Indona

INDONA.. 

(Dam chuan thursday tangin thriller lam ziah ka rawn tum ang) 

Ziaktu : Toni Rälte

"Hman tawh em? Rei thei siah" a rawn ti láwng lâwng a. He nu hi chu a. Ka sam ka tuai puat a, hmanhmawh zetin ka chhuak ta a. Ka best friend Dini scooty-ah chuan zei zeta chuangin kan tlan chhuak ta a. 

"Awii enteh nizan chu zosapah ka pâwt leh chiam a, ka meng rei vek. Ka mit a thip rap" a ti mawlh mawlh a. 

"Kei chu story ka chhiar a, ka lo muhil daih, ka ph pawh ka charge hman lo" ka lo ti a. 

Ani nen hian kum 8 kan nih atangin kan inkawm tawh a, kan vengah an awm reng thin a, mahse, anu hna avangin veng thenawmah an insawn ta a. Kan la inkawm zui reng tho. Kan mizia a inang a, kan pian erawh a danglam. Ani a lian a, kei ka tè. A háng lek lek a, kei ka ngo em em thung. A hnute leh mawngbawr vawng lah chu a hmuhnawm, mipa tam tak ít a ni. Kei erawh ka dèp tawp. Hnute phei chu ka nei mang lo. A pawng ve dèt dèt chauh. Ka mawng pawh a tè. Nufa niawm tak kan ni, kan inzui ve det det zel a. Ngaihzawng nise kan induhpui tawn chauh lo chu kan ngaizawng ngai lo. Dini miziaa ka awh em em chu mi dang hriatthiamna leh dawhtheihna a ngah hi a ni. Ka tluk lo angreng. 

University kan thleng a, chaw kan ei hman loh vangin thil kan ei phawt. Tunah hian kan single ve ve. A nuam zawk ti tawh mai ang. 

"B, en nghal miah suh, saw pa saw alawm cathy raitu chu, tisawn a la thawveng em em sia" Dini chuan a ti sar sar a. Cathy chu an kawmthlang nula a ni. A rai a, a raina pa hian a nei leh duh si lo niawm tak a ni. Dini hian a sawi ve fô danah Cathy chu a lainat leh hle anih ka ring. A sawi zawh hnu fèah ka va en ve a. Awii chhe hot! Lellul a, ngo hleng hlung si. A thak hmel tawp. 

Class lak lai chuan namèn lo vin ka mut a chhuak a, dawhkan bawhin ka lo muthlu. Dini'n min rawn kheuh zuk a. Ka phu zuk. Sir chuan a tarmit phen atangin min lo melh run a lo nia. Ka va nuih tlawn ta vel. 

Kan nitin nun chu a nawm tho rualin thil thleng danglam a awm vak lo chu a boring fô!  

Zan khat groupa ka pawt hawr hawr laiin number ka hriat ngai loh hian min lo be nawlh a. 

"Hai"

"Hi'

"Groupah i va'n pâwt nasa em em"

"Haha.. Nia"

"I mizia hi a nawm hmel ka ti"

A dp ka en a. Wow! Amah tak tak anih chuan a chhe lo rap mawle. Mahse, keini ai chuan a ú ve hmel deuh. 

"Nuam vak lo" ka ti teh ngawt a. 

"Ka chhiar nui vur vur zel" 

"I awm ve tih ka hre lo a"

"Hre nang, ka awmna a rei tawh mai" 

Thu ho te te sawiin kan inmang tha a. A hming chu Chama a ni. 

Sunday chawhnuah Dini te inah ka va leng a, a roomah inkawmin a movie neih thar kan en pah a. 

"Ka chak ve e tia inhmangaih deuha awm hi" a ti hlut a. A mitmeng nung sar chu ka va melh a. Ani pawh hian keimah ang tho vin hmangaih a la nei bik loin ka hria. Kan serious lo laklawh. 

"Sas zawng ve tawp rawh" ka lo ti a. 

"Ka nei leh mai thei.. Mahse, a la chiang lo. A chian hunah ka hrilh chauh ang che. Kan inbe zeuh zeuh a.. Groupah khan a awm ve" ka pâwt hawrh hawrhna group 'Inbunruahna' kha ania a sawi. 

"Tu nge.. Khawi a hmel" ka ti a. 

Min hmuhtir a. Chama kha a lo nia! Ka nui vur vur. A tha dawn e. A chhe vak lo bawk a. Min lo biak thu kha chu ka sawi duh lem lo. 

"A tha lawm. A fel hmel hi" ka ti a. 

"Ka duhna chhan chu Advocate a nihna hi a nia. Tiang lam hi ka ngaisang tih i hriat kha. Ih, zarkawtah an awm a, an hausa rap" 

"Chuan la confirm theih chiah si lohin in awm tihna"

" umm, a buaithlak tawp. Kan inbe ve reng bawk sia, ka sawi tawp ngam bik si lo va"

"Ka lo sawisak dawn che mi? "

"Ngai awzawng lo. Ka zak e a" 

Kan nui vak vak a. Chama chuan min lo biak leh phawt chuan lo sawi ve hrim hrim ka tum tho. 

Zanah chuan rin ang ngeiin min lo be leh ta ngei a. Sawi tan dan tur erawh ka hre lo ngei mai. 

"Dini nen khan in inhria mi? "

"Tu Dini" a rawn ti a. 

"Ramhlun S a mi kha"

"Ee.. Aw hria ti ila kan inbe ve thin a, ti nge? 

"Ka best a nih kha.. "

"Nih chu, a fel reuh khawp mai"

"Ni ula 🙊" 

"Ti ang lo e a"

"Ti nge? "

"I â em mai" 

Ka nuin min lo koh buai vangin ka reply ta lo. 

A tuk class kan kal chu Dini chu a ngui riauin ka hria. Chama vang a ni thei ang em? 

"Mood off mi? " ka ti satliah a. 

"Mood chhe uih lutuk zawk, Chama'n bialnu a nei a" a ti ta a. 

Ka nghing ve dawt thei. Hmela mai mai chu. 

