Zirsangliana 9

ZIRSANGLIANA.. (Part- 9)

Ziaktu : Toni Râlte

Zirsanga chuan min bialnu chei ta deuh thawr mai. Kei lahin rem ţeuhin ka hre si lo. Ka awmdan chu a lai hû mai. Amah lah a thothang a thain a hlim hmel suk suk thei si. Ka ngei viau dawn rualin khami zana a chet dan pa zet leh min venhim a duhna te kha ka namnul thei bawk si lo. Ka chhungte chuan an hria ang tih ka hlau takzet a ni. Rinpuia nen lah kan inkar that lai tak niin thenna tur chhuanlam chu zawn fe a ngai ngei ang. 

Chaw ei lai te hian inhmatawna thu e ti lo hian ka ke hi a rawn tlawh dat dat zel a, hauh chi a ni der si lo. Ka tawng tam loh phah a, keimah hi ka zum dûk ni berin ka hria. Ka nu hi a fing si a, a hrethiam ang tih mawlh ka hlau thin. Jeni pawh ina awm mai mai a ning si, vanneih asiamin kan veng chhungah puan thui zirna an hawng hlauh mai a. Phai atanga lo haw U Mali siam a ni nghe nghe. Ani hi designer a ni bawk a, a la lar lem lo naa, mi lar kan neih zinga thenkhat chuan an rawn pan ve zauh zauh tawh. Mi inngaitlawm leh intihlar hreh si, mahni infak hreh ngawih ngawih ang kha a ni ve a. Mi te anga boruak ngam leh show vel siam thei ni ve se chuan a lar ve tawh ngawt ang. U Mali dawrah chuan Jeni pawh zir ve kan dilsak a, puanthui thiam tel loh kha ani pawn duh bik hek lo. U Mali bulah ka nauin designing a tuizia leh a thiam ve reuhzia te ka hrilh tawh a, U Mali nen hian phaiah khan kan inkawm ve zauh zauh bawk a, nau anga min en ve bawk avangin ka nau pawh a duhsak tur thu leh a lo ngaihven deuh tur thu a sawi bawk a. Ngaihtha takin Jeni pawh kan kaltir ve ta a ni. 

Kei pawh ka dawr chu ka tihlen belh ve zel a, a variety lek lek tawh. Mahse, pawi ka ti lem lo. A len poh leh a hlawkna ka hmu tam ve zel a. Asawmi leh Faki te pawh an hlawh ka punsak a, an lawm thiam ngei mai. Min zahder thiam bakah an mawng a zangin min awl hneh em em a, an phu ve bawk a ni. Zirsanga pawh class an la kal ve zel a. Ka pa motor pawh a keng leh tawh lo, Bike ngawt a khalh leh tawh. Ka lo hlauthawng thin. Mahse, a bulah erawh ka sawi duh thak lo, amah ngaibtuah deuh anga min hriat kha ka duh lo. 

Kohhran zaipawl ten hla kan zir chho ţan a. Jeni pawh hruai ka tum thin naa a ni te reuh hi a thatchhe tlat. Serchhipah khan kohhran an bel lo lutuk a, a da a ni ber mai. Ka thiam ang angin ka'n zilh ve tak naa, tleirawl luhlul rual an ni bawk nen, a nawr luih hleitheih loh a ni ber. Ka hla zir tur ka kal dawn lai tak chuan, "Ka lo zir ve dawn" Stepa rawn chhuk pahin Zirsanga'n a rawn ti lauh lauh a. Tu pawn mak ti zetin kan en! 

"Ti nge khatia min en hû hlawm a. Hla zir chu a theih ve loh mi? " a ti hluk a. Inkhawm takngial pawh peih ngai lovin hla zir a duh ve khiah chu a mak lo tih chuan dawt kan sawi ang. 

"Ti nge" ka lo ti let hû zawk a. Min melh run pahin, "Ka zir ve châk. A ninawm alawm, hetia awm mai mai te chu" a ti leh hmuk. 

