Escape 3

ESCAPE.. (3)

Ziaktu: Toni Râlte

(Adds kha aw.. Ka duatte u 😊 ka sawi reng sia. In ning tawh awm 😂

Zomuansangi chuan ngawi rengin mutna chu a siam a. A mut a chhuak lo angreng. Chhunah khan a muhil bawk nen. A lehkhabu chhiar lai chu chhiar chhunzawm tumin a'n keu a, mahse, a rilruah a lut thei hlawl lo. A pindan bul lawka mu mipa chuan a rilru a luah tlat! A ngaizawng ni lovin a awmdan mak tak avang chuan hriatchian a chak ru hle. A va be ngam tawh der si lo. A rum nghat a, thil dang ngaihtuah tumin a chhing ta vang vang a. 

Kum 9 a nih laiin a nu duhtakin TB vangin a lo boralsan tawh a. Unau dang pakhatmah nei ta lo chu a khua a harin a lung a leng thin hle. A pa hi a hausa a. Sumdawnna lian tak a neih bakah a rukin sumdawnna dang a kalpui bawk. Mahse, Zoi chuan chung thil chu a hriatpui ve lem lo. A nu thih atang chuan an awmpuinu Pi Dari chuan a nu ai a awh a ni ber mai. A pa inah a awm khât si a, Pi Dari nen chuan an inawm nileng a ni hawt e. Pi Dari chu zing dar 6 atanga tlai dar 6 thleng bak an inah a awm thei bawk si lo. A ngaiin, zan mut hmunah ber hian hrehawm a ti ngawih ngawih thin. A nu damlai kha chuan thawnthu te chhiarsakin a mutpui thin a, a mutthilh hnuah a insawn leh mai thin. A pa a rawn haw har thei si, bakah a nu thihna khan a pa chu a vaw na deuh nge, inah a awm tlem lehzual a. Fanu a nei tih theihnghilh ang ziazangin pawn lamah a hun a hmang nasa a ni. Zoi tan chuan kum 2 chhung kha chu thlaler ang maia ram rehah a awm a ni ber e. Kum 3-naah nu thar a nei ta kha a nia. Pi Lawmi chu a la nulain, a hmel pawh a tha khawp mai. A pa Pu Liantawna chu engtia duh zawk nge maw a nih tih a ngaihtuah fô mai. Tichuan, a nu nen chuan a pa chhuah hlanin an lo inawm ve ta thin a. Pi Lawmi chu nu sual a ni hran hauh lo naa, naupang duat thiam mang lo, han chhawnchhaih zel zeihawi lo tak a ni a. Zoi pawh chu a nu thar vang chuan a hlim em em phah hran lo. Mahse, Pi Dari haw hnuah amah chauhin an in lianpuiah a awm ta bik lo tih a hriatna erawh chuan a awm a tinuam ve ta deuh. Kar loah Pi Lawmi chu a rai ta a. Zoi a lawm ber! 

Nau pathum lai a nei ta a! Ani chu upa ber chan chang takin a naute ho chu a nu ai mahin a khawih nasain a awm tam zawk tihtheih a ni. A naute pawn an ngaina, unau tak tak an ni lo tih pawh an hriatna a la rei lo. Zoi rilruah chuan pa hmun an ni tho va, han inenhranna leh intihhranna kha a tulna a awm hran lo. Mahse, Zoi hi mize mak tak nei a ni ve a. A naute pian hnu vekah a nuhrawn hian a naute hmakhua a ngaih vang nge ni a hmumawh ta tlat mai a! A tan a tangkaia a fate a duatsak tehlul nen.. Nuhrawn zia an tih ang deuh chu a rawn lang ta a ni ber mai. 

