Zirsangliana 14

ZIRSANGLIANA.. 14

(Adds kha aw.. Ka hmangaih te u)  

Ziaktu: Toni Râlte

A aw a thian kharh a, "Engtianga rei nge ni tawh? " a ti nghut a. Boruak chu a reh vawng vawng mai. Zirsanga ka va melh a, a ngawi hmuk mai si. 

"Pa, engmah a ni lo. Engmah a thleng lo" ka ti tham chhal a. Ka pa lakah chuan la inthup hram hram ka tum fan a ni. Ka hlawhtling ngut ange maw.. 

"Engkim ka hria alawm. In chezia, in mitmeng, mi mawl ka ni hleinem.. He thil hi a thlena a vawrtawp a thlen ka hlauh vangin ania Tei pawh nei tura ka nawr che ni" Tiin Zirsanga zawk chu a va melh a. 

"Aw.. Ka nei dawn alawm. Kimi chungah hian engmah tih a ngai lo. Thutlukna ka siam tawh kha" Zirsanga chuan a lo ti chang fak a. Engvanga lungawi lo ringawt nge maw a nih le. Ka pa chu a ding hluai a. 

"Ni e, thutlukna i siam ngei, mahse, He in chhungah hian Tei rawn lut ta se, buaina a kiam duak dawn a ni lo. In khata in la chen dun chhung chuan ka thlamuang thei lo vang, uirena sual leh phatsanna vanga ka thlah te an nat hi ka remti tawh lo a ni" Ka pa aw chu a thuk ngawih ngawih. A rilru chu ka zuk hriatthiampui ve phakin ka hria. 

"Engmah a thleng lo vang, i remtih chuan Zirsanga te hi innei zo se, thla hnih hnu velah ka indang mai ang e" ka lo ti zawi raih a. Ka aw chu a chhuak chang chang a ni ber. 

Zirsanga chuan din hluai pahin, "Keimahni avanga i awm hran kher a tul lo ve. Keimah ka chhuak zawk ang" a lo ti ve fak a. Ka pa chuan mitmeiin a khap a, "Thil tha ber tur pawh ngaihtuah thiam a har khawp mai. Ni e, Ka thisen i ni hauh lo, mahse, ka fapa dik tak angin ka pawm tawh che a. Ka fanu te chuan pasal neiin min la chhuahsan dawn. Kei ka boral hnuah phei chuan i nu hi i kut tur a ni. Kimi hi chu khawi hmunah pawh awm se a ngaihtuahawm loh. Tunah phei chuan a in chawm thei tawh reng mai.. " A ti a. 

"Chuan, awm hrantir chu i tum a maw? " Zirsanga aw chu a ring hret. 

"Ka hre lo. In boruak azir aniang chu. Tin, Kimi hi a awm hran kher pawh a ngai lo thei, pasal te pawh a nei ve mai ang chu" Ka pa chuan a ti a. 

"I ngaih a sam mah mah ka pa" Zirsanga aw ki chu lungawi lohna hlirin a khat. Min la ngaihtuahzia ka hriat chuan ka nâ ngawih ngawih. 

"Nang alawm ngaihsam. Ani hi I farnu a nih hi.. Thisenah inzawmna pawh nei lo ni ula, engtikah mah ka dam chhung chuan in inzawmna hian a vawrtawp a thleng ngai lo vang" Ka pa thu chu thutawp a ni tih ka hria. Ka chil ka lem khawlh. Hei hi a nia ka nun tibuaia min tihah thintu chu. Tunah hai chhuahin a awm ta chu a nia, lehlam kawng zawng chuan ka thawl hawk zawk mai. 

