Zirsangliana... last

ZIRSANGLIANA.. (Last chapter) 

Ziaktu: Toni Rãlte

Khawvar dawnah kan thleng a. Chauh pawh a sawi theih loh. Ka pa an dahna Damdawiinah kan tlang nghal. Ka nu leh Thari chu an lo ding ran a. Jeni erawh bench-ah bang nghengin a lo muthlu lawp lawp. Ka nu thlabar hmel ka hmuh chuan ka ţah a chhuak zual. Mahse, Zirsanga'n min fuih nasa bawk a, ka nu thlamuan tur ber ka nih laia lo ţah vak kha a chi ber loh tih ka hria. Kumin hi kan chhungkaw chhiat kum a nih ngei dawn hi. Damdawiin reng kan lut zing êm mai. 

Ka pa chu oxygen hip tirin a taksah hrui an thlung fur a. A la thaw ve ţêk ţèk e. Ka nu chuan a rawn nat dan a sawi mawlh mawlh a. An chaw ei kham kam ţhuah tur kha a pai khut khut a, "Ka Bp check tir a ngai a ni. Ka lu hi a rawn hai leh thut zel" a ti nge nge a. Ngaihthat lohna lutuk pawh nei lo chuan, room lamah a chho nghal a. Mahse, ka nu han chho ve chuan an room kawngka bula ka pa lo tlu reng chu a han hmu ta a ni. A thi tawh emaw an ti hman hial a, thenawm te rawn langin hmanhmawh takin an tlan chhohpui ta nghal a ni. Kan vanneihna chu an han chhohpui lai tak hian Mizorama Doctor lar ber Super Specialist Doctor Hmingsanga a lo awm hlauh mai a. Ani hian a han buaipui ta zung zung a. Nunna êm chu kan hloh ta lo a ni. Hmalam hun zel tur erawh kan hre bik lo. 

Zirsanga chu a motor khalh chau nen, inah haw turin ka hrilh a, Thari leh Jeni te nen an haw a. Ka nu erawh chuan ka pa a kalsan duh dawn lo tih ka hriat vangin ka awmtir a ni. Tihtheih nei lem lo chuan kan thu tlawk tlawk mai. Toileta ka va luh apiangin Pathian ka au a. Ka pa damna ka va dilsak thin. Ka lut zing hle bawk. Keima thiam lohah te ka ngai a, a fanu neihchhun mualphona leh hmingchhiatna tuar zo lovin a nunna hialin a tawrh phah taah ka ngai. Chuvang chuan ngaihdam pawh ka dil ngei a ngai a ni. 

Chawhma chhung zawng bal leh ţawp hnik hnek tak chuan ka awm ve zel a. Ka nu lah a ţap deuh reng bawk si. Chawhnu lamah Thari leh Jeni an rawn lang a, inbual fai te ka lo duh ve bawk nen, ka nu pawh a chauh lutuk ka hlauh vangin ka hruai haw lui a. Chaw te kan han ei sawk sawk a, tihtham erawh kan ei lem lo. Ka inbual a. Ka chau ve takzet a ni. Mahse, ka intihchak a ngai si. Zirsanga pawh a rawn intiharh tawh a. Ka nu chu muhil se kan duh èm vangin kan chiu mu ta tawp. A khawngaihthlak si a. 

"Pathian min hremna a nih hi.. Nang leh keimah vangin ka pain a tawrh phah ka ti mai kei chu" Zirsanga bulah ka ti a. 

"Ka lo ngaihtuah ve tho a. Ni e, ka inthiam lo khawp mai. Ka pa hi kei pawhin ka hmangaihin ka zah lutuk asin. Ka tan chuan pa awmchhun a ni.. Mahse, Kim, ka hmangaihna che hi engtin nge ni ang le? A reh dawn si lo va" a ti chuai raih a. Ka chil ka lem khawlh ringawt. Kei tak pawh hian ka hmangaih asin. 

