Escape 5

ESCAPE.. (5)

Ziaktu: Toni Râlte

Hector ţap chu a râpawm lek lek mai. Zoi lah thlarau lam ringawt ngaihtuah ta chu, "Chu! hectora chuan thlahrang a hmu chiang" a ti sap a. Ephraime a lo rum nghut! 

Zoi chu Ephraime lamah a tawlh hrut hrut a, an insi thawthang a ni ta. "Ih, i ngaih ang kha a ni lo a nia" a ti leh ringawt. 

Ephraime chuan, "Eng chu maw? Ngaihdan engmah ka nei hleinem" a lo ti khauh. Zoi a dang titih, "Aa.. I hriat kha" a ti niah niah a. 

Ephraime chu a rawn inlet thawk a, a ban sei pui chuan a rawn kuah ta thlup mai. Zoi chuan thawk pawh a lo la ngam lo. 

"A tlai tawh muhil tawh rawh. Hectora pawh a ţah ban tawh chu.. Engkim a tha vek, hetah hian i him e" a ti dam thlup a. A mitmeng chu a mutchhuah hmel hle, chu chuan a tilang sexy! 

Zoi chuan, "Aw le" tih pahin a maimichhing a. Ephraime kut dahna chu a hre rauh rauh mai. Engmah phei chu a rawn khawih hran lo va, a lungphu dup dup erawh a hre thei ngei ang. Pa Ruala bawk a ngaihtuah leh a, a felzia leh a duat ve zia te kha.. Linda rilru hrehawm dan tur leh a bula a awm thei lo pawi a tihzia te nen. A hriat loh karin a lo muhil ve ta daih a. Ephraime erawh a mut chhuak kha a bo leh daih! Zoi'n a thil ngaihtuah lai a rawn lak bosak tak kha a ngaihtuahnaah a rawn lut leh a, Zoi muhil thaw sak sak thlir chung chuan, a nu Mary Diary chu a mitthlaah a rawn lang a. 

Ni e, Mary pain Delhi-a chhuk a phal tak si lohah chuan Mary chu a mangang kher mai. Abbas tel lo va a hmalam hun hman chu a hreh takzet a ni. A rukin Abbas chu a zuk hrilh ta a. Ani pawh a rawn mangang ve khawp mai. A pa lahin a veng run reng bawk si. Amah duat bertu a pa chu a tan chuan rãl ang mai a ni ta. A pa ţanna lam chu a dik zawk tih a hai bik lo va, mahse, a hmangaihna thinlung an hrethiam thei miah lo chuan a thin a tirim thin. A nu erawh a pa ai chuan a khirh lo deuh zawk a, hmeichhia a ni bawk a, a hrethiam ve a ni mahna le.. Tichuan, a tel lovin a patea te chu an chhuk ta. Mary chu a khumah mittui tla zawih zawihin a mu reng ringawt mai. A nuteii pawh khan an kal dawn khan a rawn luh chilh a, a khawngaih ve hmel hlein a lang. A patea leh a pa hi chu lungpui ang mai an ni si a. 

"Tihian ka hmu lo ang a, a reh ve mai ang" Tiin Mary chuan a rilru te a han siam ve chho ţan a. College erawh a laklawh deuh avangin a kal ta rih lo. Kar hnih a ral a, a zualzawpui vaihlenhlo tih ang mai a ni. Zan tin a ţap a ni ber e. Abbas a ngai lutuk chu nep leh zahpuiawm te pawh a inti. Sex em pawh an la hmang lo va, chuti taka mipa a han ngai chu mak pawh a ti. A lo hmangaih takzet a nih a ring. Abbas lah amah ai mahin a lungleng zawk emaw tih tur a ni a, a rawn biak reng vang a ni pakhat ang heti taka a ngaih hi. Thla hnih lai a liam takah pawh Abbas nen chuan a rukin an la inbe ta zel a. Kawng eng emaw a awm an la ring tlat a, beiseinain a kiansan thei hauh lo. Mary pawh chuan, "Abbas a rinawm chhung chu ka rinawm ve mai ang.. Kawng a awm takin" tiin a rilru a thlak leh ta kha a nia. In a nghah loh pawn dawrah a kal a. Khawi dang hmun dangah a chhuak ngai meuh lo. A hmel tha telh telh bawk si nen, heltu pawh a nei chho ta nual mai. An thenawm hnai a mi Pastor zirlai tlangval senior tawh lam Lawmpuia hian a rawn hel ve teh tlat a! A lo haw lai a lo ni bawk nen, a leng lut ve ta fo mai. Chu pa ngei chu a nu leh pa ten makpa atana an awh a lo ni ta si a. Mary chuan buaina a tawk chho ţan ta. 

