Escape.. (1)

ESCAPE.. (1)

Ziaktu: Toni Râlte

(He thawnthu hi in duh leh beisei ang a ni kher lo mai thei. Romantic ngawr ngawr hi kei chuan ka hne ţhin. Romance lam pawh a tel tho dawn a, chutihrualin khatiang ngawr ngawr kha a ni dawn lo ania.. 

A kawngkhar rawn kik dat dattu avang chuan a mit nuai chawt chawt chungin a tho a. A ham bai bai mai. "Tu phiangsen nge mawni le" a hriat tawk lek chuan a ti sup a. Kawngkhar chu panin a kalhna chu a ri nghal rak. Hnuai lam a bih avangin Gucci kutchhuak, pheikhawk, leather dum hlarh chu a zuk hmu nghal a. A man tozia a ngaihtuah hma chuan, "A tawpa tawpah chuan" tih sup thawm avangin a hawi chhuak rang kher mai. 6'1ft vela sang, sam kir leh sei lek lek, khabe leh biang hmul ţo far mai te, hnar ngul zum leh bang sang angreng tak chunga mitmeng thim leh nelawm loh zet a hmuh takah chuan a mut chhuak zawng zawng a reh nghal vek. 

"Tu.. Tu nge i nih? " a ti nawk nawk a. Tunah hian zing dar 2 a ri chiah a ni. An sumdawnna avangin zan lai laklawha kaih thawh a nih fó vangin chutiang huna a kawngka an rawn kik pawh kha mak a ti vak lo reng a. Mahse, tun tum erawh sumdawnna lam a nih hmel vak loh. 

"Min luhtir dawn na nge? " a hmui pan lam lek lek avang chuan a nun a rawn hmel zual.. A biang dinglam a mit sir hnuai lama ser inrinthla kalh pawh chuan, mi ţha tak a ni lo tih a tilang chiang ngawih ngawih. 

"Ka.. Ih tu nge i nih sawi phawt rawh" a ti leh nawk nawk a. 

Chu pa sang zet chu a nui huk. 

"Mitthi khuah min la zawt dawn nia" tih leh Pistor rawn phawrhin a hmaa hlauthawng zeta ding chal darah chuan a hmehbel chat a. 

"Mang ţha le.. " ti leh supin a silai chu a hmetper ta a. A awk rawp a; a tlu zangthal nghal der. A mit chu a meng kuau a. Chu pa sang tak chuan a mit chu a zuk siamsak a. A khi leh suk, "Hmuh i nuam hle mai" a ti leh nghut a. Ngawi rengin chu in fianrial tak chu a chhuahsan zui ta nghal a. 

Kum 10 liamtaah khan.. :

A kut zur tawh tak chuan a ban puam chu a rawn zût a. Na tuar chung chuan a nui lui ţâng ţâng bawk. Sawi duh nei, sawi hlei thei si lo hmel a pu a. 

"Engkim a tha vek a nia. Doctor pawh a lo thleng ţep aw" tiin a fapa kum 23 mi chuan a nu chu a hnem a. 

"Doctor hmuh kher hi a ţul ber pawhin ka hre lo a ni. Ka thi dawn tho tho" thei leh thei lo hian a rawn ti a. A hmai zur ţep leh a sam tla kawlh vek te, a taksa cher kâng te chuan natna satliah lo tak a vei tih a tilang chiang ngei e. 

"Min dampui reng a ngai ka tih kha" a fapa bawk chuan a ti leh a. A nu chal chu chulin, a lu kawlh vek chu a tuai a tuai a. He hmeichhia chiah hi khawvela a neihchhun a ni. A theih chen chen chu chelh a duh a ni. 

Doorbell a rik rual chuan a tho vat a, Doctor Jimmy a lo ding reng tawh. A nu enkawltu doctor a ni. A nu chu a han check vat vat a, Nachhawknain a jection nghal a. A nu pawh chu kar loah a muhil ta thuai a. 

"Ephraim, ka be duh che a ni" Doctor chuan a ti sup a. Doctor sawi tur chu hriain a inhria. A chil a lo lem khawlh. Sitting room zimtê-ah chuan inhma tawnin an ţhu dun ran mai. 

"Kan chelh reng thei lo vang. Kaltir tawh mai rawh" Jimmy chuan a ti ta nge nge a. A lo chhing sawk. He thu hi a la hmachhawn a ngai dawn tih a hria, zantin a ngaihtuahna tibuaia thinthia mutthilhtir thei lotu a ni. 

"Aih.. Khawngaihin" a lo ti bah nak a. 

 Nghet zetin a kut a va vawnsak a, "A tawrhna hi belhchhahsak lo hram rawh" a ti dam thlup a. 

