Escape 4

ESCAPE.. (4)

Ziaktu: Toni Râlte

(Adds mawlh kha aw 😢

Pu Rualkhuma thihna chuan zoram titi a luah hneh bawk a, Sawrkar lam hotute pawh an buai ru hle. Mipui nawlpuiten an hriat lar pa pathum an han tualthi ta ngawt mai chu ngaihthatna chi ni nghal lo chuan. Sumdawng thenkhat lahin an lo hlau tumhrang a! An invèng ru ran tawh hlawm mai. 

Zoi chuan, Jenny number a nei tawh si lo, biak pawh theih a chak kher mai. A pa, Pu Ruala kha a tan pawh a felin a pa ang deuhthawin a en ve kha a nia. A ui takzet a ni. 

A pindan ep chiaha mu mek Ephraime paw'n thil dang a ngaihtuah thei meuh lo. Thil ţul lo fe a ngaihtuah kai leh ta zel a! A hui pap.. 

A nu khan cancer natna a vei tih a inhriat rualin zan tin diary a ziak ţhin. "Ka thih hunah i lo chhiar dawn nia" tiin.. A thih khan a chhiar ngam lawk lo va; mahse, a nu chanchin hriatchian châknaa a khah avangin zan khat chu a keu ve ta a, ni e, a nu khan chanchin tam tak a lo nei ve. A nu diary a mitthla apiangin a mittui a khap per sawk zel, a chhan chu a nu tawrhna kha a namèn lo êm a ni. Hmeichhe chak tak ni lose, amah Ephraime ngei pawh hi a ral daih tawh maithei. A nu nen danglamna erawh an nei. A nu chu hmangaihna ngah tak leh amah tinaa phatsantute pawh ngaidama theihnghilh ngai lotu a nih laiin, Ephraime rilru erawh a dang daih. A nu tinaa tuithlara khuarkhurum mawng nei lo va dahtute laka kutthlak chu a nu ba rulhnaah a ngai ta tlat! Chu tak chu tuna Zoram khawvelin mi pathum tualthihna a buaipui nen hian a inzawm tlat a ni. 

Mary:

Mary Lalawmpuii chu tleirawl mai a nih lai pawha an veng chhunga hmeltha thana thang tawh a ni. A pa chu Kohhran upa inhmuamup ve tak, Upa Thanliana a ni. A nu pawh hmeichhe pawl leh MHIP lamah a kul a ataia inhmang, President kumhlun a ni thin. Unau pathum zingah Mary chu a mi lai a ni a. A pa chu Primary Zirtirtu niin a nu erawh chuan Eichawp dawr a nghak thin thung. Khawsak sang tak ni lo mah se; a rualpawl tak an ni ve a. An vengah phei chuan a khawsa thei pawl an ni ve. Mary hian phirpui a nei a, mahse, an tet laiin a boral ta kha a nia. Chuvang chu nge mawni a pa hian a duat bik riau a, a unaute pawn an thìk lek lek fo. A nu nen erawh an inmil tehchiam lo, a nu hiz thinchhe ve tak, rilru erawh chhe lem lo, tawngka vin ve tak a ni a. A hrechiang apiangin an ngaina tih tur a ni. A pa erawh a inhmuamup deuh bakah a ţawng tlem em mai a, mi nazawngin an nel ve lem lo. 

Mary te unau chu a hun laia school tha ve pawla an sawiah an lut ve a. Lehkha pawh an thiam thei ve viau. Pawl 12 a pass chuan, a patea Delhi lama hnathawk chuan, "He lamah College kal turin ka hruai thla dawn e. A nuteii a buai thin si a, a lo pui ve thei pawh a hlû" tiin a pa te chu a dil a. An ni pawh chuan an lo remti ve mai bawk a. Mary pawh a phur viau. A patea te nupa hian fa an neih theih loh vangin fa an la ta ringawt a, kum 13 a ni ve tawh bawk a, an duat khawp mai. An nupaa hna an thawh vangin in lam lo enkawltu pawh vai an la ringawt a, an ngaih a ngam chiah lo a ni. Tichuan, Delhi lama awm ve tur chuan a patea nen an liamthla ta vung vung mai. 

