Boss Amanda 5

BOSS AMANDA (5)

Ziaktu: Toni Râlte

(Link tel lo hi chuan, khawiah mah lo post chhawng lo hram r'u aw.. 😊

Dar 12 rik dawnah a rawn haw leh chiah. Ka lo muhil tawh lehnghal. A thawm a dim tehchiam si lo va, ka harh leh. Ka va tho chhuak a. 

"Eng nge i tih chen chen a? " ka ti nghek. 

"Taxi kha ka va en leh.. Ka lo mangnghilh chiang lutuk a, Zonunsanga taxi kha.. " a ti hap a. A lung a awi hmel riau! 

"Chuan" ka lo ti nghut. 

"Ka beisei ang ngeiin kha taxi-ah khan Zonuna kha phurh chhuah a ni.. A khalhtu erawh a ni lo" a ti ta a. Ka lo meng phawk hrû! 

"Tuin nge khalh? " ka lo ti vat a. 

"Ka la chiang ngam lo.. " a ti mai a. 

"Ruatkima kha a ni thei mai ang em? Ani kha kei ka ringhlel riau mai. A û tak tak a ni bawk si lo" ka lo ti a. Coffee a va chhuang leh rak rak a, kei pawh ka thu nghet leh ta deuh. 

"Ka hre lo. Ruatkima mitmeng kha a huaisen viau mai a, tin, motor a khalh thiam loh thu a sawi kha" a ti a. 

"Dawt a sawi leh sawi loh kan hre hleinem" ka lo ti ve tlat. A ngawi ta daih a. Coffee kan in zawhah a khumah inkuah chialin kan va mu leh a. Engmah kan ti lo..! 

Mi pali lai thihna chuan Zoram a fan hneh ta khawp mai. Rin loh lama min khalh lut leh daihtu he tualthattu huaisar tak hian mi pakhat thah a tum thu a la sawi leh ta nghal. A mi thah tur tal te hi hre thei ila kan chhanhim thei tur. Police lu chu a tihai ve khawp mai. Chhui zui theihna tur reng reng a hup bet chat chat mai bawk si a! Mahse, Amanda hi ka ring tawk. A chhui chhuak leh mai ang chu maw.. 

Zonuna thih atanga ni 2-naah Amanda chuan, "Khawchhak tlang dung ka han fang lawk ang e. Tu bulah mah ka zin tur thu hi lo sawi lo la, Ka BP a hniam deuh vanga Damdawiina ka awm thu i lo sawi darh dawn nia" a ti ta a. Ka bo hû thung. Mahse, a thu awih zel a ngai si.. Min hruai ve lo chu ka thinrim lek lek. Mahse, ka pawimawh rih lo a niang e. 

A zin ni chhuna office ka va kal chu, a reh ruai mai. Mi min zawh angin Amanda chu a BP tlakhniam thu ka lo hrilh zel mai. Tihtur a awm lem lo bawk a tiin Amanda min ngen angin Zonuna in luah lam ka pan ta a. Inleng pawh an lo awm tawh mang lo. Khawpuiah chuan kan buai tlang tawh em a ni. A in luah neitu te inah chuan ka'n thu ren rawn a. Sawi tur tehchiam ka hre lo. 

An fapa tlangval lo awm ve bulah chuan, "Zonuna khan thian han kawm bik te a nei vak lo em ni? A driver pui rawn leng lut thin ang te hi" ka ti khawmawi a. 

"Nei lem lo ti ila driver ve tho chu vawi hnih khat chu a rawn kal tawhin ka hria. Keini ho nen hian kan inkawm tam mah zawk. Bakah amah Zonuna kha a leng lam vak lo, Kohhran thiltih velah a chhuak a ni mai. " a ti ve mai a. 

"A nau nen khuan in inkawm mang lo mi? " ka ti leh a. Thingpui min rawn siamsak chu ka dawt khulh. 

"Aw.. Mak ka lo ti zawk a, a û bula awm ve reng ang khan a insawi a. Mahse, a sawi dik tho mai thei. Kar tluana a riah bo chuan, keini tan han hmuh ngaihna a awm lem lo. Mahse, Sunday velah tal pawh kan hmu ngai mang tlat lo va" a ti a. Ka lo chhinchhiah kar mai. 

