BAWIHPUI..

BAWIHPUI… 

Ziaktu: Toni Râlte

Kawngkapui chu a inkhar ri khap a. Ke pen thawm chu a zawi tial tial a. A reh ta. 

A BUL.. 

Ka pa hi police officer a ni a. Ka nu erawh chuan eichawp dawr a nghak ve a. Unau pathum kan ni a, vanduaithlak takin nikumah khan ka nau mipa chu accident vangin a boral tawh a. Ka u hmeichhia hian pasal nei tawhin Delhi-ah an pa hna avangin an awm. Kei hi min mal khalh deuh ngâwk a ni ber e. Kum 36 ka nih kumin nupui duhawm leh hmel tha em em ka nei a. Psychiatrist ka ni a; ka hna vang hian duh dertu leh makpa atana min iai lo fe fe pawh ka hmu ve. Mahse, lehkha ka zir nasat luatah leh ka chut deuh roh vang nge nula lam ka ngaihsak har khawp a! Kan nu tih loh hi nula pahnih chiah ngaihzawng ka nei. Chung mi te chu hna ka neih hma ami te an ni hlawm a, eizawnna ka la neih miau loh vangin iai ka hlawh nge mi dang min hnaihsan ta hlawm a. Pawi ka ti tehchiam lo. Ka nupui Bawihpuii nen hian veng khat kan ni a, ani hi phaia awm reng reng thin, a lo haw ve cháng pawha chhuak zen zen lo a ni a. Kan inhriatna pawh a la rei tehchiam lo. Nula hleitling zet zawt, ngo vuah mai, vun nung sar a ni a. A hnar ngul chu vai rawng a kai lek lek, a duhawm a ni tawp mai. Lu zo veh vawh, induhtawk ve tak a ni. Kei chuan hmel tha ka tih mai kha ka duhtawk a, bawhzui nachang ka hre hran lo. Amah zawkin min rawn be tlat! Khata ka lawmzia kha aw.. Kan inbe chho zel a, ka phai awm hun atang daih tawha min lo hria a niawm e. Eizawnna ka nei ve ta bawk a tiin nupuia neih theih dan kawng ka dap ve nasa a. A khirh hmel tehlul nen a hma atanga min lo duh ruk thu ka'n hre zet kha chu ka lam lo chauh. 

Ka kum te a lo tlem em em tawh lo bawk a, kum khat pawh kan inzui hman lo tihah palai kan tir ta kha a nia. Min lo iai bik lo nen, awlsamtèin kan inrem chu a ni ta reng mai. Sum lamah kan buai em em lo bawk a, a ropui thei ang berin inneihna pawh kan hmang a ni. Ka u te nupa pawh an rawn chho ve a, kan inhmu khât leh ta deuh bawk a. A hlimawm nak nak hle mai. 

"Bawihpui, ka hmuh tawh hnu i ang tlat.. Khawiah emaw ka hmu tawh che" ka u chuan a ti a. 

"Aw.. Hmu ang chu, a tleirawl lai te pawn" ka nu chuan a lo ti a. 

"Aih, Delhi-ah ka hmu tawh che" 

"Delhi tak chu ka awm tam lo, mahse, ka rawn kal zauh zauh, tah chuan min hmu aniang" kan nu chuan a lo ti var a. Ka ú meng nur deuh chu ka hrethiam lutuk lo. 

Inneih zan te hi a awm ve ngai ania!.. Hehe.. 

Ka nun chu hlimnain a khat ti ila ka sawi sual awm lo ve. Bawihpuii a fel bawk a, ka nu pawh a hahdam ta khawp mai. Awmpui lak hi a duh bau si lo va, chet chhawktu a nei em em si lo. Bawihpuii hian a awl hneh khawpin ka hria. An inngaina nufa chho tan khawp mai. 

Ka hna hi nuam tih chang awm mah se; hahthlak tih chang a tam zawk fô! Harsatna inang lo tak tak formula hrang hrang hmanga enkawl chu taksa thlengin a tuar thei. Thawk khat laia a nupuiin a uiresan keimah ang rual vel ka enkawl lai phei kha chuan chaw ka ei mumal lo va, ka cher kâwk käwk mai. Mahse, a dam fel tawh a, a zia. 

"Ngur, kei chu hetia ina awm chawt hi ka ning. Awmpui la mai ila, hna zawn ve ka duh a ni" kan nu chuan a ti sar sar a. He thu hi a hma pawn min sawipui tawh. Ka hnial hran lo naa ka nu hian a remti ang em ka hre lo 

"Ka nu leh pa te ka lo sawipui dawn nia"

"Eng nge sawipui a ngaihna.. A ho em mai. " a ti hluk a. 

"Engah nge ka sawipui loh ang" ka lo ti thung. 

Tukthuan ei laiin ka sawi ta nge nge a. 

"Nia, a pawi lo. A khawharthlak ve bawk ang, a thu thu ni mai" ka pa chuan a ti a. 

Ka nu pawh chuan, "Nia, awmpui lak pawh pwi ka ti tawh lem lo" a lo ti ve thliam a. Mak ka ti ru deuh. Kan nu hmel pawh a hlim khawp mai. 