"Ka pa hi rawn harh chhuak phawt se, kan pahnih chungchang chu kan ngaihtuah tha dawn nia" ka ti ta ringawt a. A lo pawm ve mai. Eirawng kan bawl dun a, zan lamah chuan kan pahnihin kan awmpui mai ang chu.. Kan in chhung chu a ngui ruai hian ka hria. Khaw thim hmain chaw ei sawk sawkin Thari te thlak tur chuan a han chho hmasa a. Kei erawh ka nu ka la awmpui rih. Thari te an rawn haw a, ka nu pawh a rawn harh ve deuh. A mut erawh a la chhuak ngang mai. Chaw an ei a, rawn kal ve a tum naa han awm ţeuh khan kawng ro a su chuang si lo nen, in lo nghak turin kan inthlem thlu thei hram. Tichuan, kei pawh ka han chho ve ta nghal a. 

Kar khat zet ka pa nikhua hre lo va a mut hnu chuan, Doctor te sawi hmangin a damchhuak dawn a ni tih rinna kan nei ve ţan a. An enkawlna pawh a danglam ve tial tial bawk. Sunday zingah a rawn harh ţan a. Kan va lawm tak. Mahse, biak theih erawh a la ni lo. A meng â hû mai. A rawn harh hrim hrim kha kan lawm a ni tawp. Ka thiante bakah Zirsanga thiante pawh an rawn tlawmngai viau mai. Kan pahnih chungchang hre vek mah se, kan tana hriat nuam lo turin engmah an sawi ngai lo. Ni khat erawh Sangzuali a rawn lang ve hlawl a, Zirsanga vel kha a hmain ka hrilh tawh a. Ani hi zawng thluak hmang vak lo chi leh ngaihsam ve tak a ni bawk a, "In inhmangaih phawt a hnu.. Cousin pawh an innei fo alawm. Ka thiannu pawh a nî fapa nen an inru daih" a rawn ti bawrh bawrh kha a nia. Min hnem thiam dan ve ber chuan min tiengthawl ve phian. 

. "Mate, Zirsanga hi hnar phal chi a ni bik lo a nih hi.. A pa bawk sia, a care tho bawk che sia.. Awiii tiang bialpa hi ka nei ve chak" a ti ham ham a. Amah Zirsanga erawh a awm lo. Ka nui ve ringawt. 

"Engtin nge a duh che le.. I hmel hi a that em em pawh ka hre si lo" a la ti zui. 

"Awii mahse, Kan dinhmun zel tur hi a buaithlak tawp.. Ka hrethiam tawh lo.. Mi min sawina te hi chu engah mah ka ngai tawh hran lo naa, ka pa ber hian min tibuai" ka ti a. 

A ngawih vang vang hnuah, "Aa.. Pa Tluanga pawn hriatthiam hun a la nei ve tho vang. Tiang na nâ na te chu" a ti leh puat a. 

"A ni ringawt lo. A tan chuan a zahthlak bakah a fa hrawn kha a makpa a ni daih dawn a. Awm dan thiam a har dawn asin" ka lo ti a. 

"Khang te chu i ngai harsa a nih kha. A fapa a ni reng dawn tho alawm.. Tisawn in inah in awm reng ang a, an tan pawh a tha daih zawk" a ti ta zel a. Ka ţawng ve hmain a kut vai nghekin, "Ka hria.. Awiii a tha lutuk, Mate, rai rawh. I rai phawt chuan i pa pawn a phal hrim hrim ang" a ti hluai a. Ka lo nui tawp. Mahse, thil ka ngaihtuah chhuak nghal, Rai maw?! Thla kalta kha ka period miah lo! Tun thla erawh ka period hun a la thleng lo deuh a. Ehee! Kei hi ka rai mawnni le.. 

"Awii Mate, thla hmasa kha ka period miah lo.. Ka rai aniang. I sawi takah chuan ka hrechhuak zawk" ka lo ti ve hluai a. 