A patea te flat luah chu a zau lem lo naa a changkan bakah a nuam viau. View a tha bawk nen.. Mary pawh chuan nuam a ti ţan viau. College admission te an han la fel a, ţan a la hun lo deuh bawk a, in lamah sekrek khawihin a buai ve thin hle. A patea te fapa Bawihpuia nen chuan an inngaina ta viau bawk a, Mizoram lam chu a ngai em em lo. Phone te a nei ve ta bawk a, Engkim chu a tan thil thar a ni. 

College an han ţan chho va, ţawng lamah han bahlah zauh thin mah se; inzir mi tak a ni bawk a. Harsatna a tawk rei lem lo. Thian pawh a nei ve ta nual. Mizo an tam vak lo a, a awmchhunte chu an inpawh viau. A patea te nupain Kohhran ngaihsak vak lo mahse, Sundayah chuan Bawihpuia nen inkhawm turin an kal ve nal nal thin. A awm atangin awmpui pawh an la ta lo. Zingkarah Anuteii a che hman a, tlai lamah erawh zan dar 6 aia hmaah an rawn haw ngai loh vangin engkim chu Mary koah a tla a ni. Mahse, nuam a ti daih zawk. A inthlahrun loh phah bakah a nuteii chuan a duat phah bawk nen. 

Chutiang chuan hun hlimawm tak hmang ve zelin 1st year chu a zo ve ta hial mai. Christmas pawh Apatea ten hawn an phal tlat si lo va, a haw ta lo mai. A paten an phal tho bawk a. Mahse, Mizoram nen chuan a inang lem lo. A khua a har ru ve veng veng mai. Ni 27 Dec, ah chuan Bawihpuia nen Mizo ho inhmuhkhawmnaa kal turin an chhuak a. Mizo la chambang ho kha inhmuhkhawm an tum ve a niawm e. 

A hla lem lo bawk a, kein kal ang an ti a. Nui bawk bawk leh titi chungin an kal dun a. An inhmuh khawmna tur Pastor te in thlen hma kawng pengah chuan Mary chu a phone rik vangin a enna lamah a kun deuh nge, mi pakhat nen an insu her lawp mai.A phone chu a thlauh darh chuai! 

English hian, "Ka tihpalh lutuk.. " mipa aw puam lam hian a rawn ti nghal mawlh mawlh. Phone tla darh nuai chu a chhar khawm thuai thuai a, Mary hamhaih han harh chhuakin chu pa hmel a hmuh chuan a ţek sawk a ni ber! Chu pa a hmaa ding, sang leh lian tak, mithmul buk leh mitmeng thim lam chu a melh ta ngawih ngawih a. 

"Hello" a rawn tih leh takah chuan a phu zuk a. Bawihpuia leh chupa chuan makti zetin an lo melh kar thung. Bah zetin a ţawng nawk nawk a, a phone chu a kut atangin a va laksak a, a kal nghal daih. Mahse, a rawn umzui takah chuan a ding a. 

"I thinrim em ni? Ka tihpalh lutuk… phone thar ka leisak mai ang che. Khawngaihin contact na tur che number min pe thei ang em? " a ti a. 

"A ngai lo. A chhe lo vang. A tha" a lo ti nawk nawk. Chu pa chu a nui ta a. 

A nau hruai Bawihpuia chu a belbul ta daih. Bawihpuia lah chuan a pa number a lo hrilh mai a, a u chu Mary a nih thute thlengin a sawi. Mary chuan, "Bawihpui, kal ang" a rawn tih tak avangin an inkalsan ta a. Chu chu Abbas nen an intawnna hmasa ber a ni. Kha mi hun leh darkar atang khan Mary thinlungah Abbas chu a thi leh tawh ngai lo. 