"A va lerh awm ve leh.. Bialnu nei chunga hmeichhia biak reng te chu" 

"Nia, nizan khan min hrilh a. Ka na ve tawp"

Nilengin a ngui. Ka khawngaih reuh tawp. Tihhlim tumin theihtawp ka chhuah chungin eng a ang hlei thei lo. 

Zanah Chama chu ka va bia a, "Bialnu nei chunga i va biak reng vang khan ka thiannu i tina hle a ni. I lerh ka ti" ka ti hmiah. 

A online lawk lo va, a rawn online rualin min rawn chhang nghal. 

"A beiseina ka tihlawhtling thei dawn chuang si lo va" 

"Chu pawh nise, a hma khan i sawi thei lo mi? Ti nge i va biak reng reng a" ka thinchhia tih a hriat e. 

"Aman min lo be hmasa zel alawm. Mi sual lutuk ka ni bik lo va, ka lo reply ve zel a" 

"Anih tak chu, lo tibuai tawh suh" 

"Aw le.. Nangmah chiah ka tibuai tawh ang"

"I mawl a mi? "

"Mawl ve e"

Ka reply tawh lo. A nghal mah mah. Tlangval naupangchhia pawh a ni tawh lo va. Hetianga inbawl kual vel mai mai. 

Groupah ka pâwt a, Dini pawh a rawn nui ve leh thei ta e. 

"Ka hriatna che a rei tawh, ka cousin te nen in inkawm ve thin vang khan, khata tang khan ka ngaihtuahna i tibuai chho a. Ka ngaihven zui zel che a. Dini nen in inkawm thin tih pawh ka hria. Anihna takah chuan bialnu ka nei lo, ka nghak che" Chama msg anih chu! Zam lo ve leh! 

"Ka duh lo che" ka ti tawl. Block hmiah te kha ka duh ut ut a. Mahse, èmah ka ti leh ta hram a ni. A hmel chu a tha chiang alawm, a ngo hran lo va, a lian khawp mai. Tlemin a tho lam deuh, a dp-a a landan chuan khabe hmul tlem a nei a, a inhmeh riau. A lang pa tawp. Mahse, ka bialpa a ni dawn chuang lo. A ho. 

Khata tang khan a hunawl apiangah min lo text ta ziah a. Ka chhang ngai lem lo. Eng emaw chhan zeuh chu ka nei ve tho, mahse, beiseina ka siamsak duh lo hrim hrim. Ka best friend tinatu hi ka tan pawh hmelma a ni. 

"Kan bultan dan fuh lo hi pawi ka va ti ve aw" a rawn tih chuan mak deuhin ka rilru a dek ve riau a. 

"I chawh" ka va tih teh ngawt a. 

"Nula i ni tawh a. I tawngkam hi uluk ve teh. A mawi lo em mai. "

"I thu lo"

"Ka la thu viau ang"

"Phuihnam ka lo suah ang che" 

"Duhawmnu, ka ta i la ni tho tho dawn"

Duhawmnu, hmelthanu, tetakte, tuaimam tia min koh a ching thin. Eng emaw titak hian nuam ka ti riau. Mahse, a theih loh. Ani leh kei chu. 

Dini pawh groupah a luangliam thin. Chama sawi chhan deuha post siam a ching. Ka lo like hmasa ber ziah bawk. Chama'n min dawt fô bawk. Groupah chuan thian awmkhawm ang chiahin kan inkawm bawrh bawrh a. Group piahlamah chama hian a rawn bei ngawrh viau thung. Ka ning lek lek zel. 

Inkhawm turin ka insiam malh malh a. Dar hmasa a ri val val tawh a, ka tlai tawh angreng. Hmanhmawh phelengin ka chhuak a. Kan thenawm te leh kan in inkarah hian insak lai a awm a. An sak chhunzawm hrih loh vangin a ram lek lek tawh zawk a. Chulai vel chu a thim deuh vangin ph flash light ka on a. Chak zetin ka kal a, engvang teh kher nge mawni in sak lai chu ka zuk chhun kher a! Awii ka thlawk lo chauh. Thenawmten an in ban rinchhana tlangban an siamah chuan, mi hring a lo inkhai vú mai nia! Ka te tuar a. Ka chhun lo thei si lo. A hmel ka zuk hmu chiang em em lehnghal. Kan veng ami tho Zotea, addict a ni chiang. A mit chu a meng kuau a, a rapawm takzet.. Ka te nasat em vangin mi an lo pungkhawm chak kher mai. Rang takin an zuk la thla a, ka khur zawih zawih reng mai. Inkhawm pawh ka thulh ta mai. Ka inthlak lai te chuan ka khur nasa lutuk a, khumah ka han thu leh rih. Hlauhna nasa lutukin min uap run mai. Ka inthlak zawhah ka ú (mipa) nen Zotea te in singsa ve tur chuan kan chhuak ta a. Unau hi panga kan nia, ka naupang ber dawt. Kan upa ber hmeichhiain pasal a nei tawh a, a nau chiah mipa pawn nupui neiin champhai lamah an khawsa a. Ka u chiah mipa leh ka nau hmeichhia nen ka nu leh pate nen kan chengho a ni. 

An in kan va thlen chuan an lo che fel thawkhat tawh viau a. Anu chu a tap rawi rawi a. Ruang lam pawh ka hawi ngam tawh lo. Laklawh zetin an thuk bulah ka lo ding zum dâk a. Nula kan tam vak lo lehnghal. Ka dara rawn khawihtu vang chuan ka phu zawk a. 

"I va dâng em em ve" a ti thum chhak a. He pa hi Chama a ni chiang. A mi dip a na ngei mai. A lian ropui si. A dar pawh ka chen lo. 

"Ka hlau a lawm" ka ti tawp. A nui saih a, "Aniang, i hmelah a lang vek" 

Thutna an lo dah tharah chuan kan thu ta a. 

"In chhungte mi? " ka ti a. 

"Aw, Zotea nu leh ka pa hi cousin an nia" ka lo bu nghat a. 

