A zun

A ZÛN.. 

Ziaktu: Toni Râlte

"Ka tel lo vin engtin nge a hringnun a hman tak ang le? ".. 

"Eni, Lalenkawl, hei hi i duhthlanna maw? Min en rawh, chiang deuhin, i kal duh maw.. Sawi teh" ka ti tuar tuar a. Luhlul zetin a ding khawng lah a, a melh ngai a melh ngawt ngawt ringawt. He hmeichhia hian min va tibuai hneh em..

"Zo, min hrethiam ang che. I bulah hian ka hlim lo a ni. Ka hmangaih ve lo che tih hi hawihhawm takin ka sawi thiam lo va, pawi ka ti" 

Ka nghing lawih.. Ka mipa rilru a lo chhuak ta, ka inhum ruh a, a tawk ta e. Ni e, engkim hi ka duhtawk ve thei tawh e. Kal rawh se. Min hmangaih lotu tan ka hun hi ka khawhral thlawn leh tawh ngai lo vang.

"Zodin, Eni nen in inthlah fel tawh maw? " zanah ka cousin mapuii chuan a rawn ti a. Ka thaw hawk. 

"Umm thlah fel thei ta e"

"A tha daih zawk, a phû hlawl lo che alawm.. A aia tha kan zawng dawn nia. I tan chuan a huphurhawm loh" ka ner sawk. 

Mapuii nen hi chuan kan inkawmngeih bawk a, engkim kan inhrilh thin. Eni erawh min duhpui lo ngang mai a, mahse, kan han nih takah kha chuan a be chhe lem chuang lo, kan puarak ber a ni ta reng bawk a. Mahse, hetia kan inthen takah chuan pawi a ti tehchiam lo tih a lang. Ka dem lem lo. Eni hrechiang apiangin bansan turin min ti miau zel si a. Ni e, hmeichhe tha tak zawng a ni lo alawm.. Thil pakhatah erawh chiang ang, ka hmangaih tlat a ni. 

A BUL.. 

"He pa ruang hmu hmasa ber tu kha tu nge? Ka va be duh ve" ka tih zwh rual chuan, hmeichhe pakhat hian min rawn pan a. Nula te lam, ngo ving veng, ti sen erawh nei lem lo, dáng mah mah an tih tur ang hi a ni a. A sam chu a ngil siau a, a dum hlap bawk. A hmaiah make up sulhnu hmuh tur a awm lo va, damdawi addict a ni tih hai rual lohin damdawi sulhnu ka hmu thei. 

"Keimah ka nia. " a ti sap a. A aw chu a tham chhel a, ngaihno a bei riau. Ka hruai hrang a, ruang a hmuh dan vel chu ka zawt ta a.

"Nizan dar 1 velah ka haw a, ka rui deuh bawk a, a thim nen. Ka hmu mai lo. Mahse, ka thianpain min lo call a, ka ding det a, ka mit sirin ka zu hmu a. Zu rui chatthla ni turah ka ngai a, kan inbiak zawhah flash light ka on a, a hmai hi ka zuk chhun kher a, mihring dam lai hmel a put loh avangin a thawk leh thawk loh ka ngaichâng a, a thawk loh vangin in hnai berah hian ka tlan lut ta a ni" tiin. 

Police Inspector ka ni a, tun hnaiah ruang chhar a awm ta fô. Kan hah thei hrep. Chu chu Enkawli nen kan inhmuh hmasak berna a ni. 

Kar khat a liam a, tual thattu nia kan rinhlelh kan rek chhuak tawh. Case dang a awm leh tlat! Bank rawk chungchang daih!  

Mak ti zetin ka hmaa ding chu ka melh kul a, a hmai dang lèpah chuan hlauhthawnna chambang ka hmu lo. Hmeichhe nasa leh huaisar ve tak chu a ni ngei ang le. A thian mipa pahnih te nen Bank an rawk ngam ania! Cheng nuai 8 zet an ru chhuak hman a, mahse, pakhatmah an la hmang hman lo. Case erawh siamsak tho an ni. Jail lamah a hun a hman a ngai ve ngei dawn e. 

"Hmeichhia i nia, engtin nge heti ang hi i tih ve theih? Min la hriat ka ring. " ka ti sup a. Min raawn melh a. 

"Mamawhna a sang deuh aniang e" a ti leh hmiah. 

"I chhung te an lo kal a, bail tur chein" 

"An va titha ve" 

"Court absent miah suh ang che"

"Lutuk" 

Min ngaisang fahran lo niin ka hria. Mi run deuh naa han biak chhen kha tula ka hriat si loh vangin ka kalsan ta a. 

