Thinlung

THINLUNG… 

Ziaktu: Toni Râlte

Ka zak a ni. Ka zak! Engvanga kha lai hmunah khan kal ve kher kher nge maw ka nih chu le..

In ka thleng a, khumah ka bawk thlawp. Ka tah a chhuak a, ka tap chhuak thei si lo. Ka mittui chu a sur zung zung a. He vanduaina zungzam hian min kalsan hlen thei dawn lo anih hi.. Hei hi ka khawvel awmchhun a ni miau si a!  

"Malsawmzual, engah nge i mut ringawt? Rawn tho vat teh. Hei tihtur a tam asin" ka ní chuan a rawn ti lawng lawng a. Ka mittui te hruhulin ka tho chhuak a. Nitin ka hna ngai bawk thawkin thlan tla bawrh bwwrhin ni chu ka vui liam leh ta. 

Malsawmzuali ka ni a, kum 24-na ka hmang ve mek a ni. Chhungkaw diktak ka neih lai chuan unaupa ka nei a, nu leh pa ka nei bawk. Kum 4 liam ta khan Mizoramah hri mak tak a leng chiam mai a. Mihring chu an thi zawih zawih a ni ber mai. Chung mitthi zingah chuan ka chhungkua pawh an tel ve a. Kum 20 lek ka la ni. Nu leh pa thlazar hnuaia thlamuang taka nun hmang mek tana a ruala a thisen zawmpui chân vek a nat turzia chu i ngaihtuah thiam ve in ka ring. Nâ hi a na tawk lo emaw tih awl tak a ni. Keimah maia khawsa thei ka nih loh vangin in leh lo nei lo ka ni te chhungkua chuan min rawn chenchilh ta a. An tihtur ve reng anihna chen pawh a awm a. Mahse, an mawhphurhna leh he ina an chen ve theih chhan an theihnghilh hma lutuk erawh ka vanduaina bul a lo ni ta a ni. 

Ka ní pasal chu Pa Rama a ni a, fanu pakhat leh fapa pahnih an nei. An fanu chu kei aia nau hlek a ni a, an upa ber a ni bawk. An rawn awm tirh chuan min duat hliak hliak khawp mai. Ka ní hi Pathian thu sawi nasa thei deuh, awmhmuna pasal te tir zet zet thin, mi rèl chu a talent emaw tih tur khawpa midang ngaihven lama thangchhuah a ni a. A mizia hi ka ní mah nise, ka nelin ka ngaina tak tak thei ngai lo. Ka pa damlai pawh khan. 

An lo awm atanga kum 1 a liam awrh tihin, fur ruahtui tam vanglai takin a pasal chuan min pawngsual a tum a! Vanneihthlak takin ka tal chhuak thei hlauh. Ka ni bulah ka sawi a. Ka hmaiah min bengin dâwt sawi tawh lo turin min khap! Mi â ang maiin rei tak ka ding nghe nghe. Sum leh pai nei lo an intih vangin zirna ka chhunzawm tawh lo va. Ka pain ka tana bank-a pawisa a lo khawl ve hmang pawh khan ka kal thei tih ka hria. Mahse, ka sawi ri ngam eih lo. Min chuhpui dawn tih ka chiang si a. Pasal chhia tha te ka neih ve theih huna ka thuam chhawm tur lei nan tiin ka thup hram hram ringawt mai a ni. Ka pa ac-a pawisa awm zawng zawng an la chhuak tawh a, kei pawh min zawt thin a. Bank manager hnenah a rukin thil nih dan ka hrilh vek a. Bank ac ka neih loh thu sawiin ka pawisa chu ka hum ve tang tang a ni. 

