Zirsangliana 18

ZIRSANGLIANA.. 18

(Adds kha aw. In tan, kan tan click zeuha nghah ve lawk kha a ni mai aw.. 😍

Ziaktu: Toni Râlte

"Chuti chu pa leh fa kan indo a ngai dawn anih chu"ka pa aw chu a fiah kher mai. Ka lo ìp chawih a. Chhan ve ngaihna ka hre ve lo. 

"Kimi nen hian unau kan ni lo. A lema unau niha natna inpek tawn reng hi nang ni la i tawrh peih ka ring bik lo" Zirsanga chuan a ti hmiah. Mitmeiin ka va khap a. Awmzia a nei lem lo. A mitmengah chuan tumruhna a langsar em em a ni. 

"Chhungkua i nei tih hi hre reng rawh" ka pa aw pawh a chang khek khawk hle. Zirsanga chu ngawi rengin a chhuak hmiah. Ka pa chuan min melh a, "Kan chhungkaw mualpho leh mualpho loh chu i kutah a innghat ta e. I nu nen uirena vangin kan inthen a. Nang leh Zirsanga in hetih zel chuan, I nu nen danglamna in nei lo tihna a ni mai".. Ka pa tawngkam chu a na kher mai. Min nghawng dan pawh dang tak a ni. Ka nu ang nih ka duh lo. Mahse, ka nu ang chiahin Tei pasal chu ka mutpui tawh. Ka chau, ka nâ, ka hah.. Thih daih mai ka châk. 

Ka pa chuan mi dang awm lai chuan engmah a tilang duh bik lo. Zirsanga nen erawh an inbe mang lo. Zan rei tak thleng Zirsanga nen phone-kal tlangin kan inhnial a.. Ka pa vang chauhin pumpelh ka duh a, mahse, ani chuan a tawp thlen a duh tawh si! 

"Kimi, i dawihzep lutuk. I inthup tak tak thei lo va, i tuar thei tak tak lo. A tawpah hei ai hian kan mualpho ang" tih chu a sawi tam ber a ni. A dik ka ti. Ka nep takzet. Mahse, hmangaih ka la nei ngai lo va, ani hi a hmasa ber a ni tlat. Ka tan chuan biksosana kalbosan chu a awlsam hauh lo. In khatah cheng dunin a rukin min ngaihven reng bawk si.. Phaiah khan lo awm hlen daih ila a tha tur. 

A tukah tukthuan kan ei hma deuhin Tei chhungte an rawn kal ta rup mai. Bungraw rawn lak an tum a ni. A nu leh pate tak chu an ţawng ve vak lo. A nuteii leh a cousin hmeichhe pakhat chu an tawng duhthawh angreng kher mai. A chhungkua ang zawngin min dem rawn a ni. An sawi tam ber chu, "Hetia kan fanu duatlai then leh mai mai tur chuan engvangin nge in neih? A tir khan sawi tur alawm..," tih thu hi a ni. Chu zawng Zirsanga chhan tur a ni. 

Muangchangin a rawn chhuk a, Tei chhungte melh kual chungin, "Ni e, in sawi chu a dik. Engvangin nge ka neih? Fiahna ka duh vang a ni. Nei ta lo ila naute hi lo piang se, mi zawng zawngin ka fa emaw an ti ang a, ka fa ka ngaihsak loh vangin min demin ka chhungte thlengin sawi an kai ang. Chutiang thlentir ai chuan Tei hi ka bula chentira a ruka veh ka tum ta zawk a nih kha.. Tu nge a ruka a biak thin a, a hmuh thin tihte hre tur chuan a mi rinna ka hlawhchhuaha ka bula a chen tam a ngai miau si a. 

Aw a dik, niminah khan tu nge a fa paina dik tak chu ka hre chhuak ta a ni. Ka hre lo emaw tiin tu emaw a bia a, "Min lo be tawh suh, pasal ka nei tawh a. Engmah inrawlhna tur i nei tawh lo" tiin. Chu ngei chu ka bitum tur a ni tih ka hria. Tichuan, A incheck up hlanin a phone chu ka ensak a, a lo delete vek! Vanneihthlak takin ka khawih lai mekin msg a rawn lut ta thung a. Ka mi hriatchian em em hnen atangin, "I pasal kha chu bum suh. Tihsual a nei lo" tih thu hi. 