Khata tang khan ka hmu ngai ta mang lo va, ka rilruah pawh a awm lem lo. Police ka nih vang hian zu in tur leh nun pawlawh deuh turah min ngai fô! Pathian zarah leh chhungte avangin chuti ang nun holam tak chu ka la hmang ngai lo chu a nia. A hmingin kan branch KTP ah Finance Secy ka ni ve a, YMA-ah committe member ka ni ve bawk. Hun hi ka ngah tawk loh vangin duh angin ka inhmang tha thei lo zawk a. Chhungkaw pangngai tak atanga seilian ka nihna chuan min thunun ve deuh pakhat bawk a. Ka pa hi kan veng chhungah pawh Upa min langsar ber pawl a ni ve a, dam lo leh harsatna nei ten an pan a ni ve fô! Ka nu erawh ka pa thu angin nihna chanvo engmah a nei ve lo, in chhungah tangkai takin a duty a hlen thin. Unau paruk kan ni a, kei hi a milai ka ni. Ka u te chuan nupui pasal an nei tawh a. Ka nau chiah mipa hian nupui nei ve tawhin kan chengho mek a, kan pang ber erawh mzu lamah zirna avangin a liam ve nitin thin. Kan hausa le lu lo naa kan mamawh tawk ang chu kan nei ve thei mai zel. Kan lungawi tawk khawp mai. 

Zan khat chu open air service neiin kan buai mam mam a, hna lamah rilru mawlhtu ka nei lem lo bawk a, Pathian faka zaia pawl hi nuam ka tih vangin ka phur hle. Eitur te semin khawlaia vakvai ti mai ila, ruihhlo ngai leh ks te ho chu khawi ngam tumin nelawm kan chhuah a. An rawn lang ve tiam tiam mai. Eitur chu an rawn pan chhan pawh nise a tha hrim hrim e. 

"Enkawli chu i chhuak leh a ni maw? " ka ti deuh tâwng a. Engah nge maw kan inhmuh fô ni. 

A rui hmel chu a phà dài mai. Thingpui la khu vat vat chu a chhem hauh hauh a, "Umm… a mak e, kan inhmu thei" a ti tha ve mai a. 

"Heti anga nun hi a hun tawh lo asin.. " 

"Nia, ka hria lawm"

"Khawi vengah nge in awm khah? "

"Tuikualah.. "

"I chhung ten an hmangaih tehlul che nen, tha deuhin awm tum tawh la"

"Min hmangaih maw? Hehe.. Nia, min hmangaih lutuk asin" a hnuk a ulh deuhin ka hria. He nu hian eng emaw chu a pai a ni. Ka hmuh hmasak ber atang khan mak deuhin chhanchhuah duhna kha ka nei tlat a. Mahse, hna lamah buai chang kan ngah thin sia, ka lo mangnghilh leh thin mai pawh a ni. 

"Enkawl, harsatna i nei em ni? " a mitah ka en a. Min lo melh ve kiau mai. 

"Aih nei lo. Ka tha"

"Nula fel tak i ni thei asin. Isua tel lo va nawmchen chuan hrehawmna zawk min thlen zel asin"

"Isua nen nuam a chen theih a mi? "

"Theih tehreng mai. I châk ve lo mi? "

"Chák ve tho e. Mahse, a harsa em a ni.. Ka kal dawn. Nih aw" a ti thut a. A kal a ni nghal mai. Ka mut hmunah a hmel dâng lap mai kha ka hmu reng lehnghal, a chhungten an hmangaih thu ka sawi khan a nuih a za a, thil. Dik lo chu a awm chiang a ni. 

Ka thawh hmain ka nu leh ka cousin mapuii titi ka ngaithla a, an tawng ring angreng sia. Ka lo nui leh suk thin. 

"Nupui, awii Emily chuan a atchilh alawm.. Zoa hi chu ka chhuang ve em, a fel si, a hna a tlin bawk si, hmel tha bawk, palian bawk, a uniform te hi a inhmeh ngawih ngawih, ka u chu ni lo se ka ngaizawng ang" te kha a ti ang bawrh bawrh a. Lal mapuii tak hi chu aw.. Emily a tih chu a thiannu a ni. Min ngaizawng em emtu a ni a, ka duhzawng a ni lo pawh a ni lo, kan la inhamtawng lo ni maiin ka hria. Bakah ngaihzawng nei tur hian hun thawl ka nei mang lo. Hmeichhia chuan duat te hi an thlahlel thei sia, ka duat ve hman mang dawn si lo va, ka la nei lo lui a ni ber. Kum, 32 lai chu ka ni ve tawh. 

ENKAWLI.. 

"Sir, hmeichhe pakhatin a hmu duh che a. " an rawn tih chuan, lo lut turin ka hrilh nghal a. Ka hmaah chuan Enkawli chu a ding khawng lah a, jean pawl tak zet a ha a, tshirt dum simple zet a ha leh tawp bawk. 

"Teh hlawl che chuan, lo thu rawh. Eng nge ni ta? " ka ti a. Nelawm thei ang berin ka nui a. 

"Report rawn theh luh ka duh a ni"

"Tu lakah"

"Ka pahrawn lakah" 

"I sawi chiang deuh thei em? "

"Saw ramhuaipa sawn min chenchilh chhung chuan chhungkaw hlim kan ni ngai dawn lo. Ka nau dinhmun a derthawn leh tak zel avangin ka nu phal lo chung ka rawn kal tawp a ni"

"Enkawl"

"Ni e, saw mihring hurherh lutuk sawn kum 14 ka nih atangin hurna lipuiah min pawt lut a, keimah ka inven ve theih hnuah ka nau a bitum leh a. Ka tuar thei tawh lo. Ka nu saw ka nu ni lose saw mihring saw ka thahna a rei tawh ang" 

Ka fiah ta kuar mai. Ka va lainat em.. 

