Boss Amanda 3

BOSS AMANDA (3)

(Adss kha maw, PIN a lo thleng ve hnai a. Dollar 100 a tlin loh chuan ka la chhuak thei rih dawn lo va. Khawngaihin min click uar sak ve hram ru aw. Click khan 10 sec vel nghah ve a ngai a, click nawn tluk tluk kha a chhiat phah thei a 😊

Ziaktu: Toni Râlte

Pu Taia'n min han hmuh leh chuan mak a tih hmel viau. Mahse, tha takin min lo dawngsawng thung. Risk lain tualthattu chu kan chang ta ringawt mai. Thawm a reh vung vung a, Pu Taia chu ka zu kensak in in ţawng châk si, inthlahrung siin a awm a. Ka khawngaih ru hle. Amanda lah chuan a beng a chhi ngun ngang mai. Zan dar 9 a ri ţêp tihin Amanda chuan call a dawng ta a. 

A biak zawhah min rawn melh a. 

"Kal ang.. " a ti sap. Pu Taia bula thil dang sawi kha a hreh ve deuh a niang. Ngawi reng chuan kan inzui chhuak a. 

"Tanhril daiah ruang an hmu" a ti hriam hraih a. A thinrim hmel khawp mai. 

"Ka rin dan vel a ni. Khatianga a rawn vau ngam tawh che chuan, a hmun ngaiah ruang a rawn dah lul lovang" ka lo ti ve hmiah. Ani pawh chuan, "Kawng dang kan nei si lo va" a lo ti sap a. Ngawi rengin Tanhril lam chu kan pan ta a. 

Khua atangin a hla vak lo bawk a, mipui an lo pung khawm hnem tawh hle. Ruang ka hmuh chuan ka thaw hawk ringawt. 

A hma ami te ang bawkin nu valai bawk! Mahse, Ruati leh Rinsangi te ai chuan a u hlek maithei. A cher deuh a, a hleitling viau bawk. A hmel pawh a tha khawp mai. A dan pangngai ang bawkin a hrawkah chemte hriam taka zai thler a ni a. Jean kekawr tight lam deuh pawl tak zet a ha a, chapal kaih bunin, a kawr erawh a dum mawl tawp. Amanda chuan a kut zungţang a zuk en vat a, rin ang ngeiin a zungte û chu tan bun a ni leh ta bawk. Zungbun erawh a hnutchhiah lo a nih hmel. A han zawn vel chiam paw'n. 

Ruang hmu hmasa bertu chu MZU Boy's hostel-a awm mek, Rinkima a ni a. Ani hi chaw ei chhuakin amahin a haw leh a. Kawng bul maia hmeichhia lo mu reng chu zu rui emaw tiin a tlan pel zet a. Mahse, ngaihthat lohna riau a nei a ni chêk ang chu.. a let leh a, a va en nawn leh ta ngat. A lo thi chiang tawh viau a niawm e. Kan zuk thlen pawn a khawng vek tawh rêng a. 

Chu Hmeichhe ruang awmna atanga hlam sawm velah bazar bag niawm tak chhar a ni a. A chhungah purse a lo awm bawk. Amanda chuan a han endik zung zung a, vanneihthlak takin a ID a lo awm hlauh a. Tu nge a nih kan hre thei ta a ni. A hming chu Lalthanpuii a ni a. Kum 49 a ni. A phone erawh kan hmu zo leh ta lo. Ruang an senghawi hnuah ruang hmu hmasatu chu Amanda chuan a han bekbawr a, tlangval fel tak a nih hmel e. Chutia an inbiak lai reng chuan, Tanhril YMA President hian boss chu a rawn bekbawr zauh a. Amanda hmel pawh a phur sawt mai. 

President fapa leh a thianten dawr kawta an thut laiin Van Pawl a rawn tlan thu leh, A rawn let leh lam pawh an hmu leh tho an sawi a. Driver chiah a chuan avangin a rinhlelhawm thei em tih an ngaihtuah a ni. Pu Taia pawh khan Van pawl a nih kha a hmuh.. He van pawl hi zawn chhuah a ngai dawn a ni. Ti nge maw a tir atang khan kan lo hmaih char char le.. Amanda paw'n ngaihtuah chhuah awm tak.. 