A lo thawntu pawh Gospela, Ka best friend Eddy cousin a ni.. Tichuan, a bak chu ka sawi lo zawk ang e.. Amah Tei hian a hre chiang zawk ang. Ka fa ni lo pui, ka fa anga pawm ai chuan hetia ngawi renga inthen hi a tha zawk e" a ti ta dap dap a. Tumah kan ţawng lo. 

Thawk la halhin Tei chuan, "I rin ang kha a ni lo" a lo ti a. 

Mahse, awmzia a nei hran lo. A bungraw la tur chuan an room lam an pan ta a. Thla khat pawh an innei tling lo tihna a nih chu. A zahthlak angreng. A chhan hriat chak tam tak an awm leh ngei awm si a. 

Zirsanga te chu an inthen fel ta a ni reng mai. A room pawh a ruak leh ta hiau e. Tei kha an inneih lai khan sawiselna tur ka hre lo, a felin mi biangbiak a peih bawk. An inkara hnawksak tak ka ni tih hre ta se zawng a damchhungin min hmelma tawh ngei ang le.. 

Ka in luah tur lah hlawhfa kan la laklawh tawh si. Awmdan thiam a har ta ngei mai. In dang luah ta pawh ni ila, kawppui a neih lai pawha min ngaihven char chartu Zirsanga chu ka dang zo chuangin ka ring lo. Ka pa sawipui a ngai ang. He tia kan buai viau lai hian, Dinpuia leh Sawmpuia te pawn min be awl lo va. Chhungkaw thil chu hrilh kher ngaiin ka hre lo va; rawn len an tum pawn chhuanlam ka siam zel thin. Tun dinhmunah chuan hetiang mood-ah ka cheng thei rih lo. Dinpuia ngat phei chu ka hne lam a ni e. Tei a han awm ta lo chu a titi nasa ber thin kha a nia, a reh riauin ka hria. Jeni lah hi khatia an mualpho tak atang khan a mizia a hloh nasa em em a, kei a ngaihven ber tur hian ka ngaihsak hleithei meuh si lo. A fala la kawm erawh ka tum. Kan boruak pawh hre miah lo ang maia ama tlat tlata tlat a ching a, a roomah hian a tawm deuh reng mai a ni. 

"Pa, in chu ka luah tho dawn em? " ka pa nena kan awm dun lai chuan ka ti ta tawp a. 

A ngawih vung vung hnuah, "Ka hrethiam ta lo khawp mai. Nangmah nge Zirsanga hi ka dah bo dawn ka la sawi thei lo" a ti ta hmuk a. Ka zâm nasa. 

"Pa, min hua em? " ka ti ta tawp a. Min melh rulh a, "Haw lo ve, ka lainat zawk che. I vanduai a ni" a ti zawi sap a. 

"Awmdan tur pawh ka hrethiam tawh lo. Keimah hi phaiah khan hna ka zuk zawng zawk mai dawn em ni? I rilru damna hi ka duh alawm" ka ti a. Ka rilru erawh a buai viau thung. 

"Ka hre lo, kha chen min awm bosan a. I rawn haw ve chiah a. I kal bo leh daih chuan.. " a ti chuai ruih a. Ka hrethiam tho. A fanu ka nihnaah min ngaiin min thlahlel ve a. Mahse, a beisei loh ang lutuka ka awm avang chuan hrehawm a ti hle ang tih ka ring. 

"Zirsanga hi a zirna a laklawh rih si a. Kimi, ka rilru a buai khawp mai. Nang tal chuan ka buaina hi min hriatthiampui rawh aw" ka pa mitmenga ngenngawlna chu ka hmuh hmaih thei thlawt lo. Ka pa chu ka lainat ta em em a. Keimah ka inthiam lohna a zual sauh bawk. Ka rilruin, "Aw le, pa, i damchhung chuan rilru nuam takin ka awmtir ang che. I fanu ka ni a, i duh ang takin ka awm ngei ngei ang" ka ti rilru a. 

