Zirsangliana 19

ZIRSANGLIANA… 19

Ziaktu: Toni Râlte

Thari leh Jeni'n min kuah tih chu ka hria. Ka harh chhuah leh chuan Damdawiinah kan lo awm. Mumang ang ruaiin engkim kha ka hre vek. Zirsanga chu ka zawng a, ka hmu si lo. 

Ka pa bulah, "Khaw nge a awm.. " ka ti mawlh mawlh tih pawh ka la hria. ICU lam a kawk zauh a. Zirsanga chu a thi ta tih melh hian min melh niin ka hria. Ka mangang lutuk chuan sawi tur leh tih tur pawh ka hre lo. Ka nu meuh pawh a intipachang thei lo nge a meng sen râm mai. Chawhnu herah Doctor leh ka pa an inhmachhawn thei ta. 

"A lu a sawh na viau mai a. A thluak lam hi a khawih pawi thei ang em ka hre lo va.. Chuan, a nak ruh veilam saw a auh bawk a, a kaw chhung lama thi chhuak chu ngaihtuahawm lutuk a ni tawh lo ve.. " tiin Doctor chuan ka pa chu a hrilh mawlh mawlh a. A bula lo ding ve reng keini chuan hlauthawng takin kan lo ngaichang thap mai. 

"Oxygen kan pe mek a. A khawsik a sâng viau bawk.. Engpawh thleng se, Pathian kuta innghah hi a finthlak ber ania" ti dam thlupin Doctor chu a kal zui nghal a. Beisei tur a va awm lo em. A tawngkam kha, Thi turah ngai ula, Pathianah innghat rawh u min tihna tlukah ka ngai. Ka sahal a ni ber. 

"Pa, a thi tiraw? A dik em? " ka ti sek sek a. Ka pa pawh awmngaihna ka hriattir meuh lo a niawm e. Ka chiâi em a ni. 

"Thi lo, a thi hleinem, Kimi, a thi dawn lo" tiin min hnem tak naa, ka tawrhna nasa lutuk avang chuan ka pa chu ka haw lek lek mai. Amah vanga he thil hi thleng niin ka hre ta tlat! Zirsanga hi a thi a nih teh chuan, ka pa fanu nih hi ka la duh reng dawn em ni? 

Inah min hruai thla a. Ka muhil thei lo va, engmah ka ei thei hek lo. Khuma mu mek, engmah hre lova let reng bak ka mitthlaah ka hmu thei lo. Pu Faka te sawi hmangin khatia in atanga a chhuak kha, chak zeta tlanin amah zawk hian LPK kha a va su niin an sawi tlat! A tlan tih hre miah lo ang chiahin a awm an ti! A chhan hretu chu kei leh ka chhungte kan ni. Ni e, Zirsanga thisen hi a va hek bik tak êm.! 

Tei a rawn lang ve hlawl! A ţap deuh pur bawk. Ni e, Ani pawh hian Zirsanga a hmangaih vangin a fa a pai lo na chungin mualpho huamin a paah a puh ngam anih kha. Kei ang bawkin a na ngei ang. 

"U Kim, engtin chiah nge a awm? " tiin min nawr seh tlat lehnghal. Kei insûm ngai, insûm hleithei si lo tan chuan a va tawrhhlelhawm êm. 

"Ka hre lo. Ka va hmu ve lo va" ka ti tawp. 

"Keimah vang a ni ngei ngei ang. Ngaihdam dil ka duh" a la tizui! Ka rum nghat. Tei chu ka lainat zawk. Amahah a la hmehbel lui ve hram hram chu a ni si a! Thudik erawh ka sawi ngam der si lo. 

"A harh veleh ngaihdam i dil dawn nia" ka ti ta ringawt. A ngik faih faih mai. Thari leh Jeni'n ei rawng an bawl a; ka nu leh ka pe erawh Damdawiin lamah an la awm a. Tei pawh a haw tawh. Sawmpuia'n min lo call a, ka inrin hmain ka puak ka ti mai. Ka ţap tawp. 

"Zirsanga a accident a. A thi ţèp" ka ti ţuau a. 

"Nia, news-ah ka lo hmu a, a zia lo ee.. Tunah engtin nge a awm? " a ti a. 

