Escape 7

ESCAPE (7)

Ziaktu: Toni Râlte

Inspector Sangliana chuan a hmaa thu tlangval pahnih chu a melh ran a. 

"In chiang maw? Zomuansangi ngei hi a ni maw? " tiin a han zawt nawn leh a. 

Rama tia insawi zawk chuan, "Aw ka chiang viau mai. Sir, dik tak chuan kan rui lungpuam khan kan han chhaih vel a, a hlau deuh nge a tlanchhe ta daih sia. Kan va um a. Engtin tih kan tum hran lo. Mahse, a tlan zel sia.. Khawiah emaw a lum hlum a ni maithei" a ti a. A irh uk uk ringawt. Sangliana chuan mak a ti ru viau, lehlamah chuan chumite chu an fel angreng te pawh a ti a. Report nachang an rawn hria chu. An sawi hmangin Zoi te nen hian Shillong zan tlan tur Sumo-ah chuang hovin Aizawl daia an din khawmuan chhungin a tlanbo daih niin an sawi a ni. Zomuansangi thlalak an tar chhuah atanga an lo hmuh a niawm e. 

Ramsanga leh a thianpa Tea te hian thlalak an hmuh rualin kha nu ngei kha a ni tih an hre thei ta a. A tirah chuan an inhnial ve bap bap mai. A chhan pawh kha nu tlanbo chhan kha an chhaihbuai vang a ni tih an hre si a. Mahse, Tea hian, "Engpawhnise kan lo tidik lo em a ni. Keimahni vanga a thi a nih phei chuan tualthat ang kan ni dawn a. A thih leh thih loh fiah nan pawh report ngei chu a tul a ni.. Kal phawt mai ang.. Kei zawng vawiin thlengin ka la inthiam thei lo" tiin a nawr ve a. An thian dangte erawh hmun dangah an awm avangin han rawn theih an ni lo. Tichuan, Rama nen inthurualin Police Station lam an pan ta a ni. Kawngro a su êm ang chu.. 

Tichuan, a bona hmun nia an sawi lamah chuan Zoi thenrual thenkhat bakah Police te chuan an va zawng ta a. Pu Liantawna rilru erawh a kal thui ngang mai. A fanu chuan pasal neih a duh loh vangin a tlanchhia a, a tlanchhiatna kawngah lambun ni lehin zan thim hnuaiah hlau tak chungin a tlanchhe leh ta chu a ni si a. A khawngaih piah lamah a ngaihtuah takzet. A lo tlu hlum reng te a nih lek phei chuan.. A ngaihtuah zawm ngam lo. A bo tirh kha chuan a fanu laka a thinrimna avang khan ngawhngawl a chhuah lui kha a nia, a lo haw ve leh mai a beisei bawk nen.. A rilru a zing mup mup mai. A u fapa a chhuan ruk em em Hmingzuala lah thah a ni a, chuta karah a fanu a awm bawk si lo. A zan muhil thei lo nghawng nge a taksa te chu a tla dûk mai. Zoi sulhnu chu a rualrem loin lui kawr niawm tak takte pawh a awm a. Ruah a lo sur tawh vangin ke hnuhma leh eng sulhnu mah hmuh tur a awm lo. An hmalam panin an kal zel tawp a, He an thiltih mek hi tlangzarh an duh loh vangin mi nawlpui chuan an hre hauh lo.

"Ehe! Hei kawng a lo awm reng mai" Pu Liantawna te thenawm tlangval Chhana chuan a ti hlut a. Chu lam pan chuan an kal dual! Kawng chu motor leng vela zau a ni a. Kawngpui a han pawh tih a hriat theih. Tin, kawngpui a han hla miah lo tih motor tlan thawm ralkhat hriat theih danah chuan a lang bawk. Chu kawng lo awm ruah chu an zawh ta ngawt a. Rei pawh an zawh hmain thir gate lian angreng tak rinawm hmel zetin a lo dangchat ta a. A ngaihna an hre lo ngei mai. 

"Tu emaw huan a ni ngei ang" Constable Patea chuan a ti a. Gate chu a lo inkalh bur si. Sangliana chuan a sawi ta nghek nghek a. Thawm pawh a ring tha duh kher mai. Ui a rawn bauh that that a, Reiloteah kawngka pawh a rawn inhawng nghal. Palian zet hi a rawn phei a. Sangliana lungphu a dik lo. He pa palen dan hian a ngaih a titha tlat lo. Palian an zawn mek laia ani a tel ve lo chu.. Ni e, he pa hi an hmaih awmchhun a ni ngei ang. 