"Aw le, hahdam rawh. Constable kan ziahtir ang e. Tunah i pahrawn chu a awm maw? " 

"Awm e. A thu meng sen leh rûm ang chu" 

Tenawm hlawm hian. Zoram hi a va him ta lo em.. Enkawli te in lam chu kan pan ta a. Building lian zet hnuai berah an lo khawsa ve hi a lo nia. Kan zuk luh huk takah chuan an hlauhthawn hmel hlawm kher mai. 

"Pu Siamliana, i fahrawn te i khuaikhem vangin man i ni e" ka ti a. 

"Lalenkawl, zawngi, i han report hram ani maw? I pa anih hi i hria em? I va huaisar em em ve" ka rin loh deuhin a nu Zawk chuan a ti ta hrep mai a. 

"Nu, a tawk, hlau tawh suh. He mihring tel lo hian kan awm thei. Kal bo se kan him a, kan hlim zawk bawk ang. "

"Nang drugs addict khan engtia min enkawl nge i tum a? "Anu chu ka lo ngei deuh. 

"Ka insiamtha dawn alawm, nu, i fanu te pahnih nun chhiat zel i duh mi? Ka nau chu a la him hram a, kei hi ka him tawh lo tih i hria. Tichung chuan i la hum hram hram a maw? Hmangaihna i pianpui ve lo em ni? I ril arah i fanu ka nih hi" a mittui a tla. A nau niawm tak chuan a rawn kuah a. 

"Min man ngawt thei lo vang, finfiahna pawh in nei lo. He nu thusawi hi awih suh u. Mi dawheh, damdawi ngawl vei a nih hi" A pahrawn chuan a lo ti ve chhar chhar a. 

"Kei hian ka finfiah ang. Ka ngam e. Mualpho dawn mah ila, i kal bo na a nih chuan khawvel hmaah hian nang hian min pawngsual tih ka tlangaupui ang" a ti ta piap piap mai. Engmah sawi zui tawh lo vin kan hruai ta a. Ka rilruah Eni chu a thi ta lo. 

Enkawli huaisenna zarah a pahrawn tenawm tak chu jailah kan nawrliam thei ta a. An awm zel dan tur ka hre chak ngawt mai. A pahrawn khan hna chhete a lo nei ve a, chu chu an eibel ber anih avangin anu khan a lo hlau em em a lo ni. 

Kar khat a liam a, Eni ka hmu leh ta mai lo. An ina va len ngawt thu awm hek lo. Ka thianpa, ka thawhpui ni bawk, Tuikuala khawsa chu an chanchin ka zawt ta ngawt a. 

"An khawngaihthlak angreng, Enkawli khan damdawi thlah a tum a, anu hian chawhmeh te zuarin ei a zawng ve leh a, a nau hmeichhia eraeh school a la kal ve a" tiin. Ka duhkhawp lo viau. Enkawli chuan damdawi chu a thlah thei ang em? Puih chakna hlirin ka khat a ni. 

KISS… 

Federick-a crusade chhim turin lammual kan pan a. Mapuii leh Emily te ka hruai. An titi sar sar a, ka ngaihtuahna ka lo kawm melh melh ringawt. Mipui an lo tam ngang mai. Kan inhnawh ve tawt tawt a. Hawi kual ruaina chi pawh a ni lo. 

Kan hma chiaha thu tlar te zingah chuan en bik ka nei chiang. A ang lutuk, a hnunglam atang ringawt pawn Enkawli ka hrechhuak nia. He nu hi ka vei aniang. A lo hawi duh malèk a. Tih dan tur ka ngaihtuah char char. Lungte ka zawng a, a vâng si. Va kheuh zeuh phak a ni mang bawk si lo. Vanneihthlak takin kan thutna chu a tliak deuh rawp a, kan è dual mai. Remchangah hmangin hmalam ka melh vat. A rawn hawi. Enkawli ngei a lo ni. Ban ka nghakhlel ngat ngat khawp mai. Kan bang a, chhuanlam ka siam hmiah. Mapuii te chu ka thianpa ka biaksak a, a va thlah dawn. Kei eraeh hna thilah mi umzui tur ka nei.. Chutiang vel chu. 

Hloh hlau zetin ka melh kar a, a thiante nen an nih vangin a buaithlak dawn tlat. Ka va pan ta râwih a. 

"Eni, biak lawk che ka duh a, a falin. Ka thlah leh mai ang che" ka ti ta tawp. Ka inzahpui zia mai chu. 

Motorah kan thu dun ta ran mai.

"In tha zel em? " ka ti a. 

