Zirsangliana 20

ZIRSANGLIANA… 20

(Adds kha khawngaihin aw 😍

Ziaktu: Toni Râlte

Mut dun chi ni hek lo le.. Khum bula thutthleng seiah chuan thinthi vak lo chuan ka mu a. Ani pawh an rawn jection zawhah rei pawh titipui hman lohin a muhil ta thuai a. Sawmpuia bula thil sawi dan tur ngaihtuah reng reng chungin kei pawh ka muhil ta a. 

Thaw ri deuh hrâwk hrâwk ka mang hriat vangin ka harh hlawl mai. Thawh phan pawh nei lovin ka tho nghal vat. Ka va hawi phei chuan, Zirsanga thawk dan chu a dik tlat lo. Ka va pan hnai vat a. 

"Zirsang, Zirsang" ka ti mawlh mawlh a. A rum ţuah ţuah ni maiin ka hria. Rang takin ka tlan chhuak a, Nurse ka va ko chul a. Anni pawh rang takin an lo kal vat. An han chet vel dan leh an mitmei atang chuan ka ngaih a tha thei lo reng reng. Khua a vawt miah lo na chungin ka khur hlawk hlawk mai. Keimah chiah ka awm bawk si. Doctor an phone nghal a, lo kal har ka ti ngei mai. A mut dan te chu siam remin an han mut remtir a. A thawk dan chu a pangngai ta deuh. Mahse, nikhua a hre lo niin ka hria. Doctor a rawn thleng a, a'n en kual a, "A kaih a ni maw? " a tih sup ri chu ka hre pha. Kaih hi engtin nge an awm ka hre ve bawk si lo. 

Damdawi eng emaw in an jection a, kei chuan engtin chiah nge an sawngbawl ka sawi thiam lo. Kil khatah ka ding ngawi reng ringawt. Oxygen an vuah leh bawk. 

"A tha chak kan lo ti ringawt a, a nâk ruh khaw lo kha a chetpui hma lutuk a, a thawk a tibuai deuh a nih hi. Tin, a khawsik hian kaih a siam bawk a nih hi" Dam dapin Doctor chuan a ti a. Tlem chuan ka thaw veng ta deuh. 

"Engtin nge a awm zel dawn? " aw lawi zet hian ka ti a. 

"A tha mai ang. Hei nachhawknain kan chiu tawh bawk a. A khawsik hi a zia vat mai ang".. Doctor chuan a ti a. 

Min chhuahsan dawn chuan, Nurse pakhat chu tlawm leh zah pawh dawn lovin, "Nurse, khawngaihin min awmpui rih thei ang em? " ka ti tawp a. 

Nui sâng chungin, "Flask ka va la lawk ang e.. Hlauthawng suh. Ka rawn kal dawn nia" a ti a. A va fel e aw.. A hnuah a hming pawh ka hre ta thuai a. Mafaki a lo nia! Senior ve tawh lam, hmai hlai phek phuk, kawm nuam zet a ni a, chumi zan chuan zing dar 4 thleng min vil ka ti mai. A chungah ka lawm takzet a ni. Zirsanga pawh a thawk dan a pangngai tawh a, a khawsik pawh a reh tawh. Doctor khan chetpui tawh lo turin min hrilh kha a nia. A zun leh ek pawh thiarsak emaw diaper hrentir a ngai rih dawn a nih hmel. Ka chau tawngkhawng chu Zirsanga khum bawh chuan ka lo muhil ve a niang. 

"Kimi' tia min kohna vangin ka harh a. 

Ka hawi chhuah chuan Zirsanga chu a lo harh tawh a, oxygen pawh a vuah tawh lo. 

"I tha em? " ka ti vat a. 

A bu nghut a. "Nâ i nei em? " ka ti leh a. Thawh a tum chu ka nem mu leh vat. 

"Doctorin thawh a phal tawh lo" ka ti sap a. A ner sawk. 

"Ka zun a chhuak asin" a ti a. 