Master degree nei mah nise; Mizorama hna thawh mai tur van zia chu kan hre theuh awm e. Mahse, vanneihthlak takin a thianpa te schoolah a ruak hlauh mai. Private mah nise; a changtlung tawh a, an hlawh pawh a chhe hran lo. Chuta thawk ve tur chuan an inbe fel ta mai a. Ka lawmpui khawp mai. 

Nitin kan inphur chhuak a, tlai lamah erawh taxi a hmang thin. Ka tlai deuh thin vang hian. Awmpui pawh kan la tawh a. Thingtlang lam mi a ni nghe nghe. A fel thar thar khawp mai. 

Chuti ang chuan kan hringnun chu a inher kual ve reng a. Thla khat zen zawn a thawh hnuah scooty a ngen leh a, ka leisak ta mai. Taxi hman reng kha a buaithlak ve bawk a ni. Kan motor pakhat lah ka pain a hman a ngai thin si. 

"Ngur, maimichhing rawh" ka inbual zo ka chhuak chiah chu a lo ti sap a. A ngaihna ka hre lo angreng hle. Ka maimichhing ve mai a. 

"Lem.. Meng rawh le" a tih chuan ka meng a. Ka hmuh theih ngei turin pregnancy kit chu a lek a. A positive zân mai le.. Ka pawm chawih a, ka virpui ta chiam mai. Ka thiante fa, awt em ema ka thlir thin hun chu a liam ve dawn ta. Fa ka nei ve tawh dawn. Zanriah kan ei chu kan hlim hle. Ka nu te pawh an lawm ve khawpin ka hria. 

Rai inhmeh hi thlang dawn ila, kan nu hi top 3-a a lan loh takah. A fit bawk a, a inzo khawp. Indim turin kan inhrilh chamchi zawk. A neih dawn hnaih tak tak hma zawng a hna pawh a thulh duh lo. 

Fapa ka nei ta. Khawvel mihringah hian ka hlim ber awm e. A duhawmin a ngo si. Min chhun hlein ka hria. Mipa hmel chhia ka ni lo va. A nu lah a chhe si lo. Kan fapa hi a la hmel tha dawn khawp e. A hmingah ka nuin, 'Hmangaihsangzuala' tih a phuah a. Kan pawm tlang hle. 

Bawihtea chu kan chhungkaw nun tihlimtu ber a ni ta zel a. Kei phei chuan ka duat lutuk hi ka atchilh thawthang a. Ka pain min khap chang a awm fô! Ka duat lutuk vang nge a nu hian a ngaihsak tha lo deuha hriatna te hi ka nei thin. Zan laia a lo harha a tah te hian kan awmpuini a awih muttir chang a awm a. Keiin ka awih chang pawh a tam. Kan awmpuinu kutah a dah tam mah mahin ka hria. Ka nu hi chuan ina a awm phawt chuan tuma laksak theih lohin a kuah chawt thung. Kan nu pawh ka khak fô.. 

A kum khatna kan lawm te kha a pui ania. Ruai kan siam a ni hawt mai. Pawi kan ti lo. Mi lawm a hlawhin duattu a ngah bawk a, chawlhniah phei hi chuan kan pawm chang lo zawk. 

Kan nu nuna ka duh loh leh deuh pakhat chu an in lama a kal ngun lutuk hi a ni. A office bang hi a peng ngei ngei zel a, chu chu a remchanga tiin a la pawi lo. Inrinni leh chawlhni apianga a leng zen erawh a mawi lo ka ti. Bawihtea a hruai azeng pawh a ni si lo. Ka khak tawh nghe nghe a. A ngaipawimawh tehchiam lo aniang. A sim chuang lo. 

HEI HI MAW.. 

Bawihtea'n kum 2-na a hmang ve mek tih atangin kan nu chu a danglam tan ti mai ang, a ze dik tak a lang zawk aniang chu. Min zah lo sâwt riau mai. Ka nu leh pa te hi a hnial pang pang ta fô mai. Kan awmpuinu lah a tham lo hle bawk. Ina a awm ve pawn in chhunga hmeichhe tihtur awm ang chi hi tih a tum miah lo bawk. Tin, a hlawh hi a thawh tirh a thla hnih hlawh ka nu a pek bak kha a pumbilh ta vek a. Sum lama buai kan nih em em loh vangin hei chu tuman kan sawisel hran lo. Mamawh an ngah ve thin bawk nen. Mahse, Bawihtea kawr pakhat lek lei nan pawh ka nu emaw kei emaw min dil zel lawi si. A inkhawl ve miah lo zawk em mawni..ka fapa tan ui ka neih loh tehlul nen. Amah ai chuan ka nu hian Bawihtea mamawh chu a hre zawk, a leisak nasa reng bawk a. Tiang chuan kan kal ve mawp mawp reng a. Mut hmuna han inhauh bap bap chang pawh a tam thawkhat ta. 

Mi buai tak, chhungkua ngaihsak hleithei lo khawpa pawh phar ka nih vangin ka uap lum lo tih chu ka hria. Mahse, ka hun awl tawh phawt chu ka chhungkaw tan ka hmang ve chuan ka hria. 

Bawihtea'n hnute a nghei fel tak hnuah phei chuan a fapa aiin a phone hi a taksaah a bet tam zawk. 

