Boss Amanda... 1

BOSS AMANDA.. 

(The Serial Killer) 

Chapter- 1

Ziaktu: Toni Rãlte

Hmanhmawh pheleng kal kan ni bawk a. Ruang an chharna hmun chu kan thleng rang khawp mai. Media leh mipui thenkhat an lo ding khawm laih a. Ruang hi Aizawl dai, tlak lamah chhar a ni a. A piah lawkah Pu Rozama, Aizawl pa lar huan a awm bawk. Ruang chu an lo la khawih che lo va; Amanda chuan glove bunin uluk takin a han en fel ţan a. Chu ruang chu nu valai tak, Kum 40-45 bawr vel a ni maithei. Smart pant dum a ha a, kawr par smart tak tho a ha bawk. A pheikhawk khing chu a bun lo va, a tal nasa hle a nih a rinawm. A hrawk chu a thler hawk a. A kutzungţang dinglam zunglai chu a bung bawk. Dar 7:20-ah ruang hi hmuh a ni a, a ruang hmu tu hi Pu Rozama huan enkawltu Tai an tih mai a niawm e. Rang taka police rawn callin kan va kal ta kha a nia. 

Amanda chuan a duhthala ruang a endik hnuah a bul vel chu a han bih kual leh a, lei chu a thai a thai hnuah rangkachak zungbun niawm tak hi a rawn phawrh hlawl mai. Hmanrua hmuh tur a awm lo va, tualthattu sulhnu chambang a awm lem lo. Ruang chu an senghawi ta nghal a. Taia leh Amanda inbiak lai chuan ka lo ding ngawi ve ran a. 

"Thawm i hria em? " Amandain a tih chuan, a lu a lo thing mût mût a. Taia an tih mai chu kum 40 bawr vel tur niin zu a in ve nasa tih hriat takin a hnar chu a ţawk hlar tawh a. Palian lam, sam sei hnûp mai niin a bumro angreng viau. 

"Ruang i hmuh dan chu min han hrilh ve teh le" Amanda chuan a ti dam diai a. 

A heh a liak zauh, "Englo a nia. Ka thil in a laklawh deuh vangin ka muhil thei dawn si lo va tiin thil va lam turin ka chhuak a, ka scooter saw a nung thei tlat lo mai a. Motor ka lo chang ta ringawt a. A vâng angreng sia, zawi muangin kal mai ang tiin ka kal a. Ruang hi a tirah ka hmu lo, ka kalpel tawh. Mahse, thlam ka kalh lo tih ka hre chhuak a, ka let leh a. Ka kalh hnua ka phei leh chuan ka sihdet hian a va en siah a. Ka rak ţhawt nghe nghe.. Chu zawng chu a ni mai" Taia chuan a ti muang churh a. 

"Thawm engmah i hre lo chu a mak angreng hle mai.. I piah lawkah tu te emaw an inchai hle si a.. Nge a ruang hi a thattu hian a rawn dah zawk ni ang aw" Amanda chuan a ti leh vang vang a. Taia lah chu a zu châk khur nge ni a khur ang der der a. Biak pawh a ngaihsak hleithei lo a ni ber e. 

Media a chak tawh bakah thil tih a awlsam tawh bawk a. Mitthi chu tu nge a nih kan hre thei ta a. Vanlalruati niin, pasal fanau nei lai a ni. Mel thum-ah an khawsa a, Ruati pa te in hnuai an luah a niawm e. Fa mipa pahnih an nei bawk. Ruati hi Department pakhatah LDC niin, chu chu an chhungkaw eizawnna a ni mai awm e. A pasal erawh chu Ruati pa hnuaiah workshop-ah a inhlawh ve thin a, an fate pawh school an kal ve tawh bawk. Ruang te an postmortem zawh hnuaah Mel thum lamah chuan an phur phei ta a. Keini erawh kan haw. Thih sarhu lai a ni a, va chimbuai kha Boss hian a ti rih lo a nih hmel. A tukah ruang vui zawhah kan va lang ve leh a. Inleng an lo la tam angreng viau nain Vanlalruati chhungte chu kan kawm fal thei ta hram a. 

A pasal Tlansanga chu Ruati nen an inrual khat viau maithei. Pa te lam deuh, meng zim san hi a ni a. An nu boral chu a tuar ve viau a nih hmel, a hmel a phelh phang mai. Ruati nu leh pa te pawh an la valai angreng viau a, a nu chu a meng bui lâk mai. 