"Zun bur ka va la ang e" tih leh kal chhuah ka rual nghal. Zun bur chu ka sil fai fe hnuah ka keng lut a. 

"A va ho e aw.. Ka tho thei reng.. Khatiangah ka zung duh lo" a ti hlur a. 

"Zung phawt la, nakinah diaper i hreng dawn nia" ka ti a. A ner nasa lutuk chu ka nuih a za deuh. Tlangvala pumpa, inla pa ve tak, Diaper han hren chu a nuam vak lo ang. Duh lo teh mah se, a zun a chhuak tawh miau si a. Zun burah chuan a zung ta nge nge a. A zung hnem hrep lehnghal. 

"Ka ek chhuak ta se, engtin? " a ti hû a. Bed-pan ka kawk zauh a. A nûr nasa mai. 

"A teuh lo nasa lutuk" a ti nghek a. Ka nui hawk. 

"I zak mi? " ka ti a. 

"Zah ve lohin.. Ka tha vek, ka nâk hi hi a rawn na leh deuh thin tih mai loh chu" a ti a. 

" I ril a tam em? " ka ti ta daih a. A lu a thing nur nur. 

Ka va inthiar a, kei hi inthiar rei thei zet ka ni a. Phone ka khawih pah thin bawk nen. Sawmpuia chu hmuh ka duh thu leh sawi tur pawimawh tak ka neih thu ka hrilh a. Dawrah rawn kala chuta tanga chhuak dun turin kan intiam a. Chhun lamah chuan Zirsanga chu ka nu pawn a awmpui thei mai ang chu.. Ka inthiar zawha cabin-a ka va lut chu, Zirsanga awzawng a awm lo! Hlauthawng zetin ka chhuak leh nghal a, corridor-ah a rawn kal phei chhut chhut. Thinrim zetin ka va pan a, rum zeta melhin, "I mawl ami? Eng nge i tih a? " ka ti hlar a. A nâk ruh khan a pawt deuh nge a kal kun dû mai. Kan inkuah lut ta a. Khumah chuan dimtêin ka muttir a, "Ka inthiar alawm" a ti sup a. Bed-pan hman chu a duh lo ngang a niang. Tukthuan ei a hun dawn ţan, Thari pawh a rawn thleng ve mai. Zirsanga chuan buhhawp melh run chung chuan, "Hmm.. Naute pawh ka ni si lo," a ti hmuk a. 

"Ka barh ang che aw.. Khawi mu la.. " tiin a khum chu ka adjust a.. 

Thari erawh chuan kan han induat vel chu hmuh nuam a ti bik lo nge, "Kan khaw nu a awm ve a, ka va kan ve teh ang' tiin a chhuak daih. Chaw chu ka barh a, a nui ruh ruh ringawt. 

"Nge i nuih? " ka ti hlak a. 

"Min duat sia. A nuam em a" a lo ti a. 

"Chhun lam chu ka nu rawn awm se, kei chu dawrah ka kal dawn ania aw.. Zanah ka rawn riak leh ang" ka ti a. 

"Naaa.. Nileng zankhuaa min awmpui turin ka duh che asin" a ti náng nâng a. A pangchang ve vel chuan ka nuih a tiza tawp. 

"Sawmpuia nen kan inhmu dawn a. Thudik ka hrilh dawn alawm" ka ti a. Min rawn melh rân a, ka zâm lek lek. 

"Umm.. Nia, engkim chu thlentir vat a tha. Va fimkhur la, a tawp nan pawh inkhawihtir hlek suh ang che" a ti bul bul a. 

"A tawp nan ka fáwp ang" ka ti uang a. 

"Zothankim" a ti ţhawt. 

. "Min ù rawh. I u ka nih hi" ka lo ti vat a. 

"Pasalin nupui zawk a ù ţût ten le.. Kan inneih hunah phei chuan, Zothankim ti ngatin ka ko ang che" a ti nghut a. 

"Zirsanglian ka ti ve che nga ni mai lawm" ka lo ti nghek. Chaw kan ei kham a, Thari pawh a rawn lut ve. 

