Zirsangliana 17

ZIRSANGLIANA.. 17

Ziaktu: Toni Râlte

"U Kim, i tha maw? " ka harh nghal zawk. Khum bula Tei ding nui sang chu ka han thlek ngial a. Chaw min lo kensak a ni maithei. A bulah mi dang an ding lo! Ka lo zawng leh hman pek a nih kha. Ka va nep tak em. 

"Ka tha ve deuh tawh.. I va fel ve" ka lo ti niah niah a. Ka ril a ţam kher mai. Zing lamah ka muhil chauh a, ka mu rei hle a nih dawn hi. 

"Va inti harh la, chaw hi ei rawh" a ti zung zung a. Jeni pawh ka hmu chuang lo. 

"Khaw nge Jeni" ka ti a. Ka lu hai chu ka ner pui sak sak. 

"Vawiinah show an nei dawn sia, an class khan.. A rawn haw a. Chawhma chhung ka awmpui che ang a, chawhnuah Zirsanga a rawn awm ve thung ang" a ti a. "Ni lo, ani chu lo kal suh se" ka ti rilru chiam chiam. Sawi chhuah erawh ka duh lo hul hual. 

Ka va inthiar a, ka hmai te phihin ka intifai thuak thuak a. 

Chaw chu ka ei ta nghal a. Rilţam teh mah ila, chaw tui tihna ka la nei chiah si lo va, a ei tam theih chuang loh. Tei chu a titi siam siam a, an pa nen an inngeih leh deuh tawh thu te, Zirsanga mizia mak a tihzia te a ni. Ka ngawi reng thung. 

"Anih maw U Kim, Zirsanga hian naute DNA test hi a duh tak tak i ring em? " a rawn ti leh hlawl! Ka phu deuh zuk nghe nghe. 

"Duh lo vang, a sawi ve mai mai aniang" ka ti ta ringawt a. Zirsanga luhlulzia hretu ka ni si a, dawt sawi ringawt chu nuam ka ti chiah lo. Ka ei khamah a sengfel leh zung zung a. Kei pawh ka thu mu.. Kan phone ve ve chu khawihin inbe tawh lem lo chuan kan chawhma ta thak a. Kei erawh ka lu a hai deuh zel vangin ka'n muhil leh zauh zauh zel a. Dar khat bawr vela ka muhil ka harh chuan Zirsanga hmel ka hmu ta a. Ka meng zau kâwk mai. 

"Eng nge i lo tih? "Ka ti hmuk a. 

. "Ka lo awmpui dawn che mawle" a ti ve hluk a. Biak a chakawm loh rualin kei pawh min biak a chak vak kher lo maithei a ni. 

"Awmpui ka ngai lo" ka ti a 

"Min ngaih em kha" a ti sup a.. Ka va melh râw.. A nui suk leh nghal. Tum burin ka hnungchhawn a. Ka tukhum a hit mem mem zui. Rei pawh chutia kan awm hma chuan, kawngka chu a rawn inhawng a. Sawmpuia leh Zuia te an rawn lut hlawl! 

Zawi zet chuan ka thu tho ve a, "I va tha tawh awm ve kha.. Ka rin aiin ka hmu tha che" Sawmpuia chuan a ti a. Zirsanga erawh an rawn luh rual khan lehlam hawiin phone a khawih hmak thung. 

"Ka zia tawh reng. Na chhia em em ka ni hleinem.. In va fel ve.. Lo thu ru" ka lo ti ve luam a. 

Zirsanga melh chungin, "I nau mi? " a ti a. Ka bu nghat. 

"Zirsang, Sawmpuia leh Zuia te an nih hi.. Ka thiante.. An fel ania" tiin ka han hmelhriattir a. A lang chuan an innuih sak naa, Zirsanga mitmenga thil lo lang chu ka tan chuan langsar tak a ni. 

"Kimi bialpa maw i nih? " a'n ti nghal ngawt lehnghal a. 

