Escape (2)

ESCAPE.. (2)

Ziaktu: Toni Râlte

September ni 9: Zirtawpni.. 

Dar 4:10 A.M

A ke dinglam a bilh bawk si avangin a kal chak thei si lo, a ke lah chu a vúng ţan der mai. A bag pawh chu a rit ţan ta. Khua erawh a èng ţan tawh a. Eng uar erawh a ni lo. A hma zawnah chuan a kal mawp mawp ringawt. Khaw nge a awm tih a hre lo va, bihrûkna tur lah a vâng hrep. Ral hla taka ţawng thawm niawm tak avang chuan a theihtawpin a insangmar a, "Lalpa, min pui hram teh" a ti rilru mawlh mawlh a. A hah tawhin chawlh a chak ngawih ngawih. Mahse, rawn umtu te chuan ani hmeichhia akara ke nâ kal tha thei tawh lo chu an rawn nangching rang dawn lutuk tlat!

Kawng chhak lam nia a hriatah chuan áwih pangperah a inham chho a, a thaw hlawi hlawi mai. 3 minutes vel a chhoh hnu chuan, kawng a pawh hlawl mai! Kawng chu motor leng tawk a ni naa, metal loh a ni thung. A laihna a la rei lo a ni maithei, a kal chhohna lamah lei vung a hai nasa êm mai. Chu kawng chu a hma ai chuan zawh a nuam ta deuh bawk a, a hma lam zawngin a kal ta ngawt mai. Darkar chanve dâwn a kal hnuah ramhnuaiah chuan thlam nge in tih hriat loh, lian lutuk lo a va pawh ta hlawl mai le! Mi hausa ho farm house a nih dawn hi ti rilru chungin a va pan hnai a. Gate hrawl angreng tak a lo awm ta tlat! Lawn liam dawnin a sang angreng si. Amah umtu ten an rawn nanchin a hlau tawh bawk si, zah pawh sawi lo chuan gate chu a ti ri ta chiam a. Chutiang zing lam reh lai takah chuan a ring tha duh kher mai. Thawm a rawn awm ta ngei a. Ui bauh thawm a ni. Ui hi chu a ngaina a, a hlau hran lo. 

Building kawngkhar chu a rawn inhawng ta huau a. Mipa aw hniam lam, thum lek lek hian, "Hector, a tawk e" a rawn ti a. Gate bulah chuan a lo nghak tawp. A rawn kal phei lai chu a lo thlir reng a, pyzama var lam a ruka ţial deuh a ha a, tawnzau dum a ha thung. A sang viau mai a, a sam chu a sei lek lek, a kir deuh bawk. Khabe hmu tlem leh biang leh hmuihmul a nei hlek bawk. He pa hi khawiahmah a la hmu ngai lo. 

"Eng nge i duh? " tia a rawn biak avang chuan a harh zawk a. 

"Ka.. Ih, khawngaihin min luhtir rawh.. Min zawng a ni" a ti bah nak a. 

A lo ner nâwng, "Inhmuhtir mai rawh" tih leh hnungchhawn a rual nghal a. 

"Khawngaihin, khawngaihtakin, min that mai ang. Emaw min pawngsual mai ang.. Min pui hram rawh" zah pawh sawi lo chuan a ti ta ţiau a. Khawngaihthla a la bawk aniang, chu pa pawh chu a ding chawt. Muangchangin a rawn inher a, ngun zetin a rawn melh vang vang. A zâm takzet a ni. A balh bakah a kawr te chu a ţet phung tawh si a. A sam pawh a thur viau ang. Gate chu a rawn hawng ri ta rak a. 

"Ka lawm e" a tih pawh chu ngaihsak zui loin a kal zui nghal. A hnungah bai chungin a zui ve hnak hnak a. 

In chhung an luh chuan a hawi kual nasa ngang mai. Bungrua engkim a awm vek bakah a rin ai daihin a changkang! Bungraw awm ho chu Mizorama an siam pawh niin a hre lo.. 

"Ţhu rawh" a rawn tih dawt takah chuan phu zuk chungin a hnaih ber sofa-ah chuan inthlahrung zetin a ţhu a. A ke lah chuan a rawn tur ut ut tawh mai. 

"Tichuan, engtin nge? " ti el aw lek lek hian a rawn ti leh a. 

"Reilote hetah hian ka awm ve thei ang em? " a mitah pawh en ngam lo chuan a ti sap a. 

"Tu nge i hming? " teh tawp a! 

"Zomuansangi" a lo ti ve mai a. A hming erawh a zawt let ngam ve lo. Chupa lian deuh chuan a uap rùn niin a inhria. A ngaih a ngam zan lo, mahse, amah umtute avangin a bel lo thei si lo. 

"Engvanga zawng che nge an nih? " a aw phawi chu a mizo lo riauin a hria. 

Zomuansangi chuan, "Ka tlan bo va.. " a ti leh tawp. A rawn melh kâwk a. A rum nghut. 