Tunah chuan Zirsanga hi ka nun atanga ka phumbo a ngai. Eng anga nasaa min veh a nih pawhin ka intih pachan a ngai. Ka pa hi thlamuang takin ka awmtir tur a ni. Zirsanga lakah chuan nasa takin a che thei lo. A fapa dik tak a ni lo. Kei erawh a fanu ka ni a, a duh dan leh beisei a sawi ngam. Chuvang chuan ka pa hi zahna kawnah ka dintir thei lo vang. 

A fanu ka nih anga ka mawrhphurhna chu ka hlen ngei ngei ang. 

A harsa takzet a ni. In chu luah hran ka ţhulh ta rih. Mahse, luah theih tur chuan ka siamtir ta tho tho a. A nuam reuh viauin ka ring. Dawrah ka kal ve tawh a, ka pa remruat angin Zirsanga pawh a pute khuaah a han zin khawthawng a. Min hruai ve duh teh mah se; ka duh tlat lo. A kal zan la lain, "Ka nun atangin ka phumbo dawn che. Ka pa hi ka pa a ni a, ka tizak thei lo, a damchhung chuan ka nau i ni tawh ang" tiin ka thutlukna ka hrilh a nih kha. Vawi tam min call a, ka block ta a. Whatsappah pawh ka block bawk. Unau kan inblock chu a ni ta der mai. Keini anga vanduai hi an awm ve ang em le.. 

Sawmpuia chu ka nunah ka lalut ta bawk. Ni e, Dinpuia ai chuan a tla na zawk a ni mahna. Kumte chu number mai mai an tih kha maw.. Rei kan daih ring lo mah ila; Zirsanga rilru tihhel nan hetia hmanruaa ka hman hi a ngai tlat a ni. Amah phei chuan hria se a lawm vak lo maithei. Mahse, nakinah kan kal chho zel anih chuan ka la lut thuk ve zel mahna. Sawmpuia te chu chhungkaw khawsak sang tak ni lo mah se; Sawrkar hnathawk deuh vek an ni a. An intodelh angreng viau. Mizoramah chuan sawrkar hnathawh bak hi kan aim meuh lo, kan ram a la rethei a, Sawrkar hna aia hlawh hmuhna tha a vâng rih bawk a ni e. Sawmpuia hi an chawm rawn tihtheih a ni. Nu leh pa dik takte hnuaia seilian a ni bawk a, a inringtawkin a nungchang pawh a mawi viau mai. Kei aiin naupang daih mah se; A bialnu ka nih angin min treat thiam viau. Zirsanga ai mahin min care zawk ka ti. Mahse, Zirsanga a tluk erawh ka ti hran lo. 

Dawrah a hman changin a rawn leng thin a, an zirna an zo ta rih bawk nen. A hman ve bawk a. Zan lamah pawh vawi hnih vel chu a rawn leng ve. Zirsanga lah a reh vang vang a, hei kar hnih dawn chu a zin ta. Rawn haw a tum ta lo nge ka block si a, biak ngaihna a awm lo. Ka nu ten an sawi ngai bawk si lo. Ka ngaih chu a tha chiah lo naa ngaihven hûrh kha ka hreh ve tawh si. Nuam a han ti a ni phawt ang chu.. 

Sawmpuia chu ka chhungte lam pawn an hre tawh viau, Thari hian min fiam ve ziah. Sawi tawh ang khan Jeni chu a mizia a la ngai reng. Kawm ka tum khan an U Mali hovin excursion ang deuhin Shimla-ah an zu zin daih a. A rawn hawna a la rei lo. A mizia pawh a la cool hle. Ka pa pawn a rukin min sawipui tawh nghe nghe. 

"I nau hian vei eng emaw tak zawng a nei a ni. Kawm chiang teh" tiin. Hun remchang ka zawn thu ka hrilh a. Engvanga danglam nge ni ang maw? 

Ka beisei angin hun chu ka hmu ta a. A roomah lutin ani chuan zai a lo ngaithla a. Khumah bawkin a lo zaipui rat rat a. 

"Jen" a beng bulah ka va ti a. Phâwk zetin min rawn melh. 

A ear phone la thlain, "Umm.. Min tiphu alawm" a ti a. A zai play chu a off nghal bawk. Khumah chuan ka thu ve a, "Thil sawipui che ka duh a" ka ti a. 

"Umm sawi la, eng lam nge? " awki danglam hran lo hian a ti a. 