A hnua ka chhal leh chuan, "Sam, chutimaia ngaihsam ka ni hleinem. Van pawl hi tunah hian Aizawlah mi 24 hminga register a ni a. I mut der der lai khan a zawn chhuah hna ka lo thawk alawm.. Mahse, chutimaia awlsam a ni lo va. Veng inkarki tak tak an ni a. Thenkhat chu phone call in ka bia a, rinhlelhawm loha ngaih tur thlengin ka chìk vek alawm.. Tunah hian hmabak 8 kan la nei a. A bak kha chu kan thual ţha dawn nia" a lo ti dap dap. Kei aia mawl anga ka lo ngai ve rawk zel hi chu ka zak leh fô thin. 

Thanpuii ruang postmortem a nih hnu chuan a hrawka zaina kha a thihpui tih a lang. A taksa dangah hliam a tuar lo va, pawngsual a ni hek lo. Thanpuii hi Bawngkawn Chhim venga khawsa niin, a pasal nu tar ve tawh lam bakah a fate pahnih nen a pasal te nen an khawsa a ni. Amah hian Bawngkawn bazar bulah Restaurant changkang ve thawkhat tak a hawng ve a. Chu chu an chhungkaw eizawnna a ni. A pasal chuan a pa rochun an huan a enkawl ve thin a niawm e. 

"Lo riak mai rawh. I thawmhnaw pawh a la awm. Naktukah kan chhuak rual thei ang a" a tih avangin a in lam kan pan a. A ngawi ngal reng mai. Ni e, he inthahna hi a tan chuan chona a ni miau a. Tlawm zawk anga a lan avang hian a thinrim hle tawh tih a lang reng mai. Kei pawh dik tak chuan ka thinrim ve tho mai. 

A in kan thlen chuan thil dik lo a awm tih a hre nghal nge, a silai a phawrh ta rap mai. Kei ka lo chiâi thung. Ţawng lo tura min mitmei hnu chuan, bed room lam chu zawite in a pan ta ţhem ţhem a. A hawn rualin silai chu a keng kawh nghal vah a, mahse, tumah an awm lo! Khumah chuan lehkha phek a lo bet vâ a. 

"Bumnuamnu, i lo fing bik lo hle mai. Kha lai thlam bulah khan ka rawn kal leh duh i ring reng reng em ni? Min chhui hi bansan la, min enliam rawh. I nunna in a tawrh hma khan" tih thu hi pentui senin chhe zet hian a lo inziak kalh mai. A chek hlak a, a nui sak bawk. 

"Mai mai chuan, he mihring hi mi pangngai a ni hauh lo mai. Rualban lo kan lo umzui a nih hi.. Rilru lama rualbanlo" a ti hul hak a. A thusawi awmzia leh a chhan ka hre lo. Lehkha pawhthler ka tum lai tak chuan, "Ti suh" a lo ti ţhawt. Min rawn chhuhsak a, ngun em em hian a chhiar leh ta a. 

"Hriatchhuah a hlauh luatah a kut hman thiam loh lamin a ziak a nih hi.. A awmzia chu kan inhlat miah lo a ni thei.. Kei min cho chhuah nana he thil hi ti a ni em tih ka hre lo va, mahse, chiang taka ka hriat chu he mihring hian Kei aia a chungchuanzia lantir a tum a ni" a ti leh fak fak a. Sawi tur ka hre ve lem lo. 

Rei lo teah ka mutsan daih. Tun angah chuan romantic lam hawi theih a ni lo. A thluak a sawrbing nasa lutuk.. A study roomah a riah tak nghe nghe kha.

"Samson, mut rei lutuk hi taksa tan a tha lo. Tho la, va intifai rawh" a aw fiah zet avang chuan ka harh kâwk. 

Ka tho a, ka va intifai sawk sawk. Chumi chhungin eitur a lo siam a, artui kan teh tlawng kan hmeh! A chhuah pawh kan chhuak hma viau mai. 