"Khatiang huna a la rawn haw lo kha ngaihthat lohna te in nei reng reng em? " zawh bik pawh nei lo chuan a ti nghal a. 

Tlana chuan, "Umm nei e, ka call a, a switch off tlat bawk sia. Ni dangah chuan dar 6 aia tlaiah a lo haw ngai mang lo. A lo haw tlai dawn chuan a rawn sawi sa thin" a lo ti duam a. 

"A nih leh khatiang chen chen kha a reh ta si a, zawn tumna emaw report te in tum reng reng em? " Amanda chuan a ti leh a. 

Ruati nu chuan, "Police hrilh mai ang u ka tih khan a pa hian eng em a ti lo vang, duh leh Tlana leh Mama (an fapa) ten ve zawng se la a tia, an rawn zawng ta reng a, mahse, an hmu mai si lo. A hnu lawkah ruang chhar a nih thu leh a inchei dan vel an rawn sawi khan, kan ringhlel ta nghal a. Kan rin ang ngeiin… awiii ka fanu hi ka lainat em mai.. " tiin a ţap nghal hawm hawm a. An pa chuan a lo kuah vat. 

Ruati pa leh a pasal melh tawnin, "Ruati han tina duh awm mai tur hmelma emaw a mah hawtu a nei em? Ngun takin han ngaihtuah u la" Amanda chuan a ti fiah kâk a. 

  Ruati Pa Pu Ngura chuan muang ban churh hian, "Ka va hre mai lo em.. Ruati hi nu vengva leh tawng duh ve tak a ni a. Thenrual pawh a ngah.. Chutianga han haw tur awm ka hre mai lo" a lo ti a. 

Tlana pawh chuan, "Kei pawh ka hre lem lo. A nunna hial la duh khawpa haw tu chu" a lo ti ve a. 

"Tun hnaiah a awm dan han danglam deuh, ni dang ang lo taka chetna te a nei em? " Amanda chuan a ti leh a. 

Tlana chu a ngawih vung vung hnuah, "Umm.. Sawi takah chuan ngaihbel tur ting chuan a awm ve. Ni 3 vel liamta atang khan, a office bang hi a ngui riau zel a. A chau aniang ka ti mai zel a. Chuan nizan hmasa khan, 'Tun lai chu min enthlatu an awm hian ka hre tlat zel.. Ka sawi thiam lo, keimahah hian hriatna a awm' a ti mai a. "I ngaihbel aniang ka awm ve fo alawm,"ka lo ti ve mai a. Tikhan a awm zui ta mai bawk sia" a ti ta a. Amanda a bu nghat nghat. 

"A nih phone call danglam deuh te? " a han ti leh a. 

"Aih, chutiang chu a dawn awm ka hre lo. Inah a awm tlem ve bawk nen, zan lamah chuan chutiang engmah ka hriatpui lo" a lo ti var a. 

Amanda chuan a zungbun chhar kha lek vâin,"I nupui ta a ni em" a ti sap a. 

"Aw ni e. Kan inneih zungbun a nih kha" a lo ti vat a. 

"Engvangin nge a kut zunglaiah zungbun chu a bun kher le? " a lo ti khauh. 

"Aw ni e, zungbun kan chhertir khan a zungte û-ah khan a thawl tlat si a, chher tirna hman a awm tawh si lo nen, tah khan a bun ta mai a ni" Tlana pawh chuan a lo ti ve mai a. Amanda a bu nghat. 

An in kan chhuahsan hnuah, "Zungbun kha engtin nge a zunglaiah a bun tih i hriat,? " ka ti a. 

"A kutzungte û-ah zungbun bunna thla a awm loh bakah he tualthattu hian ti nge a kutzunglai kha a tansak kher ang? A suam aniang ti dawn ila a zungbun kha a la bawk si lo. He thihna hian kawng eng emaw takah min hruai ngei ang," a lo ti duah a. Ruati te kawmchhak lawka an in dawra an siam ni nghal bawkah chuan lutin eitur kan lei a. Amanda chuan nu pakhat lo awm chu a besawm luam a. 

Ruati chungchang vel chu sawiin, "An pa khu a thaibawih ve deuh ni maw? " a ti zauh a. A nui sâng bawk. Ka lo melh hû ringawt. 