"Ani hi ka neihchhun a ni asin" a ti chuai raih a. Jimmy pawh chuan lainat hmel zetin a melh vawng vawng ringawt. 

Ephraime chu a ding a, a kekawr ipte zen chung chuan thawk a han la halh a. 

"Aw le, Naktukah ni rawh se" a ti zawi raih a. Jimmy chuan hrethiam takin a lo buk khum nghut.

Zan khuain Ephraime chu a muhil ta lo. 

A tuk zing dar 8-ah Jimmy a rawn thleng a. A natna tawrh a nat êm vanga mu leh mal nei lêk lo va a taksa cher ţhiak mai tiche eih eihtu Mary chu melh vawng vawng chungin, "I tawrhna chu a tawp tawh dawn e.. Thlamuang takin chawl ang che aw" a ti sup a. Kawngka chu rawn inhawngin Ephraime chu muang changin a rawn lut a. Khuma mu, a neihchhun ni bawk chu a pan nghal chat. A kut cher em em, a vun chuar tawh tak chu nghet zeta vawnsakin a fawp vawng vawng a. 

"Nu, mang ţha aw. Ka hmangaih che.. I bâ zawng zawng chu keiman ka tlaksak ang che" a ti tham ţuak a. Jimmy chuan syringe lianpui rawn lek chhuakin, Mary ngumah chuan a vit ta thawih a. Damdawiin a thisen a fan takah chuan, Mary chu a zawi telh telh a. Hahdam hmel takin a muhil ta siai siai a. Ni e, meng leh tawh lo turin a muhil hlen ta. A tawrhna pawh lakboin a awm ta e. 

A nu thih thu chu an thenawm khawveng mi tlemte chauhin an hriatpui. An in bula phaizawl zau lo takah chuan a nu thlan laih a ni a. Chutah chuan, an awmna bialtu Pastor chuan a vui liam ta a ni. A nu vuinaa lo kal te chu mi pali chiah an ni. Doctor Jimmy, Pastor leh an thenawm chiaha nupa te an ni mai. Mahse, Ephraime chu a vui lo. Ni e, a nu nen chauh an khawvelah hian mi dang an leng ve lo alawm. 

Ephraime chu amah chauhin chu an in te taktêah chuan a khawvel thar chu a hmang chho ta a. Mahse, thil tam tak a thleng a ni. Amah chauh lo chuan chu thil thleng chu an hre lo. 

Zarkawt, Aizawl.. Rosiama Building: 

Zan chu a rehin chung lamah chhum dum a kal ruah ruah a. Thli thaw leh vûk vûk ţhin chuan a tirâpawm lek lek mai. Chu building hrawl zet kawtah chuan thawmhnaw dum veka inthuam mipa hleitling zet zawt hi a ding ran a. A coat nghawng chu pawr chhoin a hmel pawh a hliah deuh lek lek. Dar 3:20 chiah a ni. Thawm nei hauh lovin chu building lam chu a pan ta chhat chhat a. Kawngkapui rinawm leh nghet tlet tlawt tak chu a chul kual a. Thim zinga khi suk chung chuan, khawi atanga a lak chhuah nge pawh hriat loh chabi pakhat hi a rawn lek vâ a. Kawngkapuia chabi vuahnaah chuan rawlh lut in a herh khep a. Kawngkapui chu a chìk rut rut mai. Thawm ngaithlain a han ding leh vang vang a. Chutah eng thawm dang mah a awm tak loh avang chuan in chhungah chuan a lut ta a. In chung panna kai lawnah chuan a lawn hman chauh tihin kai lawn hnuai sir deuha kawngka chu hmuin, a let leh vut a. Chu pindan kawngka chu chhunglamah a inkalh tlat avangin kawng dang a ngaihtuah a ngai dawn a ni. 

Chu pindan bul chiah kawngka chu a lo inkalh hauh lo va, chutah zawk chuan a lut ta zauh. Study room zau helh hawlh a lo ni. Lehkhabu te chu a intiang erh urh a. Dawhkan lian angreng tak hualin chair pali a inhung khap bawk. Pindan pakhat zawk nena a indaidanna bang cement chu a kawng atanga a reh chhuah pistol chuan a kap ta bur mai. Silai puak thawm te chu chutiang zan reiah te chuan hriat loh chi ni hek lo le.. A duh aia rangin thawm a hre zui nghal. Chuveleh Lehkhabu intian ùrhna chhuar chu a nam thlu leh ţhuai a. Bihrukna a melh ta vat. A vâng phian mai. Thawm lah a rawn hnai tawh si, light chu a in off rih bawk a, a la thim ruai a. A awmna ep chiaha lehkhabu intiang lamah chuan a petek ta zauh a, a phènah a va inzep ta zauh. Mahse, light an on rualin an rawn hmu dawn tih a hai lo. Zanin chu a chesual dawn pawh a ni mahna. 