"Tei nena in inneih hi ţhulh chi a ni tawh lo va, he tah a rawn lawi dawn. Chu chu chiang rawh. Nupui i neih hnu lamah i û Kimi hi a hma anga i ena i biak a rem tawh lo, ka fanu a nih vang lam ni lovin upa zawk a ni bawk a, Kimi zawk hi chu ka ngaihtuah lo zawk. A paltlang thei mai ang. Nang zawk hi ka rilru tibuaitu chu i ni.. Puahkeh hun te nei la kan chhungkaw mualpho dan tur chu ngaibtuah pawh ka ngaihtuah ngam lo. Chuvang chuan in chhung khata in chen dun hi a rem lohna chin a awm a ni" Ka pa chuan a ti ta dap dap a. Zirsanga chu a ngawi hmuk. Eng tak ngaihtuah ang maw. 

"Pa, a tha vek mai ang. Zirsanga pawn a thei em em ang, aman alawm thutlukna siam ni.. A thei tur a ni" ka lo ti ve bawk a. A nihna takah chuan kan pafa chuan Zirsanga chu kan fuiha kan nawr a ni ber mai. 

"Tei hi nei loin inneih hi ţhulh ta ila.. Kimi chu hetah a la awm thei ang a" Zirsanga chuan a ti sup a. 

Ka pa chuan a va hnaih a, "Ţhulh ni ta se eng chhuanlam nge kan hman ang a? In inzawmna hi vantlangin an hriat hun a la awm bawk ang. Chuvang chuan Tei i neih hi a tha a ni. Fa te in nei ang a, tuna in rilru hi chu a la danglam mai ang. Fanau hian min hruai danglam thei teh mai a nia. Ni e, pa rilru zim tak ka ni hran lo va, piangmun lo leh thisen inzawm lo na nâ na chu in lo inhmel duh a, ka hrethiam e. Mahse, hei hi thil thleng tur a ni lo tih erawh in pawm a ngai. Naktuk atangin Kimi indanna tur kan ngaihtuah ţan ang. Mu tawh r'u " A ti ta mawlh mawlh a. In khata kan chen dun chu a thlamuanpui miah dawn lo tih ka hrethiam. Ni e, kei pawh hi ka inring tawk chuang lo. Mahse, ka pa ngeiin, "Ka damchhungin in innei lo vang" a tih kha ka ring. Pawm mai ka tum a ngai. A theih ngang loh a ni e. 

Mut dawnah Zirsanga text ka dawng a, "Kim, Tei hi ka hmangaih theih i ring em? " tih thu ka dawng a. Ka hnuk a ulh deuh. 

"Ka beisei. Khum khata mut dunpui leh fate nu na nâ na chu i la hmangaih mai ang" ka va ti a. 

"Pasal hi nei ve mai rawh" a rawn ti tawl! Nei dawn tak tak ila min ui leh tho vang. A rilru tur ka hrethiam tho. Aniin nupui a neih laia ka single bik te, inphenna tur ka nei ve lo te chu min khawngaih bakah ka laka a beiseina la chambang reng tur chu hrehawm a ti ve niin ka hria. A pawi ngawt mai. Ka indang dawn a nih chuan ka sum kawlsa te ka han ngaibtuah kai ţan a. Ka pain min pui bawk ang a, harsa tak chuan ka awm ka ring lo. Mahse, buaina ka nei,zawhna a tam dawn. Mo kan neih veleha han indan chu mi nawlpui ngaihdanah chuan mo nen inngeih loh thu hla vang a ni ngei dawn. Chu chu ka duh bik si lo, Tei te lam lakah pawh a inthlahrunawm duh dawn hle mai. Ka pa bawkin chhuanlam chu a hre leh mai ang chu. 

"Kim, ka hmangaih che tih hi dawt a ni ngai lo aw.. Unau kan nih lohna hmun thih hnu piah ramah tal chuan ka nupui i ni tawh tur a ni. Ka beiseina te takte thi thei miah lo hi a chhan ka hre lo.. Engtikah emaw kan la awmduna tuma mitmei veng lo va, kan inhmangaihna kan la lantir theih hi ka beisei fô.. Nangin min pui a nih loh chuan kei chu ka inring zo miah lo a nia aw.. I laka ka tihtauh vanga ka thutlukna mawlmang zet avang hian ka damchhungin ka inchhir dawn a nih hi.. Mahse, mipa takin ka hmachhawn ang.. Ka pa ka zahna leh i zahawmna ka hum theihna a nih dawn chuan, Zirsangliana hi ka tlawm ngai lo vang" tih thu sei zet ka dawng. Hetianga thu ril te hi engtia han phuh chhuak thei nge maw a nih le.. Chhan ngaihna ka hre lo. Mahse,. 

