Zirsangliana 16

ZIRSANGLIANA.. 16

(Adds mawlh kha.. Sawi reng a ngai ve a. In fel kha 😂😘

Ziaktu: Toni Râlte

Ka in luah tur pawh hlawhfa nen kan han bei chho ţan ta a, thil harsa em em chu a awm lo. Mahse, ka duh khirh ve riau a, engkim felfai thlap ka duh. A hnu lama han insingsak leh hi ka peih tawh lo. Tei leh Zirsanga pawh an inrem ta nge, Tei hlim hmel pawh kan hmu thei ta. Kei erawh ka na telh telh thung. Khuanglenga zin erawh an ţhulh leh ta kha a nia. Han zin bo daih se ka thawveng zawk ang. 

Ka nu hian min ngaihtuah nasa, langsar si lo hian min chìk reng tih ka hria. Chaw ka ei thei lo ber hi a ni. Ka cher kawk kawk a. Ka pa pawn vitamins min rawn hawnsak tawp. Zirsanga min leisak kha ka ei zo tawh bawk nen. Mahse, vitamins chuan ka chhungril natna a tidam zo si lo va, ka chaw ei a tui phah chuang lo. Zan mut theih loh ka ching chho zel lehnghal. Ţah erawh ka duh lo fô.. Zirsanga chuan min be bawrh bawrh thin, a û angin. Chu tak chu keiin tawrh harsa ka lo ti a. Mahse, tawrh a ngai tih ka hai chuang si lo. In dan vat vat chu a ni ka châk tak ber ni. 

Ni khat dawr bungraw lo thleng kan chinfel laiin Rawlthar tih aia upa hlek tur, tlangval tia sawi dawna la nau deuh bawk si pahnih an rawn lut a. Xerox bakah print out min rawn tihtir a. Pakhat a lian zawk chuan min en duh viau mai. 

"Ka hmuh hnu i ang eee.. " a ti ta phawng a. 

"Hmu tawh ang, khawiah emaw" ka ti ve ringawt. Min melh dan chu ka hai bik hauh lo. Zirsanga ai pawn a nau deuh maithei. 

An chhuah dawnah, "Dawr in nuam sia, kan lo dawr leh ang che u" a ti a. Faki'n a lo chhawn vat. 

"Awii a chhiat lohzia kha.. "Faki chuan a ti zawm zat. Ka lo nui a. 

"I bialpa kha a chhe lo zawk alawm" ka ti uang a. 

"A star che a ni chiang, a melh dan che kha.. Awii duh rawh, u Kim" a'n ti thlarawk a. 

"Ka nau rual te chu ka duh bik lo" ka lo ti a. 

"Kumte chu number mai mai. A ho lutuk. An cute zawk" a ti zui zel a. Ka chhang tawh lo.

Tlaia Asawmi nen kan inphur phei an ina ka va thlah ka let leh tur chu min tawk zawngin vawiina lo kal te ngei kha an rawn tlan phei ve a. Min rawn hmu ve chiah. 

"I haw dawn mi? " a rawn ti hram a. Ka bu nghat. Inbiak reng theih ni hek lo le, ka kalsan a. Zep loh chuan a hmel tha ka ti. Mahse, a la naupang em mai. 

Scooty ka hun that laiin ka pa pawh a lo haw ve a. 

"Ka rawn tlawh kawi a, saw an thawh chak riau saw.. Thla tharah chuan a luah theih ang" a ti a. 

"Nia, peih vat vat se a tha" ka ti ringawt. Veranda-a lo thu Zirsanga chuan kan thusawi a lo hre pha ve nge, "In dan vat vat chu i châk hmel hle mai " a lo ti a. A nui deuh bawk. 

"Chakawm ve tawh alawm" ka ti ve mai. Ka nui ve tho bawk. In chhungah ka luhsan ta a. 

Zanriah ei laiin Tei chuan, "Ti nge U Kimi chu a indan kher dawn a? " a ti ta chiah a. A lo hre ve tawh a ni maithei. Ka pa ka va melh a, muangchang hian ka pa chuan, "Saw lamah dawr hawn belh a tum deuh a, ani hi chu a tet lai atanga independent rilru pu kha a nia. Va awm hrang poh teh se" a ti chuar chuar a. 

