Boss Amanda 2

BOSS AMANDA.. (2)

(Adds kha aw. Duatte u)  

Ziaktu: Toni Râlte

Zêla chu a rukin ka va bekbawr a, lo kal ve a châk sia. Ka hruai ringawt. Mak ka ti viau, ruang pahnih, a hmun ngaia han chhar chu! A thattu pawh mi thuhmun a ni maithei. A hmun kan va thlen chuan, ka rin aiin pung khawm an tam lo. A zia daih zawk. Ruang chu a thla an lo la mêk a, ka hmuh dan chuan Vanlalruati nen khan an inrual khat viau ang. Ruati aiin a thau deuh a, a tawi zawk maithei bawk. Mahse, nu hmel tha tak erawh a ni. Smart pant chhawhchhi rawng a ha a, kawr pawl a ha bawk. A pheikhawk erawh a bun lo ve ve thung. Ruati ang bawkin a hrawkah zai thler niin, a kut veilam zungte û tan bun a ni leh bawk! Chhei! Keini hian tualtthattu naran lo tak kan hmachhawn dawn a ni chiang mai. Ruang hmu hmasa ber tu chu huan enkawltu Taia bawk a ni leh pek bawk! A mak zozai mang e. 

A khur beuh beuh mai. Khua a vawt hauh si lo. Amanda nen an lo inbe mek nghe nghe. 

"Tun ţum chu thawm ka hria a, a thattu pawh ka hmu. Mahse, a hmel ka hmu lo a ni. A hmai a tuam bakah thim lam hlir a hawi tlat a. Englo a nia, ka duh aiin ka lem hnem deuh a, ka zo ta lo deuh nen, pawnah ka va inthiar harh lawk tiin ka chhuak a. Kailawn ka rap chiah tih sawn Van pawl a rawn tlan a, ruang hmuhna hmunah khan a ding a, chuan mi pakhat rawn chhuakin ruang chu a pawm chhuak a. A hmaa ruang awmnaah chiah khan a zalh leh ta a ni. Ka hamhaih leh hlauh lutuk vangin thawm pawh ka chhuah ngam ta lo va, a tlan liam hnuah chauh ka va en a ni" tiin.. 

Amanda chuan lungawi lohna a nei nge, a ngawi hmuk reng mai. Hetiang case chingchivet hi chu khawih fo mah se; rinhlelh tur leh kawk tur a nei tal zel kha a nia. Ruang hmuhna hmunah chuan a hma ang bawkin zungbun a chhar leh ta bawk. A mak dangdai hle a ni. Amanda chuan a va fang leh thuak thuak a, motor ke thla te chu a han bih ngut ngut a, zan thil ngang a nih bakah kawng a diak lo va, motor ke hnuhma chu tam tak a awm tlat si. Pu Taia sawi dan berin Van pawl bak hmanrua kan nei lo. Ruang chu an rawn senghawi a, Ruati hrawk a zai dan leh tuna a zai dan pawh hi ka ngaihbel nge a inang khawp mai. Khawiah emaw a that tawh a, he laiah ruang chu a rawn thehthang a nih ber chu.. 

Kan tlaivar ta ringawt. Mitthi kha Aizawl Bethlehem-a cheng Rinsangi a lo ni a. An postmortem laiin a chhungte pawh an rawn lang nghal. Rinsangi purse atangin tu nge a nih tih kan hriatchhuah vang a ni. A chhungte pawh kan be pawp ta thuai kha a nia. Rinsangi chuan kum 43-na a hmang mek a. Pasal fanau nei a ni bawk. Bethlehemah hian mi in luahin an khawsa ve a, amah Rinsangi hi Aizawl khua a ni chiah lo va, Lawngtlai lam mi a nih thu an sawi. A pasal Fakzuala chu kum 45 awm vel niin fa pakhat an nei tawh a ni. Pu Faka hi chu Aizawl khaw hlun a niawm e. 

Amanda chuan rei rial lovin zawhna a zawt ta tawp mai. Muanchan hman a ni tawh lo a ti ta deuh nge ni.. 

"In nu hnathawh leh a rawn haw hun awm te, in nu chungchanga kan hriat tur tul zawng zawng min hrilh thei ang em? " tiin Pu Faka chu a han kawm ta a. 

