Zirsangliana... part 1

ZIRSANGLIANA.. (Part - 1)

Ziaktu: Toni Râlte

A ţawngkam ngeiawm leh tenawm zet avang chuan ka ke pen lai chu ka tawp chawt. Ner nak chungin ka va hawi let a, nui sâng chungin min lo thlek leh hâw a. Ani hian ngeiawm takin, "Ka û chu ni lo la, ka keuh thlu tawh ang che" min ti anih kha. Phiangsen chuan! 

Ani hi ka nuhrawn fapa a ni. Ka nu leh pa te hi kum 14 ka nih laiin an inţhen a, a chhan dik tak hi ka hre miah lo. Keini tana hriatthiam theih si loh hian an inhau leh vak ringawt zel a. Kan unau hi ka nau Jennifer nen kan ni tlawng! Ka pa hian zu a in ngai lo va, eng ang buaina nge an neih ka hre lo. An inţhen dawn khan ka nu chuan, "I pa nen hian inhuat leh inhmangaih loh vanga inthen kan ni lo. Thil tam tak a thlen vang a ni. Nakinah i la hre ve mai ang.. " a ti ringawt. Tleirawl ka hre ve tan tawh a, chutia an inthen ngawt chu ka tuar na khawp mai. Ka nau chu ka nu bulah a kal a, kei erawh ka pain ka kal ve min phalsak lo. Ka pa te inpuiah ka pi leh ka pa leh ka ui Huntera te nen kan khawsa ta rek rek a. Ka pa hi a hmingin officer a ni ve a. A thawhna department erawh sawi kher lo mai ang. Sum pawh a nei thei fú mai. Ka nu leh pate inthen atanga kum 3-naah nu thar ka nei ta a. Kum 17 ka ni tawh. Mahse, ka nu thar nen chuan kan la innel hman lo, a chhan pawh zirna vangin phaiah ka zuk awmbo ta vang vang a. Fapa a nei tih pawh ka hre lo. M. Com ka zawh thlengin ka haw miah lo! Ni e, ka pi a boral pawn ka haw lo! A chhan chu ka pa laka ka tauh vang a ni. Nu thar neih kha ka duh reng reng lo. Ka nu te erawh an khua Serchhipah an awm a, kan inbe pawp vak lo. Ka nau nen erawh kan inbe zeuh zeuh. Ka nu pawn ka pa nupui neih hnu lawkah pasal a nei ta bawk. Chhungkaw kehdarh an sawi ang chu kan ni ta ngei e. Phaiah khan ka awm rei a, in ka luah a, nuam ka ti daih zawk. Ka pa chuan min rawn bia a nih loh chuan ka be hmasa ngai lo. Pawisa min lo thawn a, ka duhtawk der. Min chawm tur ka nia, lawmthu ka sawi ngai hek lo. Mahse, ka thiante tan chuan misual tak ka ni bik lo. Ka thil phal a, an tan ui leh i ka nei ngai lo. Ka inah an rawn tlu lut tawp a, ka lo dawngsawng vek thin. Zu ka in ngai lo naa an zu innaa lo thut ve reng pawh ka hreh ngai lo. Chuvang chuan va piangthar lua lo mah ila, "Kimi chu vantirhkoh a ni " fiamthua an tih thin. Mi nunah ka buai ve vak lo va, ka nuna an buai pawn engah teh vak ka ngai lo. Ka dream ber chu hna tha tak hmuh vata ka pa in atanga in dan a ni. 