Tei pawh chuan a awih ve mai a niang. A lo awm atangin a tana awm nawm lohna tur khawpa ka awm ka la hre bik lo bawk a. In dang pawh ni ila inngaihbel nachang a hre bik lo vang. Amah pawh hi a sual hran lo khawp mai.. Chet kawngah pawh ka rin aiin a taima reuh a, a rai ve avang hian kan awl zel zawk a. A tihtheih ang chu a ti ve zel. Eli ngawt ai kha chuan tha tak a ni. 

Ka phone a ri ral ral. Ka lu tuamna siamthat pah chuan ka la a, number hlang a ni. 

"Hello"

"Hello, chaw i ei tawh em? " a rawn ti a. Tu tak ni ang maw.. 

"Aw ei tawh e.. Tu nge aw" ka ti a. 

"Keimah.. Ih, vawiina lo kal, nangmah en duh deuhtu che kha" a rawn ti sar sar a. Ka nui tawp. 

"Ka number engtin nge i neih? " ka ti hû a. 

"I dawrah khan i tar kulh kha" a ti ta a. 

" ni dawn tak.. Chuan ti nge min lo biak? "

"Ka number hi khawngaihin lo save ve la.. Sawmpuia ka nia" a ti a. 

"E aw le.. " ka ti ringawt. Ani pawh thil dang vak sawi tawh lem lo chuan a dah ve mai. Min ngaizawng ringawt ang tih ka hlau, a hmel tha reuh sia, a buaithlak. A la naupang si. 

Ka sam ka chhem ro laiin Tei a lo lut a. Khumah thuin a titi mawlh mawlh. Dryer thawm a ring si a, a tawng ring ngang mai. 

Ka dah hnuah, "Zirsanga fel tawh dan hi a mak zawk. Min duat bawk sia. Vawiin pawh chakai ka ei chak sia, a va zawng nasa.. A lo váng si.. Ka ei chak zawng sawi pawh a inthlahrunawm.. Min duat leh lutuk hi" a ti sar sar a. Thinlung na ţeuh chunga ngaihthlak bak tihtheih ka va nei lo em.. 

"A fel alawm.. A tir khan sual a chhuah ve mai mai a nih kha." ka ti ringawt a. 

"Mahse, maw a whatsapp kha ka la hawng thei chuang lo. Ka try nasa tawp.. Ka en chak lutuk hi ka inthiam lo deuh" nui chungin a ti a. 

"Aman a remtih miau loh chuan en luih tum bik lo mai rawh. Buaina a chhuak zawk ang, a rilru a lian si a. " ka ti a. 

"Nia, bakah an inbe ngai tawh lo aniang. Phone te hi games a khelh loh chuan a khawih ngai mang tawh lo. Ka ensak vek thei bawk sia.. " a ti ve mai a. 

"Naute nei vat ula, keiman ka lo awmpui daih ang," ka ti a. Kan nui dun nasa. Mahse, a hmel chu a rawn ngui thut. 

"Mahse, u kim, kan inneih hmaa a thusawi, 'Naute hi a pian veleh DNA kan test ang' a tih khan min tilungngai. Ti nge min rin miah loh le ka ti.. " a ti zawi sap a. 

"Aa.. A ţang ve mai mai a nih kha.. Engahmah ngai suh, DNA test pawh a ngai lo. A fa a nia, a inla eng emaw ve mai mai a nih kha" ka lo ti zung zung a.. 

"Amah bak hi ka mutpui si lo va, min ring chhe lutuk reng rneg" a ti a. Mahse, a mitmeng chu a tim dai mai. Chu chuan ngaihtuahna dang min neihtir deuh. Engmah phei chu ka sawi chuang lo va. 

Zan dar 11 a ri leh ta. Ka la meng kar, Sawmpuia nen kan intext char char. Rin aiin kawm a lo nuam a. Min tihlim phian mai. Zan dangah chuan ka menrei pawn utube te enin thawnthu te ka ngaithla thin kha a nia. Chuvang a niang, Zirsanga msg ka dawng nawlh mai. 