Thingpui ka in zawhah Zonuna in luah lamah chuan ka chhukthla ve a. Ruatkima a awm tih ka hriat vangin. Kawngka chu a lo inhawng hiai a. Ka va luh chuan, Ruatkima leh mipa pahnih an lo awm a. A thiante an ni mahna.. 

"Ehe! I lo kal law? " a lo ti hlut a. Min lo la hre ve a nih dawn hi. 

"Nia, hei ka rawn kal leh mai mai. Amanda damdawiinah a awm bawk nen, zuk kal ve leh mai mai teh min tia" tiin dawt var ka han sawi zauh a. 

Mak tih hmel angreng tak hian, "Amanda damdawiinah a awm maw?! Ngati nge? " a lo ti vat a. 

"Umm aa a serious hran lo, a BP a tlahniam deuh a, Doctorin awm rih rawh se a tia nih kha" ka lo ti ve mai a. 

"Khawi damdawiinah nge a awm? " a tih leh chuan, ka hamhaih lek lek. Mahse, "Aa.. Amah hian sawi a duh lo va, Damdawiin a awm tih phei chu mi dang hriat a hlau zawk.kan case chhui lai a serious si a" ka ti ta ringawt. A buk nghut nghut danah a awih ve ni fahmiang. 

A thiante chu an zak nge an hlau nge an ngawi run reng mai a. 

"I thiante ni maw? " ka ti khawmawi a. 

"Aw ka balu lak pui thinte an nih hi.. An fel khawp mai" a ti ve luam a. 

"E taka! Khawhai lama in chhungte chu an rawn dikdak ta lem lo a ni maw? " ka ti hluai a. 

"Umm.. Engmah an rawn sawi lo. A pawi lo, min ensan tawh a, an tuamhlawm leh nih ai chuan, hetia rethei taka awm hi ka duh zawk. Ka nghei bik lo vang" inhrosa awki deuh hian a ti a. Sawi leh tur ka vân mang e aw.. 

An balu lak thin dan te sawipuii, a thiante pawh an rawn ţawng ve hlawm a. Rin ai takin kan inkawm thei ta phian. Ka haw dawn meuh chuan khia a tlai ruai tawh mai. Chaw ei tur te chuan min han sawm khawmawi ve naa, ka hnial ta mai. A zah pawh a zahthlak e a.. 

In ka thlen veleh Amanda call nghalin kan inbiak dan zawng zawng ka hrilh ta vek a. A pawimawh a ni awm phawt ang a. Zanah Zela nen a bialnu kan va rim daih. Amanda chu ka ngai veng veng mai. Eng chen nge a cham dawn lah ka hre si lo. 

A tukah chuan phone bo vel chungchangah kan chhuak a. Rukru ho thil rûk thiam thinzia hi chu aw.. Bum theih theih a mual lah an ngah. Rukruk hi a addict theih lehnghal. Rûk a ni tih hre reng chunga an thil zawrh lo lei ching lah an awm! An demawm em em chuang lo. An bum thiam ve bawk êm a ni. 

In ka thleng chiah tihin Amanda call ka dawng zat. "Sam, ka inah va phei la, eirawng lo bawl rawh. Dar 8 bawr velah ka rawn thlen ka ring" a rawn ti! Chhan pawh ka chhan hmain a dah leh daih. Thupek min pek chang hi a thiam a! Bual pawh inbual ta lo chuan ka phei leh ta a. Chabi hi pakhat min kawltir ve ţât a. Ka thiam ang angin eirawng chu ka bawl a, Zela kal tlangin Whisky ka lam zân bawk. A chau awm sia, a duh ve tho ka ring a.. Hehe.. 

A sawi ang takin dar 8 pelh hlekah a rawn thleng a. Chau hmel pawh a pu lem lo. A sam pheng zet chu a inhmeh phian.. A inbual nghal a, keiin chawhmeh ka lo tilum. A inbual zawhah zanriah kan kil ta a. A ţawng hun ka nghak tawp. 