Light chu a rawn eng ta ut. Vanneih asiamin a mi duh ngei mai chu rawn lutin lehkhabu darh nuaih chu a melh kual a, a hawi kual rualin silai kua a hmachhawn ta nghal. A hamhaih atalangin tihtur pawh a hre lo. Silaia tintu chuan a hmai a tuam hauh lo naa a sam kir lek lek rawn tla thla chuan a hmai chanve dawn chu a hliah. 

"Paa, eng nge i hmuh? " hmeichhe aw tliang ralin a rawn ti a. 

Silaia tintu chuan mitmeiin a sawi tur chu a hrilh nghal. Aw khur lek lekin , "Eng.. Engmah a ni lo. Sazu a niang" a ti ta tawp a! 

Kawngka chu silaia tintu chuan a va khar nghal rap.. 

Silai puak thawm hre phak in chung lama mu te pawh an rawn tho sang sang a. An rawn chhuk thla khep khep mai. Nu ber chu Study room kawngka bulah a lo ding a. 

"Nu, eng nge puak kha? " an fanu upa zawk chuan a ti a. 

"Ka hre lo, silai puak ri niin ka hre sia, i pain sazu thawm a ti ringawt a. Kawngka lah hi a inkalh tlat bawk si" ngaihthat loh hmel zet hian a lo ti a. 

"Thil dik lo a awm chiang" a fanu naupang zawk chuan a ti a. A phone la turin in chung lam a pan zui nghal. 

Mahse, a tlai,..!  

"I thi dawn.. Mitthi khuaah kan inhmu dawn nia " titu mitmeng hlauhawm zet chu thlabar zetin a melh ran a. Ţawng a tum a, a kha a chih vek.. Silai a puak leh ta dur! A reh ta vawng vawng mai. Mahse, a reh rei lo, nu ber leh a fanu upa zawk chu an rak ta tuar tuar a. Kawngka chu hawn tumin an chum vak vak. Chutah a rawn inhawng rawp a. An la hmuh ngai reng reng loh, palian zet mai a rawn chhuak a, ngawi rengin a rawn kal pel bawk. Chiâi zeta an thlir reng lai chuan kawngkapui a kan ta a. Hre chhuak thut niawm takin an va umzui a. Mahse, ramhuai emaw tih mai turin khawiahmah an hmu zo lo. Fanu naupang zawk chuan ţap pur chungin Police a call nghal a.. An rawn thleng rang khawp mai. 

Enquiry an han la a.. Police officer Ramliana chuan, "Ni 4 liam taa Pu Rinawma thih dan nen khan a inang hle mai" a ti sup a. Ni e, an chaldarah ve ve kah an ni miau a! 

Thil thlen dan chu Pi Darmawii leh a fate chuan an han sawi a. An ţap leh rih thul. An thlabarzia leh hrilhhaizia chu a lang chiang reng mai. An pa thattu chu a hmel fak an sawi thei der lo lehnghal. Palian tak, a duma inthuam.. Tih bak sawi tur an hre meuh lo. Police ten rang takin chu lai area chu an check nghal zung zung a. Mahse,hmeithai ina mipa sazu zawn ang maiin an mi zawn lai niawm chu an hmu zo ta lo. 

Inspector Zirliana chuan, "Hmanni lawka thil thleng kha chu chhui zui harsa tak a ni a. Pu Rinawma kha a farm house-a thah a nih bakah amah chauhin a awm a. Hnuhma leh sulhnu han chhuizui theih kan nei lo a nih kha. Tun ţum erawh tlemin hma kan sawn e. Pu Rosiama thattu leh Pu Rinawma thattu hi mi thuhmun an ni ngei ang. Chhan tha tak a awm bawk ang" tiin a naute chu a hrilh hlawm a. Hmabak erawh a ko ve viau ang le.. 

Kum 3 liamtaah khan.. 

"Ephraime, hei hi i duhthlanna maw? " Doctor Jimmy chuan a ti hawk a. He nau nen hian hun rei tak atangin an inhre tawh a. A fapa ang hialin a en tawh a ni. 

"Aw.. Ka nu chhungte zawng chhuak turin ka inpeih tawh a ni" a lo dam thlup. A nu thih atang khan kum 7 lai a lo liam ve ta reng mai. Tunah chuan, kum 30 a lo tling ta bawk a. Puitling a inti tawk tawh a ni mahna. 

"Chuan, i in leh lo chu tiral mai la.. " Jimmy chuan a ti ban chat. 