Pa Rama lakah chuan fimkhur a ngai tih ka hriat tawh vangin inveng reng rengin hun ka hmang ta a. Ka ní fanu chu ka ni ang chiaha tawrhhlelhawm a ni. Min zah miah lo. Hmui pan hling hleng, hmel chu chhe hran lo, lerh ing euh ve zet a ni a. A tawng theihzia hi mak ka ti ru fô! Ka thawmhnaw a duh duh a ha chhuak a, a ta cheibawl a. A thawmhnaw chu pakhat pawh khawih a phal lo. Ka make up tha ve deuh ho pawh a thiar zo deuh vek tawh a. Ka tlereuh phei chu ka ní nen an insem a ni ngawt mai. Mi chuang ka nih miau vang leh puitu ka hmuh si loh vangin ka tuar tlawk tlawk mai a ni. Ka chhel viau aniang, tihduhdahna ka tawh vanga ka tahna aiin ka chhungte ka ngaih vanga ka tah a tam zawk. Tunah pawh he in ka pa hminga awm hi an hminga thlak tumin an bei leh mek a. Ka signature a ngai ve tlat a lo nia! Ka sign duh bau si lo va. An thin chu a rim teh e. 

Kum 3 teh meuh Pa Rama lak atanga him tuma ka beih hnu chuan ngaiah ka nei chho titih hial a. Hun remchang siamsak ka tum lo bur, tin, ka kum a lo tam ve ang zelin ka huaisenna pawh a lo pung ve zel a. A hma anga min tihretheiha min tihduhdah vak ang khan an ti hleithei vak tawh lo. Mahse, ngam loh chang erawh ka la ngah khawp mai. 

Ni e, vawiinah khan kan kawmchhak nula Puiteii pass lawmnaa fatu turin ka han chhuak ve a. Ka ni fanu Julie pawh a lo awm ve a. Ka hriat ngai loh pawh an awm nual. Chungho kar atang chuan ring takin, "Awmpuinu, ka thuamhnaw kha i su tawh mi? Nge i lo kal ve ngawt? " tiin min au el anih kha..! Veng chhung mi te chuan engkim an hriatsa vangin anmahni ka zah em em lo. Veng dang atanga rawn kal te kha.. Ka zak em a ni. 

Zanriah ei hma deuhin puiteii leh a nu an lo lang hlawl mai a. "Sawmpui, chaw rawn ei ve rawh. I haw leh ta daih sia, i buai anih kan ring a" anu chuan a ti a. Ka hnuk a ulh tlat nia! Ka nî chuan, "Nia kha a nuamsam lo a nih pek kha. Damdawi te ka pe a, a zia ta deuh anih hmel. Swmpui, han ei ve rawh" a rawn ti zuah zuah a. Puiteii te chuan an awih bik ka ring lo. Zak viau mah ila, an zahawm ka ti si. Ka kal ve ta hram a. Ka chaw ei pawh a tui nek lo ve. 

Zanah chuan Julie chuan inleng a nei a. Zu an nam thar thar mai. Thingpui min lumtirin min sem tir leh zak zak hnuah ka inbual a, ka mu hmak. Ngaituahna hi a thui duh teh e. Ka chantawk khuarel hi ka pawm thiam nge ka la dam ve reng hi aw.. 

"Sawmpui, idol an thlan leh dawn kha. Tel ve tawh rawh aw. I hming ka thehlut dawn" ka thiannu ve ngawih ngawih Teteii chuan a rawn ti hlut a. Ka nui ringawt. Zai lam hi ka tithei phian a. Zaipwlah pawh ka tel ve thin. Ka dinhmun avang hian ka tel tam vak lo zawk a. Nikumah pawh khan tel turin min nawr tawh a. Ka hnial fithla thak kha a nia. Kumin hi ka hnial leh thei ngut ange maw chu le.. 

Ka ni te bulah chuan a thawi tham pawha sawi rik chi ni hek lo. Ka sawi rualin min ankhumin min nuihsawh leh kha a ni awm si a. Teteii chuan ka hming a lo thehlut tak tak mawle.. Ka va ngei tak. Ka dinhmun a hriat chian ve em vanga min hmangaih vang a ni tih hre tho mah ila, ka tan a buaithlak. 

A rukin ka zai hun tur chu min rawn hrilh a. Ka zai dawn ni chuan chhuanlam siam tur ngaihtuahin kan inrawn nasa mai a. Puiteii a tangkai ta hlauh. Ani pawh hi a zirna vangin kan inkawm tam thei lo naa mi tha chhungkua an ni a, min lainat vangin kan inzui ve nasa thin. An khawsak a lo harsa lo bawk a, ka ni te pawh hian an be chhe ngam lo. Rèl reng mah se.. 