"Aa.. Ni chiah lo, la ni turah ka inngai" a lo ti ve sak. Sawmpuia ai chuan Zirsanga chu a lianin a sang zawk a, a upa zawk bawk tih chu a lang reng. Sawmpuia chu hmel tha an ti zawk maithei. Ka mitah erawh Zirsanga chu a tha hliah hliah zawk. 

Bet lo zet chuan kan han titi ve laih laih a, Zuia pawh a tawng duh ve khawp mai. Kawm a nuam angreng. Zirsanga lah chu han inthiarfihlim a tum thak lo va, min vil run ni maiin ka hria. Mahse, pawi ka ti em em hran lo. In kan hun a tawp takah chuan an haw ve ta hram a. Zirsanga'n a zuk thlah! 

A lo let leh chuan a hmel a dur khup a, biak ngam a ni leh tawh lo. 

"A hmel that piak puak kha" a ti nghut a. Ka nui hawk. 

"I haw dawn lo mi? " ka ti daih a. 

"Ka riak dawn" a la tizui! 

"I zak lo, haw rawh. Jeni maw Thari maw lo riak rawh se" ka ti hlak a. 

A nui hul hak a. "Ka riah duh i ring reng reng mawni le.. A thinlunga mipa dang ngaihtuah reng hmeichhe bulah rei ka awm thei lo" a ti hniam raih a. A aw chu a chang mah mah. Mahse, na ka ti em em tawh lo, min ţhawn thut thut hi a sim duh si lo va; ka intuar chhel tawh ka ti mai. 

Thari'n chaw a rawn dah a, a riak nghal dawn bawk. Zirsanga chuan a hawn dawnah ka chalah a rawn fawp zauh a, Thari a awm lo hlauh! 

Dam dap hian, "I dam vat ka duh a ni. Dam rawh aw" a ti a. Hei hi alawm ka ngei em em, min tithinur ţeuh a, a nem leh ziah zel hi. Ka hua. Ka nem ve leh ziah thin bawk si. 

"Mang tha" ka ti hmak a. Lehlam ka hawisan daih. A chhuak thawm ka hre reng. Ka ruak huaiin ka inhria.. Ni e, engtikah nge ka ngaihna hi a reh ang a, ka ngaih zawh theih ang le.. 

Thari nen kan titi char char a. Mut chhuakin min zem chiai chiai a. Ka muhil ta daih. Mumang bo thak khawpin ka mutui. Zingah chuan ka harh vâk mai. Chhuah dil tur a ni ka ti rilru a, Jeni'n Thari a rawn thlak a. Doctorin min rawn tlawh chuan, "Ka tha tawh sia, min chhuahtir tawh mai la" ka lo ti tawp a. Min en vang vang a, "Umm i that deuh hmel e. Chawhma lam chu drip te han khai leh la, chawhnu lamah i chhuak dawn nia"a ti ta hlauh a. Ka lawm khawp mai. 

Sawmpuia'n min rawn tlawh leh zuai, ka chhuah tur thu te ka hrilh ve a, "A remchan hlauh chu, ka lo hruai ang che" a ti ta mai a. Hnial kha nuam hek lo, aw le ka ti ta ringawt. Ka pa te pawh ka hrilh a, bill vel tifela a rawn kal tur thu a sawi nghal a. Thla a muang sawt e. Zirsanga erawh ka hrilh lem lo. A hre leh tho vang. 

Drip te chu min han khai leh a, ka muhil deuh reng mai. 

Chawhnuah ka pa a lo lang a, bill te an tihfel zawhah kan inlachhuak ta a. Sawmpuia pawh a rawn thleng ta chiah, kan haw ta a. In kan thlen chuan ka nuin kawtah min lo hmuak a, hah a dam hle mai. Sawmpuia pawh a rawn lut ve a. Tei chu a hnaah a kal a, Zirsanga ka la hmu lo. Ka nuin Sawmpuia chu thingpui te a han lumsak a, thingpui a in lai takin Zirsanga chu a rawn chhuk ve hnak hnak. 