"Ih, englo a nia..tun lai i mizia hi a danglam riau a, thil eng emaw vei nei ang hian i awm a. Roomah i tawm tlawk tlawk bawk si, buaina i nei em ni? I u ka nia, ka bulah chuan engmah zep suh. Inpuih dan pawh a awm ang" ka ti a. 

"I danglam vak ang khan maw? " a ti ta khauh a! Ka phu deuh zawk. Ni e, kei pawh tun thlengin ka la panngai hlei thei lo va.. Chaw erawh ka ei ve thei hlek hlek tawh a, mut erawh ka la mu tha meuh lo. Sleeping pills pawh ka ei ta zeuh zeuh kha a nia. Ka awmdan chu ka nau pawn a lo hai bik lo a nih hmel. 

"Kei chu ka tha alawm.. Buaina i neih chuan min han hrilh teh" ka ti dam thlap a. 

A thu tha sat sat a, "Ih maw.. U, ka bialpa khan min then thei lo va, min umzui zel a.. Dik tak chuan ka lo hmangaih ve tawh si a. Ka sawi ngam ngang lo a ni. A rukin kan la inhmu thin a, mahse, a dik lo tih ka hre si a, tunah hian ka block vek a, engkim tihtawp tumin. Mahse, ka ngai ve thin lutuk, ka â mai dawn ten ka inhria a.. Chuvangin mi bula awm te hi ka peih thlawt lo a ni" a ti ta a. Ka rin ruk sa a nih avangin mak ka ti hran lo. A lu-ah ka chul a, "Ka rin dan chiah a nih chu.. Ka hrethiam lutuk che. A hrehawm ngawt ang. A duh chein a care bawk che sia.. Kei pawh i buaina ang tho kha ka buaina a ni a. Chuvangin ka danglam alawm. Tunah erawh hei Sawmpuia nen kan inzui ta a, ka chak ve hret hret tawh. Nang pawn i hneh a ngai a ni" ka ti mawlh mawlh a. 

"Ka tum alawm. A nupui a then phah a, ka inthiam lo lutuk khan engkim ka titawp ta a. Kan inkawp ru leh tih kha in hriat ka hlauh em vangin engmah ka sawi ngam lo a ni" a ti a. A khua a har hmel kher mai. 

"Jen, harsatna te chu kan tawk tur alawm.. Khami vang khan kan indahhniam tur a ni lo. Ni e, nupui nei lai a nia, chuvang chuan i bansan a ngai si a. I tithei em em ang, thiante kawm tam la, in hnathawhnaah pawh ngaibtuah ngut ngut lovin titi ve la.. I zia ve zel mai ang" ka ti leh a. Mahse, Zirsanga vanga ka buaina leh ka nepzia ka inhrechhuak nghal. Ka tih hleih theih loh hmangin ka nau chu nawrkal ka tum ve chu a nia! Unau nauin mi pasal vangin buaina kan tawk chu a ni ta reng mai! Ka pa hian hre vek ta se, a va zak dawn em.. 

Thiamthu sawi tur kan nei lo. Jeni erawh a bialpa khan mawh a phur lian zawk ka ti ve tlat! Ti nge he zoram zimtêah hian mi nu, mi pa sawi lo va kan inkawp zung zung mai le.. Thiamthu sawi tur lah kan nei ţheuh bawk si. Mi pasal ngaihzawn zing kan dem rualin nupui fanau neia pasal dinhmuna ding mekten an nupui fanaute phatsana mi dang an ngaizawng hi kan dem nep zawk fô! Mipa chu tisual ve thei lo emaw kan ti thin. A ni lo. Amaha innghat a nupui fanaute phatsantu leh mi pasal a ni tih hre reng chunga lo kawp duhte kha an dik lohna leh demawmna a inchen ve ve.. Thiam zawk an awm lo. 

Keini unau pawn he buaina tenawmzet vangin kan nungchang kan hloh ţhelh chu a nih hi.. Mahse, kei chu ka duhthlanna a ni tel a, ka tenawm zual. Tei lakah khan thiamna engmah ka nei lo, mahse, Tei pawh kha a fa paina ni lo pui kha ti nge a puh ve tlat mai le aw.. Khawvel zet hi chu.. 