"In inti mi? " min melh kur chung chuan a ti zawi sap a. 

"Ti ve e.. Vawikhat. " ka lo ti a. Ka zak deuh.. A ţawng leh hmain Zirsanga a lo lut a. 

Sangzuali chu a chhuak vut, a ngaihna ka va hre lo tak. 

"Min hua mi? Ka lo luh veleh a chhuah daih" Zirsanga pawh chuan a ti a. 

"Haw lo vang. A zung dawn aniang" ka lo ti a. A eitur lei ho chu ka phawrh nghal a.. Ka pa mut dan a va siamrem a, "Ka pa hmel that tawhzia hi.. A tha chak tiraw? " min rawn en chung chuan a ti a. Ka lo bu nghat ringawt. Sangzuali a rawn lut leh hlawl. A thil ken lai chu min pe a, makti zetin amah ka en. "Va test rawh" a ti hmuk a. 

"Thla khatah a lang tawh mi? " ka lo ti hû! 

"I mawl siah, kar hnihah pawh a then chu a lang tawh. " a ti a. Zirsanga chuan a ngaihna hre lo zetin min melh tawn sek. 

"Engtin nge test dan? " ka ti leh hram. 

"I zun kha i thlawr ang, hei tah hian.. Chuan i nghak deuh ang a, rin sen pahnih a rawn lan chuan i rai tihna" a ti zung zung a. Ka chhuak tur chu Zirsanga'n min lo chelh, "Eng nge a awmzia? " a ti a. A mitmengah chuan phurna ka hmu. 

Ka nui a, "Ka rai in ka hria a" ka ti a. 

"Ka fa maw?! Ka fa tiraw" a ti hluai! Ka bu zauh a, ka chhuak nghal daih. An lo inhrilhfiah ve tawh mai ang chu. 

Test kit chu ka melh vang vang a. Rin sen chu a rawn lang kalh. Rei vak loah a hnuaian a rawn inrin phei leh ta kalh bawk! Ka au chhuak lo chauh. Hlauhna te, Zâmna te, phurna bakah lawmna te chuan min zem chuai chuai mai. Zirsanga fa ka pai! Hmanhmawh tawkin test kit keng chung chuan ka chhuak a, Zirsanga bul ka thlen chuan.. Ka lek vâ a. 

"Pa i ni dawn.. zirsang" ka ti sap. Khata a hlim leh lawm hmel kha ka damchhungin ka theihnghilh tawh lo vang. Nuih pawh a nui thei lo, a hnuk a ulh mah zawkin ka hria. Sangzuali a awm ve tih hre mah ila, kan zah zo lo.. Kan infâwp ta vawng vawng a. 

"In va over tak" a lo ti hlak a. Kan han nui leh rih.. Mahse, nau ka pai thu chu la zep rih kan ti tlang a. Sangzuali chungah pawh ka lawm angreng, amah vang chauhin ka rai tih ka inhre sia. Buaina kan tawk ngun malh malh lutuk a, ka period leh period loh lam ka lo ngaihtuah chang lo deuh a ni. Ka pa hian hre ta se, a nat belh ang em? Chu chiah chuan min tibuai. 

Ka pa dam lo awmpui e ti lo chuan kan hlim dun khawp mai. A lawm pheng chuan Eddy a va hrilh zuah zuah. Eddy chu rintlak turah kan ngai. Tlaiah Thari leh Jeni an rawn kal a. Anni pawh kan hrilh ve nghal. Min kuah chuk chuk a, kei ai mahin an lawm hmel zawk. A hming phuah an han inchuh nghal phat! Hahthlak hlawm hian. 

"Ka pain a hming chu a phuah ang" Zirsanga'n a tih takah chuan an inhnial ta lo. Kan in lam pana kan inphur te chu a'n khalh dim em em khawp a! Ka ngei zawk. 

"Naute tan a tha lo vang" a ti deuh tlat! 