"Ehe! I lo kal ve ni maw? I va fel ve" tiin Sawmpuia chu a be hlut a. Ka lo en reng ringawt. 

"Nia, a remchang sia ka rawn hruai a" a lo ti a. Zirsanga chuan thingpui a in ve nghal a. Sawmpuia vang chuan ka la chho thei bik si lo. Inbual ka chak tawh takzet. 

"Lo leng thin rawh aw. Kimi pawh i rawn kan atang khan a dam hawk hawk sia" Zirsanga chuan nghal zetin a ti a. 

"Nia.. Rawn leng ang.. " Sawmpuia chuan nui chungin a ti ve nghal a. Ka dinhmun hriain rei a awm ta bik lo. A haw rual rualin roomah ka chho nghal. Mahse, ka luh rualin Zirsanga a rawn lut ve zat. Ka dang hman ngang lo a ni. Khumah min bawhthlu thlu rawp a. A rit si.. 

"Khawi teh.. Tho teh, a hrehawm ania" ka ti a. 

"Ka ngai lutuk che" a rawn ti thawp sup.. A mitmeng thuk lutuk chuan min melh ngawih ngawih, kei hi ka dik leh dawn lo. Ka ngai ve ngawih ngawih si a. 

Ka nam ţang tang a, "Tho rawh.. Min rawn hmu a nge" ka ti a. Thuawih zet chuan a tho ve mai. Kan thu chhuak a, chhuah a tum si lo. "Ka inbual duh, chhuak rawh" ka ti a. 

"Ka bual dawn che" tih leh kawngka kalh a rual nghal a, min rawn panin ka thawmhnaw chu zei zetin a phelh nghal. Ka hamhaih atalângin chet lak ngaihna pawh ka hre lo. Ka harh chhuah leh chuan kekawrte nen ka lo ding reng tawh. Ka kekawr chu ka ke rekah a tla hnuk a, bra pawh a phelh! Awi leh! 

 Ka theih tawpa nain ka nam vak a, "Chhuak rawh.. Chhuak vat rawh. I va zak lo ve. Tenawmpa" ka ti chiam chiam a. Ka awrawl pawh a zawi lem lo. Ka tha a khur zawih zawih mai. Ka inham buai chu min chelh bet a, "Shhs.. Kimi, a tawk.. A mak.. Engtin mah ka ti dawn lo che. I la chau, i la damkawr a, bathroomah luhai ten tlu la engtin nge niang. Inbengdai rawh.. Hawh le" tih leh zo zeta min pawm a rual a, bathroomah min luhpuiin kawngka a kalh nghal hmiah. Shower a on nghal a, tui vawtin min phuh seng seng takah chuan ka chhungril so bulh bulh chu a zia ta deuh. Mipain hmeichhia an khawihna ang ni lovin Pain a fa a bual ang hian ka taksaah chuan sahbawn chu a chulh kual a, ka ding khawng reng ringawt. Ka hriat loh karin ka mittui a tla a. Heti em ema nghaisak ni tur hian eng nge ka tihsual bik? Ka hmangaih leh min hmangaihtu nen hian ti nge thlamuang taka kan inkhawih ve theih loh? 

"I lu su lawk ang" tiin a phun sup a. 

Min thuttirin min kuaikun a, ka lu chu a su ta bawrh bawrh. Ka zâng hawk mai. Lu bala awm hi hrehawm ka tih pawl tak a ni. Ka hmai êm chu min phihsak ta lo. Saruakin ka awm tih inhrechang miah lo turin min khawih thiam a nih chu! Tisa taka inkhawihna a tel lo. Zirsanga hi mipa mak tak zawng a ni e. 

