Zirsangliana 13

ZIRSANGLIANA.. (13)

Ziaktu: Toni Râlte

"Eng nge in tih a? Eng nge a awmzia? " ka nu chuan a ti he haw a. Kei chuan chhan dan tur ka ngaihtuah vung vung, Zirsanga chu a che thut a, ka nu chu ka roomah kai lutin kei pawh min nawr lut ve nghal a.. 

"Nu, Kimi nen hian kan inngaizawng a ni" a ti ta thawr mai. Kei ka lo ìp chawih. Ka nu hmela mak tihna chu en pawh ka en rei ngam lo. 

"Eng thu nge maw i sawi le? Fiamthu hun a nih loh hi" a ti hlak hlak a. 

"Ka fiamthu lo. Kimi nen hian kan inhmangaih" a ti leh tawp. Ka nu chuan min rawn melh a, hnuai lam ka bih vat. 

"A dik em? " a ti ta a. Ka lungphu chu a rawn insawh chhuak ang tih hlauhthawnawm khawpin a phu nasa a ni. 

"Ka.. Ih, nu, kan tihpalh" ka ti riat niah niah a. A chek hlak, "Unau in ni tih in theihnghilh em ni? Eng tin nge in tih theih zawk? " a ti hluai a. A ţawng chu a ring lo naa ka pain a hre pha ang tih chu ka hlau tho mai. 

"Thisenah kan inzawm chuang hleinem" Zirsanga'n a lo ti khauh!  

"Chu pawh nise, unau in ni. He thil hi a thleng thei lo. I pa ka hrilh dawn" tih leh kal a rual. Rang lutukin kan va pawt let a, "Nu, khawngahin ka pa chu chu hrilh rih lo hram rawh. Kan chhe vek a ni mai. Khawngaihin" ka ti mawlh mawlh a. 

Zirsanga pawh chuan, "Kan inpeih hunah sawi chhuah kan tum lo pawh a ni lo. Mahse, kan dinhmun a la khirh rih em a, Tei hetiang a lo ni bawk nen.. Ka pa lakah chuan zep rih phawt kan duh a ni" puitling takin a ti a. 

Ka nu chuan a hmela mak tihna la cham bang chung chuan, "A mak teh zawng a ni e. Hetiang hi chu ka rin phak bak a ni. A theih loh a ni tawp. I pa a thinrim lutuk dawn ania" tiin min melh tawn sek a. 

"Ka hria alawm. Chuvang ania chinfel dan kawng kan zawn" ka lo ti sap a. 

Ka nu tak ni lo mah se; ka pa han hrilh thawt thawt kha êmah a ti ve nge, "Aw le, hun ka pe ang che u. Chumi chhung chuan lo inthen fel ngei ngei ang che u. Hei hi chu a dik lo alawm" tiin a kal sawn ta a. Zirsanga nen kan inmelh reng ringawt. He hun hi a thlen ring tho mah ila, duh aia hmain a thleng a, a hamhaih theih khawp mai. Ka zakin hrehawm ka ti. Zirsanga erawh thawveng hawk hmel a pu mah zawk. Inup leh inthup reng kha hrehawm a lo ti viau tawh a ni maithei. Eng thu em em mah sawi tawh lem lo chuan a pindanah a kal a, kei pawh ka mu nghal daih. Mutthilh erawh a har ngang mai. 

Kei chuan inţhen mai pawi ka ti tawh lo. Hrehawm dawn viau mah se, Amah Zirsanga pawh ka nawr. Kan mualpho thui hma leh ka pa in a hriat hmaa a hma anga awm leh turin ka nawr nasa. Mahse, a nghet tlut mai. Chu chu ka buaina a ni. 

"Bul kan tan tawh a, kan tawpsan leh hni hne ten.. Hetiang tuar huam vek hian alawm bul ka ţan. I duh chuan tawpsan rawh. Ka kal zel chhung chu min pensan rei thei chuang lo vang" a ti khauh fung mai a. A va buaithlak tak em.. 

"Ka pa i hmachhawn ngam ang maw? " ka tih chuan, "I tan chuan tu pawh ka hmachhawn ngam. Unau anga en che ai chuan ka hmelma ni kumkhua zawk rawh" a ti bur! A hmelma nih chu tuin nge duh bik ang? A sual thiamzia leh min elsen nasatzia ka lo hre tawh si a. Min phentu tur Rinpuia lah ka then fel der tawh bawk si. 