"Lo mu ve tawh em em teh" sana ka en a, dar 2 lai a ri tawh. Kan nu chu laptop enin a lo la khi vur vur nia! 

"Lawk, thil ka chah a, ka tifel tep" a ti puat a. Ka mut a chhuak ve tho nen ka lo muhil leh hman a. 

Zan rei tak tak thleng online hi nutling tih chi ni pawhin ka hre lo. Kan nu chuan a ti thin miau a!  

"Sawi dun teh ang. Kan nupa chungchang hi.. Heti ringawt chu a dik lo. I awm dan hi thlak la ka duh. Kei pawh ka dik tawk lohna a awm chuan sawi la, insiamtha tawn ang" ka ti ta thlawt a. Chawlhni zan a ni nghe nghe. 

A tum deuh bur a. "Insiamthat ka ngaihna ka hre lo. Insawisel tawn lo vin tihian awm ila a tha a ni mai" 

"Heti ang nupa hi ka duh ve hleinem"

"Min ringhlel tihna mi? "

"Rinhlelh turin i awm em ni? "

"Mipa ve si, tawng thei lutuk" a ti ta daih a.. Mi haua zilh hau vak chi ka ni lem lo a, ngawihah ka tlak leh mai thin. Ka thin erawh a ur teuh thung. 

Thawhlehni tlai ka hawng chu ka nuin eirawng a lo bawl a, a chhan ka zawh chuan, "Tukin i kal hnu lawk khan sangi(kan awmpui) kha in nuin a hau hrep a. Min chhuahsan ta anih kha.. " a ti a. 

Khaw thim dawnah kan nu chu a lo haw ve chauh. Thinrim lo turin ka insum hram hram a ni. 

"A mawl si, a thing ropui si, thatchhe bawk si, ka hnawtchhuak anih kha. Awmpui dang lak tur an tam lutuk" kan nu chuan a ti hlawih hlawih a. 

Sangi aia fel leh taima chu kan hmuh ka ring tawh lo. Kan nu mizia hi ka mil lo tan ta hle mai. 

Sangi'n min chhuahsan tak siah chuan kan buai ta viau mai. Bawihtea awm a lo ngai tawh si. Ka nuin dawr a nghak hleithei ta lo. 

"I hna hi bansan mai la a that ka ring. Kan mamawh em em lo bawk a; bawihtea enkawl a ngai bawk si" ka ti a. 

A ter at mawle! "A sawi pawh i sawi zak lo e a. Ka hna hi awlsam taka ka neih a ni hleinem. Ka bang awm lo em mai a. Bawihtea chu a piin a awm thei, a pi hian dawr khar se a tha zawk" a ti! 

Ka ngwwi hmak. Kut ka thlak duh mai dawna ka inhriat vangin. 

Ka nu chuan dawr nghak tur a la a, in a nghak ta ngawt mai a ni. A fapa pawh enkawl peih lotu nupuia ka lo nei hi ka vanduai hle mai. 

Friday tlai ka haw chu bawihtea a lo tap nasa mai a. Ka nu chuan tihthlei tumin a lo thlem char char a, a bang duh si lo. Ka pawm a, ka han thlem ve ngial a. A tap uar telh telh mai. Na a nei anih ringin kan thenawm nurse Zaiteii ka va ko ngawt a. An en kual vel a, a pum chu puar riaua a hriat vangin damdawiin lama tlan chho mai turin min ti a. Kan nu ka call a, a ring quit thak. Tehchai chuan.. 

Ka nu nen kan tlan chho a, rin aiin a lo serious, an admit ta mai. Kan buai nufa hle mai. Ka pa pawh a rawn chho ve a. Bawihpuii a la haw loh thu a rawn sawi. Ka thin hi a tawt up up mai. Ka nu leh pa te lakah ka inthlahrung ngawih ngawih. Bawihtea chu cabin kan book sak a, tumah chaw la ei kan awm bawk si lo va. Ka nu te chu an zuk haw phawt a. Zanah inthlakna leh chaw min lo kensak a. 

"In nu a lo la haw lo, in inhau nge eng nge a awmzia? " ka nu mangang hmel chu ka khawngaih ngei mai. 

"Hau lo. Rawn haw malèk rawh se" ka ti nghut a.. 

Chaw ei kham, bawihtea mutthilh laiin ka call leh a. A pick up mial. 

"Khawiah tehlul chuan nge i awm a. I fapa dam lo in a mut reng hi" ka ti vin thak a. 

"Ka rawn haw tawh dawn lo. Nun thar bul ka tan dawn. Ka hmangaih ber bulah ka awm tawh" a rawn ti ta a! Ka puakdarh lo kha a mak! Rinhlelh chang nei mah ila, heti ang em em hi chu ka beisei lo asin. Kan mangan leh a fapain a mamawh ber laiin min phatsan a maw? Ka bulah chuan awm se ka sat hlum duh hial ang. 