Ka pa chian, "Exam a hnai tawh a, lehkha zir zawk la a tha rih. Exam zawh atangin i zir zawk dawn nia" a lo ti khauh. A ner sak a, "Exam zawh te chuan enjoy kan duh ve leh si ang a, hla ka zir leh peih tawh nang" a ti nang nang a. 

"Lehkha chu lo zir phawt zawk rawh. Exam zawhah peih lo mah la ka hruai lui zel ang che" ka lo ti ve a. 

"Aw a nih ka thlah ang che.. Meizial lei ka ngai tho" a ti nghut a. Ka hnial duh ta bik lo. Kan chhuak dun ta a. Kan veng bawrah kohhran huang chhunga ka kawm thinte an awm lem lo bawk a, kan thenawm chiaha nula Seni hi kan mizia a inmil lo nge kan innel hlei thei der lo. Sangsangi te lah exam tur an nih vangin an la zir rih si lo va. A bike-ah bwk chuan ka thu leh ta vung a. 

"Nge min lo hnial ve kher a? " a ti chang rût a. 

"Aw lehkha zir kha a pawimawh zawk alawm. I zir lo rei sia, fail a hlauhawm" ka lo ti ve mai a. 

"Ven i ngai alawm" a ti pawr hlur a. Ka chhiatkhum hrep! 

"I zak em? Ven ka ngai awzawng lo" ka lo ti ve hlak hlak a. 

"Aa.. Tlangval hoin an melh nasa dawn che asin" a ti leh hluai. A va naupangchhia tak. 

Biak in thlen dawn dawr kawtah a ding a, kei pawh ka chhuk ve nghal. 

"In zir zawh veleh min lo bia la, ka lo hruai leh ang che. Tumah rawn inthlahtir suh" a ti leh hmak. A va inla boss tak e aw. Ka thiante thawm ka hriat vangin ka bu nghat a, ka kalsan ta a. Rilru chu a nuam veng veng lawi a! Kei pawh hi ka dik hlawl lo. Hla chu kan han zir a, kei hi ka aw a lian naa ka control thiam tehchiam lo va, Saprano ka sak chuan ka aw a lang bik thin si. Contralto ka sa ta daih a. Ka thiam phian a, a zia khawp mai. Sawi leh sawi hnu rei tak phaia ka awm avangin Kohhranah pawh ka la mikhual angreng a, min hre miah lo pawh an awm! Kei pawn hriat loh ka ngah mai. Veng chhung a lian tham ve bawk nen. Ka thian ka tihte pawh ka inkhawm hnua ka chhar chawp, hmun danga ka kawm lem loh te an ni a. A chang chuan thian ka nei lo lutuk chu ka zak ve thin. Asawmi te lah kohhran dang an nia. Faki te chu vengchhakah an lawi daih bawk si. Buaithlak a nih hi.. 

Break -ah chuan Biak in hul hliapah kan thu thap a. A then an zung bawk. Phone kan khawih leh sap sap mai. Ka kun ngur ngur lai chuan ka hnungzangah a rawn beng dat a, ka hawi chhuak vat. Kan asst. Conductor Dinpuia a lo ni a. Ka nuih ringawt. Ka bulah a lo thu ve nghal a. 

"I thiam chak ka rin aiin" a ti sup a. 

"Nia ka sak awm chi tak a lo nih kha" ka ti ve mai a. 

"Chuan, i dawr lam te i tluang zel maw" a ti leh daih. 

"Umm tun lai phei chu a zia ve lutuk" ka lo ti a. Dinpuia hi Faki te venga awm an ni naa, kan Kohhranah an la rawn lawi vang vang, an lawina hmasa a ni sia.. Kan inhre tha hran lo, hla kan zira kan han fellowship atang chauhin kei phei chuan ka hria. 

"Lo len te pawh hi ka duh thin a, ka buai ve thin lutuk a" a ti leh suam suam a. 

"Ni ngawt mai. Kan buai hlawm tawh lutuk a" ka lo ti tha ve mai a. Amah hi Electric Department-ah hian a thawk ve a, eng hna ber nge a thawh erawh ka hre lo. Kan inrual khat vel viau ang. A hmel chhe hran lo naa kei mipa hâng lam hi ka hmu mawi thei vak lo va, ka duh aiin a hang lek lek. 