La naupang teh mah se;College a kal ta rih lo ta sa sa, a lang nula bik a. Kohhranah a chhungte nawrna avangin a inhmang chho viau bawk nen. Pasal nei rual a la intih loh laiin a chhungte leh Lawmpuia te chuan an lo hmu nula mah mah a. Awmze nei tak takin an titipui tan ta a. A rilru a hrehawm takzet. Lawmpuia chu khawvel leh Pathian lama thlir pawhin mi tha tak, Sakhaw puithiam la ni mai thei tur a ni. Chu bak bak chu fanu neite tana makpa atana awhawm an awm kher lo vang, an chhungkaw khawsak a harsa lo bawk nen. A nu leh pa te chuan an be thain fiamthu titaka inneih lam hawia an sawipui chang a awm ta zauh zauh mai. Lawmpuia chu duhna chhete mah a nei lo va, a hne ru em em zawk. A titi patling zet zette chu zawm harsa a ti a, pasal atan lek phei chuan a fel leh lutuk a, a khirh a ring ru hial! Bakah Pastor nupui ni tur chuan tling a intih loh bakah a peih a ring lo. Piantharna tak tak pawh a la chang si lo. Pastor nupui te chu mi nawlpui thlir danah an thlarau nun pawh sang tak leh Kohhran hote huikhawma tu pawh tawngkam hawihhawm taka dawngsawng tura beisei an ni fo. Mary chuan chu chu a huphurh piah lamah a peih lo. 

Lawmpuia chu a zirna lama kal a hun leh tak avangin a rang lama intihfel a duh nge palai a rawn tir ta ngawt mai le! Mary hlauhthawn ang ngeiin. A nu leh pate lah chuan a der chuan an rawn ve tak naa a thu an ngaichang tak tak dawn lo tih a chiang reng mai si. A rilru hrehawmzia leh hahzia tak kha aw.. Inbunruahna tur rinngam tumah a nei lo, a laizawn ngeiin a do tlat bawk si.. A rilru hahna chuan a taksa a kai kang a, a cher kawk kawk mai. Lawmpuia palai te chu an vawi hnih rawn kalnaah a hun leh ni an sawifel ta der mai. Kum chanve hnuah a lo haw leh chauh dawn avangin a lo hawn veleha innei turin thu an titlu ta a! Lawmpuia duhthusam a ni. Mary erawh a kehsawm a ni ber e. Awmngaihna reng a hre lo. 

Lawmpuia a kal a. Kar khat hnu velah Abbas nen engkim an sawi dun thei ta a. Abbas chu a ţap lo chauh, "Mary, ka ta i ni. Ka ta chauh.. Ka kaltir dawn lo che.. ". A ti mawlh mawlh mai. Tichuan, Abbas remruatnaah a innghat ta hmiah. A hnu ni 3-naah Abbas chuan, "Shillongah lo chhuk la, ka lo awm ang. Chu chu kawng awmchhun a ni" a rawn ti ta. A thaw huai mai. Ni e, a rilru hrehawm chhung khan tumruhna tam tak a nei hman a, Engpawhni se, eng pawh paltlang ngai dawn se, a hmangaih ber leh amah hmangaihtu hi a zui ang tih hi a intiam tawp. Hmangaih miah loh laka damchhunga saltana a chhungkaw tihlawm ai chuan, a chhungte leh a ram phatsana hnam dang tlangval zui a thlang zawk hi Ram leh hnam hmangaihtu tan chuan anchhelawh tlak pawh a ni mahna. Mahse, Mary tan khan mipakhat chiah a awm a. Chu chu Abbas a ni. 