Intipachang takin Pu Faka chuan hetiang hian a sawi ta a. 

"Kum 6 liamtaah khan kan innei a. Kan inneih atanga thla 6-na velah ka nauin nupui a nei ve ta bawk nen, Bethlehemah kan in dang ta a. Fanu pakhat kan nei bawk. Kan nu hi sumdawnna lam tui tak a ni a, Loan te puk vein cosmetic dawr lian pangngai ve tak a siam ta a. A lun ve thin hle. Cosmetic atangin a huang a zauh ve zel a, thawmhnaw lam te pawh a khawih tel chho va, a zin fo thin. Kei erawh kan veng chhunga private schoolah ka inhlawh ve a. Kan chhungkua kan tam lem lo bawk a, kan khawsa thei ve viau mai. Kan fanu pawh school a kal ve tawh a, kan nu hian rai a duh rih lo va, chhang a la nei lo a ni. Chuan ni dangah pawh zan dar 9 dawnah te lo hawn chang a nei fo, an bungraw chang leh intihfel chhung hi a rei ve thin bawk nen.. Zanin pawh kha a tlai tur thu a sawi sa a, ngaihthat lohna ka nei hran lo. Mahse, tikhan min rawn be ta si a, min ţhawng khawp mai" tii. Pa dam dup mai, zaidam hmel zet a ni a. Ka khawngaih hle. 

"A nih han ngaihtuah la, in nu nunna la duh mai tur khawpa hmelma emaw hawtu emaw a nei awmin i hria em? Nangma lamah pawh" Amanda chuan a ti a. 

A ngawi rauh rauh a, chutah thawk la hawkin, "Zep thu a cheng lo. Tlem lai khan kan nu leh tlangval pakhat an lo inkawp deuh a. Ka hriatchhuah chuan chu tlangval chu ka va bia a, kan inchhang deuh hrep a. Kan nu pawh ka vau bawk, khami hnu atang kha chuan a hmuh leh awm ka hre lem lo. Kha pa bak kha kan chhungkaw tana han hlauhawm tur ka hre hauh lo mai. Kan nu hian ka hriat loha hmelma a lo nei te a nih ngawt loh chuan" a ti a. An nu chuan a lo lerhsan ve a nih dawn chu. 

"Chu pa hming leh address chu khawngaihin min han pe ta che" Amanda chuan a lo ti sap a. Pu Faka paw'n chu pa number leh address chu a pe ve nghal a, chu pa hming chu Nunmawia a ni. An nu ruang awm lai renga han biaksawm vak kha Amanda pawh a inthlahrung ta deuh aniang. Kan kaltir ta a. A khawngaihthlak hnûp hnûp hle mai.

"He tualthattu hi mi naran a ni hauh lo mai" a ma hriat tawk lek chuan a ti sap a. 

"Ni e, a mak ka ti, a hmun ngaiah.. Chu tah kum inrual tak nu valai a bitum bawk si" ka lo ti ve vat a. 

"Rinsangi thiante ho kan kawm kual hnuah thil nih dan chu a chiang mai turah ngai ang. Rinsangi thattu kan hriat chuan, Vanlalruati thattu pawh kan hre nghal tihna a ni mai" a ti duah a. Ka rin dan chiah. Mi thuhmun an nih ka ring. 

"Chuan, Sam, naktuk atangin Pu Taia chanchin kha i va chhui dawn nia. A kimchang ka hre duh. " a ti nghat a. Ka lo bu nghut. 

Zing dar 4 bawrah kan in ka thleng a, ka nu te bulah chanchin engmah ka hrilh loh vangin Pu Rinliana te ina tlaivar angah min ngai mai thei. Mut nan tlai deuh tawh mah se, ka meng lui thei ngang lo. Ka mu leh ta nge nge a. Ka mumangah Amanda nen luiah kan lo kal a, tui chhungah kan lo inchhaih nasa mai. A hnute mum zet, a hmur sen no chek fawh tuma ka va kun lai tak chuan ka phone riin min tiharh ta a. Ka va ngei mai mai tak. Mahse, Amanda a ni tih ka hmuh chuan thawhphan pawh awm lem lo chuan ka'n chhawn a. 