Kar hmasa khan ka zirna te ka zo ta bawk a. Rei tak ka hmuh tawh loh Mizoram lam panin ka haw ve ta kha a nia. Kan in pawh ka pain housing loan lain an lo sa tha ut tawh a. A pui viau mai. Ka nuhrawn chu nu lian tak, ngo vuah mai hmel tha tak a ni a. Lalnunsangi a ni. Ka haw hlim hian a fapa chu a lo awm lo va, ani hi chu hetah zirna a chhunzawm thung. Tunah M.A (Pol. Sc) 1st sem. a zir mek a niawm e. Kei aiin kum 3-in a naupang. Zanriah kan ei kham hnuah a rawn hawng a. A sam a buk a, a kawi bawk, mipa hi an sam ka en hmasa ber thin. A dum hlap bawk a, a mawi phian. A lian a, lian over erawh a ni hran lo, a ngo hlung lo naa hâng tak erawh a ni lo bawk. A pa lamah a kal nge a nu nen an inang tehchiam lo. Ka nuhrawn (ka nu tiin kan sawi tawh mai ang) hi chu a nunnem hmelin a mitmeng te pawh a dam thlap mai a, kei pawn han huat viauna tur ka hre mang tlat lo. Ka pa nupui a nihna chauh lo chu. A fapa erawh a mitmeng chu a hriam mah mah, mizo ang lo takin a mitmu chu a uk deuh kharh bawk. A hmui chu a pan lek lek a, a kareh a zau ţep bawk. A hmel hi ka ngei chi. Thawt thawt a na. Ka pa chuan, "Ti nge i lo va haw tlai ve, i u a lo thleng dawn ka tih kha" a lo ti vat a. 

Min rawn melh a, "Sorry, Davida ten ui an talh a, min sawm sia, ka ei ta mai" a ti liam puat a. Nui chungin, "Kan va inhmu har ve, ka u" ka tana ngeiawm rawngkai si hian a rawn ti zawm zat a. Mi dang tan chuan poilite a tling ang. Kei erawh chuan ka mil loh sa vang nge ti el rawng a kai ka ti. Tha tak chuan ka lo dawngsawng ve phawt. 

Ka pa pawn pension a hnaih ve ta tan a. A hmel te pawh a lang upa ve tan. An nu nen chuan inhmeh lo ka ti nasa thin. Ka pa laka ka inlakhran miau vangin ka nu nen chuan kan inbe tam lo thei lo. Chuvang chuan ka beisei ai daihin ka nel hma. Nu sual tak chu niin ka hre lo. Mahse, ka pa a neih chhan hi sum vang a nih rinna ka la nei tho. Ka pa aia hmel tha zawk pawh a hmu ţeuh awm si a. Zirsanga erawh inah a awm ngai mang lo va, a awm ve chhunah a roomah a tawm a, games a khel deuh reng niin ka hria. Zanriah erawh kan eiho deuh ziah. Ka rin ai takin ka pa chu a zahthiam a. Ka pa hi Kohhranah inhmang le lu lo mah se, a hnathawhte vang nge mawni rawn leh fak a hlawh ve phian a. A thil phal ve bawk nen.. Kohhranah pawh nihna a nei har lo vang. 

Vawiinah kan nula a hawn lawk vangin leh ka nu te an chhuah vangin kan unauin zanriah kan kil dun a. Inbe lem loin kan tlingtla ve mai. Thlengte ka sil fai zawha ka rooma ka lut tur chu khatiang tawngkam ngeiawm lutuk khan min rawn tawng khum ringawt a! Kei nula pangngai ve tak inti, inla mitak ve thei tak thin hian a diar ta lo a ni. 

"Khatiang tawngkam kha i chhak chhuak leh a nih chuan ka nasa viau ang. Zak thei lo lutuk" ka ti chang fak a. Ka melh kul bawk. Ka mitmeng hi a lian bawk a, hlauhawm tham a ni ve. Ka nu tê em em lo a, a vantlang chin ka ni ve. Ka pian pawh a nalh fahran lo, ka hnute hi a lian lem lo a, ka mawngbawr pawh a chuti falua lo. Ka hmel landan erawh a thlirtu mit a zir aniang chu.. 

"Ka fiam che anih kha.. " a ti hluk a. A roomah a lut nghal. Ka phone a rik tak bawk avangin kei pawh roomah ka lut nghal a. 

Ka nau Jen-i kha a hriselna lam chian kuan loh vangin zirna a chhunzawm thei ta lo va, designing lam a tui ve si a, ka nu pasal hlawh a beitham angreng si a, ka pa bulah chuan, "Hetah awm se, zir rawh se. An harsa si" ka ti a. Chuta ka pa tawngkam chu a nia mak ka tih em em ni.. 

"Ka fanu nihna nei ve lo tan ka sum leh ka neih hi ka phal lo" tih tawngkam kha. Ka melh reng ringawt. Ani lah a ngawi leh hmak si. 

"Jeni khi i fanu a ni ve lo a maw? Eng nge maw i sawi le? " ka ti nghek a. 