Ka nu ka bia a, ka nupui chungchang chu ka hrilh a. Ka aw khur lek lek chu ka duh lo ngawt mai. Ka nu hrilhhai hmel tur ka mitthla nghal. Bawihtea muhil sák sák chu ka en ngawih ngawih a. Nu a nei ta lo chu a ni mai si a.. Kei hian nu leh pa nih ka tlin meuh ang em? Mi tam tak buaina ka lo chinfelsak tawh ngei mai chu ka chungah a thleng ve ta chu ania. Uiresan dinhmuna ka din hi ka lo ring ngai lo asin. 

Bawihtea pawh zo takin an enkawl a, ni 3 hnuah dam takin kan chhuak ve ta mak a. Anu erawh a reh vang vang mai. Bawihtea nat buai atalangin ka nupui vanga ka tawrhna pwh ka hrechang lo lek lek a. Kan haw hnu, rooma keimaha ka awm tawh hnuah ka natna chu a rawn intan dawn chauh a lo ni. 

Kan chhuah zanah kan nu ngei mai chu a rawn lut a! A thawmhnaw rawn lak a tum anih chu.

"Ee.. A vai khan la rawh. I bungrua hi kan kawl duh lo ve" ka pa tawngkam chu a hriam hreih hrawih hle mai. Ka pa hi a tawng mai mai ngai lo va, a thinrim phei chu vawi hnih vel bak ka la hmu bik lo. A mo awmdan chu a zo ta bik lo a ni ngei ang le.. 

"Naktukah a vaia lo lak kan tum dawn nia. Tunah chuan inthlakna tur bak ka la hrih lo vang" a la ti ngam nia! He hmeichhia hi ka nupui ngei kha a ni si a. 

"Zonunsiam, hei hi hria la ka duh. Bawihtea hi i fapa a ni tawh lo tih hria ang che. He in chhungah hian vawi khatmah i hmel hi rawn lan leh tawh ngai suh". Ka ti chang fak a. 

"Tehreng mai.. Mahse, bawihtea chu ka fa anihna a bo dawn chuang lo ania" 

Ngawi rengin min chhuahsan ta kha a nia! Pathlawi ka ni ta.. 

BAWIHPUII

… 

"A thawhpui khasi nen sawi an kai hat a, kan lo hre ve miah lo zawk a lo nia. Tuna a um pawh hi chu pa chu alawm lo ni le.. Bawiha, a pawi ngawt mai. In hrechiang mang lo vin in innei ngawt a. Kan thiam loh tak pawh a ni" ka nu chuan a ti char charh a. Ka nui lui tawp. Ka natzia leh ka chhungril nawm lohzia chu tawrh hrehawm tak a ni. Tlawm leh zah pawh dawn zo lo vin chawlh ka la ta ngawt a. Ka fapa nen chawlh kan hmang a ni ber e. Ka zak em em a, tumah ka hmachhwwn ngam lo. 

"Heti ang tur a ni lo. I hna i hria, i hnaah chiang la hetia harsatna i tawh lai tak hian mi dang pui zawk la, i natna pawh i hneh hma zawk ang" ka pain a tih chuan dik ka ti a. Mahse, a awlsam si lo. 

Ka chawlh lak a zawh chuan mi thar ang maiin office ka pan ve leh ta a. Thawhpui te pawh ka hmu zak. Min lainat em em ang tih ka hria. Mahse, ka zak a ni. 

"Remruatsangi".. 

Ka hmaah chuan nula lian lo tak, ngo veng mai, sam tawi miat, mitmeng fiah kel kawl a thu ran a. Lungngai hmel a pu.. Eng harsatna tak nei ang maw.. He dawhkan kil hian vawi tam tak nula tam tak ka lo titipui tawh thin a. Vawiina ka hmaa thu erawh danglamna riau nei tlatin ka hria a ni. 

"Eng nge i harsatna le.. Bawihi" nelawm chhuah a ngai thin hi ka zo lo fô! 

"Ih.. (A aw a thian a) dik tak chuan a ho i ti mai thei. Mahse, a ho lo bawk.. " a tih bah nuaih a. Ka nuih a za deuh. 

"Ka nu hian pasal a nei a. Ih, ka pa a ni lo ta a maw.. Chu pa chu.. Chuan chu pa chuan min khawih a tum thin a. Ka nu ka hrilh a. A awih si lo va, keimah zawk min hau vak zel a. Saw pa saw ka hlau tawh lutuk, engtin nge ka nu rilru ka hneh ang.. " a rilru pawisawi lo zet chu ka hmu thiam nghal. 

"I nu bulah i pahrawn chu a insawi thiam zel tihna em ni? "

"Aw, chu pa chuan, "I fanu zawk hian min ngaizawn alawm.. A thik che" te a ti thin. Ka sawi thiam ve si lo va, ka nu hi ka neih chhun ni tawh sia.. A hrehawm lutuk a" a mittui parawl kiang chu a khap sak sak a. 

"I nu hlata awm chu i duh lo tihna.. "

"Umm.. Awmna tur ka nei chuang lo. Ih.. Sâwn ka nia, ka nu chhung te hian ka nu chu min pai vangin an hnawtchhuak a, chuan.. (A kun a) zu kan zuar ta a. Ka pa hi ka hre tho a, mahse, min hre ve lo. Eng atan mah min ti lo a. Ka nu lo chu belh tur ka nei lo a ni" a dinhmun chu a khirh reuh hle mai. Ka khawngaih. 