"Thari rual hian ka chhuk ang a, i lo awm thei ang tiraw? " ka ti a. 

. "umm thei mai ang, ka nu khan ka boxer rawn keng rawh se aw.. " a ti a. Ka bu nghat. Thari pawh zah zo lo chuan, a chalah ka fawp zauh a. Kan chhuahsan ta a. 

Ka pa chuan, "Tei a riak i ti sia" a lo ti ta reng a. Ka hrilhfiah zuai zuai a, inbual turin ka chhohsan daih. Min khap leh min thunun vak hi chu a tum tawh bik loin ka hria. Mahse, inneih erawh a phal ka ring lo. Kan tlan bo tawh mai ang chu.. Ka inbual chhung zawngin Ka pa rilru hneh dan tur ka ngaihtuah leh a, huiham, rilru hi a va chawl lo tak êm.. Ka inthlak sawk sawk a, Ka tlai deuh tawh lehnghal. Asawmi'n min kalsan tawh vangin keimahin ka kal a. Ka va thlen chuan customer an lo awm nual. Ka'n che ve sawk sawk a, kan fel thawkhat viau e. Zirsanga chin min zawt leh vat a, a that deuh thu ka sawi chuan, "Kan kan ve thei mang si lo va.. Min lo kan kep mai dawn nia" an ti a. Zirsanga nen kan inlaichin dan an hre miah si lo va, hre ta se mak an ti awm ve mang e. Hriat hun an la nei dawn chiang lehnghal. Ka zah ru ngawih ngawih. Lunch ei hma deuhin Sawmpuia a rawn thleng a, Faki nen tak hi chuan an la inhre pawh lutuk lo naa, kan dawr atanga intawng kan ni bawk a. An inkawm thei nghal viau kha a nia. A rawn thleng pawh chu an infiam leh nasa mai. Tichuan, Lunch ei dun tur chuan kan chhuak ta a. 

Eitur kan chah hnu chuan, "Eng nge i sawi tur chu, min tizâm ania" a ti a. 

Ka chil ka lem khawlh. Thawk ka han la leh te te a. 

"Pawi ka ti khawp mai. Ka sawi ngei a ngai si a. Kan inthen a ngai a ni" ka ti ta a. Sawi chu a awlsam lo kher mai. Makti hmel a pu lo naa zawhna mitmengin min melh. 

"Ih, Mak i ti viau ang. Mahse, ka ring tawk che a, mipa tha tak i ni bawk a. Ka sawi ang. Zirsanga nen hian kan inngaizawng a ni. A rei tawh. Mahse, ka pa vangin ka kal hrang a, ka titawp vek, chuan nang pawh ka ngaizawng ta che a. Mahse, Zirsanga erawh chuan min then aiin thih a thlang zawk zel si a. Keiin a thih ka phal bik si lo, mualpho huama neih mai ka tum ta a ni" ka ti ta mawlh mawlh a. Ka tawngtai nasa bawk a, Pathianin min pui aniang, ka rin ai takin ka sawi thei ta deuh. 

Eitur an rawn dah a. Thil ei hnua sawi awm tak, ka sawi tawh si. Thil ei pawh a tui lo zo vek dawn anih hi. A ngawi ran a, a eitur chu a chawk a chawk a. Ka khawngaih lutuk. Pawisawi miah lo, kan nih chhung pawha rinhlelhawma awm ngai miah lo kha a nia! A lakah hian bat ka nei kumkhua dawn a nih hi.. 

"Chuan, Zirsanga nen chuan in innei dawn em ni? " a ti a. 

"Kan tum a" ka ti tawp. 

"Chuan, Zirsanga theihnghilh nan min lo hmang tihna em ni? Nge runluih nan? " a ti ta khauh a. Ka sen awp awpin ka ring. Chhan loh chi a ni bawk si lo. 