A tuka tukthuan kan kil chu ka ei tam lo ngang mai. Ka nu hi a melhin ka melh ngam lo tawp. Zirsanga pawh a ţawng tlem khawp. Ka pain Tei chungchang bawk a sawi leh a, "Fate tihfahrah ringawt hi ka ngaihdan a ni lo. I rilru siam fel rawh" tiin a kar a. 

"Ka rilru ka siam fel vek tawh. Ka fa a lo ni tak tak anih pawn neih ka tum lo, mahse, ka fa chu ka phatsan lo vang. Awmpui a ngaih leh ka phak ang tawkin hna ka thawk ve mai ang" a lo ti nghet charh a. Ka nu chuan, "Mi fanu te hi infiamna tur an ni hleinem. Pathian duh loh zawng i tihpui ngam a, i mawhphurhna hlen chu i hna a ni asin" a lo ti khauh. Kan pahnih chungchang a sawi tel pah tih ka man.. 

"Ka infiampui lo, kan pahnih duhthlanna a nia. Kei phei chu ka inveng ka tih kha.. Ka ning ka sawi peih tawh lo. Neih ţâlh in duh leh nei ula, ka chhuak anga a ni mai" a ti hmiah. A kham nghal bawk. A hmel pawh a nelawm tehchiam lo. 

Ka pa chuan, "Thil hi a tha zaia sawi tur, khatia tihtauh bawr bawr te kha a naupangchhia lutuk. A nei tur berin i duh ngang loh chuan kan tilui ţâlh hleinem che" a lo ti vat a. A chhang tawh lem lo. 

Kei pawh dawra kal turin ka insiam a, Zirsanga chuan, "Ka ippik em mai, Eddy te huanah kan zuk picnic ang e" a ti a. Phala phal loh tur pawn a insiam nghal hmiah hmiah. Kei pawn ka sawi buai lo. A rilru te zuk tithawveng teh se.. Kei pawh Faki titi ka ngaithla leh char char, a frank sia, a bula awm hi chu a nuam thin. Ka ippikna te theihnghilh thakin ka nuih ve leh uar uar kha. A tha vek e. 

Rinpuia pawh ka block bawk a. A reh cher cher ngei mai. Ngaihna leh han thlakhlelhna kha ka nei miah lo. Chu ai chuan Zirsanga nen kan inlaichinna khirh zet hi chinfel dan turah ka buai a ni. Upa zawk ka ni naa ka rawn tlak loh nasa. A kutah ka innghat ta deuh tawp. Bansan ringawt ila, hei aia mualphona nasa zawk te tawk ta ila, ani lah a rilru a lianin a luhlul si. Rilru a buai. Ka hawn chuan a lo la haw lo va, chhunah vawi khat kan inbe zuai kha a nia. Chubak chu a reh vang vang mai. Zu an in ngei ka ring. 

Zanriah pawh kan eisan. Ka lo haw tlai ang a ti sa bawk a. Eikhamah Thari ka sengfel pui lai chuan door bell a rawn ti ral ral a. Jeni'n a va hawng a. A sir zawngin Tei hi ka va hmu a. Ka pawnchhe ken lai chu dahin ka va kal nghal vat. Karei le! Tei chuan Zirsanga, kal pawh kal ngil tha hleithei lo kuahin a rawn lut a nih chu! Ka hamhaih vek, engtin nge chutiang chu a nih theih? Tei lah chu picnic-naa kal ve niawm takin a indress bawk si. 

Ka nu chuan a lo dawngsawng ta vat a. Tei chuan, "A rui mah mah a, ka rawn thlah haw a nih hi. A thiante an rui ve vek bawk sia" a ti a. 

"Khaw nge a bike? " ka pa chuan a lo ti a. 