Ka la pangngai hlei thei lo a ni e. Ka kut chu a rawn hum a, laksawn ka tum, kan inpawt titih. 

"Hlau suh, thlamuang deuhin awm tum rawh. Thawk la la.. Ummm" a ti thlup a. Ka kut chu a hum vang vang a. Eng emaw ti hian ka muang ve deuh. Mi an lo pungkhawm ve zel a. Kekawr nen ka kal avangin tlaivar dawn chuan inthlak ka ngai. Mahse, keimahin ka haw ngam lo. Min thlah tur sawm tur chu ka hmu nual, an la buai ve deuh bawk si. Ka rilru hria niawm takin, "Ka va inthlakpui dawn che mi? " a ti sup a. Hnial duh viau mahila ka mamawh bawk si. Kan chhuak ta a. 

Motora kan chuan lai chuan, "Ka hlauhzia hi aw.. Min lo melh kuau sia.. Awii ka mur" tih pahin ka phu zuk zuk. Hahdam deuhin a nui var var a. 

"A hlauhawm ve ngawt ang. Ka hrethiam a thla a hran phei chuan aw" a rawn ti. Ngei lutukin ka melh, "I mawl a mi? " ka lo ti hlur a. Za fe hian a nui a. 

In kan thlen chuan ka pa pawh kal turin a lo insiam ve mek a. Ka nute bulah Chama chu ka inhmelhriattir zawk zawk a. Roomah ka luhsan ta a. Ka hmai pawh chei tawh chuang lo vin ka thawmhnaw ka thlak zawk zawk a, keimahin ka awm tih ka hrechhuak a, ka hlau thar leh ta. Hmanhmawh zetin ka che sawk sawk a. Ka chhuak ta a. 

"I hlau a ni maw.. I va rei lo ve" a lo ti nghal. Ka nui tawp. 

Thingpui te kan han in leh rih phawt a. Ka nu leh chama chu an titi thei phian. Ka nu lah a tawng duh ve angreng sia. Dini ka call a, Zotea te nena lo inthenawm ve reng tawh an nih vangin a rawn kal ve dawn a ni. Kan lo nghak a. 

A rawn thlena chama a hmuh chuan a bo hú mai. A mitmenga zawhna chu nakina chhanah ka ti. Kan chhuak ta dial a, a scooty erawh a dah a. 

"Eitur lei in duh em? " Chama. 

"Ummm" ka lo ti vat a. 

Dini nen kan chhuk a, kan va lei a. Tawng a chak tawh tih ka hria. Ka mitmeiin ka khap zel si. A hmel erawh a hlim. Mahse, ka buai ru viau. Engmah a hre ve si lo. 

Mitthi inah pawh kan thu ho zel a. Dini chu a laiah ka thuttir lui tlat. Chama lungawi lo hmel chu ka nuih ru tut tut. 

Mawng a kham duh sia, ninawm. Zawi te tein Zotea ka hmuh dan vel chu ka hrilh a, a hlauh ve hmel khawp mai. Ka ph a rawn ri a. Hmela mai mai chu, min rawn call vel. Ka reject a, whatsappah ka lut a. A msg a lo lang nghal. Thuru titihin ka'n chhiar hram a. 

"Ka bulah thut ve mai tur che nia. I plan ve hi ka duh bawk lo" a rawn ti. A number hi, "Mawlliana" tiin ka save a. Hmu se a duh lo ve ngawt ang. 

"A hlim em hi. Be tha rawh" tiin ka reply. 

"Beiseina ka siamsak duh lo. Nangmah lawm ka duh che"

"Ti suh. I ninawm"

"Ka haw dawn.. Ka hah" 

Ka reply tawh lo. Zai a har si, thu an sawi sek a. Mitthi lumen hi thil nuam zawk zawk chu a ni lem lo. Mahse, mizo nunphunga thil duhawm tak eraeh a ni lawi si. 

Zing dar 1 velah eitur an rawn sem a. Kan ei ve lo. Thingpui erawh kan in. Kan chhuak a, zunram te kan thiar a. 

"Naktukah zin ka ngai sia, ka hawnsan mai ang che u aw" Chama chuan a ti a. Dini ngui rawih chu ka hmu thei. 

"Kei pawh thawh hma ka ngai sia, haw ve mai ka duh. B, i thinrim ang em? " a ti ve. 

"Rim lo e, a rei tawh dawn chuang lo va" ka lo ti a. 

"Cham, min thlah mai rawh aw. Scooty chu awm rih mai rawh se" 

Chama hmel dur deuh khap chu ka melh ru ve reng a, a phur lo tih ka hre thei. Dini pawh mak ka ti ve deuh, tlaivar turin a rawn chhuak ve reng sia. Chama vanga haw ve leh ngawt chu. Mahse, lungawi lo angin ka lang duh chuang lo. Chama chuan min lo melh a, chuta a mitmeng chu ka hrereng thin. A bialnu la ni lo mah ila a mitmeiin min rawn tlat! Ka lo bu nghat a. 

An haw ta. Ka ruak huai mai. Lalkawka te ho bulah ka thu ve ta ngawt a. Ka muthlu zauh zauh. An haw atanga rei vak loah an pahnih msg ka dawng nghal. 

"A cool tawp, ka duh telh telh, a polite si. Motor tangin a chhuk a, kan veranda thleng min thlah thlap mawle.. Ka â lo chauh" Dini msg a ni. Ka thaw halh a. Ka chhungrilah hian eng emaw a awm chiang. Ka sawi thiam si lo. 

"I plan a flop aw. Lo kal leh mai ka duh eee.. Dini a haw tho bawk si". Chama. 

"In va thlah tha thei maw"

"Deuh kher a che"

"An veranda thlengin i thlah thlap a. I fel thin" ka sawi loh tawp tur ka sawi. Ka thíkthu a ni tawh. Hei chu. 

"I thík ve a mi? "

"A teuhvang" 

A reh daih. Ka text tawh awm bik lo e. 