"Mak deuh chu Rinsangi kha a thih hmain tu emaw nen sex an hmang a ni" a rawn ti daih! 

"Tualthattu khan a pawngsual a ni mai lawm" ka lo ti hmuk a. 

"Chu chu ka beisei. Mahse, a bialpa Nunmawia ka be phawt ang.. Mipa chi chu Forensic lamah kan thawn tawh e" a rawn ti leh a. A aw a zangkhai leh hle tawh. A va fit bik tak. A muhil tawh miah lo ang tih ka ring. 

"Tho la, thil ei la, Pu Taia va ngaihven rawh. Fimkhur ang che" a rawn ti leh zung zung a. Ka nu hi a ang thin mang e. 

Ka chhungte fel vena riau chuan case kal lai hi min zawt uluk vak ngai lo. Eng emaw thleng thei a nih vangin. Court lamin thiam loh a la chantir loh phei chuan kan suspect leh tisualtu ni ngeia lang pawh an sawi mai mai ngai lo. A hunah kan chhui chhuah dan chu ka sawi mai zel. Chaw ka ei sawk sawk a. Ka bike a chiankuan loh vangin Zela scooty ka hawhsak ringawt. Petrol ka thunsak chuan a lawm daih zawk. Da ve thei bawk sia maw.. 

Pu Taia awmna hmun lam panin ka tlan ta vang vang a, invenna hmanrua te chu ka keng ve ţât e. Mahse, Pu Taia chu ka hlauh loh zawng tak a ni ve. Ka hneh ve dawn hian ka hre lutuk. Thlam atanga lang thei loah chuan ka ding a, scooty chu side thain Thlam lam chu ka pan ta ţham ţham a. A reh ţhiap mai. Kawngka pawh a lo inkalh bâm mai. Ani pui hi a chhuak nge mawni dawn le. Pu Rozama te zawk be hmasa lo va, ka pawng pan ve ngawt chu mawl ka inti leh hnuhnawh hle. Thlam luhkaah chuan ka thu ta reng a. Dar 11 a ri hnai tawh tihin Aizawl lam atang chuan Pu Taia chu a rawn haw ve ta hram e. Thil a khai bawr ţuah a, eitur vel a va lam a ni mai thei. Min rawn hmuh chuan mak a tih hmel viau. 

"Ka lo nghak che a" ka ti ringawt a. Ngawi rengin thlam kawngka kalhna chu a hawng a. Kan inzui lut nghal. Chiseh eng ilo a hawn chu a rem fel nghal mawlh mawlh a. A la ngawi reng tho. 

"Pu Tai" ka han ti a. Zawi muangin a rawn inher a. 

"Eng nge i lo tih dawn? " a ti thum ta dût a. 

"Kawm lawk che ka duh a. Tualthahna chungchangah khan" ka ti a. 

"Nizanah ka sawi vek tawh kha.. Kha bak sawi belh tur ka nei lo" a ti hmuk a. A lawm vak lo a nih hmel. 

"Ka hria alawm.. Tizawng hian i ngaihtuah ngai em? Ruang pahnih chu i chenna bul lawkah hmuh a ni ta a, a hmu hmasa ber tu i ni zel bawk. Police lam ten kan kalpah mai mai che i ring em ni? " ka ti ta tawp a.. Tun tum chu Amanda tel lovin ka han hmachhawn dawn chu a nia. Inlak fin ka tum ve nasa. 

A kut a nuai a nuai a, "Nia.. Min rinhlelh ka ring reng a. Nuam ka ti vak lo khawp asin" a ti dam ta thlup a. A rawn thu ve ta bawk. 

"Chuvang chuan i fihlim a ni tin fiahna kan neih a ngai a ni.. Ruang i hmuh dan te kha chu ka ngaihven vak lo. Nimin chhunah khan khaw nge i awm? " ka han ti a. 

"Falkawnah ka nau te chhungkua ka va tlawh a. Vawk an talh bawk nen, ka rei ta phian a. Thlam ka thlen chuan dar 3 a ri tawh" a ti tha ve mai a. 

"Chuan, zu i in nghal mai mi? " tlawn deuh titih hian ka ti a. 

"Umm ka ngah bwwk a, ka ren vak lo.. Rawng ka bawl pah a" a ti a. 