Puiteii chuan chhuahpui min duh thu rawn sawiin chhuanlam mawihnai deuh a rawn siam ta hlauh a. Hnial ngam hek lo. Ka chhuak ve thei ta mial mai. Thawmhnaw zahawm deuh hlek ka nei si lo va, Teteii'n a smart pant leh kamiz min haktir a. Ka lawm bawk si, ka zak bawk si. Vawiin zet chu'h! 

Ka thiante nen chuan ka zai hun tur kan nghak ran mai a. Ka lung a phu dup dup mai. Ka hming an rawn lam a, ka serial no nen. Ka zun te a chhuak awt awt mai. Ka thiante chuan zam miah lo tura min fuih chungin min kuah nawk nawk a. Ka chhuak phei ve ta. 

Ka hmaah chuan judge pathum, Zaithiam lar em em Zoramchhani, Hla phuah thiam C Zarmawia leh Producer lar lutuk Michael Ramthanmawia te chu an thu a. Ka mit sulh ni maiin ka hria. Ka khurh nasat zia chu aw.. 

"I zâm hmel hle mai. Thaw han la vang vang la, hmanhmawh miah suh. Relax rwh" Michael chuan a ti a. A sawi ang chuan thawk kan la vang vang a. Ka nu leh pa te leh ka naute miithla chungin, "Hla taka khawdur " tih hla kha muang fan raih, uluk takin ka'n sa ta a. Thinlung atanga zai ka ni bawk a. Zamna reng ka nei tawh lo. Ka hnuk rawn ulh eraeh a timing lo deuh ka ti. 

Ka zai zawh chuan a reh vawng vawng a. Pawna ka thiante pahnih hlima au thawm chuan boruak reh tak chu a rawn nawrkiang a. Ka nui sak mai. 

"I va zaithiam kher em.. Sawi tur ka hre lo. I thiam lutuk" Zoramchhani chuan a rawn ti! Awii kei hi ka muhil em le.. Ka ngaihsan em em leh a zai ka ngaihthlak nin theih loh chuan zaithiam min ti anih chu.. 

C Zarmawia pwh chuan, "Thinlung a fan khawp mai. Music nen han zai phei la chuan.. " a ti bawk a. Ka chhungril nun chu hlimnain a tuam hlup hlup a ni ber e. 

A tawp berah Michael chuan, "He competitionah hian a tawp thleng i tel thei lo anih pawhin ka awm alawm. Zoram khawvel hi i la luah hneh tho vang" zuk ti a! Hei em em zawng ka phu lo.. Lalpa, ka lawm e.. Ka mittui tla chu ka thiante chuan hrethiam takin min hruksak a. Anni pawh an meng sen ram mai. 

In ka thleng a, ka khawvel pawh a danglam leh ta. An lo thu thap a. Rum em emin min melh khui hlawm mai. 

"Mi huaisarnu, dawt muhluma i chhungte min han bum khanglan le.. Tv-a i zai awr awr kha kan hmuh i ring lo mi? I zah theih lohzia hi " ka ni chuan a ti hlawih hlawih a. Ka hlimna a la pawlhdal pha chuang lo. 

"Mi in an bawl che a, tak tak emaw i ti a ni maw.. I zai thiam loh rapthlak nen" a fanu a ni thung. 

Ka inbual a, chaw kan ei a. Ka ngawi reng tawp. Min hau kal reng mah se, ka thinlung a thleng phak mawlh lo. 

Idola ka tel atanga thla khat hnuah result puan a ni a. Ka la tling ve zel e. Ka chhungte chuan min dodal viau mah se, ka tum ka tiruh ve laklawh tawh a, ka chhuak ve hmak hmak tawh mai. Min phuar bet ngawt thei bik si lo va. Ka lar anga ka hlawhtling ang tih an hlau tih ka hrethiam ve vek a, chu chuan ka tum a tiruh nasa sawt. Lalpa, min pui zel rawh aw. 