"Ka hriat loh karin i va lo cher ve" lungawi hmel vak loh hian a ti leh a. Ka la ngawi ngat ngat. Ka tawng chuan ka ţah ka hlau. Min rawn melh vâwt a, ka mittui a luang tih a hmu thiam anih mahna.. 

"Tihpalh.. Tihnat che hi ka tum a ni lo. Hmangaih taka vawi khat chauh tal bual che leh enkawl theih che hi ka duh em a ni" a ti a. A awmah ka va bei thlawp a, ka ţap khur ta ngawt ngawt. Duat zetin min kuah a, min chul a. Ka beng bulah, "Ţap rawh.. A pawi lo.. Ka duat" a ti sup sup a. Ka duat tia min koh phei chuan ka keh vek.. Hetianga a mi duatna hi ka lo va thlahlel em.. 

Rei tawk tak kan inkuah hnu chuan ka bang ta a. Zahnain min phuar tawh lo, a nih nih ni rawh se tih rilru puin Zirsanga bek tawnah chuan ka vuan a. A mita melh chungin, "Zirsang, ka hmangaih che.. Ka hmangaih lutuk che" ka ti ta mawlh mawlh a. Nghet zetin min rawn pawm leh a, "Ka damchhungin ka theihnghilh tawh lo vang. Kimi, kei pawn nang chauh hi ka hmangaih tawh ang. Ka neihchhun i ni" a ti ve nghut nghut mai. Kan khat liam a ni ber e. 

A inhlip a, kan pahnihin kan inbual dun ta a. Ni e, pawi ka ti lo, ka dang thei lo, ka dang zo lo. Kha lai bathroom zimte, a chhuat vawt takah khan Zirsanga nen hmangaihna chu kan chen dun ta a nih kha.. Ka tan a hmasa ber a ni a. A hnuhnung ber pawh ni se ka ti. 

Kan inthlak fel meuh chuan Tei tawng lang lang pawh kan hre ta. Ka thinlung a rawn na leh ta vawt vawt mai. Kei hian Tei pasal chu uirena sualah ka kai lut a ni. Ni e, ka nu ang chiah khan. Mi tenawm ka va ni em.. Zanriah chu an rilru tihhrehawm ka hlauh vangin ka kil khawmawi ve. Tei mitah chuan ka melh ngam ngang lo a ni. Ka zakin ka inten ngawih ngawih. 

Mut hmunah duhthu ka sam a. "Ka in dang ang a, ka rai ang a. Tu nge a pa tih zawhna chu ka chhang lo mai ang. Ani nen chuan ka damchhung hun kan hmang dun tawh mai ang chu.. " tiin. A thleng ang em tih erawh Pathianin a hria ang chu. Tawngtai erawh ka ngam ta lo. 

Kan khatih avang khan an nupa nun chu a kal sual phah ang tih ka hlau viau mai. Zirsanga thusawi, "Kan inneih atangin vawikhat mah ka la mutpui lo" a tih kha a dik ang em ka hre lo le.. 

A tukah dawr ka la kal peih lo deuh a. Inah ka awm. Tei te nupa incheck up turin an chhuak a. Jeni a hnaah. Ka nu nen kan awm. Thari pawh a leng chhuak ve ngei. Roomah ka tawm deuh ngat ngat a, Sawmpuia'n min lo be deuh reng. A laka ka intluk luh dawn loh vangin beiseina siamsak loh law law ka duh a. Ka chhang bul thei ngei mai. Min duh ve tlat pawh hi a mak! A la naupan ngaihtuahin a puitling thei phian sia.. Zirsanga nen pawh inanna a mual mual zawng an nei ve e. 

Tei ang thawm vangin room atangin ka chhuak vat. In hnuaiah an nupa chu ding dunin an inkawk leh ta sawk sawk mai. Tei chu a thinrim takzet tih a lang reng mai. Ka zu chhuk ta nge nge a. 