Ngaihzawng a la nei miah lo! Ngaizawngtu leh betu chu a nei ve reng. Mahse, a zak zel! Tin, a duhthusam ang mipa an ni ngai lo. Kha mihring, a phone tihdarhsaktu kha a mangphan thin, a mipa duhthusam a ni tih hriatna a nei tlat! Hnamdang a ni tih a hai lo. Pawi tihna reng reng a nei lo. A vei zui lutuk chu a ţap lo chauh! A nungchang leh mizia engkim a danglam phah vek. A patea te nupa lakah erawh a inthup ve hram hram. An inhmu leh ang em? Tih chauh a ngaihtuah a, a chhuah apiangin hmuh tumin a zawng thin. Mahse, a hmu leh ta ngai reng reng lo va.. Kar khat zet kha chu.. Ni e, kha kar khat kha a tan chuan, kum khat tluka rei a ni ngei ang. Kumthar vuakvet paw'n an tibuai pha lo. A vawi khatna a ni bawk a, a vei tlut mai a ni. 

Ni 3, Jan a rawn inher chhuak a. A patea leh tu emaw inbia chu a ngaihsak lem lo, mahse, "Mary, gift i dawng a nih chu! Abbas inti hnen atangin.. Kan address min lo zawt a" a patea'n a tih chuan a phu zawk. Kha pa kha a ni ang tih rinngaihna a hre lo. 

"Abbas tih hmingpu hriat pawh ka nei lo ve a" a lo ti niah niah a. 

"In college ami te pawh a ni ve thei alawm" apatea chuan a ti leh mai a. 

Chumi ni chawhnu dar 3-ah chiah an door bell chu a ri ral ral a. Tlangval la naupan hmel tak hian, "Hei hi Mary gift a nia" tiin bawm a rawn dah a. A nuteii chuan phur zetin a lo hawng. 

"Phone a nih hi" a ti nghal chul a. Mary pawh chuan a va hnaih ve nghal, a phone kha an siamtir leh a, awlsamtein a tha ve leh mai a. Chutia phone thar a dawn takah chuan hriat chhuah a nei lo thei ta lo. Ni e, kha pa kha a ni lo thei lo tih a ngaihtuah. 

"U Mary chuan a dawn ka ring reng a. Kha pa khan ka pa no a la alawm" Bawihpuia'n a tih lehzel avang chuan a rinhlelh chu a dik a ni tih a hre thei nghal. 

Phone bawm hnuaiah chuan card pakhat a lo let ngât a. Abbas Tamim tih inziak leh a contact number a lo ni. Mary chuan a ak ta zauh a. A be ngam ang em tih erawh a hre lo. A phone hlui chu Bawihpuia'n games khelh nan a ngen tlat vangin a patea te chuan an remtihsak a, a pe ta mai. A phone tharah chuan sim card te thuin a'n khawih vel a, a iptea a card ah chuan a luah veng veng lawi a! Lawmthu tal a sawi chu a ngai ve alawm ti rilru chungin a phawrh zal zal a. A patea te nupain engmah an zawt zui lo kha a lawm takzet. A patea hi a khirh lem lo va, Hnamdang erawh ngaizawng lo turin vawi hnih vel chu a hrilh tawh. Mary hi zilh leh hauh ngai khawpa awm a ni ngai lo bawk a, an zilh ngai meuh lo. 

Call a tum ûk a, a ngam leh ngang lo.. Whatsappah a zawng a, a hmu lo zui! A whatsapp no lo zawk a pe tih a hre thei. Msg pangngai thawn mai a tum ta a. A ngaihtuah fe hnuah, "I thilpek ka lo hmu e. A ngai kher lo a nia, accident a nih bakah ka thiam loh a nia. I rawn thawn tak siah chuan ka lawm e.. From Mary" tih hi a thawn ta tawp. Lukhamin a hmai a hup a, a za cheng mai. Chhanletna a hmu har si a, a thinte a rim thul, a tah te lam a chhuak. Hetiang hian a awm ngai hauh si lo. A tawpa tawpah a mut tawh hnuah, "I lo hmu chu a lawmawm e.. Zanriah kan la kil dun ang chu tiraw? " tih thu hi a rawn thawn a.. Mary chu a au chhuak lo chauh. Chhan ngaihna pawh a hre lo. 