"Ka hre lo. A mu tawp" ka ti a. Ka hre lo tak tak alawm. 

"Zaninah ka rawn kal dawn nia. Chaw ei rawh aw. I chau lutuk ang. Hahdam deuh khan awm tum rawh" a ti dam thlap a. He pa pawh hian min ngaihtuah hle a ni. A laka ka inthiam lohna tinasa zual turin. Awmngaihna tak pawh ka hre tawh lo ve a. Chaw ei an siam a, ka va ei châk lo tak em. Jeni'n, "U, tlem tal chu ei tum rawh.. " tiin min rawn kai a. 

Bar hnih vel chu ka bar ang, ka lem lui thei ngang lo. Ka thu ngawi ta reng a. Jeni thinthawk chuan, "Ti nge hetia in awm? Innei mai ta che u. Unau tak tak pawh in ni lo va. Apa bulah pawh ka sawi dawn. Inkhawngaihthlak em mai" a ti lawng lawng a. 

Thari pawh chuan a rawn thlawp vat, "Dik chiah, mualpho tih te chu kum hnih hnuah tuman an sawi peih tawh lo vang che u. U Zirsanga dam veleh innei ru.. Ka khawngaih em mai kei chu" a lo ti ve hmiah. 

"A theih loh alawm" ka ti hul hak. Ka kham ta daih. Anni pawh an ei tui ta lo nge an kham ve nghal maiin ka hria. Ka nu te an rawn haw a, chaw an ei ang a, an chho leh nghal dawn niawm tak a ni. Kei erawh ka kal ve an phal lo. Veng chhung thalai tlawmngai te an awm ve nual si a, ka mualpho mai ang tih an hlau a niawm e. 

"Mahse, chanchin min rawn hrilh ru aw" ka ti a. An bu nghat. Ka pa hmel pha dai chu melh pawh ka melh peih lo. Ka hmel huat tlat! 

Sawmpuia pawh a rawn lang vat mai. Ka thlahlel ber lo asin le. Mahse, khawhar erawh a hnem deuh ang chu. Pawi a tih thu leh Zirsanga chu a dam chhuah a beisei thu a sawi niah niah a. Han biak lumlam vak dan ka hre lo kher mai. Min hrechhuak mai ang tih ka hlau ve tho bawk si. 

"Zirsanga nen hian unau in ni lo tiraw? " a hnu deuhah chuan a ti ta a. Ka heh ka liak zauh. Ka lai tlat alawm. 

"Aw.. Ka nu fa bik hi a nia" ka ti a. 

"Mahse, i ngaihtuah hmel, i rilru hi a tha viau aniang,. " a ti a. Min chìk viau anih hmel e. 

"Ngaihtuah ve bawk e. Unaupa ka nei lo va, ani hi ka unaupa neihchhun a ni sia" ka ti ta ngawt. A awih ve nge a bu nghut nghut mai. 

"Eng èm a ti lo vang. Tawng thu chhe loah thi tur chu nise a hmunah khan a thi tawh ang" a ti a. A sawi dan chu raw viau mah se, min hnem thei tlat! Kei pawn chu chu a ni ka beisei em em chu. Ka rilruin ka tawngtai mawlh mawlh mai. A mak ngawt asin. Kan sual lai leh nuam kan chen tak tak lai chuan Pathian ka au ngam lo kan ti sasawi a, a tawpkhawk tak takah erawh kan ngen gawl leh viau si thin. Kan Pathian hi a dawhthei ve ngawt mai. Chhanna kan duh ang kan hmuh loh lahin kan chhuahchhal thul! Pathian niawm reng zawng a lo ni e. 