"Remchang hmasa berah ka la rawn leng ang, i phal chuan" a ti a. A nuih zawnga a ha var zet chuan kuhva leh meizial a ti ngai lo tih a tilang chiang hle. 

"Phal tehreng mai. Lo la leng rawh" ka lo ti vat a. 

Hla kan zir leh hnu te chuan ka ngaihbel nge Dinpuia chu ka bul hnaiah a rawn kal sek a, ka bulah te rawn dingin ţul ûk lo vah ka part te chu min han sakpui thul. Mahse, ngaihbel loh luih hrm erawh ka tum ve. Dar 9:30 dawnah kan bang ta a. Ka aw pawh a lai vek mai. Kan veng lama phei tur chu an awm tho naa, Scooty te an keng hlawm a. Kei pawh Zirsanga khan min thlah lo se ken ka tum ve reng. 

"Ka va thlah ang che.. Tirawh, " Dinpuia chuan ka dara a kut rawn nghatin a ti a. Zirsanga call ka tum mek lai a ni. 

"Aaa ka nau biak ka lo tum a.. " ka ti a. 

"Aa.. In veng lamah kalna tur ka nei tho alawm.. Hawh " a ti leh tlat si. Hreh ru angreng tak chuan ka zui ta poh a! Zirsanga'n a hriat teh chuan aw.. 

Kan inphur phei ta chu a nia. Kan in kawtah a ding a, "Rawn peng la, thingpui te kan lum dawn nia" ka ti khawmawi ve a. 

"Aa.. A tlai laklawh em mai, zan dangah zawk aw" a ti a. Kan inmang tha a, kei pawh gate hawngin kan in lam ka pan ta nghal a. Kawtah hian street light kan vuah thin a, mahse, a chhia a, tun lai chu a thim mup reng mai. Veranda erawh a eng pam mai. Kawngka bula thutthlenga Zirsanga thu run pawh ka va hmu nghal mai a, nuam lo tihna in min tuam nghal. 

A zawn ka thlen chuan, "Lehkha i zir na nge" ka ti khawmawi a. 

"Ka rawn hruai leh che i hlauh danah kha pa thlah kha i lo chak zek zek vang anih dawn kha" a ti chhum hmak a. 

"Awii lo biak che ka tum reng, amah khan ka thlah ang che a ti tlat alawm.. " ka lo ti ve hluai a. 

Elsen zet hian a nui hak hak a, "Ni rawh se" a ti leh hmuk. Ka luhsan ta daih a. A awmdan hi ka ngei a, ka ngei si lo. Ka sawi thiam lo. Ka hua a, ka haw tak tak lo. Ninawm. Ka nute pawh mut an lo tum ve mek a, Jeni erawh roomah a lo tawm leh tawh aniang, lerh rual an ni ve tawh bawk a, video call tih vel hi a uar khawp mai. A hlim chuan a tha a ni mai. 

Ka hmai ka phih fai a, ka inthlak sawk sawk. Ka phone ka'n hmeh chuan, Rinpuia misscall 3 lai a lo awm hman a! Whatsapp chu ka la lut duh lo law law. Hla kan zir dawn tih ka hrilh sa ve reng sia. Ka call back ta nghal a. Ngaihpawimawh loh theih bik si loh. 

A ring ral ta thak. A mu tawh aniang. Chhun lamah an vei chau deuh thin a, kei aia mut hma chang a nei fo mai. Whatsappah ka lut a, awiii Zirsanga msg chu 102 lai a lo awm! Ka seen peih ang em aw.. Em em a na. Rinpuia msg chu ka chhang ta phawt a, "Muttui aw.. " tih chiah a ni bawk a. 

"Muttui le" tiin ka chhang ve hmak. 

Rizai sin thain ka tawngtai leh te te a, Chumi zawhah Zirsanga msg chu ka open ta a. A nghalzia chu.. Tawite te hian a lo thawn nghek a lo nia. Ka hmingpum ngatin hawrawp mal te te ten a rawn dah a, a tawp lamah erawh, "Kim, ka va nghak rei tawh che. In la bang lo mi? " tih te, "Ka lo kal risk tawp dawn", "hmm.. Ka rawn hruai che i hlau anih kha" tih te an ni. 

