram lama rawn chuan chhoh vata ka nun tichhetu Pi Lawmi laka phuba lak chu ka tum nghet bur a ni. 

Tichuan, ka inkhawl ngah ve hnuah ka pi bulah khawpuiah ka mamawh lam tur anga insawiin Zoram ka rawn chuang chhuak ta a. Ka thiltih hmasak ber chu Pi Lawmi zawn a ni. Amah a lo larin hmelhriat apui a ngah a. Ka hre ta vat reng a. Jail atangin a lo chhuak tawh ngei bawk. Tichuan, zan laiah a ruih laiin ka luhchilh a, ka thah dan chu a ruang atang khan in hre tawh mai ang chu.. Ka hlim veng veng mai. A phutawk a ni tihah ka chiang. Tichuan, hotel pakhatah ka innghat a. Ka pawisa khawl kha a lo thahnem ve tawh bawk nen, mahse, ka hmelhriat ka hmu ang tih hlauhnain ka khat thin. Chuvangin buaina a punlun zel loh nan ka u ka rawn pan ta tawp a ni e" tiin. 

Pu Thanga te nupa chu an thaw hawk. An fanu duatlai chuan tual vawihnih ngawt a that ta. Mahse, an demin an thiam lo phal chuang lo, an fanu a ni miau a. Tunah chuan a zalenna tur an ngaihtuahsak a tul ta a ni. 

"Bawihte, lungngai miah suh. Hmel thar i nei ang a, khawvel tharah tuma tihnat theih tawh lohna hmunah nun bul i ţan dawn nia aw" Pi Mali chuan a ti a. A mittui chu a hru pawk pawk a. 

"Ruatfela hi kan bum reng thei ang maw? " Nancy chuan a lo ti khauh! 

"A hnaihah ka awm dawn hleinem. Tin, nupui a nei hi ka dem lo. Ka duhthusam zawk a ni" Arini chuan a lo ti sap a.. Lainat zetin a chhungte chuan an thlir tlawk tlawk ringawt. 

Chawhnuah Nancy nen Delhi lam pan turin an thlawk chhuak ta kha a nia. A rilru erawh a kal thui ve khawp mai. Hmana Arini kha phum bo vek a ngai tawh dawn si a. Mahse, tan in-a let leh ai chuan a thlang zawk tho tho. Delhi-a ni hnih an awm hnuah Dr Ramesh chu a inpeih ta bawk a. Surgery ti tur chuan an inpuahchah chho ta a. A ú in eng lai pawha a awmpui avang chuan a zãm lem lo. A tana a ú hlutzia a chiang telh telh mai. 

Ni 10 hnuah chuan a hmai tuamna chu phelh a ni ta. Darthlalang hmaah chuan a ding vang vang a, a hmel thar chu a thlek veng veng mai. Mizo nula hmel pangngai leh zahpuiawm lo tak, hlim theih hmel tak a lo pu ta chuan a chhungril nun a tiphur a. Hmel tha a inti in, amah a ang lo tih a hai lo. Tihi chuan tuman Arini a ni tih an ring pha tawh lo vang. Ni 20 hnuah Aizawlah an let leh ta a. Pu Thanga te fa lak (adopt) angin an vengte chuan an hre kumkhua tawh ang. A hming thar pawh a pa phuah ngei, "Lalnunthari " a ni tawh ang. Tharte tih chu an koh duatna a ni. Thenawm khawveng te nena inlenpawh vak an ni lo bawk a, hria an awm meuh lo. Amah a tuallim lo bawk nen. Resort-a kal a chak thin ngei mai. Mahse, a insum ve ţang ţang thung. 

"Siampui, vawiin chu han in checkup tawh ru aw. Mama pawh a awl ni a ni bawk a, ka damdawi min lo leisak nghal dawn nia" Pi Zuali chuan bawkbawn chan pah chuan a ti mawlh mawlh a. A hma pawhin in check up turin a ti tawh a, Siampuii hian chhuanlam a siam zel a, a chang leh a inti dam lo vak a. An kal lo nge nge thin. Vawiin chu hnial a harsa tawh maithei a ni. 