Min tlaivarpui thu ngawt awm hek lo, Zan dar 11 a rik takah chuan Sawmpuia pawh chu a haw ve ta nge nge a. Ka thlakhlelh vak loh ngaihtuahin a awm ve avang khan ka ngaihtuahna kal bing lutuk tur a veng ve a, ka tan chuan a tha viau a ni. Ka nu te nen kan inbia a, tlangval tlawmngai ten an tlaivarpui tur thu a rawn sawi a. A thlamuanthlak thin teh e. Mizo kan nih nawmna chu chhiat niah mawlh hian a ni. Mutthilh theih ni bik hek lo le, ka let ka let a. Ka chau angreng bawk si. Damdawi ka hmawm ta tawp. Darkar chanve vel a ral hnu chuan ka hriat loh karin ka muhil ta bawrh bawrh a. Ka harh leh meuh chuan zing dar 8 a lo ri vah tawp. Rit bûrin ka tho a. Ka ka a tui lo ngei mai. Thari'n rawng a lo bawl a, ni dangah chuan Zirsanga a rawn chhuk thla ve ang a, ri hluai lo mah se, a awm ve tih hriatna khan min thlamuan thin. Tunah erawh engmah hre miah lovin a let reng mai si a. Dawr pawh ka hawng ta lo mai. Asawmi leh Faki pawh chawlh ka pe tihna a ni mai. Tukthuan kan ei sawk sawk a, ei khamah Thari nen ka nu te chhawk tur chuan kan tlan chho ta a. Ka nu hmel dang bai leh pawr chap ka hmuh chuan ka lainat takzet a ni. Ka pa lah inthiam loh hmel taka a meng pha dui bak hmuh tur a awm lo. A fapa dik tak ni lo mah se; Zirsanga hi a hmangaih tih ka hre chiang. Chumi tihnawk lehzual turin kei a fanu ka tel ve leh zel si chu ka pa rilru hahna tizual tur a ni. Tlangval ho pawh an haw ve sang sang a. Ka pain lawmthu hrilh mawlh mawlhin an thingpui inna tur te a pe ve a, lak loh duh teh mah se, a hnawn lui ve tlat hlawm. Zirsanga thiante pawh an awm ve zel a, an ni phei chu hawn an tum lo emaw tih tur a ni. Ka sawi hmaih loh tur chu, Eddy te hian Zirsanga nen inkawp tak tak angin min ngai lo tih hi. An party zana min hruai kha tu emaw a runluih duh vangah an ngai a niawm e. Amah Zirsanga hian min venthawn vangin engmah a sawi duh bik si lo va, ka zahawmna humhim nan a thiantha ber te bulah pawh kan inlaichinna a hrilh ngai lo a nih chu.. A tan hian engmah ka ti ve ngai si lo. 

Doctor te ka dil a, roomah chuan va lutin a bulah ka va thu ngat ngat. A la thaw tih bak chu han thlamuanpui tur a vâng hle mai. A kut an tuam var lûk chu ka chul ka chul a. 

"Ka thusawi hi i hre thei kher lo mai thei. Mahse, ka sawi duh ve hrim hrim a. I dam vat a ngai a ni. A chhan chu i dam veleh kan innei dawn si a. Nangmab vangin ka thutiam ka bawhchhe mai ang, ka pa pawn min dang zo tawh lo vang. Ka nei ngei ngei ang che. Chuan maw, i hriatna hi hloh miah suh aw.. Min hre reng tur a ni.. zirsang, ka hmangaih che.. I ta ka ni reng ang," ka ti mawlh mawlh a. Min hre thei nise engtin nge min dawnsawn ang aw.. A lawm ang nge Sawmpuia vangin ka lakah a titau leh ang? Min hmangaih asin. He pa hian.. Chuvang chuan a thi lo vang, a thi thei lo hrim hrim. 

Ka ngaihbel nge a kut chu a rawn ti che hrut ni hian ka hria a. Ka phu zawk. Mahse, a hnuah chuan a che zui chuang lo. A vai film mang e ka ti rilru a, ka thil ngaihtuah vang chuan ka nui thul. Mahse, Zirsanga chutia a awm laia lo nuih chu ka inthiam lo leh bawk. Nurse-in awm a phal tak lohah chuan ka chhuak a. Damdawiin thlanglam bathlarah chuan thli thaw vuk vuk karah ka ding reng a. Ka ngaihtuah ber pawh ka hre lo. Chutiang chuan ka ni leng hun chu ka hmang tawp mai a ni. Tlaiah ka pain min lo hruai a, Thari kha chu chawhnu herah a haw tawh hrim hrim. Zanriah pawh tihtham ka ei leh chuang lo. 