"Van pawl zawngin nileng hun kan hmang dawn ania.. I ngaihtuahna kha tifim ang che" a ti sap a. Ka lo bu ve nghut. Office-ah report a pek zuai hnuin Van pawl zawng tur chuan kan chhuak ta. A zawn bak pariat te chu an address kan hre sa vek bawk a. Huphurhawm niin ka hre lo. Veng inhnaih zual leh karkik lo deuhte kan vai hmasa a. Thanpuii chhungte biak chu hna hmasaah a nei duh rih lo a ni maithei. Ni e, a sawngsawhlawt vak tlat lo ve bawk a. A hma ami te ang tho kha a nih a rinawm. 

Van neitu mi pali te chu kan be tawh a, pali kan la bak. Kan biak tawhte kha chu an van pawh lo chhe tawh te an ni hlawm a, thenkhat lah an chhungten an neihsak, Khaw danga an hawn tak daih te a lo ni a. Mi pali kan la hmabak te chu kan be leh poh a niang chu. 

Pu Remruata te in kan han lut chu amah a lo awm remchang bawk a, a tihzia hle. Kan kal chhan te kan han sawi zung zung a, a lo hrethiam khawp mai. A van chu kumin kumtir lamah Thingtlang pa pakhat hnena a hralh tawh thu leh an ni chuan an huan thlai phurh nan bera an hman tak thu te a lo sawi a. Rinhlelhawm a ni leh lo ta phawt. A ninawm ţan. Kan va hmuh tum pakhat te chu an lo inkalh tlat mai a, an in piah lawka dawrah kan lut ta ringawt. 

Dawr nghaktunu bulah Amanda chuan, "Ka pi, Pu Zaia te saw an van pawl kha hralh an phal niin ka lo hria a. An lo awm mang si lo va.. " a han ti khawmawi a. 

A tarmit chawikan zauh pah chuan, "Aw.. Hralh an lo tum a ni maw? Tukinah pawh buhfai lak nan an hman reng kha mawle.. Khaw nge an kal ka hre miah lo" a lo ti hlut a. 

Han zawh chian chiam kha nakinah thil a kal sual kan hlauh vangin kan kal san ta phawt. Chanmari west lamah kan tlan leh ta vang vang a, step thui fe kan zawh hnuah Van neitu pakhat te in chu kan thleng ve leh ta hlawl mai. 

Pa ber a lo awm lo va, an nu erawh a fing fel in biak a nuam hle. 

"Kan fapa u zawk te an indan khan a pain indan nan a pe ve a. Dawr bungraw sem nan ber an hmang ve a, eizawnna dang nei hek lo. An hmang tangkai teh asin" a ti bawrh bawrh a. An fapa address te chu kan la ve leh rih a. Mahse, a tawpna ber va hmuh leh phawt chu kan tum. 

Bawngkawnah a ni thung a.. An khawsak pawh a harsat hmel lem loh hle. Pa ber a lo awm lo leh a, an fapa leh an awmpui chauh an awm. Mahse, an fapa chuan min lo dawngsawng vat a. Tlangval thau lam lek lek, chaw heh hmel zet a ni. 

Amanda chuan Van chungchang chu a han sawipui ţan a. 

"Kan leklam vak tawh lo, ka pa hi chuan Thingtlanga kan chhungte pek a duh a, ka nu hian a phal chiah lo va, keimah hian lui kal nikhua leh picnic chang hian ka khalh chhuak ve zeuh zeuh. In en duh chuan garage -ah a awm" a lo ti a. Kan va en ta nghal a. A chhung lam chu a lo bal viau mai. Lui kalna vela a hman a nih vang a ni maithei. Amanda pawn thil thar han hmuh chhuah tur a nei hran lo a niang. Kan let leh lamah an lo awm tawh tak mialin tiin kan la kal lohna kha kan tlawh kawi a. 

Vanneihthlak takin an lo awm tawh. An huanah an lo kal a niawm e. 

Amanda chuan a han kawm kual vel a. Pa ber chuan thingpui sen dâwt khulhin, "Kan Van hi nikkum hmasa lawka kan lak kha a nia. Kan tangkaipui ve khawp mai. Tun hnaiah a bo awm kan hre miah lo " a ti khauh a. 