Mahse, "Nia.. Ka hre lo le" tij velin a chhang ta niin a hria. A phone a off daih. Chutiang vel chu a nia, Mary rilru thianghlimzia leh pawisawi lohzia chu.. 

Khata tang khan inhmu leh tawh lem si lovin thla 2 chuang chu phone atangin an inbe chho ta a. Chutih laia Mary hlim theihzia leh a nungchang phurzia chu chìktu tan chuan mak tih loh rual pawh a ni lo e. A hlim sâng reng a, a mood hi a fuh ngawih ngawih a ni ber e. Abbas chu hnam dang a ni tih hre mah se; A thinlung hian a pawm hmui hmak. Nupuiah sawm ta se a zui duh hial ang tih tur khawpin a tawntirh hmangaih lakah chuan a luangliam a ni. A sihhnip leh awlsam vang a ni hauh si lo. A khawngaihthlak zawk hial mai. 

Abbas chu Sumdawng a ni tih chiah a hre bawk. A bak thil dang a zawt ngam ngai lo. A thusawi zawng zawng a awih fai vek bawk. 

Thla 3-naah Abbas ngenna avangin Zanriah an ei dun dawn ta. A patea te bulah erawh a thiannu Lily haw tur an thlah dawn niin a sawi. A vawi khat nan dawt a sawi ve ta chu a nia. A inthiam lo miah lo lehnghal. A thawmhnaw chu pakhatmah duhkhawp a nei lo! Ţhing anga a hriat loh pawh Abbas hmaa dinpui tlak niin a hre lo fai vek.. A thinchhe hlur a, a kawr thlan chhungin a lo tlai duai tawh. A tawpa tawpah helhkam nei rûn chungin Jean kekawr leh jean jacket chu a thlang ta tawp. An zanriah eina tur hmun a ngaihtuahin chutianga inchei chu a pawina awmin a hre lo a ni. Make up a uar lem lo bawk a, a hmai khawih chhung chu a rei lem lo. A sam a thlah mawl tawp. Phur leh huphurh tak chungin a chhuak ve ta kha a nia. An han inhmu chu a khurh nasat èm vangin a inhumruhna lamah a hah vek thei. Mahse, Abbas chu a felin a polite êm a, tluang tak chuan zanriah chu an ei ve thei. Dar 8 bawr velah a thlah haw a, chutah chuan Abbas chuan, "I duhawm ka ti a. Mahse, i la naupang deuhin ka hre bawk sia.. " a ti ta a. 

Mary chu a ngawi tlat! An in an thlen dawnah, "Mary, min duh em? " a ti thawp sup a. 

A mitah pawh en ngam lo chuan, "Aw" a ti tawp! A zak lutuk chu car atanga chhuakin in chhungah a tlan lut nghal. Khami zan atang khan an inbe awl lo va. Mary dawihzep luatah an inhmuh leh meuh chuan, thla thar a ni der tawh. 

Abbas ngenna a vangin Abbas flat luahah an inzui lut a. Fawh te zawng an infawh ve kha.. Mary rilru chu a la thianghlim êm a, infawh bak kha kal pelh ngaihna a hre lo. Abbas kha a ring pumhlum takzet bawk. A duatin a tihlim thiam a, a titi duhzawng engkim a sawipui thei vek bawk. Ni e, Mary tan chuan khami kum kha kum rangkachak a ni hial awm e. Kum lai hawl velah Mary pa a rawn zin ve a, incheck up pahin Delhi lamah a rawn peng lut ve zuai a ni ber. A pa nen an han inhmu chu a hlimin a ngaih tawhzia a inhrechhuak ve. Hlim takin a pa pawh a zin chhung chu a awm a. Mahse, a hawn dawn zanah Mary leh Abbas inbe thawm a hriat avangin thil a kalsual titih ta a. Hnam dang a bia tih leh an inbiak chhunga Mary nuih zinzia leh hlimzia a hai hlek lo. An inbiak dan zawng zawng chu a hre vek lo naa, thian satliah a ni lo tih hai tur khawpa zirtirtu laktlak loh a ni bik lo.. Rang takin Mary chu a ko va, a dâwp ta zêk mai. Ani Mary lah rilru dawih leh derthawng tih takah a inpuang fai ta leng mai le.. A pa chuan kut a thlak hman ţhelh a ni. A nuteii'n a lo dang hman hlauh zawk a. An buai ta chuk chuk mai. Mary chu a bialpa then tura vau beh a ni ta a, ani lahin a pate chu a hlau nasa mai si. Abbas chu a thlahlelin a duh ve ngawih ngawih tho bawk si.. Awmdan a thiam lo takzet. Mahse, anuteii thurawn angin a pate bulah chuan a then tur thu leh hmuh a tum tawh loh thu a sawi ta a. A vawi khatna a ni bawk a, a pa pawh rilru hmin zân lo chungin a haw ve ta hram. 