"A nihna takah chuan Zirsanga khan min bansan ve se, nangmah vang khan min hlat kumkhua se tih ka duh vanga zui che ka ni. Mahse, a beidawng ngai lo vang' ka ti ta nge nge a. Eitur pawh chu ka ei mumal meuh lo. Ka riltam a reh vek bawk. Sawmpuia erawh rin ai takin a ei thei phian. A tawrhna tilang miah lovin a nui lui hram hram ka ti mai. 

"Aw le.. A tha alawm.. Nia, Zirsanga i ngaibtuah dan leh Zirsanga'n a melh dan atang che hian keimahah hian ngaihthat lohna a riak tlat hrim hrim tawh.. Mak ka ti hran lo.. Min ţhawng ve deuh tih a ni mai. Hlim deuhin in awm dawn nia" a ti a. Ka melh vawng vawng ringawt. 

"Zirsanga khan a sawi dik a nih hi.. Mipa tha tak i ni" ka ti sap a. A nui hawk.. "Ka tha hran lo. Mahse, mi dang i hmangaih tih hrereng chung chuan i bulah ka hlim dawn chuang lo va, ka hma ka sial zawk alawm" a ti a. 

Topic a thlak daih a. Zangkhai takin kan inthlah thei ta. Ka va lawm èm. Mahse, nuam lo tihna erawh ka nei lo thei lo. 

Sawmpuia haw rual rualin call ka dawng nghal. Kan Zirsanga bawk chu.. A va hre chak awm zek zek tak. Tihderh ka chak tlat! Hello ka tih rual chuan, "Eng nge chanchin? " a rawn ti var a. 

"Zirsang, min hrethiam mai teh. Sawmpuia hi ka tina thei ngang lo a ni.. Min duh ve bawk sia" ka ti a. Ka aw te chu ka ti lâwi kual vel! A thaw hawk chu ka hre pha.. 

"Dawt i sawi lo em? " a rawn ti a. 

"Umm.. Ka then thei lo" ka ti a. Ka inhmuamup nasa ngei mai. 

"Zothankim, phone atang pawn dawt i saawi leh sawi loh hrethiam tur khawpa chìk che ka nih hi. Haw la, inbual la, rawn thlawk chho nghal rawh" a rawn ti nghut nghut a. Ka nui lo thei lo. Ka nui chhuak ta nge nge a. A sawi ang khan dawrah awm tluan lovin ka haw hma a, tun lai chu Asawmi kutah a awm a ni deuh ber mai. Thari a lo awm a, eirawngte chu kan han bawl hma deuh a. Chhoh hma ka duh vangin. 

Ka nu pawh ka pa rualin a rawn haw ve a. Chaw ka ei sawk sawk a, tiffin nen ka lim chho leh nghal. Ka pa hian sawi duh chu a nei, hun ka siamsak thei si lo. Ka khawngaih viau nain luhlul chhuah a hun ve tawh niin ka hre deuh tawh si. Buaithlak eee.. 

A lo zia leh hret a, a hmel hmuh pawh a nuam e. A lu a sawhna hmuamhma kha a la dam chiang lo deuh a, a kawchhung lam pawh Doctor te kha chuan a felfai ang kha chuan an sawi a. A nák ruh hi eng emaw tia a han chet deuh hian a kalh thin a, chu chuan a pawh kun deuh bakah a thawk lamah harsatna a la siam deuh thin a ni. Inthiar vel ber hi amaha inthiar a duh tlat hi a ni. Inla pa leh lutuk mai. 

Chaw chu ka han eitir leh a, barh a nuam viau. Zirsanga hmarcha thak ngam lo lutuk hi ka hawn tirh khan ka nuih a za thei tawp. Hmarcha tai hi a seh ngam lo, a kutin a sik thin. Pakhat hi a kham tawk viau bawk. Ka wai wai chhum phei chu a ei ngam lo, vawi khat kan nih tawh hnuah spicy noodles ka siam a, test tiin tlemte a rawn ei ve a. Awii a lam lo chauh, a sen vek a, kan bawnghnute a in zawh vek bakah chini a hmuam ţûn bawk. Hmarcha thak ngamah na nâ na chuan min khan lo nasa.. 

