Boss Amanda 4

BOSS AMANDA.. (4)

Ziaktu: Toni Râlte

"Sam, kan tlai.. A va pawi tak em.. Ruang an chhar leh tawh.. Mahse, mipa a ni! " a rawn tih chuan ka thaw hawk ringawt. Ka va ning tawh tak êm.. Ruang chu Zemabawk daiah a ni leh ta! He mihring rapthlak tak hian engzat chiah nge maw thah a tum le? 

An lo la pungkhawm tam vak lo, Zing dar 4 a pel hlek tawh a. Amanda pawh ka va hmu nghal. A hmel dur khap leh lungchhiat hmel tak ka hmuh chuan ka kawchhung a fan rawih rawih mai. Ruang ka va hmu ve chu ka tawlhkir dâwrh! Zonunsanga, taxi dirver kha a lo nih chu! Chhei! Engvang nge ni ta ang le.. A ngaihna ka va hre lo em.. 

A taksaah hliam a awm nual lehnghal, a ban veilam kawi ngâwk chu a tliak a ni tih ka hre thiam ve mai. A hmai chu a duk chhuak lek lek, sawisak leh hnek hrep a ang ka ti ber mai. Ani hi chu a nak dinglamah vih a ni a, a vihna chemte pawh a la bur vû mai. Ka mit sulh a ni ber, thahnemngai taka min thawhpuitu ber kha a ni asin. Engtin nge hetia rawng taka thah a nih theih? Chemte chu forensic lamah thawn a ni a, kutze thla pawh lak tur a ni. 

Ruang an seihawi hnu chuan, Amanda chuan a bul vel chu a han dap leh ţan a. Engmah a hmu lo! Amah Zonunsanga hi lo hre sa lo phei ila chuan, tu nge a nih hriat theihna pakhatmah hnutchhiah a ni lo. Ruang hmu hmasa bertu chu Chhingchhip atanga rawn haw Pu Dina te nupa an ni. Anni hi Chhingchhipa an nu nu leh pa te bulah an han zin lai a ni a, mahse, zing lam dar 1 bawr velah an fanu nikhaw hre lo va a awm thu hrilh an nih vangin a zan azanin an lo tlan hawng a, kawng sir maia ruang let reng chu an hmu lo thei ta lo a ni. 

A thu hnawk a. A melh ngai a melh vang vang. "Sam, ka hlawhchham dawn ta a nih hi" a ti sap a. 

"Chutiang sawi suh. I hlawhtling dawn chiang" ka lo ti vat a. A beidawng hmel chu hmuh hrehawm ka ti kher mai. Zing khua a lo vara Police Station kawtah mipui an lo pungkhawm luai luai mai. 

"Kan Sawrkar uisathiamte hian mi pali rawng taka thahna hi an chhui chhuak thei lo a nih chuan, bang ngam rawh se" tiin an au dum dum nia! Office-ah kan thu tlawk tlawk. A tlawmthlak piah lamah a rilru natthlak takzet. 

Amanda chuan mitthi thlalak te kha a en kual leh a. Ka lo thlir reng ringawt. Chemtea kutze thla lo lang lah kha Zonunsanga kutzia bak a lang lo! Tualthattu namai lo tak kan hmachhawn a nih chiah hi.. Kei chuan kawng zawh tur ka hre tawh lo. 

"Zonuna kha keima hnuhluh niin ka hria a, Sam, ka inthiam thei hlawl lo. Thi lo tur a nia sin" a ti sap a. 

"A ni lo vang, i ngaihbel mai mai a nih kha.. Mahse, Zonuna ber kher a bitum hi chu a mak ka ti khawp mai" ka ti a. 

Zonunsanga chu Khawhai lamin an rawn ngaihsak si lo va, a in luahna lamah a ruang nghah niin ropui taka vuiliam a ni. Rin aiin thenrual a lo ngah a, uitu pawh an lo tam hle mai. Mipa sual tak kha a ni lo reng reng bawk nen. 

An vui zawh tawh lamah Zonuna in luahna lamah chuan muangmarin kan zu kal ve leh a. Office kawta mipui pungkhawm pawh an ţin tawh. Zonuna in luahna pa Pu Rinliana chu pa dam thlup mai, thau liang luang hi a ni a. An nu Pi Mary erawh nu cher lam, meng thìp ram mai a ni thung. Ka nel loh zawng tak a ni. 