Ka thiam ang tawkin ka han hnem a. Lehkha a zir tawh lo va, puanthuiin mi dawrah a inhlawh thin a lo nia. Anu chu sawipui leh tura thurawnin kan inthlah ta phawt. Kan inhmu leh turah ka ngai. 

A kar hnihna vel aniang chu, ka nu thiannu Sihphir ami a boral a, Bawihtea hruai thoin kan pathumin kan va râl a. Awmpui kan hmu leh mai si lo, Sangi lah an khuaah a awm leh daih tawh si. Ka nu nen chuan awmpui lak kan sawidun leh a. Ngawrh deuh hleka zawn ka tum thu ka sawi lai mekin call a lo kal a. Lak loh ka tum zet naa Remruatsangi a lo nia.. Ka la ta a. 

"Doctor, kei chu ka peih tawh lo. Thi ila a nuam zawk ang" a rawn ti teh ngawt a. Ka ding chawt a. Tih takzetin kan inbe ta a. Inhmuhna hmun tur ka sawi a, kan inbiakna kan titawp rih. 

"Nizanah a rui a, min khawih a tum leh a, ka au vak vak a, ka nu pawh a lo tho. Mahse.. (A tap zawih zawih a) keimah zawk min mawhpuhin ka tih vek zawk angin a sawi.. Kei chu dam nuam ka ti tawh lo" a insut hlap hlap a. Ka lainat takzet. 

FIR thehluh mai ka duh tawh a. Mahse, chu aia tih hmasak tur ka nei. Remruatpuii chu a awmna tur ngaihtuahsak a ni. Ngaihtuahna thar ka nei ta a. 

"Kan inah lo awm mai ta che. Kei leh ka nu leh pa leh ka fapa kum 2 leh a chanve chauh kan awm a, bawihtea i awm thin anga. Engmah thawh a ngai lo" ka ti a. Thutak deuhin min melh a. Duhthlan tur dang a nei bik si lo. Kum 24 chauh a la ni a, mahnia awm turin a la nau deuh a ni. A derthawng bawk si. 

Inthlahrung takin min zui haw a. A pahrawn laka action lak ka tum dan te chu ka hrilh a, mahse, "A ngai lo. A danglam chuang lo vang. A khawih phaka ka awm tawh dawn chuan loh vangin ti sawn awm ve tawp rawh se.. Ka nu sawna a hmangaih bawk si" a ti ta reuh a. A awmna chin tal chu a nu hrilh turin ka nawr a. Hreh zetin a call ta a. A nu aw vin lutuk chu ka hre thei. Eng ang nu nge maw ni ngai le.. Ka nupui hlui ka hre chhuak nghal.. 

Ka nu te chu thil awm dan ka hrilh thuak thuak a. An lawm hmel zawk hlein ka hria. 

"Bawihi, engtia koh nge i duh? Bawihi tih hi a tha mai em? I hming hi a sei deuh si a" ka nu dan ve ania. 

"Ih.. Bawihpui tiin mi chuan min ko thin" ka ding chawt. Ka nu nen kan inmelh ralh a, ka thaw hawk mai. 

A inthlahrun em vangin tihtlangnel phawt a ngai tih ka hria. Ka tir bawrh bawrh a, bawihtea nen erawh an innel nghal mai. Bawihtea hian duh loh vak pawh hi a nei lo. Mipa naupang fel a ni miau a. 

Thla hnih dawn kan ina a awm hnu chuan nuam a ti chho ve ta viau a. A chhungril nun va hriatpui lo mah ila.. Thawmhnaw engmah a rawn ken luh loh vangin a thar kan leisak vek a. An ina mi lak a duh viau naa ka remti lo. Bawihtea nen phei chuan a tak leh a mei ang maiin an inzui kawi ta reng mai. 

"Anu" tiin a ko mai a. Ka lo khi suk thin. Anu tia koh tur a nei lo rei tawh a. Pawi ka ti hran lo. 

Ni khat chu ka haw hma ve deuh a, Bawihpuii rooma bawihtea nui ar ar chu hlim deuha ngaithla chungin ka inphelh thawl a. 

"I lo haw tawh law.. Thingpui" a lo ti zat a. 

"Aih.. Inbual nghal mai ka duh" tiin an pahniha thil tur ka hawn chu ka pe a. A dan ngaitein hlim deuhin "Ka lawm e" a ti a. Hmuh a nuam thin mang e. Nupa kan ang riaua ka hriatna chuan ka nuih a tiza deuh. Naupang mai a la nia. Ka farnu ang a ni. Ka nu te hian an duat mah mah em aw tih tur khawp a la ni zui.. Amah hi a zam a thain a taima si, a che zung zung a. Hah a tidam em bawk lah taka.. 

Ka inbual zawh chuan ka chhuk a. Bawihtea chu ka chhaih nui hawr hawr a. "Pa ngur, vawiin chu in album ka en a. Ka en chak lutuk a. A pawi em? " a hmela inthiam lohna lo lang chu ka nuih a. 

"Pawi lo e. "

"Bawihtea nu hmel that dan kha.. Tiraw? "

"I tha daih zawk" engvanga kha thu kha sawi nge ka nih pawh ka hre lo, min rawn melh kâwk a. Kan lai chhe dun mai mai. 