"Khua a var tawh dawn a. Vawiin chauh chu hetah i awm ka phalsak ang che. Tlai dar 5 hmain min chhuahsan tur a ni. A tha em? " a ti ta nghut a. Duhthlan tur dang a nei chuang hleinem. 

"A theih chuan intihfai ka duh a. Chuan ka ke hi ka bilh a, a na lutuk a, tuivawtin ka dep thei ang em? " polite zetin Zoi chuan a ti ve ngam ta a. Chu pa chuan, "Tha i tih ang khan lo awm rawh.. " ti leh hmukin a room niawm takah a luhsan ta daih. A thaw huai zawk. A uap a na êm mai. 

A inchingfel a, a bag chu hawngin a thawmhnaw chu a la chhuak a, pawisa a ken tho vangin thawmhnaw tihtham a keng lo, a lei leh mai ang a tih rilruk vang kha a nia. Mahse, a tum loh danin a awm ta si. Chu in zau lutuk lo, nuam leh changkang zet si chu a fang kual a, bathroom a zawng pah bawk. Chokaah bathroom chu a va hmu a, hmun dangah pawh a awm tho maithei. Eng pawhnise a inbual fai a ngai. Zing lam a nih vang nge a vawt sûk lehnghal. 

A ke chu a lo vung bûr tawh a. A pheikhawk pawh kha a tawt reng a ni. Hmanhmawh takin a inbual sawk sawk a. A inthlak fel zawhah a kawr pakhat chu pawtthlerin a ke chu a tuam lum ta a. A chau lutuk chu thutthlengah a let nghal hawl.. A mut a chhuak takzet a ni. Ni e, buaina chu a mutthilhsan ta phawt. 

Ui bauh tuar tuar vangin a harh hlawl mai. Sana a han en chuan dar 8 a lo ri vah tawh. Thawh a tum chuan mak ti zetin a puan sin lai chu a melh a. Kha pa khan a lo sintir ve ngei a nih dawn hi.. Mi sual tak chu a ni lo aniang. Phun hluk thawm a hre zui zat a, kawngkhar lam panin kha pa kha a pen pawk pawk a, a hawng nghal rap. 

"Hector, eng nge ni leh ta" a tih ri chu mu chungin a lo ngaithla a. Hector pawh a reh daih. 

An rawn inzui luh lai chuan a muhil der ringawt. 

"Eitur saw va ei rawh. " a rawn ti a. A meng ta nge nge. Thei leh thei lo chuan choka lam a pan a. A ril chu ţâm tak a ni. Nimin chawhnua a thil ei bak kha engmah a ei leh ta si lo va. Dawhkanah chuan artui kan leh bawngsa soup a lo inchhawp a. Chaw a melh a, a hmu mai si lo. 

"Chhuar thlanglamah khan buh chu a awm" a rawn ti leh dût a. A phu zuk lehnghal. Chaw ţâma ţâm a ni si a, zah pawh sawi lo chuan buh chhum tlem angreng tak chu a zuk la a. A ei ta bawrh bawrh mai. 

Fridge hawng mek lam chu hawiin, "Engtin nge ka koh ve dawn che? " a ti zum dûk a. 

Rawn en hran loin, "Ephraime" a ti sup..!

"Israel thlah i nih chiah chu" Zoi chuan a lei a veng leh hman pek lo.. A rawn lehhawi rang kher mai. Chiang zeta rawn melhin, "A dik alawm" a ti dam dup thung a. A chezia chu a hlauhawm tih dawna ni chiah lo, nelawm loh tih hian a pawl pha ber awm e. 

Chaw a ei khamah a eina te chu seng fel a tum a. Ephraime chu a rawn kal vat. 

"Mikhual chungah that chhuah tur an tih kha.. I ke a na bawk sia, va thu rawh. Ka lo ti ang" a rawn ti mial a! Zoi chu a hrilhhai letling. Ephraime chuan thleng chu a sil rawk rawk a. A hnehsawh phian mai. 

A tih fel zawhah sitting roomah chuan inhmatawnin an thu dun ran mai. Zawhna an ngah ve ve. Zoi chuan, he lai ramhnuaia he pa lo awm ringawt dan hi a ngaihtuah thiam chiah lo. Eng mi nge a nih? Eng nge a eizawnna tih pawh a hre hek lo. A zawt ngam der bawk si lo va. 

"Khawia tlanbo nge i tum? " a rawn ti ta thut a! 

Zoi chuan ţhut ţhat pahin, "Shillongah " a ti zawi sap a. Ephraime hmela maktihna rawn lang zawk erawh a hmu lo. 

"Chuan, Shillongah chuan chhungte in nei nge? I thiante zawk" tlan bo a tum chhan a la zawt miah lo hi a mak viau. 