"Zonuna hi tlangval fel tak a ni a; nikum hmasa khan in luah tur a rawn zawng a, a hmel kan hmuh khan mi fel tak nia ka hriat avangin ka lo remti hmiah mai. Tichuan, a tul tul te thawk vein insakna lamah te a thawk ve lawp lawp a. Taxi ka lei a, ka faten khalh peih hek lo, Zonuna chu kan khalhtir ve a. A eizawnna tur tak a lo ni a, thahnem a ngaiin a hah pawh a hah ve hle. Kum khat chhhung zet kan taxi a khalh tak hnuah chuan, a thiante sawipuiin 2nd hand taxi a la ve ta rawih a. Kan taxi pawh chu kan nu nau fapain a khalh ta bawk a. Tiang chuan thahnem ngai takin a khalh chho a, keini pawn chhungkhat ang chiahin kan en.. Ka fate nen pawh an inkawm fo.. Chuan, a mimal chanchin tak hi chu ka hre thuk vak lo. Amah hian a sawi tha vak duh lo va" Tiin Pu Rinliana chuan a ti a. 

Amanda chuan, "Khawhai lam atangin rawn hmu leh rawn thlenchilh te an awm ngai lem lo mi? " a lo ti a. 

Pi Mary chuan, "Thawkkhat lai kha chuan ka nau a a tih kha chuan a rawn thlenchilh deuh reng, kum chanve dawn chu a awm kha" a lo ti ve a. 

Amanda bawk chuan, "A nau chu in hmu ve em? Eng ang mi nge le? " a lo ti a. A pawimawh vak em mawni le.. 

Pu Rinliana chuan, "Aw hmu ve e, a pangngai hmel viau, an pawh an inan riau kha mawle" a lo ti a. 

"Anih tihian amah ber a boral ta sia, a bungrua leh taxi te hi engtin nge in tih dawn? " a ti leh a. 

"Aa.. Engtia han tihtheih pawh a ni lo. A chhungten an rawn ngaihven ve mai turah chuan ka ngai a, Khawhai lama a chhungte pawh chanchin ka han hrilh tawh a. An rawn kal mai ang chu maw" Pu Rinliana bawk chuan a lo ti chuar chuar a. 

Amanda chuan, "A nih nizan khan a chhuak thawm in hre hrim hrim em? A taxi lah chu fel takin a awm lawi sia. " a ti a. 

Pi Mary chuan, "Hre lem lo, chhuat hi slap a nih vang hian in chung leh hnuai thawm hi kan inhre thei vak lo.. A leng ve fo a, zan dangah te pawh, Kohhran thiltihna angah te.. " a lo ti duah a.. Chumi hnuah Pu Rinliana fate ho kan han be ve leh a, thu thar em em kan hre lem lo. Zonuna mimal nun hrechiang tak an lo awm hlek lo mai. Khawhai khua a ni tih an hria a, a thi tih an hriat pawh khan an chhungte biak ngaihna an hre mai lo. Mahse, Pu Rinliana hian a in a luahtir dawn khan document felfai tak a lo neihtir ve thlap a, chuta tang chuan a patea te chu an be pawp thei hram a niawm e. 

Amanda ze zawi lutuk chu hmuh hrehawm ka ti khawp mai. Tihtheih ka nei der bawk si lo. Zonunsanga chu ka ngaihtuahnaah a rawn lut ve zeuh zeuh bawk, a naka vihna kha a thihpui tih result atangin kan hre tawh a. Dampui chi ziazang ni lo chuan.. Ban hunah pawh kan kal hrang mawl tawp! Ni dangah chuan kan inthlah thlum ve thin a nia. Ka mood pawh a chhe lek lek. In ka thlen veleh ka inbual harh nghal a, Zela text msg ka hmuh chuan ka awm a nuam deuh. Chaw ei hmain ka chhuah zauh a, an in lamah ka han chho a, a roomah lut nghalin, a lo thli sen karh karh mai. Ka thutchilh ve nghal a. Zu hi ka in nasa hran lo, eng emaw changa han lem zauh erawh ka ching. Ka pa phei chuan min khak tawh. Police nih vanga zu in angah te min chhuah lek lek lehnghal. Vawiin tlai chu ka mamawh tlat a ni. Zela chuan kan hnuchhui te chu a thuphung min zawt ve a, ka hriat chin leh a pawi lo tur chin chu ka hrilh ve nuah nuah. 