"Danny khan a khalh haw sak a, ka scooty in ka rawn hruai a.. " a ti ve mai a. Scooty-ah pawh engtin lèk nge a chuan le.. A tla lo chu a vanneihthlak zawk hle mai. A roomah ka nu nen chuan an kuah chho ta a. Ka thlir zui vawng vawng. Engtin emaw ka awm. Ka na vawng vawng niin ka hria. Ka hnual vek bawk. A hnu rei vak loah Tei leh ka nu chu an rawn inzui thla leh a, ka nu chuan lawmthu a hrilh malh malh a. Tei chuan, "A ho lutuk, ka tih ve tur alawm.. Bike chu naktukah emaw an rawn dah mai ang. Ka phei phawt ang e" a ti a. Kawngka bulah ka lo ding a, "I fel hle mai" ka lo ti khawmawi ve a. Min nuih sak ringawt. A hmaa keimah vanga Zirsanga'n a ben kha a la hre reng ve thoin ka ring. Ka nu chuan kawt thleng a va thlah a. A rawn let leh lamah chuan chiang taka min melhin, "I tan chhuanlam tha tak a ni ngei ang" a ti zawi sap a. Ka harh kâwk. Ka nu sawi awmzia chu ka hre nghak. Zirsanga ka bansan theihna chhan tur chhuanlam a ni tihna. anih chu.. Ni e, ka ti ngei ang. 

Lungawi lo zetin khumah chuan ka mu ngil ut a. Chunglam ka melh reng ringawt. Engvangin nge Tei te nen an zuk picnic? Chu mawlh chuan a ni min tihrehawm ni.. A sawi hmangah mipa hlang an ni dawn sia.. Dawt min hrilh a, Rilru thawven a duh vanga kal anga insawiin Tei nen chance an zuk nei zawk a! Ka na et et.. Ka ţah te a chhuak. Ani lah a chatthla hmak bawk si. Tei chuan a beiseina a rawn tisang lo thei dawn ta lo. 

Mit thial urhin ka tho va. Mut ka va kham lo mai mai tak em.. Ka lu te a nâ.. Ka inphihfai a, in hnuaiah chuan ka chhuk nghal a. Ka nu leh Thari an lo awm. Ka pui ve nghal a. Tukthuan kan ei thlengin Zirsanga a rawn lang lo. Kaihthawh kan tum lem lo bawk a. Ka insiam mawlh mawlh laiin a thawm ka hre ta a. Ka rin ang ngeiin ka roomah a rawn lut.. Ka inchei lai tak a ni a, en pawh ka lo en lo. 

"Nimin kha sorry" a ti hul hak a. 

"Okay" ka lo ti satliah. 

A ding reng a, "Kim, i thinrim mi? " a ti leh a. 

"A ho ee.. I nupui tur te nen in picnic ve a ni mai a. Sawi tur ka nei hleinem" ka lo ti hliai a. Ka bul chetah a rawn ding, "Tei kha a rawn kal ve dawn tih ka hre sa miah lo asin. Eddy ten an lo sawm ve ringawt a. Ka ngei nak alaia " a ti mawlh mawlh a. 

"Ngei deuhte scooty khalha chuan hi a nuam duh asin" ka lo ti leh hmak. Ka duh chuan ka ngeiawm thiam ve tho, bakah sorry tih vang ringawta ka thinlung hi dam tur a ni tlat lo. Ka na laklawh a, chhuanlam min siamsak ang ngeiin ka kalsan bawk ang ka ti ve tlat! 

"Kha pawh Eddy te bawk, an rui ve bawk sia, bike kha ka khalh an phal tlat lo va, ka lo rui ve tho nen" a ti leh nuah nuah a. 

" A ho lutuk.. Ka kal dawn.. Chhuak rawh" ka ti a, ka bag ka la nghal. Min en reng, kawngka bulah ka ding a, kawngka chu ka hawng zau hret bawk. Ka hmel a thutak em vang chuan min hnial duh lo nge ngawi reng chuan a chhuak a. Mahse, "Tawpsan i tum te kha a lo ni ang e. Ka la tawpsan ve dawn lo ania" a ti leh kher. 

"Khangte chu i thu alawm.. Keima lamah chuan a tawp" tiin a chhanna pawh nghak tawh lovin chak zetin in hnuaiah ka chhuk ta a. Thinrim bûrin dawr ka thleng. Tun laia ka mood inthlak nasa lutuk hi ka naute pahnih hian an ning ru ve thoin ka ring. Inthunun harsa ka ti bawk si.