A tawpna ber chu room-a ka luh hnua a lo thawn a ni. 

"I lakah hian ka thikthu a la chhe dawn chauh. Kei chu mi sual ka nia, ka ta i nih theihna a nih dawn phawt chuan mi dang tihnat mai mai te chu ka hreh lo a nia. Tui deuhin muhil ang che. Muttui" tih hi a lo dah. Ka khi sak a, la rilru erawh a buai deuh. 

"Rinpuia nen kan la inthen lo. Chuan hmalam hun kan nei ve lo, chuvang chuan tun hi a tawpsan hun lai tak a ni" ka va ti ta a. Hrehawm erawh ka ti ve reng mai. 

A seen rang ngei mai. A typing nghal a. Ka lo nghak ve tawp. 

"A tul anih chuan ka tlanbopui hreh lo che. Ka duh em che a ni. Hmalam hun chu hunin hril rawh se.. I rilru dik tak sawi la, i kutah kan dinhmun a innghat" a rawn ti. A serious takzet a ni. Kei pawh ka zâm deuh. 

"Ka hre lo. Dik tak chuan ka haw lo che. Ka nau anga en che pawh harsa ka ti ve tho. Mahse, chhungkua avang hian nat mai pawh pawi ka ti lo. Chhungkaw kehdarh hrehawmzia ka hre tawh a, keimah vanga ka pa zak tur leh i nu mualphona tur ka ngaihtuahin tuna tihtawp hi a tha maiin ka hria" khur der der chungin ka type. Mak takin ka na nget nget bawk. Zirsanga hi ka lo duh ve tawh lutuk em mawni dawn le. 

A seen hnu rei vak loah, "Aw le.. I duh ang chu zawm ka lo tum ang. Kei chuan ka sawi hnem tawh a. Nang chuan a thim zawng zelin i ngaihtuah a. Tunah chuan i tel lo va ka hlimna tur ka zawnna kawngah engpawh ti ila, min demin inchhir suh ang che. Mang tha le.. Ka u" a rawn ti ta a. Ka sa hat hat mai. Mahse, intihpaukhauh a ngai tih ka hria a, keimah zawk hi chak taka ka awm a ngai a ni. Nuhrawn fapa ngaihzawn chu Zoram khawvelah a mikhual tawh lo a nih pawhin, kei chuan kawng dang dap hram ka la duh fan a ni. 

Ka mu tui teh hrep lo ve. Ka harh hma si, ka let ka let a. Ka ţah te a chhuak. Ka lu a na bûr bawk. Phur lo zetin ka tho va, ka inphihfai a. Chokaa ka zu chhuk chuan, ka nu leh Thari'n rawng an lo bawl a. Ka pa hi a leng a ni maithei. Jeni erawh zai rat rat chungin in chhung a tifai a. Thari leh Jeni hian min awl hneh bawk a, ka awm thatchhe lek lek tawh. 

"Nizan zan rei tawh khan i nau a chhuak a. A lo la haw lo hei" ka nu chuan a ti a. Ka ding chawt. Hlauhthawnna hlirin min tuam. 

"Ti nge a chhuah leh a? Eng nge a tih? " ka ti nghek. 

"Ka hre bik lo, Thari hian a thawm a lo hria a, a bike la chhuak thawm leh a tlan chhuak thawm vel, dar 1 bawr vel a niang.. A call tlang theih bawk si loh" thlabar hmel zetin a ti a. 

"Khaw nge ka pa" ka lo ti daih. 

"I nau ngaihven chuan a chhuak ve ngawt a. A thiante ho a va be kual dawn a niang" a ti vat a. 