"Min va ring chhe em em ve.. Kha pa nen khan zui chu kan inzui ve zuai, mahse.. Engmah a thleng lo. Fiahna nei lo chuan tiang khan min puh hlek suh aw.. " a ti tâwn tâwn a. Ka nu pawh a rawn chhuak ve. 

"Eng nge ni leh ta hlut? Nangni nupa zahpuiawmzia hi" a ti vin thak a. A thinrim ve deuh a ni maithei. 

Zirsanga chuan thawk la hawkin, Tei chu a'n melh ren rawn a. "Tei, inzep a ngai hleinem. Gosa kha Eddy cousin a nia, kawm pawh kan inkawm ve fo asin.. Tuna i fa pai hi a fa ngei a ni tih fiahna ka hmu tawh a ni" a ti chang rût a. Boruak chu a reh tlawk tlawk. Tei inhnit thawmin a rawn zui leh a. 

"Zirsang, mi tenawmpa.. " a ti hawk a. A ţap hlap hla.. 

"I mittui hian ka tan engmah awmzia a nei lo. Gosa ngeiin min hrilh tawh. A tirah pawh i va bia a, mahse, a hnu lawkah i period leh thu sawiin keimah min puh ta thung a. Tei, mi hrang an awm lo bawk a. Ka sawi ta vek mai a ni. Min hrethiam ang che. Zanin chu i duh leh riak la, naktukah i haw thei ang" tiin Zirsanga chuan thutawp a siam ta hmak mai. Tumah kan tawng ngam tawh lo. 

Zirsanga chu ka kai chho a, ka roomah ka luhpui ta a. 

"I chiang maw? Nimin vang te kha a ni em? Sawi rawh" ka ti khur dawt dawt a. 

"Hahdam rawh. Ka chiang. I hmu duh em ni? " tih pahin a phone min entir a, Gosa nen an inbiakna chu min entir ta a. A sawi dan ang vek kha a lo ni. Ka hah hluah hluah. Kan chhuak leh a. Tei chu ţap pur chungin a insiam ta chuk chuk mai. Ka nu nen zanin chu riak turin kan ngen sasawi a. Awmzia a awm lem lo. Zirsanga lah a ngawi ngul mai si. Ka pa a lo haw a, kan chhung buai ta a ni ber. Ka pa leh Zirsanga chu reivak lo pindanah an inkawm a.. An rawn chhuah leh chuan ka pa mitmeng a dang ta riau. 

Zaidam takin Tei bulah chuan, "Zirsanga hian hre chiang a inti ve si a. Ni e, va haw phawt mai la, keiman ka va thlah danw che nia. Thu thar kan nei leh vat turah ngai ang. I chhung te nen pawh kan inbiak a ngai a ni" a ti ta a. Tei chu amah ngeiin a va thlah ta a. 

Sawi tur a vang duh hle mai. Zirsanga lah a roomah a tawm tlat! A thil hriat chuan a nghawng ve ta deuh a ni maithei. A nupui kha a ni ve miau si a. Ka hrethiam tho mai. Zan dar 9 velah ka pa chuan Zirsanga nen min hmuh a duh thu a sawi a. Zâm takin a pindanah chuan kan va lut a. 

A aw thian kak kakin, "He thil hi in pahnih rem ruat a ni em? " a ti a. 

"Aih" ka lo ti ţhawt.  

"Engpawh nise, Hetiang thil pawh hi thleng mah se, nangni unau chu a theih loh ka tih tawh kha" a ti khauh fang a. 

Zawi muanga ka pa pan chhat chhat chungin, "Ka pa, nang meuh pawn Kimi ka neihna tur hi i dal thei tawh lo vang. Ani hi ka ta chauh a ni.. A tha em? " a ti vawt ta raih a.. 

(Dar 10-4 thleng online class kan kal a. Ka chau. Ka ziak tam thei ngang lo a ni e. Ni 18 thleng kan la kal dawn zui.. Story ka rawn dah hram paw'n a sei thei dawn lo aw 😢