"B, chama nen khan engtin nge khatia in lo awm dun theih. Hria angin i awm ngai bawk si lo va"

Dâwt tlem phuahbelhin ama tana bei anga insawi siin ka type teuh. A awih ve aniang, 😘😘😘a rawn dah tuar. 

"Zai ta che" ka beng bulah a rawn ti sup a. Ka hmuh thut avang chuan ka au tep. Ka ka a rawn hup. Kan thutna hi a hnung bawk a, min hmu thei an tam vak lo. A rawn kal leh, mawlliana hi. Chutah pawh tawt chung chungin ka thutna a rawn pan leh. Dini'n a hria ang tih ka va hlau eee.. Ani nen chuan zan kan tumtawi ta a. Thil hrehawm zawk zawk a ni hauh lo. Zingah hmun te ka phiahfel hnuin min thlah haw leh ta a. 

"Hlau miah suh. Mitthi hlauh chu mahni inhremna ania, tikhan tui takin i va muhil dawn nia" a ti a. Ka chau khawp mai. 

Khawhar in lenah pawh a rawn kal ve zel a. Dini pawh a rawn lang ve zel bawk. Awmkhawm lai chuan thian inkawm angin kan titi bawrh bawrh a, kan rilru erawh a dang theuh si. Ka inthiam lo va, ka inngei bawk. Ka rilrua chama a len ve tak deuh avang chuan.. 

Dini lahin ka lakah beiseina a nei sang si. A beisei tisang tur thil han hrilh tur lah ka nei ngai bawk si lo. A va hahthlak e aw. 

"Dini hi ka hrilh mai dawn aw" a rawn ti a. 

Awii ka phal lohzia chu rapthlak zawk. La inngaizawng lo mah ila, Dini hriat ka duh lo hul hual. 

"Min lo be ve reng bawk sia. A khawngaihthlak alawm"

"Duh ve mai la.. Eng nge"

"A theih ngawt bik loh. Ka duh hmasa tawh che alawm"

"Ka duh ve chuan loh che hi"

"Min duh tawh reng, i sawi hreh anih kha.. Dini vangin" 

A sawi dik tlat! Ka awmdan hi keipawn ka duh lo. Nuam ka ti lo. Dini lakah ka inthlahrung ngawih ngawih bawk si. Hmela vang vek a ni. 

Tlawngah kan kal dawn a, Dini chuan a lo sawm ve chu niin. Ka kal ve dawn vangin a lo aw ve ngawt lehnghal. Ka ning, inthup a ngai thei si. Kan thian dangte pawh chuan an nel nghal em em a, amah a felin mi kawm a thiam si. A hna avang hian mi hriat a hlawh ve zèk a. Ka thiante pawh chuan an lo hre fur tawh. Dini bialpa angin a lo kal thung. 

Tui kan chen lai chuan thla a lo la mawlh mawlh a. Dini chuan a zui zel tawp! Ka hmu kham tan lek lek mawle. Chuti em em chuan a lo duh a, chuvang chuan inngaizawng chi kan ni lo. Kan inthianthatna a chhe thei tlat. 

Tui a rawn cheng ve a. Kan hlim hlawm kher mai. Beer an in sap sap a. Kei pawn ka keng ve ran mai, ka la hawng lo thung. 

"Khawi ka lo hawng ang"

"Ka thiam ve"

"I thiam lo ka ti lo.. Khawi" a ti hmuk a. Ka pe ve mai. A hawng dawn emaw ka tih laiin, a paih daih mawle!  

"Hmela" ka ti tuar a. 

"Bialnu beer in ka duh lo" 

Hmm.. Ka hah. Hepa hi. Tui pawh ka cheng peih tawh lo. Ka lo thlir vel mai mai a. Dini chu a bulah a kal ve zel a, tui chen te pawh an inzirtir nasa. Ka ner sawk. Ka rilru hi ka duh ta lo hle mai. Thíkna ka nei tlat chu.. 

Min rawn en zauh zauh tih pawh ka hrereng. Eirawng ka bawl ta daih a. 

An rik nuai nuai avangin ka va tlan vat a, tui tla an awm chiang. Dini.. Kareii… 

Rang takin ka va tlan phei a, ka va hleuh pap pap, mahse, chama'n min hmakhalh. A va chhar a, a zawi nguai mai. Mahse, a thi lo tih ka hria. A kaah ka ham a, a pumah kan nem sawk sawk a, a hnungzang nen. A rawn harh ve leh thei ta a. 

"Changtupain changtunu a chhan chhuak, a va ropui em" laltetea rui pheng chuan a ti lawng lawng a. An nui dar dar mai. Chama nen chuan kan inmelh kawk a, ka mitmeng a chhiar thiamin ka ring. A mitmeng erawh a thúk lutuk a, ka pawh pha lo. 

Chaw kan ei laiin, "Awii mate, chama hi ka tan a hlu zual tawp. Ka damchhungin ka rul zo tawh lo vang" Dini chuan a ti a. Chama pwh kan bulah a thu ve reng a. 

"Kha te chu tu pawh nise kan tihtur a lawm. A ho lutuk. Inrulh chi pawh anih loh kha" chama. 

Ka ngawi reng thung. Ka mawl aniang sawi tur ka hre lo. Chaw ka bar mawlh mawlh. Hawn lamah puia carah ka chuang. Ka thei tawh lo. Rilru ippik reng reng leh inthup chunga cara chuanho kha. A lungawi lo tih ka hrereng. Ka chuang lui tlat si. Dini nen an pahnih chiahin an haw dawn. 

"B, ka lawm e.. " Dini a ni. Chance ka siamsak angah a ngai tih ka hria. A pawi chai lo ve. In ka thlen chuan ka inbual sawk sawk a. Ka mu daih. Ka chau lutuk. Ka lo muhil a, ka ph riin min tiharh a. Chama a lo ni. 

"Lo len ka tum asin"

"Ka chau em mai. Ka muhil duh tawh"

"Aniang, i tawng dan tang pawn a hriat. Muhil rawh. Kei pawh hna khawih tur ka nei a, ka khawih zo anga, ka mu ve ang. Muttui suk suk aw, ka naute" a rawn ti a. Ka lunghnur tawp, hei pangchang deuhin ka awm ka sawi thiam lo. 