Amanda nen kan inmelh ringawt. Chutah, "A nih in laina hnaiten an hawhsak thin che u em? Beidawn hmel angreng tak hian a ti a. 

 "Aw, Ni dawn tak, . Lalţana chu ka û fapa hi a nia, Kan veng tawntirhah sawn an awm. Lui kan kal dawn e a tia, Kar tir khan a rawn hawh a, Van kan lak tirha a khalh min zirtirtu ber a nia, ui ngam tur niin kan inhre lo va.. Tukin zingah khan a rawn dah ve leh mai. " a ti chuar chuar a. 

"Tukin dar engzatah nge a rawn dah le? " Amanda chuan a ti thut a. 

"Dar 7 bawr velah aniang, nizanah an lui kal an lo haw chiah aniang, an lo hww tlai deuh vangin a zana zana rawn dah kha a ti lo aniang" a lo ti tha ve mai a. 

An garage awmna te chu a zawt ta mai mai a. 

Pa ber chu a ding a, tukverh thlanglama dakin an in thlang, kawngpui bul lawka garage chu a kawk a. "Kan in bulah chuan hmun a awm tawh si lo va, khu lai khu a neitute ka dil tawp a. Tikhuan ka sa ta ngawt a ni" a ti nuah nuah a. Khawpuiah chuan mahni in bula garage neih hi a har ve bawk a ni. Thingpuite kan in zawhah kan chhuak a. Garage chu Amanda chuan a en duh vangin kan zuk kal leh rih a. Rangva veka sak niin, a kawngkhar te chu a han en uluk deuh a. Tu emawin an ru turah a ngai a ni maithei. Kei erawh chuan khaw lum nen ka ning hluah hluah. 

Kan haw ve thei ta hram e. Beer vawt tawk ka in châk mang e. A vâng angreng si. Office kan thlen meuh chuan a tlai duai tawh. Ban hun erawh a la ni lo. 

"Sam, i chau tawh sia, lo chawl rih mai rawh. Thanpuii chhungte ka va hmu leh lawk ang e" a la tizui! A hmeichhia zawk pawh a fit te chuan mipa zawk han tlawm kha ka hreh ve tum hrang si. Ka zui leh ta nge nge. Min nuihzat tlata hriatna ka nei lehnghal. Thanpuii te in kan thlen chuan in leng tam zawk an lo ţin tawh a. Thlan lama kal te pawh an lo haw tawh. In chhunga ka zu luh chuan, min lo dawngsawng vat a. An in hi Assam type niin, in mal ding a ni a. Kawmchhak erawh an ngah ve deuh. Thanpuii pasal Malsawma chu a lo meng bui lâk a, a tuar hle a nih a rinawm. A nu tar ve tawh angreng tak erawh a tarpui ti mai ang, pitar pahnihte nen an lo titi a. An fate pahnih erawh ka hmu mai lo. Malsawma chu kan han kawm hrang ve leh a. 

Nimin thil thlengte chu lungchhe tak chungin a sawi ta a. 

"Zing dar 5 bawr velah dawr hawng turin a chhuak ziah thin, niminah pawh khan chutiang hunah chuan a chhuak a. Kei pawh ka fate school kal hnuah huan lamah ka tei thla ve leh a. Dar 3 bawrah ka haw. Ka fate pawh an lo haw tawh. A pi hian engtin tin emaw a lo buaipui ve mai thin a. A chang chuan an school bang hi a nu bulah tam talin a nu rualin an rawn haw ve mai thin. Mahse, nimin chu in ka luh rual khan ka fanu hian, "Apa, a nuin dawra awm a phal lo" tiin a lo zualko nghal a. 

An buai deuh a nih ka ring. Ka han hnem ve ngial a. Dar 5-6 inkarah hian kan nu hi a lo haw tlangpui thin. Mahse, ka faten chaw an ei kham hnu pawh chuan a rawn haw thei ta reng reng lo va, ka call ta a. An la buai thu leh a rawn tlai tur thu a sawi a. A dah leh nghal. Ngaihthat lohna pawh ka nei lem lo.. Chaw pawh ka eisan ta nge nge a. Dar 9-ah pawh a rawn hawn tak loah chuan ka call leh a. A switch off ta si.. Tlem chuan ka mangang ta deuh, ka fate chu an mu tawh a. Dawr lamah ka han tlan chho ta tawp. An lo inkhar thap tawh si! A ngaihna hre lo zeta ka din laiin Thanpuii u nupuiin min lo call a, Thanpuii ruang an chhar thu min rawn hrilh ta ngawt a ni.. a tirah phei chuan ka ringhlel khawp mai" tiin. 