Shillong kalna tur Ticket chu a ruk takmeuhin a la ta a. A chhungten an rinhlelh loh nan Lawmpuia nen an inneih hun tur vel te chu hlim hmel takin a sawi siam siam thin. Chu a lemchanna chu hrethiam lovin a rilru a danglam taah ngaiin a chhungte chu an lo lawm ve em em a.. A pa pawh a hma angin a khauh ta ţung bik lo. "Pasal ka nei dawn sia, mi dang tihbuai vak ai chuan" tiin a pa thianpa Pu Dinpuia dawrah a inhlawh a. Kar khat dawn chu a inhlawh ve hman a ni. Ni e, kar thara Dawr nghak tura a chhuak chu a damchhunga an hmuh tawpna ber a lo ni ta a ni. Ani pawhin a chhungkua leh an in a hmuh hnuhnunna ber a ni ve bawk. Shillong lam panin an tlan ta vang vang a. A rilru chu a chawmawlh vek, engmah a ngaihtuah tui tak tak thei lo. Ephraime hmuh a chak rualin a kalsan tak a chhungte hrilhhai dan tur te, an zah dan turte pawh a ngaihtuah lo bik lo. 

"Mary, i kal tawh a. Hawikir suh. Engpawh tawk dawn la, i duhthlanna hi huaisen takin kal tlangpui ang che" tiin a infuih mawlh mawlh mai. 

Shillong chu an thleng ta.. A hawi chhuah ruala Counter kawt maia palian tak lo hawi vual vual a hmuh chuan a tawrhna leh a thinlung hahna zawng zawngte chu lak bo ang maiin a thep suai suai thei nia! Hei ngei hi hmangaihna chu a ni dawn lawm ni? A va ko va, a rawn hawi vat. Hlim em emin a rawn pan a.. Tumah an zah zo tawh lo, an inpawm chawt mai. Tichuan, Ephraime carah lutin a bag lian lo taka thawmhnaw tlemte chu dah lutin Shillong khawpui an chhuahsan zui ta nghal a. Gauhati-ah Hotel bookin chumi zan chuan Nupa in an tihtur zawng zawng chu an ti ve ta. Mary nui hmelah chuan tawrhna chambang a awm lo. Ephraime chuan duat theihtawpa duatin lal fanu ang maiin a sawngbawl a ni ber e. Delhi lamah kal lehin court-ah an innei ta hmak mai. Chu chu ni 5 chhung lekin a thleng vek a ni. 

"A thattu chu denghlum rawh u" Zomuansangi rawn tawng thut avang chuan a phu zawk. A che hrut a, Zoi chu a melh nghal. A mutui hle bawk si. A tawngvai a ni chiang. A khi suk a. Khua a var lek lek tawh a, a muhil thei dawn chuang lo tih hriain zawitein a tho ţhem ţhem a. Zoi chu puan chu tha taka sintirin a chhuahsan ta a. Pawn a chhuah rualin Hectora'n a lo chhaih nghal vut vut.. 

"Nizan khan ka mikhual i tithlabar alawm" a ti sup a. Exer la turin an inzui ta nghal a. Tlaivar a ni tih a chetdanah a hriat lem loh. A harhvang em em tho. Mahse, mawlhtu a nei tih erawh ngun taka en chuan a hriat.. 

Zoi pawh a rawn harh ve hlawl mai. A zi ţelh ţelh a. Sana a'n en nak chuan dar 9 a lo ri vah tawh. "Ehe! " tih leh thawh a rual nghal a. A inthiam lo angreng hle. Mikhual a ni ve bawk si a. Choka atang chuan Ephraime eisiam rimtui tak chu a rawn nam chek chek a. A khi sak. He pa hi a ngaina tan riau. A hmel rum ul leh a palian lutuk kha a nel loh phah naa nizan atang khan a hnaih ta riau niin a inhria. Inngaihzawnna lam rawngkai erawh niin a hre lem lo. 

"Min kaihthawh ve tur alawm" tih pahin a ham bai bai a. Tawnzau leh kekawrbul nen tlawng a lo awm a. A ngo vuah bakah a palian sia, a hmuhmawm roh hle. Zoi chuam tuisik a in nghal khawlh khawlh a. 

"Tukin chu bawngsa soup hawp a ngai tlat" Ephraime aw phawi chuan ngaihno a bei angreng hle. 

"I chau deuh em ni? " hrethiam takin Zoi chuan a lo ti ve a. 

"Nizanah ka kuahna lamah che ka chau vek a" a lo ti fiamthu a. An nui dun hawk hawk. Ephraime nui hawk hawk a hmuh vawi khatna a ni bawk a. Hmuhmawm a ti ru hle. Zoi a inpeih fel hnuah chaw chu an ei a. 

"I chhuak leh dawn em? " Zoi chuan a ti a. 

"Dawn lo. Vawiin chu ka awm dawn che" a lo ti a. Zoi chuan a va melh kâwk! 