"Kan tum ang a, kan thei em em ang. Kei pawn ka hmangaih che. Naktuk atang chuan unau kan ni tawh ang. Zanin hi kan tawp hlenna ni rawh se.. Muttui mang tha le" tih thu chu hnukulh ţeuh chungin ka type a. Ka va send nghal. Data ka off a, chunglam melhin ka mu ta reng a. 

Ka ţap miah lo hi a mak! Ka chhel vang lam aiin dik tak chuan Zirsanga ang bawka beiseina eng emaw ka la neih tlat vang a ni. Chu ka beisei chu eng nge a nih ka sawi fak thei bawk si lo. He dinhmun laklawh, tuilairap nun hi ka va kham tawh tak êm.. 

Inneihna pawh ni 2 chiahin a dang ta. Tei te lam an phur bawk a, an bazar deuh reng mai. Mo kawr tur an en dawn ni chuan min sawm ve a. Ka hnial ta mai. Ka ngam lo a ni mah zawk. Bakah thil mawi leh nalh ka hre ve tehchiam lo, Jeni hian a hre zawk. U Mali design an va en a. A simple mah mah an ti nge hmun dang an en leh a. Tu design nge an va lei tak ka hre lo. Dan thianghlim a ni chuang lo va, Mo kawr te chu hawh ve mai awm ka ti rilru a, mahse, Tei te an hausa a, an duh phawt a hnu le.. Ka sawi phak a awm lo. Dawr lamah pawh kan buai lutuk lo naa, Bungrua ka siksawk tir a. Rin aiin hun awl a vâng leh si.. Mahse, rilru chawl lutuk tur a veng a, ka lawm viau tho mai. Asawmi lahin Sangsangi rilru nat thu a sawi ve sek! Hahthlak hlawm hian aw.. Kei aia na tur chuang an awm dawn em mawni le.. 

Kan chhungte hmun danga mi te pawh an lo thleng khawm tan a, keimahni lam tak chu an awm lem lo. Zirsanga nu te lam atanga kan chhungte an ni deuh zawk. Zirsanga nui hmel ka hmu ngai lo va, min be ngai lo bawk. Ngaia neih tum erawh a harsa ve khawp mai. Tei erawh a khi var var reng a, a hlimin a phur takzet tih ka hai lo. Chu a hlimna tihchhiatsaktu nih chu ka duh miah lo.. Mahse, ka zep lo, ka thìk. Ani chu Zirsanga bula muin a nupui a ni dawn bik a. Fate an han nei ang a, ka fa a ni lo ti tu Zirsanga pawn naute hmel a hmuh meuh chuan a rilru a danglam ngei ang. Kei chu ngaibpawimawh loh ka ni telh telh ang a.. Ni lo, hetiang ngaihtuah fo hi ka duh lo. Ka chak loh phah thin. Ka nu hian a rukin min chìk reng tih ka hre bawk a, ka theih ang tawkin hlim taka lan ka tum thin. Hlawhchham chang erawh ka nei fo. 

Zirsanga leh Tei te inneih ni pawh a thleng ta. Kawr thar te chu ka han ha ve bawk a, a hatu berin hlim hmel ka put loh chuan chu kawr mawi tak chuan min mawipui zo chuang lo. Jeni nen kan inchei a.. 

"U, U Rinpuia nen in inthen hi i van tuar awm em em" a ti thut. Ka lo ka hau! 

"I cher sia, bakah i hlim lo. I ngui reng a" Mascara inhnawih pah chuan a ti sar sar a. 