Mahse, kan Zomuansangi hian mize danglam tak a nei kan tih tawh kha. A nuhrawn mitmei leh zia a han hriat takah chuan, diau hlek lovin lal a'n hrawt tak tak mai a nih kha! Upa ber a ni a, a pa lahin a hau ngam teuh si lo. In chhungkhurah intilal takin sum leh pai te chu a'n chalai kual vel ta a! Nuhrawn tan chuan a nem zawka ţan mai loh chu kawng dang a awm ta meuh lo. Chu chuan thla 5 bawr vel a awh a. A hnu lamah chuan Zoi chu a pangngai leh mai. Pi Dari kha a boral tawh vangin awmpui an la thar a, a naute ho lah hostel lamah an awm deuh reng bawk nen. Amah tak hi chuan, M.Sc(Geo) a zo ve thlap. Tuina em em a nei hran lem lo. A pa sumdawnna han enkawlpui zauh chu a hna ber a ni rih. A pa pawn a ringngamin a thachhang dawltu ber atan a hmang chho ta reng a. Chuvang chuan an inah chuan a lal lo thei bik lo a ni. 

Ngaihzawng hi pahnih a nei ve tawh a. Pakhat chu a nuhrawn û fapa a ni. Chhungkaw boruak vangin an inţhen ta kha a nia. Pakhat leh chu a pa sumdawnnaa an manager a ni. He pa nen hian kum 3 ngawt an inzui hman. Mahse, sâwn a lo thlak khanglang a! Khata tang khan mipa a ngaihsak zui ta lo a ni. Kum 2 dawn a single hnuah thil a lo inthlak danglam a, a pa sumdawnpui, a bultumtu ber Pu Sapliana fapa Lawmsanga nen chuan an inneih a ngai tlat! Milianho sumdawnna leh a phêna thil dang awm thin hi tu khaw kha tan hriatthiam harsa tak a ni reng a. Nupui pasal te hi inremna hmanrua a nih piahlamah sumdawnna in a kentel a ni chãwk nia! Lawmsanga chuan Zoi chu a duh ve hranpa reng reng bawk a. Zoi erawh chuan, "Mipa tenawm" a tih zinga a hmasa pawlah a dah! Lawmsanga chu mipa chapo tak a ni miau a. Zoi ngainat chi a ni lo bur. A pa sumdawnnain a chhiat phah dawn tih hre reng chungin Lawmsanga ta nih ai chuan, tlanbo kha a thlang ta hial kha a nia. Tin, amah râwn leh miah lova a nì tur nen lama an lo ruat fel chu a inhmuhsitthlak a ti a. A nuhrawn remruat leh duhdan a ni tih lah a hai lo. Chuvang tak chuan, an duh dan anga awm a tum lo bur.. 

Chawhnu lamah a bag lian lo takah thawhnaw tlem te leh a pawisa ruksa chu dahin, "Maliani te inah ka riak phei dawn. Inneih chungchang sawi dun a ngai" tiin chhuanlam a siam a. A thiante tumah a be lem lo. A chhan chu a tlanbo tih an hriat chhuah hunah loh theih loha a thuruk an sawi chhuah a hlau a, buainaa hnuhluh ve a duh lo. Restaurant pakhatah inhnawh puarin khua a nghak thim a, Shillong kal tur Zan chhuak tur ticket a hum ran bawk. Sumo-ah chuan amah chiah hmeichhia a chuang. Driver nen mipa pali an chuang a nih chu.. Aizawl an pel fel tihin an ţawngkam a tlahawlh tan a. Zu an rui bawk. Zoi chuan a him lo tih a inhrethiam ta. Aizawl daiah an ding ta chiah a. Driver chuan a rawn piai nghal ta mai a. Mipa pali sek tak tak chu ani hmeichhe satliah chuan a hneh dawn chai lo tih a hre ve kar. 