Ka nau nen rei ngial kan inkawm hnuah Ka nau pawh chu a harh ve ta deuhin ka hria a. Lungmuang tak chuan ka chhuahsan. Kei tak pawn kan inkawmna chu ka hlawkpui. Ka tan vek tho a ni ve tlat. 

Sunday chawhnu inkhawm chu ka tlanbo ta mai. Ni a sa bawk sia, nimin lamah Jeni leh Thari te nen eng nge kan hriat teh chêk ni, kan walk ve a. Ka taksa a rawl ţhûm mai si a. Ka inkhawm ta lo. Ka room ka chingfel a, han chinfel em em tur erawh a tam lo. Ka thawmhnaw hlui ho, la tha si te chu ka dah khawm a, Thari ka pe ang ka ti. Thari hi chu kan unau angah kan ngai deuh tawp tawh. In hnuai lama ri deuh huk vang chuan hawkdak ta reng reng chu ka zu dak a. Awiii! Zirsanga a lo haw! Sundayah hian.. Ka nghing ve det. Engtin emaw ka awm. Thari leh Jeni chuan an lo lawm nasa mai a, an lo ngai viau tawh zawk em mawni.. Kei erawh ka pindanah ka lut leh daih. 

Thawm a reh deuh hnuah ka chhuak a, Thari chuan thei chi hrang hrang hi a lo dah tha a. 

"U Zirsanga lo hawn a nih hi" a ti sar sar a. Theite pum khat chu ka la zauh. Hetiangte hawn nachang a hre ve a. A pindan lamah a awm tawh a nih ka ring. 

Eirawng kan bawl laiin inbual fai sarin a rawn chhuk ve thauh thauh a. 

Biak loh ngawt chu mawi hek lo. 

"Sundayah te i lo hawng a" ka ti a. 

"Nia, motor an tlan tam lo va, a nuam ber alawm" a lo ti mai a. 

"A nuam em? " 

"Umm nuam ve reng, Thingtlang hi chu nuam ka ti hrim hrim" a aw pawh a zangkhai hle. 

"Nia, i cham hlen dawn maw ka tia" nui chungin ka ti a. 

"Cham hlen theih lohna chhan ka nei alawm" a ti satliah a. Thari chu a lo nui huk, "Ehhh.. I lungleng chiang, U Tei chu niminah pawh ka hmu.. A pum pawh a lian ve reuh tawh tawp.. Min lo bia a" a ti huah huah a. 

"I hre lo bawk, Thar lerh, Tei lam a ni leuh" a lo ti hluk a. Ka lo nui ve ringawt. 

"U Kimi bialpa thar pawh i la hmu lo ang a.. A cute tawp" Thari chuan a la ti zui! Ka va mitmei a, min en duh der si lo. Zirsanga chu a nui tak naa a chhungril atanga chhuak a ni lo tih ka chiang. 

"Sawmpuia kha mi? Ka hre hnawhsawh. Naupang a nih kha, naupang" a ti nghut nghut a. 

"Mahse, a lian tho alawm" Thari chuan a ti leh zat. 

"In ninawm" ka ti hlak a. Ka thil chan lai chu ka va sil ta daih. 

Zanriah kan ei laiin a zinna vel report a pe thuak thuak. A nu pa hi a la dam a, a putea te chhungkua nen an khawsa. 

"Ka pu khi a chak vak tawh lo sia, he lamah awmpui daih tur a ni," a ti a.. Ka nu chuan ka pa mitmei veng tih hriat zetin, "Leh ngawt zel a che. Ka pa pawn a duh kher lo vang.. " a ti hlak a. 

Ka pa chuan, "Aman a duh phawt te chuan rawn awm rawh se, Thari nen an inkawm thin ang a, a taksa hriselna pawh a zia deuh ang" ka pa chuan a lo ti ve a. 

Thil dang daih ka lo ngaihtuah. Nuthlawi pathlawi te hi ka hnualsuat ni miah lovin, fa neih tawh hnua inneih leh hi chuan karah neuh neuh a awm tih hi chu a lo dik a ni. Fa bik ve ve neih phei chuan kan chhungkua atang pawh hian a hriat theih mai. Ka pain ka nu mitmei vengin keini unau lakah a duhthusam ang pwh a thlentir thei loh laiin ka nu lahin ka pa leh keini mitmei a ven vangin a duh angin a che ngam bik lo bawk. Hei hi a hrehawm dawn hian ka hria. Mahse, nuhrawn azawngah Zirsanga nu aia tha leh fel hi chu an váng viau ang. Jeni reng hian a ngaina èm mai. 