"A pawi khawp mai. Zirsanga chu.. Mahse, Pathian zarah a dam leh vat mai ang" ka pa chuan a ti a. Min rawn melh zauh bawk. 

Thawh pahin, "A dam veleh kan innei dawn" ka ti khauh fang a.. Tuman eng mah reng reng an sawi lo. 

Sawmpuia rawn len tum pawh chhuanlam siamin ka hnar tawp. Ani pawh hi thudik ka hrilh vat a ngai a ni. Hmanruaa ka hman avanga Zirsanga tawrhna hi ka en liam thei lo. Mi fate pawh an inrunluihin na tak takin an intâwng ve thin, thih an tum kher lo. Ti nge Zirsanga hian keimah nen buaina kan tawh apiang hian thihna rim nam buainaah a intahluh zel bik le? A nunna hi a hlut miah lo em ni zawk.. Chuvang chuan ka neih a ngai. 

Ka pa te an han chho leh a, zan dar 10 pelh hretah ka nuin min lo bia a. "Zirsanga a harh asin" a rawn ti! Ka au chhuak lo chauh. Mahse, rei kan inbe hman lo. Doctor ten an han en leh a, zanin chu ICU-ah riak leh phawt rawh se an ti a niawm e. Naktukah a dinhmun azirin ward pangngaiah an sawn thei tawh ang chu.. Tlem chuan hma kan sawn ve e. Ka muhil leh thei chuang lo, Sawmpuia bula thudik sawi dan turah ka buai a. Rei ngial ka ngaihtuah. Mipa pangngai a ni a, a kamtam ka ring hran lo, mahse, Ka nu fapa nen kan inhmangaih tih han hrilh chu huaisen a ngai ve khawp ang. Mahse, engtin pawn min lo dawngsawng se, huaisen taka ka hmachhawn a ngai ang. Hmaichhanah ngei sawi ka duh bawk. Ka ţawngţai nasa khawp mai. 

A tuka kan thu hriat chuan min tilawm hle mai. Zirsanga chu ward pangngaiah a dah theih tawh a nih awm chu! Thenrual a ngah ve thin si a, ka pain Cabin a book sak leh ta bawk. Ka haw hnuah ringawt pawh kan Zirsanga hian damdawiin vawi thum ngawt a lut ta chu a nia! Chu pawh hlauhthawnawm lutuk zelin. Chhungkaw rilru chu a tibuai zing ve khawp mai. Fapa mal kha a ni ve miau bawk sia. Cabin-a an indah luh hnuah mamawh tur te Thari nen kan la khawm a, Thari leh Jeni'n an han dah ang. Kei erawh dawr hawn a tul takzet. Kan Kohhran ten order an rawn la tawh si a, kan insingsak a ngai tawh tlat. Zanah ka riahpui hmiah ang. Asawmi leh Faki chuan Zirsanga chanchin min zawt var a, a that deuh thu ka sawi chuan an lawm ve hmel hle. 

Chawhnu herah kan haw thei hram. In ka thlen chuan ka nu leh Thari an lo awm tawh a. Jeni erawh chu a hnaah a kal a, Zirsanga chu Eddya'n a awmpui a niawm e. 

"Zanah ka riahpui ang" ka ti hmiah. Ka nu chuan, "I pa ngaihdan a ni lo vang" a lo ti vat a. 

"A ngaihdan leh duhdana kan kal vanga nunna kan hloh teuhzia hi" ka lo ti hmak. Min chhang zui tawh lo. 

Ka pa pawh a lo haw a. A tar sawtin ka hria. Chhungrilah amah khawngaihna nei mah ila, Zirsanga vangin ka hnaih tak tak thei rih lo. A rilru erawh a hah ru hlein ka ring. 

Zanriah kan ei hma a, Zirsanga chaw kensak a ngai dawn nen. Ka pa chuan, "Tu nge han kal dawn? Jeni leh Thari'n an riahpui thei mai ang chu maw? Eddy pawh kha a tlawmngai thei tho ang" a ti mual mual a. Ka nu te nen kan inmelh ralh ralh. 

"Keimah ka riak dawn" ka ti chhum hmak. Min rawn melh hrâwk a. 