"Ka va zung lawk ang aw.. Chuan, zu ka in ve duh a nia" tiin a han nuih tlawn a. Anni kai phur tawh helhhawlh lah chuan ngaihthat lohna awm miah lovin an kaltir ve mai a. Zu pawh an thlit kep thlap. Mahse, a rawn let ta awzawng lo. Thawm ri rawk rawk an hre zui a! An sava hual lai chu a tlan chhuak tih hrilh hranpa an ngai lo. Rang takin an umzui ta nghal a. Ramhnuaiah thawsa phulkaiin an inum ta zak zak mai. Mipa pahnihin an beidawnsan hnuah pawh mipa pahnihte erawh an la beidawng ve duh tlat lo.. Zoi kha nula hmel chhe lo tak a ni miau a! Mahse, an man hmain Ramhnuaia In pakhatah a lut ta si a! An va luhchilh ngam ta lo a ni. Anni pawn chutia ramhnuaia in lo awm ringawt chu mak an ti ve tho! An inum rei bawk a niang, an let leh lamah chuan khua a var titih tawh. An chau ve khawp ang le.. 

"Ka pa te chuan Aizawl ka chhuahsan lo tih an hre awm der si lo va" ama hriat tawk lek chuan a ti sap a. A mutthilh chhuak lo lutuk chu a hui pap a. Light chu off-in, a tuka a awmdan tur a hisap zui leh ta nghal a. 

"I harh em? Tho rawh. Dar 5 a ri tawh" a pindan kawngka rawn chum dat dat avang chuan a harh kâwk. A mit a nuai nawk nawk a, a muhil tlem hle mai. A lu chu a rit bur reng a. Vawiinah Aizawl a chhuahsan tawh dawn tih chu a rilruah a lut hmasa ber. Kawng dang a dap a ngai. Hetah hian a him a, awm rih a duh. A awmna man chu a chawi mai tur a ni. Ephraime chu engtin emaw a hneh a ngai. 

Sam pheng zetin a va tho va. A lo smart leh thlap tawh. A muhil ve miah lo em mawni le.. Tuisik a in khawlh khawlh a. A hnungah a rawn ding run lehnghal. 

"Ephraime" a ti sap a. A hawi let nghal. A lo en kur a. A zâm leh deuh. 

"He tah hian ka him asin. Min kaltir lo hram mai la" a ti ta tawp a!  

A lo rum khum nghut. 

"Hna ka nei a. I tan a him lo " a lo ti hmuk. 

"Eng pawh ti rawh. Ka tibuai ngai lo vang che. Kar khat tal hetah min awmtir rawh. Awm man pawh ka chawi vek ang. Khawngaihin" a hma ai chuan sawi a awlsam ta deuh. Ephraime chu a ngawi run a, chhuatah chuan a vei tuak sek. 

A rawn melh leh thut a, "I chhung ten police ruai ta se, Police nena inhnimhnaih hi ka duh hlek lo a nia" a ti ta a. 

"A teuh lo. Ka pa chuan a ruai lul lo vang. Nang ang bawkin Police a ngaina bik lo" a lo ti dam thlap a. Ephraime mitmeng chu a chìk ran bawk. 

"Okay, eisiamtu leh in chhung enkawltur ka mamawh tho alawm.. Kar khat chu i awm leh thei ang. Mahse, chu bak chu min nawrlui hlek suh ang che. " a rawn tih chuan, lawm vangin a lo nui hawk. 

"Tin, ka awm loh hlanin khawiahmah i lo kal tur a ni lo. Ka pindanah i lut tawh tur a ni hek lo.. " a ti leh a. 

"Vawiina i chhuah dawn chuan pawisa ka thawn che ang a, phone min lo leisak ta che" tlawn titih hian a ti a. 

"Eng nge tih i tum a? " a rawn ti khauh. Rinhlelhna mitmengin a rawn en a. 

"Ka.. Ih, a khawharthlak thei lutuk a. Tv a awm bawk si lo.. Lehkhabu chhiar hi ka tui vak lo va" a lo ti nawk nawk a. Ephraime khi suk a hmuh chuan a thaw huai e. 