"Eng nge ni ta " a rawn ti dam thlup a. Kum 30-34inkar vel chu a ni ngei ang. A aw pawh mipa a ni tih hriat tak a ni. 

"Min luhtir rawh" Sangliana chuan a'n ti thâwr a! 

"Aw le" tih pah chuan gate chu chhunglam atang chuan a rawn hawng a. An lut nghal huk. 

"Eng nge in duh? " a ti leh a. 

"Thil eng emaw zawh lek che kan duh a ni.. In chhungah lut ila" a in neitu zawk niawm takin Sangliana chuan a ti leh a. A rinhlelhna chu a thup rih hram hram. 

An inzui lut ta a. In chhung chu an rin aiin a changtlung. 

"Nula pakhat kan zawng a. A hming chu Zomuansangi a ni a, hei hi amah chu a ni" tiin thlalak chu a hmuhtir a. Ephraime chuan a melh vang vang.. 

A lu a thing a, "Hmu hauh lo" a ti thawp sup. 

Sangliana chuan a mita melh kar chung chuan, "I hmu lo takzet maw? He tah hian a hnu a tawp si a" a ti a. A aw chu a rum ţep. 

"Hmu ila chuan puih che u ka hreh hauh lo a nia. A pawi hle mai" a lo ti dam leh thlup. 

"A nih he tah hian eng nge i tih? " a lo ti chang fak. Ephraime chuan khi suk chungin, "Hei hi ka in a ni a. He tah hian ka cheng" a ti a. A tawi tek tawk hle. 

Sangliana bawk chuan, "Ti nge khaw pawnah daih daih.. " thil sawi zui chak hmel deuh hian a ti leh a. 

Ephraime chuan, "Khawpui thawm bengchheng hi ka ning thin a, he lai ram hi ka lei ta a ni. Hei a lo rem khawp mai. Tui lakna a remchang bawk si, a nuam viau a ni" a lo ti duah a. 

"Chuan, tunah hian Tualthattu chhui mek a ni tih i hre ngei bawk ang a. Kha tualthattu hmutu te khan palian tak an hmuh thu an sawi a. Aizawl khaw chhunga mipa lian deuhte chu thu kan zawt fiah vek tawh a; nang chiah i bang tawh" Sangliana chuan a lo ti leh ta kalh a. 

Mi dang awm ve te chuan an melh hrek hrek mai. 

"Ngawi teh, Sir, Thuthang kha ka lo hriat ve vang a nia chhuah pawh ka chhuah ngai loh. Gate pawh rinawm tawk takin ka siamtir leh a, nang ang bawkin tualthattu hi ka lo thlithlai ve reng zawk asin" Ephraime chuan a ti duh lek a. A hmaia ser inrinthla ruak chu melh pahin, "Kha i ser kha engtia i neih nge? " Sangliana chuan a lo ti leh daih. 

"Zawhte.. Zawhte tih lemah zawhte nghal chi.. I hrethiam em? " Tiin Ephraime chu a nui hak a. Constable pakhat chu a lo khi sûng bawk. 

"Engpawhnise, naktukah Police Stationah kan hmu duh che. I lo kal dawn nia. Tin, kan nula chu he lai hnaiah a awm maithei. Nang hian i thukru pawh a ni thei. Search warrant ka lak veleh i in hi ka lepse ang" tham lo angreng tak hian Sangliana chuan a ti leh a. An chhuak ta nghal. 

"Tehreng mai. Ka pu" zawi sup leh tiel rawngkai si hian Ephraime chuan a lo ti ve a. 

Gate an pelh fel hnuah Ephraime chu Study roomah lutin lehkhabu intiang ûrh chu a hnawl phei a. Bang mai mai anga lang chu a nem a, a inhawng ta mai a. Pindan rûk a lo awm reng chu niin.. A va dak a. 

"A him tawh e" a ti sup. Zoi pawh a rawn chhuak ve nghal. 

"Min zawng nasa dawn mang e" a ti halh a. 

"Kal mai rawh. Ti nge hetah hian i la cham tlat? Buaina hi ka duh lo a nia aw" Ephraime awki chu a sang lam hret a ni. 

"Ka hawn chuan pasal ka nei dawn asin" a lo ti ve nghek. 

"Nei la a tha" a lo ti hmuk! Zoi chuan a lo melh rum ngang mai. 

"Nang hi i zak thei lo em mai. Ka pasal neih leh neih loh sawi turin thuneihna i nei lo" a lo ti ve vak a. 

"Heta cheng reng tur hian thuneihna i nei bik em ni? Police hi ka ngaina lo.. I hrethiam em? " tiin a rawn dinchilh rap a. 