"A nih in nupa hi han intihthiam loh emaw in inkara buaina dang deuh rawn tlazep te a awm em? Engmah zep neih a ngai lo a nia. Kan hriat a ţul tlat.. Khawngaihin " Amanda chuan a ti a. 

Malsawma chu a ngui sawt hian ka lo hria. Sawi hreh nei hmel a pu bawk. Mahse, a nupui thattu hriat chhuah nan a ţul ve bawk si. 

"Aw.. Ni e, zep thu a cheng lo, ka nu nen hian an inngeih loh bakah tlem lai khan ngaihzawng a nei a" a ti ban chhalh a. Ka rin dan chiah! 

Amanda chuan sawi zel turin a mitmei a. 

"Ih, a bialpa chu kan veng ami tho Tluanga a ni a. Pathlawi a ni nghe nghe.. Huana ka riah hlanin ka nu hian a lo phawk deuh nge ni ka hawn veleh a lo sawi nghal a. Kan inhau ta hrep a.. Khata tang khan ka nu nen an inkar pawh a chhe zual ta a ni. Kei lahin ka lo hmangaihin fate nu tiin then mai chu ka phal bik si lo va, a sim tawh tur thu te intiamtirin kan inrem leh ta chu a nia. Khami hnu khan an inhmuh leh ka hre tawh lo, a pawn lam hun hman dan ka va hmu vek tawh si lo va, rilru na ru deuh chungin ka pawm lo thei lo a ni ber.. Ka dinhmun heti hi a ni bawk nen.. Ka fate vang hian ka tuar hram hram a ni ber.. Ka nu lah han rinchhan theih a ni tawh bik si lo va" a ti ta mawlh mawlh a. A thawl hawk a niang, a thawven huai hmel. 

"A nih he in hi in in a ni em? In nupa intawn dan leh in bultan dan tlangpui min han hrilh leh teh" Amanda chuan dawhthei zetin a lo ti a. 

Malsawma chu a chhing vang vang a, "Umm.. Thanpuii hi Serchhip khua a nia, Serchhipah sawn ka nuteii te an awm ve a. Ka va zinna lama intawng kan ni. A nihna takah chuan nuthlawi a ni a, a fa erawh a pain a kawl thung. Kei lahin ka lo duh sia, rei pawh inngaizawng lovin kan inru ta ringawt a. Aw. Kan awmna hi kan in a ni e, kei hi chu Aizawl khuaa piang leh seilian ka ni.. " a ti a. 

"In inneihtirhin i chhungte dang te chu hetah an la awm ve em? " A va dilchhut tak.. 

"Aw awm e, ka farnu leh ka nu te nen kan awm a. Mahse, Thanpuii leh ka nau chu an inngeih vak lo va, Mami chu ka nuteii inah a va awm ta daih a, chuan, chutah chuan pasal pawh a va nei zui ve ta mai a ni" inthlahrun hmel lek lek hian a ti a. Amanda a bu nghat nghat. Tluanga address kan la bawk. Thil thar han hriatchhuah emaw dangdai deuh han hmuh chhuah kan nei lo. Vanlalruati leh Rinsangi te nen inang khat vek hmeichhia a thi leh chuan awmzia zawng a nei chiang ang. 

Kan hawn kawngah, "Kei chu a thattu hi pathlawi, nupui uiresan a nih ka ring" ka ti ta hlawl a. 

"I ngaihtuah thiam ţan e.. Kei pawh ka rilrua a lo lan dan a ni.. Mahse, naktuk lamah ka mi kohte ho kan han kawm leh phawt ang a. Ngaihdan thlak te pawh a ngai maithei" a lo ti ve sar sar a. 