"Nei chuang lo, mahse, rei tak ka lo awm tawh a. Hriat chu ka ngah mai. Eng emaw chen ka biruk theih ka ring a" tiin a lo chhang fel át a. 

Ephraime chuan, "He tan hian dar 5 thleng bak i awm thei lo tih i hria tiraw? " a ti chang fal a. 

"Hria.. Ka ka hria" a lo ti ve fak. 

"Tlan bo rual i la ni lo asin. Engvang nge? " nem deuh zawk hian a ti a. 

Zoi chuan a heh a pet sawi a, "I tan a pawimawh hran lo ve" a ti ve hmak. A lo rum nghut. 

"A nih nang pawh hetah hian eng nge i tih? Ramhnuaiah te" a ti ve ta khauh a. Ephraime chuan a rawn melh zawk, a mitmeng thim lam, tak ran chuan a tihlau leh ţêp. 

"Ka in a lawm.. Heta ka awm lohin khaw nge ka awm ang" a lo ti zawi sup a. 

"Mahse, i hlau lo mi? " naupangchhia zetin a ti leh a. 

"Keimah hi ka inhlau te a nih ngawt loh chuan tu chu nge ka hlauh ang a? " a ti nghut a. 

"Mahse, a nuam ee.. Mahse, tui lakna hi a harsa lo mi? " inla puitling deuh zawkin a ti leh a. Ephraime chu a ding thut, "Hmeichheho tak hi chu" a ti sup a. A kal daih. Zoi hrilh a hai hle. 

Dar 11 a lo ri vah tawh a. Tihtur em em a nei si lo. A phone lah a tlanchhiatna lamah a tibo daih bawk si! Ephraime in leh a vel chu fan mai mai a rilruk ta a. A ding chhuak a, pen mai a tum chu a thu leh hlawl. A ke chu a na lutuk.. Rah ngam a ni hauh lo mai. A tuamna chu phelhin a vung puam ûl chu a zut a zût a. Ephraime pindan kawngka chu a rawn inhawng rak a. 

"Bandage i nei mial lo maw? " a lo ti tawp. A kawr pawhthlera rualrem lo zeta a tuam ve ngawt kha a nia. A duhkhawp chiah lo. 

"A la na em ni? " kal pah chuan a ti a. 

"Na khawp mai. Tihi chuan tlaiah ka chhuak thei lo vang" zahtheih loh chhuahin a ti ta tawp. A rawn melh vung vung a, A pindan bula pindanah chuan a lut leh vut. A rawn chhuah leh chuan first Aid box a rawn keng a. A ke chu a rawn ensak a. A chek hluk. 

Damdawi a hnawih thuak thuak a, a sa ham ham mai. Bandage chuan hnehsawh zetin a tuamsak ta mawlh mawlh a. Zoi chuan a lo en reng ringawt. He pa hi a lan dan ang ngawt chu a nih loh hmel a ti rilru a. 

"Nachhawkna i duh em? " a rawn ti leh sup a. A lo bu nghat. Tui va laksakin damdawi chu a dawlhtir zui zat a. 

"Saw lai saw study room a nia, khum te takte chu a awm. Heta mut ngawt ai chuan va mu rawh. Mahse, engmah khawih hlek suh ang che" a ti thum dût a. 

Zoi chuan thuawih takin kal mai a tum a, mahse, a ţe ţhawt. A ke chu a na tulh tulh niin a hria. Ephraime chuan a rawn melh a, rum nghut chungin zo zet hian a rawn pawm kang lawp a, Study roomah chuan a luhpui ta a. Khum lian lem lo takah chuan a nghat chawrh a. 

"Ka chhuak dawn a. Dar 4-ah ka rawn thleng ang. Lo muhil ang che" a ti chhum hmuk a. Engmah sawi hmain a chhuak nghal vut. Zoi chuan a chhuak thawm chu a ngaithla kar a, a motor thawm a reh hnuah thaw hawk chungin a tho ta a. 

A han hawi kual chuan room chu a lian lem lo viau, chhuar lian leh sang zet zet pahnih a awm a. Lehkhabu hlirin a khat. Dawhkan leh chair pakhat a awm a. Computer Desktop a inhung bawk. A felfai viau. Hnawk leh lehkha tlahlang a awm lo reng reng. "He pa hian awmpui a nei mawni le" a ti chhuak hial. A chhan chu engkim hi a faiin vaivut pawh hmuh tur a awm lo a ni. Lehkhabu chhiar ngaina tak chu a ni lo naa, chuti ringawta nileng hun han hman chu a ninawm dawn lutuk tih hriain lehkhabu chu a enkual ta a. A ke chu rap ngam hek lo, a bai auh auh mai. English novel chu a han en kual a, a ngainat zawng a awm lo. Mizo thawnthu chu han en lehin, "PARADISE LODGE" Chhantea Pautu ziah chu a chhah bakah a dangdai riaua a hriat vangin a la ta nalh a. Khumah chuan bawkkhup zawnga muin a chhiar ţan ta a. 