"Nia, bakah vaccine te pawh lak a ngai a ni lawm ni? I lak awm pawh ka hre lo. Naute tan a tha lo a nge" Ruatfela chuan a lo ti ve a. 

"Nia.. Kan kal dawn nia" a lo ti chuai raih. Ruatfela ai mahin Pi Zuali ngaih a tha fahran tawh lo. Lantir erawh a la lantir êm lo va. An inneih atangin thla hnih a liam lek lek tawh a, Siampuii awmdan ngai reng leh raino luak chhuak emaw luhai tih vel a nei ngai miah lo chu mak a ti deuh tawh a. Amah Siampuii a rinhlelh vang lam ai mahin nau hi a lo chhiat ang a, a sawi ngam lo zawk em mawni dawn le ti ang zawngin a ngaihtuah a ni. Ruatfela erawh mipa tih takah thil a chîk em em lo va, chutiangin ngaihthat lohna a nei lem lo. Zan khat nupa nun hmanpui a tum erawh chuan theihtawp chhuahin a lo hnar a. A kap bawr vel chu a veng rûn bawk. Chu erawh mak a ti deuh. Mahse, hmeichhia chu an mood hian a chawi êm a, a mood-ah a cheng rih lo ni maiin a ngai. 

Chaw ei khamah an insiam a, Siampuii chu a phur fahran lo kher mai. Dâwt hmanga a pasal leh a nu a bum chu a inchhir tawh viau mai. A sawi ngam tawh der bawk si lo. Motorah pawh an inbe tlem ngang mai. Doctor chu amahin a va hmu a, nau pai in check up tur nisi, nau pai bawk si lo chu Doctor chuan mak a lo ti nasa mai a. Mahse, "Khawngaihin nau pai treat in min treat hram rawh. Thla khat lek a nihin ka chhiat a, ka sawi ngam si lo va.. Min khawngaih rawh.. doctor" tia a ngen ngawih ngawih avang chuan, lungni lo tak chungin rai puar ten an ei thin damdawi te chu a lo chawh ve ta tho va. Fimkhur tur erawh chuan a hrilh. Ruatfela pawn ngaihtha takin a lo nghak a, thil dang ti pah lem lova hawn mai an tum lai chuan, Nancy leh nula pakhat hi an rawn lang ve hlawl mai. 

"Ehe! Eng nge in tih dawn? " Ruatfela chuan a lo ti var a. 

Nancy bula ding nula chuan a rawn melh eih lo, a hmuh tawh hnu a ang a ti a, mahse, a hrechhuak zo tawh lo. A pian leh fuke te chuan tu emaw a hriat chhuahtir chiang. Chu erawh sawi kher tul a ti lo

"Hei ka nau hi a inentir lawk dawn a. Taka i la hre lo tak ang, Arini aiawh tura Pathian min pek a nih hi. Tharteii a nia, Tharte, hei ka resort enkawltu Ruatfela a nih hi, hei hi an nu Siampuii" tiin Nancy chuan confi zetin a inhmelhriattir zung zung a. Tharteii nen an inchibai chuan Ruatfela chuan a kawchhung fan rawih thei thil eng emaw hian a rawn luhchilh ni tlat hian a hria. Arini aiawhtu a nih vangte pawh a niang e. 

"Chuan tun kar tawpah kan chhungkuain chawlh kan rawn hmang ang. Mikhual chu lo nei rih lo mai rawh aw" Nancy chuan a tih zawm zat a. Ruatfela a bu nghat. An inkalsan ta a. Tharteii chu a hnunglam atanga a va thlir chuan Arini chiah chiah! A ngaihtuahna chu paih bo tumin a inthing nar nar a. Siampuii nen chuan motor dahna lam an pan ta nghal a. An ţawng tlem dun kher mai. 