"Kimi, fimkhur rawh.. Mi dangin engtin nge an ngaih ang? Thari tal tel ve rawh se" a ti dam thlup a. 

Ka tho a. Chang beng bawng hian, "Mi dang mi dang tih reng mai, mi mitmei ven vangin Zirsanga a thih ţêp hi. I hre vek. Ka ning tawh. Ka zah che a, ka zah em che vangin harsa ti chung chungin ka hnar a, tunah chuan ka thei tawh lo. Ka phatsan tawh dawn lo.. " ka ti ta a. Ka pindanah chhoin ka insiam nghal miah miah. Ka thin lah chu a ur hlur ve ringawt. 

Ka inpeih rang khawp mai. Ka mamawh zual tur ka la khawm zung zung a, stepa chhuk pah chuan, "Thar, tiffin kha lo siam ta che" ka ti lang lang a. Ka pa chu a ngawi reng. Ka nu zawk chuan, "Kimi, Thari nen tal han riak ula" a lo ti dam diai a. 

"A ngai lo. Thari a hnawk ka tihna ni lovin, nuam a ti lo ang.. amah Thari pawn" ka ti hmawk hmawk a. Thari pawh chuan, "Nia, zep loh chuan ka chau tawp.. Ka kal ve lo mai ang" a lo ti ve bawk. Ani hi chu ka nu leh pa te thu pawh hnial ngam chin khawpa kan hnena cheng rei tawh kha a ni ve a. Ka pa te pawn an ngai haw lem lo. Thari tiffin siam chu ka khai a, Scooty chabi lain ka chhuak nghal. 

Zirsanga room-a ka luh dawn lai takin Eddy zung tur nen kan intawk a. A nui suk. 

"A harh em? " ka ti a. A buk nghut danah a harh a nih hmel. Huphurh ru angreng takin kawngka chu ka hawng dêk dêk a. Ka va dak a, khumah a lo ţhu mu a, venflon an vuahna lai chu a lo kheuh nuap nuap mai. Ka aw ka thian kharh a. A rawn hawi nghal vat. A hmelah engmah danglamna a lang lo, chu chuan min tihnual deuh. 

"I lo harh maw? I rilţam tawh em? " Ka ti a. Ka nui bawk. 

"Ţam lo" a ti bul hmuk a. A la titau ve rih a niang. Chaw ei chu ka siamsak ta nghal a. Eddy pawh ka ken kep nghal bawk. Ani pawh a rawn lut ve a, chaw chu an ei dun a. 

"I riahpui dawn mi? " Eddy chuan a ti a. 

"Aw" ka ti hmiah. Mak ti hmel erawh a pu lo. Zirsanga erawh a ngawi reng a, chaw chu a ei ve mawp mawp. Buhhawp a ni si a, a eitui tehchiam lo vang. Eddy pawh a ei tam lem lo. 

"Naktuk zanah ka rawn riahpui ve dawn nia. Zanin chu ka va mu hahchawl ve ang e. Nizan kan tlaivar sia, vawiin ka mu hman chiah lo nen.. " Eddy chuan a ti a. 

"Ni e, in hah tawh sia. Va chawl hahdam rawh" ka lo ti ve a. 

Chutia chaw an ei lai chuan kawngka chu a rawn inhawng a. Ka beisei loh lutukin Tei a rawn lut hlawl mai. Eddy pawh chuan mak a tih hmel khawp. Zirsanga erawh chuan a melh run run ringawt. 

"Awiii i lo harh tawh maw? Ka va'n lawm tak.. Chaw te chu i ei tha thei em? " a ti siam siam a. Min rawn nuih sâng bawk. 

"I va fel ve, i rawn kal a. Tu nen nge in lo kal" ka lo ti ve vat a. 

"Keimahin a rukin ka lo kal. A chanchin ka hre chiang chak sia" a ti a. Zirsanga bulah chuan a va thu a. Ka so bulh bulh mai. Zirsanga lah chuan a be der bawk si lo. A lu an tuamna leh a ban vel te chu a chulin a ensak vel a. Hmuh hrehawm ka tih êm vangin an chaw eina chu ka sengfel sawk sawk a, ka va sil ta daih. 