Tukthuan chu a siam a, a ke pawh a zia ta khawp mai. Tukthuan an kil dun lai chuan, "Eng nge i eizawnna? " a ti ta tawp a! Zawh sual erawh a hlau ru hle. 

"Mi liante hna ka thawhsak thin.. " a lo ti mai a. Eng hna nge tih erawh a zawt ngam tawh lo. 

Dar 10-ah Ephraime chu a chhuak a. A reh leh ta vung vung mai. A theih ang angin in chhung chu a tifel a. Tihfel ngai a awm vak lem lo. Ephraime pindana luh chu châk viau mah se; a remtih loh êm vangin a insûm. Lehkhabu ho chu a en kual leh a, a ning leh thuai. Computer chu a on a. Movie en tur te a awm takin tia on a ni. Password a lo ngai khanglang! A ner sak mai. He pa inlak secure dan em em hi. Zanah a mu tlem si a, "Ka'n muhil mai teh ang" tiin a mu leh ta ringawt. A va boring lulai tak êm.. 

Inspector Sangliana chuan, Aizawl mipa lian leh sang ho profile chu a en kual thuak thuak a. A then phei chu a mi hriatchiante pawh an ni. A ngaihtuahnaah chuan, He thihna hlawkpui thei tur zawk hi kan hriat chhuah phawt a ngai a ni tih a ngaihtuah. Mahse, a bangbo viau. Pu Rinawma leh Pu Rosiama hi an inralkhat hriat pawh a ni thei, mahse, thian leh inpawh tak an ni hran lo. An sumdawnna lah a inang lo nasa bawk si. A nì inhnaih taka an thihna chu mi pakhat thiltih niin a lang bawk si. Mitthi chhungte an biakna atang kha chuan, hmelma an neih awm hriat a ni lo bawk. 

Vawiin chu an sumdawnna lamah va kal a rilruk a. An hnathawkte hian an nupui fanaute aiin an hre fô zawk reng a ni. Pu Rosiama bialnu, a secretary rai ta pawh kha an be tawh a. A lo tuar ve em em zawk a. A tira an ngaihtuah danah kha chuan, "Pu Rosiama hian a nei duh mai si lo va, he nu Lianzuali hian a nawr vak ang a, an intithiam lo chho ang a, Lianzuali hian a thahtir ta mai aniang" tih kha an rilrua rawn lang a ni a. Mahse, Lianzuali an han hmuh chuan chutiang ti duh tur awm niin an hre thei lo. A fa pai pawh thla 5 dawn a ni tawh a. Amah lah a cher kuam mai si. 

Pu Rinawma erawh a nula mutpui te ho zawng zawng an khawm thei mai lo vang. A kawp thin langsar zual, Aizawl tlak lam nuthlawi hmel tha zet, Linda erawh an be tawh a. Ani chuan an inkawp lohna a rei tawh thu a lo sawi. Pu Rinawma thihna chu mak a tih thu a lo sawi ve mawlh mawlh bawk. Mipui lam nawrna a nasa bawk nen.. Hma an lak vat vat chu a ngai a ni. 

Dar 6 a pel tawh a, khua chu a la eng ruai ruai.. Unau hmelhai awm vel a niawm e. Pu Rualkhuma chaw ei kham pawh thingpui hâng dawm chungin a phone chu a kheuh malh malh a. An nu chuan, "I pa lah hi a.. Phone hi a leklam leh lutuk a, biak pawh a hre thei lo" a ti hlak hlak a. 

A phone bih ngur chung chuan, "Ka hre vek.. Eng nge i sawi khah" a ti lawi a! An nu chuan rum zetin a lo melh, "Nauteii chu kan va la chhuak mai dawn mawni ka ti.. Hrehawm a ti si a" a lo ti hlar a. A phone dah pah chuan, "An zuau ve bawk thin a ni" a ti dam thlup a. 