Aizawl: Zarkawt.. 

"A thiante pawh ka be vek tawh. Tuman an hmu lo. An zeppui zawk nge mawni " Pi Lawmi chuan an pa melh chung chuan a ti hmarh hmarh a. Nu lian leh thau lam, ngo suah mai. Sam tawi hmarh mai, mi lian nu tih hriat zet hi a ni a. 

"Khawiah tehlul nge maw a kal le? " a pasal Pu Liantawna chuan a lo ti ve nghut nghut a. A nupui nen han en dun chuan an inhmeh vak lo. Pu Liantawna chu a fipin, a upat hmel deuh a, a ngo lem lo hle bawk. Tin, a palian lem lo, a mitmeng chu a phakar hmel viau. An nu erawh amah aia naupang fê awmin a lang. An pa thawhchhuah a chen ve a ni mahna le.. 

"Kan zawntir dawn lo em ni? " Pi Lawmi chuan a ti leh a. 

"A peih chen chen chu tlanbo ang hmiang. He lai baka nawmsakna a hmu dawn chuang lo" Pu Liantawna chuan a lo ti hmiah! 

"Mahse, Pu Sapliana te hi an lungawi lo ang e" Pi Lawmi chuan a ti leh hlak a. 

"Tihngaihna awm hek lo. Amah ber a awm miau loh chuan, inneih pawh kan ţhulh mai lohin" an pa chuan a lo ti a. 

Ner nâng chungin, "Kan Zomuani tak chu aw.. A nawmsakna kan ngaihtuah tih a hre miah lo mawni le.. Hetia kawhmawh bawl kual vel hi a ching hrim hrim" Pi Lawmi chuan a ti hlak hlak a. A lungawi fahran lo tih a lang chiang hle. 

"Kan lo nawr na deuh pawh a ni mahna le.. Nge ngaihzawng te hi a nei ru reng zawk em mawni le" an pa chuan a lo ti zawi sup a. 

"Nei mai mai lo. Hmana a bialpa nen lah kum khat dawn an inthen tawh. Lawmsanga tluk hi a hmu tawh lo vang. Mawl lutuk" an nu chuan a ti hmuar hmuar a. 

Ni e, an fanu Zomuansangi leh an sumdawnpui Pu Sapliana fapa Lawmsanga te inneihna chu ni khat chiahin a dang tawh. Mahse, a mo tur ber a awm si lo! An buai ru viau a ni. Police lam hrilh chu Pu Liantawna'n a duh chiah si lo, Police nena inhnimhnaih hi a duh vak lo. An sumdawnna vang pawh a ni mahna le.. Tunah hian District pathum laiah a sumdawnna.. Hardware dawr chu a hung tawh. Mizoramah a lian ber pawl a ni. Tin, Hardware dawr phênah sumdawnna dang a kalpui tih hria erawh an tam lem lo. Chu zawk chu an sum hmuhna lian zawk a ni a, Ram leh in hmun a lei thluah tawh a, fapa pakhat leh hmeichhe pathum a nei a. A fate hmakhua pawh a thim lem lo viau. 

A fa upa ber Zomuansangi chu tunah a awmna chin hre lovin an awm mek a ni. A awm loh chhan erawh a chiang reng. Pasal neih a duh lo. A tira inneihna an han sawipui pawh khan a lo hnial fithla hmak kha a nia, mahse, a ngaihdan chu a pawimawh ber lo. Amah râwn leh tawh miah lovin a sumdawnpui Pu Sapliana fapa nena innei tur chuan thu an titlu ta rup kha a nia. A fanu chuan a dodal ngam a rin loh nen, tunah in chhuahsanin sum thahnem tham tak a tlanbopui bawk. 

Pu Sapliana te pawn chanchin an lo hre tawh a. An han sawiho hnuah, inneih chu ţhulh rih phawt an titlu a. Mi dang bulah erawh Zomuansangi hriselna tlakhniam thu leh chumi avanga ţhulh rih an nih thu an sawi thung. Zoi chu phai lama a inenkawl rih tur thu an sawi bawk. Tun laiah tumah an inlenpawh vak tawh lem lo bawk a, a tu amahin zawhna an nei hran lo. Zoi thian tlemte te erawh thudik an hrilh lo thei lo. A kalna te pawh an lo hriatpui ve thei tlat! Khawiahmah sawi chhuak lo turin an ngen bawk. Zep hlen thei tak ang maw? 

Chawlhhmun.. Hotel Vasti.. 

Pu Zoliana chuan a hmaa ding palian zet, a kekawr ipte zena ding khawng lah chu a melh zak zak a. 

"Chhui zui theih tur engmah hnutchhiah suh ang che" a aw khur lek lek chu thup a duh hle. 

"Mi pahnih an thi tawh a. Tuin nge chhui chhuak tawh? " a rawn ti thum chhak a. 

Pu Zoliana chuan a chil a lem khawlh. 