Chu nu lah chuan ring angreng tak hian, "Awii i ti duh, Tlana chu nupui ni awm zawk a ni. Engkim zawng zawng khu a khawih vek a ni mai. An fate school kal tur pawh Ruati khan a siam ngai kan hre lo, Tlana hian a buaipui vek.. A khawngaihthlak rualin a ngeiawm zawk", a ti bawrh bawrh mai. 

"Anih Ruati kha eng ang mizia nge ni le.. Ţawng duh ve tak a nih chu ka ring, thian a ngah danah" a ti leh luam a. 

"Umm.. Amah ngawr ngawr hi chu nu sual tak a ni lo. A taima lo ve êm a, in chhungkhur chet leh fate han buaipui tak tak pawh a ti peih lem lo va,ro khu a rel vek bawk a, lehlamah a sum hlawm thawkchhuaktu a lo ni bawk nen.. thenrual han kawm te chu a thiam reng.. " a ti ve mai a. 

"Ngaihzawng han neih tih velah te sawisep han kai te a nei ve tawh em? Amah kha a hmel tha viau sia, an pa khu a nung ve che che ni maiin ka hria" Kan pi kuhva khawr lai han khawrpui pah chuan a ti leh a. Ka lo melh rum tawh hle. Engah phei chuan a ngai lem hlei lo va. 

"Aa.. Ka hre miah lo, chutiang zawng chuan.. Chuan ti daih ila, police in ni tiraw? " a'n ti leh hnuhnawh a. Uniform kan ha lem lo bawk nen, hriat a har ve bawk aniang. Amanda chu a bu nghat a. 

"Chhui chhuah theih te i inring em? " a ti hluai a. 

"Ka beisei alawm.. Kawm i nuam hle mai.. Kan kal ange aw.. Nakinah kan inkawm leh dawn nia" tih pah chuan min rawn mitmei a. Kan chhuak zui nghal. 

"An pa kha a thaibawih tih engtin nge i hriat? " ka ti vat a. 

"Ka risk a nih kha" a lo ti mai si. 

"Sam, zanin chu lo riak ta che.., " a ti zui zat a. 

"Ka chak zawng tak" ka lo ti hmiah. A khi sak a, "Whisky kan lem sek dawn nia. Tun lai chu ka chau riau zel a. Inthlahdul ka ngai" a ti leh ta zel a. Phur tawh tak ka ni. Zan lam hlir ka dream nghal. 

Ruati chungchanga kan hriat theih ang angte chu kan han lakhawm leh a, office ban rualin a haw ve a. Scooty a ken loh ni a nih vangin taxi a lak thu a thawhpuinu chuan a sawi. Chu chu a dam lai hmel an hmuh hnuhnun ber a ni ta a ni. An office lamah buaina a tawh sawi tur hria an awm lo va, a tawng duh a, kawm a nuam tih bak sawi tur vak an hre lo. Mi sual tak chu a nih hmel loh,. A nih chuan tuin nge râwng taka that duh ta ang? Amanda thluak kutah ka dah ta mai e. Kei te chu a bialpa leh a hnungzuitu satliah mai chauh ka ni. 

Zanriah ei hmain whisky chu kan han lem dun ta sak a. A kai duh malêk a! Arsa fry rimtui zet leh bai neuh neuh nen chuan kan puar êl euh mai. A eirawngbawl ka ei vawikhatna a ni hial maithei. Ei khamah kan han tifel leh phawt a, a study roomah whisky in chhawp chung chuan Ruati chungchang kan han chai leh ta a. 

A phone kan hmu zo tlat lo va, tualthattu hian a tichhia emaw a kawl emaw a ni maithei. Ka men phi chiai tawh laiin a la fim kur a! Ka ning. 

"Inthlahdul i sawi ve sia, i insangmar reng tho si" ka ti hluk a. 

"A la hun lo" a ti mai a. 

"Ruati kha pawngsual a ni miah lo mawle" a ti leh thut. 

"Umm.. Pawngsual kher tur tihna em ni? " ka lo ti hlur a. 

"Ni lo ve.. Mahse, pawngsual miah lo va rawng taka thattu hian chhan pahnih vangin a that tihna a ni. Pakhatna: A rawk, a suam.. Ruati bag- kan hmu lo. Pahnihna- Phuba vangin a that thei. Eng zawk nge i rin? " tiin min rawn melh a. 