Ka thiante pahnih hi an va hlu tak em.. Min tawiawm thei zel a. An thawmhnaw pawh a rim malh malh khawp mai. Ka thawmhnaw neih that ve ber pawha ka inthuam hian an duhkhawp tlat si lo va.. Min inthlaktir leh nge nge thin. Music nena kan han zai takah phei chuan ka confi ve tial tial a, a zai tha pwl ka ni ve zelin ka hria. Kan veng chhungah pawh min hre chho tan a. Min tantu leh min fuihtu, thilpek min petu an awm ve ta nawlh nawlh mai. Michael chuan min fuih nasa, ka dinhmun a hre vek lo naa a khawngaih zawng tak ka ni nge min duhsak bik riaua hriatna te ka nei hial thin. 

Top ten intihsiakna kan neih laiin ka chungah thil tha lo tak a lo thleng ta a. Zing ka tho ka tawng chhuak tur chu ka aw a chhuak thei ta reng reng lo mai. Ka mang a va ang tak. Vawiinah kan intihsiak leh dawn si. Msg in ka thiante ka hrilh a, an rawn lawr vat. Zaizirin kan inbia a, an mang a ang ve lutuk tih ka hria. Ka tah a chhuak ut ut mai. Puiteii te motorin hospital kan pan nghal a. Doctor chuan min han endik zung zung a. Test ngai te an han test a. 

"Nizan lamah eng nge maw tak a ei a nih dawn hi.. A hrawk tiphuitu eng emaw a awm a ni. Eng nge anih kan hre thuai ang" a ti ta a!  

"Kar khat lai pawh a awh thei.. Ka chiang bik lo " a la ti zui! Ka khawvel kuhmum chho mek chu nuai tilhin a awm leh ta.. 

U maia (Michael hi maia an ti mai zel a. U maia tiin ka ko tawh ang) a lo lang ve hlawl mai. Ka hmuh rualin ka mittui a hnam sawk thei. Thil pawi tak a thleng a ni tih a hriat ve chuan a pawiti takzet tih a hmelah a lang thei. 

"Eng nge i ei nizanah"

Kan chawhmeh ka sawi a. Zaizir titihin. Tlem chuan ka aw a chhuak ve thei deuh tawh a. A thinrim hmel viauin ka hria. Ka ni te thiltih a nih rinna ka nei ve tho kei pawn. Mahse, finfiahna a awm si lo. Ka zai ve thei ta lo. Top tenah ka inhlang kai hram a, ka bansan a ngai ta. A va na ve.. 

Mittui tla zawih zawih chungin ka thiante intihsiakna chu ka thlir a. Pathian pawh hian min khawngaih ve lo mi le.. Ti nge heti ang em ema ka aawm bik? 

Doctor kohna angin Hospital kan pan leh a. Damdawi chi khat vangin ka aw chu a lo phui ngei e. A titu pawh ka hria. FIR thehlut turin min ti hlawm a. Ka hnial ta mai. Chhungkua kan intimualpho dawn lutuk e. Phuba zawng lak hun a la awm ve chèk ang chu.. 

Idol pawh an thlang tawh a. Ka zaipui thin Rindika an thlang. Ka lawmpui em em a. Nat erawh ka na. U maia chuan min rawn be fô thin. Ka aw a fit veleha zai thei turin min hrilh chamchi. Ka aw pawh a fit chho tan ta a. Ka thiante nen Umaia studio kan pan tham tham a. Ka kalna tur pawh ka nite bulah ka sawi sa vek. Min hnial mah se ka kal dawn a ni ringawt mai. 

Umaia'n min lo hmuh chuan a lawm hle mai. Muangmarin a hla kawl chu min zirtir a. Studio-ah vawi khatmah ka la zai lo va. Ka zam angreng. Ka châk bawk si. Chumini nilenga kan zir hnuah tlai lamah kan record thei ta hram e. A mawi turah ngai ang. 

Thil chu a thleng chho ve mawlh mawlh mai. Umaia puihna vekin music video pakhat chu ka puitlin ve thei ta. You tube-ah kan upload ve a. Viewers an tam ve khawp mai. Ka lawm e. Zoram khawvel chuan ka hming hnaisailo chu an hre ve tan dawn ta e. Umaia hi ka tan a hlu ngawt mai. Zaithiam tam tak a lo chher tawh te zinga ka tel ve thei ringawt pawh hi ka lawm takzet. 