"Nia, a lerh em a. Ka hua alawm," ka ti ringawt. Rinpuia hming hi ka hre chhuak khât tawh khawp asin. Zirsanga vanga ka then kha a ni naa, hriatzui a chakawm lem loh bawk nen.. Ka theihnghilh chu a ni deuh mai. 

"Chuan U Zirsanga pawh hi a hlim lo. U Tei hi a duh vak lo mi le ka ti" bo zetin a rawn ti leh. 

"Awihawm loh" ka lo ti nghek ringawt. Mak min tih hmel viau. Kan inchei zo va, Room atanga chhuakin in hnuaiah chuan kan chhuk thla a. Ka pa te pawh an lo thu thap. Min en chìk hle, ka ngei lek lek a ni. 

In atanga kan chhuah dawn chuan ka beng bulah, "Ka fanu, chak takin aw" a rawn ti sup a. Kha tawngkam khan min tichak sawtin ka hria. Hall-ah chuan mipa lam thutna tlar hmasa berah kan thu a. Zirsanga te chu an langsar ngei mai. Tei pawh a nalhin amah a hlim bawk a, a hmel tha ngawt mai. Inneih thutiam an chham laia ka insanmar nasatzia chu aw.. 

Zirsanga aw chu a zawi viau naa ka bengah a ring viau thung. Mi nawlpui hmuh theihah kan thu si a, insum a harsa ngei mai. Ka hah vek. Pastor chu a sawi tawi thiam ngei mai. Kan bang hma a, ka inthlahdul thei hram e. Thla pawh vawi khat ka lakpui a, ka duhtawk mai. Ina hawna mut veng veng tluka chak ka nei lo. Mo lawmna chu a hrana neih an ti lo hlauh a, ka lawm tak tak a ni. Kan haw a, ka inbual vat vat a, buai deuh nuaih mah se; ka mu daih. A mawi chiah lo tih chu ka hre tho, ka khua a sik vut vut lo naa chhungrilah min ţham er er tlat a ni. 

"Kimi, " ka nu aw in a rawn ti a. Peih leh peih lova va thoin kawngka chu ka va hawng a. Juice a lo keng va a, "In rawh" a ti dam thlap. Ka in ve mai. 

"Darkar khat hnuah mo hruai a ni dawn a. I rawn tho harh peih hram ang chu tiraw? " a ti a. Ka nuamsam lo tih chu zawh kher ngai pawn min hre lo a ni mahna. 

"Ka lo tum ang" ka ti hul hak a. Min lainatna mitmeng chu ka hai miah lo. Ka nu tak ni lo mah se, Zirsanga nu a ni a, ka ngaina a, kan boruak hretu a nih vang bawkin amahah ka innghat hle. 

"Tuar hram hram rawh. A behbawm chu a zo ţêp tawh ania" a ti sap a. Ka bu nghat ringawt. Khawngaih ngai zawk nih chu tlawmah pawh ka la thei bik lo. A hrehawm êm a ni. Ka nu leh pa te hian hre lo niin inthup ngai zawk se ka â thei hial ang. Min hriatpui tawh vang hian ka chak zawkin ka hria. 

Alarm ka set a, mutthilh hlek ka duh. Ka muhil ta thuai a. Ka thil inah khan eng emaw a pawlh pawh a ni mahna le.. Alarm ri ral ralah chuan ka harh a. Ni ka hai ţep alawm le.. Mahse, Mo hruai a hun tih ka hre thuai a. Ka tho sak ţalh nia. Ka inthlak a, ka inhnawih ve nel nual a. Ka chhuak zui nghal. 

In hnuai ka thleng chiah tihin Thari'n, "Thlahrang i hmu mi? " a lo ti vat. Ka hawi phawk ngang mai. 

"I hmai kha a dâng vek" a tih zawm zat a. Ka nui ringawt. Phai atanga ka hawn tirh leh tuna ka lan dan chu lei leh van ang vel a ni tawh. Ka tha ve leh vat ang chu maw.. 