Mampuii te chhungkua pawh an la hlim tlang ve zel a. Vanlala sumdawnna a kal tluang roh a, an mamawh tawk na nâ na chu an nei ve thei zel e. A chhungte nen an inbe pawp vak lo va, a pa hian a rawn be ve zauh zauh. Veni te nupa pawh boruak dang an nei zeuh zeuh mai. A zu in a sim duh si lo va, Veni pawh a mangang ţan ta a nih hmel. A naute nupa hnawk a tih em em an chhuak ta cheng a, a pasal chuan a phur a tirit ţan ta. A chhungte lakah a inthlahrung tial tial a, A chhungte pawn an khak ta fo bawk. Ni e, mi chunga rilru chhe lutuk put hi chu hlimna hian a chenchilh rei thei lo a ni e. 

Kar tawp a ni ta. Nancy sawi ang ngei khan an chhungkaw hnih te chuan resort lam an pan ta dal dal a. Tharteii erawh a inhum ruh nasa ngang mai. A hmangaih hmasa ber, a ta ni thei tawh lo tur nena hmun khata han awmho chu thil awlai tak a ni dawn lo tih a hria. A ţawngţai mawlh mawlh bawk. Hetia nun thar a neih tak hnu hian a phak ang tawkin Pathian a bel ve a, a pa lah harhna a lo chang zui vr zel bawk nen. Hmana an chhungkua chu an phumbo ti mai ang, chhungkaw thar an ni tawh. Pi Mali lah Pathian thuah a tuiiin Bible a chhiar nasa a. A fanu tan vawi tam a dilsak thin. Chu chuan rah tha a chhuah ve te pawh a niang e. 

"Arin, huaisen takin aw" a u in a rawn tih chuan insehruh chungin a lo bu nghat a. 

"Hetia i hmuha i pal fo hi a tha zawk. I pehhel zel chuan a harsa telh telh zawk ang" Nancy bawk chuan a ti leh a. 

"Ka hria e" a lo ti sap. Resort an thleng ta. Hnathawk ho in am bungrua an rawn hlang thla sap sap a. Ruatfela pawh zangkhai takin a rawn khi phei var var mai. 

"Chawhmeh eng nge kan siam ang le? " a ti nghal a. 

"Vawksa leh bawngsa kan rawn keng a, duh leh layer kha buhchiar bawk ula.. A tawk reng. Bai kha awm bawk se" Pi Mali chuan a lo ti var a. 

An room tur theuhah an innghat fel a, Tharteii pawh Arini room ni kumhlun thinah a innghat. A lunglenzia chu sawi fiah ngaihna a awm lo. A kawngka an rawn kik dat dat a, a va hawn chuan Ruatfela hian nui sâng chungin, "Tharte, kan tuilumna khawl a chhe rih a, naktukah a thar a lo thleng dawn chauh sia, tui vawta inbual i hreh deuh chuan kan lum thei tho a" a ti a. 

Ruatfela bula ţawng loh hram a duh nen, a ţawng ve a ngai tlat. A hmel thlak mah se, a aw an thlak ve thei si lo. 

"A.. Aih a ngai lo. Tui vawtin ka inbual thei alawm" a ti ta a. Ruatfela chu a ding khawng lah a ni ber, maktih hmel em emin Arini chu a melh a. 

"Thil dik lo a awm em ni? " Arini chuan a ti leh sap a. Harh chhuak thut niawm takin, "A ai i awhsak Arini kha ka hre chhuak thut alawm mawle.. In aw thlenga a inan hi ka lo ring pha lo asin" a ti ta a. Arini a chhing sawk. 

"Ka'n inbual ange" tih leh kawngkhar khar a rual nghal a. Ruatfela pawh a kal kiang zui ve nghal. Mahse, a lungphu rang lutuk avang chuan a ding tawp! A hmel chu a dang, a aw erawh a ngai si! Mak a ti em a ni. 

"Ani chu a thi tawh alawm" tiin a phun sup a. 