Zoi chuan lo en chhoh hâ chungin, "Ka hria. Mahse, ka chhuak dawn lo. Ka duh chen chen ka awm dawn" a lo ti ve hmak. Kal tuma a inher chiah chu a rawn man chawt, "Nang hmeichhia hi" tih pahin bangah a nawr bet ta ran a. An inhnaih leh hle. 

"Enteh, i mipa duhzawng tak ka ni tih ka hai hlek lo. Mahse, ka duhzawng i ni ve lo.. I haw ngei tur a ni. " a ti chang rût a. 

A mitmeng pawh a hlauhawm lam a ni. Zoi chuan chuti taka Ephraime thinrim chu mak a ti a ni. 

"Ephraime" zawi sap hian a ti a. 

"Ti nge hetia i awm" a ti leh ţiau. 

"Tihhlauh che ka duh vang a ni lo. Mahse, buaina ka duh lo" inthlah dul chungin a lo ti ve a. 

"Ni e.. Ka hrethiam e. Chuan, i bialnu te pawh i hruailuh theih loh phah aniang.. Ka kal ang. Tlaiah ka chhuak ang" Zoi chuan a ti khur dat dat a. A kal kiang nghal. A ţah chhuak zet chu a duh lo hle.. 

Zanriah tur ei rawng erawh a bawl hram. Khaw thim hnuah law law hawn a tum a ni. Ephraime lah biak ngam lohin a thu khur a, a mitmeng chu nelawm lem loh tak a ni. Police ho nen khan an inbakkaih deuh mawni dawn ni, an thawm engmah a hre pha ve bawk si lo. Zawhna a zawt ngam der bawk si lo. Zanriah hnuhnung atan Arsa chu a fry a, anţam tharlam zet a tlak bawk. Salad tuihnai tak a siam bawk a. A dang bai neuh neuh a awm bawk. A awm ve atangin Ephraime hian buh a ei ve ta zeuh zeuh a, a chawhmeh siam pawh tui a ti ve thoin a hria. Inbe lem lo chuan chaw ei an siam a. Boruak chu a uap kher mai. Zoi lah a tah chhuak atalângin chaw chu lem harsa a ti hle. A helh awl awl reng mai. 

"He lai hmun hi a awm ve tih pawh hre miah lo tur khawpin han awm ang che" Ephraime chuan thawh pahin a ti nghut a. 

"Tehreng mai. Ka damchhungin ka rawn kal leh tawh lo vang" a lo ti ve salh. 

An ngawi dun leh vang vang. An inkar boruak chu sawi thiam theih loh khawpin a alh tlat a ni. An inhuat vang em em pawh a ni lo. Ephraime mize inthlak hlawk chu Zoi chuan mak a ti takzet. Buaina a duh lo vang tih chu a ring, mahse, chutia a laka a thinrim em em ringawt chu a ngaihdan a ni lo ve lutuk tlat. A tirah a hnawtchhuak pawh a ni si lo. Chaw eina vel chu seng felin a sil leh vek a. Engkim a tihfel thlap hnuah Study roomah lutin a inthlak a. A thawmhnaw tlemte chu bagah khungin a phone erawh Ephraime leisak a nih avangin khumah chuan a dah a. A inpeih der mai. A hawi kual a, rei tak a chenna tawh ang maiin he in hi a ngai dawn hlein a inhria. A chhan a hre lo naa, A chhungril atanga hrilhtu awm ang maiin, "Ephraime vang a ni" tih thu hi a bengah a rawn ri leh thin. He pa hi a duh em ni? Ni lo, a duh tur a ni lo. Ani chuan a haw mek a, a hnawtchhuak zawk alawm.. Tin, a hmeichhe ît zawng a ni lo tih vawihnih lai a sawi tawh. Ephraime tana hmeichhe ítawm chu engtiang chiaha nalh nge a nih ang le.. 

"Ka inpeih" tiin Ephraime hmaa va ding chung chuan a ti a. 

A rawn hawi chho a, ngawi renga thovin a pindanah a va lut a. Chabi a rawn hum chhuak bawk. Zoi chu a chhuak a, a rawn zui ve nghal. Car-a an chuan dun hnu paw'n an tawng lem lo. Gate an pelh fel hnu chuan, Zoi chu a hawi let zauh a. 

"Ngai duh suh. Saw in saw a hrâng alawm" Ephraime chuan nuihzat hmel zet hian a rawn ti a. Zoi pawh a nui sak ringawt. 