"A mak hle mai" a rawn ti hlawl! 

"Eng chu? " ka lo ti hû a. 

"Zonunsanga atanga engkim hi inţan a ni ti ila a dik mai awm e" a ti ta mai a. Ka lo man thiam lehpek lo. 

"Khang hmeichhe pathum thihna pawh kha maw? " ka lo ti nghek a. 

"Umm.. Ka rin aiin a tawp awlsam.. Mahse, ka thin a rim takzet a ni. He mihringpa chungah hian " a ti a. Ngawi rengin kan ei dun leh mawp mawp. Chaw ei kham leh mut hma inkarah whisky lem pahin kan sawi dun ta a. 

"Ruatkima chu engtikah nge kan man dawn? " ka ti ta hlawl a. 

"Naktukah kan man ang" a ti vawt raih a. 

Hmeichhe pathum leh Zonunsanga thattu chu Zonunsanga nau Ruatkima a ni tih a chiang ta. Mahse, engvanga that nge a nih tak ang le? 

"I zin bo chhan kha hriat ka phû tawh lo maw? " ka ti sup a. 

"Khawhaiah ka han zin alawm. Ka zawhna thenkhat chhanna chu ka hmu a, mahse, Engvanga hetianga che nge a nih ka hre bik lo. Rin dan erawh ka nei. Amah ngeiin a la sawi ang chu" a ti ta a. 

"A nih engtin nge Ruatkima hi i rinhlelh theih? " ka ti a. 

A aw a thian kharh kharh a. A no sawi hliau hliau pah chuan, "Van pawl khan ka rilru a tibuai ta ber a. Tin, Zonunsanga ka rinhlelh thu chu ka sawi tawh kha. Ka veh ru deuh thin naa fiahna ka hmu lem lo. Van-ah bawk khan lut leh ta ila, kan zawn reizia i hriat kha. Pu Zaia van kha kan bitum tih i hre thei ang. Lalţana chhanna atang khan thil ka zeldin ta a. A inrem ta riau. Vanlalruati ruang kha Van-a phurh a ni ve em tih kan hre lo va, Rinsangi leh Thanpuii chu Van pawla phurh an ni ve ve a nih kha. Tu emaw chuan Van pawl kha a hmang tangkai ta riau a ni. Lalţana te riah luh hun kha chhut la, Rinsangi thih zanah chiah an riak lut. A nih chuan an Van thuhruk kha tu emaw chuan khalh chhuakin Rinsangi phurh nan a hmang ta a ni. Tichuan, Thanpuii a ni ve leh a. Mahse, Lalţana te an lo haw tawh tlat. Mahse, vanneih asiamin Lalţana chuan Apu Zaia te ina va dah lovin an kawtah Van chu a park a nih kha. Kha Van ngei kha ru chhuak lehin Thanpuii chu Tanhril daiah a ruang a zu hnutchhiah a nih kha. 

Engvangin nge Van pawl kher?! Hei chu rinhlelh kai loh nan leh kan rilru lakpen nan a ti a ni. Tichuan, Pu Zaia garage-ah khan lut ruin Van chu ka va bel chiang ta a. Silver thi leh thisen khawro tawh ka va hmu chhuak ta a ni. Chu ringawt chu ngaih tihthatna a tling lo.. Mahse, ka haw lamah Pu Zaia te in piah lawk kawng kual laiah Zonunsanga taxi ka hmu ta tlat! A khalhtu hmel erawh ka hmu chiang thei lo. Zonunsanga ni lovin Ruatkima ngei a nih ka ring. Ka chet dan min thlithlai a ni tih ka man thiam ta a.. Mahse, Ruatkima ka la hmelhriat tlat loh avangin Zonuna ka la ringhlel zel.. Tichuan, Zonuna heta a lo kal hmasak ber nia a ruka a thla ka lo lak ruk chu en tha lehin ţhi a awrh leh awrh loh ka en a ni ber. A awrh hauh lo! 