"Huanah khuan hna i thawk vak ngai lo nge? Engtin nge i thawh dan tak hi? Hlawh te a tha em? " ka ti duah a. 

A aw a then kherh kherh hnuah, " Ka pu te hi an felin min khawngaih a, huan enkawl hi chu a hna hrâm hi min thawhtir vak lo. I hriat angin huan puitling a ni tawh a. A hnim zual changa thlawh fai mai kha a ni tawh a, ka thawh ber zawk chu huan thlai bo ven hi a ni deuh mai. Tin, huan thlai rawn leia a hmuna rawn kal chilh te vil leh lo buaipui hi a ni bawk a. Hlawh chu tha ve e, thla khatah hian Cheng 7000 lai min pek bakah ei leh in leh silhfen zawng zawng min tumsak bawk.. Mahse, a khawharthlak ve thin a. Chuvang ania zu pawh hi ka in nasa tak deuh ni.. " a ti ve ta mawlh mawlh a.. 

"A nih chu mawle.. Mi nazawng hlawh phak loh i hlawh daih a nih chu.. A nih Asenchi i in ngai em? " ka han ti leh a. 

"Ee..! Asenchi te chu keini ang lei phak a ni ve hleinem" a lo ti vat a. Ka bag atang chuan Royal Stag ka phawrh ta zal zal a. Ìt hmel zeta a melh chuan min tilawm hle. 

Keiman ka han buatsaih nghal a, no pahnih lain a chawhmeh bai chu sehhmehah ka va suak bawk. Min lo en reng ringawt. No hnih kan han lem takah chuan ţawng pawh a kal chho tan e. 

"A nih Pa Tai, fa te i nei ve lo mi? " ka ti leh ta hlawl a. 

A nui hawk a, a no thumna tur a tlak leh pap hnuah, "Umm.. Nei ve e.. Mahse, a nu bulah an awm a. Hei kum 10 dawn chu kan inthen ta. Ratu-ah an khawsa a, kan inhmuh lohna a rei tawh viau mai" a ti sup sup a. 

"Ti nge in nu nen in inthen a? " ka ti hû. Zu chu ka thli leh nghal zat. 

 

Huan lam melh vawng vawng pah chuan, "Ngawi teh, naua, Zu hi a lo tha lo em a ni. Kan nu nen kan inneih tirh te chuan ka felin kan hlim dun ve asin aw.. Mahse, ka thian kawm ten an zir bawk nen.. Zu chu ka in chho ta zel a. Fa pathum kan neih hnuah pawh sim a hnekin a tlaran zawngin ka khawsa chhunzawm zel ta si. Zu in a kentel ni maw.. Thinramna te, kut han thlak duh maina te ka nei chho va, kan nu kha a chhel viau zawk asin. A tawpah a tlin ta ngang lo va, an khaw lamah min hawnsanin rei rial lovin bungrua an rawn la ta hmiah bawk a. Ka hrilhhai hle a ni. Mahse, zu nen ka la tal hiar em vangin ka la inhrosa kuk kûk a.. Harhfima khawsak kha ka ngam lo chho zui ka ti mai. Kan in ruak ta lutuk leh ka khawhar lutuk kha ka tei ta ruk ruk a, zu chu ka chaw a ni ta mai. Ka taksain a tuar ta lo hial a, ka pumpui pawpin ka thi ţhelh a. Ka farnu ten min tuam hlawm ta hlauh zawk a. Chumi hnu chuan kan in pawh luah chhunzawm thei lo vin ka farnu te pahnih bulah ka awm chhawk ta ngawt a. Kan in erawh chhete mah nise, ka la voh ve hram hram a ni. Ka fapa neihchhun tan khan ka la zuat ve a nih ber chu.. 

Tihian a theih ang angin inhlawhna te ka zawng ve ta a. Hna hrâm thawk chi ka ni ta bawk lo nen.. Kawchhung na ka lo nei si a. Tihian ka thawh awm tak Pu Rozama te hian min thawhtir ta a. A lawmawm tak tak" Pu Taia thusawi chu ngaihnawm ti zetin ka lo ngaithla a. 

Ka khawngaih angreng hle. 

"I fate nen chuan in inbe pawp tawh lo mi? " ka ti leh a. 

