Zirsangliana 15

ZIRSANGLIANA… 15

(In zarah Adds pawh a tling khawm ve ţan a nia. Khawngahin min lo click sak leh hram ru aw.. Love u all 😍

Ziaktu: Toni Râlte

Dawra kal lovin ka in luah tur chu ka va en fel a. Hlawhfa rawih tur chu ka pa kutah ka dah. Dawra an siam a nih avangin neuh neuh ngai a tam ve dawn a ni. In dan vat vat duh nak a laiin. Pindan tur vel ka en fel lai chuan Zirsanga'n min lo call a, lak loh ka tum zet a, mahse, pawimawh te a nih takin tiin ka la a. 

"Jeni'n buaina a tawk a" a rawn ti ta daih! 

"Engtin? " ka ti vat a. 

"Lo haw la a tha in ka hria" a rawn ti a. Phone ka dah a, ka kalpui dawr neitunu kutah chabi ka hmehbel a, "Ka hawn a ngai" ti chungin ka chhuak nghal. Eng tak ni ang maw.. Traffic lah hi a jam ve chhen bawk si, hmanhmawh nak a laiin. Ka rin danin ka nu te an rawn kal a nih ka ring ber, ka insehruh nghal vak ringawt. In ka thlen chuan an lo inkhar pui vek a, kawngka chu ka hawng ţhuai a. Common roomah chuan Jeni leh Zirsanga te nupa bakah ka nu leh Thari, nupa niawm tak ka la hmuh ngai loh an lo thu a. 

"Eng nge thleng? " ka ti lut nghal. 

Jeni ţawng tum chu a ţhulh leh daih, ka nu zawk chuan, "Hei Jeni hian buaina a tawk a, kan thiannu pasal nen hian inzawmna an lo nei nge hei an rawn kal ta rup a nih hi" a ti dam diai a. Jeni kut chu a vuan pah bawk. Nupa niawm tak te chu ka va melh a, an nu zawk chu thinchhiat hmel lam, inhnawihsen zet, mit dur ham mai a ni a. A hmel phei chu a chhe hran lo. An zawk chu an nu aia naupang niawm hmel a pu, a sar vuah a, kum 36-40 bawr vel a nih hmel. A zaidam hmel fû mai. 

"Jen, sawi fiah la" ka ti chang rãt a. 

A inhnip faih, a mittui hnâm tiam tiam khap sak sak chung chuan, "Û, min ngaidam rawh. Mi pasal a ni tih ka hre lo a ni" a ti ta a. Min deng dawt ni maiin ka hria. Chu pa nen chuan inngaizawngin an nu thinrim a rawn thawk chhuak tih ka hre nghal mai. 

"Chuan, eng nge buaina ber? Mi pasal i lo ngaizawng a, pawi i ti a, i inchhir a nih chuan a nupui hnenah hian ngaihdam dil la, damchhung atan i bialpa i kalsan bawk ang. Chu chu a tawk mai em? " tiin ka melh kual a. 

Hmeichhia chuan, awki sang hleng hlawng zet hian, "Thupha chawina sum kan duh a ni" a ti ta a. Ka nui tawp. 

"Ni e, pawisa an phût tlat a. A nih loh chuan an nu hian FIR thehluh a tum a ni" Tei chuan a lo ti var a. 

"I pasal a lo ngaihzawn vang chuan pawisa kan chawi ang maw? " tiin ka va melh a. Ka awki phei chu a danglam hran lo. 

"Aw, thil dik lo a ti a, a tihsual man chu a chawi tur a lawm," a lo ti a. Mipa erawh zah hmel takin a kun daih. 

"Engzat nge i duh a? " ka ti puat a. 

A rin aia awlsama ka sawi vang nge a phu zukin ka hria.. "Ka hrethiam lo. In khawsak ngaihtuahin cheng 50000- 100000 thleng pawh a ni thei a" a ti a. Chutiang inremna nge in blackmailna chu ka la hre ngai lo va, ka nuih te lam a za zawk. 