"Engtik hunah nge chet i tum? " a ti leh a. 

"Chu zawng ka rawn hrilh ang che. " a lo tihsan a. 

Pu Zoliana chuan a phone msg ri tlang chu a en a, rawn hawi chhuak lehin, " Pawisa pawh an rawn dah lut chiah e, ka beiseina a sang viau a nia" rinhlelh hmel lek lek hian a ti a. 

Paliana chu a khi suk, "I rin aia tha in ka hlen ang. " tiin a che hrut a, Pu Zoliana thutna bul dawhkana thlalak pakhat let ran chu a va la a.. Lek vâ chungin, "A bo vat ang" a ti hniam raih a. Koh zui hman lohin chu pindan atang chuan a chhuak ta nghal a. 

Chawlhmun atanga a tlan chhoh pah chuan, kha nula mak deuh kha a mithlaah a rawn lang zawk. A ner sak a. Mizorama a rawn awm atang hian hmeichhia a la kawp miah lo! Ni e, hmeichhe melh hmanin a khawsa meuh lo a ni. A insak chhung kha chuan a hna lam pawh a hlamchhiah a. An han insangsak fel meuh chuan, hna in a lo hmuak leh tawh si a. Tin, a awmna hmunin a zir lo bawk a, Aizawl hulum laia va inpenparh kha a tui lem lo bwk nen. Mahnia awma hnaa rilru peka a nu bâ pek tlak tuma rilru sen chu a hun khawhral dan tam ber a ni. Doctor Jimmya'n a rawn be zeuh zeuh bawk. A in chu kar tin an va tihfaisak thin. Engtikah emaw Jimmy hi a la rul let ve ngei ang. A tan mai ni lo, a nu tan khan a thain a tawp thlengin a tuamhlawm a nih kha.. 

Zomuansangi bawk a rawn lang leh. A va mak teh fô ee.. 5'6 ft vel a ni maithei, hmeichhe te chhe lo tak chu a ni ve. A tan erawh a lian falua lo. A hmai hlai lam, mam leh ngo zet, a mit tlangkawm lang chiang zet leh a mithmul dum, tun lai nula ang lo taka line ve lem lo, rual tak si te, a hnar ngul tribal lek lek, a kareh zau ţêp si te kha.. Nula hmeltha tak chu a ni a, fak chiam tur erawh a awm lem lo. A vun kha a dikin a mam hle. A ke a tuamsak lai khan a ti a dìpin, deh a nawmzia kha a hre hman tlat! Mizo nula hi Shillonga a awm lai khan pahnih chu a mutpui tawh. Mahse, an ni kha chu Mizorama cheng an ni lem loin a hria. Zomuansangi tlanbo chhan niawm te a han ngaihtuah a, a khi suk. "Ka thil ngaihtuah mai mai chu" tiin a phun hluk a. 

Police Station: An buai mam mam viau. Mizorama pa lar pahnih tun hnaiah silaia kah an ni a. A thattu an chhui chhuak mai thei si lo chu mipui lam nawrna nasa nen, an thinte chu a chhe hlur tawh. Pu Rinawma kha a farm house-ah chawlh hmanga a awm laia thah a ni a. Amah maia kal a nih vangin a thattu awm chu zawn chhuah a har viau ang. Cctv lah a chhiat lai a lo ni kher si! Pu Rosiama erawh ama in ngeiah a nupui fanaute hriat laia thah a ni.. A thattu pawh an hmu! Mahse, a hmel landan an sawifiah thiam tlat lo.. A palian hle tih chauh lo chu.. Mahse, Mizo zingah hian langsar khawpa palian hi chhiar tham lek an la ni a.. Chuta tanga chhui tawp mai chu an tum ta mai. Pu Rinawma leh Pu Rosiama thihna hlawkpui thei tur an chhuina lamah an mimal nun ţenghneng zet zet an phawrh leh ta nghal. An nupui fanaute tan chuan a zahthlak duh viau ang. Ni e, Pu Rinawma hi Furniture workshop lian tak neitu a ni a. Mizoramah chuan an lar ber awm e. Sum pawh an ngah ngiang reng a. A nupui P Thanpari nen fa pali neiin, an fa u te pahnih chuan nupui pasal neiin an chhuak tawh a. Tunah an fa pahnihte nen an khawsa mek kha a nia. Ex-Minister pakhat farm chu leisakin farm house nuam tak a sa bawk. Chutah chuan weekend-ah a nupui leh fate thlimin hmeichhe chi hran hran nen nuam an zu tawl thin. An veng chhungah erawh Pa rawn leh fak hlawh tak a ni lawi a! Ni e, sum donate lam a peih a, a hmingchhe ve tak tak thei lo. An nu pawh hian an pa awm dan chu a hai lem lo va, a sawisel ngam lo nge demna thu a sawi ngai lem lo. An fanu hian modelling kawng zawhin, a inphelh thui ngam a. A lar pawl tak pawh a ni ve. An fapa erawh mi chut leh buh tia sawi a ni thung. Inah a tawm chawt a, Games chu a inawmtleina a ni. Zirna lam chu an bansan ve ve tawh thung. 