Khata tang khan fiam zauh zauh ka ching a. Hetih lai mek hian kan thawhpui Mahriati thiannu saroni hian min hel ve mek bawk a. Pathlawi nih hnuah hian luck a lo awl a nih awm hi maw.. Saroni chu kan kum pawh a inrual khat ti ila kei ai chuan a nau ve tho a. A iaiawm miah loh. Kohhran leh khawtlanga inhmang, nula fel pawla sawi a ni ve a. Mahse, tihsual leh hi ka hlau tawh a. Ka hmanhmawh chung duh lo. Bawihpuii hian ka rilru tihbuai zauh chang a nei fô! Ítna ka neih awm pawh ka hriat loh laiin mangpui lama mangphan te ka ching roh a! A hahthlak lam aiin a nuam lam a pawl mah zawk. 

AMAH.. 

Bawihtea pawn kum 3 a lo hnaih ve ta reng mai. Hun hi hriat loh karin a ral ve zung zung si a. Anu te lam hi an reh hmak thung. A bialpa nen khan an innei aniang chu, an bo ta vang vang mai a. A bungrua pawh rawn lak an tum loh vangin kan va dah let tawp. Uire bungrua ka kawl duh bik hleinem. A hmingpui kan inah a awm si avangin loh theih loha hriatchhuah chang a awm lo thei lo a. Mahse, a kal ta kha pawi tihna em em ka nei tawh lo. Khatih lai a sarhu lai khan ka pa min fuih angin ka theihtawpin mi dang tan ka hun leh nun ka hlan a. Kha ka buaina khan chakna min pein ka natna te pawh min theihnghilhtir titih fô a! Theihnghilh hlen hmak erawh a theih loh tih hretu ka ni a, ka tum lui ngai lo. 

"Pa ngur, rawn haw vat teh" a aw-a zâmna chu ka hai mawlh lo. Laklawh pawh sawi lo vin ka inkhalh haw nghal a. In ka lut chu ka nghilh dup thei.. 

Bawihpuii leh bawihpuii chu an lo inhmachhawn ran mai a. Ka nu pawh a lo thu ve khar, bawihtea chu ka nu in a pawm a. 

"Nang hian eng nge i lo tih dawn? " ka ti thawr a. 

"Ka fapa ka rawn kan dawn. Ka fapa ania, ka hmu thiang"

"Aw hei a tha alawm.. I ngaihtuah ngai lo vin kan ngaihtuah thei e"

A cher hle a, a vun nung sar thin kha a thu thet a, a sam lah a hnawk niah bawk. A mitmeng chu ruih nei niawm takin a sen ram a. 

"Hei hi i nupui chu mi? Kan fapa hian nuhrawn a hrawn ka phal hauh lo"

Ka nui hawk. Ka ten lutuk he nu hi. 

"Aw ka nupui a nih hi. Ka fapa hi nang aiin a hmangaih zawk a, ka fapa pawn nang aiin a thlang zawk bawk" 

"Ngurhmingtluang, mi bawlhhlwh pa, ka fapa hi ka la dawn, chu chu hria ang che. Ka ta a nia, ka hrin a nih hi"

"I hrin hah man chu ka pe ang che. Tunah chuan nu a nei a, a mamawh lo che. Hriat pawh a hre taeh kher lo vang che. Kan in hi chhuahsan phawt teh" 

A ding tlat a. Ka kai lui a, ngawi rengin ka nawr chhuak ta a. Bawihpuii mangang leh hrilhhai chu ka va nuih a. Ka nu lah hi engmah sawi ve tum lo. Mi hmai eng zah lutuk ang chi a nia, a dawih tel bawk. Nu tha tak eraeh a va ni si em.. 

Zanah Bawihpuii roomah ka va lut a. 

"Vawiin thil thleng kha chu theihnghilh vek rawh aw.. "Ka ti a. 

"Nge dawt i hrilh kher.. " titau titih hian a lo ti a. Ka nuih a za hle. 

"Kawng dang a awm lo lawm"

"U Saroni nen khan in innei dawn lo mi? "

"Ka hre lo le.. Hun te hi kal ve phawt se.. "

"In inhmeh ngawt ang. Innei ta ula, ka la awm ve reng tho ang tiraw" a ti ta reuh a. 

"Bawihpui, nang chu kan chhungkaw zing ami i ni tawh alawm.. Bawihtea ú i nih hi.. I awm reng tawh ang. Kan in atangin pasal i nei ang.. Ropui tawkin" ka ti ta duah a. A ngui hmel erawh a thup thei meuh lo a ni e. 

Mahriati min nawrna avangin Saroni te inah chuan ka leng ve ta zeuh zeuh a. A chhungte nen pawh kan inbe thiam viau. Mahse, han neih em tan chuan keimahah hian mawlhtu a awm thin. Eng nge ka hre si lo. 

Ni khat chu chaw eiah ka sawm a. Mahriati, ka thianpa Bena leh Saroni te an ni a. Kan titi mam mam a, Bawihpuii leh ka nuin eirawg an bawl a. Bawihpuii hian eirawngbawl a thiam bawk a. Kan eitui leh ngawtin ka ring. 