Tei chu an hausa bawk a, thuam chhawm pawh a turu ngang mai. Kan inah chuan a rawn lawi lut ta rup mai. Zirsanga room kha thlang lamah kan zauh belh hlek a. An inhnawh leng turah ngai ang. Hun serh hman lai chuan Zirsanga ep chiahah ka thu a, ka tum loh deuhin ka va melh a, min lo melh ngat ngat nia! Ka mit ka lasawn rang ngei mai. Mahse, ka hawisan rei hleithei lo, ka va melh leh zuk thin. Khaw dang a hawi ve miah lo emaw tih tur hian min lo melh ding ngar ngar zel mawle.. Mi in an notice- ang tih ka hlau si, ka mitmei thin. A hawisan duh map lo. Awmngaihna ka hriat tak loh vang chuan ka kal sawn ta daih. Ka lungphu dat dat chu a rang ngei mai. 

Ruai an theh tan a. Catering lam te an fel a, felfai tak chuan an ei thei. Zirsanga te pawh an paliin an kil ho va, a thianpa Eddy chu a ţawng lar lar reng mai. Eddy hi ka mil vak lo, a chhan pawh Zirsanga te nen an picnic ni khan Tei hi a lo sawm ve ringawt a. Amah Tei hian a lo hmin ve bawk aniang. Tikhan Zirsanga rui tawh nen an han thlah fal kha a nia. Zirsanga pawh ka dem tho rualin amah pawh rawn der eih lo va Tei an lo sawm sak ve ngawt kha ka ngei. Hmeichhe rilru atang chuan a ngeiawm ve em a ni. 

"U, ei ve tawh ang u. Ka ril a tam" Jeni'n a rawn ti sar sar a. Thlanglam bathlarah Thari leh Asawmi te nen kan va ei ta daih a. 

"U Zirsanga khan hunserh hman lai khan a melh char char che mawle" Asawmi chuan a ti ta mai a. Kha maw… 

"A ni maw? Ti nge le? " ka lo ti hû a. Nuam ka ti lo ngei mai. 

"A mak tawp.. A rawn melh reng che sia.. In intithiam lo emaw ka ti zawk a" a la ti ta zel a. 

Thari chuan, "A mit hi a nghal ve alawm.. Kan U Zirsanga hi chu" a lo ti ve vat a. Chu chuan boruak a tidai ta deuh. Ka rin aiin chaw chu ka eitui leh si.. A zia tho e. Inleng tam zawk an ţin a, kan la zi deuh niai tho naa kan thawl ta deuh. Thil tihfel ngai ang te ka han tifel ve sawk sawk a, Zirsanga te erawh an inbual a ni maithei. Zan hun chu Hotelah an hmang dawn a niawm e. A tha. 

Lu na burin ka roomah ka lut a. Ka inbual tawh naa ka intleuh leh puat puat. Ka harh ta deuh. Cream ka inhnawih laiin kawngka an lo kik a. Ka va hawn chuan Zirsanga leh Tei an lo ding dun a. Tei chu a nui sang a, Zirsanga erawh a nui ve lo. 

"U Kim, present kan hawng dawn a. Lo chhuk ve la" Tei chuan a ti a. 

"Aw.. Dawn e, ka inhnawih lawk a" tiin ka kuta cream kai chu ka pharh a. 

"I lu na a chhuak leh mi? Lo mu hahdam zawk rawh. Kha i chauh hmel em mai.. I hah tawh a nih kha" Zirsanga chuan dawt var sawiin min lo pui ta vat a. Ka lawm naa ka na dawt. 

"Nia, nachhawkna ka ei mai ang" ka ti niah niah a. 

"Aa.. Lo chhuk ve lo mai rawh. Mu hahdam rawh. I dam lo leh vak palh ang" a ti dam thlup a. Tei chu a mitmei zauh a, an kal nghal. Ka thlir liam hnuah kawngka ka khar a. Ka lungphu rang zet chu ka dawm vang vang. Engtianga rei nge ka tawrh ang le?! Chhuk chakna ka nei lo bawk nen, Zirsanga khan min lo sawi mam sak tho beiseiin ka mu ta daih. Phone pawh ka khawih peih meuh lo. Thil ngaihtuah vak lah rilru a na zel si a. 