"Kan inneih hunah a buaithlak awm, i bai thak thei awm si" ka ngaihtuahna hria niawm takin a rawn ti a. 

"Ka eitur leh i eitur kan siam zel mai dawn nia" ka lo ti. Chaw a ei khamah ka sengfel a, ka va sil leh phawt. Ani pawh jection a ngai. 

Room chhung chu ka chingfel thuak thuak a, a hnawk em em lo naa thil a awmna tur ni lo va awm hian ka mit a tikham ngawih ngawih zel. Ka senior hri te pawh a ni mahna. 

"Lo thu tawh teh.. Ninawm.. Min va ngai lo ve" a ti hmuk a. Ka va thu ve ta vat. Sawmpuia nen kan thusawi te chu ka hrilh ve malh malh a. 

"Ka tih reng kha, mipa sual tak chu nise, kan inlaichinna pawh a sawi puang ang a, a then duh tlat lo maithei che a ni" a ti dam thlup a. 

"Dik chiah, ka inthlahrung tawp.. Nangmah vang vek" ka ti a. A chalah ka va nam a. 

"Hmm.. Kei pawh nupui ka neih ve rup tho kha. Mahse, nupui te sex hmanpui miah lo awmchhun ka ni maithei ni" a lo ti ve a. Kan nui hawk hawk. 

Thutak deuha min rawn melh thut chungin, "Nang, Kimi, i la virgin tiraw? " a ti daih! 

"Mawla, ka virgin i hawn kha i hre tawh na nge? " ka lo ti nghek! Ka va ngei tak. 

"I la hre ve maw? I theihnghilh tawh ka lo ring a" a la tizui. A lu tuam chungah chuan ka va kuk fawk. 

Thil tam tak kan sawi dun ve a. A changin kan han nui dun leh rih.. A chang leh kan inhnial. Mut a hun takah chuan a ngai tein a hrangin kan mu leh a, a khum a tet bakah ka mang a chhe angreng si a, ka tina ang tih ka hlau. 

Zanin erawh tui takin harsatna tawk miah lovin kan muhil ve thei ta hram e. 

Hun chu a kal ve zel a. Kar khat leh ni 3 zet damdawiina a awm hnuah chhuah an phalsak ta hram a. A dil ngun lutuk chu Doctor te pawn an nuih tawp zel. A ning thawkhat viau aniang. A nâk ruh pawh an siamrem thei ta a. A lu pawh a dam fel e. Damdawi ei tur erawh kan inhawn nual mai. In kan thlen rualin inbual a duh thu a sawi nghal. A awm chhung khan a taksa chu ka hrukfaisak thin bakah inbual satliah chuan a inbual ve tho naa, a duhkhawp lo nasa a niang. A pindanah ka luhpui a. A thawmhnaw thlakna tur laksakin a thawmhnaw chu ka hlihsak a. Bathroomah kan innawrlut ta a. 

Tlem chuan a la cher ve kuam mai. A meng pawh a la val ve deuh. Uluk leh hmanhmawh lo zetin ka bual a, nuam a tih hmel dar dar viau. Nawhlung thap zetin ka nawt tâwk tâwk a, a khawk ve nasa, a nui hawk hawk a. "Ka inbuk ang, ka zâng sawt ang ka ring" a ti thul. Kei pawh ka nui ka nui ringawt. 

Zanriah ei khamah chhungkaw inkhawm kan nei a. Ka huphurh ru hle. Ka pa chu lo dingchhuakin, thupui fun takin Zirsanga chu a'n zilh ta phawt a. A fimkhur loh vanga nunna kan inhloh teuhzia te a sawi a, a dik chiah. Ka va melh a, chhuat lam a melh run ringawt. 