Zanriah chu kan kil a. A tui ngei mai. Bawihpuii erawh kan rualin a ei lo, bawihtea a hrai bawk nen. 

"Thianpa, in nau hi a fel reuh hi mawle.. Ka la rawn chhai ang" bena chuan a ti fiamthu hlut a. Bawihpuii ner ru sak chu ka va hmu reng. 

Zan dar 8 velah ka thiante chu an haw ve ta a. A nuam thin e. Bawihpuii'n chaw a la ei lo tih ka hrechhuak thut. A roomah ka va lut a, a lo mu hlun mai. A chal ka zuk dek a, a lo sa deuh a. A muhil lo tih ka hria. Damdawi ei turin ka ti a, a rawn tho a. A ei ve mai ang. A hmel chu tap hrep ang mai a ni, a mit a sen ram bawk si. 

"I tap em ni? " ka ti sap a. 

"Aih.. Ka mit hi a na thin hrim hrim a" 

"Bena khan a star che sia, a nuam awm"

"I zak lo" a ti hluk a. 

"In inneih hunah a thianah ka tan hmel siah.. " ka tilui chak tlat. 

"I va tenawm tak" a tawngkam hi a na thei a, a lawmawm thei bawk si. 

"Nge.. I melh danah khan i duh ve thoin ka hria"

"Awii, kha dulkiara kha.. Kha pa kha maw.. Ani neih ai chuan lentar ka duh zawk"

"A hlawh a tam asiii"

"Apu hlawh a tam fe zawk" a ti ta daih a! Apu a tih chu ka pa a ni. 

Ka nui hawk hawk a. Min rawn melh kal a, chiang zet hian.. 

"Pa Ngur, U saroni nen in inneih hunah bawihtea hi a tiduhdah ang em? " a ti thut a. 

"Ka hre lo le.. I chhan ngam ang em? "

"Awii.. Lutuk, bawihtea tan chuan insual pawh ka ngam.. " a ti pang pang a.. Ka duh reuh hle. 

"Chaw ve ei la"

"Ka ril a tam lo "

"Tam lo mah se, ei loh ringawt te chu"

"Nakinah ka ei mai ang" 

Ka chhuahsan ta a. Chumi zan chuan Bawihpuii nen kan intawn tirh vel ngaihtuahin hetia ka fapa hmangaih em emtu a lo ni ta te hi Pathian remruat vek a nih ka ring. Ka lawm bawk. 

Zinga ka zuk chhuk chuan ngawi rengin sitting roomah ka thu a. Chanchinbu ka chhiar a. Ka nu leh bawihpuii inbiakna chu ka ngaithla pah a. 

"Kei chu maw.. Pi, bawihtea hmangaih thei lo tu chu mo atan ka duh lo hrim hrim" Ka khi suk. 

"Kei deuh, Saroni kha chuan a hmangaih ve mai ka ring. Nula fel tak niin ka hria.. "Ka nu a ni. 

"Nia, mahse.. A thinchhiat hmel ka ti…"

Chaw kan ei laiin an sawi leh. Ka ning tep. 

"Bawihtea pawn nu a mamawh alawm.. Tun atanga nu anga a pawm thlap theih tura neih hma hi a pawi lo" ka nu chuan a ti a. 

"Hmm.. Nu chu a mamawh kher lo. Ka awm ve reng hi. " a aw-a titau tih hriat lutuk hian a rawn ti hlawl a. A inthiam lo leh deuh nge.. Nui lui chungin, "Ka sawi awmzia chu, pasal ka neihsan dawn lo hrim hrim. Bawihtea hi.. amah pawh hian a phal lo vang" a ti a. 

"Chutiang ringawt a ni lo. Nang pawh nula senior nih hmaa neih a tha.. Ngaihzawng te hi nei ve rawh" ka nu chuan a ti leh a. 

"Aw.. Bena khan a hmu tai a ni lawm ni" ka pa chuan a lo ti suk a. 

"Ninawm.. In duh leh nei ru.. Khatiang" tih pahin a tho a. A kham hmak. Kan nui tawp. A duh lo ve ngang aniang. 

Hun a kal ve zel a. Ka nupui hlui chanchin pawh ka duh vang ni miah lo vin ka hre ve reng a. A pasal um khan kut a thlak nasain sum leh paiah an lo tlachhe nasa a lo nia. Beidawngin a rawn haw leh ta ringawt a ni. Mi bulah, "Ngura saw chuan kei aia hmangaih a nei lo vang. Tisawn nupui pawh nei lo vin min lo la nghak ania" te a lo ti a nih awm chu! A ä tawh a ni ngei ang le.. 

Saroni nen chuan inngaizawng fak si lo vin mi dem bel kan hlawh chho riau a. Amah chuan a bialpa angah min ngai ngei ang. Kei erawh ka la tím tlat. Ka sawi thiam si loh hian phuartu ka nei tlat a ni. 

REMRUATPUII.. 

"Pa Ngur, harh teh.. Bawihtea hi a dik lo. A pang a sa lutuk" Bawihpuii thlaphang ri chuan min kai harh chiang hle. Ka tho vat a. Ka nu te zin lai a lo ni kher si. Ka mangang hle. Hospital kan thlen chuan rang takin an buaipui vat vat a. Thla a muang thin e. Bawihpuii mangang chu ka hnem hram hram a. Api te a va bia a, a tap tuau bawk si. Api te chu an mangang ang chu aw

. 