"A va mak ve aw.. Ti ng le.. Ka'n call ve chhin" tih leh call ka rual nghal a. A switch off bawk si. Ka ţah a chhuak ut ut mai. Ka nu pawh chu ka khawngaih khawp mai. Khawiah tehlul nge maw a kal dawn ni? Zan lama kan inbiakna te ka chhuikir zut zut a. Khang vangte kha em mawni dawn le.. Ni lo hram teh se.. Ka rilruin, "Zirsang, mawla.. Ti lo teh. Tiang hi chu a dik lo" ka ti mawlh mawlh ringawt. 

Tukthuan kan peih tihin ka pa pawh a rawn haw ve ta hlawl. A va hlawhchham tih hriat takin a meng hnual raih a. 

"Danny te ho pawn a chin an hre lo.. Eddy te inah a awm aniang an tia, Eddy ka biak lahin a lo kal lo a ti bawk si" a ti nghut nghut a. 

"Police hrilh mai chi em? " ka lo ti vat a. 

"A bo chiah pawh niin a lang si lo va, khawiah emaw chuan a awm ang. Kan lakah lungawi lohna a nei nge mawni dawn le.. Nge nupui te hi a lo ru reng em ni zawk? " ka pa chuan a ti leh dap dap a. 

Ka nu chuan, "He nau hi chuan min va tibuai tak em. Inthlahrunte pawh hi a inthlahrung zozai lo mawni.. Rawn haw teh se, a hre khawp ang. A patea te bulah ka dah hmak ang. Mai mai ana" a ti hlaih hlaih a. Kan pafa mitmei a ven vang tih ka hria, ka khawngaih em em zawk. 

"Nu, i rilru tihah lutuk suh, Tei hi ka'n be chhin ang e, a lo hre maithei asin" tiin a darah ka va kuah a. Tei chu ka call nghal, "Tei Zirsanga a lo kal em? " ka ti nghal tâwng. 

"Kal nang, ngati nge a? " a lo ti hû a. 

"A rawn be hrim hrim che em? " ka ti leh hram a. 

"Be lo. Kan inthen tawh alawm" a rawn ti hmak. Ka dah ta daih a. 

Tukthuan chu tui ti vak lovin kan kil ta hlawm a. Kan tawng mang lo. Rilru kan kawm vek ni maiin ka hria. Kei pawh dawra kal loh mai ka duh, tihtheih nei lo mah ila, dawra rilru hah zeta va awm ai chuan ka nu te bula awm chu ka thlang rih. Asawmi kutah ka dah leh mai ang. Thenawm khawveng kan la hrilh lem lo. Dik tak chuan tun laiah chuan thalai tam tak riahbo hrat leh awmna chin hre lo va thangbo mai mai ching hi an tam tawh a. A mak hran lo. Mahse, keini tan chuan Zirsanga chu a vawi khat riah bona a ni tlat! Ka hawn hma te chuan a lo riak bo ve tho mahna. Bakah zan laiah a chhuak kher bawk si. A mak ve em a lawm. Ka pa erawh a hnaah a kal a, chanchin erawh a lo ngaihven tur thu a sawi. Vawiin nilenga a rawn haw loh chuan Police pun mai a tum thu a sawi bawk. A fapa ang tak taka a ngaihven leh a ngaihsak chu ka dem lo, fapa a awt ve bawk em a ni. Hei vang hi a nia Zirsanga pawh ka bialpa ka nihtir ngam loh. Ka pa tan a nat bakah a zahthlak dawn em mai. 

Danny te ho nen pawh kan inbia a, engmah an hre si lo. An ni pawn an lo ngaihven ve tho va. A thiante bulah pawh engmah sawi lo va chutia han kal bo daih chu a mak a ni. Ka rilru a hah uchuak bik niin ka hria. Keimah vangah ka ngai bawk si. Ka tawngtai mawlh mawlh mai.

Chawhnu dar 3 bawr vel a ni ang. A bike ri kan hre ta. Kan meng hrû hlawm mai. Kawngka chu hawngin kan va chhuak ţhap a. A bike a hung tha a. A rawn kal phei a. Kan lo ding thap chu mak tih hmel deuh tak hian, "Ngati nge a? " a ti zawk mah a. Ka va ngei tak. 

"Khawiah tehlul nge i kal a? Min va timangang ve.. " ka nu chuan a ti bawrh bawrh a. Kei chu ka kha a chih a, ka tawng thei lo. 