Sawmpuia a lo leng. Ka inkhawm lo bawk nen. Zan lam inkhawm hi ka thatchhe ta riau mai. Hla zir pawh ka kal chhe khawp. Dinpuia ka hmuh hreh vang a ni pakhat. A zia lo khawp mai. Sawmpuia nen chuan thlang lam bathlarah kan thu dun a, khua a thiang nuam kher mai. Ka kut chu a hum a, a titi siam siam a, a kum ngaihtuah chuan sawi tur te hi a hre reuh tawp. Ka sawi duhzawng a hre bawk si. 

"A chang chuan mi dang daih i ngaihtuah ang hian ka hre thin, ka feel ka ti mai" a ti thut. Ka lo harh zawk. 

"Awihawm loh" ka ti nghat a. 

"Tak tak alawm..i ex i ngai aniang. Tu nge i ex pawh ka hre bawk si lo" a ti nuah nuah a. 

"Ex te hriat vek a ngai kher lo. Nang pawh ka hre duh kher lo" ka lo ti leh hlak a. 

"A nih leh min hmangaih em? " a ti leh hlawl! Ka phâwk hrû mai. 

"Aa.. Teh ngawt a che. Chuti maia awlsamin a inhmangaih theih loh. Nang pawn min hmangaih lo vang" ka ti a. Hmun dang ka hawi daih. 

Min la en reng tih erawh ka mitsirin ka hmu thei. 

"Kei chuan ka hmangaih chein ka hria" a ti sup a. Ka kut chu a hum nghet sauh. 

"Ka la hmangaih ang che. Ka beisei" ka ti tawp. A khi sak a, "Nia.. I frank a ka lawm daih zawk" a ti a. 

In chhunga thawm awm hlut vang chuan kan hawi let rual ţhawt. Ka thil hmuh chu awih harsa ka ti hle mai. Zirsanga chu rui tih hriat zetin Danny leh Eddy hian an rawn kuah lut a, a hmai chu thisenin a bual khat vek bawk. Buaina leh bawk maw.. Hrep tak hian. Sawmpuia nen chuan kan va lut ve vat a. Ka nute an inkhawm daih si.. 

"Eng nge thleng a? " tiin Danny chu ka melh a,. 

"A thisen hi hru fai phawt ru" a ti hluk a. Ka che nghal vat. Thari hi thisuk nei ania, tirh ngam chi a ni lo. Jeni lah a kimki viau bawk si. Keimah bawkin Zirsanga hmai chu ka hru fai a, a room lamah kan kuah chho bawk. Ka sil fai thuak thuak a, khumah chuan rem deuhin kan muttir a. Mahse, a chal kak chu a thi duh hle, bandage ka va la a, Eddy chuan zei deuhin a tuamsak ta a. Zirsanga lah chu a phun nuah nuah a, ka hmuh dan chuan zu rui mawl zet angin ka hmu. 

"Zanin chu kan hrethiam bik lo, a ruih phat atangin buaina a zawng ka ti mai. Kan zu inna bula rawn in ve te nen kan inhnial deuh a, ani buai chak renh reng chu khap hman lohin a va inrawlh a, an insual ta a ni. Kan inphek sual zui nghal a, Zirsanga hi an lo sual rawn deuh nge amah pawn a khawih na ve tho.. Kan rawn hawn pui tawp anih hi" Danny chuan a ti zung zung a. Ka thaw hawk. Zirsanga buainaah hian ka hlim thla a tel ve zel. Keimah vang a nihna chen a awm ve zel hi ka thin tirimtu a ni. Tha takin unau kan ni dawn emaw ka tih nak alaiin. 

Danny te chu an haw zui nghal a. Ka nute pawh an rawn bang. Sawmpuia pawh chu a rilru a bet ta vak lo nge, chhuanlam siamin a haw ta thuai a. Zirsanga vang vek. Ninawm lutuk. Ka nute bulah thil awmzia ka sawi thuak thuak a, mu turin ka chho daih. 