"Umm.. Tha a ni mai, ka putea ten min pui nasa bawk a. Kan pangngai ve viau tawh e"

"Anih nangmah lam te, damdawi kha i thlah thei ta em? "

"Hei kar 3 lai chu a ni ve tawh a. Ka suffer pawh ka tuar zo ve tawhin ka hria. Eng nge min biak duhna chu? "

"Hmm. Englo ania, Eni, mak i ti maithei. Ka hrethiam bik lo. Ka rilruah i awm reng a, puih che ka duh a ni"

"Engtizawngin"

"Ka hre lo. I hre zawk ang. Harsatna i neih chuan min hrilh la.. "

"Tunah chuan ka nu ber hi, hetia kan sum dinhmun a lo tlakchhiat takah chuan puhmawh tur a dap reng a. Kei hian mawh ka phur lo thei si lo va, pawi ka ti chuang lo naa, pawisa thawhchhuahna hi ka duh ve a ni" 

Ka ngawi vang vang a. Kan upa ber ten dawr nghak tur an duh thu kha tukinah ka nuin a sawi tak e. 

"Ka u ten dawr nghak tur an mamawh asin. I thawk duh mai lawm ni? Hardware dawr a nia, tlema thil zir ve deuh, hriat tam ve deuh chu a ngai ang" ka ti ta a. 

A hmel chu a hlim tih ka hria, ka lo hlim ve tawp. 

"Awii ka van lawm dawn. Engtik atangin ka thawh theih ang? "

"Lawk aw.. Kan bia ang e"

Dar 10 a pel tawh a. Ka u chu ka va call ta tho va. Eni te dinhmun tlangpui ka hrilh a, a lo remti ve mai. A tukah kal nghal turin kan tithlu ta a. A awlsam ta hle mai. 

Ka thlah haw a. A number pawh ka nei thei ta. 

Ka u te dawrah chuan ni 4 a thawk ve ta. Thu a awih a, a inzir peih bawk a. A blind em em tawh lo. Ka u hi mi chekngel zet a ni a, hrawn a nuam vak lo. Mahse, Eni nen chuan an la inpawh tha viauin la hria. Call leh msg in ka be zeuh zeuh a. Min be chhe hran lo. A tan hlutna ka nei ve tlat alawm. A dinhmun dik tak ka u te ka hrilh chuan an khawngaih ta viau mai a, a hlawh pawh mi dang aia sangin an tihsak thei dawn a. Ka lawm ve em em zel. 

"Eni, bialpa i nei em? " a tawpa tawpah chuan ka thawn ngam ta. 

"Nei lo, ti nge? "

"Ka zawt mai mai che. " hmm.. Ka va nep tak. 

"Ka ring rengah" 

"Tak takin ka awmdan hi i hriatthiam tho ka ring" hmm.. Tlemin ka huai ta deuh. 

"Hrethiam deuh reuh"

"Chuan"

"A tha lo, i rilru kha thlak daih rawh"

"Engvangin? "

"Mi tha ka nih loh vangin.. "

"Mi tha ka ni bik hleinem"

"Ka tan chuan pathian ang mai i ni alawm" min dek riau. 

A tukah dawrah ka peng zuai a, a lo awl ve lai tak a ni bawk a. Lai deuh tut chungin kan in nuih ringawt. Nitin hian a hmel tha telh telh lehnghal. Ka koki pawh a chen kher lo vang, mahse, ka thinlungah a lian hle si.. 

Zanah ka awl bawk a tiin ka inkhalh chhuak a. Eni te in ka pan ta ngawt mai. Anu te nen an lo awm leh dal a. Min be tha khawp mai. An naupang ber mipa naupang mutpuiin a nu chu a mu ta thuai a, a nau chiah erawh lehkha a la zir tlat tlat a. 

"Ka û dawn lo che aw.. Zo" a rawn ti a. Kum 25 chiah a la ni sin le.. 

"Nia, û ka ngai lo" 

"Thingpui"

"A ngai rih lo. Lo thu teh" ka pawtthu a. 

"Eni, ka rilru i hria, min duh chuan duh ti tawp mai teh. " ka ti hmiah. Tawngkam ka thiam lo ve em a ni. A nui sak a, "Ka duh lo che pawh a ni lo, mahse, ka tha lo em a ni. Ka dinhmun zawng zawng i hre vek tawh a, ka inthlahrung alawm" a ti ta a. Min duh ve tihna. 

Huizzz.. A mak a ni, bank hial rawk ngam, khawlaia tei rawlai thin addict ni thin kha ka bialnu a ni ta daih. Kei lah police ka ni daih bawk si. Khawvel hi chu aw.. Chumi zan ka haw tur min thlah chu zantin ka suangtuahna tifamkim turin ka fawp a. A manhla teh e.. Hehe.. 

INRAWLH.. 

Ka theih ang tawkin tihhlim ka tum ve a. Puih an ngaihna laiah pawh puih zel ka inhuam ve. Kan inlaichinna chu thup a duh zel a, min zahpui anih hi tia thinrim chang ka nei fô! Amah a inthlahrun em vang a ni tih a sawi thin. Infawh bak kan kal ngai lem lo, a aia thui kal duh ni ila min dan ka ring lo. Mahse, ka nihna leh Pathian vangin ka insûm ve thin. 

kan pahniha kan awm dun chuan tumah kan ngai lo va, kan mamawh hek lo. Anu te pawn an hre vek tawh a. Min duhsak ve em em zel. Hna avangin ka leng tam hman lo naa a remchan phawt chuan kan inhmu hram thin. 