Ka let leh chuan Nurse nen kan lut rual a, a jection dawn a lo nia. Tei nen chuan min melh dun a, "Tu berin nge riahpui dawn che u" a ti a. Chhan ka tum lai takin, Zirsanga chuan, "Tei hian" tiin Tei chu a kawk a. Ka ding chawih. Eddy pawh a rawn meng phar nasa. Tei chuan, "Nia keiman ka riahpui mai ang. " a lo ti awlsam êt a. Awmngaihna reng ka hre lo. Ka zak bawk si. Ka na bawk si. Ni e, Zirsanga chuan min hnawl ve tak tak tawh a nih dawn hi. Ka duh a, ka cho a, ka cho chhuak a nih hi. Ka pawm ngam tur a ni. Tiffin chu ka rem fel a. Eddy tawng tum zuau chu ka mitmeiin ka khap vat. Awm ve rengna chi niin ka hre si lo. Ka lai takzet a ni. 

"Tei, inthlakna mamawh i nei em? Hei ka keng nual a, i duh chuan ka hnutchhiah mai ang" ka ti a. Ka aw chu a lawi rât mai. 

"Umm face wash vel ka keng miah lo. Towel pawh.. A bak chu tih dan a awm mai ang" a lo ti var a. 

"Umm face wash chu ka keng alawm.. Towel pawh pahnih ka keng a, pakhat hi nei mai rawh. Min pek a ngai tawh lo ania.. " tiin ka la chhuak nghal a. Zirsanga eitura ka leisak, Apple leh chocolate chu ka dah chhuak a, "Hei zana in ei atan aw" ka ti zawm zat a. 

"Ka hawn san mai ang che u aw.. A tlai tak tak hmaa ka hawn loh chuan" ka ti a. Ka ding det. Zirsanga chuan eng emaw tal a sawi ka lo beisei a, mahse, Tei zawk chuan, "Umm nia, lo ngaihtuah suh u.. Ka chhung ten ka chanchin an lo zawh che u chuan kan hmu lo reng reng in lo ti dawn nia aw.. " a ti lang lang a. Ka bu nghat. A tawp nan Zirsanga chu ka va melh a.. Min rawn melh ve chiah. Ka mittui a tla mai dawna ka hriat vangin ka tlan chhuak ta a. Ground floor ka thlen chuan ka thaw hlawi hlawi.. Ka hah lutuk! Ka taksa mai ni lo ka rilru zawng zawng hi a na kim vek.. Ţah hawm hawm ka chak. Mahse, ka theibtawpin ka insûm a. Scooty chu startin chak zetin kan in lam ni lo vah ka tlan ta daih a. Kawng lun lo laiah ka ding leh lai lawk a. Ka thiannu drinks ve thei tak Sangzuali ka call ta a. 

"Mate, ka rui duh" ka ti nghal tâwng. 

"Maw?! Ngati nge? " a rawn ti hû a. 

"A chhan chu nakinah. Zu ka duh a ni mai" ka ti nghek a. Ka mamawh takzet tih a hria a ni mahna.. 

"Aw lo kal la, kawtah ka lo awm ang. Cottage-ah kan riak dawn nia" a rawn ti zat. Sangzuali hi chuan ka tan ui leh ì nei thei a ni bik lo. Phaia kan awm lai khan ka buaipui nasa ve a, a bialpa in kut a thlaka an in luah atanga a hnawhchhuah pawhin tuamhlawmtu ka ni. Pawisa a mamawh changa pe ve tawp zel kha ka ni bawk a. Chuvang chuan ka sawi tawh hi chu a hnial ngam ngai lo. An in lam chu ka pan nghal a. Ka thleng rang viau. Kawtah chuan a lo ding vang a.. A rawn chuang nghal. A sawina lamah ka lim phei ta nghal a. 

"Awii saw pa saw min zui zel.. Tu nge le? " zemabawk kan pelh hnu chuan a ti a. 

"Min zui lo vang. A haw ve dawn aniang" ka ti ringawt. Cottage kan thleng a, Reception counter a pan nghal. Ka phone a rik vangin ka ding det a, Ka pa a lo ni. 