"Be ve zeuh zeuh e. An nuin pasal a nei leh tawh a, mahse, fa an nei thei tawh lo va, an pahrawn chu pa fel tak a ni roh a, ka fate pawh a enkawl tha viau chuan ka hria.. An khawsak erawh a awlsam em em bik lo va, chuvang chuan ka hlawh atang hian tlem a zawng thawn ve zauh zauh chang pawh ka nei ve alawm" a ti a. 

"I dinhmun a khirh ve hle a nih chu mawle. A nih huana i awm loh changin i farnute bulah i khawsa mai zel tihna ni maw? " ka ti leh a. 

"Ni mai e. Ka in kha man chawiin ka luahtir ve a, in luah man erawh bank-ah ka dah ve zel a. Nakinah ka boral hunah ka fate tan ka ti ve a ni" a ti ve lehzel a. Pu Taia chu ka rinhlelhna zawng zawng a bo vek. Pa fel leh fate hmangaih tak niin ka hria. Zu bawihah a tang ve a ni mai a, pa sual tak zawng a ni hauh lo vang. 

Khua pawh a lo tlai ve rawih mai. Chaw ei turin min sawm er teh naa, Amanda nen inhmuh kan tum si a, ka hnar thei hram. Tlawh leh ngei tura intiam chungin ka hawnsan a. Kan zu in bang bakah Stag half ka kawlsa chu ka pe ta bawk. A lawm ve kher mai. E! Thil pakhat a sawi zauh tak kha.. Vanlalruati thih hnuah thawm a hriat zeuh zeuh thu kha.. A thlâ a nih a rin thu leh a tak erawh a hmuh ngai loh thu te a sawi a. Nizan lamah phei kha chuan a thlam chu a insawi nasat thu te, engah vak a ngaih loh thu te a sawi. Amanda hian thlahrang lam a ring ve mang si lo va, bawhzui chi a ni maithei. Hlawhtling inti tak chuan ka haw ta vang vang a. 

Ka inbual sawk sawk a. Amanda inah zanriah bawp man hmanin ka tlan phei leh ta nghal a. Eirawng a lo bawl ve ngei. A thlan hliam a, a va hmel tha tak. Ka kuah chawt a. "A va hun lo e aw" a ti nang nang a. 

A biangah ka fawp zauh. 

"Ka lo vil ang, va inbual rawh" ka ti a. Thuawih zetin a kal ve mai. Tun lai chu eirawngbawl bakah chawhmeh siam tur te hi a lei ve ziah a, inzir ve tan a tum aniang. Chumi awmzia chu inneih kan hnaih tihna. Ka thil ngaihtuah avang chuan ka khi suk suk a. A sam chhem ro zawhah zanriah chu kan ei a. Chaw ei lai chuan thil dang kan sawi a, thu ho mai mai. 

Ei khamah Study roomah kan lut leh ta. Vawiin lama ka va thangna chanchin te min zawt a. A kip kawiin ka hrilh vek. A tawpah, "Ani saw chu rinhlelhna chhan tur ka hre hauh lo. Pawisawi lo a nih ka ring" ka ti zawm zat a. 

"Mi lah hi i ring hma siah" a ti hlak a. Mahse, ani pawn Pu Taia chu a ringhlel em emin ka hre lo. A kalna chanchin a sawi ve ta thung a. 

Rinsangi thiante a kawm nual thu leh, a dawra a chhawr an nula a biak thu te nen. Chu nula chuan nileng deuhthawa an buai dan te, tlai dar 4 velah Rinsangi chu Dawr atangin a chhuak a. A let leh tawh loh tur thu leh dawr chabi pawh kawl mai tura a hrilh thu a sawi. An inchhawr rei tawh a, an inringngam khawp a niang. A kalna tur erawh a sawi loh thu a sawi thung. 

"Anih a bialpa thin kha i be lo mi? " ka ti a. 

"Va hmu chiang e.. Ngun takin lo ngaithla la, a sawi dan ka'n sawi ang e" a ti a. Coffee a in leh te te hnuah Nunmawia nen an inbiak dan leh Nunmawia thusawi chu a hrilh ta a. 