Ka hawn lamin dawrah ka peng kawi leh a. A chocolate pawh ka ak tat mai. Rin loh deuhin mapuii keh emily an lo awm ve a. Ka u te nen inhre sa an ni bawk a, an lo titi luam a. Min hmuh rualin,, "Ph la thei reng reng lo, i va buai awm. Ve" mapuii chuan a lo ti sawk sawk a. Eni erawh customer a nei a, a la buai a. 

"Min lo call mi? Kan buai ve deuh a, ka lo hre lo aniang.. " ka ti ve mai a. 

"Hei zaninah Emily hna thar hmuh kan lawm dawn a. A changtupa ber i rawn lan loh chuan kan tia, kan rawn sawm che. " Eni ka va melh zawk a, min lo melh ve chiah. 

"Zanin chu meeting kan nei a, ka va hman hmel loh ve"

"Hmm.. Over suh. Thulh ve mai rawh. Makpa chet hun a nih hi" Mapuii lah hi a over ve det zel. 

"Nia, Zo, lo kal hram tum la, i tel lo chuan kan kim dawn lo" Emily chuan a lo ti ve a. LDC hna a hmu thar a, chu chu lawm a tum a ni. 

"Ka hrethiam lo. Ka lo inngaihtuah ang" Eni mitmei ka veng bawk si. 

"Dar 7 ah min lo lam rawh. Chhuanlam siam a ngai lo" Mapuii leh bawk. 

"U Mamuan, ka nuin min lo call a, ka nau kha luhaiin a tlu a, damdawiin an rawn panpui mek a, ka va buaipui loh chuan.. I remti em? " Eni chuan a rawn ti a. Ka melh kâwk.. 

"A va zia lo ve, va kal rawh. Hei kan khar tep tawh tho alawm. Naktuk pawh a tul chuan lo kal lo mai rawh. Inthlahrung suh" ka u hi chu a fel ve alawm, a duhsak zawngte lakah chuan. 

"Ka lawm lutuk, anih ka kal aw" ti chungin a chhuak nghal. Ka hnîm ruai mai. Keimah vangin dawt a sawi nge a nau chu a tlu tak tak le.. 

In ka thlen hmain ka call a, a pick up lo. Zanriah ei kham veleh ka chhuak vut a, an in lamah ka inkhalh phei nghal. Ka va lut chu an lo kim thap si. Dawt a sawi chiang. 

"I nau kha " ka ti zo hman awrh, "Dawt ka sawi anih kha" a lo ti zat a. 

"Engvang"

"Mi hna thar lawmna titi ka ngaithla peih lo va"

"Ka sawifiah thei"

"A ngai lo"

"Eni"

"Va kal rawh. Makpa interview a ngaih kha.. A changkang sia, a hmel tha bawk sia.. In inhmeh tawp" a ti ta duah a. 

"Ka kal lo vang. Kal tumna ka nei lo hrim hrim" ka thu lui ve tlat. 

Ka hawn dawnah chuan kan infawp leh tho. Kan nuih dun leh ker ker kha maw.. A zia a zia. 

"Zodin, i mak khawp mai. Emily i tihrilhhai lutuk alawm.. Eng nge i awmzia, call i la duh bawk si lo" a tukah min tim hrep. 

"Mapui, emily nen hian kan ni hleinem, bialnu ka nei lawm.. "

"Tu nge? "

"Ka u te dawra thawk kha" 

"Eheee…! I a ta mi? Kha nu kha a background ka hria nia aw. A tihchi loh lutuk"

"I hriat aia tam mah kha ka hria lawm.. Mahse, ka duh a ni"

"Unaupa leh.. " ka nui ringawt. 

Chumi tlaiah chuan zanriah ei laiin ka nuin min zawt ta chiah reng a. Ka sawi hmiah. 

"Bawiha, fimkhur tluk a awm lo ania, a chanchin te ka lo hria a, rinngam a ni ang em tih ngaihtuah ang che" ngaihzawng chungchanga ka nu min kamkhat vawikhatna. Mapuii chu a che rang hle mai. Ka u pawn min lo be nghal. Mak a tih thu a sawi luam, mipa a nia, thu tam a pai lem lo. Mahse, min duhpui chiah lo tih chu ka hre thei. Ka pa eraeh a la ngawi. 

Chuti chung pawn Eni chu ka tan a la pawimawh ber tho. A nunhlui chu engpawhnise ka tel ve hma thil ania, sualna khura a tlu lut te kha a dinhmun ngaibtuah chuan a demawm em em bik loh. Tunah nun thar neih tumin a fight ve mek a, kei hi a bula ding tur ka ni tlat. 

"Zo, lo peng ngei ngei teh aw.. Buaina kan tawk a" ka u in a tih chuan mak ka ti hle. Eni vang a nih loh hram ka beisei. Dawra ka lut chu an lo thu deuh thap a, mapuii pawh a tel. Thawktu dang te karah Eni pawh ngui zetin a lo thu ve a. 

"Enteh, hei hi Enkawli bag ah an rawn man a, keimah thlengin rinhlelh ka kai phah ta anih hi" tiin a chhinsen tam lutuk lo hi a rawn dah chhuak a. Eni. Chu ka va melh a, a mitmenga hlauhthawnna chu ka hmuh hmaih lo. 