Chumi hnuah kan pahnih chungchang chu a sawi ta a. Thawk pawh thaw tha ngam lovin ka lo ngaithla a, "Tei nen in inthenna a la rei lo va, tun tut tutah chuan inneih tumna rilru kha la pu lo ula, kum te liam se la, kum thar lamah chuan intintuah pawh a pawina a awm hran tawh lo vang. Kumin erawh insum hram hram ang che u. Vantlangin an hriat theih tura inzui nasat te, inlengte mit tikham khawpa innêk te kha ka remti lo va. In pawm theih ngei ka beisei.. " a ti ta dap dap a. 

Ka thinlung lawmna chu a so bulh bulh a ni ber mai. Harsatna chu kan hneh taah ka ngai. Ka pa ngeiin inneih a rem tih loh thu a sawi si lo va. Zirsanga hmel pawh hmuh a nuam takzet. 

A room tihfel pahin kan awm dun leh a.. Kan inneih hun tur te a lo chhut thul.. Kumtir lam a ti bur.. A rang thei ang bera inneih chu a duh a ni tawp mai. 

"Mahse, a buaithlak awm.. Palai te an intir ve thin asin" ka ti a…. 

"Nia, kei pawh kha kha a buaithlak ka ti. Ka pute bulah ka han awm rih zuai ang a a ni mai," a ti awlsam leh êt a. 

"Mi in mak an ti lutuk tur hi ka ngaibtuah ngam lo. Kei chu ka thi thei mai ang" ka ti a. 

"Ka awm chuan i zah ai ka tuar vek ang. A ho em mai. Kan inhmangaih miau alawm" a ti nghet charh. Kei aia nau mah nise, a bulah chuan ka thla a muang thin. 

Ka rooma ka phei dawn chuan, "Riak mai la.. " a ti a. 

Ka lo ngai ve tho bawk si.. "Lo riak zawk rawh" ka ti fiamthu chu, a ding nghal at a. A inpeih der. 

Ni e, Ka khumah kan riak dun ta a. Sex erawh kan hmang lo. A insum thei khawp mai, insum tura nawrtu kei hi min lo hmangaih êm a ni. 

Mahse, kan hriat phak miah lohin chhum dum chuan min lo la uap reng a lo nia! Tu kâ atanga chhuak nge tih hriat miah lohin Zirsanga nen kan chanchin chuan kan veng titi a siam ta a. Awmngaihna reng ka hre ta lo. Dawrah pawh ka kal ngam lo va, ka tawm tlawk tlawk. Zirsanga pawh a la dam kawr bawk a, kan inawm nileng a ni deuh mai. A nawm tho rualin mi in min sawi dan te kan lo hre ve zel si a! Thiamthu sawi tur nei miah si lo va, mi dang diriamna leh nuihsawhna ngaihthlak hi a lo va namai lo êm.. Kan chhuanlam neihchhun chu, "Kan inhmangaih alawm" tih a ni tawp. Ka pa a zakin a hriselna pawn a tuar ta hial a. A cher kuam a, chawlh a la ve tawp. Ka nu pawh a chhuak ngai lo. 

"Unau in khata cheng nisi, kan Zoram hi a va rapthlak tawh em.. Pianghmun ni lo mah se, a tenawm dan a ril" tihte chu min chirhthehtu te atanga ri chhuak a ni. 

"Engtin nge a rai loh theih zawk le" tih te bakah Tei chhung te lam atanga diriamna ri mawlh mawlh chu namnul a har ve khawp mai. Jeni leh Thari bakah Asawmi te hian min lainatna lamah min hrilh lo thei si lo. Ka pa hming lamin, "A khuahkhirh thei lo a ni maw? A lo nep hle mai," tih thlengin.. Ka pa hming em em chu lam a ngai hleinem mawle.. Kan tisual a, kan zak ve lutuk. Mahse, hmangaihna hian ramri a lo kham hlawl si lo va, kan thunun zo bik ngang lo a ni e. 