"Aw.. Tei a lo kal a, Zirsanga'n Tei riahpui a duh zawk a. Kei chu Sangzuali te inah ka riak dawn.. Ka phone ka off maithei aw" ka ti zung zung a. 

"Kimi, i tha maw.. Eng emaw tih te kha i tum ang e" a rawn ti a. 

"Teuh lo mai. Sangzuali hi a zin a lo haw ve chiah sia, min ngai ve bawk nen, kan riak dun dawn.. Zingah ka lo haw ang" ka ti a. Phone ka dah nghal hmak. Ka phone ka ah that lai tak chuan, ka hmaah mipakhat a rawn ding thut. Eddy lek! 

"Eng nge i tih ve? " ka ti nghek a. 

"Eng nge in tih zawk dawn? " a hmel chu a rum deuhin ka hria. 

"Saw ka thiannu nen sawn kan riak dun dawn. " ka lo ti vat a. Mak ka ti angreng hle. 

"Kimi, haw ang.. Hawh, ka thlah ang che. Zingah i scooty chu ka va la mai ang" a ti ta mai. 

"Engvangin maw? Ka thiannu alawm.. Engmah kan ti dawn lo" ka ti a. Ka thin a rim ţêp. 

"Zirsanga'n nangmah zui tur chein min tir a nih hi. A ngaihtuabawm zawng chuan khawsa suh" a ti chang fak a. Ka ding khawng lah. 

"Engvang chuan nge min zui tura a tirh che a. A va zak lo ve. A nupui duhtak nen khan nuam va chen zawk rawh se" ka ti hlawk hlawk a. Ka kut ka vai bawk. Ka kut chu a lo la chat a, nghet zeta humin, "Ka thianthaber min ngenna angin inah ka dah dawn che. Hetiang hian awm suh" a ti a. Kan thawm a na ta deuh nen, Sangzuali leh Counter nghaktu pawh chu an rawn chhuak ve a. 

"Min thlah rawh. Engtinmah ka awm dawn lo. Tin, ka duh dan dana ka nun a thiang. Ani chuan Tei a nei a, min ngaihven pawh a ngai tawh lo, " hnukulh ţeuh chungin ka ti a. 

"A mak! Naupangchhia viau teh suh. Zirsanga natzia i hre lo. A thutlukna kha a duh vang a ni lo. Tei laka a venthawn vang che a nih kha.. Tei saw atan engmah a ni lo",,tiin a thianpa thlavang chu a hauh ve hram hram a. Ka nui lui nghek. 

. "Nang pawn Tei chu i duhpui êm kha.. Kal rawh. Va awmpui rawh. Kan intina tawn a, a tawk tawh e.. " ka ti nghat nghat a. Ka mittui lah hi a lo hnâm ve sek lehnghal. Sangzuali chuan thil awmzia min rawn zawt a. Hrilh ngaihna a vâng hle. Eddy phone chu a rawn ri ta hlauh a,.. 

"Aw ţhianpa, hei Zemabawkah kan awm mek. A thiannu nen riah dun an tum a.. Aw cottage-ah.. Ka tilui thei lo. A thinrim bawk sia, Tei vang khan.. Aw aw le.. Ni e" tiin a dah a. Min rawn en a, "Zirsanga chuan a ko che. Tei chhungten Tei an va hruai a. Riahpuitu a nei dawn lo ania" a ti a. 

"Dawt anih chu.. Riahpui a ngai lo a niang chu, Tei a thlan zawk" ka lo ti hmak. Sangzuali chuan makti zetin thil awmzia min lo zawt ve sek bawk. Eddy chuan a pehhel zawng deuhin thil awmdan chu a hrilh ta a. 

"Kal ang.. Min nghak rei tawh.. Tei awm lai khan 'Kimi hian min riahpui dawn' ti ta se, Tei khan engtin nge a ngaih ang? A kamtamzia i hria alawm.. A venthawn vang che ka ti a ni lawm ni? " Eddy pawh chu a vin ve lek lek. 

Sangzuali chuan, "Nia, Kim, kal mai rawh. Henry ka call mai ang. Thil tha lo a thleng zawk ang" a lo ti sam êt a. Henry chu a bialpa a ni. Ka nùr nâng a. Ka hreh a ni. Tlawm thlak ka ti bawk si, engah nge min hruai leh tur si min hnar? Min venthawn lam aiin min tihnat a chak ve hrim hrim anih kha.. Sangzuali'n min nawr sek sek bawk nen, Eddy lah a bike a start ut ut bawk. 