"A tha lo khawp mai. U mamuana te hmingchhiatna tur vek ania, Enkawli pawh i ti tahw lo emaw kan tia, a rukin i lo la ti char char tihna a nia" mapuii chuan a ti bawrh bawrh a. 

"Zo, ka ta a ni lo takzet. Engtin nge ka bagah khan a awm theih ka hre lo. Ka ti tawh ngai lo. " Eni mitmeng ka hmuh chuan ka ring nghal hmak. 

"Û, eni thiltih a ni lo. Tu emaw in a set up a nih hi. Eni ta a ni lo"

"I bialnu anih vangin tikhan ti ringawt suh, an man lai chiang takin ka hmu" Mapuii leh bawk chu. 

"Anih tu nge Eni bagah damdawi a awm tia report tu hi? Engtin nge an rinhlelh ngawt theih? "

"Addict pakhat a rawn lut a, kha pa kha an chhui sa deuh nge an rawn dap tawp mai a ni"

"Hrep taka.. A lang tlang ruak alawm, tum mumal tak neiin Eni hi tu te emawin tihhmingchhiat an tum anih chu.. A hmain tu addict mah an rawn kal ngai hleinem. Addict chu biak a ngai anih chu. Rawn checktu te pawh" ka ti ta hmak a. Ka u hi chuan min ringtawk viau bawk a, ka thusawi pawh nau zawk mah ni ila a zawm chang a tam zawk. 

Eni chu ka thlah haw a. A mittui a hru fap fap a. 

"Zo, ka ni lo tak tak asin. Kha addict kha hriat pawh ka hre ngai lo. Min lo be tawp a, khawmaw thil chu a rawn ti a. A ngaihna reng reng ka hre lo" a ti a. A lungchhe hle mai. 

"Ka ring che lawm. Tu emawin a set up che anih kha. Lungngai suh. Tuman an tihnat che ka phal hleinem" ka ti a. Thlamuan hmel zetin min rawn melh kiau a. Ka tuar zo thin lo. 

Zanah ka nu bawkin a rawn sawi leh. Mapuii chu a hnawksak zet mai. Ka u bulah Eni chu ban turin a lo nawr vel. A inrawlh tam deuh chu a ni. 

Ka u eraeh chuan ka mitmei a veng ve deuh nge a ban ta lem lo va. Damdawi chungchang pawh sawi zui a awm ta lo bawk. An plan a flop ta phawt. 

A TAWPNA.. 

Hna vangin Delhi lamah thla hnih chhung zet ka zuk zin bo va, Eni nen kan inbe pawp reng tho. Ka ngai thin. Ka hlauh ber chu damdawi a lo ti leh ang tih mawlh hi a ni. 

Ka hawn hma zan chuan ka call ngat ngat a, a pick up thei thak lo. Msg ka hnutchhiah nual bawk. Kar hnih liamta atang khan kan inkar chu hriatthiam theih si lohin a hla riau hian ka hria a. Kan inawmbosan rei tawh vangah ka ngai deuh mai a. Zan lamah a biak theih loh fô! Zan khat phei kha chu anu in a lo la a, a mut twwh thu a rawn sawi a. Min mang tha lo va a mu ringawt khan min run hle anih kha. Ka haw tawh dawn tho va tiin ka inhnem a. Min lo hmuah ka beisei chuang lo va, ka chin hrilh kha tha ka tih vang ania. Mahse, call a la thei si lo va tihngaihna a awm ta lo a ni. 

In ka thleng a, kan han ri deuh laih a. Ka inbual a, chaw kan ei nghal. Eni mawlh ka rilruah a awm. Chauh pawh sawi lo vin ka chhuak vut a. An in lam ka pan leh ta. A thil tur ka hawnsak te pawh ka keng. 

Anuin kawngka a lo hawng a, a phu deuh zawk mai. 

"Khaw nge? " ka ti a. 

"Zoa, hei zan hnih a lo haw tawh lo. Angaihna ka hre bik lo" mangan hmel zetin a ti ta a. Fiamthu anih ringin ka melh a, a thutak nasa si. A va mak em.. 

Ka call leh tluk tluk a. A la thei chuang lo. Ka rilru natzia chu ka sawi thiam lo tawp. 

"Zoa, damdawi a ti leh tawh a.. Dawrah pawh a kal ngai tawh lo, i u ten an hrilh lo che mi? ' 

Ka u kha chuan, "Banna a rawn thehlut a, singapore a kal ve a tum thu a sawi a" a ti anih kha. Kha pawh engmah min hrilh loh vangin ka vui a, Eni ngeiin "I phal ka ring chiah lo va, i lo hwwnah tha deuha sawi ka tum a" a ti anih kha. Hmm.. A va buaithlak ta em.. 

"Damdawi a ti leh maw? "Na ti ru zetin ka ti a. 

"Aw, a hma ai mah khan a zualkai a. Kei chu hrehawm ka ti em mai. In luahman lah kan ba bawk si. Tihian a chhuak tawp a, a chang changin a rawn haw a. A chhan ka zawhin, ka hlim vena awmchhun a ti zel bawk sia. In inthen a nih ka lo ring zawk a" a ti a. 