"Tihian kan intheihnghilh hmak anga tiraw? " Zoi chuan kalkawng en chung chuan a ti a. 

"Ni mai e" a lo ti hmuk. Zoi run lutuk chuan, "Lawmsanga nen kan inneih sawmna card tal ka lo thawn dawn che nia. Nangmah vangin ka nei dawn sia" a ti fak fak a. 

Ephraime chu a ding dawt.. Mahse, a tlan leh nghal. 

"Ka phut hran lo ve" a lo ti sup a. 

"I phut ka ti hleinem " naupangchhia zetin a lo ti ve a. Kawngpui an pawh ţep. 

Zoi chuan in a thlen huna a awmdan tur, a pa thinrim a hmachhawn dan tur te a ngaihtuah mai mai a. A thaw leh hawk thin. Lawmsanga nupui a ni kumkhua tawh tur a ngaihtuah thlen phei chuan awmngaihna a hre ta mang lo. A lu a dawm thul, Ephraime a awm ve tih hre lo ang maiin a awm a ni. 

"I hreh takzet em ni! " Ephraime chuan a ti ta nge nge a. 

Mittui tling pam chungin a va melh a, a aw pawh a chhuak thei lo, a bu nghat ringawt. Ephraime chu a ding ta a. Hma lam a en vang vang a. 

"Eng nge i duh? " a rawn ti leh hawk. 

"Engmah.. Awm ve loh ka duh" a lo ti tawp ringawt. 

"Pasal neih i hlau nge i pa i hlau? " a dilchhut thei. 

"A pahnihin" a lo ti leh tawl. 

"Haw lo ta la, ka bulah i awm reng thei dawn lo va.. "A ti zawi sup a. 

"Shillongah ka chhuk mai ang" a lo ti vat. 

"Zomuan, i chiang em? I pa te hi mangang takin an awm tih i hrethiam ang tiraw? Police hial an pun tawh a nia. Chanchin tal chu hrilh an phû, i la dama i tha tih tal chu.. " a ti ta dap dap a. Zoi pawn chu chu dik a ti. A thi nge a dam tih an hre tlat lo a tin ni. 

"A nih kan let leh dawn em? " a ti a. 

"I hmel ka enin ka dahkir thei lo che. Thi mai tur hmel i pu sia" Ephraime chuan tih pahin steering a tuai vir a, an let leh ta. Zoi a thaw huai tak naa, Ephraime chu a zah thar ta viau. A inthlahrung bawk. 

In an hnaih tawh hle tihin, "I bialnu chu i hruai lut thei. Min vengthawng suh. Engmah ka ti lo ang" a ti sap a. Ephraime a nui huk. Chutah a ding leh thut a. Rawn en hâw chungin, "Hawh, ka nupui ni ta che" a ti ta hmiah mai le! Zoi a mengphar nasa mai. 

Sangliana chu khumah a let tawn sek a. Vawiina a mi hmuh tlangval hmel leh pianzia hlir kha a mitthlaah a lang leh nghal. Tualthattu a nih theih lohna chhan tur reng a hre hauh lo. Chhui chian ngei ngei ngai niin a hria a, a tawp an hnaih ta hle niin a ring nghet hmiah bawk. Mahni chauha rampalailenga a awmna chhan te khan chhan tha tak a neih a ring. Tu nge a nih a? Tu te nge a chhungte tih te thlengin hriat a duh. A tuka zuk kala zuk fiah leh ngat a tum ruh hle a ni. Zoi a ngaihtuah kai a, kha pa khan a lo ru bo te a ni thei ang em? A inah khan a thukru pawh a ni thei.. Chung zawng zawng chu a ngaihtuah vek a ngai.. A tum a tiruh a, "Tualthattu hi ka hling thei a nih chuan.. Zoram khawvel hian ka hming an hre tawh ang" tia phun sup supin a khi vur vur mai. 

Ni e, Zoram khawvel chu tualthattu dik tak hriat chakin a phi ruai tawh a ni. Mi pali lai hun inhnaih taka an han thi ţhawt chu a rapthlak em a ni. Pu Rualkhuma phei kha chuan uitu a ngah viau mai a, mipui thinrim pawh an sosang tan viau tawh a ni. Hmingzuala chhungte pawn an fapa thattu chu chhui chhuak ngei turin police te an ngen chamchi a; an tuar thiam lo khawp mai. 

(Min hrethiam ula, tihian tawp lailawk lawk mai rawh se aw. Season 1 ni mai teh se. Exam zawh veleh ka rawn come back ang. A la bawn chho telh telh dawn a nia. Ka lawm e.