"Hmm.. Muttui le.. " ka ti a. Dini msg pawh ka chhiar peih tawh lo. Ka muhil leh ta bawrh bawrh a. 

Nitin hian Dini chuan thu thar ni chiah si lo, chama lam pang hlir hi min sawipui ziah a. Hrehawm tiru deuhin ka lo ngaithla thin. Friday tlaiah dine out turin min sawm a, Dini tel lo vin. Sawi tur ka ngah ve tawh em vangin ka remti a. Min lo lam a. 

Sawi tan dan tur ka hre lo. 

"Dini hi engtin nge niang le? " a hmela ngenngawlna lang chhuak chuan min hneh tawp. Ka khawngaih deuh. 

"Ka hre bik lo, keipawh ka buai vek tawh"

"Hrilh ka tum lahin i phal bawk si lo va"

"A nawm lohzia i hrethiam lo nih kha"

"Nia, ka hrethiam tho mai. Ka thiam loh a ni. Dini kha lo biak that ve lèk loh tur a nia. Ka lakah hetiang rilru a put hi ka ring lo lutuk a"

"I chanchin hlir a sawi bawk sia.. Ka ning eee" ka ta hlawl a. A nui deuh a. 

"Ka block dawn mawni le ka ti" 

"Ngai lo. Tha deuhin hrilh leh la, keimah min sawi tel chuang lo vin".. Ka tih mek lai chuan, "Lal B.. Ehe.. Chama pawh.. " rawn ti hluttu lam chu kan hawi rual thawt a. Dini. 

Ka hamhaih vek, ka inthlahrung bawk si. 

"Eng nge intih zawk? " chama chuan a lo ti vat a. 

A makti mitmenga zawhna chu ka chhang thei dawn si lo. Thluak hman a ngai. 

"Ka hrilh lo che a. Thinrim miah suh, Ka zak tawp. Ka thianpa nen chhuah dun kan tum a, a lo kal leh si lo va. Chama hi a rawn kal ta hlauh zawk alawm. " ka ti tawp. Chama nur hmel chu ka haider lui a. 

"Tu nge chu pa chu? "

"I hre lo vang, Bethlehem a mi ania, aman min sawm a, engmah sawi lo vin a rawn ka lo tawp. A thing tak tak a ni.. Tu nen nge in chhuah zawk? " ka ti nghal zat a. 

"Nuteii fapa Apuia nen.. A rawt tlat a. Hei a mah pawh" tih pahin kan lam pana lo kal mek chu a kawk zauh a. Apuia a tih fo chu a thlalakah ka hmu tawh. Keimahni ang rual tho, harhvang ve tak a ni a. A hmel pawh a chhe lo khawp mai. Min inhmelhriattir a. Kan dawhkan chu an rawn kil zui ve nghal a. Remchang an tih zawk vang a ni mahna. 

"Cham, naktukah min chhuahpui hman ang em? In office-ah tihfel tur kan nei a, min buaipui la" Dini. 

"Theih lohna chhan tur a awm hleinem. Boss" a lo ti nghut a. Kan inmelh zawk. Boss han tih kher.. 

Apuia chu a tawng ve vak lo. Min melh leh zauh thin chu ka hrereng. Kan sawi tur pawh sawi zo hman lo vin hun kan hmang ral leh ta chu ania. Hahthlak e. 

Zanah Apuia khan min lo be nawlh mai. 

"Dini hian a sawi ziah che a. I chhiat lohzia a lo sawi tel ngai lo va" a rawn ti. Vak vaka. Kan inhre ve chauh a. 

"Mate, Apuia hian a sawi reng che nia aw. Ni daih ula" Dini leh bawk. 

"Apuia khan a melh tai khawp chein ka hria. Ka ta i nih kha aw" Chama ve thung. Awiii ka khawvel hi a buai eee.. Movie en daih ang. 

A tukah chuan Dini te chu a buaipui a, chanchin min rawn hrilh zel vangin ka hre ve. Ka thikthu ka tilang ngam si lo leh ngaihzawng tak tak anga kan la inzawm chuang si lo laklawh kual vel lai hi ka ning si, a nuam tho bawk si. 

Zanah Apuia a lo leng ngei. Chama lo la lang lo se chuan ka be chhe miah lo vang. Mahse,, hmakhalhtu a nei tawh tlat. Thian angin ka bia a, titipui eraeh a nuam phian. Chama erawh a reh hrih. Hun remchang a hmuh veleh Apuia chuan min bem nghal mawlh mawlh. A zak thei lo ka ti mang e aw. Pangngai takin ka hnar a. A rawn lang chhen ang tih ka hlau. 

Mut dawnah Chama'n min rawn bia a. Am hna a laklawh thu te a sawi luam a. Apuia lo len thu ka sawi chuan, a thinrim vel. 

Dini lahin ka hriat tawh hnu tho an vawiin hun hman dan min rawn hrilh bawk a, Apuia chu chhang ve turin min nawr nasa, ka duh der si lo. A cousin ania, ka duh loh thu sawi bawl ka hreh ve bawk si. Biak thin ka neih thu hmangin ka tlip tawp. Awih tak ang maw.. 

Chuti ang chuan kan khawvel chu a kal ve bek bek a. Chama lahin a duhthawh tullh tulh si, a rawn leng zauh zauh a. Aw ka la pawh chiah si lo, ka awmdan a hai tawh chuang bawk si lo. Thil hrehawm tak a ni. Dini lahin Chama a beisei sang tial tial a, pawisak a nei lo telh telh bawk. Zan khat phei chu Tlawnga kan kal tuma an pahnih thlalak dun chu statusah hmangin, "Keimah ta bik ❤" tiin caption a siam! Ka sa ve zawk thei. A kal thui ta lutuk a ni. Kawng dang ka hre der bawk si lo. 

"Dini status saw i hmu tawh em? " ka va ti a. 