Kei pawh kan in lamah ka haw zui ve nghal. Ka chau bawk a, zanriah ei kham atanga rei vak loah ka muhil daih. 

A tukah chuan Amanda mi kohte chu dar 10 bawrah an rawn thleng a. Remliana inti chu a kawm hmasa ta ber a. 

"I van kha i nute pek che niin ka lo hria a, i hmang tangkai viau a ni maw? " tiin bul a han ţan a. Remliana chu a hawi â deuh. Mahse, a inngaihtuah harh leh thuai aniang. 

"Aw ka pa ten min indan nana min pek a nia, kan eizawnna ve ber a ni e" a ti dam thlup a. Misual hmel zawng a pu mawlh lo. 

"A nih tun hnai ti ila, kar liamta velah khan rawn hawh emaw an awm em? " a ti leh a. 

"Awm nang, a awl mang lo va, inhawhsak ngawt chi pawh a ni lo.. " a lo ti ve mai a. Amanda paw'n a ring a niang, a kawm rei lo. 

 

Lalţana an tih chu kan hmaah a thu ran a. Cher chhe ve tak, zu heh hmel zet a ni a. A meng kawr ni maiin ka hria. 

"I patea te Van i hawh ni kha eng ni nge ni khah? " Amanda chuan a ti a. Ţana chu a kang deuh awkin ka hria. He pa hi ka ring hlawl lo. A mitmeng hre hraw hi.. 

"Eng ni nge ka va hre tawh bik lo em.. Rei chu a la rei vak lo ang. Ngati nge? " a ti puat a. 

"Van pawl kher kher hi kan ngaipawimawh khawp mai. Khawiah nge i kalpui le! " Fiah zet hian a ti a. 

"Luiah, Matah kan kal alawm.. Kan zu riak sia, puanthuah vel leh bungbel phurh nan kan hmang a. " a ti a. 

"Zan engzat nge in riah le? " 

"Zan 3 lai chu kan zu riak ve a.. " a lo ti a. Amanda chuan eng emaw ngaihtuah hmel a pu. 

"Chuan, Van chu khawiah nge in dah? Luiah a tlan pui theih awm si loh a" Amanda aw-a phurna lo lang chu ka hre thei. 

"Kawng peng bulah kan dah mai. Kan lock vek a, bakah kawng atanga hmuh mai theih pawn kan dah lo, a va biru ve deuh.. Ka pi, engmah ka hrethiam lo. Van chu eng nge a pawimawhna? " Lalţana chuan a ti ta hlawl a. 

"Nakinah i la hre mai ang. Chuan, Van chu zan thum ngawt in riahpui ta a.. Nizanah maw in lo hawn? " a ti a. 

"Aw, kan thleng tlai deuh sia, ka chau deuh nen, zingah ka va dah a" Lalţana chuan a lo ti a. 

"Chuan, nizanah chuan Van chu khaw nge i dah? " Amanda chuan a melh kar mai. Zâm hmel lek lek hian, "Ih, kan tuizem bulah ka dah tawp ringawt a. " a ti zawi ruih. 

Amanda chu a ding hluai a, a mitmenga phurna namèn lo awm avang chuan ka lo phur ve em em tawp. Lalţana lah chuan a ngaihna hre lo zetin min melh tawn sek ringawt. 

Lalţana chu a haw ta phawt. A dawta lo lut chu Thanpuii bialpa hlui Tluanga a ni. 

Ka rin aiin a patling. Malsawma ai mahin a upat hmel. A chum buang mai. 

"Thanpuii ruang hmuh a nih lai khan khaw nge i awm le? " Amanda chuan a ti nghal fawk. 

"Ka thianpa Rosanga nupui dam lo ka va kan ve. Dar 11 pelhah ka haw a. Thanpuii thih thu ka hre ve chiah" a ti vat a. A confi hmel hle. 

"Thanpuii khan a pasal a hlauh vangin inkawp zui zel a duh tawh lo va, chu chu duh lovin i thinrim a, in inhnial buai a.. Chuan, i insum zo lo chuan i tihlum ta mai em ni? " Amanda chuan a ti leh sak sak a. 