"Ni lo ve, i kutah ka dah ang. A chhan chu Mizoramah ka awm hlen dawn hleinem. Eng emaw tawhsual tawka ka lo thi ta a nih pawhin i thlah ten an rochun tawh mai aniang chu.. Ka nu lu nghahna hmun hi ka hralh thei lo" Ephraime chuan a ti a. Jimmy pawn a hrethiam viau. 

"Mizoramah tumah hriat i nei si lo va, engtia han khawsak nge maw i tum le? " a ti leh a. Doctor Jimmy hi Hmar hnam chi khat niin, he lai hmunah hian ţhangkhat lian zet chu an lo khawsa tawh a ni. 

"Ka ngaihtuahawm loh ang. Pawisa ka nei a, a tawk rih mai" Mi ţawng tlem tak Ephraime chuan a lo ti ve mai a. 

"Shillong hi i nu lu nghahna hmun a ni tih i hre reng tur a ni" Dr Jimmy chuan a ti nghut a. Ephraime kal tur chu a ui ru hle tih a lang reng mai. 

Amah bawk chuan, "I pawisa kawl sa khan a daih reng dawn lo che a. Buaina i tawk a nih chuan min rawn hrilh hreh hauh suh ang che.. Mizoramah chuan hna a vâng viau ania.. " a ti leh a. 

"Ka hre vek tawh alawm.. A takin ka la hmuin a leilung ka la rap lo mai chauh a ni" a lo ti hul hak a. 

"Aw le, i duhthlanna a ni miau si a. Ka duhdan chuan he tah i nu lu nghahna hmunah ngei hian khawsain nupui fanau te nen hlim takin awm ula ka duh a nia" Jimmy chuan a lo ti a. 

Nupui! Chu thumal chuan a nuih a tiza. A nu chauh lo chu hmeichhia a mamawh lo. A taksa tinuama a khum ţawmpui duh hmeichhia zawng a hmai lo, ni e, mut pawh a mutpui tam tawk e. Mahse, nupui neih hi a la ngaihtuah ngai lo. A nunah a nu aia lal leh langsar tur tumah an awm a remti lo bur! 

A in leh lo te chu Dr Jimmy kutah dahin, Hmabak kó tak chungin Mizoram leilung a rawn rap ta. 

A lo ngaihtuah leh ruahman lawkna angin Aizawl aţanga hla lo takah ram zau lutuk lo leiin, chutah chuan chenna in nuam tak, lian lutuk si lo a sa ta nghal a. Sum a awm hi chuan tih theih loh hi a vâng thin. A in sak chu a duh khirh êm vangin a mi chhawr panga laiin an bansan hial! Khawi atangin chutiang sum zozai chu a neih tih Dr Jimmy takngial pawhin a hre lo ang. A nu khan pawisa tam tham hnutchhiah tur a nei lo. Mary kha Factory pakhatah a thawk ve chauh a, a hlawh lah a beitham viau. An chenna in erawh Ephraime in kum 2 a rawn tlin hian a lei ve chauh a ni. A fapa chu a tan a pawimawh ber bawk a. Shillonga zirna tha berah luhtirin mi puitlinga chher a tum khawp mai. Mary hringnun kha a chhukchho khawp mai. Chu tak chu a ni a fapa hian rulh let a tum tak ni. 

Mahse, a fapain Master degree a zir laiin natna chimawm tak Cancerin a rawn man a. A fapa bulah rei tak a zêp nghe nghe. Mahse, hna a thawhpui reng avang leh a incheckup mumal loh vangin kar loah a natna chu a rawn lang chhuak ta a. Chutah chuan a ni Mi ţha tak Dr Jimmy nen an intawn ni. A harsatna leh an khawsak dinhmun te hriain, an hnam a lo inunau bawk a, Dr Jimmy chuan a lainat ta khawp mai. Tichuan, an chhungkaw Doctor angin a rawn kan ta fô a. Ephraime pawn a hre lo thei ta lo. A nuin cancer a vei tih a hriat chuan a thin tawt lutuk chu a puak leh lek lek a ni. Dr Jimmy awm lo se zawng a nu aiin a kal hmasa maithei a ni. 

Tichuan, Chu lai Aizawl atanga hla lotê, ramhnuai ni si-ah chuan a nu tel loin hringnun bul a ţan chho leh ta kha a nia. A sum khawlsa pawh a phai ve duak mai. Kum 7 chhunga a thawhrimna leh a hna thawh zawng zawng te ngaihtuah chuan rin ai takin a hmang tangkai e.. 

A khum zau pui, nelawm loh zet chungah chuan ţhuin.. Thlalak pakhat hi a lek vâ a.. 

"Ka rawn hmu thuai ang che" a ti vawt raih a.. 

(Comment ve u la 😊