"Hmu e, ka ngeizia hi. A zak lo e"

"Dik tak chuan beiseina hi chu i siamsak ve aniang, hetiang em ema ngampat te chu"

"Ka hrethiam lo. Ka be chhe hran lo va. Inngaihzawnna lam hi ka sawipui ngai lo hrim hrim. A mak ka ti keipawn" a ti ve tawp. Nia an inbiakna ka chhiar fo. "Ka mu chiah" "kal dawn chiah" 'Eikham chiah e" tih vel bakin an inbe chuang lo. Chama'n a biak hmasakna ka hmu miah lo bawk. Report petu chu Dini vek. 

Vawiin chu Hmuifangah kan leng dawn a. Chimbuaitu kan nei tawh em lo vang chu. Kan inbe tam lo naa kan inhaw hran lo. Kan thleng a, kal an lo awm ve nual a, eitur te kan han ei a, inngaizawng ang chiahin a ni kan awm ni. 

"Kei chu ka tuar thei tawh thlawt lo. Hetia awm hi. I puangzar tawh mai ang" a ti ta thlawt a. 

"Ka hreh em a ni. Thiante bialpa chhuhsak ka ang dawn em asin"

"Thil i ngaihtuah kual vak a nih kha.. I chhuhsak lo, mi thil kan chhuhsak chuan an ta a lawm kan chhuh thin. Dini ta ka ni ngai lo va, amah zawkin min ta cheibawl ve mai a ni. Dini lakah engmah tihsual i nei lo. Keiman duh ka thlang a, ka duh che a ni mai" 

A sawi dik ve reng. Mahse, Dini bakah mi dangin mak an tih dan tur leh min ngei dan tur hi ka ngaihtuah ngam lo. 

Haw lamah chuan inngaizawng kan ni ta. Rilru chu a nuam chiah lo nain ka duh ve tawh lutuk bawk si. Min care a, min zah thiam a, min duat tho bawk si. Kawng reh laiah a ding a, min fawp tur ringawtin.. 

"Ka nghah reizia che hi e i hrethiam pha ngai lo vang. Ka fawp dawn che ania" a tih zawh rualin min pawt hnai a, min fawp ta ngawih ngawih a. A thúk takzet. Kei pawn ka lo kuah let ve a, ka fawh tur dik tak fawp angin ka inngai hmiah. A hrehawm zawk zawk loh hle mai. 

Kan tlan leh hnu chuan, "Kha Apuia pawh kha raen leng tawh suh se"

"Hm.. Ka khap theih a ni hleinem"

"Chhuanlam siam mai rawh"

"A ho e, lo leng ve ang hmiang, kan ni chuang hleinem"

"Ka bialnu, mipa dangin an rim hi ka phal lo hrim hrim, a rawn len lahin rawn len ve i phal ngai bawk si lo"

"Dini bulah a sawi dawn asin"

"Dini.. Dini.. Ka kham, ka hne lutuk" a ti hluk a. Ka lo nuih kiah kiah. A titau hmel chu a tha tawp. 

Ka nun chu hlim khatin a hlim a, Dini ka ngaihtuah chhuah apiangin ka ngui leh zel. Inthup theih loh chin a la awm ngei dawn si a aw.. 

Exam zawh ni a ni a, kan bazar kual a, Chama te kan tawk thut. Hmeichhia nen an ni. Ka nghing ve deuh. Thinrimna chi a ni bawk si lo. Kan inbe luam a, kan inkalsan nghal a. Kei aiin Dini a túm lian zawk. 

"A bialnu chu anih ngei dawn kha" a ti nghat a. 

"Hmana a sawi kha maw"

"Aih, nizan hmasa mai khan bialnu a neih thu a rawn sawi leh alawm.. Amah be tawh lo turin min tia, a bialnuin min thik a hlauh vangin"

"Min hrilh si lo va"

"Nia, hrilh che ka tum lo pawh ni lo" a ti ringawt a. 

"Nia, Din, i rilru tina lo la, chama lo pawh hi i hmu dawn tho a, bansan mai hi a thain ka hria" keimah inhaw chungin ka ti a. 

"Nia ka tum ve nasa lutuk biak loh hi ahar em alawm.. " 

"Block hmak la" 

"Nia, a ngai" a hlim lohzia ka hrechiang khawp mai. 

Zanah a lo leng a. Kha hmeichhia kha a ní fanu, phaia awm reng thin a lo nia. Ahmaa a ph ka checkna vela an inbiak dan ka hmuh tawh vangin ka thik lem lo. Ka chanchin leh kan dinhmun khirhzia te a lo swipui ve a. Chuvang ania vawiinah pawh khan min hria anga a awm duh bik loh. Dini kha a awm ve sia. 

Dini nen kan inbiak dan te ka hrilh ve a, "Ka khawngaih lo pawh a ni lo. Mahse, tu emaw chu kan nat a ngai tho tho dawn a" a ti a. Apuia a lo lut.. 

Pangngai takin kan inkawmho a, "Chama chu Dini nen in intithiam lo a mi? Chaw pawh a ei duh lo. A tap in ka hria " Apuia chuan a rawn ti a. 

"Intithiam lo tur pawn kan inngaizawng lo alawm" ka sik vâwt vâwt a, a hre lo der hmiah. 

" Ehee… in ni maw ka tia. A va mak" a ti nuah nuah a. 

"Bialnu ka nei alawm" a lo ti leh hmiah. A sawi zawm ka hlau lutuk chu thu dang ka sawi khalh tawp. Min melh no vak lo lehnghal. 

Mut dawn a ruaiah kan inhau hrep. Apuia lakah kan relation zepah min ngai a, ka duh ve vangah a ngai. Keiin Dini ka venthawn vang tiin ka sawi a. Kan inhnial ve nasa. Mahse, a mipa zawk na nâ na chu a tlawm zawkah a tang leh thei ta a. Kan inmang tha thlum ve thei hram. 

An inah te pawh min lenpui tawh. An fel hlawm khawp mai. Mahse, ka zak. An hausa si. Dini hi venthawn theih loh hun kan la nei dawn. Chu hun chu ka huphurh a ni. 