Zanriah chu tui ti takin an ei a. An hlim ve dar dar hle. Tharteii erawh a ţawng ve meuh lo. A u fate nen an infiam a. Naupangho bulah deuh hlir a awm. Ruatfela pawh an rualin a ei ve bawk a, ţawng an fimkhur hlawm viau mai. 

Engkim a tihfel zawhah mu turin an in lamah a phei ve ta a. An nu chu a lo mu tawh a,.. 

"I nuamsam meuh na nge? " a ti thuphung a. 

"Umm ka tai a na a" a lo ti mai a. 

"A va zia lo ve.. Rit te hi chawi vak vak suh. Taksa ngeih tawk chuahin hna pawh thawh tur, naupai lai i ni sia" a ti a. Siampuii a îp zawk. Ruatfela chuan thingpui hang te a in leh te te a, Berhpuia leh puipuia ten lehkha an la zir bawk. Siampuii chu zung turin bathroomah a lut a, a rawn chhuak leh bathroom a khar lai chuan, "Ehe! Au Siampui, i kekawr a thi" Berhpuia chuan a ti ta roh a. An hawi rual thap. Pi Zuali pawh chuan Siampuii kekawr mawng val kalh chu a va hmu ve nghal. 

"Ehe! A nih hi" Siampuii chuan a ti a. Roomah a tlan lut nghal. Pi Zuali'n a umzui vat. Siampuii chuan a kekawr chu a hlip sawk sawk a, Pi Zuali lo luh lai pawh a hre lo. A hamhaih vek tawh a ni ber. Kekawrte nen chauha a han awm takah chuan a stayfree hren chu a lang chiang ngang mai. Pi Zuali chuan a va hmu vek.. A ding chawt reng a. Ruatfela pawh a rawn lut ve nghal. 

"Siampui, eng nge thil awmzia? " pi Zuali aw chu a nelawm hran loh hle. 

Kekawr a hak hnu chuan a rawn hawi phei a. A hmai chu a sen vek a ni ber. A pasal leh a nu chuan an melh chiang ngang bawk si. 

"Nu.. Ka.. Ih, englo ania" a ti niah niah a. 

"Nau i lo pai reng reng lo nge i chhiat zawk? " Pi Zuali chuan a ti chang leh fak! 

"A ni lo.. Nu, ka pai alawm.. Ka chhiat a" a ti chul a. 

"I chhiat thu chu ti nge i pasal pawh hian a hriat ve loh? " a ti leh khauh. 

"Ka sawi ngam lo alawm" a ti sap a. 

"Ngawi teh, Siampui, ka lung awi tlat lo. Ka ngaih that lohna a rei tawh. Thudik sawi mai rawh. Nau kha i pai lo tiraw? " Pi Zuali chuan a ti khur leh dat dat. Ruatfela chuan tawng ngaihna vak a hre lo.

"Ih,.. U Ruatfela ka duh em vangin nau pai angin ka insawi ta mai a ni. Min ngaidam rawh.. Khawngaihin" a ţap ta a. Ruatfela'n a kut a hum ruh thung. 

"Inbumnaah pawh a tenawm mah mah a ni." Pi Zuali'n a ti leh nghat. 

Siampuii a alh ve ta nge.. "Nang pawh eng nge i nih bik? U Ruatfela hrai ruia mutpui tura min tirtu kha tu nge? I fapa ngei kha i hrai rui a.. I dik bik lo" A ti ve ta piap piap mai. 

Pi Zuali a tawlh hnung deuh, Ruatfela erawh Siampuii thusawi chuan a deng dawt a ni ber e. A nu a melh a, Siampuii a melh leh bawk. 

"Nangni pahnih hian ka chungah thil dik lo tak in ti a ni. Eng nge ka tih ang ka hre lo. Ka va chhuak rih ang e" a ti nghut a. A chhuak zui nghal. Pi Zuali te pawh inbe tawh lem lo chuan an inkalsan a. Siampuii rilru hah ang thoin Pi Zuali rilru pawh a hah. A fapa chuan a thuruk a hre chhuak ta si a. A haw dawn lutukin a hria. A hmangaih vanga ti a ni tih a pawm thei awm si lo. 