Ka pa hian in pahnih lai a la nei a. Pakhat chu ka patea fapa Puia te chhungkuain an luah a. Pakhat chu parlour dawrah an hmang a. Chu zawk chu ka luah tura kan han ruahman deuh chu a ni. A kawng bul hran lo naa kawng atanga hla lo teah a awm a. A lian lo naa, in mal ding pangngai ve tak a nih vangin ka duhtawk tiu teu viau mai. Dawr nghak te pawn insawn chhuah an tum ve reng reng tho va, a chhan pawh a awmna a lun loh bakah kawng bul lo deuh a nih vang a ni. Mahse, pan tawk erawh an awm ve reng tho. Choka cabinet leh room pin dan neuh neuh te a la ngai dawn a. Thla hnih chhung chuan luah nuam taka kan chhuah theih ka beisei. Mahnia awm hran kha a ni lawm ni phaia ka awm lai pawn ka dream thin. Khatih lai kha chuan ka pa ka la haw tlat a. Tunah Zirsanga vangin ka pa in ka chhuahsan dawn chu a nia. Tam tak chuan ka pa in dem ngei ang. Mahse, ka pa ngaihtuahna hi ka hriatthiampui. Kei chu pasal chhia tha la nei mai tur ka ni a. Tuna ka awmna tur saw ka in ka chanpual a ni ngjal dawn bawk a. Tin, tuna kan awmna pawh hi ka pa chuan min râwn lovin mi dang kutah a dah ngawt dawn lo bawk. Jeni pawh hian chanpual a nei ve dawn chiang. Chhungkua kan darha kan mualpho ai chuan keimah insaseng mai chu kawng tha berah ka ngai a ni. 

Zing dar 2 velah ka harh hlawl. Ka va zung a. A reh thap tawh. Ka mut chhuak zawng zawng a bo vek. Phone ka khawih ta ringawt a. Tei chuan a status-ah an inneih thlalak a hmang nasa mai. En pawh ka en chhuak lo. Zirsanga ve thung chuan, Keiman ka lakpuina chauh kha a lo hmang ve a.. 

"Ka û neihchhun nen" tih caption-ah a hmang! Min tinatu mai a ni. Tin, a mawl thin. Tei ngaihdan tur te thlir thiam ve tur a nia. Ka laka a thinrimin thutlukna atthlak tak tak a siam zung zung a. A hnuah a tuar thei lo ziah bawk si. A la naupang ve deuh bawk a ni. Kei chuan status tur pawh ka hre lo. Facebook-ah te ka lut ta vel mai mai a. Group-a an inhnialna te chu ka chhiar thla a, rilru a kaipeng a, a tha phian mai. 

Mizo te mutan pakhat chu tun hnaiah mizo nula leh tlangval inkara insawiselna tam ta lutuk hi a niin ka hre ta. Mipa lam lah hmeichhia ai mahin an tawng thei tawh zawk a, an mizopui nula sawichhiain engtin tin emaw an troll a. Hnam dang nena inneih pawlh chungchangah pawh a tawngkam duhtui lo chu mipa tho. Zilhhauna leh nawrkala fuihna kam thlum chhak chhuak ta loin a diriam leh hmeichhe rilru tihel zawngin an kamtam ta si a. Hei hian nghawng a la neih a rinawm viau. Kan insiam that tawn hi a tha viau a ni. 

Present pawh an dawng tha narawh e. Thian tha an lo ngah ve bawk nen. Ka lawmpui ti mai teh ang. Chhungkhat te nen tukthuan pawh kan kil ho va. Zirsanga te rawn thlen leh hmain dawrah ka phei. Nilengin ka vir buai a, ka lawm zawk. Ka awl hlek chuan Zirsanga chauh lo chu ka ngaihtuah thei si lo. Ka nat loh hmel viau emaw in lo ti ang e. Ka chhungrila natna inphum, irh chhuah chaka so but but tawrhhlelhawmzia hi ka sawi thiam lo. Ka hlim lo va, ka nui der a, a lema lawmna, langsar taka hlim luih tumna vang pawha ka taksa leh rilru hah nasatzia hi.. Ka ţap thei lo mawlh hian min ti ippik zual.. Ţap hawk thei ila ka thawl huai ka ring a ni. 