"Aw le, a tha alawm. A nih chuan, a û ka nih angin phut ka nei ve a, i pasalin ka nau a lo bumna man erawh in chawi ve a ngai dawn a." ka ti ta hmiah a. A beisei loh chhanna chuan a men zautir kâwkin ka hria. 

"Kan chawi ve chhan tur ka hre lo. Mi pasal a ngaizawng a, tawrh pawh a huam tur alawm" a ti nghal ta reng a. 

"A nih Jen, i bialpa hi i ngaizawng hmasa em ni? In ingaihzawn dan saw teh" tiin ka nau ka melh a. 

Felfai tak hian, "Amah hian min lo be ziah a, group pakhata kan awmho atangin.. Thian anga inbiain a hnuah min ngaizawng ta a. Inhmuh hma chuan ka duh loh thu ka sawi a. Chuan, kan inhmu ta a, kan ni ta a ni. Kei aia a upat deuh vangin nupui a neih tawh leh tawh loh ka zawt a, kan inthen tawh, a tia.. Pathlawi angin a insawi" a lo ti a. A chiang reng. 

"Ka pi, ka nau hi ka ţan hauh lo, i pasal zawkin a bum hneh vang zawkin a uai tâng ta a nih hmel a. A hranpa taka i pasal hi rawn ngaizawnga rawn kheh a ni lo bawk. Chuvang chuan ka nau a bum vangin cheng nuai khat ka phût e.. A nih loh chuan FIR ka thehlut ang" ka ti ta a. 

Mipa chu a rawn ding hluai, "A tawk tawh e. A zahthlak zozai ta e. He mihring vang hian zahna ka tawng tam zozai ta.. Ni e, Jeni nen kan nih lai khan kan inthen lai a nia. Ka chhung ten min rawn miah lovin an lo ko leh sia.. Jeni bulah ka sawi ngam ngang lo a ni. I nau hi ka duh a, ka hmangaih bawk.. Mahse, ani chuan min pawm thei kher tawh lo vang. Chuvang chuan tihian kan inkar chu tawp rawh se,.. In mi ngaihdamna ka dil nghal bawk e" Tiin a nupui chu a kai lawk a, chak zetin a chhuahpui a. An nu erawh a rak nasa ngang mai. 

"I nau kha mi hur a nih kha.. Mi pa ngaihzawn ching hi ka ten.. Lo veng tha hle ang che" a rawn ti lawng lawng mai. Kan thlir tawp ringawt. Jeni lah ka nu awm nghengin a ţap hliam hliam mai si. A va zia lo tak em.. 

"U Kim, i van fing tak. Awii ka ngeizia chu, a tawng thei sia maw.. Kan chhang tha ngam hleinem" Tei chuan a lo ti a. 

"A pangngai vak lo emaw an pa khan a tina zing tawh viau a ni maithei.. A pawi khawp mai" ka lo ti a. Jeni chu roomah ka luhpui a. Ka nuin min zui bawk. 

"Û, sex kan la hmang miah lo asin. U Zara khan min hmangaih ve tak takin ka hria, chance pawh kan nei zing, mahse, min khawih a tum ngai lo.. Mahse, min bum vang erawh chuan ka haw takzet" khuma thu chung chuan a ti a. 

"Ni e, a tirah bialpa i neih thu te min hrilh ni la buaina i tawk lo tur a nia.. Bum nuam rual lek in la ni a. A bum che a nih kha. Tun atang chuan fimkhur viau tawh ang che, an chanchin hriatchian vek tum phawt tawh rawh aw.. " ka ti ve mawlh mawlh a. 

"Ngaihzawng neih leh pawh ka chak tawh lo. Ka zak em mai. Kha nu khan a sawi pung awm sia" a ti leh a. 