Dar engzat chiah nge ka hre lo. Ka rin ai takin ka mu tui ve a ni maithei. Ka pindan kawngka kik ri pawh chu ka mang hriat ruai ruai, a hnuah a chuma a rawn chum takah chuan ka harh hlawl. Hmanhmawh zetin ka va hawng a, Amah bawk! Mahse, ka nu leh pa bakah Thari leh Jeni pawh an rawn lang ve nghal zat! A aw rawl a len bakah ka pindan kawngka a chum chhia ang tih hlauhthawnawm khawpa a chum nasat vangin an lo harh lo thei lo a ni ngei ang. 

"Eng nge" ka ti pawr hlar a. Ka chhungte an awm ve reng tih hre miah lo angin a lu tuam bur chung chuan min rawn pawm thawk a. Tawlh hnun hman pawh a ni lo. 

"Kimi, ti nge misual ber anga i awm? I thinlung kha bum suh. Ka nei dawn tho tho che. Ka neih loh che chuan, Zirsangliana ka ni lo vang.. Chu chu i hria em? " Ring zet zetin a ti ta lung lung mai. Ka ip chawih chawih a, sawi tur reng reng ka hre ve lo. Thari leh Jeni hmela maktihna inlar chhuak zut zut chuan min tihrehawm takzet a ni. Ka nute erawh an hriatsa anih vangin mak Tihna aiin pawi tihna an lantir nasa zawk. 

"Zirsang, mawla, engvangin nge hetia i awm a? Min thlah rawh" ka ti hlak hlak a. Ka aw chu a khur dat dat mai. Ka zakin ka lung a chhe bawk si. 

"Ka mawl tawh.. Ni e, mi mawl ber angin ka che tawh dawn. Ka hmangaih hi ka hloh dawn lo bur, tu pawn min dan tum rawh se.. Zirsanga ka nih chhung chuan a tawp ka thleng tho tho ang" nghet zeta min kuah chung chuan a la ti ta zel a! Ka hah. Ka nam vak a. Hnai takah kan inmelh ta reng mai. 

Mittui tling pam chungin, "A theih loh ka tih kha. Ka thei lo. Ka hmangaih tawh lo che. Ka tan engmah i ni tawh lo. Sawmpuia ta ka ni tawh" ka ti ta fak fak a. Ka thinlung erawh chuan, "Zirsang, hei hi kan pahnih tana tha tur leh kan chhungkaw chhanhimna tur a ni.. Hrethiam hram teh" a ti mawlh mawlh thung. 

A ding khawng ut a, chiang zeta min melh chungin, "Kimi.. I mitmeng dawttheihzia kha ka hai lo.. Inbum tawh suh. Keimah ang hian huaisen ve rawh" a ti sup sup a. 

"A ni lo. Dawt ka sawi lo. Ka nau i ni a, ka nau i nih zel hi ka duh tawh a ni. Hrethiam ang che" ka ti leh a. 

Bu nghut nghut chungin, hnung lama ding te chu a melh kual a. A nui hul hak bawk. Beidawn hmel zeta min rawn en lehin, "Dawihzepnu, hmangaihna i titlawm hle mai. Ni e, i duh dan ang tak chuan le.. Naktukah he in hi ka chhuahsan ang. Mang tha le" a ti hniam raih a. Chelh hman rual lohin a pindan a pan nghal. Ka pa in ka hnungzang a rawn chul a, kei erawh khur dawt dawt chungin ka pa awmah chuan ka bei thlawp a. Zah pawh sawi lovin ka ţap ta hlawp hlawp a. 

Thari leh Jeni mittui hru lai chu ka va hmu phe ruai mai. Min khawngaih ve a ni maithei. Ka ziaawm deuh hnu chuan, ka pa chuan Sitting roomah min kai phei a. Mi dang pawh an rawn kal ve zat. Tlang takin Zirsanga nen kan chungchang chu a sawi ta hmiah a. Thari leh Jeni bulah chuan, "Kamtam loh a him. Thenawm khawveng chu sawi loh in thiantha ber bulah pawh in sawi tur a ni lo. He thil hi chhungkaw case a ni a, in ka in an vaih chuan mi zawng zawng en rawn leh mak tih kan nih bakah kan mualpho hlen tawh ang. In hrethiam em? " vau titih thlem titih hian a ti a. An bu nghat nghat mai. 