Pu Rosiama te erawh chhungkaw tlemte an ni thung. Fanu pahnih an nei a. An nu hi Pi Sangteii a ni. Nu fel tak zawng a ni. Pu Rosiama hi Department pakhata Director ni lai a ni a, sum lamah chuan an phang lem lo. An fanute pawh phaiah hlir an awm thin a. Kuminah an rawn haw ve chauh a ni. Pu Rosiama hi an Kohhranah Upa ni lai a ni a, Pi Sangteii pawh Hmeichhe pawlah President kumhlun a ni thin. Mahse, Pu Rosiama te ang pa fit zek zawk, meng harh ve tak tan chuan a staff zinga awmbawr lian leh mawngbawr khal deuhte chu melh liam ringawt a lo har nge ni.. A secretary nen sawi an kai ta hat a. A secretary chu a rai zui ta mai bawk. Mahse, Pu Rosiama chuan a ka hup nan sum thahnem tham tak a hmang nge, naute a nei ta lo. Sawi sep sep kai mah se, an zak der lo va. Hotela riah dun leh Zanriah kil dun thlengin an tìm lem lo. Pi Sangteii nen pawh inkhik khak reng an ni ta a, a tirah khan Pi Sangteii hi rinhlelh a kai nghe nghe. A pasal hi a thahtir aniang tih ngaihdan a awm. Mahse, ani ang nu nunnem leh zaidam tak chuan thlavang hauhtu a ngah khawp mai. A fanute pawn an nu lam an ţang tlat a ni. 

Inspector Sangliana hmaah khawng zeta dingin Constable Ramdina chuan file a pe a. 

"Sir, khatah khan Aizawla mipa 5'8- 6'2 ft kan hriat theih chin te profile a awm a" a ti a. 

Sangliana chuan, "A lawmawm e.. Ka lo en dawn nia" tiin a buk khum zauh a. An hna chu a khirh ru khawp mai. Mipui lam lahin demna thu an aupui nasa tawh si. 

Dar 3:40 pm. 

Hectora bauh thawm vangin a harh hlawl! A lehkhabu chhiar kha a lo muhil daih a nih pek hi.. A zi ian ian a, a ham bai bai bawk. Sana a'n en chu a phu zawk a, "A inah min awmtir sia, eitur tal ka siamsak loh chuan" tiin a tho ta vat a. A ke chu a hma ai chuan a zia ta deuh, a ram ngam ve sawlh sawlh tawh. Choka lamah a phei a. Tukverh atangin gate lam chu a va bih a, tumah a hmu lo. Hectora khan tu nge maw a bauh ni.. 

Chhuar leh Fridge te chu a han hawng zuai zuai a, Fridge-ah chuan vawksa kawchhung leh ar puahsa a lo awm. Thlai hnah leh rah eng emaw nen. Chawhmeh siam tur a ngaihtuah vang vang a, min hau em lo vang chu tiin Ar pum chu a la chhuak a. Sa a la siam ngai miah lo! Ni e, an hausa a, awmpui pahnih lai an nei. Engmah a khawih ngai lo. Artui chu a kang thiam ve. Mahse, artui teh tlawng han siamsak chu a hreh si. Eisiamna han en turin phone a kawl der si lo, "Risk tawp ang" a ti sap a. An nula pakhat Zeli arsa siam dan a mitthla angin a sawngbawl ve tawp. Bawlhlo chu a nei chikim phian a. A telh ve tawp tawp. A rim chu a tui ve viau e. 

Zikhlum chu la chhuakin a chhum leh tawp a. A bak siam tur a hre tawh lo. Eirawng a bawl zawhah a inbual ta a. A zai pah rat rat mai. Tlanbo e ti lo chuan, a thawveng phian! 

A inthlak zawhah tihtur a hre mai lo. Tv en tur tal awm se a ti rilru a. Ngaihtuahna dang a nei thut! Ephraime pindan chu a hmu chak ta tlat! Inthiam lo ru tak chung chuan a hnaih hret hret a. Kawngka kalhna chu a herh ri rak a, a inhawng ta mai. A chhung chu a zau hrep! Khum lianpui chu fel takin a lo inhung ruah a, bed sheet uk dal lam, hmuh nuam zet chu mar zetin a lo inphah. Chhuar lian zet a inhung bawk a. A thawmhna dahna a ni ngei ang. Darthlalang lian puiah chuan a va inhmu thut a. A phu zawk nghe nghe. Bathroom a awm leh a, Dawhkan lian lem lo chungah Laptop a awm ran bawk. Chu zawng chu chu pindana thil awm chu a ni… 

"Mikhual huangtau tak i ni" chu aw ri a hriat chuan a per dâwrh a, khumah chuan a zuk thu hnawk. A tho leh vat a, hamhaih zetin, "I.. I lo haw lai ka hre miah lo.. Englo, ka in en chak a" tiin dawt a sawi ta tawp. Awih loh hmel zeta rawn melh thìp ram hian, "I hmel zahpuiawm zet kha hmuh tlak pawh a nih loh kha" a ti ram hmuk. Zoi chu a sa ve zak, mahse, tisualtu zawk a nia, a insum hram hram. 