Zai tura sawmna ka dawng chho ve ta mawlh mawlh a. Ka thiante idea angin silh leh fen te ka inlei ve tan a. Mipui hmaa dingchhuak tur chuan zahpuiawm lo tawk incheina mawihnai ka neih ve a ngai tlat si a. Chungte chu ka chhungte chuan tul an ti lo nasa. Pawisa tlem azawng ka thehlut a, a bak ka hmang hmak zel. Ka pawisa duh tawh bik lo. 

"Vawiin chu leng ang hmiang. I awl tiraw? " u maia chuan a rawn ti dut dut a. Umaia hi pathlawi a ni a, fapa kum 3 mi vel a nei a. A nupui hian tlangval dang a umsan a ni awm e. Palian tak, Ngo lutuk lo, sa tha lam, pian nalh zet a ni a. Gym a kal thang bawk a, mizo mipaah chuan nalh pawl tak a nih ka ring. A smart a, a mitmeng na zet, sexy ru phian si chu hmeichhe ho tawrh har tih pawl tak a ni awm e. A hmui hi tlemtein a phir a, a naupangchhia lek lek. A khabe hmul chu duh aiin a buk deuh em aw tihtheih a nih rualin a inhmeh em em tho. Keipawh hian ka star em em. Mahse, u anga ka enna hian min thunun hram thin zawk. 

Phur takin ka hman thu ka hrilh a. Ka tihtur ka tih zawhah ka insiam a. Ka chhuak ta a. 

Hmuifang lamah kan kal a. Kan pahnih chauha kan han awm ta chu ka lai tlat pek a! SWi tur ka ngaihtuah nasa ngang mai. A titi hlut zawk a. A zia tak a awm e. Amah nen kan nih vang nge nuam ka ti. Hmuifang ka kal vawikhatna a lo ni bawk nen.. 

"Sawmpui, innei ang hmiang" awii ka phut chianzia chu.. Ka tui in tur ka phuh thawt mawle.. 

"I â mi? "

"I dinhmun hi hetiang hi a ni sia. Innei mai ang" 

"Inngaizawng lo pui inneih te chu a"

"Kan inngaizawng emaw ka tia"

Ka han melh kawk a. A nui miah bawk si lo. "Kan inngaizawng maw? "

"Aw a rukin kan inngaizawng ve ve.. Kan sawi chhuak lo a ni mai a.. Eng nge? "

"Aa.. Bialnu i nei ang. Tha deuh"

"Ka nupuiin min phatsan atang khan nangmah chiah ka la ngaizawng che"

"Ka hrethiam lo.. "

"Hriatthiam a ngai lo. Inneih vat a tha. Oct thlaah innei ang aw"

"I va hmanhmawh em em"

"Ka hlauthawng a ni. Mi hurherh leh a thuihhruai te bula i khawsak reng saw ka remti lo'

"Maw.. "

"Nia, i thianten i ni pasal chungchang te kha min lo hrilh tawh alawm.. Ka venhim vat che a ngai" 

Min rawn fawp chawt a. Ka rin aiin a zei lo. Kei phei chu zirtir chawp ngai ka la ni zui.. A ngaihna awm lo. 

Ka nun nawm ve tanzia chu aw. Ka chhungte sualna pawh chuan min hneh zo tak tak tawh lo a ni ber e. Zan awlah a rawn leng thin a. Julie hi a fel em em ziah bawk, ka ni phei chu a tawng nem thiam leh em em zel. Mahse, keimah vanga lo leng a ni tlat. Ka ta, ka chanpual, ka chanvo a ni. 

"Michael hi i ngaizawng mi? Miin an sawi duh tawp. I nihna te hi hre ve rawh aw. " julie chuan a ti bawih bawih a. 

"Ka ngaizawng lo. Kan inngaizawng"

"Awiii i va zak thei lo tak. A duh che i ring reng reng mawni le.. A bawl kual vel mai mai che nih saw. Sumdawn nan a hmang che.. I hrethiam em? "

"A pawi mi? I tan a pawi ve dawn chuang hleinem. Lo buai lo teh"

Ka ni nen min tawng el zeuh zeuh reng a. Ka hne viau naa.. An chauhthubarawh a ni tih ka hre ve. Nuam ka ti phian si. 

"Ka msg en vat teh" Tetei'n min lo call a, a msg chu ka en a. Instagram ami a lo ss a, Umaia leh Model Pakhat lar ve tak mai ding dun lai thlalak a ni a. A caption chuan ka ngeng a chhun kher mai. 