Zirsanga chuan call ka la duh dawn lo tih a hria aniang chu, min rawn text ta tlut tlut a. Ka seen a, ka reply lo. A insawifiahna vek. Tei nen engtinmah an awm lohzia te, a sawm tel ve lohzia.. A tam mai. A then chu a dik pawh a awm ang, mahse, ka inlak paukhauh ve a ngai tlat! Tuna ka chak lo a nih chuan ka tlawm zel dawn si a. Kan chhungkaw inlaichinna chhanhim nan pawh tun bak remchang ka hmu lo vang, chuvang chuan a thusawite chu awih châk viau mah ila, ka awih duh lo lui. Palzam ka tum, anihna takah chuan a induhtawkna kaihthawhsak ka tum a ni ber. Tichuan, ani pawn min runluih nan Tei a pawm ang a, engkim a tawp thei tak tak ang tih ka beisei a ni. 

Mahse, ka chhungril erawh a na veng veng. Dik tak chuan min treat dan engkim ka hriain ka tem vek tawh a, a pa zia leh min duatzia ka hai lo. Kha a nungchang leh zia kha Tei laka a lantir tur anga ka mitthla chuan hriauin min chhun zawk zawk se, chutiang chuan a na.. Ka tawrh a ngai miau si! 

Ni dang aiin kan bang hma. Faki ten mikhual an nei a, an buai deuh bawk nen. Inhralh a kal vak lo bawk a. Scooty ka lak chhuah lai takin Dinpuia'n min rawn au lauh lauh, ka va hawi a, a nui sâng mai. 

"Zanin chu ka rawn leng ang" a ti a. Ka lo bu nghat. Zirsanga runluih nan pawh a pawi lo ve. Asawmi nen kan inphur phei leh a, "U Kim, mi sawi danin U Zirsanga'n sawn a thlak ami? " a ti thut! 

Zep kha a tulna ka hre lem lo va, ka sawi ve mai. 

"Sangsangi. Rilru a na ngawt ang" a ti ringawt a. 

"An ni chuang hleinem" ka lo ti mai a. 

"Nia, mahse, a star em a, a starna a rei tawh bawk sia.. " a ti a. Sangsangi ai chuan ka khawngaihthlak fe zawk ka ti rilru a. 

In ka thlen chuan ka nu chu dam lo kanin a lo chhuak a, a lo la haw lo. Jeni te pawh an la bang lo. Thari nen chuan ei rawng kan bawl a, kan titi mai mai. 

"U Zirsanga khi a thinrim hmel tawp.. Chhuna thingpui han pek ka tum khan bang a lo hnek vak vak a, ka hlau lutuk a, ka chhuk leh tawp" a ti sar sar a. 

"A va mak awm ve, ti nge chutianga a awm le.. " ka ti ve mai a. Ka ngaihtuahna erawh a kal thui viau. Ka haw tawh tih a hre ngei ang a, a rawn dik dak miah lo. A beidawng ve tawh pawh a ni mahna le.. Ka nu pawh a rawn haw a, kei pawh ka inbual a, ka room kawngka ka lo kalh lo nge ni.. Ka inbual zo bathroom atanga ka chhuak chu khumah a lo thu ran mai. Ka phu zawk lehnghal. 

"Eng nge a? " ka ti hrâwk a. Ka awki pawh a dam lem lo. 

"Tawp ka duh lo" a ti bul hmuk a. 

"Keiin ka duh alawm" inhruk hul pah chuan ka ti a. Ka inveng ru deuh bawk. Mahse, min khawih tum hmel a pu lem lo. Ka inthlak sawk sawk a. Ngawi rengin min en reng. 

"Ka pa a lo haw tep ania, chhuak rawh" ka ti a. 

"Ka pa ka hrilh vek dawn engkim hi" a ti ta mai! Ka ding ngil zawt. 

"I mawl em ni? Nge i la rui zawk? " ka ti nghek a. 

"Ka harh fim khawp mai. Nilengin ka ngaihtuah a, ka pa hrilh mai hi ka duh tawh a ni. " a ti nghet charh. A awmdan mai mai chu aw.. 

"Zirsang, i ngam chuan hrilh rawh. Kei chu ka kalbo leh a ni mai. Ka pa tihmualphova tihhrehawm ka duh lo. Tun hi kan tan kal hranna remchang a ni. Inthen ka duh" ka ti ta hmiah hmiah a. 

A rawn ding a, ngui zetin min melh. 

"Kim, inthen chu i duh takzet maw? A chhan ka hre duh" a ti a. 