"Chhuak rawh. Vawikhatmah ka pindanah lut tawh suh" a rawn tih leh ţhakah chuan, bai auh auh chung chuan a chhuak ta a. A zak angreng hle. Sitting roomah chuan a thu ngawi kar a. Ephraime chu a inbual a ni maithei. Lo nghah chawt bak tihtheih a nei lo. 

Khua a thim chhulh tawh a, a ril a tam tawh viau. Ephraime lah a la reh si. Phun nang nang chungin choka lamah a lut phei a, chaw ei a siam hmiah! A ţam chhawl lo chauh tawh a ni. Bar hnuh vel a bar hnuah Ephraime chu a rawn chhuak ve hlawl a. Makti hmel pawh a pu hran lo. Dawhkan chu a rawn kil ve chawt a, buh chu a ngaina lo nge, Cookerah chuan a dah let leh a. Zikhlum leh arsa chu a suak a. Zoi chuan a lo melh reng. Thinphu dep depin a lo ngaichang a, arsa a ei lai te chuan chaw bar nachang pawh a hre lo. 

"A zia ve reng hi" a ti hmuk. Zoi a thaw huai mai. 

"A that chu.. Ka lo siam ve tawp a.. " a ti hluai a. 

"Zanin chu i la riak thei ang a, naktukah ka chhuah rualin i chhuak ve ang. " a lo ti leh nghut. Zoi chu a meng rum ngei mai. 

Mahse, induhtawk ve ngang kha a nia. "Aw le, Shillongah chuan ka chhuk mai ang" a ti a. A kham zui nghal. 

"Ticket ka lo laksak che alawm" a tih chuan makti lutukin a va melh a. 

"Maw?! " a ti nghek. 

"Aw.. " a lo ti leh tawp. Zoi chu lawm viau tur a nih laiin a lawm mang tlat lo. A chhan a hre der lo lehnghal. 

"I lawm na nge? " a rawn ti ta chiah a. 

"Lawm e" a lo ti hmak. Mahse, a lung a awi zân lo. Heta chen hi a la duh viau nge mawni dawn ni.. 

An eina vel a tihfel zawhah Sitting roomah chuan a thu a. 

"Tv te lei ta che" a ti thâwr a. 

"Ka mamawh ber lo" a lo ti a. Cigar a ţan zui nghal. 

"I chhung ten an zawng lo che em ni? " a ti dam thlup a. Chutia a aw danglam chu mak a lo ti leh pek. 

"Zawng lo vang. Ka pa mizia ngaihtuahin" a ti sap a

"I tlan bo chhan azir te pawh a niang chu" a lo ti ve mai a. 

Zoi chuan sawi vek mai thain a hria a. He tah hiam himin a inhre bawk. Tin, Ephraime chu a ring tlat! A mipa hriat tawh thinte nen chuan an danglam lawtlak tlat a ni. 

"Pasal min neih luihtir an tum alawm.. Ka hmangaih loh pui chu engvangin nge ka neih ang? " a ti ta nge nge a. Ephraime hmel chu a danglam eih lo. 

"Bakah min inneihtir chhan kha sum vang a nia.. Ka duh lo bur" a ti leh a. 

"Sum chu a hlu alawm" a lo ti khauh. 

"Mihring ka nih hi.. Hralh leh lei mai mai theih, sumdawnna inremsiamna hmanrua atan chuan ka hlu mah mah" a ti ta duah a. A rilru dik tak a ni. 

"Pasal i hmu zo ve te a nih chuan, nei mai ta che" a la ti zui! A tlawh hrep chak ngei mai. 

"Nang pawh nupui i nei bawk si lo. Chhungte pawh i nei lo mi? " a ti ve ta tawp a. Ephraime mitmeng danglam nghal chu a va hre thei. A sawi sual niin a inhria. 

"Ni e, chhungte ka nei lo.. " a ti sup a. A awah chuan natna thuk tak a inphum tlat a ni. 

"Lei atangin i lo chawr chhuak tawp tihna mi? " Zomuansangi chimawmzia hi.. 

"Nu ka nei alawm.. A thi tawh" a ti hriam hraih a. A ding vut, "Muttui le" a ti sup a. A pindanah a lut daih! 