My love ❤❤ tih te mai hi. Thil dang a inziak miah lo. Mahse, ka thinlung tina turin a tawk em em. Model upload zawk a ni a, mahse, chu chuan kawngro a su chuang lo. Julie chuan a lo hmu ve leh tawh a ni ang. A tawng nuam ham ham khawp mai. Sawi tur a vang ka ti.. 

Umaia chuan min lo call a. Ka reject. Vawi 7 chuang min lo call hnuah ka la ve ta hram a. 

"Inhmu ang.. Khatah ni lo" a rawn ti a. 

"Inhmuh a ngaihna chhan ka hre lo ve" ka ti hmak. 

"Ka lo kal ania" a ti a. A dah. 

Awmngaihna ka hre lo. A insawifiahna ngaihthlaksak chu ka châk a, däwt pawh min hrilh se ka awih lo phal lo vang tih ka hria. Ka innghahna a ni miau a. 

Kan inah rawn lutin ka chhungte awm ve reng laiin, "Ka hruai chhuak lawk dawn" tih leh ka kuta vawn a rual a. Min kai chhuak nghal. 

"Sarah khan min ngaizawng thin a. Ka tlangval lai atang tawhin. Mahse, a mizia ka duhzawng a ni lo. Ka ngaizawng ve lo. Khami thlalak kha chu hman zan runway an neiha ka tel ve zan ami kha a nia. Min sawm tlat sia, ka lakpui anih kha.. Kan inkarah engmah a awm lo.. " ka awih vek. Mahse, ka thin a rim tho. 

"Kei ai chuan a tha zawk alawm. Innei rawh u"

"A tha zawk lo bawk"

"An hausa a, a hmel tha a. A pian nalh bawk. A zei viau bawk ang"

"I tawng thei "

"Ka duh leh"

"Nangmah ka duh. Nangmah chiah"

Tawngkam kan thiam lo dun a. Thinrima inankhum pawh kan thiam hran lo. Chumizan chuan lungawi takin kan inthlah leh ta phawt chu nia. 

Zaia sawmna ka dawn angin Sialsukah ka zin a. Ni 3 lai kan cham a, ka lung a leng hman hle. 

Kan haw dawn zan ka mu tur chuan msg thinthawng em em ka dawng ta a. 

"Inthen ang. Ka then che. Mang tha" Umaia hnen atangin a ni. Ka cal a, min block aniang. A tlang thei lo. Whatsappah min block bawk. Thil awmzia ka va hrethiam lo em. Ka muhil mang lo a ni e. 

Ka haw veleh ka thiante ka pun nghal. Eng nge thleng ka hre si lo. Ka thlen ni la la chawhnuah a studio lam panin kan kal nghal a. Zah pwh ka sawi thei lo a ni ber mai. 

Hmeichhe pahnih an lo awm ve a. Umaia thianpa a thawhpui ni bawk Ulawma pawh a awm. Chhete mahin min ngaihsak lo va, en pawh min en duh lo. Nula pakhat zawk bulah chuan a titi a, a nui huah huah reng a. Ulawma zawk chuan min be bawrh bawrh thung. Engahmah ngai lo va min mikhual en chu tawrh harsa ka tih em vangin, "Umai, thil sawi lawk ang. Khawngaihin" ka ti ta tawp a. A rawn hawi a. Min rawn melh a. 

"Ee.. Sawmpuii kha i ni tiraw? Ka hai dawn che lawm. I lar tak hnu hian i dang tawh lutuk a" a ti ta a! Ka puakdarh lo chauh a ni ber e. Chhungril khur zawih zawih chungin ka inpetruh a, tah loh hram ka tum. 

"Aw le.. Anih ka kal mai ang e. Min lo hre tawh lo chu a mak hle mai" ka ti nghat a. Ka chhuak vang vang. Ka tawng lo va. Ka kal mawp mawp ringawt. Heti ringawt hian kan tawp ang maw? 

Ka ni leh Julie lahin mei nei tak takin min tawngkhum reng a, kan inthen tih an hriatna chuan a tilawm nasa aniang. An chaw ei a tui em mai. Engmah ka ei thei lo va, ka muhil thei bawk si lo. A chhan eng emaw chu a awm tih ka hria. Ka hriatchhuah a ngai a ni. 