Zanriah kan ei laiin ka nu bulah Zirsanga chuan a sawi ta a. Ka pa dam loh atanga a nui hmel kan hmuh vawikhatna a ni hial ang. A lawm ve hlein ka hria.. 

"I pa hi han dam khawchhuak se, innei bung bung kher lovin in inkutsuih ve ang a, mi pawh sawm vak a ngai lo. Kan hmingchhe laklawh tawh a, a tawp thleng ţan khawh mai hi a tha zawk" ka nu chuan a ti hmiah. Ka pa a zah em vang leh a mitmei a ven vangin kan pahnih chungchangah thu a nei ngam ngai lo kha a nia. Nau hial ka ken takah chuan a huaisen ve ta niin ka hria. 

Awiii! Zanah te chuan Kan Zirsanga chu e.. Over tak a ni. Ka dul la puar eih lo chu a teh kual vel a! A zût kual vel thul. 

"Thla thum a nih hma chu kan inkarah a mu ang a, thla thum a nih veleh khum bulah a khum kan siam ang a, a mu ang. Kum 3-5 thleng inah Zirtirtur kan rawihsak ang a, kum 5 a nih veleh Mizorama School tha berah kan kaltir ang. Keiman ka thlah ziah bawk ang, chuan, kum 7 vel a nih hunah a chhang tur chu kan siam chauh ang. A chhang chu nangman i duat ve mai dawn nia.. " te a ti nia! 

"Anih engzat nge kan neih dawn? " ka ti a. 

"A tlem berah 7 aw.. Ka tet lai khan unau ka nei ngai lo va, ka mal sia, a hrehawm em mai. Chhungkaw hung deuh nih ka duh" a ti zuah zuah a. 

"A paitu tur ka nih hi.. Ka peih dawn mi? " ka ti hlak a. 

"In pai chhawk theih te nise aw" a ti leh vung vung a. Ka nui nghek. 

"Ka pa pawh hi awmpui tawh rih suh. Naktukah poster ka va lei ang a, i room khat hian ka tar dawn. Damdawiina naupang chhe zet zet i hmuh chuan kan naute in a chhun palh ang. Chuan, che vak vak tawh lo bawk la" a ti leh mial mial a. A samah ka va kek a, "Zirsanglian.. I mawl siah.. Exer te lak a tha zawk aw" ka ti chiam a. 

"I kawngte a na em? I luak te hi a la chhuak ve miah lo mi le.. " tiin a'n ngaihtuah leh vung vung a. Ka ner nâwng ringawt. 

Ka pa dam loh atanga a vawi khat nan thinthi diaiin kan muhil ve ta a. A tukah chanchin lawmawm lam kan hre ve zel bawk, ka pa pawh rawn harh ve zelin a biak theih tawh a. Kan hlauhthawn ruk em em, A rilru lamin rual a ban lo mai ang a kan tih ruk pawh Doctor te ka atangin a tha vek tih thu kan dawng a. Kan va lawm tak em.. 

Awm mai mai ai chuan tiin darthlalang ka nawt fai a, ka nu damdawiinah a awm a. Thari erawh ka aiawhin dawrah ka tir.. Ka zai pah rat rat bawk. Ka nawt zo ţêp tawh tihin Zirsanga a rawn lut a. Khaw nge a kal dawn a sawi lo va, a chhuak vut kha a nia. 

"Dah rawh dah rawh. Ti nge hna i lo thawh.. Awm mai mai rawh ka tih kha" tih pah chuan min rawn pawm nawlh a. Ka lo ţeu hlar mai. 

Test kit a rawn phawrh a, "Kha va test tha teh".. A ti hmuk. Makti zetin ka melh a, "Eng nge i hriat? " ka ti hâw a. 

"I luak te a chhuak si lo va, i lu a la hai bawk si lo.. Engmah na vel i nei si lo va, i lo rai tak tak lo mi le ka ti deuh.. Va test teh" a ti ta a. Ka thaw hawk. He pa hi chu aw. Thuawih tak chuan ka va test leh a. Pahnih bawk a inrin leh.. 