An fanu upa zawk chuan rawn vei thuak pahin, "Hruai hruai a ngai lo, keini pawh kan awm ve tawh, a zuau vang mai mai a nih kha" a lo ti ve lang lang a. 

Nu ber Pi Saii chuan, "A ni ringawt lo. A teber a nia, a zuau te pawh a zuau ve ang chu.. Hostela dah lo pawh hian a zir thei tho alawm" tiin an fa naupangber thlavang chu a lo hauh a. An fapa neihchhun chhuak tur chu va melhin, "Mama, rawn haw tlai tawh suh aw.. Nizan ang te khan awm tawh hlek suh ang che" tiin a va auzui zat a. 

An fapa chuan a helmet kuah chungin, "Ninawm" a lo ti hluk a. A chhuak zui nghal. 

Pu Rualkhuma hi Journalist lar ber pawl a ni a. A huaisenin dikna ngaina tak mai a ni bawk. An nu Pi Saii hi Officer a ni ve bawk a, an awm thei chhungkua viau. Tunah hian in an sa ve mek a, an la zo fel lo deuh. Fanu pahnih leh fapa pakhat an nei a. An puitling vek tawh ti ila a naupangber Naute tia an koh erawh a la pangchang deuh a. Tunah hian class-Xii zirin hostelah an dah ve a. Hrehawm a tiin a nu a ngai lutuk chu a ţap thin a niawm e. Chu chu va lak chhuah mai an duh ta a ni. 

"Pa, Pu Zoliana case kha engtin nge a kal zel a? " an fanu upa zawk Deboi chuan a ti a. Ani hi chu upa ber a ni bawk a, Sumdawnna lam tuichilh vein mipa thawmhnaw dawr lian tak neiin a intodelh ve viau a ni. 

Pu Ruala chuan, "Aa.. Hearing neih leh tur kha a nia. Court lam hian an chhuah zalen leh ringawt mai thei a ni" a lo ti chuar chuar a. 

Pi Saii chuan "Pu Zoliana case i khawih ve hi chu ka duh vak lo. Pawisak an nei si lo va, hman deuha a driver thih dan te kha kei ka ringhlel riau asin" a lo ti ve a. 

"A ho mai mai e a. Mi dik lo te chu tarlana pho chhuah zel tur alawm.. " an pa chuan a lo ti leh thlup a. Nupa inngeih leh inrem tak, insupport tawn em em an ni. An fapa hian zu a in ve zeuh zeuh a, chu bak an fateah hmuhmawh tur a awm lem lo bawk. Chhungkaw awhawm tak zawng an ni ve e. 

Pu Ruala chu tho chhuakin, "Ka lo mangnghilh lek lek alawm le.. zaninah kan meeting dawn" a ti sup a. An pindanah lutin a va inthlak a. Kum 66 bawr vel a ni tawh a. Nupui a nei har zawk a, an fa naupang ber hi kum 17 lek a la ni. A chhuah dawnah an nu chuan, "Phone te kha meeting lai te khan i va kheuh sek ang e aw.. " a ti hram, An nu chu lo nuih sukin, "Ka hre ve alawm mawle aw.. A nih ka kal e aw" tiin a chhuak zui nghal a. Dar 7 a ri dawn hnai. An meetingna hmun tur YMA Rûn lam chu panin kein a kal zel a. A hnai bawk a, motor ken chhuah kher ţul a ti lem lo a ni. YMA Rùn hi an veng kawr ruamah a awm a. A bul maiah tuikhur a awm bawk. A bul hnaiah in ding a awm lem lo. Tuikhur a pel fel chiah tihin tu emaw hian a rawn kal pel thuak a, thawmhna dum vekin a inthuam tih a hria. 