" I va online rei ve, zan dangah dar 9-ah te chuan i reh hmak zel sia" a rawn ti. 

Eng nge ka hriat pawh ka hre lo, ka runluih chak thut a niang. 

"Nia, tu emaw nen kan inbia a" ka ti a. 

"A nih chu" tih chiah a lo dah. 

Ka be zui duh bik lo. Mahse, min biak zawh ruala a status chuan ka mit a la lo thei lo. 

"Ka chelh thei lo che a. I duhthlanna a ni. Mahse, i hlim tur a ni" tih hi a ni. Keimah min tihchhan tih hai rual a ni lo. Sawmpuia pawh ka be tui leh tawh lo. Utube ka ensan ta daih a. Ka tho tlai leh ngei mai. Dawrah kal loin ka in turah ka va kal ve a. An lo thawk chak hle tak a, a tihzia e. Kan vil tha vak hman si lo va, mahse, an leader ber hi a fel hle tih a lang reng mai. Luah a chakawm tan ta hle e. 

Chawhnu lama ka haw tur scooty ka start lai chuan, ka nuin min lo call a. 

"I nau te nupa an inhau nasa lutuk, hei Tei chhuah a tum a. Lo haw vat teh" a rawn ti ta mai. Chhei le! Hmanhmawh zetin ka tlan a. Ka thleng rang viau mai. Kawngka ka hawn rualin Tei ang thawm ka hre nghal. Sitting roomah chuan a pasal chu a lo kawk sawk sawk a, "Nang hi bumhmang zawk chu i ni. Mi dang be reng chungin min nei a, ka bula i mut lai pawn i be tho. I lo tenawm takzet a nih hi.. Tianga min tina leh tur si chu min nei lo mai ta che" a ti hlaih hlaih a. 

Zirsanga chuan, "Engmah sawi a ngai lo. Chhuak mai rawh" a ti rum hak a. 

Ka nu chuan, "Hmanni lawkah in innei a. Tunah in inthen leh ang maw? Eng nge maw in hriat le.. " a lo ti vat a. 

"Ni e, eng nge in buaina? Ti nge hetia in awm? " ka va ti ve a. Zirsanga chuan min rawn melh eih lo. 

"Zirsanga hi tukin atang khan biak ngam awm loh khawpin a tùm bûr a. Nidanga a sawi ngai miah loh a phone ka ensak chu a thinrim ta em em a. Ka nau pai chungchang thlengin a sawi a. Ka ngaihdan a ni tawh bik lo, duh hun huna intihlungawia inankhum leh hi ka duh renh reng lo" Tei chuan a ti ta a. Ka chhing sawk. 

"Zirsang, buaina i nei em ni? " zaidam takin ka ti a. Ka va melh bawk. Rum em em hian min rawn melh a, "Aw ka nei, buaina ka nei. " a ti hmuk hmuk a. 

"Tha takin chu chu a sawi theih. In la inneih rei loh tehreng nen, hetia in hauh chiam ringawt" ka ti leh a. 

"In dang vat la a tha mai ang" Zirsanga tawngkam chuan min ti nghing dawt! Ka heh ka pet fan fan a. 

"Ka indan leh dan loh lam daih maw lo ni a? Ni e, kar lehah ka awm hrang ang. Keimah vanga in nupa inkar a chhiat ai chuan " ka ti ta nghat a. Ka nu leh Tei chu an hrilhhai hmel kher mai. 

"Eng nge U Kimi chu i hmer tel daih a. Ani sawn eng nge tel vena a neih? Min va chhuah chhe ve, i û ning niawm takin tawng suh" Tei chuan a ti ta chiah a. 

Zirsanga chuan, "Engmah i hre lo. " a lo ti nghut. Ani insum zo lo hian sawi loh loh a sawi ang tih a hlau a ni ngei ang, ka nu chuan, "I zak thei lo mai mai e a. Kimi aia u tha leh i hma ngaitu an awm lo ve. Kimi, han chawl hahdam rawh.. Nangni pawh roomah chho ru" a ti ta fak a. Tei chu a chho mai. Zirsanga erawh a thu tlat. Kei pawh thinrim insehruh chungin ka chho ta a. Buaina hlir.. Ka hah, ka chau. Zirsangliana lo piang hi a pawi a ni. Ka pa nupui fapa a lo ni pawh hi a pawi. 