Faki bialpa a rawn kal nulh a. Ka rin aiin a hmel a tha. Faki hmel ngaihtuahin.. Mahse, a hawn dawnah Faki bulah net pack man a dil a, cigaratte man a dil zui bawk! Faki lah chuan ìhe lovin a pe ve ta mai a. A kal hnuah, "In pa chuan a dig ve che ni maw? " ka ti zauh a. Ka nui tho. Ka sual ve thin hi ka tia! 

"Nia, a da thei tawp. A petrol man ka tumsak zat pawh hi ka sawi seng tawh lo" a lo ti ve mai a. 

Asawmi lah chuan, "I va duh zawk.. Then daih rawh. Thawhchhuah neih loh akara mi dang ei tum hi chu ka chêkin a mil hlawl lo" a lo ti bawl bawl a. 

"Ka then zing lutuk, ka ning ve thin a. Amah zawk hi a tlawm thiam sia, ka lo khawngaih ve tawh nen.. Kan inngaidam leh nge nge zel a. Buaithlak" Faki chuan a ti tha ve mai a. 

"Then kher lovin tha takin hrilh la, a thawh awm tawk te thawk ve se, inhlawhna te chu zawn chuan a awm ve reng alawm. " ka lo ti a. 

"Awiii ka hrilh zing tawh. A thatchhe tawk lek hian lehkha a lo zir ve tingtang sia maw, ka thawk zak te a tia.. Ka ngei thei a nia" a lo ti hlak hlak a. A. Bialpa chu a ngei ve deuh in ka hria. 

"Chu chu lawm kan buaina chu.. Sawi takah chuan hmannia ka thianu kan khua ami lo leng pawh kan inhnial hrep alawm.. 'Thawhhreh nei lo hi an tha ber.. Kut hnathawk hi ka ngaisang' a tia. Mahse, a nundan ka enin kan khuaa kut hnathawk a ngaihsan em em ka hre si lo, Kan khuaa a bialpa ram hnathawk thin aia Aizawl ami pathlawi zu heh ve tak a duh zawk te ka hre chhuak a..

'I ngaisang tak tak lo. Neih atan chuan sawrkar hnathawk emaw sumdwng emaw i duh tho' ka lo ti hmiah.. Kei chu ka ti, Mizo nula pawh hi kan dik lo ve tho, kut hnathawk kan ngaisang kan tia, neih atan chuan hna nei ve kan duh leh tho sia.. Sawrkar hnathawk phei chu kan chhungte pawn makpa atan an lo it a. Hei vang hian tlangval te pawh hian kut hnathawh te hi an hreh phah mawni ka ti" Asawmi chuan a rawn ti ta mauh mai a. A puitling ka ti kher mai. 

"A va dik ve aw.. Thu chauha inngaihsan hi chu a ho bawk a ni tiraw? Nawmsak hi kan duh ve tho bawk sia. Chuvang chuan keini tal hian thawh chhuah neiin intodelh tum ila a tha mai" ka ti ve a. Sawi belh tur vak ka hre lo. Dawrtu kan neih tak avangin kan topic chu kan sawi zui ta lo. 

Thim dawnah in ka thleng a. Chaw ei an lo siam mek. 

"Min eisan mai ru, nakinah ka ei mai ang" ka ti a. In chungah ka chho nghal. 

Ka inbual zo, ka inthlak lai chuan, Zirsanga aw hian, "Kimi, chaw chu zuk ei rawh. " a rawn ti lung lung a. 

"Aw ka la hman lo" ka lo ti a. 