"B, i thiannu hi damdawiinah kan kalpui a, i la hriat loh takin ka tia ka rawn hrilh che" Dini nuin a rawn tih chuan ka phu zawk mai. 

Rang takin ka han chho ve a, ka lo ngaihsak tha tawk lo chu ka inthism lo ngawih ngawih. Chama pawh ka hrilh ve a. Rawn kal a tum kha. 

Dini chu a lo mu hlun a, a khawsik rehthei lo vangin an lo kalpui a lo nia. Chama hian tel vena a neih ngei ka ring. 

A muhil hrih a, riahpui ka tum bawk nen. Chama nen kan thutpui a. A chhungte erawh mamawh lamin an chhuak hrih a. 

A rawn rum tiah tiah a, a lu ka dawm vat. A rawn meng diar diar a. Chama chu a melh ta vawng vawng a. Chama awmngaihna hre lo chu ka khawngaih tawp. 

"I ril a tam em? " ka lo ti vat a. A lu a thing a. 

"Chama hi biak ka duh, a falin" a ti sap a. Ka hrilhhai tawp. Ka chhuak ta a. Ka zauthau deuh. Eng tak sawi ang maw.. 

Chama'n min lo koh chuan ka va lut a, Dini lungngai hmel chu hmuh a va hrehawm tak. Chama pawh helhkam nei hmel a pu ve tho. Apuia a rawn lut ta hlauh a. Kan boruak a rawn tizangkhai ta. 

Zanah chuan a khawsik chu a awm tawh lem lo naa a muhil hleithei lo. 

"Mate, ka lo hmangaih hle anih dawn hi. Khatia bazara ka hmuh dun atang khan ka kaah hian engmah a tui thei tawh lo. Ka na lutuk, ka be chak si, ka be ngam bawk si lo.. Hei hi hmangaihna chu a nih ngei dawn hi… mahse, ani chuan bialnu a nei si" a bianga mittui luang zung zung chuan min va tirethei tak em.. Ka inhumruh a. Ka thiantha ber, ka tana ui nei ngai lo, puih ka ngaih laia tlanchhe ngai lo hi ka phatsan ang maw.. Ka thei lo. Ni lo, ka tawpsan a ngai. Ka pe thei lo anih pawhin ka chhuhsak lo vang. 

A tukah Chama ka be nghal a. Kan inhmu nghal. Khatia a fala an inbiak khan Dini chuan vawikhat chauh inngaihtuah thaa a thinlung hrethiam turin a lo ngen a. Ani erawh lungpui ang maiin a khauh fun thung a. Bialnu a neih thu bawk a lo chham khum leh niawm a ni. 

"Cham, ka thei tawh lo. Tawpsan mai ang. Ka kalpui thei tawh lo" ka ti ta thlawt a. 

"Tawpsan leh hni hne turin ka zui lo che. Tawp mah la, ka tawp ve dawn lo" a ti chang fak a. 

"Ka thiantha ber mittui a far asin. Heng zawng zawng phenah hian kei a thiantha ber hi ka awm tih a hriat chuan a damchhuak zo lo vang"

"Hahdam teh, bawihi, Dini chu a thi lo vang. Mahse, tlemtè chuan in inthianthatna chuan a tuar ve deuh ang.. " 

" chu chu lawm ka duh loh chuuuuu" ka au a ni ber mai. 

"Relax.. Bawihte, ka hrethiam che.. Ka hrethiam lutuk che. Ka ngaihtuah lawk vek tawh. I inhuamnaah a innghat. September thla atang hian traning tenau ka hmachhawn dawn a. Delhi-ah ka chhuk dawn. Nang pawn i lo zir zo ve chiah anga. Ka rualin i chhuk ve ang. Duh leh eng emaw i zir ve anga.. Tibuaitu kan nei tawh lo a ni mai. Kum khat kan zuk awm hnu chuan Dini pawh a lo dam tawh anga, engkim a tha vek tawh ang.. Um.. 

. a tha em? " 

Ka melh kâwk a. Ka thaw hap ringawt. He pa hi ka duh tawh lutuk bawk si. 

Dini pawh damdawi hmanga mumal taka enkawl a han nih takah chuan a tha chho ve zel a. Apuia pawhin min la rawn hnár ve reng mai. Kan thuruk a hriatchhuah hlauin kan be chhe ngam bawk si lo. 

Hun a liam a, Chama nen pawh kan inhmangaihna a pung deuh deuh zel a. September kan chuangkai dawn ta. Min nawr nat em vangin ka nute ka sawipui ta nge nge a. Zep hni hne kan nei ngai lo bawk a, a chinchhuakin engkim ka hrilh vek mai. Min hrethiam a, min khawngaih bawk. Chama hi an iai lem lo bawk nen.. Delhi-a hna chhete thawk tur chuan ka liam thla ve ta. 

In kan luah a, ka chhungte bulah erawh hostela awm angin ka insawi. Nupa angin kan awm ta chu a ni ber e. Kan induh tawnna a nasa si a. Kan inchhir miah lo. Kan hlim em em reng a ni. Dini nen pawh kan inbe zeuh zeuh a. Bialpa thar a tawn thu kan hriat nia kan hlimzia kha. Kei ai mahin Chama a hlim zawk awm e. 

Thla ruk zet kan awm hnuah ka ruak ta lo nge nge a. Ka mangang ngei mai. Ani erawh a lawm tih ka hria. Ka ngei bawk si. Chhoh en hâ chungin, "I thiltih hi engtin nge kan tih dawn? I hur vang anih hi" ka ti chiam a. Min nuih suk duh chauh. Ka inrin hmain min pawm kang lawp a, min virpui chiam ringawt. Ka rak tuar tuar a. 

"Ka ta diktak i ni ta" a ti a. A ruk tak chuan ka hlim ve tho mai. 

Ka nute hrilh ka hreh em em a. Amah engkim a ti ta vek. A thil zir a zawh law law huna man leh mual inhlan turin kan inberem ta kha a nia. Hringnun hi ka dream angin ka hmang lo. Mahse, a nuam lo chuang lo. 