Ruatfela chu in chung zawlah a tlan chho hlawk hlawk a. Au vak vak a chak kher mai. A thinrim a, a rilru a na em em bawk. A nu a hmangaih em em chuan a lo bum reng a, chutah a fa pai anga a ngaih a nupui lah a lo rai awzawng si lo! Engtin nge hetiang hi a chungah a thlen theih? Thutthleng lo awmah chuan a thu hnawk a. A chal a dawm vung vung mai. Thawk a la leh hawk a, van lam thlirin arsi de iarh chu a melh vang vang a. 

"Vanduaina hian ti nge maw min umzui zel mai le.. Eng nge ka tihsual bik? " a ti sup sup a. Thli rawn thaw her her chuan a mita chambang mittui chu a len tle niar niar a. A piah kil thim lai atanga thawm rawn awm avang chuan a thu ngil zawk. A va hawi chuan, Tharteii kha amah hnungchhawn zawngin a lo ding a, an thlang lawka ngaw dur khup lam chu a melh veng veng mai. 

Ruatfela chuan a aw a thian kharh a. Tharteii chu a che lawih, a rawn hawi nghal a, Ruatfela a hmuh rual chuan in hnuai lama tlan thlak a rual nghal. Mahse, Ruatfela chuan a va man chawt a, thla eng hnuaiah chuan hnai zetah an inmelh ta ngawt ngawt mai. 

"Min thlah rawh" Tharteii chuan a ti sap a. Thinrimna erawh a tel lo. 

Ruatfela rilru tawt lutuk inhrikthlakna nei si lo chuan, zah pawh dawn loin, "A ai i awhsak Arini kha ka hmeichhe hmangaih a ni asin. Nang ni lovin ani kha ka bulah ding se, ka phurrit zawng zawng hi min chhawk thei tur" a ti ta piap piap a. 

"Harsatna i nei em ni? " Tharteii chuan a ti nem diai a. 

"Nei e.. Ka nei. Ka ngah lutuk. Vanduaina hian min lo duh em a lo ni.. Ka nu leh ka nupuiin min bum a, eng nge ka tih ang ka hre lo" a ti chuai raih a. Chutia a han sawi takah chuan thawl hawkin a inhre deuh. 

"I sawi chiang deuh thei em? " Tharteii chuan a ti leh sap a. 

"Ka fa pai anga insawiin nupuiah ka nei a. Ka nu lahin min hrai ruiin chu hmeichhia chu min mutpui tir a.. Eng nge ka tih ang ka hrethiam lo a ni" a ti khur dat dat a. Tharteii pawh chuan mak tih hmel zetin a rawn melh kâwk. 

"A va mak dawn ve" a ti hliai a. 

"Ni e, a mak a ni.. Engkim hi a mak" Ruatfela aw ki chu a sang mah mah a ni. Tharteii chu a insum zo ngang lo nge, Ruatfela kut chu lain nghet zetin a hum a. 

"Mipa i ni alawm.. Rilru fim takin inngaihtuah la.. Fimkhur takin chet i la dawn nia" a ti fiah kâk a.. Zawi muangin a chhuksan ta a. Ruatfela erawh amahin chu zan khawhar tak chu in chung zawlah a hmang tlaivar ta thak a. 

A tukah chuan a rilru siam fel tawh niawm takin muangchangin an in lam a pan hnak hnak a. A nu leh Siampuii'n hlauthawng takin an lo hmachhawn thung. Thutthlengah fel fai taka thuin a aw a thian kharh kharh a. 