Ka phone ka khawih rualin Zirsanga msg ka dawng nghal. 

"Nizana i awmdan vanga rulhletna a nih kha" tih thu hi. Ka phone chu khumah ka theh thla tawp. Ni e, nizanah tu emaw ka biak vangin a thinrim chu a nupui lakah a hrithla ta a. He thil hian min kiansan dawn lo. Kan la tawng chho mawlh mawlh dawn.. 

"Ka ning lutuk" ka ti chhuak sap a. Ka ţah te lam a chhuak. Ka inbual harh a, Asawmi nen kan inbe zuai zuai. Sawmpuia msg pawh a lo tlar leh dal tawh. Ka la ngaihven hman lo.. Buaithlak. Zirsanga hi ka runluih chiam zawk dawn em mawni le.. Kan mualpho vat awm si a! Pawisak a nei der si lo. He thilah hi chuan amah hi a thiam lo zawk a ni. Bul tantu a nia, hetianga a awm leh dawn chuan neih loh mai tur.. Ka hua.. Ni e, huat ka duh. He mihring hi. 

Engtin nge an nupa chu an awm zel tak ka ngaihven lo. Chaw pawh ka ei tak loh avangin. Ka nawmsam loh vangin nakina ka ei mai tur thu ka hrilh. Ka nu chuan mak a ti lo vang. Zirsanga tawngkam na tak tak te avang khan ka na a, keimahah tumruhna min siamsak bawk. Ni e, ka kal bo a ngai, chhungkaw hlim nan. Ka pal lui khawp ang. 

Ka pa a rawn lut a, ka lo mu a. Chik zeta min en vang chuan ka lo ìp deuh. 

"I nuin min hrilh a. Khatianga awm tur i ni hleinem, ka fanu neihchhun i nih kha.. Chak takin awm rawh. I duh anih phawt chuan he in atangin ka awm hrantir ang" tih pahin a rawn thu thla a. 

"A ngai lo. Miin mak an ti dawn asin. Bakah kan buai zawk ang. Keimah hi ka awm hrang vat ang a, engkim a tha vek mai ang" ka ti a. 

"Rinpuia i lo nei ta mai lo te kha a pawi ta viauin ka hria. Amah ka duh em em lam ni lovin hetia hrehawm taka i awm hi ka hmu thei lo a ni" a ti sup sup a. 

"Ka tha alawm.. Min ngaihtuah suh. Tei hian a hriat chhuah hma ngeiin ka kal ang. Hlawhfa pawh rawih belh mai tur" ka lo ti a. 

"Min dem em? Kimi, i pa ka nih angin i laka ka tihtur hlen lovin min hria em? " thutak zetin a ti a. 

Ka nui hawk.. "A teuh lo, pa, i rilru tur hi ka hrethiam ve vek alawm.. Ka dem reng reng lo che. Nupui tha tak i nei te hi ka lawm lutuk. Zirsanga pawh dem chi a ni lo. A la naupan bakah ka laka a rilru hi a la paih thei tak tak si lo va.. " ka ti mawlh mawlh a. 

"Ni e, nang hi zawng ka rin ai hian i puitling thin. Kan hetih tak avang hian kan duh loh dan deuha kan khawsak pawh a ngai a nih hi.. Chaw chu zuk ei rawh.. Chaw ei loh ringawt a tha lo" tiin a tho va. 

"Aw ka ei dawn.. Ka ril a la tam lutuk lo va" ka ti a. A chhuah hnu chuan ka tet lai hun ka ngaihtuah kir mai mai. Ka lungte a leng veng veng mai. Ka nu kha tenawm takin lo awm lo nise, Zirsanga nen pawh kan intawng awm si lo. Aaa.. Sâwt tawh lo ngaihtuah vak vak hi a tha lo. Chaw ei tur chuan ka tho va, zawi zetin ka chhuk hnak hnak. 