"I nu zawt rawh" a ti bul hmuk. A kalsawn daih zui. 

Makti em em leh thinphu dup dupin ka nu ka call ta a. Thil awmzia ka sawi ta vek a, "Tuin nge i pa bulah Jeni hi enkawl rawh se ti rawh ti reng reng? Engvangin nge i lo saei ve ngawt? Thahnem i lo ngaihpui ve viau kha eng nge a ţulna? " a rawn ti zêk a nih chu! Mak hi ka ti nasa khawp a. Ka nau nen kum 5-in kan inthlau a, thil awm ve rengah ka ngai. Ka pa fa a nih loh chuan tu fa nge a nih ang? Hei hi an inthen chhan kha a ni thei ang em? Ka lakah an zep tlat a? Ka pi pawh khan ka nu kha a uider miah lo. Thil eng emaw tak zawng a awm chiang.. Ka hriat chhuah a tul. 

Awm mai mai chu tha ka ti chiah si lo va, hna ruak awm ang angte ka dil ve zel a. Mahse, hmuh a harsa viau mai. Kan duh ang diak diak hna hmuh chu vana rah ang vel a ni. Ka pa bulah sumdawnna bultanna tur ka dil ve ta râwih a. Ani a loan rulh ngai nen, in an lo sa ve bawk, a lo inhmang da viau mai a. Personal loan min sawihmuh ta a. Bank lam ka dawr ve ta tlut tlut mai. 

Zanriah kan kil laiin, "Zirsang, zu rim i rawn nam haw leh thin a. Ka duh dan a ni hauh lo a nia. " ka pa chuan a ti tlang hrâwk a. Ka pa hi mi koh duat thiam lem lo a ni. 

Zirsanga chu a ngawi reng a, ka nu chuan, "A dik chiah, kan sawi zing tawh. Zirlai i la nia, ruihhlo hi chu i khawih tur a ni lo. I pa thu chu zawm ang che" a lo ti ve a. Nu mawl tak a ni hauh lo. 

"Ka rui chuang lo, ka nam ringawt alawm" chaw hmuam ţûn chungin a ti a. Kan awmpuinu nui hak chu ka hre nghal. A chhan dan kha a nghal ve bawk a ni. 

"In tawh lo la a ni mai. Zirna chhunzawm zel i duh chuan" ka pa chuan thawh pahin a ti leh nghut. Chu chu thutawp a ni. Ka nu erawh a ngawi zui ta daih. Zirsanga chu a kun chhal a, chaw a bar mial mial ringawt. Engah vak a ngaih hmel loh. 

Vanneih asiamin loan chu ka la ve thei ta hlauh mai. Ka pain tlem min belhsak bawk a. Ka duh dan chuan kan veng bawr velah stationary dawr hi a la awm chiah lo va, chuta tang chuan bul tan chhoin a aia lian leh sum hrawm na zawk tihbelh zel ila ka ti a. Ka pa chuan a ngai ho khawp mai. Mahse, hna a vang si a, thawh chhuah neih ve ka duh. Beiseina ka nei tlat. Bungrua te ka han lam khawm a, phai lam te pawh ka zin leh ta. Ka vai thiante ho nen kan han inhmu leh ta chu kan hlim ngei mai. 

"U, thil min lo hawn teh a" ka msg dawn chu ka chhiar nawn leh. A dp ka en a, Zirsanga a lo ni! A number ka nei reng reng lo tih pawh ka lo hre lo va. 

"Eng thil? "Ka han ti a. 

"Whisky " a rawn ti! He mihring hi a! 

"A teuh lo" ka ti ringawt. 

"I fel em kha.. Please.. Ka pa ka hrilh lo vang" a la rawn ti! Ka pa a ti ve ringawt chu ka la na zui. Ka thikthu lah hi a chhe phian a. 

"Zu kher kher chu ka hawnsak lul lo vang che" ka ti a. 

"Anih leh sana aw" a ti a. 

Ka chhang tawh lo. Û anga min en ve ringawt chu ka ngei. Mahse, a û ang chu ka ni ve miau bawk sia. Huiham. 

Sana pawh chu ka hawnsak ve ta tho. 