"Thutlukna ka siam tawh e. Siampuii hian min chhuahsan se la, ka nu erawh ka nu a nih miau vang leh khang thil kha chhan nei lova ti a nih loh avangin ka ngaidam thei mai ang. Mahse, ka mimal nunah tumah inrawlh tawh lo ula ka duh khawp mai. Siampui, nang pawh ka haw lo che. Mahse, min bum char chartu nen chhungkua ka din thei lo, min hrethiam ang che. Vawiinah i nuteii te inah ka han thlah dawn che nia.. " a ti ta dap dap mai le. Siampuii a ţap nghal hlawp hlawp. Pi Zuali erawh a ngawi reng a, a fapa chu a zah ngawih ngawih a ni ber mai. 

"Min ngaidam rawh.. Khawngaihin, a thleng leh tawh lo vang. Khawngaih takin" Siampuii chuan a ti lawm lawm a. Ruatfela erawh chuan a thu sawhsawn a tum loh hmel kher mai. An thawm a ring deuh nge Nancy leh Pu Thanga te an rawn lut hlawl mai. Thil awmzia an han hriat ve takah chuan pawi an tih hmel hle, mahse, ngun taka Pu Thanga mitmeng en tan chuan an boruak chuan a tiphur zawk emaw tih turin a awm thung. A fanu hmangaih ber mipain a nupui a then chu a lawm viau pawh aniang e. Chawhnu lamah Siampuii chu a thawmhnaw te nen Ruatfela chuan a han thlah ta vang vang mai. Kalkawngah kam khat mahin an inbe lo. An ngaihtuahna an kawm char char ni maiin a lang. 

A let leh lamah chuan Ruatfela pawh a zawiin a chau hle. Zan lamah a lo tlaivar bawk nen.. Tharteii lah kha a mitthlaah a rawn lang chhen lehnghal. Engvang teh reng nge mawni dawn ni. A nupui vang chuan a rilru a na hran miah lo, thawveng leh thawl hawk angin a inhre lehnghal. Mahse, a mah hringtu a nu ngeiin a bum ve thei chuan a la nghawng reng thung. Hun eng emaw chen chu a nu nen an inpawhna boruak pawh a chhe ngei ang. Mahse, thisena inzawmna hi zawng a thûk êm a, a nu chu a huat hlen a ring lem lo. Chutianga a ngaihtuahna kawm chung zel chuan resort pawh a thleng thla ve leh mai. Inah chuan Mampuii leh a nu an lo awm a. A rooma luh nghal a tum lai chuan, Mampuii chuan, "Ú, ânu hi dem suh. A hmangaih vang zawk che a ni. Arini vanga i lungngai leh hrehawm ti lutuk kha a hmu thei ngang lo va, a hriat chhun kawng dang a dap ve mai a nih kha.. Chuvang chuan haw suh aw" a rawn ti a. A ding chawt, "Umm ka haw hleinem. Mahse, hun thawl ka mamawh rih" a ti bung nghut a. A roomah lutin a inthlak a. 

Zanriah pawh tihtham a ei lo. A ka a tui rih tlat lo. An hnathawk Rina tirin whisky a laktir a, zanin na nâ na chu lu lam leh mawng lam hre chang lêk lo va chahthlak hmak a duh a ni. A phurrit a kiang deuh mahna. Dar 8 velah in chung zawlah a zu ûm nen chuan a chho leh ta hnak hnak a. Stepa a chho lai lo thlir rengtu an awm tih a hre lo. Lainat tih hriat ngawih ngawih mitmeng nena lo thlirtu chuan, "Kan vanduai dun a ni tiraw? Intawng tura khuanu ruat, awmdun thei lo tura ruat ni bawk si, tuna kan khawvel hi nang leh keia inremna khawvel a ni ve lo aniang e.. Hlim rawh aw" a ti rilru mawlh mawlh a. A chang chuan han thawh lawka, "I hmangaih Arini ngei kha ka ni asin" han tih a chãk. Mahse, thil thleng thei tam tak a ngaihtuah bawk si. Tunah a nupui a then ve chauh a, inrawlh buai ve sek chu a inthlahrung bawk si a ni. 