"A chhui chhuak ve leh mai ang, kan mifingnu sawn" a tih chuan ka nui hawk a. Kei pawn chhui chhuak vat se ka duh takzet a ni. 

Chaw ei turin ka haw leh ta phawt. Ka ei kham ţêp tihin ka phone a lo ri leh tawh. Ninawm thei. Amanda bawk a lo ni! Ka la ta vat a. 

"Zonunsanga nau kha zaninah zuk hmu ang hmiang.. A u bungraw ngaihvenin a rawn kal a niawm e" a rawn ti tliang ral a. Zela bialnu rim kan tum ve nen, a thu hnial chi ni hek lo le.. Zela ka be leh a, a lo hrethiam khawp mai. Ka insiam zung zung a. Phur fahran lo chuan ka inkhalh chhuak ta nghal a. 

A ina ka va luh chuan, lehkha them lian lutuk lo hi min lo pe vat. Ka bih ve nghal a, "Tunah chuan a tawp kan thleng dawn ta. Ka sava hual pakhat ka talh leh phawt ang a, chuan ka reh ang.. I spy Zonunsanga ka dahbo a ngai erawh pawi ka ti. A tirah a tel ve miah lo asin le.. " tih thu hi a lo inziak. Tualthattu rawn thawn leh bawk. 

"Hei hi engtika i dawn nge? " ka ti a. 

"Ka haw khan Door mat chungah a lo awm a. Mi dang ka zawt buai peih ta lo a nih kha" a lo ti a. 

"Cvtc vuah ve a ngai a nih hi.. I tan pawh a tangkai reng reng" ka ti nghut a. 

"Ni e, mahse, Cctv vuah ila, he misualpa hian min rawn vau ngam kher lo maithei. Hetia chance kan siamsak hi a tha zawk. A sawi ang chiah khan a tawp kan hnaih tawh. A hmawr kan bawk thei ţêp" a ti nghat nghat a. A insiam zung zung a, muangchang lovin kan chhuak ta nghal a. 

Pu Rinliana inah chuan thalai lam an lo zai ţhat that tawh a. An tam viau mai. Amanda chuan Pu Rinliana chu a va bekbawr sar sar a, a hnu lawkah Pu Rinliana leh tlangval sa tha lam, hang lam lek lek, Hmai fangah chuan Zonunsanga nena inang tak hi an lo chhuak ta a. Zonuna in lamah kan chhuk thla a. 

A in zimtê, felfai angreng chu ka enkual a. Mipa luah a nihna a lang vak lo, Zonuna kha mi che fel tak a nih hmel. Thutthleng sei pahnih a awm a. Pakhatah chuan Amanda nen kan thu a, pakhatah Pu Rinliana te. 

"Ani hi Ruatkima a nia, Zonuna nau chu a nih hi.. Vawiin tlaiah khan a rawn thleng ve chiah a ni" Pu Rina chuan a ti a. 

Amanda chuan chiang kêk kâwkin a melh kal a, a nelawm viau loh. 

"I u chu rawng taka thah a ni a, a ruang êm pawh i ran nang hman thlawt lo a ni maw? " tiel rawngkai lek lek hian a ti ta a. 

Ruatkima chuan a aw thian kharhin, "ka hre tlai èm alawm.. Tlawngah balu lain ka riak daih a, ka thianten news an chhiar atangin alawm ka hriat.. " a ti a. A u thihna chu a tawrh hmel viau mai. Pu Rinliana chuan, "Inleng te dawnsawn a ngai dawn si a, ka chhohsan ang che u. Nakinah thingpui ka rawn pektir dawn che u nia" tih pahin a tho a. Pa fing fel tak zawng a ni ngei e. 

Amanda chuan, "Aw le, Ruatkim, i u chungchang kan hriat loh zawng zawngte hi min hrilh turin ka duh che a ni.. A hmasaberin in chhungkaw chanchin min han hrilh teh" a ti dam thlap a. Ruatkima chu a thu tha sauh sauh a. 