"A ho lutuk.. A sawi chhuah rual khan a mawng a hlim tel ve tho. An pa sawn ngaihzawng a neihsan fo a nih phei chuan ama lam dik loh te pawh a ni thei. Nang chuan engmah i hre lo va, bumin i awm a. Thiam lohna i nei lo ve.. Chuvang chuan chak takin awm la, fimkhur tawh viau ang che" Ka lo ti ta vat a. Hauh vak kha a sawtin ka hre lo a ni. A la naupan bakah a â chi a ni ve a, bum chu a nuam phian ang. 

Tei leh Thari te nen rawng kan bawl a. La hma deuh mah se; tihtur a vâng si. Zirsanga erawh a chhuak, eng nge a tih dawn ka hre lo. 

"U Kim, taka na, Zirsanga hian whatsapp pahnih a hmang a, pakhat zawk chu password a dah tlat a. Ka hawng thei lo. Ka ngaih a tha thlawt lo" a ti sar sar a. Ka awm a nuam lo hle. Chu a whatsapp pakhat zzawkah chuan ania kan inbiak thin. Kei erawh chuan main ac ka hmang thung. 

"A va mak awm ve. Tha takin zawt la" ka ti ve mai a. 

"Nizan pawh ka rilru a na tawp. Nupa nun hman ka châk vang pawh ni lovin, 'I rai sia, naute tan a tha lo vang' a ti leh tlat a. Naute a ngaihtuah vang aiin kei hi min duh lo hrim hrim niin ka hria" a ti leh ta zel a. Thari erawh ar a puah daih a. A hre ve lo. 

"Ka lo hau leh ang. A zia hi a mak ve bawk sia maw.. He pa hi chu" te kha ka ti khawmawi ta ringawt. Mahse, Zirsanga awmdan chu mak ka ti. Mipa a ni a, Tei chu rai pawh a la rai lian si lo. Ti nge sex hman a duh tlat loh le.. Keimah vang a ni leh ang em? 

Tlaia a rawn haw pawh chuan a ngawi hmuk a. A mood hi a chhiat hmel ngawih ngawih. Tei chuan a lo besawm vat vat a, nupui tha tak zawng a ni mawle.. Kei hi ka la hnawksak tak tak dawn niin ka hria. Zirsanga nun atang hian ka kal bo vat a ngai a ni. 

Zanriah ei laiin ka pa chuan fiamthu hian, "Kimi pawh hi Dinpuia sawn a kherh riau chein ka hria.. Rinpuia ang mai mai te khan i chhuah leh ringawt ange aw" a ti a. Ti nge maw a fiamthu ve ziah ni.. 

"Dinpuia hi chu ka tui lo" ka ti ringawt. Thari a lo nui hak hak, "A vun rawng vang a mi? " a la ti zui.. 

"Ni deuh.. Mahse, a fel chu ka ti reng" ka ti a. Ka ke chu a rawn kherh awt.. Zirsanga a ni tih ka hai lo. Chaw ei a tui ta lo hle mai. Tei lah a ţawng suam suam bawk si, hnuai lamah kan ke chu a insual bap bap mai. Vanneih asiamin a kham ta hlauh a, kei pawh ka kham zui ve nghal. 

Room ka pan rualin a rawn kal ve chiah. Chhung te tan chuan engmah mit tihkhamna tur chu a ni hran lo, keimah zawk hi ka hlauthawng thin. 

"Damdawi kha i ei tha maw? " a ti sup a. 

"Aw ei e" ka lo ti a. 

"Jeni thlavang i hauh dan kha a tha khawp mai.. " puitling zet hian a ti leh a. Ka nui ringawt. 

"Zin chu aw.. Hre reng ang che. Ni 2 chiahin min dang tawh a nia" a ti thut. Ka lo theihnghilh daih tawh. 

"Awii kha kha kei chu ka thei lo tak tak a nia aw.. Tilui suh" ka room kawngka bula ding chung chuan ka ti a. 