"Ka hrethiam lo. A bag kan hmuh loh danah a rawk aniang, Ruati lo ţang nasa ve si nen an innuai deuh ang a, a tum loh deuhin a that pawh a ni ve thei" ka lo ti a. Ka fin ve hmel tawp. 

"Hmm.. A ni thei. Mahse, a hrawka zaina kha inchaina lama tum loh taka zai thler niin a lang lo. En la.. Muangchang leh rem taka zai thler a ang" tiin Ruati ruang chu a hmet chhuak a. Ka en rei duh lem lo. 

"A kut zungtang a tan kher leh a zungbun bunna ber kher a tan bung khan ngaihtuahna dang min neihtir a ni. Kei chuan phuba vang a nih rinna ka nei deuh" a ti leh a. Ka kai deuh bawk sia, ka ngaihtuah zui vak peih lo. 

"Aw.. A ninawm.. Rui ve tawh rawh" ka ti hluk a. Min rawn melh hâw.. 

"Tlaw lutuk" a ti sap a. Zu chu a thli nghal a, a tlak ve ta pawp. Zan dar 11 tlângah te chuan kan ni ve hûih tawh mai. Ka hnaih hret hret a, a ţawng siam siam lai chuan ka kek dak thut a, ka fawp ta chawt mai. A ţawng tawp chiang teh asin aw. Min nam lo va, min fawp let chuang lo. Mahse, ka fawh ka fawh takah chuan min chhang let ve ta a. A uar tân tân khawp mai. Mipa zawk ka ni bawk a, engkima hmahruai ka tum ruh hle. A study room-a khum te takteah chuan ka pawm phei a. Min kuah ve chial mai. 

Tichuan, kei hi mipa ka lo ni. Ka hmeichhe duh leh ìt em em ka boss ni bawk ka han keuh thei chu ka hlim takzet. A mutthilh sâk sâk lai te chuan ka nui tak ang vur vur a.. Aa.. A nuam bawk a ni. 

"Sam, ka duh aiin i mu rei.. Taxi driver ho bula kan kal kual a ngai ania.. Hun kan ngah lo" a aw chu a zangkhai hle. Ka meng duar duat a, ka thaw rim zet chu! Ka luak lo chauh. Kan in hnem bawk a ni. Ngawi rengin ka va intifai a. Ka lû a na bûr mai, ka va phur lo tehreng êm. Energy drink min pein, "Nangmahin insiam ve mai rawh" a ti sap a. Chaw min lo eisan chiang. Nupa te pawh kan ang deuh reuh e. Ani chu a lan dan a thar sar mai a, hmuh a nuam leh hle. Tui ti vak lo chuan chaw chu ka ei a. Ka ei tam lem lo. Inthlakna ka kensa chuan ka inthlak sawk sawk a. Kan chhuak dun leh ta. 

Office kan tlawh kawi leh phawt a. Kan DGP leh Boss chu an inbe leh rih. Ruati thihna vel chungchang a nih chu ka ring tho mai. A rawn let leh chuan, "I inpeih maw? Kan kal kual nasa dawn ania aw" a ti a. Note bu leh pen te chu a bagah a khung rawk rawk a. A silai erawh ka mamawh rih lo ti niawm takin drawer-ah a dah daih! Chhuah kan tum lai takin Constable pakhat a rawn lut a, a hnungah mi pakhat sang lam, cher lek lek, ngo lam deuh, hmel felfai tak hi a rawn tel ve a. 

"Ma'm, hei hi Vanlalruati phurtu taxi driver kha a nia" Constable chuan a ti a. Amanda a khi sak. 

"Lo ţhu rawh. A va lawmawm êm..rawn zawn che kan lo tum mek a" a ti nghal sawk sawk a. 

Taxi Driver chu Zonunsanga a ni. Vanlalruati chungchang vel chu hetiang hian a sawi ta a. 