Khatah khan ka buai ta deuh! Tichuan, Zonuna chu a rukin ka veh ţan a, mahse, ka rin loh leh beisei loh lutukin a thi ta si a! Ka buai ta a ni. Finfiahna ka zawn mek laia khatia ka mi um ber thah a nih mai bakah vauna ka dawn leh takah khan, Zonunsanga ka ringhlel tih hriaa Ka chhui thui zel chuan man chhuah a ni dawn tih inhretu ngeiin Zonuna kha a that a ni. Tin, khang hmeichheho thattu pawj kha amah chu a ni. 

Zonuna thihnaah kan va kal a. A in kan zu fan ţum khan, ka duh chu ka hmu ta a ni. Khum kil sira dawhkan-ah khan passport photo a lo let ngât a. Ka hum chhuak ta zauh a, a hnua ka en chian chuan, Zonunsanga nena inang lek lek, mahse, hâng angreng tak silver ţhi awrh ngei mai chu a lo chuang ta vah a! Ka lawmzia chu.. 

Mahse, tu nge a nih ka la hre mai lo. Zonuna nau kan kawm khan kha pa ngei kha a ni tih ka hre ta a. Mahse, ka man ringawt thei lo. I hriat kha.. Khawhaiah ka han zin a, an chanchin ka han thlithlai ta a. An lo hre tha viau mai. Tlangval fel tak, an fahrah vanga khawngaihthlak tak anga sawi a ni. A patea te chungchang a sawi pawh kha a dik vek. A nu leh pa leh a nau thih dan te pawh. Tin, Zonunsanga bialnu thih dan pawh kimchangin ka han hre ta a.. Ngaihruatna ka ngah phah hle. Zonunsanga pawh an lo hre hlawm viau. Aizawla a rawn chhukna a la rei lo bawk a. Tlangval fel leh tlawmngai tak a ni a, a bialnu thihnain a tih khaw loh deuh vanga Aizawla rawn tla thla niin an sawi bawk.. An chhungkaw chunga vanduaina thleng mawlh mawlh kha a mak an tih thu leh an vanduaizia an sawi nual.. Vanduaina nge tu emaw thil tih tih chu kan la hre thuai ang.. " a ti ta dap dap a. Ngaihnawm ka lo ti nasa mai. 

Van kan zawn nasat vanglai khan ani chuan ngaihdan leh tum mumal a lo nei daih tawh tihna a nih chu! Zonuna kha rinhlelh nachang pawh ka lo hre ve lem lo lehnghal. Mahse, a han sawi en takah chuan a lo rinhlelhawm ve em bawk a ni. Buaina ka la nei.. 

"Mahse, silver thi atang ringawt chuan a fuh thei dawn em ni? Ruatkima khan motor a khalh thiam loh thu a sawi kha.. Bakah engtin nge khang hmeichheho kha a phurh vek theih ang? A bum nge tihluihnain? " ka ti vei thluam a. Ka fin ve hmel tawp. 

"Hei hi rei tak ka buaina a ni. Mahse, Zonuna hretu taxi driver dangte ka kawmnaah kan zawhna chhanna hi ka hre ta chiah a ni. Zonunsanga hian taxi a khalh regu viau lo a niawm e. Driver dang a chhawr veleh chhawn thin thu sawiin, chu driver thar chu an pawh vak loh thu leh amah pawh a hran deuh thin thu an sawi leh ta zel a. Vanneihna hian min umzui ka ti mai.. A dik tiraw? " a ti duah a. A fel leh ta thlup mai. 

"Mahse, a mak tho. Engtin chiah nge khang hmeichheho kha a phurh thin ang le? Chu pawh Van pawlin.. Vanlalruati kha chu Zonuna taxi pawh lo nise, amah Zonuna kha a rawn inreport bawk si.. A mak riau" ka ti ve leh zel a. Ka hnial hrat khawp mai. 

"Sam, thil zawng zawng hi kan chingfel thei bik lo alawm. Amah Ruatkima ngeiin a la sawi ang chu.. Mu tawh ang. Naktukah tualtthatu inpuanna kan ngaithla dawn si" a ti thliam a.. Ka lo pawm kher mai. Mu tura a pindana kan inzui luh lai chuan, ka khi ver ver mai.. Mahse, a zin chau ve bawk sia.. Hmm.. Ninawm.. 