"A ho.. I duh danin ka kal a, ka duh danin awm ve rawh" a ti hluk a. A kal daih. Ka duh danin a awm maw?! Ka duh loh dan berin asin a awm. Ti nge hetia a awm tlat le.. 

Dinpuia a rawn leng leh a, ka chhung ten min nuih ruh ruh chu ka ngei tak tak. Ani lah a titi suam suam a, Thingpui kan in laiin, "Kimi, ka rilru hi chu i hrethiam tawh reng tiraw? " a ti ngawt a. 

"Eng chu" ka lo ti hû.. 

"I hre reng. Ka duh che a.. Ka vei tawp che. Bialpa i nei lo ve thoin ka hria a.. Chuvanga rawn leng ngam pawh ka nia" a ti a. 

"Aa.. Ngaihzawng lam hi chu ka buaipui hman rih lo a ni. Min hrethiam rawh" ka ti ringawt a. A hnual hmel ka hmu hran lo. 

"Ka hrethiam alawm.. I buai ve rih em a nih hi.. Ka nawr hmanhmawh lo vang che.. Ka nghak thei che alawm" a ti tha ve mai. Thu dang kan sawi zui ta a. A haw tur chu ka va thlah a, "Mahse. Lo inngaihtuah tha leh hrim hrim la tiraw? " a ti hram a, kei pawh ka lo bu nghat. Kan inmang tha ta a. 

Step ka chhuak chho chiah chu Zirsanga hi ban phen atangin a rawn kal a, ka banah kaiin ka roomah min luhpui. Ţawng ja tum chu min khap bawk si. A ngaihna ka hre lo angreng khawp mai. 

Kawngka chu a kalh khap bawk. Khumah min nawr thu a. 

"A harsa em mai. Kimi" a ti ta thlawt a! 

"I duhthlanna a lawm" ka lo ti hmak. 

"A ni lo, nang hian khatianga awm lo thei lo khan min nawr zawk a ni. Ka pain min hre chhuak lehzel bawk nen.. Tei hian fa nei vat se, DNA test ka duh a ni" a ti chuai raih a. 

"I fa a ni tho ang" ka ti ţâlh a. Ka bulah thuin khawih phei chu min khawih lo. 

"Nupa nun pawh i hmanpui duh lo va, a vui teh kha.. Ti nge hetia i awm? Mipa i nia, chak taka awm tur zawk i ni asin" ka ti a. 

A nui hul hak a, "Ka mutpui chak hlawl lo a ni. Ka rilrua nang i awm reng laia hmeichhe dang khawih kha ka thei lo.. Mipa ka ni lo aniang" a ti a. 

"Enteh, nupa in ni tawh a. Ka pa sawi kha i hria em? Tei nen hian inthen mah ula, ka damchhung chuan in innei lo vang a tih kha.. Chuvang chuan unau kan nih hi a tha.. " ka ti a. Thinrimin ka sawi lem lo. 

"Ka hria, ka hre vek. Mahse, ka pa pawh hi kan dinhmunah vawikhat pawh a ding chhin tawh em ni? He tah i pindan a awm a, sawtah keini.. Khawhar leh min ngaihtuah chunga i mut laiin keiin ka hmangaih miah loh ka lo kuah vel ang maw.. A chang chuan puahkeh ka chak thin. Nang hi vengthawng lo che chu ni ila kan kehdarh vek tawh ang" a ti bawrh bawrh a. Chhan ngaihna pawh ka hre lo. 

"Aw.. Engpawh nise, chhuak phawt rawh. In nuin min hmuh dun chuan a hrethiam lo vang" ka tih mek laiin Ka room kawngka an rawn kik ta mai. Ka phâwk hru a, Zirsanga erawh a danglam hran lo. Ka kai a, bathroomah ka nawr lut leh tawp. Kawngka chu ka va hawng a, "U Kim, Zirsanga i lo hmu em? A chhuak daih a, mahse, kawngka khu chhunglamah a inkalh tho sia.. Pawnah a chhuak lo aniang.. A lo kal mial em? " Tei chuan a lo ti a. 