Zirsanga chu common roomah a lo thu run a. Ka pa nen an titi a ni maithei. Tei erawh ka hmu lo. Chaw ei chu ka insiam mawlh mawlh a. Ei châkna nei lo mah ila, taksa a chak a ngai si. 

"Ei niap niap lo khan ei tun tun ta che" Zirsanga tui rawn la tur chuan a ti hluk a. Chhan pawh ka chhang duh lo.. Min tihthinrim vak hnuah a nem leh duai zel a, hei hi ka hua. Ka lakah thinrim reng se, min hua se ka tan pawh damkhawchhuah a harsa tur. 

Ka ei khamah ngawi rengin ka chho leh daih. Sawmpuia nen kan inbe hnem ta viau. Chanmari-ah an awm a, an chhungkaw chanchin te pawh ka hre ta nual. A fel viau, B. Sc (Physics) a zir mek a, kumin hi a final kum a ni nghe nghe. Min star thu leh min hmuh phat khan a tleirawl chhuah hlima inneihnaa a mi hmuh a vei ruk reng kha ka an thu a sawi a. Keimah pawh chu ka lo ni maithei a ni. Ka inhawng vak lo tih a hriat vang nge inngaihzawnna lam chu a sawi zui vak ngai lo, a kar lakah a rawn zep tel zauh thin. A bak chu thian dun inkawm ang chiahin kan inkawm. Chuvang ania ka khawhar a hnema ka biak ve reng ni. Dinpuia hi chu ka be peih hlawl lo a ni tawp. Sual chu ka inti ve reng. 

Dar 10 bawr velah hriat loh theih lohin Zirsanga te nupa an inhnial leh ta. Ka room bul chiah ni mah se, ring taka ţawng loh chuan thawm a hriat vak loh. Duh lo hle mah ila, ka hre lo thei si lo. 

"Sawi rawh.. Tu nge?tu nge i bialnu chu? Ka pasal i ni tawh tih a hre lo em ni? Mi pasal ngaihzawn ching chu a hur hle a niang.. " a ti tâwn tâwn a. Jeni ka hrechhuak zawk. Ka nau hi a hur lo. A vanduai a ni zawk. Bumna a tawk miau a. 

Zirsanga aw ka hre pha ve lo. A tawng ring tehchiam lo aniang. 

"Daw suh, nupa kan nia, engkim kan intawmin kan inhre tawn tur a ni. Engvangin nge i thup tlat a? Sawi rawh.. Keiman ka lo bia ang" Tei chuan a ti leh hlawih hlawih. Ka lo ìp chawih chawih ringawt. Keimah ka ni tih hria se a puakdarh thei ang. Mak a ti dawn lutuk. Ka bengte chu ka'n hup ngawt a! Awmzia a awm lo. 

A hnu lamah phei chuan Tei chu a ţap titih niin ka hria. Inrawlh tumna ka nei tawh lo bawk a. Ka ning ta deuh nen, ear phone ka phawrh a, ka vuah ta daih. Mahse, ka ngaihtuahna erawh a vak kual hleithei lo. Pindan lehlamah chauh a awm. 

Ka tho hma ve khiah a! Ni e.. Ka tlaivar miau alawm. Ka muhil thei reng reng si lo va.. Ka meng tlang tawp. Ka lu a hai bûr a, ka chhah lûk bawk. Ka nu te pawn ka tho hma ve chu mak an tih hmel viau. Tukthuan chu kuttum tiat vel ka ei ang. Ka lem thei ngang lo. A chhan pawh, "Zirsanga hian bialnu a nei" Tei'n a tih tawl vang a ni. Kan ngawi thup. Thari pawh a ka hau mai. 

Ka pain, "A dik em? " tiin Zirsanga a melh a. 

Zirsanga'n nui huk chungin, "I hria alawm" a lo ti hmiah. Ka pa tan sawi tur a vang ta hle. Ka nu a fel hlauh a, a zilh ta daih. Kei chuan eng nge an sawi ka hre tawh lo. Ka kham daih. 