"Tei vang leh kan chhungkaw inlaichinna avangin" ka lo ti fiah kâk. Huaisen ka inti hle. 

"Tei vang chu ni kher suh se.. Ani saw kan inkar tihtawp phah nan chuan a nep lutuk.. " a lo ti a. 

"Engpawhnise, a hma anga kan awm leh kha a ngai a ni. Chu chu ka duh. Min hmangaih anih chuan tihlawhtling rawh" ka ti ta a. Ka thinlung erawh a nâ. 

A kun a, a rawn dak chhuak leh. Zawi sap hian, "Ka hmangaih che avanga thlah zalen tur chein min ngen a. I duh ang chu ni rawh se. Ni e, hetiang hian vawi hnih ngawt kan intawng khum tawh. Min hmangaih ve tak tak lo tih ka pawm thlap e.. Zalen ang che. Ka u i ni reng tawh ang" a ti a. A reh tlawk tlawk. Sawi tur ka hre teuh, mahse, ka sawi thei lo. Ngawi rengin min chhuahsan ta a. 

Khata tang khan Zirsanga chu ka nau a ni ta a, a tan pawh û ka ni ta. Kan khawvel reilote, nuam tak erawh ka theihnghilh ngai lo. Ka pa rawt angin chhungkua an inrawn khawm leh a, Tei te lamin tawngkam an lo nei vr deuh bawk nen.. 

"Palai tir ru. Tei chu ka nei ang. Mahse, zirna chhunzawm zel ka duh. Nupui te chawm nih ka duh lo" Zirsanga chuan a ti a. Ka nghing dawt. Mahse, ka intichak hram hram a. Zanriah erawh ka ei lui thei ta ngang lo. Chaw ka khalh hrep hnuah ka kham ta daih a. Inthunun a va har si em.. Ka beisei aia hmain a lo thleng miau si a. Ka pa thawhpui pakhat hi Tei te thenawm pa a lo niawm a. Ani chuan Tei chu keimahni lamin kan duh lo leh iai angin a lo sawi a. Ka pa ngaihdan a ni lo deuh a ni. Zirsanga lahin neih a rawt ta hmiah bawk si a. Keimah vang tih erawh ka hai lul lo mai. Thutlukna a siam rang deuh zawng a ni e. A inchhir loh hram ka beisei. 

Dinpuia kha a sawi tawh angin a rawn leng a. A mawi lo zawngin kan awm lem lo bawk a, tin, a leng rei hran lo. Insum taka inleng kawm chu chhel a ngai hle. A haw chu ka thaw hawk mai. Amah ka hua pawh a ni lo. Mahse, inthup chunga polite ngai si kha ka hah a ni ber mai. Ka intifai sawk sawk a, ka mu daih. Mut ve lah hian mut a chhuak chuang miah si lo. Thil tam tak ka ngaihtuah leh a, Zirsanga te lah inneih an tum chu a ni si. Tei hi tha takin ka biain ka pawm thei ang em? Farnu sual leh hrawn hrehawm tak nih ka hlau a ni. Han indang dawn se mipa awmchhun a ni bawk si, keimah zawk hi ka indan a ngai maithei a ni. Zirsanga chuan chhel takin kan inkara thil awm hi a hmachhawn thei a ni mahna.. A derthawng leh chak lo zawk ka ni si a… aaa.. Lo thleng phawt teh se. 

Ka pa te pawn palai tirin kan inrem ta chu a nia. Hall-ah an invuan ve dawn a ni. Tei hi sawi tawh ang khan Lecturer a ni a, amah a inchawm theih piah lamah an chhungkaw khawsak a sang ve thawkhat. An fanu neihchhun a ni bawk a. An duat khawp mai. Amah pawh a no reng a. Zirsanga hi a pa te lam chuan an duh ka lo ring vak lo zawk a, mahse, an fanu sawn paitir teh ngawt kha an ngam bik chiah lo a ni maithei. Kei pawh inneih boruak velin min tuam tak tak hmain zinna tur ka hmu ta hlauh a. Ka bungraw lam chhuanlamin ka zin ta daih a. Zirsanga uapna hnuaia ka awm lo ringawt pawh chu a zia ve reng reng. He thil hi ka cho chhuah leh ka chunga thleng tur ve reng a ni tih ka hria, mahse, rilru kil khatah chuan, "A tha zawk e. Ka chhungkua ka chhanhim alawm" tiin ka ngaihtuah ve tho. Na ti mah ila, tawrh chhuah hun ka la nei ve mai ang. Cham hlen theih ni hek lo le, ka hawn a lo hun leh ta mai si a. 