Zoi chuan chechang lo in a melh reng ringawt. He pa hi a mak êm a ni. A hmelte hi a nelawm loh si, a sam lah hi a sei lek lek a, a la kir zui. Mahse, a hmai tluak chu a tha.. A hnarngul leh mitmeng chu Mizo an lohna riau a nei. Vai a ang chiah bawk si lo,.. 

Laptop chu a on a, Folder pakhat chu hawngin a hmet kual sek a. Pakhat chu ngun takin a melh ta veng veng a. Chu thlalakah chuan mipa naupang kum 3 bawr vel tur, chum buang leh hmel tha em em leh a nu leh pate an lang a. A nu chu a nui sâng a, a hlim hle tih a lang. A sam dum hlap ngil zet chu a thlah siau a, a kawr fual chu a pawl tak hle. A inhmeh takzet a ni. A bula ding naute pa chu a sangin, a lian hle a. A sam chu a buk lek lek bakah a dum thlap bawk. A hmai tluak chu tuna thlalak en mektu Ephraime nen danglamna vak a awm lo. Pafa an ni lo pawh ti mah se; tu'n an awih a rinawm loh. 

Chu chu a chhungkaw thlalak a neihchhun a ni. Zan tin a en ziah a, ngaihtuahna tam tak a nei ziah bawk. Ni e, nikhua a hriat ve meuh chuan a pa a nei tawh lo. A nu nen chauh an chen dun vangin zawhna tam tak a nei thin. School a kal a, a thiante chu an pa ten an rawn thlah fô! Mahse, ani chu mal takin a kal thin. A nu lah Factory-ah hna a thawh a ngai a. A fapa chu a thlah hman lo. Kum 16 a nih khan retheihna awmzia leh retheihna in mihring rilru a tihdanglam theihzia a hre vek tawh.. A nu a hmangaih em em a, a nu tan chuan engmah tih hreh a nei lo. Shillongah an awm a, mahse, Khasi an ni si lo. Sap leh vai an ni hek lo. Chu chu a hrethiam lo va, a nu a zawt ta tawp a nih kha. 

A nu chuan, "Keini nufa chu Mizo kan ni.. Mizo chu Shillongah pawh hian tam tak an awm. Mahse, kan inpawh ve lem lo. Va pawh kher pawh a ţul rih lo a nia. Tunah chuan Mizo ţawng i zir a ngai ve ta a nih hi" a lo ti a. Mak a ti viau. An schoolah Mizo an awm ve em tih a rukin a zawng ţan a, pahnih chu a hmu. Mahse, a pawh ngam lo. A nu khan a phal si lo va. 

A nu chuan Mizo ţawngin a be chho ţan a, a tirah chuan mak a tiin thiam harsa a ti ngang mai. Mahse, "Nakinah ka thin hunah Mizoramah i chho ang a, i tan ţawng thiam hi a ţul takzet a ni. " tia a fuih fo vangin kum khat hnu lamah chuan Mizo ţawng chu a nal ve ta viau. 

A nu thusawi a la hriat reng chu, "Mizoramah hian ba rulh tur tam tak ka nei a ni. Nangin min la rulhsak ang chu! Ka chhungkua i han zawng chhuak ang a, an duh loha an hnawl hnu, hnamdang fa a pai avanga an tuithlar tak an fanu hian ka hmangaihin ka theihmghilh ngai lo tih i lo hrilh ngei tur a ni" tih thu kha.. 

Zawhna a va ngah thin tak. Tuithlar awmzia a hriat hnua a nu a khawngaihzia te kha.. A tawpah a insûm thei ta ngang lo va, "Nu, tu nge ka pa" tiin a zawt ta tawp a nih kha.. 

A fapa melh vang vang chungin, a thaw hawk a. Zawi leh fiah takin, "I pa chu Abbas Tamim a ni a, Jewish a ni.. Arab ramah tunah chuan a awm, khawi lai hmunah ber nge a awm ka hre ta lo a ni" a ti ta a..

Ephraime tih chu a pa phuah a nih thute a hre zui leh ta zel a.. Ani hi Thlahpawlh a ni.. Mahse, a nu hnam chhawm a duh vangin kum 20 a tlin khan a nu bulah, "Mizo hming ka duh" tiin a ngen a. 

"Aw le.. Ka lo ngaihtuah fo tawh alawm.. I mizo hming chu Zothanpuia ni rawh se" tiin a nu khan a hming a phuahsak ta a nih kha.. 

A hming chungchang a hriat chhuah chuan, thil pakhat a hrechhuak zawk.. 

Saw nula, Zomuansangi bulah khan a hnamdang hming a sawi! Ni e, engvanga sawi nge maw a nih le? Kha hming kha chu phumbo daih tawh tur a nia sin. A sumdawnna hming erawh a dang daih.. 

"A pawi tawh lo e… Ephraime ka ni alawm.. Saw nula sawn min hre reng hauh lo vang" ama hriat tawk lek chuan a ti ta sup a. 

(Kut a kham duh hle mai.. A kawnghmang in hre deuh ţan em? 😁😊