"Umm.. Nia, ka û hi ka nu fabik a nia. A tirah chuan kan bulah a awm lo. Ka putea te bulah a awm thin. Mahse, kum 10 bawr vel ka nih hian ka putea khawsak chu a harsa ta deuh nge ka u hi kan bulah a rawn awm ve ta a. Ani chu kum 15 vel a ni tawh. A felin min duat a, ka pa nen pawh an inrem viauin ka hria. Lehkha zir tawh lo na nâ na chu hna te a thawk nasa a, kan unau pathum kha min chawm ve nasa khawp mai. Keini pawn pianpui unau angin kan en vek niin ka hria. Tichuan, hun a kal zel a, kan lo nula tlangval ve a, ka nau chiah mipa hi khawsikpuiin a na vak a. Damdawiin thlen hmain a boral a ni. Chumi lai pawh chuan ka nu khan mu leh mal a nei meuh lo va, U Zonuna hian ka nu ai a awh ka ti mai, min tuamhlawm vek a ni. Chuan, ka farnu hian sawn a pawm a, vanneihthlak takin a sawn paina nen an innei ta a. Khawzawl lamah an awm. Kei pawh tlangval pangngai ka nih ve hnuah ka nu leh pa te chu kum zawn deuhthawin an boral ta a ni.. Ka sawi dan hi tawngkam ka thiam lo va, ngaihthlak dan in lo thiam mai dawn nia. 

Ka pa a boral hmasa zawk a. A huan kalnaah a lum a, a intuah na hle a niang, in an rawn thlenpui chuan a chatthla tawh a ni. Ka nu chuan a tuar em em a, ka nau thih lai ang mai khan mumal reng a nei leh ta lo va, Ka u nen chuan kan buai thin khawp mai. A kum lehah ka nu chu kan chul fangin amahin a chhuak a, a rawn haw ta mai si lo va. Kan buai khawp mai. Khawtlang kan pun ta tawp a. Ka nu chu ni 3 lai kan zawn hnuah kan vau bul luikawrah a ruang kan hmu ta a ni. A mak khawp mai. Kha lai kha kan zawn nasa tehlul nen, a hnu ni 3-naah daih a ruang kan hmu kha.. Ka u phei chuan ka nu kha thahah a ngai tlat a ni. 

Tichuan, nu leh pa nei tawh lo, fahrah kan ni ta a. Ka u hi a fel êm zawk a, mualphoin kan awm ngai lo. Zan khat erawh zu a rawn in haw ve teh tlat a! Mak ka ti ngang mai. Chumi tum chuan mak tak maiin, "Ka nau tak tak pawh i ni lo va, chuvang chuan Aizawlah ka chhuksan dawn che. Ka patea te bulah awm mai rawh.. "Min ti ta a. Miin an fuihpawrh a nih ka ring. Ka rilru a na em em a, ka ţap hial nghe nghe. 

A tukah chuan a insiam ta mai a. Kei chuan ka ngen ngawih ngawih, mahse, tha deuhin, "Kima, tihian patea te bulah lo awm rih la, khawsak dinhmunte ka zuk siam ve ang a, ka dinhmun a that ve deuh hunah i lo chhuk ve dawn nia.. Nizana ka tawngkam kha chu ka thin tawt lutuk vang a nih kha.. Min hrethiam dawn nia. Ka nu thattu hi a rukin ka chhui reng a, ka hre chhuak thei bawk si lo mangang mai mai a nih kha.. " a ti ta a. 

Ka û chuan min thlamuan thiam bawk a, a kal pawh chu ka ui ngam bik lo. Aizawlah chuan eizawnna te pawh a lo tam a, kei pawn awm ve ka chak reng. Tichuan, ka u chhuk hnuah mahia awm ngawt chu Ka patea ten dikin an hre lo va, an inah ka awm phei ta a. An sawi hmangin kan in leh lo pawh tiral lovin nupui chhia tha ka neih huna kan awm ve nan an ti.. Mahse, mihringn rilru hi a lo danglam nasa thei khawp mai. Kum chanve âwrh ka awm tihin ka patea te chuan min rawn miah lovin, kan in leh lo chu an lo hralh a nih chu! Ka hriat tirh chuan ka thinrim em em a, ka na bawk. Ka âng chiam nghe nghe. An hralhna pawisa pawh ka dil hmiah bawk. Mahse, bank-a an dah thu leh nakinah kan tan vek a nih tur thu an sawi leh a. Ka awih miah lo naa tih dan ka hre si lo. Ka û lah ka be pawp mai thei si lo. 