Vanapa Hall-ah function a awm dawn a. Zai tura min sawm laiin ka lo yes tawh si. Phur lo zetin ka chhuak ve a. Ka chhe khawpin ka ring. Puiteii'n min tawiawm leh a. Teteii erawh a zin lai a ni hlauh. 

Ka zai that vak pawh ka ring lo. Mahse, lawm dertu leh chibaitu erawh ka ngah ve leh phian. Mipui tam tak karah pawh Umaia chu a langsar bik aniang e. Sarah nen inhnaih fahrana an thudun lai chu ka melh zeuh zeuh a. En reng hrehawm ka ti a, ka melh lo thei si lo. Ani chuan a mitsir pawn min melh eih lo. Heti tak hian min huain, min hmangaihna te kha a bo ta vek a maw?  

Ka mut dawna ka ph ka hmet eng chu min unblock ani ngei ang, "I zai tha e" tih thu a lo dah a. 

"Ka lawm e" ka ti ve hmak. 

 A reh leh hmak bawk. Chutianga hun khawhar tak hmanga thla hnih dawn lai ka awm hnu chuan tlemin ka tha chho ve leh ta deuh a. Tv-ah hmuh tur a tam si, ka thinlungah zawng a thi hlen thei lo a ni e. Sarah nen khan an inzui ta aniang. An lar em mai. An thlalak an post chei chuai a. Hmuh ve kur reng chuan hliamah chi an phul leh thin. 

Ka ni te nen kan boruak pawh a la ngai reng. Min tiduhdah ngam tawh lo a ni mai. Sum ka thawkchhuak tlat a. Tin, mi hriat ka hlawh ve tawh bawk nen. Sum ka khawl zel anga, ka indang ve ang tiin rilru ka siam a. Ka pa in ngei mai atanga in hrang han chan chu ka ui a, ka ngai, mahse, a ngai miau si a! Ka tum dan erawh ka la sawi chhuak chuang lo. 

Umaia nen kan inthen atanga thla thum a vei hnuah ka nunah mi thar a rawn lang a. Sangpuia a ni. Kan kohhran thalaiah Secretary ni lai a ni a. MZU-ah Commerce deppt. Ah a thawk bawk. Kei aiin kum 9 laiin a upa a, mahse, mi fel a ni. A hmel tha bawk. Kan inbe zeuh zeuh a, zaipawl vela tel tura insawmna atangin kan inbe tam tial tial a. Kan infiam zauh zauh bawk. A rawn leng ve ta fo a. Induh thu vel pawh sawi lem lo vin inngaizawng ang deuhin kan awm chho ve tawp mai a ni. Lengzem ka sak avang hian Kohhran lam ka hlat phah deuh a, U sangpuia hian min hnukhnai leh ta a ni. Ka thiante chuan min duhpui em em, fel an tih leh an ngaihsan thin kha a ni miau a. A chhungte lah an felin an chapo lo si. Tlangval hnahkhat ngat a la ni zui. Umaia chu pathlawi a ni ka tih tawh kha.. 

"Bialpa i nei chhe lo hle mai" Umaia teh tlat chu.. 

"Ka lawm e"

"A fa kha chu titla ve miah suh" 

"Eng a?! "Ka phu zawk thei. 

"Hre lo der suh. A ho"

"Nau titla turin tu fa mah ka la pai lo va, nula thianghlim ka nih hi"

"A ni thei lutuk ang. Haha"

"Aw le" tih tawpin ka chhang. Ka thinrim lutuk chu ka khur hial. Nau titla angin maw min lo hriat.. Tu thiltih nge ni leh ang le.. 

Usangpuia chuan palai lo tirh mai a duh thu a sawi a sawi tawh a. Kan la ni rei lo bawk si. Nghak rih turin ka ti a. A remti ve mai. 

Loh theih loha Umaia studio-a ka zai tur chu ka hreh angreng. Ka thiante lah an hman si lo. Ulawma nen an lo awm leh a. Umaia chu a inzuah buk vel tawp. Ka hai tep. Ulawma a chhuak nulh. Ka lai. 