Min lo bum char char anih chu. Rui chungin min be thin anih ber chu. Ka thinrim a ka rilru a na bawk. Engtin nge a tih leh theih.. Chhan a awm ngei tur a ni. 

A tuk nileng chu inah ka awm a. Ka ngaihtuahna ka kawm tawp. Khaw nge a awm ang le tih ngawt ka rilruah a awm. Khawiah emaw a lo OD reng te hi a ni lo maw.. Ka inbeng kang a, ka zawn hmuh a ngai tiin. Ka inkhalh chhuak tawp. A thiante tumah ka hre lo, zawn ngaihna ka hre lo hle mai. A phone lah a off hmak tawh si. Aizawl khawpui ka suar tluan a. Ka hmu si lo. Ka rilru a va tihrehawm em.. 

Khua a thim chhulh tawh a, Ngaizel lamah ka la inkhalh phei. Hmuh ka inring lem lo naa bei tidawngtuah tal tiin. Bus pawh an lo ding far tawh a. Ka inturn a, let leh ka tum lai takin, "Ka pu.. Ka pu.. Khawngaihin mn pui rawh" hmeichhe pakhat hian thlaphang zetin a rawn ti chul a. Ka ding chawt. 

"Kan thiannu hi a od a, ka pu, khawngaih takin damdawiinah min hruaisak rawh. A thi mai ang" a ti a. Ka thil hmuh avang chuan ka thidang lo chauh. Enkawli ngei mai chu nikhua engmah hre lo tih hriat zetin a lo zal der a. Hamhaih hman ka ni lo tiin ka pawm a. A rang arangin damdawiin hnai ber ka panpui ta a. Ka rilru a chawmawlh vek. 

Doctor ten an han enkual a, kan lo inhre sa bawk a. An ngaihsak tha viau. A thil ei lo lutuk nen a damdaei ti nasa bawk si chu a chau ngawih ngawih a, enkawl deuh a ngaih tur thu an sawi a. Cabin la laksak hram.. Kei anga hmangaihtu hi a hmu bik dawn em mawni le.. Anu ka bia a, a nauin a lo riahpui thei dawn. Ani erawh a mu chawrh chawrh mai. A thiante lah kha ka hmu zo ta hlek lo. An hlau aniang e. 

A ni 2naah a rawn harh tan a. A vai ruai mai. Min hmuh rual chuan a mitmeng chu huatnain a khat nghal a. Lehlam a hawi hmak bawk. Mahse, ka intiluhlul tlat dawn. Heng thil thlen chhan hi ka hre duh a ni. 

"Eni, i sawifiah thei alawm. Ka hmangaihzia che i hria.. Eng nge a chhan? Engvangin nge nunhluiah i kir leh? " ka ti sek sek a. 

"Chhan a awm a ngai mi? Ka khua a har a, ka ti leh ta mai a ni"

"A ni lo. Dawt sawi suh. Thudik ka hre duh. Ka chungchangah miin eng emaw an hrilh che em ni? "

"Aih, ih mww.. Zo, ka hmangaih che emaw ka tia, ka lo hmangaih tawk lo che aniang. Tuna ka nun hi nuam ka ti zqwk" tawl mai a. A na a ni. 

Engmah sawi duh lo va min hnar mawlh mawlh si avangin mipa takin ka kaltir ve ta kha a nia. Min hnar chian em vangin ka tlawmngai zo va, amah ka hmangaihna pawh huatnaah a chang chho mek a ni. An awm man te chu engtin nge an pek ka hre ta lo. Ka ngaihven duh ta bik lo va. Ni e, ka nu sawi angin a lo rintlak tak tak lo anih daen hi. Kei aiin a nunhlui a thlang miau si a. 

Mapuii te ho pawn min kawmhlim an tum nasa. Emily pawh a rawn ngampa leh tan ta. He nu hi Eni tih lohah chuan a duhawm ta ber maiin ka hria. Ka nu leh pa a be thiamin a pawh thiam bawk si. Rilru siam fel ka ngai.. Nupui nei lo rual lah ka ni tawh si lo. 

Kan eitur chah a lo thleng har hrep mai. Kan nghah mek laiin Enkawli leh a thiannu an rawn lut ve zui. An kai hmel chha chha khawp mai. Emily hian a hre ve vek tawh bawk a. Min chîk hle tih ka hria. Engahmah ngaih loh ka tum ve tlat. 

"Nangni pahnih hi in va ruih hmel ve.. Heti ang hi kan dawra chawl atan pawh ka duh vak hleinem. Min risk in ching si" dawr neitunuin a tih takah chuan kan en thap a. 

"Ka pi, eitur min pe rawh. A ei man chu kan nei ve alawm.. Buaina kan siam lo vang" eni chuan a ti a. A bu deuh lawp lawp mai. Saw nu saw ka lo atchilh ve thin kha a nia. A hmel zawng a la tha teh vawr tho mai. 

"Nia, ka pi, ei man chu ka lo tumsak ang e. An ni ang hi chu hrethiam rawh. " ka ti. Ka inrin hmain ka sawi. Chaldelh ka tum vang a ni pakhat. 