"I lo hawn tak tak pawh ka ring lo va, ka lawm e aw" a ti a. A khi sâng mai. Ka melh nghek ringawt. Dawr pawh ka han singsa vel a, hnathawk tur pakhat ka ruai ve bawk. Kan thenawm te in hnuai luah, nula mawngzang zet Asawmi a nia, kei aiin a naupang fe. Mahse, kan inkawm thei nghal mai. Ka dawr hmun hi YMA Library hnuai a ni a, Restaurant te an lo siam tawh thin a, a zau hek hawk viau. Chuvang chuan nakin zela tihlen belh dawn pawn ka buai lo vang. Kawn lai tak a ni bawk a. A zia viau a ni. 

Zirsanga a rawn lut hlawl. Kan buai loh lai tak a ni bawk. A thiante pahnih nen. Ka dawr hawn atanga a lo kal vawi khatna. 

"Û, hei xerox a ngai a.. " tiin document a rawn phawrh a. A thiante pawn an rawn phawrh ve nghal. Asawmi chuan a lo tihsak zung zung a. Xerox machine hi a dang a la ngai, buai zual lai chuan kan indaih meuh lo. 

An zawhah pawisa min pe diat diat a, Zirsanga pawn a rawn phawrh ve. "A ngai lo" ka lo ti a. A thianten mak an tih ka hlauh vangin. 

"La rawh. A thlawnin engmah ka duh lo" a ti nghut. Ka melh râw raw a. A nui sâng zui. An kal liam chiah tihin Asawmi chuan, "Awii i nau chhiat lohzia hi chu aw. Sangsangi pawh sawn a atchilh tawp. I nau tak tak a ni lo bawk a, ka sawi ve mai mai" inthlahrun hmel angreng tho si hian a ti sar sar a. Ka nui tawp. Zirsanga hi chhe lo an lo ti a maw?! Sangsangi phei chu Asawmi te in luahna te fanu, kan veng tleirawla hmel tha pawla an sawi kha a nia. Keiin tha ka tih loh nen. 

"A chhe em mai" ka ti hlak a. 

"A u i nih vang a nih kha. A chezia te hi a man riau" a la ti hram. 

"Ka lo hrilh ang" ka ti zauh a. 

Min rawn melh rum nghal, "Awii a ngai teuh lo, i sawi vaih. Ka rawn kal tawh lo vang" tiin min vau nghal a. Ka lo nui var var. An la naupang ve a, star nei rual an ni alawm. Kei eraw star tih vel hian min tibuai ta vak lo. Ngaihzawng ka nei lo a, tun hnaiah erawh Zarkawt tlangval Rinpuia nen kan inbe nasa ve ngang mai. Advocate a ni a, tlangval lian leh chhe lo ve tak a ni. Ka mitah chuan. Phaia kan zinna atanga inhria kha kan nia. Number te inpe tawnin thian angin kan inbia kan inbe ve ta kha a nia. Groupah te min lo add ve a, kan inpawh sawt khawp mai. Mahse, kan zin atang khan vawi hnih bak kan la inhmu leh lo. Ka lo buai ve bakah ani pawh a buai ve tho si a. 

Dawr atanga ka haw in ka thleng chu a lo reh thap mai. Tumah an lo awm lo! Kan nula Thari pawh a awm lo. Khaw nge maw an awm vek le ti rilru chungin ka room lam ka pan a. Nilenga mawng hung hman lo va phet buai chang chuan ka chau ve thin. Ka thawmhnaw hlipin inbual turin bathroom ka pan nghal a. Towel ka khai a, underpant leh bra nen ka awm. Tumah an awm lo emaw ka tih vang a nia. 

"Ka pa te chu an zin thut a" a aw ka hriat rual chuan ka vir zawk a ni ber. Kawngkaah chuan a lo ding run a. Towel chuan ka intuam vat. Mahse, min lo thlek fè hman tawhin ka ring. 

"Chhuak rawh" ka ti sap a. 

"I mak e. Inlak thutak vak hi a ngai lo. Ka ìt lo che" a ti khawl mai. Ka îp chawih a, "A that chu" ka ti a. A chhuah hmain bathroomah ka lut nghal. Ka pa te chu an zin dawn pawn min hrilh ve awm ania. Mak teh thut thin. 