Tluanga chu a nui hawk, "Kan inkawp lohna a rei tawh. Tunah te chuan a dawr bula dawr nghak ve naupangtê nen an inzui daih tawh" a lo ti awlsam êt a. 

Amanda chuan a han zawt chìk deuh a, Thanpuii kawp thar chu Electronics dawr nghaktu a lo nia! Thingtlang atanga Aizawla rawn awm a niawm e. Thanpuii dawrah zan reiah an inhmu fo thin tih thu thlengin a sawi thei. A chhan chu a sawi danin, "Thanpuii hi ka hmangaih a, ka chhui ve nasa alawm.. Kan inkawp tawh loh hnuah a lerh zui zel tih ka hriat khan ka rilru a na a, vawi khat phei chu an pa hrilhah ka vau nghe nghe. Mahse, ka sawi ta chuang lo.. " a ti ta a. 

Thanpuii chu rin aiin a lo ţawp hrep! 

Tluanga chu rinhlelh tur awm hek lo. Kan kaltir leh ta phawt a. Tunah chuan a hma ngawt ai chuan kan zia ta deuh. 

Amanda nen Cofffee ina kan titi dun lai takin Constable pakhat hian Amanda chu envelope uk hi a rawn pe a. Amandain an hawn nâk chuan, Silver zungbun hi a rawn tla thla nawlh. Lehkha them a rawn tla tel bawk. 

"Ka daikhalh zel ang che. Ka hnung dawl tur i ni. Min hmakhalh tur ni lovin" tih tè hi a lo inziak a. Amanda chu hmanhmawh zetin a va tlan chhuak a. Ka zui ve nghal. Envelope rawn petu kha a lo be mek a., "Tuin nge pe che? " a lo ti sawk sawk. 

Chu pa lah chuan, "Thil xerox ka tum a, xerox machine chungah khan a lo let reng sia, i hming a inziak sia.. Ka rawn pe mai che" a lo ti êt a. Amanda chu chu roomah chuan a va lut nghal. Constable pahnih an lo awm. 

"Civil mi heta rawn lut in hmu em? " tiin office-a awm ho chu a zawt zung zung a. Civil mi rawn lut chu an tam si, a tu berin nge envelope kha dah tih tuman an hre lo. Hriat ngaihna awm hek lo le.. 

Zungbun lek vâ chung chuan, "I lo intithei ve a maw? Tunah chuan ka rap bet tawh ang che. I chesual tlat" a ti zawi sap a. Za lo zetin a nui hak bawk. 

Hetih lai mek hian Media lamah Police demna a tam hle. Nu pathum ni inhnaih tak taka an tualthihna pawh chhui chhuak thei lo tiin mipui nawlpui atangin nawrna kan hmu nasa hle. Kan tan chhan let chi a ni mang si lo. Thin a rim ţeuh mai. Amanda erawh a hma zawng aiin a phur hmel tlat! Eng a hria chu ni maw.. 

Zan ka mu hi "Ruang chhar leh a ni" tih thuin min kai tho ang tih hlau takin ka muhil ţhin. Thanpuii thih atangin ni 2 a liam leh tawh a. A pasal bakah a bialpa te pahnih te pawh kan kawm nawn tawh. A bialpa ni lai chu kum 19 awrh chauh a la nih a rinawm. A sawi hmangin khami zan khan a dawrah an inhmu a, dar 7 bawr velah an haw tih a ni. Dawt a sawi a rinawm loh. Dawr atanga an in lam a panna kawngah tualthattu hian a lam bun tihna a ni mai. 

Mitthi te thlalak intar kalh chu Boss chuan a thlir dauh dauh a..

"Hmeichhia, chhungril nun ţwp ru tak, pasal fanaute thlim zak zak vek an ni. Tu te emaw ngaihdanah chuan thih phu an ni. Mahse, nunna hi kan siam a ni tlat lo va. An chunga râwng taka chetu hi dan hmanga hrem a ni khawp ang. An fa naupang tete an kalsan tak te avang pawhin he tualthattu hi ka kut ngeiin ka la man ang a, ka la sawisa ang" a ti nghat nghat a. A mitmeng pawh a rum lam hret e. 

"Ruati khan ngaihzawng a nei ve em ni? " ka lo ti vat. 