" Helai hi street light kha a awm thin si a" a ti rilru a. A lo chhe leh tawh a ni maithei. Rûn luhna kai lawn a rap chiah tihin a hnunglam atangin tu emaw hian a ka a rawn hup thut! Rûn chhunga an titi mam mam ri pawh a hre pha.. Minute chanve vel chutia a hmui a rawn hup hnu chuan a zawi ta hnawk mai. A thim ruai ruai a, a tawpah phei chuan engmah a hmu thei ta lo. 

A harh leh chuan, a awmna hmun chu a hre hauh lo mai. Thawm a hriatna lam chu a hawi vat a. A hamhaih miah lo chu amah pawn mak a inti. A hmaah chuan mipa sang leh lian tak hi a rawn ding ta khur a. 

"Pawi ka ti khawp mai. I thih a ngai tlat" tiin a chal darah silai vawt raih chu a rawn hmehbel a. 

"Sawi tur tam tak i nei ngei ang. Mahse, ka ngaithla ngai lo. Ka hna ka thawk chauh a ni" a ti leh sup a. Pu Rualkhuma an zuau lai chuan silai cheng chu a hmet ta khap a. Pu Rualkhuma chu a let tawp a, a hnuai kham angreng deuhah chuan a lum thla nghal bawk. Mahse, a lum thui lo. Kawng atangin a zuk hmuh theih reng. Chu chu tualthattu duhthusam a ni. Mahse, silaimu a hnutchhiah kha a ngai tlat si a. A signature a ni miau a! 

A vei tawn sek, a ke na pawh a theihnghilh a niang. Sana chu a melh chhen ringawt. Dar 8 a rik pawh chuan Ephraime a rawn haw thei lo. Ani hi a thi aniang te a ti thul. A ril lah chu a ţam tawh nasa. Eisan mai kha a hreh ve deuh bawk si. Dar 8: 20-ah chuan motor thawm a hre ta a. Phur zetin parda chu keuin Honda city dum tle zak lo tawlh lut chu a va hmu ta a. A thaw huai mai. Insiamremin Living roomah chuan duhdah angreng takin a thu a. Lo nghak anga lan kha a tum bik lo. Kawngkhar chu a rawn inhawng a. 

"I va'n rei em em" naupangchhia zetin a lo ti vat a.. 

A bag chu zen rak rakin bawm pakhat hi a rawn pe a. Ngawi rengin a pindanah a lut leh daih. Phone a ni tih a hre ve mai. A kal dawn khan pawisa kha a thawn theihnghilh leh daih sia! A pawisain a lo leisak a ni chiang! Rulh leh a tum khawp mai. A phone thar chu Realme 7pro silver a ni a. A duhzawng tak a ni. Sim card a rawn leisak thlap bawk. He pa hi tu nge maw a nih chiah le?! 

"Chaw ei ka siam dawn. Ka ril a tam lutuk a" a ti lang lang a. Chhanna erawh a dawng lem hlei lo va. Chaw ei chu a siam ta tho va. A hnu lawkah a rawn chhuak ve mai. Inbual fai hlim tih hriat takin a sam chu a huh thlap a, tshirt dum loose hek hawk hain, short pant buang a ha bawk. A chawn sei thlurh chu Zoi chuan a hmu duh kher mai. 

"Phone kha pawisa ka thawn leh ta si lo che a. Engzat man nge.. Ka rul ang che. Chuan ka lawm lutuk" a ti niah niah a. 

Amah pawh rawn en chuang lo chuan, "I eisiam leh in chhung i tihfel lawmman ni mai rawh se.. " a lo ti a. Pek tum mah se, a la duh dawn lo tih a hria. 

"Nih i va lo haw har ve" a ti leh hram a. 

"Zawhna ngah lutuk hmeichhia ka ngaina lo a nia" a ti ram hmak. Zoi a ngawi chiang kher mai. An ţawng dun leh ta miah lo. Ei khamah a tifel sawk sawk a. A ke chu damdawi hnawih lehin a thiam ang angin a tuam ţha a. A phone thar chu a khawih nghal. A thiante no a neih ho chu a dah lut a, hriat erawh a nei tlem viau. Facebook erawh a lut ve leh thei ta. Tihtur awm hek lo, a lut kual vel mai mai. 