"Kal lo.. Ka hmu miah lo" harsa ti zetin ka lo ti a. 

"Khaw nge maw a awm le. In hnuaiah ka zu en tha leh ang e. Ani hi zu te hi a lo in ru mawni le," tih leh kal a rual nghal a. Ka thaw hawk. Zirsanga hi chuan min va tihlauthawng zing tak em.. 

Tei chuan a call a ni ngei ang, bathroomah a phone chu a ri ral ral a. A tawp leh daih. Kan va inmanchhuak teuh ve. Tei lah chu beidawn tum hek lo, pawnah a awm lo tih a hre ve tho si.. Ka nu te hial an lo tho ta a. Ka mangang ţan ngei mai. 

"In hnuai room zawng zawng ka dap vek tawh. Ka hmu lo. Khaw nge a awm ang le? " Tei chuan mangan hmel zet hian a ti a. 

"I call em? " ka nuin a tih chuan, "A tir khan a tlang a, a hnuah a switch off daih" a la ti zui. Ka nu chuan Tei hriat lohin min rawn mitmei a. Ka bu nghat. Zep chi ni hek lo. 

"Aa. I mangang lutuk anih kha.. Ka hre chhuak leh si, keiman kawngka te chu ka kalh alawm.. Inpa chu a chhuak lawk a niang" ka nu chuan a ti ta a. Tei chuan a rinhlelh hmel angreng. 

"Ka haihawt lutuk hi alawm..i pa hi a inthiar sia, in hnuai toilet-ah ka zuk inthiar a. Tah chuan kawngka chu ka kalh alawm, zuk hawn leh a ngai a nih chu" a ti leh a. 

Chutah chuan a awih ta a niang e. Phun nuah nuah chungin an roomah a lut ta a. Ka thaw huai mai. Mahse, ka nu chu a rawn lut a, "A tha lo, kimi" a ti ringawt. 

"Nu, amah alawm.. Ka ko lo" ka lo ti vat a. Zirsanga chu a rawn chhuak nghal. 

Ka nu chuan hnai set sawta dinchilhin, "Tun hi a tawpna ni rawh se, kha kan inmanchhuak ţêp alawm le.. " a ti chang fak. 

Zirsanga chuan, "Aw le.. Zanin hi a tawpna" a lo ti ve mai a. A aw a dam thlup mai. 

Ka nu chu a chhuak a. Zirsanga chu chhuak ve nghal turin ka hrilh a. Khumah a thu tlat. 

"Zanin chauh chu ka riak dawn.. " a ti ta a nih chu! Awiii ka beng lo chauh. 

"I va zak thei lo tak.. Chhuak rawh.. Min tihmualpho i va châk awm ve a" ka ti hlaih hlaih a. 

"Kan laklawh tawh alawm.. Kimi,. Zanin chiah aw" a ti nghet charh. Min melh kul bawk si. Ka zâm takzet. Chet thawha nam chhuah emaw an khum chiam dawnin Tei mitmei ven a ngai bawk si. Ka va duh lo mai mai e aw.. 

"Khawngaihtakin Zirsang, chhuak hram rawh.. " ka ti leh a. 

Khumah chuan a mu a, zangthal duai hian, "Va inphihfai rawh.. Mutna ka lo siam ang" a ti duh lek a. 

Ngei zetin ka rum kâwk.. Ka va inphihfai a, ka kir leh chuan thosilen te chu a lo zar fel diam a. Rizai pawh sin mai theih turin a lo thlep fel vek. Ka tum bûr mai. Chhuatah mutna dang phah turin in hnuaia Jeni roomah pawnthuah lak a ngai dawn. A chhan min zawt se.. Khawi laiah emaw mu ta ila, zingah a chhan min zawt ta se.. 