"Dar 4 vela a chhuak kha Nunmawia nen an inhmuh dawn vang a lo nia. An tih fo dan angin Hotel pakhatah room an book leh a, dar 6 thleng chutah chuan an va khawsa dun a ni. Dar 6-ah hotel atang chuan an kal hrang ta ve ve niawm tak a ni. Dar 6:30 bawr velah Rinsangi'n a rawn call a, a scooty a chhiat thu leh workshop-a a dah luh thu bakah taxi a hman mai tur thu a va hrilh leh a. Chu zawng chu a chanchin a hriat chu a ni mai. Chuan, khatia an pa nen an intâwng hnu khan eng emaw chen chu an inhmu lo ve a, mahse, Rinsangi zawk hian rawn be lehin a tan sum a ui si lo va, Nunmawia bêl val vála val na nâ na chuan lo hnar thei hek suh. Bul an ţan leh ta a niawm e. Mahse, an fimkhur viau thu a sawi. Tichuan, mipa chi an hmuh kha Numawia chi ngei a nih a rinawm ta hle a ni. Tuna kan ngaihven tur nia lang chu a chuan hawna taxi chu a ni.. Zonuna kha bia ila, Driver group velah thu lo thehdarh tura ngen a ngai a ni. Mi fel tak a ni bawk a, min thawhpui theiin ka ring. He tualthattu hi a mawl hauh lo, sulhnu pakhattemah a a hnutchhiah duh lo. A kutze thla lanna reng reng a awm bawk si lo. A victim te phone lah chhui zui ngaihna awm hlek lovin a dah bo hmak hmak bawk si.. Ruahmanna tha tak nena he thil hi ti a ni tih a chiang. A khirh viau ang" a ti ta dap dap a. Ka ngaithla uluk ngang mai. Rinzawn leh ngaihdan engmah ka nei thiam lo. 

Zonuna chu a be ta nghal a, "Nimin tlai dar 6-7 inkara Bethlehem venga nu valai tak phurtu khan min lo be hram la, kan lawm khawp ang. I tan lawmman te pawh a awm maithei a ni. " ti ang zawnga Driver group vela thu thehdarh tur in a ti ta a. Zonuna pawh chuan theihtawp a lo chhuah tur thu a sawi ve a. A lawmawm thin e. 

White board-ah chuan Rinsangi leh Vanlalruati inanna kawng hrang hrang chu a ziak ţeuh a. A kawh zawmtir nasa ngang mai. Kei chuan rilru buai ru angreng takin ka lo en ve reng a. 

"Nu valai tak, thisen la lum tha vet vawt an ni ve ve a. Pasal ngam ve tak ve ve an ni bawk. Sum thawkchhuak tamtu zawk an ni ve ve chèu bawk. An thih hun bawr vel a inang bawk.. Ti khan eng nge ngaihtuah chhuah i nei em? " tiin min rawn der ve a. Ka lo ka leh hó! 

"A.. Ka. Ih, he tualthattu hian a rawk leh a ni mai lo maw? " ka lo ti bah nuai a. Min melh rum ngang mai. Ka ngaihtuahna a chawl deuh bawk a ni. 

"Rinsangi kha chu a rawk lo. A ATM card pawh a bo loh bakah a pawisa la ah kha a la tam tham em mai.. Ruati kha chu kan chiang ngam lo va.. Sam, ngun takin ngaithla rawh. Ka rin danin Rinsangi thihcham emaw chumi hma emaw chuan ruang dang kan chhar leh maithei. He thil hi tu emaw phuba lakna a nih hi.. Mahse, engvanga phuba chu la nge a nih kan hre thei hauh lo a vanduaithlak a ni.. " a ti chuai raih a. 

"Thikthu vang te pawh a ni thei. An pasal te ve ve hi i dâwp ve reng reng lo va"ka lo ti a. 

"Ka zawt alawm.. An thih hun bawrah khan an inah an awm ve ve, hriatpuitu tha tak an nei bawk" a lo ti a. 

"Mahse, mi pawh an ruai thei tho" ka lo ti ve khauh a. 

"An call record ensak turin Constable ka hrilh tawh alawm.. Naktukah kan hre thei mai ang. Tu te nge an biak tih atangin bul tan dan a awm mahna.. Rinsangi leh Vanlalruati hian inkungkaihna an nei hauh lo va, thil thleng palh mai zawng a ni lo ang" a ti leh duah a. 