Kan in an hralh atanga thla khat em pawh a liam hmain ka patea te chuan, Pickup an lei ta chiah a! Kan in an hralhna a ni tih ka hai lo. Kan inhauh phah ta chiam a, min hnawtchhuak ta nghe nghe. Kei lah mi luhlul ve chi ka lo ni bawk nen, pickup chu ka ta a nih thu ka sawi ve tlat! Thuneitu sang zawk hnenah kal ka rawt lahin an ngam chai si lo.. Kan VC te pawn min buaipui ve khawp mai. Chutih lai vel chuan ka u hian min rawn be pawp ta hlauh mai a… chanchin ka hrilh chuan, a thin a rimin a rilru a na ve khawp mai. "Keimah vang a ni. Ka uap lo a, ka tlanchhia a, keimah vang vek a ni" a ti mawlh mawlh mai. Mahse, ka u kha ka thiam lo hran lo, ka patea te khan lem an chang thiam êm a ni. 

Tichuan, ka u remruatna angin kan in an hralhna hmun hniha thena hmun khat tal chu min pe turin kan nawr ta a. A nih loh chuan courtah kan kal tur thu thlengin.. Kal tak tak ila thiam chang dawn hek lo, an pickup lei thar chu an hralh leh a, VC te hriatpuiin pawisa chu kan insem ta a ni. Dik tak chuan kan in an hralh kha a dik lo va, khing thei kan ni. Mahse, ka u in, "He lamah inbengbel law law ila, pawisa hlawm kan neih chuan kawng a awm mai ang.. In kha chu ui lutuk lo mai rawh" a tih vangin ka khing duh lo mai a ni. Ka u kha ka ring êm a ni. 

Tichuan, ka û bulah ka rawn chhuk ve a. Taxi a lo khalh a. Ka sum ken thlak chuan Taxi lei ve a, chuta tanga bultan chhoh zel kan rel dun ta a. In hmun lei nan a tlem tham si a. Sumdawnna lam kan thiam si lo. Lehkha zir nan a tlai leh tawh bawk si nen.. Taxi chu kan la ve ta râwih a. Ka ù bula eng emaw chen ka awm hnuah inhlawhna te ka zawng ve a, ka thawh chi tak, Balu lak lamah ka kal ta a. Chhim lama ka zin vang vang changte pawh a awm. Tlawng lamah ka liamthla deuh reng mai a ni. In chungte nen pawh hian kan innel ve vak lo, ka tawmìm angreng a, ina ka awm ve chhunah ka chhuak ngai lo tihtheih a ni. Chuvangin ka awm ve tih pawh an hre vak lo reng a, kar tluanin ka riak a, sunday rawn hmangin ka rawn haw ve zawk zel a.. An tan chuan hriat a har ve bawk ang. 

Kha zawng kha kan chhungkaw chanchin chu a ni e" Ruatkima chuan a ti ta dap dap a. A sawi rei bawk a, tui a va in khawlh khawlh mai. 

"Anih amah that duh tur awm han rinhlelh te i nei em? " Amanda chuan a ti a. 

"Aih nei miah lo. A thiante hi ka hre vak lo bawk nen.. Ka u hi chu tuman an huat ka ring lo, an nel vek zawk. A fel em a ni" a ti a, a aw chu a lawi rùt mai. A lung a chhia a ni ngei ang. 

"I patea te chuan an hre ve bawk sia, a bungrua vel hi an rawn la mai lawng maw? " a ti a. 

"La ngam lo tawp ang. Sawi tawh ang khan, ka u hi chu ka nu fa bik a nih vangin a chungah thu an nei ngam vak lo. Ka putea te zawk hian rawn ngaihven se ka hrethiam ang. Mahse, an ni nen an inbe pawp tawh ngai lo va" a lo ti var a. 

"Tun hnaiah i riak deuh char char em ni? " Amanda chuan a ti a. 

"Aw kan balu lak a laklawh a, kan thianho pali chiah kan ni bawk nen.. Thawhrim a ngai lutuk a" a lo ti a. 

"A nih hetah hian i cheng zui zel dawn em ni? " a ti leh a. 

"Awmna tur dang ka nei si lo va, ka awm mai aniang chu.. Taxi hi ka hralh mai ang te ka ti ta ringawt.. Mahse, ka û in a duat leh a uluk em em a ni si a, ka inthlahrung. Awm dan tur pawh ka thiam lo" a ti ţuau a. Ka lo lainat hle. A la upat hmel em em bik si lo nen. 