A half a in zo tawh, a chatthla thei hlek lo lehnghal. Boruak chu a nuam hle mai. A thinlung erawh a rit si. Tu emaw a ngai a ni. Ni e, a hriatrengna pindan luah rengtu Arini kha a ngai takzet a ni. Ani kha chuan a bum ve ngai lo va, a phatsan ve ngai hek lo. Thinlung na taka a siam hnuah pawh ngaihdamna tawp thei lo nen a lo dawngsawng thin a nih kha.. 

"Awm la ka ti. Ti nge? I thih? Mawh? Ti nge min thihsan theih? I va sual ve.. Khawngaihin lo nung leh mai rawh" tiin a ma hriat tawk lekin a phun bul bul a. A sehhmeh lak chhoh a zawh twh vangin zuk la leh turin a tho tuah tuah a, a lu zawng a hai ve chhalh mai. Dar 12 a ri hnai tawh a. An mu vek tawh a ni ngei ang. Chokaah chuan bawngsa fry chu a zuk suak a, muangchangin a chho leh nghal. Mahse, Arini room kumhlun ni thin a kal pelh dawn lai tak chuan ţawng ri avangin a ding chawt. Inthiam chiah lo chungin a beng chu a dawh deuh hû a. Nancy ţawng thawm a hre zui nghal. 

"Ka nau, a harsa ang ka hria. Mahse, i paltlang thei. Khatin amah i lainat vangin ţap suh. Engtikah emaw chuan thudik hriain in pahnih tan khawvel thar a la awm ngei ngei ang. Tunah chuan a nu leh a nupuiin a chunga an thil tih hi a tan a na tawk rih lutuk a, thil dang amah ţhawng thei tur thil chu pek belh rih loh a tha.. Ani pawhin a hrerng ngei ang che" a ti malh malh a. Ruatfela a meng phawk kher mai. Chutah inhnit faih faih thawmin a chhunzawm a. 

"Ni e.. Mahse, vawi khat chauh ka kuah leh chak, a kut te khi ka vuan leh chak.. Ú, ka hmangaih êm a ni. A hlim hi ka duh asin. A nupui kha ka hua, engvangin nge a bum.. A sual lutuk" Arini aw ngei chuan a ti hlap hlap a. Ruatfela chuan a bowl ken lai a thlauh bawl mai! A thawm avang chuan nge pindan lama an thawm chu a reh hmak thung. 

Kawngka chu a chumin a chum ta dawt dawt a., "Arin, Arin, lo hawng ru.. Keimah ka ni.. Lo hawng teh u" a ti tuar tuar mai. Pawisak reng a nei tawh lo. A hmangaih Arini kha a la dam a nih chu! A mumang a ni ang tih hlauin a insik kual vel a. Kawngka chu a rawn inhawng ta. Khumah chuan Arini chu mittui nen a lo thu ran a. Nancy pawh a mittui a tla.. 

A va pan nghal ruak ruak a, Nancy mitmei pawh a veng zo tawh lo. A zuk kuah ta ngawih ngawih. An pahnih chuan nghet zeta inkuahin an ţap khur ta ngawt ngawt a. 

"Ka hmangaih, i dam maw? I dam tiraw.. Ka va lawm em.. I thih hi ka ring lo reng a ni.. Lalpa, ka lawm e. Ka lak atangin i kal bo leh tawh ngai lo vang" a ti mawlh mawlh a. Arini erawh engmah sawi theiin a mawi lo. A ţawng dawn a, a ţap nghal zel. Nancy chuan hmuhnawm ti takin a lo thlir reng a.. A khi sang bawk. 

Arini bek tawn tawna chelhin a kuai dak a. 

"A tawpa tawpah chuan Ruatfela leh Arini te chuan khawvel thar an siam thei ta.. " a ti sup a. Arini hmui sen hiamah chuan a fawp ta ngawih ngawih a… 

(Hman lo chungin ka ziak a. Mistake a awm maithei. A tawp tawh aw)