A tawpna:

Dar 10:30 a ri tawh. Kei leh Amanda bakah Inspector Saidinga leh Constable Rammawia te nen Ruatkima te in chu kan pan ta a. In chungah kan peng zuai. Ruatkima a awm leh awm loh kan zawt thlithlai a. 

"Awm ang chu a.. Kan inpawh lo bik khawp a, tukina chaw ei tura ka zuk koh kha chuan a la awm kha maw.. " tiin pa ber chuan a lo ti a. Ni e, Zonuna ang lo takin a nau hi an pawh ve loh bakah a hmuh pawh an hmuh vak ngai loh thu an sawi tlat! Zoram titi pum luahtu case a nih miau avangin tlang thantir vak chu thil tih chi a ni si lo va, an in chungte bulah pawh thil awmzia kan sawi rih lem lo. Mipui thinrim kan dang zo lo palh ang tih a hlauhawm tlat! 

In hnuaiah chuan kan inzui thla a. In hnuai atanga chhuah chhohna hi in chungte bed room lam a nih avangin an inhmu zen zen lo pawh kha a mak vak lo.. Kawngkapui nen a inhlat viau si a. 

. 

Kawngka chu a lo inkhar phui khap. Amanda chuan a han kik a, a reh tlawk tlawk mai. Rei ngial kan nghah hnuah Amanda thinin a tuar ta lo nge.. Kawngkhar chu tichhe turin min ti ta a. Ramliana nen chuan kan han bei a, awlsamte chuan chhunglama a inkalhna chu a inhawng ta mai a! In chhung kan luh chuan tumah an awm lo. A reh ngawih ngawih a ni ber. 

"Thil dik lo a awm" Tia phun sap chungin pindan te takteah chuan a va lut a. A rawn chhuak zui leh nghal. Bathroom lam panin,bathroom chu chhung lamah a inkalh tlat. Tihchhiat a har zek lehnghal. Kan kar chhe thei ta hram.. Kawngka a inhawng chiah tihin Ruatkima lo inkhai vû chu kan hmachhawn ta a ni. A lei a seh tut a, a meng pual hrû bawk. A thi chiang hle tawh tih a hriat. Ruang chu kan la thla a, Postmortem a ngaih dawn vangin Ambulance kan ko nghal. Kan thawm a lo ring deuh nge an ngaih a lo tha bik lo in chungte bakah thenawm hnai ho an rawn lawr far mai. Mak an tih hmel hlawm viau mai. 

Ka thinrim ţeuh ringawt. Thuruk hriat chak nak alaiin.. Amanda chuan pindan a va fang leh thuak thuak a. Note bu chhah vak lo a rawn zakzeh ţât e. Mahse, lung a dam chuang lo. 

Ruatkima chu tualthattu a ni tih puanzar a la ni lo. 

A lehkha hnutchhiah erawh Amanda ho vin kan la chhiar ang chu… A ruang hlawm tur takngial pawh awm hek lo. Zonuna chenna veng ten a thlan laihsakin a û thlan bulah an phum ve ta ngawt kha a nia. A khawngaihthlak rualin, a phutawk tih mai chu a awl ve riau. Khawhai lam pawh chanchilh hrilhriat tawh an ni a, mahse, an rawn dikdak lem lo. An unau thil neih te chu engtia tih chi nge tih chu court lamin an la relsak ang chu.. 

An chhungkua an mang titih chu a ni ta der mai! An farnu neihchhun chiah kha a dam awmchhun a ni ta. Ani lah chu biak pawh ngaihna kan hre miah lo lehnghal. Khawhai lamin an lo hrilh hre em ang chu.. 

Ruatkima inpuanna chu ni 15,10,2017-ah ngaihthlak leh chhiar turin Amanda office-ah a let ran mai.. He note bu hi finfiahna atan kan pawmsak thei ang em? Court-in a pawm thei ang em? Tu nge hria?! 

(Next i lo nghak dawn nia 😊