Khawvar dawn hnaih lamah bawihtea chu a rawn harh a, a tap miah lo. Bawihpuii chu melhin, "Amaa" a ti a. A ngik faih faih a. Duat taka pawmin, "Ka duatte, ka van khawngaih tak che em.. " tiin a awi hliau hliau a. Ka rilruah hian sawi thiam theih loh thil a rawn awm.. Bawihpuii hi ka nupui a nih a ngai. 

Bawihtea chu khawsikpui a lo ni a. Bawihpuiin chhum lo chat lo vin a awmpui chawt mai a ni. 

Saroni te pawn min rawn kan ve a. Bawihtea a han chul vel chu bawihpuii chuan ngaihtheih loh hmel zet hian a melh kal mai a. Thil dik lo a thlen palh hlauin thil dang ti turin ka tir ta a. Min ngei hmel ngei mai. 

Saroni te haw hnu chuan, "Tiang khan awm tawh lo la,bawihtea te chu an duat vek alawm" ka ti satliah a. 

"Min tirh kher kha a ngai mi? I fapa dam lo bula chance neih pawh a ngai lo. I tenawm" a lo ti daih. A thinrim ngang mai si. Ka chhang zui tawh lo. A rilru eraeh hriain ka inhria. 

Ka nu te bulah bawihpuii chungchang Chu ka sawi a. Hnialna an nei lo naa mak an ti deuh chuan ka hria. 

Bawihtea chhuah zan chuan a roomah kan thu dun ran a. "Bawihtea hian nu a mamawh si a, nupui hi ka nei mai dawn mawni ka tia" ka ti a. 

"Nu a mamawh ziah lo ka awm hi. Nupui neih i chak anih kha.. Nei rawh" a ti chhum hmak a. 

"Ka nupui tur pawh ka sawi a hmaa"

"U saroni bak tu nge.. Kha nu kei chuan ka ngaina lo. A mitmeng a thíp em mai. "

"Ka nupui tur chu bawihtea duat deuhtu ania. Hmel tha deuh, thinchhe deuh a nia"

Min rawn melh haw a. Nur zetin, "I chawh" a ti hluk a. Ka insum thei ngang lo. Ka kuah thawk a, khumah ka kuah thlu ta a. A tal aih aih a. Ka bawhbet run mai. 

"I inthup thiam si lo, min duh tih ka hriatna a rei tawh mai.. Innei ila a tha"

"Ka duh teuh lo che.. I zak lo. Tho teh"

"Zep duh suh. Ka nu te pawh ka hrilh vek tawh. Thla lehah kan innei ang"

"I hrilh a maw? I va hmel chhe tak.. Hmela" 

Chumi zan chuan a chhuak miah lo. A roomah a tawm ngat ngat. A zak tih ka hria. 

Ka pain a sawipui chuan a zak lutuk chu ka khawngaih zawk.. "Ka duh lo, Pa Ngura hi.. Aa.. In â siah.. In ninawm" a ti thul. Ka nu a lo nui khur char char. 

Thutak deuhin, ka pain, "Anih saroni hnenah palai kan tir mai dawn mi? "

"A ngai teuh lo. " a ti hlur bawk si. Ka pa meuh pawh a insum zo lo, a khi vur vur mai. 

A tawp atawpah, "Ih.. Nia, Pa ngura hi ka hriat tirh atangin ka ngaina.. A fel ve em a. A hmel hi chu tha pawh ka ti lo" a ti ta a. Kan nui dar dar mai. 

Apa rual zet tur ka ni naa.. Kan inhmeh chawp ve mai ang chu. Bawihtea kum 3-na champha-ah kan innei ta a ni. Mi zawng zawng mak tih a tling a. Kan inneih zana saroni leh kan nu hlui rawn lang chu a pui khawp mai. 

"Mahni awmpui te han neih chu.. Ka lo dah san vei che nen, i mizia a lo hniam ngei mai. Hero to zero i ni ringawt alawm.. " Saroni mize dik tak chu Bawihpuii khan a lo hre zawk a nih dawn hi… ka nei lo hi ka va lawm em.. 

"He nu hi kei aiin a tha zawk a maw? Bawihtea enkawl turin ka ring zo lo. Bawihtea hi ka awmpui dawn" kan nu hlui ve thung a ni. Ka tawng hmain ka nupui a rawn tawng.. 

"Anu hi min dil a ngai ang. Kei hi Hmangaihsangzuala nu ka nih hi" a rawn ti fiak thak mai. Tumah kan tawng lo. 

Nupa nun hlimna taj tak ka pawh ve ta. Ka inchhir lo kher mai. Bawihtea pawh school kan kal tir ve tawh a. Anu in a hruai nitin thin. 

Mahse… 

"Pa nguuurrrr" tia min koh erawh a la sim thei lo. 

A pawi lo e. Ka nupui a ni tho.. 

A tawp ta. 😂😂😂😂 ka inthlahrun em vangin ka rawn dah aw. In beisei pha lo mah se, ka thawkrim teh mai ania 😢