News groupa a luh rual chuan ruang chhar tih hi a lo chuang kuau mai. A lut ve vat a. Thlalak a hmuh chuan a phone a thlauh lo chauh! A thiannu Deboi pa Pu Rualkhuma ruang an chhar! 

"A va'n mak em em.. Ka awih lo" a ti chhuak ta hial a. Chutih lai tak chuan Ephraime a rawn chhuak ve chiah. 

Zoi hmel lan dan danglam avang chuan, "Eng nge a? " a ti tha ve mai a. 

"Enteh, ka best Deboi pa a thi! A ruang an chhar.. Pa Ruala chu a van mak tak.. Ka ui lutuk. Tuin nge that ang le" a ti mawlh mawlh a. A ţap ţuau bawk. Ephraime chuan a rawn hnaih hrut a, thlalak chu a rawn en ve a. A mitmeng danglam zawk chu Zoi chuan a hmu lo thung. 

"A va zia lo ve. " a ti bung nghut a. 

"Pa Ruala te ang pa tha tawpthang, dikna ngaina leh huaisen that duhtu chu mi sual tawpkhawk a ni ngei ang. Ka rin danin journalist a ni si a, a huaisen bawk si a, tu ten emaw an lo hua a ni ngei ang" a ti vawng vawng a. 

Ephraime chuan, "Mi tha tak maw a nih a? " a lo ti zawi sup a. 

"Umm.. Mi eirukna leh sum hman dan dik lo te pawh hai chhuaka puangzar ngam, Police te thawhpuitu tha ber a nia. Ka ui takzet" Zoi chuan a lo ti chuai raih a. 

Ephraime chuan chhuat lam melhin, "A thattu chu mi â tak a nih chu" a ti zawi sup a. 

Pu Rualkhuma lehzel thah a ni leh ta chuan mipui a tirâlkhel zual ta kher mai. Police te lu pawh a hai zual ta viau. Pu Rualkhuma ber kher phei chu an ui ru ve khawp lehnghal. Meeting turin a chhuak tih bak a chhungten an sawi thei lo. YMA Rûn a thleng lo tih an hre leh bawk. Tuman Pu Rualkhuma an hmu lo chu mak tak a ni. Rûn lam te chu an va en fel ngawt a, engmah hmuh tur a awm der si lo. A chhak deuha parawl pakhat chuan, car dum pakhat a tlan thlak thu leh rei vak lo va a rawn tlan chhoh leh thu a sawi. Chu lah tualthahna nen inzawmna a neih awm hriat a ni si lo. Pu Rualkhuma call record leh thl dang an han check pawh chuan, rinhlelh tur tumah an awm lo. 

"Sir, Pu Zoliana thiltih te hi a ni thei ang em? Ani nen hian boruak an nei hat si a" Thanpuia chuan a ti a. 

Pu Sangliana chuan, "Ka lo ngaihtuah lai tak.. Pu Zoliana chu lo hruai rawh u" a lo ti vat a. 

Hectora'n a saruh a chhaih kual thawm chu a hre reng. Khumah chuan a mu meng kar a. A rilruah thil dang a awm. A pindan ep chiaha mu mek Hmeichhia sawn tu nge a nih a hre lo. Hre ta se, a tan hnawksak a la ni thei ang em? A kawlhrawng ve riau lehnghal. Chinfel chu a la ngai dawn niin a hria. A thu chhuak hlawl.. 

Ama hriat tawk lek hian, "Mi tha tak a ni tur a ni lo asin" a ti sup a. 

Pu Rualkhuma hmel chu a mitthla ta vang vang a… 

(Amanda kha chu ka tawp lailawk zuai aw.. A rei lo vang. Naktuk ka chawlh ni a ni bawk 😘😊