Stepa ka chhoh lai chuan ka luhai muai muai avang chuan ka ding det a. Ka pen leh chiah chu ka mit sulh a, ka khaw hmuh a thim ruai ruai mai. Ka vawnban chelh chu a nghet ta lo va, ka hriat hnuhnun ber chu Zirsanga aw in ring zeta, "Kimi" a rawn tih chu a ni. A bak chu a thim ta vek. 

Ka harh leh chuan damdawiin khumah ka lo mu reng mai! A eng lutuk a, ka meng hleithei lo. Ka khap sek sek a. 

"E! I lo harh tawh maw.. " ka nu aw in a rawn ti a. Ka hawi kual a. Ka nu leh ka pa bakah Jeni leh Thari ka hmu. 

"Engtin nge ka awm? " ka ti sap a. Ka chau ngawih ngawih. 

"I chau tawngkhawng a nih kha.. Thil i ei tha si lo va" Ka nu chuan a ti leh a. 

Ka maimichhing leh daih. Ka muhil leh niin ka hria. Ka harh leh chuan zan a lo ni tawh. Ka khum bawhin Jeni chu a lo bawk a. A muhil a ni maithei. 

"Jen" ka ti tham ţiak a. 

A rawn hawi chhuak vat. "I zun a chhuak em? " a ti var a. Ka bu nghat. Min kuah a, ka lu a la hai ngei mai. Keimah chuan ka zung thei hram. Ka khur der der mai. Ka mut leh hnu chuan, "I ril a tam em? " a ti a. A ţam naa, ka ei châk si lo. Ka lu ka thing tawp. 

"Awii ka hlauthawng hman lutuk a. Ti nge khatia i awm le.. Ka ţap nasa lutuk asin" a ti leh mawlh mawlh a. 

"Engtin chiah nge ka awm a? " ka ti a. 

"Ih, i chaw ei kham i rooma i chho tur kha i lu a hai thut a, i tlu a, mahse, i lum thui hman lo, U Zirsanga'n a rawn pawm hman che a.. " a ti sar sar a. Zirsanga.. Ni e, Zirsanga. 

"Doctor te chuan thil i ei that loh bakah mut i hmuh that loh thu te, i taksa chauh lutuk vang a ni tih an sawi a. Chuan i rilru i hmang nasa lutuk niin an sawi bawk" A ti leh a. A dik ang. Ni e, ka chau takzet a ni. 

"Zirsanga te nupa an inhau leh em? " ka ti daih a. 

Mak tih hmel zet hian, "Hauh pawh ka hre lo.. Bakah an ni chu an lo kal ve lo va.. Inah an awm a. Ti nge a? " a ti a. 

"Nizan khan an inhau vak a. Chuvang mai mai" ka lo ti a. Ka ril chu a ţam tak em vangin tlem tal ei ka tum a. Jeni chuan a siam sawk sawk. A fel thin a nia.. Ka nau hi chu. Tlem chu ka ei ve. Ka ei kham tihin Doctor a rawn kal a, "Ni hnih thum chu han chawl hahdam vang vang la, i tha leh mai ang. Rilru hahdam takin awm ang che" min ti a. A hnu lawkah nurse ten drip min rawn khaisak nghal bawk. 

Zan dar 12 a ri ţep tihin ka phone msg tone a lo ri tlang tlang a.. Kei ka lo harh laklawh nen, Jeni a muhil tawh bawk si. Ka phone chu zawi zein ka lek kang a. Ka'n en nak chuan, "Tei hi engkim ka hrilh mai dawn, anih nih ni tawh mai ang. Kimi… ka thei ta ngang lo. I ta chauh nih ka duh.. " tih thu hi Zirsanga hnen atangin ka dawng ta a.. Ippik zetin ceiling melh chuan ka mu meng ta reng a. 

(Online class (B. Ed) kan kal dawn a. Naktuk atangin. Ka rawn ziak hman angem ka hre lo va.. Mahse, ka lo tum hram tho ang a. Theih tak ngang loh pawn inhriatthiamah aw.. Love u ka duatte u 😘😍