A chhuak vut a,Stag bawk a rawn keng lut! Ka lo khi hui mai. No thum ve ve kan han in leh takah chuan, kan phur leh ta sârh mai. 

"Sam, la virgin ila chuan nupa nih hmaa sex hman hi ka duh hauh lo vang. Mahse, ka thianghlim tawh chuang lo va.. A nawmna lah ka hre tawh bawk.. Chuvangin ka ngaih ka tisam lui a nih hi" a ti sar sar a. 

"Ka tan chuan i la thianghlim alawm" te chu ka'n ti khawmawi ve a. A nunhlui erawh ka hre rauh rauh mai. Nawhchizuar pawh ni mah se; han hnualsuatna ka nei hran lo. Mahse, mipa chu in hrethiam ang, eng emaw hi chu a awm lo thei lo.. Chumi anih vang erawh chuan ka kalsan ngai lo thung ang. 

Zingah phak chuapin kan tho a. Ani pawh a ni ve chhû mai. Kan han inbual harh a, Canteen-a in hnawhpuar turin kan chhuak zui ta nghal a. 

Paratha hlai hlep hlawp, kan thar hlim leh kel êk chana hi chu a inrem viau a ni. Chowmein, Noodles soup tih vel ai chuan ka puarpui daih zawk. Kan inhnawh puar zawhah Pu Faka leh Pu Tlana te call record chu kan han en dik ţan a. Rinhlelh tur a awm lem lo. An nupui te biakna lo chu an thian te leh an chhungte an ni deuh mai. A beidawnthlak mang e aw. Boss phone chu a ri ral ral a.. "Zonuna" ti sapin a hello nghal a. 

An inbiak zawhah, "Zonuna chuan a lo post ngei a, mahse, tuman an la rawn be lo a nih hmel.. Vawiin lamah driver thenkhat a lo titipui tur thu a sawi.. " a ti zung zung a. 

"Anih chuan eng nge vawiin lamah kan bawhzui dawn" ka lo ti hè haw aa. 

"Rinsangi scooty dahna workshopah kan kal ang" a lo ti nghet charh a. Awmzia a awm awm lo. Kan inzui chhuak leh ta poh a. 

A scooty dahna hi Nunmawia kha a lo hrilh ve vangin kan hre thei hlauh a ni. 

Workshop neitupa nen an inbiak chhung chuan ka lo ding ngawi reng a. 

"Nia, tukinah a thlalak kha ka lo hmu ve a, a zia lo tak tak a ni. Dar 6 leh a chanve rik dawnah a rawn innawr lut a, keini hi chu zan rei tak thleng kan inhawng thin hrim hrim a. A scooty kha kan la ensak hman meuh lo nen, 'Tihian ka dah ang a, naktukah ka rawn la mai ang' tiin number te kan inpe nghe nghe.. Kawtah hian taxi a lo chang a, ka va enzui tawh lem lo a. Ka hre zui tawh lo a ni" a ti nuah nuah a. A ha sen zet tibelhchhah turin kuhva a hmawm leh hmak bawk. 

Kawta kan din vung vung lai chuan a thlang lawka motor silna atang chuan vai thlah tih hriat zet, ria den dawn, rawlthar chhuak hlawt hi a lo chho va. Kan bul a rawn thlen chuan, workshop neitu Rja chuan, "E.. Ka pi, kha Rahula khan a hre maithei.. Han zawt teh u. Nimin tlai chuan kha nu motor chan lai khan kawtah a awm tak alawm" a lo ti lung lung a. 

Amanda chuan chu rawlthar chu a lo dawm ding vat a. A hlauhthawn hmel angreng. 

"Rahul, thil ka zawt lawk ang che. Hlauh tur engmah a awm lo a nia aw.. He tah hian i thawk ve em ni? " nelawm zet hian a ti a. 

"Umm thawk ve e" Mizo ţawng pai angreng tak hian a lo ti ve mai a. Amanda chuan thu dang dang sawipuia a biak seuh seuh hnuah, "Ih maw.. Nimin tlaia scooty rawn dah nu pakhat kha i la hria em? Thau ve lam, tawi lam, hmel tha deuh kha" tiin a kut a zaizir pah bawk a. Rahula chu a ngawih run run hnuah, "Nangmah Police ami? " a ti he hâw a. Kan han nui leh rih. 