"An office ban rual deuhthaw khan an office bula dawrah passenger ka drop a. Ani a rawn chhuak chiah nen, min hmang ta nghal a ni. Mahse, tu emawin a rawn call a, Ngaizel kan pel awrh tihin, 'Let leh mai teh.. Ka thiannu in min nghak sia" a ti a. Kan let leh a. Kulikawn tawntirhah sawn a chhuk ta a ni. Chuan, a ruang chhar tih leh a hming leh a thawhna vel kha ka lo hre ve a, a thlalak ka hmuh chuan ka phurh ngei kha a ni tih ka hre ta a, ka rawn inreport ta nghal a ni. " tiin. 

A tawngkam pawh a felfai hle. Amanda chuan ngun taka melhin, "I titha hle a ni. Hetiang hi khua leh tui tha nihna chu a ni e. Tichuan, a lo call tu nen an inbiakna chu a then azar i hre mial lo maw? " a ti a. 

"Aw.. Chu a thiannu chu a nih ka ring, 'Kan tlanpel tawh anih chu.. Aw ka lo let leh mai ang' tih vel a ni" a lo ti vat a. 

"Amahah danglam deuh, phurna riau emaw nguina riau emaw a neiin i hria em? " tiin a zawt leh a. 

Zonuna chu a ngawih vang vang hnuah, "Back seat-ah a thu a, ka va hmu chiang lutuk lo nain call a dawna kan let leh lamah kha chuan a phur riauin ka hria, min be luam nghe nghe kei pawh" a ti ta a. 

"Aw le.. A tha hle mai. Anih a chhuk chuan a thiannu emaw niawm chu i hmu ve em? " a ti leh ta zel a. 

"Aih, hmu miah lo. Ti ila, dawr bul mai a nia dawr kawtah kha chuan mi pali nga awm vel chu an ding a, chutin ka lo chìk bik si lo nen" Zonuna chuan a ti a. 

"A lawmawm e.. Anih nangmah khawi vengah nge i chen a, nupui fanau te i nei tawh em? " a ti ta daih a. 

Zonuna chuan min rawn melh zawk pahin, "Ka parawl ve a. Sawi nuam a ni lo naa, nikum khan ka nupui hualin min boralsan a. Hmeichhe lam chu ka ngaihsak ta lo. Chuan, Khawhai atanga rawn awm ka nia. Nu leh pa ka nei tawh lo" a ti chuai raih a. A landan zawng zawng nen khawngaihthla a la roh mang e. 

Amanda pawh chuan a lainat hmel viau, "Ka tihpalh a ni. Ka'n zawt satliah mai mai che a nia.. I kal thei tawh ang, kan lawm e aw" a ti thliam a. Zonunsanga pawh chu buk nghut pahin a chhuak ve ta nghal a. 

"Hma kan sawn hret e. Vanlalruati chuan tu nge a hmuh ang tihah chiah kan buai a ni" a ti sap a. 

"Nizan kha.. A nuam ee" ka ngaihtuahna ka lo sawi chhuak palh! 

"Samson" a rawn ti fiak ţhak. Ka eu awrh a, chair atang chuan ka tla thla tawp! "Sorry" ka ti sup a. A sir zawng chuan a nui hmel ka va hmu thei a, ka thaw huai mai. 

"Chhuak ang. Kulikawn vel chu i va fang ang hmiang" a ti a. Kan chhuak zui ve nghal. 

Zonuna sawina lai velah chuan kan han ding ren rawn a, dawr nghaktu nu thau liah luah chu kan va kawm ta a. Ani chuan, pawn lam mi a lo enchian vak loh thu sawiin chutiang engmah a hriat loh thu a sawi. A dik ang, customer an nei ve reng bawk nen, taxi atanga lut leh chhuak chu ngaihven hman an ni chiah lo. Mi han zawh mai tur kan hre mang si lo. Pawi ber chu Ruati phone bo kha a ni. A switch off satliah tawh lo, a sim card pawh a chhe tawh tih a hriat. 

"Tlang law law ang" tiin Mel thum lamah kan tlan leh a. 