Zirsanga chu ngaihtuah loh hram ka tum. Unau dik tak kan nih loh bakah hmannia a tawngkam ngeiawm tak avang khan ka inveng ru ran niin ka hria. Ka taksa a hmuh vang khan ka zak a ni bawk ang chu. A chhan chu ka taksa lang tam thei thawmhnaw pawh inbel ngai lo, mahni tawka invawng ve tak ka nih vang a ni. Phaia ka awm laia club- vela kan kal pawn mal leh chawn lang thawmhnaw ka inbel ngai lo. Khawlum em em pawn keimah chauha awm e ti lo chuan kekawr tlawn te hi ka ha reng peih. Ka confi loh vang pawh a ni mahna. Tin, Kan tette atanga inzilhhau leh titi vak thin kan ni lo va, ka nu pawh ka nu mahnise ka pawh viau hran lo. Chuvang chuan thil hi ka ngai serious hma, sex lam ngat phei chu. Ka thian ten tim map lo va blue film an en te hian ka lo zak ngawih ngawih zel. Sex education pawh ngaithla ngam vak lo ka ni thin. Hei hi a tha lo. 

Ka inbual zo va, ka inthlak a. Ka ril a tam viau lehnghal. Chokaah ka chhuk a, ka nuin min lo call. "Ka rawn be hman tawh lo che a nih kha. Thari nu kha a boral a, i pa nen kan kal ve hram loh chuan kan tia, kan kal ta mai." a rawn ti. Thari chu aw a va zia lo tak. Hmanni maiah kha chuan a nu kha a tha viau asin le. Ka khawngaib reuh khawp mai. 

Chawhmeh thing a awm nual a, artui ka kang sar sar. 

"Min chhum kep ve em? " ka hnunglam atangin a rawn ti dût. Ka va phu chiang tak. 

"I mawl ami? Thawm te rawn nei hmasa ta che" ka ti vin thak a. Towel-a a sam huh nuai pahin, "I mak leh tawh" a ti ringawt. Ka ner khum nâwng a. Ka thil kan chu ka chawhsan daih. 

Kan pahnihte chuan kan kil dun leh ta nge nge a. 

"Thari chu ka khawngaih eee.. A pa a thi tawh bawk sia" a rawn ti hlawl. 

"Nia, a khawngaihthlak tawp" ka ti ve mai a. Sawi belh tur a vang tawh viau. 

"Ih, zanah ka thiante an rawn leng dawn ania aw" a ti leh a. 

"An rawn len pawn zu in suh ang che u" ka lo ti hlar. 

"Umm" a ti ringawt a. An in tho ka ring. Ka mutsan daih ang. 

A sawi ang chuan an rawn kal tak tak a. Pali lai an ni. Min rawn len chhan lo bawk a, roomah ka luhsan ta daih. Rinpuia nen kan inbe char char. Zan menrei hi ka thei vak lo. Dar 10 a rik meuh chuan ka mut a chhuak tawh hle. Zirsanga te erawh in chungah an awm nge an thawm ka hre tawh lo. An haw tawh pawh a ni maithei. Ka intifai a, ka mu ta daih. Ka mutui viau lehnghal. 

"Lo hawng teh.. Vat.. Kimi" a thawm ring zet avang chuan ka harh hlawl. Zing dar 3:46 a ni tawh. Tehchai chuan le.. 

"Eng nge a? " tih hlar pahin ka va hawng a. Kareii! A hmai chu thisen hlir. Ka hnungtawlh dawrh a. 

"Mi ka that in ka hria" a ti sup a. A awn riai riai a, min rawn bawh rawk. Nikhua a hre lo zui nghal. Ka mangang lutuk chu ka rak nghek ringawt. Thawm lah chu a reh vawng vawng mai si.. 

"Zirsang. Harh teh. Hei " tiin ka sawi nawk nawk a. A mit a meng diar diar, "Rukru a nia. Ka that.. Kei pawh min that" a ti chuai raih a. A hmai ringawt ka lo en vang in a dul zawna chemte bur vu chu ka lo hmu lo a ni… 

Ka hmuh rualin ka mit sulh a, ka chhaw hûih mai. 

(Part -2 ah kan inhmu leh dawn nia. Chaw ka ei dawn 😂😂