Dini'n a lo hre ve ta a ni ngei ang le.. 

"B, ka thu hriat hi khawvelah mak ka ti ber ang. Min lo bum char char a ni maw? " tih chu.. 

"Min ngaidam rawh. Kawng dang kan nei thlawt lo a ni. Tihnat che kha kan duh bik lo asin.. "

"In la hre viau ang" min block ta hmak. A va hrehawm. Ve. Ka tawrh tur a ni tho a, mahse, ka na viau tho. 

Ni khat ka pum a nuam lo deuh a, ka mu a. Chama a lo la haw dawn bawk si lo, nau ka chhiat mai ang tih te ka hlau ru viau. A rawn na tulh tulh lehnghal. Ka call ta nge nge a. Thlansa phulkaiin a rawn thleng, hospital kan pan ta chuk chuk a. Ka hlauh ang ngeiin ka nau pai thla 3 tlin nan kar khat a la ngai tih chu a ral ta. A awm ta lo. Na ka ti ngei mai. 

Doctor te chuan ka pum chhunga damdawi, nau tihtlak nana an hman thin an hmuh thu an sawi a, a ngaihna ka hre lo. Chama a thinrim, min mawhchhiat vek a. Kut min thlak duh hial khawpin a thinrim. Chutiang damdawi ka ei loh thu bak sawi tur ka hre si lo. Mak ka va ti tak. 

Mahse, mut hmuna ka ngaihtuah ka ngaihtuah hnuah ni 2 liam taa ka hnaa ka kal, ka haw lamin ka mizopui, ka hmelhriat tha em em Zoremi te nena thil kan ei kha ka hrechhuak ta a. A tirah ka ringhlel a ni lo, zoremi leh Dini hi an pate unau an ni tih ka hriatchhuah tak avangin ania ka rinhlelh tak. Khami ni ber khera zoremi'n tihtakzeta thil eipuia min sawm kha mak ka ti, kan ei hmain wash roomah ka kal kher bawk si. A chiang tawk viauin ka hria. 

Chama ka hrilh a, a ngaihtuah ve vung vung mai. A tukah Zoremi chu a lo va hmu a, advocate ngang a ni bawk a, a dawp thiam nasa si. A inpuang ta vek a. Dini tihtir anih thu te a sawi ta vek a. Rapthlak hian.. 

Chama pawh ka lakah a thinrim ta lo. Mahse, ka rilru a na thlawt. Dini chu biak ka tum, Chama'n, " a sarhu lai chuan ngawih chuh hrih ang. Kan haw tep tawh tho a, hmaichhanah kan sawi dawn nia" a ti a. Ka insum leh hram. 

Kan haw chhoh nan ni 4 lek a awm ta. Ka phur rualin ka huphurh bawk. Ka insiam nitin a, Chama nuih hi ka tiza thin khawp mai. 

Ticket pawh kan book vek tawh bawk a. Zaninah dinner min leisak dawn a, ka nghak mek. Ka inpeihna a rei tawh mai. A ni leh ni lo angin a rei ve phian. Ka call a, a off ve teh tlat bawk si.. 

Ka ph a rawn ri a, ka la vat, Vai tawngin a rawn tawng a, "Accident a tawk a" tih thu chu.. Ka tlu thlawrh mai. A thim vek. 

Ka harh chuan Zoremi leh a thiannu niawm tak leh vai thenkhat an lo awm a.. An hmelah chuan helhkam lian tak a lang a ni. 

Ka tho a, khaw nge Chama a awm ka zawt a. Tuman min chhang lo. 

Ka au vak vak a. Mumalin ka awm lo. Kan thenawm vai ho chuan min lainat hmel zetin min en kuau hlawm a,. 

A tawpah Zoremi chuan hreh hmel zetin, "U Chama chu damdawiin atangin a bo a.. " a ti ta a. Däwt muhlum anih chu ka rilruin a ti a. 

"Eng tin? "

"Truck nen an insut hnu khan hospitalah an hruai a, mizo nurse a awm ve a, min lo hrilj vangin ka va kal ve a. A hliam na viau naa a damchhuah ka ring. Ka buaipui nghal a, a mah erawh a harh lo. Doctor ten buaipuiin an singsa a, kei pawh nangmah hrilh turin ka rawn kal a, mahse, i lo tlu reng a, nikhua i hre bawk si lo. Chuan i rawn harh hma lawk khan ka thiannu nurse chuan U Chama bo thu min rawn hrilh leh a ni" 

Ka tap lo va. Ka nui hek lo. Engmah tih tur ka hre lo. 

Zoremi chu ka nau pai a lo tihtlak avang khan a inthiam lo a, tha takin min buaipui a ni. Mahse, ka bialpa hi khawiah nge a awm? Dini thiltih leh bawk em ni ang? Zoremi. Chuan Dini tih a nih a rin loh thu a sawi thung. Theihtawp kan chhuah a, Chama chhungte leh ka pa te pawh an lo thleng thla ve. Kan buai takzet. 

Kei chu ngaihtuahna mumal ka pu thei lo. Chama chu hmuh leh ka inbeisei tlat a ni. Ka pasal a la ni ngei bawk ang. 

"Hmangaihten min phatsan chuan, hmangaihtu hian engmah pawisak a nei ngai lo. I pasal hual hi ka ta a ni tawh e".. Number hriat ngai loh atangin msg. Ka dawng. Ka call a. A off leh tawh. Dini… dini ngei a ni. 

Inbeihna chu a thleng ta. Tu nge chak zawk anga, tuin nge hnehna chang ta ang.. Tunah chuan ka hmangaih ber nei let leh turin ka pen chhuah a ngai ta. Hmangaihtu ve tho ka ni. Ka chak ngei tur a ni. 

Mizorama haw turin kan in chu ka chhuahsan ta a.. 

(Awii in chawh leh tawhzia hi 😂😂 in ui tih ka hria. Tikhan Dini emaw B-i emaw kha lo chaktir ve tawp ru.. Keipawn a chak zawk ka hre lo. Hun ka nei ta lo…)