Ka awmdan hrehwmzia leh ka rilru hahzia hriain Zirsanga chuan zin a rawt ta a. Ka pa bulah sawiin ani pawh chuan a lo hnial bik hauh lo. Mak ka ti angreng zawk. Khuanglenga zin tur chuan kan insiam ta a. Zin harh ka mamawh êm a ni. Motor a hman theih dawn bawk a, a zia khawp mai. Thari leh Jeni kal ve chak lutuk lah chu an khawngaihthlak letling. 

Zing dar 7 velah chaw fun nen kan thawk chhuak ta a. Engtianga rei nge kan cham dawn ka hre lo,. Boruak a reh deuh hunah kan haw mai ang chu. Asawmi kutah dawr pawh ka dah tawp, a rintlak bawk a. Ka pain a lo enpui zauh zauh thei bawk ang chu. Nupa ni awm tak chuan kan zin chhuak ve ta chu a nia. A hlat tham deuh vangin Zirsanga chu ka ngaihtuah deuh. Motor khalh char char a ngai si a. Khua a vawt lek lek tawh a, khawchhak lam phei chu a vawt riau tawhin ka ring. Inngaizawng ang pawh ni lovin kan titi char char. A hnuah ka mut chhuak lutukin ka mutthluksan a. Ka harh chuan ka khawngaih deuh. A khawhar dawn tehlul nren. 

"Leiletah te kan kal ang a, nuam i ti viau ang" a ti a. Ka chak ber thin a ni. Ramhnuai thlam nuam deuha chaw ei te hi ka chak ve thei tawp. Inru te pawh kan ang deuh. A pute chu be lawk tho mah ila, ka zah ru ve tho. Mak min ti ve ngawtin ka ring. 

Zinkawng thui tak kan zawh dun a, mipa a nih angin min care em em.. 

Khuangleng peng kan thlen hma deuhin ka nuin min lo call a, "Kimi… i pa hi" a rawn ti ţuau mai! 

"Eng nge ka pa chu" ka ti tuar a. Zirsanga pawh a ding hrâwih. 

"A biak theih loh.. Stroke a niang… ka hre lo.. Engmah.. Khawngaihin lo haw ru" a rawn ti a. A ţap nghal hlawp hlawp. Ka mang vek, ka bing mup mup a. Engmah ka ngaihtuahnaah a awm lo. Zirsanga chuan ka phone chu lain ka nu chu a bia a. Hmanhmawh zetin Aizawl kawng lamah kan let leh ta. Kei chu ka la bo mup mai. 

. "A thi tiraw? Ka pa kha" ka ti chhuak thei hram. 

"Kimi, intipachang rawh.. Khatin awm suh.. " a rawn ti a. Hmalam a en a ngai bawk si. Ka va tibuai dawn tak em.. 

"Ti nge? Ti nge ka pa chu a thih? A chhan chu keimah vang a ni. A dik em? Kei a fanu hian ka tihrehawm em a ni. " ka ti tuar tuar a. A ding a, min rawn kuah leh rih.. A awmah ka lo chum vak vak a. Engahmah ngai lo niawm takin min kuah bet tlat a. 

"Ka pa chu a thi hleinem.. A thi dawn lo.. Hlauthawng suh. Hahdam deuhin awm tum rawh.. Khawngaihin" a ti sup sup a. 

"A thi alawm.. An sawi ngam lo a nih kha" ka ti leh tân tân a. Ka mittui chu dan rual lohin a luang zung zung bawk. 

" I chau lutuk ang e ka duat.. Engkim a tha vek ang ka tih kha.. Hei, min en rawh, ka mitah en rawh.. Min ring em? " tiin min kuai dak a. A mitah chuan ka melh ran mai, ka bu nghat a. 

"Min ring a nih chuan hahdam rawh.. Ka pa chu a thi dawn lo" a ti nghet charh a. Mak takin chu chuan min muan huai niin ka hria. Ani pawh insiamremin ngawi rengin kan tlan leh ta nghal a… 

"Lalpa, ka pa i thihtir chuan ka damchhungin ka ring leh tawh lo vang che" ka ti sap a. Pathian hian min va dawhthei si êm.. 

(Class kal chunga ziah hi chuan e.. Huiham.. 😢