"Inneih te in tum hnai em? "

"Nakkum lamah aniang"

"Hehe.. Oct thla kha kan inneih hun tura kan duan ve kha a nia tiraw"

"Nia, min then thla a ni zawk a"

"A chhan i ngaihtuah ngai miah lo mi? "

"Ka ngaihtuah thiam lo.. Mi dang duh zawk vanga kal i ni tih ka pawm taeh lawm"

"I nau tihtlak thu ka hriat vang zawk ania"

"Nau ka titla lo ka tih kha.. Chu chu khawi atanga i hriat nge? "

"Ka cuz nurse a tangin. Record bu-ah i hming a lo chuang vang a."

Ka tho zawk. Eng thil nge thleng le.. 

A sawi chiang ta a. A cuz Seni nurse hian kan ni tih a hriatin hmana nau ka tihtlak tawh thu a lo hrilh a. Record bua ka hming chuang te nen lam.. 

A va mak tak. Ka hrechhuak ta. Julie.. Julie hian kum 2 liamta khan nau a titla tak alawm. Sawi chhuahsak tul ka ti lo a, ka sawi ngai lo. Khatah khan ka hming an hmang tihna em ni ang?  

Zai pawh ka zai lo. Ka haw nal nal. Kan in chu thinrim angthawmin a khat a ni mai e. Julie chu ka kek bawrh baerh a, heti ang reng renga ka thinrim hi an la hmu ngai lo bawk a. An ti dak thei nia! Ka dawp a, ka zawt a. Ka beng thuai thuai. Min lo thelh tumtu chu ka vai kiang a, chemte ka va la.. An tawlh dial a. Pawisak ka nei miah lo. 

"Aw ka hming aiah i hming kan hmang.. Ka nu remruat vek ania" a ti ta. 

Ka ni chu ka pan hnai a, chemtea tin chung leh khur dawt dawt chungin, "Tun atang chuan nang leh kei hian inzawmna kan nei ta lo. He in atang hian chhuak nghal rawh u. Kan inzawmna ka chhu chat vek e. He in hi ka in a nih hi. In awm ve ka remti tawh lo. A tawk tawh e" ka ti ta a. 

Boruak chu a ngawi duk mai. Thinrim zetin ka ni chuan a chhuah loh turzia leh min enkawl vanga damkhawchhuak thei ka nihzia min chham khum a. Ka pawisa lo. An roomah kalin an thawmhnaw ka chinglet a. Insiam turin ka tur a. Chemte ka keng reng bawk. Police phone ngam an awm der si lo. An tihsual rah a ni miau a. 

Tunah chuan keimahin kan in zaupuiah chuan ka awm ta. Ka zalèn ta. 

"I ni te i hnawtchhuak tih ka lo hria a.. "

"A dik alawm. Nau ka tihtlak lohzia finfiahna anih kha"

"Ka lo kal ang aw"

"Ka mamawh reng reng lo che" ka ti thei ta. 

Mahse, a lo kal tho. Usangpuia a lo leng lo hlauh a. Ka lawm khawp mai. 

"Bul kan tan tha leh thei ang em? "

"Ka ring lo"

"Thudik ka hre tawh a. Ka ring tawh che alawm"

"Mi dang chanpual ka ni tawh a tin ni"

"Ka hmangaih loh vang chea kalsan che ka ni lo tih i hriat kha..,"

"Mahse, thudik zawnchhuah i tum chuang hleinem"

"Ka nei tho vang che"

"Kan hria ang chu"

Mi pahnih inkarah ka ding ta. Ka thinlung hian awmdan tur a hre lo. Nhaihtuahna buai tak a nei a, a chingfel thiam si lo. He thinlung hian eng nge a tih anga, eng kawng nge a zawh ang le.. 

"Insiam rawh aw. Zanin kha KTP inkhawm zan anih kha" U sangpuia msg chu ka melh vang vang a. 

"Zaninah hla thar chu i record fel a ngai ania. Ka peihfel vek tawh e" umaia thung.. 

Ka hmalam hun tur ka ngaihtuah a. Kawng pahnih a awm.. Eng nge ka tih ang ka hre ta lo.. 

THE END.. (In chawh khât tawh sia.. Chawh leh phawt mai ru 😂😂