Jeni lah â ve tak tih takah, "Kei chu ka ringhlel reng ah! U Zirsanga hian a duh hmel thei ka ti thin lutuk a" a lo ti hmanhmawh a. Thari lah zep thei hek lo, "Chu chiah, an inneih nia a melh char char atang khan mak ka ti tawh" a lo ti ve bawk. Lehlamah kan boruak chu a zangkhai phah ta deuh. Zirsanga thawm erawh kan hre lo. Ka nu hmel ngui tak chu ka khawngaih takzet. Keimah vangin a fapa chuan in a chhuahsan dawn chu a ni si a! Ka pa hian a dang thei ang em le.. 

Ka muhil thei tawh lo. Ka let tawn sek mai. Zirsanga beidawng leh hrilhhai hmel kha ka mitthlaah a inlar mawlh mawlh mai. Ka khawngaih a, ka khawngaih thei si lo. Ka pa vang chauhin he thil hi ka paltlanga ka hmachhawn a ngai si. Zirsanga hi chhuak ta tak tak se ka awm thei chiah ang em le.. A luhlul si a. A chhuak ngei ang. 

"Lalpa, ti nge unau kan nih tak tak loh le?! Mawh.. Tinge unau dik tak min nihtir loh? " tiin ka rum nghat nghat a. Chhanna erawh ka hmu chuang hlei lo va. 

Kan tho hma tlang hlawm kher mai. Kan meng tlang fur a ni maithei. Ka pa chu Zirsanga be turin a pindanah a kal a. A rukin ka ngaihven reng. Ka nu erawh a awmdan a danglam hran lo. Chìk deuh erawh chuan a ngui ru em em tih a lang. 

"Nu, a chhuak tak tak lo vang. Ka pain a hmin em em ang" ka ti sap a. 

"Chhuak rih mah se pawi ka ti lo. Paltlang ve phawt rawh se" a ti a. A fapa a hmangaihzia leh Zirsanga pa chhungte lamin an ngaihthah sizia te ka lo hre tawh a. Ka khawngaih. 

"Aa.. Chhuak se khaw nge a kal chuan ang? " ka ti a. 

"Khuanglengah a chhoh leh mai ka ring" a ti zawi sap. 

"Aa.. Nu, a chhuak lo vang" ka la ti fan a. Mahse, ka sawi lai mekin Zirsanga chu bag nen a rawn chhuk thla chhat chhat mai.. Ka pain a rawn zui bawk. 

Ka nu chu a va kal hnai vat a, "Bawiha, khaw nge i kal ang" a ti chuai raih a. 

"Hre lo zawk rawh u" a ti sup. Ka chhing sawk mai. Ka tilui thei ta ngang lo va, ka va pan hnai ve ta ngawt. A mita en chungin, "Chhuak suh. Naktukah ka in dang ang. Ka in pawh an siam zo vek tawh.. " ka ti ta a. 

A nui hul hak.. "Mahnia i awm lek phei chuan.. " a ti a, a ngawi daih. A ngaihtuahna chu ka hria. Sawmpuia lam daih a ni. 

"I chhuah avang hian engkim a tha dawn chuang lo" ka ti ve tlat. 

"Nangma tan, nangmah vang chauhin ka kal bo dawn.. kimi, mang tha" tih leh chhuah a rual nghal.. 

Tuman an umzui lo. Ka pa takngial pawn. Ka en ngai ka en ngawih ngawih ringawt. Tukthuan pawh ka ei peih lo. Dawrah kal lova mut nilen ka tum. Tukthuan an ei kham atanga darkar tlemtê ah, Kan kawngkapui chu a rawn inhawng ţhuai a. Kan veng YMA president Pu Vanlalfaka a rawn lut a. Kan lo phâwk hrû hlawm mai. 

"Tumah reng rengin phone in lak theih loh le…? Tunah Zirsanga nikhaw hre loin a awm mek.. Lpk nen an insu a.. A dinhmun a tha lo khawp mai.. " a rawn ti dam thlup a. 

Ka bengah erawh ţek tla ri ang mai a ni..