Kar thar nilaini-a innei tur an ni tawh. Mi pawh kan sawm falua lo. Dan thianghlim a ni lem lo bawk a. Tei te lam hian an sawm zau zawk maithei. Zirsanga nen kan inhmu khât ngei mai. An inbuatsaihna kal velah a chhuak deuh reng bawk nen, chaw kan eiho khât viau bawk. Kan awm ho ve chhunah a tul feah lo chian kan inbe ngai hek lo. 

Ka sam ka khuih laiin ka nu a lo lut a, "I nui hmel kan hmu khât ta hle mai" a ti hlawl mai.

"Ka nui fo alawm" ka ti ringawt. 

"A hrehawm viau ang tih ka ring, mahse, i hmachhawn a ngai si a. Ka hrethiam lutuk che a nia" a ti a. 

"Nia, ka tuar chhuak ve mai ang. Ka pa hian engmah a hre lo takzet em? " ka ti a. 

"Hre lo, ka hrilh hleinem" a ti a. A heh a liak zauh. Dawt a sawi tlata hriatna ka nei. Mahse, ka zawh belh duh hran lo. A chhuak a. Kei pawh ka thiannu te inah thil lam tur ka neih vangin ka chhuak ve nghal a. Gate ka pelh hma deuhin Zirsanga a rawn haw. Kan intawk chiah. 

"Khaw nge i kal dawn? " a ti sup a. 

"Saw tah" ka ti ringawt. 

"I na hle tho sia, min kalsan i duh tho bawk sia tiraw? "A ti leh hram. 

"Aw" ka ti zawi raih a. Ka kalpel nghal. 

"Mawl lutuk" a tih nghut ri chu ka hre hman. Ka nau a ni tawh tihah ka chiang tur a ni. 

Zanah Dinpuia a lo leng leh a. Kan inkawm ta reng mai. A fel suam suam bawk a, ka khawhar a hnem viau. Dar 9 velah a haw ta a. Ka va thlah zo in chhunga luh ka tum lai takin Zirsanga a rawn chhuak nulh. Min kai lawp a, garage ah min pheipui leh. Tal a sawt lo tih ka hriat vangin ngawi rengin ka zui tawp. Bang nghengin min dintir a. 

"Min runluih khanglang suh" a ti hmuk a. 

Ka lo nui tawp. 

"Tu nge inrunluihna kalpui hmasa zawk tih kan hria alawm" ka ti a. 

"Nupui ka neih chhan chu tihnat che ka duh vang a ni.. Mahse, i na hi ka hmu leh thei chuang si lo.. " a ti a. A indawm vung vung. Kei chuan ka huat vang nge chutia hrehawm a ti chu nuam tihna riau ka nei pek! 

"Ka kal dawn.. Nupui nei mai tur nen hian sawi dun tur kan nei tawh lo" ka ti a, ka kal nghal, ka banah a rawn man a. Chiang zeta min melhin, "I sual hle a ni tiraw? " a ti a. A aw chu a ril hle. Ka nui lui a. 

"Aw ka sual " tih leh kal ka rual. Mahse, garage lo china lo ding reng ka va hmuh chuan ka rak ţhawt.. Ka ka ka hup leh a, ka tlu mai dawnin ka hria. 

"In pahnih khan ka be duh che u.. Lut rawh u" a ti khauh fun a.. A mitmeng chu a mak hle. A thinrim leh thinrim loh ka hre lo. 

"Pa" ka ti ţial rian a. 

"Tunah" a ti leh hmak. Zirsanga nen chuan inmelh zak zak chungin kan lut dun ta a.. 

(Ka regular lo teh e. Mahse, nitin rawn dah ka tum tawh ang. Ka thei tawh turah ngai ang aw.. Min lo la chhiarsak ve hfam hram ru.. Zirsanga a tawp hunah hian thawnthu thar, mizo story-a la awm ngaia ka hriat loh ka rawn ziak dawn e.. Amanda kan zep tel zeuh zeuh bawk ang. Ka hmangaih vek che u ❤😊