"Mai mai che u hian" ka ti hlak hlak a. Scooty chu ka start ve nghal. Sangzuali ka buk khum zauh a. Ka tlan ta nghal a. Eddy nen bawk Damdawiinah chuan kan lut dun a. 

"Tei a awm lo maw? " ka ti leh hû. Ner sak chungin, "I chhuah rual khan Zirsanga'n Tei nau a text nghal a, hruai turin an lo kal alawm.. Mahse, an rawn hruai laiin ka awm ve tawh lo" a ti a. Ka ner nâwng ringawt. Kan Zirsanga chet dan hi chu aw.. 

Cabin-a kan luh chuan a lo mu ut a. A muhil nge mawni.. Mahse, thawm kan han neih deuh chuan che chang loin a rawn meng a, "Ed, ka lawm e" a ti sup. 

Eddy chuan buk nghut pahin, "Ka kal dawn. Duh aiin ka tlai tawh. Ka chhungte phei chuan riak turah min ngai tawh ang" a ti a. 

"Riak ve law law la" ka lo ti hmanhmawh. 

"Chi nang.. Saw pa sawn hnawk min ti dawn em mai" a ti a, a nui sûng bawk. 

Biak hman rual lohin a chhuak zui daih. Ka lai leh ta hle mai. 

A rawn tho ţuah ţuah a, ka lo dawm vat. A nui huk. Ngei zetin ka melh rám rám a. 

"Zung ang" a ti sup a. Ka kuah tho nghal. Ngawi rengin kan va inzuntir a. Kan let leh lamah, "Tei chu an rawn hruai ami? " ka ti a. 

"Umm.. Ngah nge a riah ve ngawt ang" a ti a. 

"Nangman riahtir i duh kha" ka lo ti hlar a. 

"Eddyan a sawi vek ang. Ka vengthawng che alawm.. Mawl thin suh. Ka veilamah mu ang che. " a ti nghut a. Ka muttir hnuah hah hmel deuha thaw hawkin, "Apple ka ei châk" a ti a. 

Ka vel sak nghal, A nat dan ngaihtuahin rin aiin a dam chak ka ti. Ka lo ngaihdanah chuan a zun te siak a ngaih ka ring a, thut pawh a thut chhuah theih ka ring lo kha a nia. Mahse, amah hi a chhel ve hrim hrim nge a tha chak khawp mai. Apple chu ka eitir a, "He tah hian awm reng ang" a ti a. 

"I dam vat a ngai.. " ka lo ti a. 

"Min enkawl loh chuan ka dam dawn hlek lo a nia" a ti chang rût a. 

"Inneih vat i duh chuan dam mai rawh" ka lo ti hmanhmawh. 

"Maw..?! Tak tak em? Kan innei dawn maw? " a ti hluai a. 

"Ka pa chuan rem a ti lo maithei. Mahse, kei man rem ka ti tawh alawm" ka lo ti puat a. 

Ka biangah a rawn piai zauh. "Min dinpuia min kalpui zel theih chuan eng pawh ka ngam.. " a ti thawp sup a. A va hmel tha tak êm. 

Rawn harh thut niawm takin, "E… mahse, Sawmpuia kha" a ti leh thut! 

"Ka la then lo" ka lo ti nghat. 

"Mi tha tak niin ka hria a. A na lo thei ang berin i then dawn nia" a ti a. A rilru tak tak a sawiin ka hria. 

Doctorin a rawn en a, ani pawn, "Ka rin aiin i tha chak tlat. Damdawi tha deuh i hmuchhuak aniang" tih pahin min rawn melh zauh a. 

Zirsanga phur pheng lah chuan, "A dik.. Hei ka damdawi a nih hi.. " tiin min la kawk vû zui! Ka nui tawp. 

Doctor a chhuak chiah tihin, "Lo hnai teh. Ka fâwp chak lutuk che.. Ka ha pawh ka nawt vek tawh " a ti ham ham a. 

(Love u all 😍😍