Insawh nghawng nghawng chung chuan a bulah chuan hreh zetin ka mu thla a. A ruk tak chuan a mi dehna chu nuam ka ti tho. Ka thlakhlelhna kha a la bo hlek si lo va. Mahse, "Min si hlek suh ang che" ka ti hlak a.. Ngaipawimawh lo zet hian, "Min ngaih em kha" tiin min rawn kuah nawk. Nghet zetin a awmah min pawm bet a. Ka tal aih aih, mase, a nghet lutuk. A tawpah phei chuan chau zetin ka bei ve ta hle hle a. 

"Khawih che ka tum hleinem, hetia thlamuang taka nangmah kuaha zan khat chauh tal pawh hun hman hi ka châk em a ni" a ti sup a. A lungphu dat dat chu ka hre thei.. 

"Mahse, mi pasal i ni tawh a, thil tha ber a ni lo a ni. Kan hria alawm" ka lo ti a. 

"Ni e, a tha ber lo. A mawi lo bawk. Mahse, Kim, hmangaihna hi a la mak zawk fo.. Ti nge kan thunun theih miah loh le " a ti ta daih a. A thusawi erawh chuan min tinâ.. Ka la hmangaihzia pawh ka hre chhuak. 

"Inhmangaih tawh lo tur kan ni asin" ka ti a. 

"Kan thei ngai lo vang" a lo ti hmiah. Engmah ka sawi hmain min rawn fâwp a, a thinlung zawng zawng atanga chhuak leh ril ber a mi fawhna chu ka chhang let lo thei bik lo. Zawite leh dimtein kan infawp ngawng ngawng a. Nawm lam aiin hnukulh lamah a kal. Ka rin loh karin ka mittui a tla ta nge nge a. Duat zetin min hruk hulsak a, amah pawh na tak tuar tih a hmelah a lang reng. 

"Kan pahnih khawvel hi a la awm ve ang em le! " a ti thawp sup a. Ka chhang thei lo.. Ka kuah thlawp a, ka ţap khur ta ngawt ngawt a. Ka ţap ngai lo kha a nia, a bulah meuh chuan ka insum thei ta lo chu a nih hi.. Ka hnungzang chu a chul hauh hauh a.. 

"Keimah vang a ni. I laka ka thinrim vangin thutlukna atthlak ber ka siam a. A pawi ka ti" a ti mawlh mawlh a. 

"Engpawhnise, zanin chu hlim deuhin awm ang. Naktuk atang chuan kan nun zawng zawng hi kan phumbo tawh dawn si a" ka ti a. Ka nui lui hram hram. 

Tichuan, mutthilh pawh tum lem lo chuan kan titi a, a changin video kan en a. Kan han infawp leh rih. Chhungril tak chuan hlim lo mah ila, intihhlim tawn kan tumna chu hlu tak a ni thung. Zan hnuhnung ber a ni miau si a! Zing lam dar 3 bawr velah kan chau ve ta bawk nen, inkuah dun rialin kan muhil ta bawrh bawrh a. Kan harh meuh chuan dar 8 a ri vah tawh. Engtin nge Zirsanga hi pawn lam atanga lo haw angin kan lantir tak ang? 

Kei chu ka tho va, ka zu chhuk a. Tei leh Thari an lo awm. Tei hmel ngui tak chuan min tina.. Ka zakin hrehawm ka va ti tak em. Rilru a buai ta hle. Hun remchang a awm thei si lo. Tei lah a tûm bûr tawh si. Ni e, innei hlim chauh an ni a, a pasal chuan a riah chhuahsan nghal a nia. A nupui tan chuan a va na dawn em.. Ka nau Jeni chu mi pasalin a bum a, kei erawh keimah ka inbum a ni. Hrereng chungin ka pal lui a, ka thlah thei lo va..Natna ka thlen ta. Ka inhaw lutuk.. 