"Aw.. Ni e, kha nu kha ka chhui a. Min hrilh chuan, lawmman pawh a awm maithei a ni" a ti sar sar a. 

"Aw ka hria alawm.. He tah hian a ding reng a. " a ti ta a. Amanda hmela phurna chu ka hai lo chiang. 

"Chuan, amah khan taxi a chang tiraw? Taxi-a a chuan khan a driver hmel i hmu em? " a ti ta a. 

Rahula chuan a lu a hiat nuah nuah a, "Aa.. Aw keiman hmu vek alawm.. Taxi kha lo kal a, driver leh nu an lo chuang a, ka pi khan a lo phar a.. Bethlehemah keimah haw dawn a tia, a chuang ve a.. " a ti ta mai a. 

"Rahul, ngaihtuah la, driver hmel kha i la hre thei em? " Amanda chuan a ti phur sârh a. 

"Ih.. A mah khan lukhum a khum a, amah kha a hmel chhe lo. A lian bawkin ka hria.. Kawr dum ban tlawn a ha a " a ti a. Kan thaw huai tak naa, taxi driver tam tak zingah chu pa chu engtin nge maw kan zawn hmuh theih ang le? Zonunsanga anga rawn inreport thlap mi a nih ve loh phei chuan… 

Chawhnuah office kan thleng a. A lum angreng sia, a chauhthlak angreng. Amanda chuan tu tu te emaw a be kual a, kei chu ka lo thu mai mai. A thlazar hnuaia hah hi a nuam tawk viau a ni. Ka thluak ka seng vak thiam lo. 

Ka nuin hmarcha min rawttir sawk zawk lai chuan, ka phone a rawn ri a. Amanda bawk! Min ngai viau mawni le.. Kan inhaw san chauh kha a nia. 

"Aw" ka ti satliah a. 

"Sam, lo phei rawh.. Thil thleng a awm" a ti a. A dah leh nghal hmak. Aww.. Thaibawih ni tur hian min duh mawni le.. Ka nu ka hrilh a, ka insiam zui nghal. 

Ka va thlen chuan, sitting roomah a lo thu ngawi ran a. Thil danglam engmah ka hmu lo. 

"Eng nge" ka ti sup a. 

"Bed roomah va lut teh" a ti nghat a. 

Ka lut nghal. Ka hawi phâwk kher mai. Darthlalangah chuan lipstick nge thisen pawh ka hre lo.. 

"Zaninah ruang i hmu leh dawn. Min chhui tawh lo la; i hah a dam a ni mai.. Nang hmeichhia ai chuan ka fing zawk ang" tih thu hi a lo ziak! A hawrawp lah a nalh hrep. 

"Engtin nge? " tiin Amanda bulah ka va kal a. 

"Ka kawngkhar a tichhe lo va, chabi hmang ngeiin a lut a ni. Engmah a bo lo bawk" a lo ti sap a. A inngaihtuah muk hmel kher mai. 

"Engtin nge ni dawn? Zaninah ruang i hmu dawn te a ti si a" ka ti leh a. 

Ka za vek a ni ber. Hetiang hi kan tawn vawikhatna a ni si a. 

"Sam, he thil hi department-ah la sawi ri lo ila ka duh. He mihring hi mipa a ni tih kan chiang ta phawt. Mi thah a bansan dawn lo tih nen.. Keimah ngei hian man ka duh a ni" a ti vawt raih a. A mitmeng pawh a nelawm loh kher mai. 

"Mahse, ruang kha" ka ti leh a. 

"Kan tan He khawpui hi a zau deuh a ni. Venhim duh mah ila, tu nge a thah dawn tih kan hre tlat si lo alawm le.. Mahse, tunah chuan hmanrua eng emaw tal chu kan hmu ngei tawh ang" a ti chang fak a. 

Awmngaihna vak ka hre lo. Hnem dawnin a chiâi lem chuang si lo. 

Zanriah kan ei sawk sawk a. Amanda remruat angin, a hmaa ruang kan hmuhna hmun lam panin chak zetin kan lim chhuak ta a.. He lai hmun lo hi chu ţan hmun kan nei miau si lo a le.. 

(Kut a kham ta e)