"Ka pi, ka u thattu hi khawngaih takin min zawn chhuahsak hram rawh aw.. Mi dang tam tak an awm laia ka û kher kher min thahsak hi ka tuar thiam thlawt lo a ni.. " a ti leh a. Amanda pawh mit khap sak sak chungin a bu nghat mai. 

"I û thih thu chu i thiante ka atangin maw i hriat? " a ti leh sap a. 

"Aw, ka phone hi tuiah ka thlauh vangin a in on thei tawh lo va. Ka thiante phone khawih khan news-a Zonunsanga ruang chhar tih vel an hmuh khan, i û kha Zonuna tiraw an tia.. Ka va en ve ta vat a. A thlalak ka hmuh khan ka ù ngei a ni tih ka hre ta a ni. Ka chiâi vek a, ka thiante an fel hlauh zawk a, min rawn hawnpui ta a ni" a ti ta mawlh mawlh a. 

"Taxi chu khalh ve mai la.. Balu lak ai chuan a hahdam zawk lawng maw? " ka lo ti ve zauh a. 

"Ka khalh thiam lo. Bike pawh ka thiam lo, ka tlaw lutuk a" a ti a. A nui deuh.. Kei pawh ka nui.. 

Zonunsanga room te chu kan han enfiah ve leh a, engmah phei chu kan hmu lo. 

Kan hawn hnua Study rooma kan thut hnu chuan, "Zonuna kha dar 3-4 vela thah a ni tih thu kan dawng a. He lai tak hi a mak a ni. Pu Rinliana fanu khan, "A zan leng haw phone a hmang thawm ka hria" a tih danah a zan leng kha rukbo a ni lo tih a chiang si.. Zan rei tawha zuk kaithova hruai chhuak theitu chu a thian hnai tak emaw a hriatchian tak an ni ngei ang.. " a ti nghat nghat a. 

"A driver pui an ni ngei ang. Aw a ni ngei ngei ang, Khang Thanpuii leh Rinsangi phurtu ngei kha" ka ti hluai a. Min rawn melh kâwk. 

"Sam, a tir kha chuan Zonuna hi ka lo ringhlel zawk asin" a ti ta halh a. Ka lo melh kuau ringawt. 

"Khatia Vanlalruati phurtu a ni tih a rawn inreport thlap danah khan dik lo awmin ka hre daih tawh. Mi fing fel pangngai tak tan lo chuan, khatiang kha rawn sawi chi a ni miah lo. Chuvang chuan a rukin Zonuna hi ka chhui ru char char alawm.. A chanchin tlangpui ka hriat atangin tualthattu a nih theihna chance a sang viau bawk. A nau kha ka zawt ta lo a nih kha.. Amahin a sawi zauh tawh, a bialnu thih thu kha i la hria ang a.. A lo dik tak tak a! A bialnu nghet kha inawkhluma hmuh a ni ta tlat a, chu chuan Zonuna min rinhlelhtir ta a ni. Beisei ang ngeiin a bialnu thih sarhu laiin Aizawlah a rawn tla thla ta chiah a! I hrethiam zel em? A nau khan a sawi tha duh lo mai mai a nih kha.. Zu te pawh a in ve fô.. A driver pui nen taxi a khalh tirh hian thisen chhuahin an insual hrep tawh bawk. A nun chhungril khawhar leh a bialnu thihna kal zel nen, hetiang hi a ti ta mai nge mawni le ka ti hman a.. Mahse, amah ber a thi leh ta si! " a ti ta zung zung a. Mak ka lo ti viau. 

"Chuan, a nih a nau sawi zawng zawng kha a dik vek em tih kan finfiah dawn lo em ni? " ka lo ti a. 

"A dik thawkhat vek. A patea te vel pawh kha a dik.. An khawngaihthlak unau viau asin. Ruatkima phei saw chu mi zakzum leh inkiltawih tak a nia.. Zonunaah khan a innghat ve takmeuh tih a lang reng" a lo ti a. 

"Tu nge kan chhui zawn tak ang? " mangang fe hian ka ti a. 

"Tu emaw a thah leh hma ngeia kan man a ţul.. Zonunsanga thihna hlawkpui thei tur kan zawng ang" a ti nghet charh a. 

Chutah a tho thut.. A kawr chung a ha a, "Sam, ka chhuah lawk a ngai.. Ka va haihawt tak" tih leh chhuah a rual nghal. A va mak tak e aw.. 

Ngui zetin ka thu tum bûr ringawt.. 

(Tawk rih aw 😊