"Thanpuii leh Rinsangi ai mahin a lo che na zawk alawm le. An office lama an pu ber nen hian hotel an luahlum zing khawp mai" a lo ti hawk a. 

"I va hre leh vek tawh law" ka lo ti hû a. 

"An office peon kha pa fel tak a ni reuh a, Office ban tawh hnua an pu leh Vanlalruati inenglo pawh a lo hmu zauh zauh tawh.. " a ti a. A khi sak bawk. 

"Mahse, an pa khan zan dar 6 aia tlaiah a lo haw ngai lo a ti sia" 

"Dawt a sawi pek a nih kha. An nu a hmangaih luatah a mualphona tur a la thupsak hram hram a nih kha.. A lainatawm khawp mai" a ti leh mai a. Ka fiah ta deuh. 

"Kei chu an mi kawpte theuh hi dâwp tak takin dâwp la ka ti" ka ti nuah nuah a. 

"Engmah an ti lo. Thah chhan tur an nei lo.. Sam, an bialpa ruk te theuh khan inthurualin an that a niang ti dawn ila, an call record en in a tu amah kha an inbe ngai lo va, hriat pawh an inhre hek lo. A awmzia chu anmahni hrechianga chhui ru rengtu hian an hun hman dan te a hre thlap tawh a. Remchang a zawng ran a, a that ta a ni mai. Tuna ka hmachhawn hi mi piangsual ka tih kha.. A nihna takah chuan a khawngaihthlak viau ta ve ang" a ti ta duah a. 

"Van chungchang kha" ka lo ti zauh. 

"Kha kha a pawimawh viau reng asin. He tualthattu hian sulhnu engmah min hnutchhiah a tum hauh lo va, chuvang chuan a mi thah tur te pawh mi motor-a phurha mi dang umzuitir min tum alawm.. Mahse, kan hnaih chilh zel sia, a hlauthawng leh hnuhnawhin ka rilru tihbuai nan tikhan min rawn vau ta vel a nih kha.. " a ti a. 

"Chuan, Lalţana van hman kha kan thlurbing dawn tihna em ni? " 

A nui a. "I tlai.. Nizan zan laiah ka va en fel vek tawh. Lalţana te khan an Van kha luia an riahbo chhungin tu emawin a ru chhuak tih hre miah lovin an thil hawn leh pawnthuah te kha an dah rum rum a, sulhnu min hnutchhiah tlem ta a ni. Mahse, nizanah chuan thil pakhat ka va chhar chhuak ta a ni. " a ti a. A aw chu a sexy lek lek. 

"Eng chu" ka lo ti vat. 

"Silver ţhi sin tak a ni a. Pu Zaia te sawn an motor saw an sil khât ve viau aniang, a bal mah mah. Mahse, ka tan chuan a lawmawm angreng. Chu Ţhi chu ruang kan chhar te ta a ni lo tih ka hriat chuan ka hlim teh asin.. Tin, Ka haw lama ka mi tawh avang khan ka hlim lehzual.. " a ti sar sar a. Ka zawh chian chuan a sawi zawm duh der lo. A sual thei ania aw. 

"A nih Rinsangi phurtu taxi kha kan hrechhuak thei ta na nge? " ka lo ti a. Ka aw chu a tiel aw lek lek. 

"Zonuna kha ka han mitmeitir deuh naa, a tan pawh thil awlsam a ni bik lo. Motor number kan hre tlat si lo va. Mahse, Sam, taxi kha a pawimawh ber tawh lo ve. Ruang chu Van pawlah phurh a ni alawm" a ti ta a. Sawi tur ka hre tawh lo. 

Ban dawnah, "Zanin chu ka lo riak dawn aw" ka ti sur sur a. 

"I zawngchhang dawn tlat! Nang hi.. Zanin chu chhuahna tur ka nei.. " a lo ti fiah kâk a. 

Tûm bûrin ka inkhalh haw.. 

(Last Chapter chu ka fân dawn.. Utube-a chhiar a nih hian a tawpna lo sawi zut zut an awm thin a.. Detective story phei chu a tawpna hriat chuan a ho vek zel 🤣