"Enteh, nizan kha chu.. Ka.. " a tih mek laiin.. 

"Ngaihdan maksak zet hi nei thin lo teh.. Ka ìt zawng hmeichhia i ni lo" a lo ti tawl mai. Zoi chu a ngawi hmak. 

A ît zawng hmeichhia a nih loh thu a hrilh khan a na ve ringawt! Hrep tak hian. 

Pu Liantawna chu a meng sen rum mai. A vei nghut nghut a. Tuman an be ngam lo. An û Zomuansangi chu a awmna chin an hre hleithei si lo. Shillong lam pawh an be pawp tawh a, a tu aman an hmu der si lo. 

"Police hrilh tawh mai ang. A dik lo" Pi Lawmi chuan a ti a. 

"Kan Zomuani chuan Pasal a um em mawni le.. A lo um a nih teh chuan kan mualpho dawn asin" Pu Liantawna chuan a lo ti ram hmuk a. 

Zoi nau hmeichhia Hlimi chuan, "Pa, heti ringawt chu a dik lo alawm.. Police hrilh ila.. An hmu mai ang. An chhui dawn alwm" a lo ti ve a. A faten an nawr nasa si a, ani pawh chuan, hrilh mai pawi a ti tawh lo. Thenawm khawveng ho lah hian an zawt peih bawk si, thil ngaihven ching lutuk ho hi an buaithlak. 

Chaw ei khamah Police station lam chu a pan ta nge nge a. Zomuansangi lakah chuan a thinur takzet a ni. A fa bik a nih avang leh a nu kha a hmangaih em vangin a duat a, an nu in ngeih vak lo mah se; a fanu hi chu a chuan a phal ngai lo. Pasal tha tak nei se nuamsa ve deuhin awm se a duh vang ania Lawmsanga neih pawh kha a remtih ni.. Heti hi an ni leh ta si.. Huiham.. 

Pindanah chuan bati pakhat chauh a alh teng teng a, dawhkan kilin mi pahnih chu khun khan takin an titi mek a ni. 

A lian zawk chuan, "Tunah Zokhawthar atangin an rawn phur mek a. Kan naute pawh an awmna tur hmunah an awm tawh a ni. Mahse, buaina pakhat kan nei. Detective pakhat hian min hnaih tan riau tawh a ni" A ti sup sup a. 

A te zawk leh fin hmel zawk chuan, "A that chu.. An rawn phurh fel theih chuan, kan buaina kha chu kan puin chinfel dan tur a hre tawh e.. Proffesional killer a ruai dawn a niawm e" a lo ti a. 

"Pu Rualkhuma thattu kha maw? " a lian zawk chuan a lo ti var a. 

"Maithei. A hming chu Amos-a a nia.. Awlsam takin mi a that thin tih chiah ka hria" a te zawk chuan a lo ti ve a. 

"A that chu.. Buaina kan nei tawh lo e. Bungraw sem darh dan tur ka lo ngaihtuah ange" tih pahin A lian zawk chu a tho va. 

Ephraime phone ri tlang tlang a hriat rualin, "Hello" tih thawm a hre nghal a. Eng nge an sawi tin erawh a hre zui lo. Ephraime a kal sawn daih vangin. Mikhual a ni si a tiin Ephraime in bul hnim vel chu a pawhfai pui ve a. Ni sain a biang chu a chhun tai hlar a. A thlan hliam bawk. 

"I sunburn vek dawn alawm kha.. Lo lut tawh rawh" Ephraime aw a hriat rual chuan a phu zawk. A biang thip hlar chu a hre nghal. Thuawih takin a lut ve mai a. Vur tlangin a biang chu a dep nghal. A dam huai huai mai. 

"Ka chhuak dawn a. Zanriah chu nangmahin lo ei mai rawh aw" a ti dam thlup a. 

"A va pawimawh awm ve" a lo ti ve mai a. 

"Ka bungrua a lo thleng a. Lak a ngai a.. Dar 9-10-ah ka lo thleng ang" a ti a. Zoi chuan a huphurh ru hle. Pu Ruala a mitthla nghal. Ephraime chuan a rilru hria niawm takin, "Hector a awm alawm.. Hlau suh. Kawngka hi kalh tha la" a ti a. 

"Aw ka hlau lo" a lo ti ve tlat. A lo nuih hak danah a thusawi chu a awih lo a nih hmel. 