Tlana te pawn in leng an lo la nei nual a. Ruati nu te in lamah zawk chuan kan lut a. A nu chuan a tuar hle a nih hmel. A lo la inhru chawt chawt mai. An chhungkaw chanchin erawh kan hriat belh ta a. Vanlalruati te hi unau pali niin, ani hi a upa ber a, a nau mipa chuan nupui nei ve tawhin in puiah an la khawsa a, chumi nau leh chiah hmeichhia chuan naupangtein pasal a um ve niawm tak a ni. An te ber mipa erawh college kal lai a ni. Ruati pa hi mistiri niin, workshop a nei nghe nghe. A nu erawh an veng primary school-ah a thawk ve thung. An khawsak chu a chhe hran lo nain, chuti luaa khawsak sang an ni lo. Tlana hi Mamit lam mi a ni a, Ruati nen an inneih atanga thla hnihna velah Ruati hna avangin he lamah an rawn awm ta a niawm e. Tlana chhungte lamin an rawn ngaihsak vak loh thu, Ruati nu chuan a sawi kai nghe nghe. 

Ruati nu pawh in hnuaia chhuk ve a ngai tawh si a, engmah han chhui theih tur a awm bawk si lo. Kan chhuak leh ta phawt. Tlana erawh in leng chhawn leh lo dawnsawn a ngai si a, kan be ta lo. 

Vanlalruati case chu a khirh zek mai. Han rinhlelh tur awm an vâng takzet a ni. A thiante zawng zawng kan hriat theih chin kan han be kual a, a tu amah chuan a thih ni khan an hmuh lo tlat! Rinhlelh an hlauh vang nge phei zawng ka hre lo. Amanda pawh chu a thluak a hmang nasa tih hriat takin a thu ve that mai. Hun a kal bek bek a, kan la hul hle bawk si. 

A tun hma nun te kan han chhui sasawi a, chutianga thihna khawp thil a tihsual kan hre mai bawk si lo. Ruati chu a nulat lai pawha hirha ve thei tak a ni a. Unau zinga upa ber ni bawk chu a lal pawh a lal ve viau a niawm e. Tlana nen an inneih hma hian an ru ve zuai tawh bawk. Tlana nen hian an puk lawk tawh avanga innei zui ta an ni nghe nghe awm e. Tlana sawi hmangin, Ruati te hi an hna thilah Tlana te khuaah an zin a, Tlana chuan office motor a khalh lai a ni a, an inphurh kualna velah an lo inhmel duh ta ni awm tak a ni. An inneih hnuah pawh hian taxi a han khalh ren rawn a, mahse, in lamah an buai tak deuh vangin workshop-a thawk chungin in lam hna a lo thawk ta thin a ni. Han hnemhnanpui tur a vâng viau mai. 

Ruati thihcham pawh a lo thleng leh dawn ta reng mai. Police lamin eng thu thar mah chhuah tur kan nei der si lo. A tha natthlak mang e aw. Ka nuin ka putea te inah gas min han dahtir a, in ka thlen chuan khua a thim a ni deuh mai. Chaw kan ei nghal a, "Zanin chhuah i tum em? " ka pa chuan a ti a. 

"Umm Pu Rinliana nupui kha ka va menpui ve dawn mawni ka ti. Ka la lang ve miah lo va.. " ka lo ti a. Pu Rinliana hi kan veng pa lar a ni ve a, an nu hi Pumpui cancer niin rei tak a na tawh a. Tunah in lamah enkawlin veng chhung mi tlawmngai ten an tlaivarpui deuh reng tawh a ni. Chuvang chuan va lan ve ka duh a ni. 

Dar 7 bawr velah ka chhuak a, Zela ka sawm a, muangchang thei si. Amanda nen kan la inbe miah lo. Tihbuai ka hreh ve deuh bawk nen. Zela ka nghah chhung chuan ka va text ve a, a seen har leh ang chu aw.. 

Pu Rinliana te inah chuan kan lut a, an lo awm leh ţiai tawh. An nu tawrhna hi a rei tawh si a, lehlamah chuan kal tawh mai se tih chu amah khawngai tu tan chuan a awm viau ang. Kan titi pah bawk nen, rin aiin hun a kal chak. 

Ka phone vibrate char char chu phawrhin pawnah ka chhuahpui a,. 

"A hmaa ruang kan hmuhnaah khan tunah lo kal nghal rawh.. A ngai bawk. Hmeichhe ruang hmuh a ni leh tawh" Amanda chuan a rawn ti zawi sap a.. 

Eng thil chiah nge maw thleng le..!? 

(Min tur lo hram ru aw. Online class nilengin kan nei a, an strict si.. Break leh eng emaw kar lakah ka rawn ziak hram zel a.. A thui thei ngang lo a ni. Kar leh atang chuan kan zia deuh ang 😊😍