A rukin Abbas bulah engkim a sawi tawh a. "Ka lo ngaihtuah vek ang. Lo lungngai suh" a rawn tih avangin amahah a innghat tawp! Ni e, hnamdang zuna uaia hmangaih hi a duhthlan a ni bik reng reng lo. Tunah chhuah duh mah se; a tâng nghet tawh lutuk. Abbas lah in a uap thiam si, a lakah a che mawi lo ngai lo va, sex phei chu vawite khat mah hmanpui a la tum chhin ngai lo. Tichuan, a ruka inbia leh inhmu ru renh chungin kum tawp pawh an lo hnaih ve ta der mai. Apatea chuan khuahkhirh teh mah se; college naupang a ni miau a, a chhuak lo thei bik lo nen.. Abbas lah a fingin remruatna a nei tha thei si a. Inhmuh ruk dan kawng chu a la awm ve reng mai a ni. Christmas erawh Apatea te chhungkua nen Mizoramah an hmang ta a. Kha Christmas tluka nuam lo kha Mary nunah sawi tur a la awm awm lo ve. A khua a har ngawih ngawih a, zan tin deuhthaw lunglengin a ţap thin. Delhi-ah kha chuan inhmu zen thei lo mah se; an inhlat lo tih tal kha a hria a. A zia.. Mizoramah erawh chuan Abbas hmel chu sawi loh amah ang takngial pawh hmuh tur an awm si lo. A chang chuan a inhua a, a inten ve thin. Hnam dang ngaihzawn chu a ram phatsanna angah ngaiin a han infuih ve ngial thin a. Mahse, a tawpna chu Abbas a hmangaihna chuan a rawn luahlan leh vek thin… kum a lo thar a, Delhi an chhuk leh dawn takah chuan Mary mi hlim thei tak kha a ni leh ta.. Mahse, a pa chuan a lo chìk viau nge ni dawn.. "I zirna laklawh mah se, i chawl ang. IGNOU-ah admission kan la tha leh mai dawn nia. Zirah tlai luat a awm lo ve" a ti ta tlat mai le..! 

"Ephraime" Zoi aw fiak ţhak avang chuan a harh hlawl.. A thu chhuak vat a. A pindan kawngka chu a va hawng a. Zoi chu mit nuai chat chat chungin a lo ding ran mai. Dar 2 a pel thuak tawh. 

"Eng nge ni ta? " a ti dam thlup a. 

"Ka hlau" a ti chuai raih. 

"Eng nge i hlauh? " a lo ti vat a. 

"Pa Ruala" a lo ti! Ephraime chu a meng zau deuh kâwk a. 

"Eng nge i hlauh chhan? Ti nge? " a ti a. 

"A thi sia.. Min lo tlawh ka hlau" a lo ti ţiau a. Ephraime a khi suk. 

"Eng nge ka tihtheih chuan? Light off lo la a ni mai lawm" tiin kawngka chu khar leh mai a tum a. Zoi chuan a lo chelh vat. A mita rawn melh ran chungin, "I khumah ka lo mu ve" a ti ta sap a. An in en vang vang hnuah, "Aw le.. " a ti nghut. Zoi chu inthlahrun hmel zetin a rawn lut a. Khumah chuan bet lo zetin a thu a. 