A pindanah a va lut a, a va insiam aniang. A rawn chhuah leh chuan lukhum hmathlawk a khum a, summer jacket dum hain, jean kekawr paw dal lam a ha bawk a. A converse chu a sei ngang mai. Street boy niawm tak angin a lang a ni. Zoi erawh chuan inhmeh a ti ngang mai. Pawn thleng a va thlah ve a. Amah chauha zanriah ei turin a lut ta a. 

Zanriah a ei khamah chuan a phone a khawih mai mai. Hector pawh in chhungah a awm a, an la innel lutuk lo naa a thlamuanpui hle lawi si. 

A thiante number fb atanga a dil kual ho chuan a chanchin an rawn zawt sap sap reng a. A tira an inbiak khan a tlanbo chhan a sawi ta hmiah a, an lo hrethiam ve mai. Linda erawh a la be pawp lo. A lusun sarhu lai a ni a, a rawn ngaihtuah kher pawhin a ring bik lo. 

"Zo,I pain FIR a thehlut a" rawn titu Lalpari msg chu a chhiar nawn tluk tluk ringawt. 

"A pawi hleinem" a ti tak naa

.. Police meuh an rawih takah chuan hlauhthawnna a nei ta deuh. Ephraime hian hre ta se, a lawm miah lo bawk ang. Khang amah umtute khan police an hrilh phei chuan Ephraime thlenginna tawrh phah ve thei tihte thlengin a ngaihtuah a ni. 

Chhun lamah a thawk chau ve deuh nge phone a khawih reng emaw a tih laiin a lo muthlu daih. Hectora chiau thawm vangin a harh a. Dar 9:30 a lo pel tawh. A thaw hak a; Ephraime chu lo thleng tawh se a ti hle. A number lah a nei der si lo. A phone bawk chu a bih leh a. Face book a luh ruala a home-pagea lo lang chuan a men zautir kâwk! 

Private Detective Lalhmingzuala ruang chhar a ni tih thu chu! Hmingzuala chu a hria.. Ni e, inhre tak an ni. A cousin a ni tlat! A pa û fapa a ni. An inkawmngeih hle. Ti nge a ngainatte apiang an thih a?! A pa a call hman ţêp a ni. Awmngaihna reng a hre lo. Hmingzuala chu a zan leng chhuak niawm tak a ni. Chaltlangah a ruang chhar a ni a, ni e, Chaltlangah bialnu a nei. Tun hnaiah thi an va tam ta ve le.. Chu pawh tualthihna vek.. Zoi chuan tui a va in ringawt. A za sek a ni ber. A tah pawh a chhuak lo. A chiâi vek a ni ber e. A tei sek laiin kawngka a rawn kik dawt dawt! Khur ru der der chungin a pan a, "Keimah" pawn lam atanga a rawn tih chuan hmanhmawh zetin a va hawnsak a. Ephraime chu inkhai bawr teuh chungin a rawn lut a. 

"Ruang an chhar leh kha i hria em? " a rawn ti lut nghal. 

"Aw.. Ka.. Ka cousin a nih kha.. Engtin nge ka tih dawn? Ka pa u fapa a nia, kan inkawmngeih lutuk asin" Zoi chuan chiâi zetin a lo ti a. Chutia mi dang an awm ve takah chuan a lungchhia tih a hre chhuak ta nge, thutthlengah a thu hnawk a, a hmai a hul a. A ţap ta tlawk tlawk a. Ephraime chuan ding chungin a melh vawng vawng ringawt. A mitmengah chuan thil tam tak a inlar a, chung zinga pakhat chu pawi tihna a ni. 

"Ka haw mai dawn.. Hmingzuala ruang hi chu ka thlah a ngai. Ka unaupa a nia sin" ţap ţiau chunga tiin a ding hluai a. 

"Tunah maw? " Ephraime chuan a lo ti vat. 

"Aw.. Ka hre lo.. Min thlah thei ang em? " a ti bah nak a. 

"Ka theih ka ring" a lo ti nghut. 

Mahse, Zoi chu a thu leh lawi a. "Mahse, ka pa bulah eng nge ka sawi ang. Min inneihtir a tum uar sauh dawn si a" a ti chuai raih a. 

Ephraime chu a bul setah rawn thu vein, "Nei mai rawh. He ta i awm reng chuan i him lo thuai ang" a ti ta a. Mak ti zetin Zoi chuan a melh ta reng a.. 

(Muttui suk suk u 😍