"Umm a chiang ta. Rai i haw vak dawn lo aniang" a ti a. 

"Thla thum velah te an haw chauh zel a ni lawm ni? " ka lo ti hè hâw a. 

"Nia.. A ni maithei. Tunah chuan ei rawng kan bawl tawh ang. Pa berin ka'n bawl ang e. Bawngsa kawchhung ka lo hawn a, tui mangtarain ka'n siam ang e" a ti suah suah a. A che vut vut. Hrilhhai zetin ka melh reng ringawt. Mahse, ka hlim takzet a ni. Zirsanga hian ka hmangaihna aia nasain min hmangaih tih ka chiang. Sangzuali sawi ang deuh khan engtin nge min duh zawk le ka ti ve fô! Hmangaihna hi chu a mak ve bawk a ni. 

Tlaiah ka nu chaw a han pe a. Ka pa pawh a lo harh thu leh tawng te pawh a tawng ve theih thu a sawi a. A lawmawm tak tak a ni. A bawngsa siam chu a sawi ang khan a tui zêk, Ka ei ţeuh mai. Zanah ka roomah bawk kan inawm leh a. Sawi tawh ang khan ka roomah naute hmel tha zet zet thlalak a tar khat vek. Hawina lam apiangah ka hmu. A hneawm zawk. Pa zawk duhdan a ni miau si a. 

Ka pa pawh a thu chhuak ve thei ta mial e. Doctor te inpekna a fakawm takzet a ni. Thla khat tling lo hret damdawiina kan indah hnuah kan inla chhuak thei ta a. A la chak loin mahni pawn a la kal thei lo. Mahse, a hriatna a buai lo va, mi pangngai tak a rawn ni leh thei chu kan lawm em em tho. A lo hawn atanga ni 3-naah chuan Zirsanga nen min hmuh a duh thu a sawi a. Zâm ru takin an pindanah chuan kan va lut a. Ka nu pawh a lo awm ve. 

"Naute chu thla engzat chiah maw? " a lo ti tham chhal a. 

"Thla hnih vel chu a ni ve tawh," inthlahrung zetin ka ti a. Ka chhut thiam chiah loh vanga Zirsanga'n a thianpa nu a va rawn nghek te kha chu ka sawi duh lem lo. 

"Umm.. Nau hial in lo pai ta si a. Duh aia hmaa in inkutsuih mai a ngai dawn a nih hi.. Hmingchhiat leh mualpho in inhuam thawkhat bawk a, naute lo piang tur tan pawh in inneih nge nge chu a ngai dawn a nih hi" a ti ta a. Zirsanga'n ka kut a rawn hmer vawng vawng mai. 

"Thla khat hnuah he tah in inkutsuih dawn nia" a ti leh ta zel a! Ka aubchhuak lo chauh. Thla khat chu in buatsaih nan a ti ve pawh a ni maithei. 

Ka pindan kan lut chiah chu min rawn pawm kang lawp a, khumah dim taka min nghatin, "Kan tithei ta.. Tunah chuan ka nupui i ni dawn ta e.. Kimi, ka hlim lutuk" tiin min rawn fawp nghal mawlh mawlh a. 

Kei pawhin duhthawh takin ka lo chhang ve.. 

"Mahse, Sex chu hmang lo vang. Nautein hrehawm a ti ang" a ti nghut. Ka nui ta hawk hawk a. Ka pasal ni mai tur, ka nau ni bawk Zirsanga mitmeng nung sar chu ka melh vawng vawng a.. 

"Hmangaihna chuan chak ber nihna a hauh ţhin"

A tawp ta. 

(Amanda hming kan lam thei tawh dawn e. Min lo chhiarsak leh theuh r'u aw.. Zirsanga chu kan mang tha thei ta e.