"Ka teirawlai mai mai" a ti duh lek a. Ka nu insum zo lo chuan a banah a lo mansak a, "Zirsanglian, i va zak lo ve. I pa mitmei te hi veng ve ta che. Ti nge i duh dan dana i tal a.. Hre rawh, naktukah i patea te inah i awm dawn khawp mai" a ti hmarh hmarh a. Zirsanga a ding chawt. 

"I thu vek alawm ka nu" a ti hmiah. Min rawn melh zawk a, in chhungah lutin a pindan lam a pan zui nghal. 

Kan boruak avang chuan kan nuam lo ru thûm mai. Tlaia ka pa lo hawng chuan a pindanah a han kalchilh nghal a. Eng nge an sawi erawh kan hre lo. Ka nuin a patea te ina awm tura dah chu ka pain a phal teuh lo. A phal kha ka ring lo sa hrim hrim bawk a. Ka lo lawm ve ringawt lehnghal. 

Ni 2 lai chu Zirsanga ka hmu lo. Ti ila, in khatah kan awm reng naa, a pindan a chhuahsan miah lo. Kan rualin chaw a ei bawk si lo. A awm dan chu ka va duh lo tak e aw. Rinpuia lakah lah ka thla a ngam chuang bawk si lo. Ka insawh ka insawh ringawt. 

Zan khat Rinpuia lo leng chuan, "Inneih hi ka hmanhmawh thut. Kan hna vang hian zin thut thut kan ngah si a. Ka nu te lamin min nawr ve chhen bawk nen, kan la inzui rei lutuk lo naa, naupangchhe zawk zawk kan ni tawh lo bawk a, ngaihtuah chu a ngai a ni" a ti ta hlawl mai. Ka lo hamhaih. 

"Aa.. A la hma e" ka ti ringawt a. 

"Ka hria alawm. Mahse, kan dinhmun heti hi a nia, rem lohna em em kan nei lo bawk nen.. Palai hi ka rawn tir ve chawt dawn mawni le" a ti leh a. 

"Awii a zahthlak, bakah nulat ka la duh. Ka dawr te.. Engkim" ka lo ti mial mial a. Min thawng deuh bawk a ni. 

"Dawrte chu inneih hnuah pawh i la enkawl zui zel dawn alawm.. Hman zan i pa ka titipui mai mai chhin atang kha chuan an ni lam pawh hian min iai hran lovin ka hria.. Chuvang chuan ti ve râwih mai ang" a ti leh tlat a. Ka rilru a buai hle. Thil dang zawng zawng aia ka rilrua lang tam zawk chu Zirsanga a ni. 

"Awii ka hrethiam lo. Nakkum lamah ti zawk ang. Kumin chu a laklawh vel vek tawh" ka ti ve ta tawp a. A ngawi ta daih. A lungawi chiah lo niin ka hria. Zan dang aiin a haw hma ta reng a. Ka mu tur rooma ka luh hma chuan Zirsanga room chu a rawn inhawng a, a lo chhuak hlawl. 

"Kimi" a ti sup a. Luhsan mai chi ni bik lo chuan.. 

A rawn kal hnaih chuan a hmuihmul te chu a lo to fur a, a bawrchhawr hle. Class pawh a kal ngai si lo. Ka nu ten a awmdan mak an tih thu an sawi an sawi reng a. 

"Ti nge hetia i awm? " ka lo ti halh a. Ka chhoh en hâ bawk. 

"I hria alawm. A harsa asin. Mahse, ka hneh tèp e" a ti chang khauh a. Ka lo na zawk. 

"Mipa i nih kha" ka ti lawi rut a. 

"Mipa pawh mipa kan ni fo thei lo alawm.. Va lut tawh rawh. Kei pawh thil ka zuk ei ang e" tih leh kal a rual nghal a. Ka enzui vawng vawng mai. 

Dawrah kan buai chho mep mep reng a, mahni tawkah ka indaih lo. Ziah fel ngai leh bungraw thawn chhuah tur te kan nei ve zut bawk si. Vawiin phei chu lunch takngial pawh kan ei tha hman lo. Faki leh Asawmi pawh an phe buai hle. 