" mu ila" tih pahin a rawn thu ve a. Khum a zau tho bawk a. Insi miah lo pawn an mu thei tho ang. Zoi chu a sir thei ang berah chuan a mu ta a. "Puan dang i nei em? " a ti zawi raih. 

"Nei e" a ti naa lak tum hmel a pu hran lo. Khua a vawt ve tan tawh bawk nen, puan insin tawm chu Zoi chuan a hreh ru viau. An insik palh a hlau! Chu pa chuan a beisei angah a ngai palh ang tih a hlau ve tlat a ni. 

Ephraime chu ngawi rengin a rawn mu ve ta mai bawk si. Tawng tuma a ang ziau pawh chu a ngawi leh ta daih a. 

"I va dawihzep ve" Ephraime chuan a ti a. Zoi chuan thinrimah pawh a la bik lo. 

"Ka huaisen lohna lam tak a nia" a ti ve mai a. 

A nui leh huk.. "Zan thimah ramhnuaiah i tlanchhe ngam tho sia" a rawn ti leh a. 

Zoi chuan, "Hlauh vangin alawm ka tlanchhiat reng ni" a lo ti ve khauh. Zan a rei tawh si a, an ngawi ta rauh rauh mai. Mahse, an harh laklawh si. Zoi ning chuan, "Ti nge hetah hian i awm? " a ti ta thlawt a. 

A che hrut a, rawn en lem lo chuan, "Chhungte ka nei lo ka tih kha" a ti nghut. 

"Unau pawh maw? " a lo ti leh hâ! 

"Umm unaute pawh" tiin a lo chhang a. 

"Bialnu i nei lo mi? " a ti leh tawp! 

A nui huk a, "Ka la nei hman lo alawm" a ti ţha ve mai a. Chutah a lam hawiin a rawn saisir a, "Nang bialpa i neih vang em ni? I tlan bo? " a ti ve ta a. 

Zoi chu a thaw halh a, "Nei miah lo" a ti sap a. A ngaihtuahna chu a kal thui hmel tawp. 

"Khawi vengah nge in awm reng reng? " Ephraime chuan a ti leh a. 

Zoi chuan rilru buai angreng deuh hian, "Zarkawtah" a lo ti zawi sap a. 

"Anih nang? " tiin a va melh a. 

"Mizoramah ka awm ngai lo va" a lo ti ve mai. Mahse, sawi thui a hreh tih chu a hmelah a lang. Zoi pawn a zawt zui duh tawh lem lo. 

Mutthilh tuma an ngawih vang vang laiin van lamah chhum a let but but a, Zoram pa pawimawh tak thihna chu an sûn ve nge ni dawn ni, Ruah leh thli chu khawthlang lam atangin a rawn chho muah muah mai. Thli a thaw vûk vûk a, Zoi ţih zawng tak a ni. Sâr thli a nih ngei pawh a ring. Pawn lama riak Hector a bauh leh that that thin a, Zoi chu a tiril a khur der der ta mai. Mahse, Ephraime va sik chu a hreh si. A kut a hum ngawt ngawt mai. Chutah ring lutukin ţek a rawn tla thut mai. A rak tuarh a, Ephraime chu a va bawh rawk rawk. Ani pawh a muhil bik lo a ni maithei, a lo kuah bet vat a. Engtin chuan a khawih zawm bik lo. 

"Ţêk hi ka hlau lutuk a" a ti sap a. A lung phu nasa lutuk chu a dawm vung vung pahin a inlahrang a. 

"Hmeichhia i ni tlat alawm" ti supin lehlam a hawi ta daih a.,Zoi run lutuk chu a ner sak.. A va kuah thlawp dawn mawni tij a ngaijtuah rauh rauh lai chuan, Hector chu a rawn ţap ta ruah ruah mai le.. 

(Type tam a har thin a ni e)