Eitur chu an ei bawrh bawrh a. Pawisa an phawrh chuan, "Ka lo pe ang. Kha chu thil dangah innhmang duh ang" ka va ti leh a. 

"I pawisa leh i puihna kan mamawh lo" chang fe hian Eni chuan a ti a. Min hmusit hmel a pu ngam nia!  

"Mai mai a che. Addict lehnghal.. Min mamawh ka ti lo, ka lo tihsak ang che u ka ti mai a ni" ka tawngkam chu keimah pawn ka awih lo. 

"Ni e. A dik, addict kan ni" a ti zawi raih a. A mittui chu a rawn hnâm nghal. Pawisa a dah a. A tlanchhuak ta nghal a. 

Emily nen chuan sawi tur kan hre ta lo kher mai. 

zan dar 9 a ri mek, ka phone a lo ri a. "Zoa, ka inthlahrung lutuk, mahse, mateii hi ka dang zo dawnin ka hre lo. Intihhlum tumin zan tir atangin kawng a dap char char mai. Khawngaihin lo kal hram teh" Eni nu. Ka tha a khur a, ka tukhum a za mer mer. Hetiang taka min la tihlauthawng thei hi ka lo la hmangaih tih ka hria. 

"Khaw nge a awm? " ka ti lut nghal tawng a. Thaw huai chungin, a room min kawhhmuh a. A lo kalh tlat. Ka ko, a reh tlawk tlawk si. Ka hlauthawng riau. Ka tha chaknain ka nek hawng ta hmiah. 

Khumah a lo mu zawi nen a. Chhuatah damdawi mum a let phung bawk. Ka sawi nawk. Nawk a, ka pawm kang a, a ka ka zen a, luaktir ka tum.. Tui vawt la turin anu ka hrilh a. A kal vat. A lu chu ka leih huh a. A rum nghet nghet mai. Damdawiin lama hruai mai ka duh rum rum tawh. Mahse, a rawn harh ta a. 

"Zo" a ti thawp sat a. 

"Meng rawh. Muhil tawh suh. Meng teh, eni" ka ti tuar tuar a. 

"Addict ka nih hi. Min khawih suh" vawiina kan inbakkaihna ka hrechhuak. A la na hle a nih dawn hi. 

Tlema a rawn harh deuh hnu chuan, tui te a in a. A la zawi kher mai. 

"Zo, ih maw, ka nun chhanhim nan min lo ngaizawng der mai mai mah nila, ka lawm tho. Kei chu khatihlai khan nangmah vang takmeuhin damkhawchhuah kha ka tum asin" a mittui a rawn luang a. 

"A der a? A der in ka ngaizawng lo che sin"

"Hehe.. Keimah vanga in chhungkua in kehdarh loh nana ka beihna hi hautak hle a ni. Ka ngai thin lutuk che asin..,zo" a tap feih feih a. Anu a chhuak. Engmah a sawi awmzia ka hre lo. 

"Eni, sawi fiah rawh ka tih che kha. Ti nge i pehhel zel.. "

"Hm.. Kan sawi tawh mai ang e. Ka thi thuai dawn bawk a. U mapuii khan min lo bia a, i zin hlan khan. Emily nen in inhual tawh thu te, keimah vanga i nu leh pate rilru hrehawmzia leh i nu hriselnain a tawrh hial thu te a sawi a. Ka nei lui che anih chuan i nu in in chhuahsan a tum thu te a sawi a. Chumi zanah bawk chuan Emily hnen atangin addict ka nih vanga min ngaizawng der i nih thu leh engkim a hriatpui thu che min hrilh a. Zo, hmeichhe chak lo tak ka ni, ka derthawnzia i hria. Khatianga min hrilh chung pawh khan bansan che ka la phal lo va, engkim fiah phawt ka duh. Mahse, a tukah dawra ka awm laiin, u mapuii a lo kal leh a, "Zoa chuan, hetiang pahrawnin a pawngsual hrep hnu hi eng atan nge ka tih ang? " a tih che kha a rawn ti leh a. Ka puakdarh ta a ni. Na ka ti em a ni. Tawrh dan ka hre lo va, hmangaihna avanga ka nat vawikhatna a ni. Ka thiam ve dan berin ka nunhlui ka chhuikir leh ta a nih kha. Ka ruih chhiat ber lai pawn ka theihnghilh ngai lo che. Ka ngai lutuk che. Mahse, ka haw bawk che" a thaw hlawi hlawi a. A chau takzet a ni. 

Thudik ka hriat takah chuan ka thaw huai thung. Thinrimna leh lawmna in min bual. Ka pawm a. Damdawiinah ka hruai leh ta. Tun tum zawng keimah ngeiin ka buaipui vek ang. Min kalsan leh tawh lo vang. 

Mapuii chu ka damchhungin unaunu anga ka en leh theih ka ring tawh lo. 

Tawp mai teh se. Ka kut hi a bung dawn. Ka type dik thei bawk si lo. A ho viau ang. Nitin rawn dah ka duh sia. Vawiin chu ka thatchhiat ni ni mai teh se. Ka hne che u. In chawh 😈