A reh nghal daih. Mi hi chu a la ngaihtuah ve tho a nih hi.. Mahse, min ngaihtuah lo tawp zawk se, ka tan na hle mah se ka chak phah zawk maithei a ni. Lu tuam chungin chaw chu ka zuk ei a. Ei tam a har ngei mai. Mo thar rawn lawm inleng an la awm ve nak nak bawk si. Ka ning lek lek. Tei pawh a nui ring thei viau. A fel zawng a fel reuh ang, ka nu te pawh a ko nghal zung zung a. Lehkhathiam te an lo ni bawk a, a la fel chho zel ang chu. Thleng ka sil lai chuan, ka hnunglam atang hian, "I room kawngka bulah damdawi ka dah, vitamins i mamawh. Ei ang che. Tikha chuan mitthi i ang" a rawn ti nghut a. Zirsanga a ni tih ka hai lo. 

"Ka lei ve thei tho alawm.. Ka tha reng" hawi let chuang loin ka lo ti a. 

"Nizanah kan mu dun lo. Ka chahthlaksan daih a" a lo ti daih! 

"I va a ve.. I tihrilhhai viau ang" ka lo ti a. 

A ruk chuan lawmna riau ka nei. 

"Zaninah pawh ka peih lo. Kimi a ni si lo va" a tih mek laiin, 

"U kim, Thingpui lo chhuang nghal lawk mai teh a. Ka lo siam ang" Tei aw hian a rawn ti a. 

"Aw le" ka ti a. Zirsanga chu a lo la thu run mai. Thingpui ka chhuang a, ka vil pah deuh. Mo an nih vanga thil hote pawh tihtir vek kher hi a tul hran lo. 

"Kan zin dawn a. Ka pute khuaah khan" A ti leh sup. 

"Honeymoon in hmang dawn ni maw? " ka lo ti a. Ka nui lui. 

"I lo kal ve dawn" a ti ta mai. 

"I â anih chu" ka lo ti nghek. 

"Ka sawi tel vek tawh che. Jeni nen in lo kal ve dawn. Ka pute pawh ka be tawh" a ti lehzel a. 

"Min tihnat hi i duh viau a ni maw? " ka ti a. Ka sa phat. 

"I rilru tihthawven nan zawk mawle" a la tizui. A va sual tak. 

Tei a rawn lang a, kan ngawi daih. 

"Nizanah he pa hi a chatthla daih mawle.. Ka ngei tak tak" tih pahin Zirsanga a kawk a. 

. "Ka lo hlap ang" nui chungin ka lo ti ve a. 

"I rai chhung chu sex kan hmang lo vang" Ka suan chhan vawn lai chu ka hmer nghet sawt. Zirsanga tawngkam kher kher chu aw.. Tei hrilhhai hmel ka hmuh chuan, "A uan ve dan hi a rum thei ania. A ti mai mai a nih kha.. Mut a chak tawh lutuk awmngaihna hre lo a nih kha" ka ti zung zung a. 

Zirsanga chu a ding a, nui hul hak chung hian, "Lemchang vek kan ni hi a buaithlak. Mi lem awmkhawm kan ni" a ti chang fak a. A kal zui daih. Tei nen chuan kan inmelh reng ringawt. 

"U Kim, Thudik min hrilh hram rawh. Zirsanga hian bialnu a nei mi? " a ti ta a. 

"Nei lo. A sawi tur hre lo a nih kha" ka ti puat a. Namnul hram hram ka tum. 

"A nei aniang, ka nawr luih vanga innei kan nia.. Min la hmangaih theih beiseiin.. Bakah nau ka pai bawk si. Zirsanga hian hmangaih a nei a ni. Tu nge ka la hre khawp ang" a ti ta mial mial a. Ka ke chu a nghet ta lo nge ka lu a hai deuh chuai chuai.. Chair vuan chung chuan ka ding a, ka khur ru deuh. 

"A nei lo. Hmangaih a nei lo" ka ti sap a. 

(A tawp ţêp aw.. ❤