Roomah ka chho leh a, "Tei, rooma a rawn chhoh veleh i lut dawn nia" ka ti a. A bu nghut. 

. "chuan, kan tawp tak tak tawh aw.. " ka ti leh a. 

"Aw le, ka hria alawm.. Chak takin awm ang che" a ti ta a. Kei pawh ka infuih mawlh mawlh mai. Tei chu an roomah a lut ta a. Zirsanga pawh a chhuak ve nghal. Engtin tak va inthlem ang maw.. Ka ngaihtuah zui tur a awm ve lo ve. 

Dawrah ka buai nileng a, zan lama kan hun hman dun bak suangtuahnaah a chambang lo. Ka ngaihtuah mûk lutuk chu auh pawh ka lo hre thei lo va,ka beng bulah Faki' a rawn au. Ka phu chiang ngei mai. Chawhnu lam kan awl laiin Rinpuia leh hmeichhe pakhat rai puar luah hi ka dawr epa Restaurant-ah an lut dun a, ka va hmu chiang ngang mai. Min rawn hmuh ka hlauh vangin ka tlum lut daih. Kher khera ka dawr ep lo Restaurant a tam tehlul nen, min runluih te a tum ve khanglang mawni… ka engahmah a thawk tawh lo ve. 

Dinpuia lah hi min lo be sek a, Hla zir pawh ka phur loh phah. Ka duhzawng a ni tlat si lo hi ka buaina a ni. Ka khawngain tho naa ka awmdanah hriatthiam ve mai tur a nia. 

Ka hawn chuan an lo reh riai a, Thari takngial pawh a awm lo! Zirsanga te room lah a inkalh bal bawk si. Jeni erawh a la rawn haw loah ka ngai, ka pa nen. 

Ka nu ka call ta nghal a, "Hei damdawiinah kan tlan chho alawm mawle. I buai ka ring sia, ka rawn be duh ta lo che anih kha" a rawn ti a. 

"Ngati nge?" ka tih rual chuan, "Tei pum a na thut a, chuvang mawle, hei a zia tawh e. An jection a. Naute pawh a tha e" a rawn ti leh zung zung a. Ka thaw huai mai. Zirsanga takngial pawn min rawn hrilh ve mai tur a nia! Mahse, min pehhel a tum ve tak tak tawh a niang e. A tha zawk. Ei rawng bawl a lo ngai vak lo, Thari'n a lo bawl sa deuh tawh a, hmarcha te ka rawt ta vel mai mai. Khaw thim tawh hnuah an rawn thleng a, ka pa pawh a lo peng kawi nghal a lo nia. Jeni pawh a rawn thleng ve nghal. Tei chu a dang bai a, a tla kuam mai niin ka hria, ka khawngaih ru hle. Engvanga pum na nge a nih ang le.. 

Zanriah kan ei laiin, "Doctor ten engtin nge an sawi? " zawh bik pawh nei lo chuan ka ti a. 

"Engtin vak an sawi lo, a damdawi ei lai erawh an thlaksak anih kha. A ngeih lo aniang an tia" ka nu chuan a lo ti a. 

Tei chu a hlim thlawt lo tih a lang, biak pawh a huphurhawm. Zirsanga pawh a ngawi ngawt ngawt ringawt. 

"Inenkawl tha rawh u, naute tan pawh" zahzelah ka ti ta ringawt a. Min bengkhawn lem hlei lo va. Hla zir a ngaih vangin ka insiam malh malh a, In hnuai ka thlen chuan, "Kimi, naktuk atangin hlawhfa ho pawn an thawh dawn kha aw.. Chawhma chhung chu i va enpui zuai mai dawn nia.. " ka pa chuan a lo ti a. Ka in a sawina a ni tih ka hria. 