Kan awl deuh laiin, "U Kimi hi i cher e.. Tun hnai hi.. Ti nge? Thil i ei tha lo mi? " Asawmi chuan a ti hâ a. 

Ka cher tih pawh ka lo inhre lo va. "Ka indiet alawm" ka lo ti mai a. An awih loh hmel hle. Indiet ngai tue khawpa thau ka ni ngai lo hrim hrim si a. 

Zan hla zir a ngai leh bawk si, chau zetin ka kal. Zirsanga erawh chaw eikham rualin a chhuak nghal. Ka pa pawn, "Vei eng emaw tak a nei anih hi. Enliam rih a ngai. A tha ve leh mai ang" a ti ringawt. 

Kan hla zir kan bang chu hmanhmawh takin ka haw nghal a, mut veng veng ka chak tawh a ni ber. An lo reh thap tawh. Scooty ka hun that rual chuan Zirsanga bike ri ka hre zui zat. Hmanhmawh deuhin ka siamrem sawk sawk a, luhkhalh tumin chak zetin in chhung lam ka pan nghal. Mahse, ka banah a rawn vuan hman mawle. A. Va che rang tak.. 

"Vawikhat chauh" tih leh a lama min pawh hnaiha min fawh a rual nghal. Min kuah nghet si, ka tal arh arh naa ka hneh ngang lo a ni. Garage lamah min luhpui a, au chi a ni bawk si lo. Bang ngheng chuan min dintir a, hnai zetah min rawn melh run mai. 

"Ka nula i ni dawn" tih leh min fawh a rual lehnghal a, ka nghawng, ka ir leh beng te chu a chul bakah a fawp ngjal bawrh bawrh. A tir kha chuan ka lo ngaih ve deuh vang nen ka lo chhang let ve mai a. Mahse, ka duh aiin a che na ta tlat! Puan ka bih si, ka puan bih chu a kek thla a, ka boxer chhanah min rawn dap ta ruai mai. A dik dawn lo tawp mai tiin ka insangphek a. 

"Duhtawk rawh. A tawk" ka ti mawlh mawlh a. Ka tawng ring ngam bik si lo. Duhtawk a nei thei lo. Min ei zawh vek duh niawm takin ka taksa engkim chu a fawp bawrh bawrh a, hlauhnain min tuam tawh zawk. 

"Zirsang, khawngaihin.. Duhtawk teh" tiin ka ţap ta ţiau a! 

Min thlah thut. Ka puan chu chharin thiam lo zetin min ven thattir mawlh mawlh a, Kei chu chechang lo vin ka ding reng ringawt. Min rawn pawm leh a, ka darah a lu rawn nghatin, "Ka tihpalh aw.. Ka tihpalh" a ti mawlh mawlh a. Ka thakhur pawh a zia ta deuh. 

"Lut ang" ka lo ti sap a. Ngawi rengin inkai chungin in chhungah chuan kan lut ta a. Ka muhil har ngei mai. Zirsanga hian min atchilh nge min hmangaih ni ang?! Ka buai. 

Tukthuan ei lai chuan ka pa chuan, "Nizan khan Rinpuia palai te an rawn kal a. I thu hmua rawn kal an ni turah ka ngai a. Engtia tih chi nge ni dawn? " a ti ta mai le.. Ka chaw hmuam lai ka chhak lo chauh. Kei aiin Zirsanga a phâwk zawk. Kan bula chaw a lo ei ve chhunah a thu hriat chuan a deng na viau ani ngei ang. 

"A va mak, ka duh lo ka ti mawlh mawlh sia, Rinpuia chu a va han timak em em" ka ti chiam a. Ka mangang hle. 

Zawi sup, hriam zet si hian, "I neih ngei a ngai dawn anih chu" Zirsanga chuan a lo ti a. 

(Sunday-ah ka awl thin a. Mahse, in special em a, ka zia deuh bawk a, ka rawn thaikawi leh mai mai.. Min tawngtaipuina avangin ka lawm e.)