"Aw. A that chu" tih leh chhuah ka rual nghal. 

Hla kan zir chhung zawngin Dinpuia chu ka hnaihah a awm a. Ning ru viau mah ila, tih lan a rem si lo. Thiante lah hian min dem bel deuh lehnghal a. Ka lawm lo tak tak a ni. Kan ban rual chuan scooty ka pan vat a, tuma biak hman lohin ka tlan vang vang. Garage atanga ka chhuak chiah chu Tei ka va hmu a. Bag a ak a, khaw nge a kal dawn le.. 

"Tei, khaw ngei i kal dawn? " ka va ti a. A ding dat. 

"Ka haw dawn" a ti hmuk a. 

Ka va hnaih nghal, "Eng a?! Ngati nge? Eng nge a awmzia? " ka ti sawk sawk a. A mit khap fak fak chungin, "I nau hi a ngaihna a awm hlawl lo a ni e. Ka thei tawh lo" a ti ta thlawt a. 

"Engtin nge a tih che.. Haw suh.. Lo kal teh, keimah ngeiin ka'n hrilhfiah ang e" tiin ka kai a. A ţang hauh lo chu mak ka ti deuh. Ka nu te an mu tawh a nih a rinawm.. La meng se chuan an chelh ngei ang. An roomah kan innawr lut a, zirsanga chu khumah thuin zu no a lo dawm a.. 

"Engtin nge i awm a. In innei chauh a, ti nge hetia i awm? " ka ti kalh kalh a. 

A chechang eih lo. 

"Zirsang, ka biak che chu" ka ti vin thak. Zawi muangin a rawn inher a. Ka mitah tak a rawn melh. 

"Ka privacy min zahsak lo tu nupui atan ka duh hleinem" a ti nghut a. 

Tei ka melh, ani chuan, "A whatsapp pakhat zawk password kha ka zawt a.. I hriat ai chuan inthen ang a ti anih kha" a ti ta. Thil awmzia ka man. Keimah ka tel ve zel chu aw… a va hrehawm tak em.. 

"Nupa in ni tawh a, privacy sawi a ngai lo. Pumkhat chuan engthil pawh in inţawm ang, thuruk a awm thiang lo" ka ti leh mawlh mawlh a. 

A rawn ding chhuak a, min melh leh ngur tawh. 

"Maw, eng maw i sawi? Thuruk a awm tur a ni lo maw? Okay, ka sawi anga a ni mai lawm" a ti vawt raih a. Ka ţim sung sung mai. 

Mahse, ka intipaukhauh a, "Tei hi i nupui a ni tawh a, pasal angin awm rawh. Nau pai lai a nih hi hre reng ang che. " ka ti khap a. Na zetin ka melh bawk. 

Tei lam chu hawiin, "Ka nupui duhtak, a tha alawm.. Tun atang chuan kan inkarah eng thuruk mah a awm tawh lo vang.. A tha em? " tiin a pan hnai a. Tei chu a hamhaih deuh. 

Tei dul chu chulin, a kut chu a vak chho zel a, a nghawng leh a biangte chu a chul dan dan a, "I duhawmzia ka lo hre ngai lo a nih hi… tun atang chuan i ta chauh ka ni tawh ang.. " tiin a phun sup sup bawk. Ka melh lo thei lo va, na tak a ni. Mahse, ka tawrh a ngai tiin ka infuih a. 

"Kim, chhuak tawh la, Ka nupui hi ka duat duh" mi pawh en chuang lo chuan a ti a. Thawm nei lovin ka chhuak ta a. Ka hah vek. Rooma ka luh chuan ka puan bih lai pawh phelh lovin khumah ka mu thlawp. Ţap miah lovin ka mittui chu a luang zawih zawih a. 

"Kimi, mi vanduai tak i lo nih hi.. " tiin keimah leh keimah chu ka inbia a.. 

(A zo thei lo. Huiham 😂😂