Zirsangliana. 8

ZIRSANGLIANA… (Part-8)

Ziaktu: Toni Râlte

Ka nu pawh a tha chho ve zel a, a damdawiin awm man bill a san tur thu leh an harsatzia a sawi zen chu ka hne lek lek. Min phut ru tih ka hre ve kar a, tihsak loh ka tum pawh a ni lo. A sawi zing leh lutuk chu ninawm lamah a kal. Zirsanga erawh a hma ang khan inah a awm leh ta vak lo, a awm chhunah a tawm leh tlawk tlawk bawk. Zanriah pawh kan ei ho khât ta riau! A lo haw ve chhunah a rui ziah lehnghal! Ka pa pawn a khak tawh nghe nghe. A ngawi reng zel a, sim tang e a ti chuang lo. Class a kal tha viau chuan ka hria. Tei a rawn leng leh tawh rih lo va, an la inzui turah ka ngai mai. Rinpuia erawh a rawn lang zut roh a! A hma ai khan min hneh a tum ni hmiang ka ti mai. Ka pa nen hian an inkawm thei fu lehnghal a, a tihzia phian mai. 

Ka nu pawh a chhuak thei dawn ta a niawm e. Jeni nen kan han khul chhuak a, a bill manah chuan ka pawisa ka hmang. Ka pa te tihbuai kha ka tlawmlak bakah a inthlahrunawm ka tia. A pahrawn farnu pawh a rawn lang ve leh a, Serchhip-a chhoh nghal an tum anih hmel. 

"Bill te min peksak vek a, kan lawm lutuk ania. " ka pahrawn chuan a ti ve a. 

"Aa.. Ka tih ve tur ania laawm.. Ka nu hi tha takin lo enkawl la a tawk mai. " ka ti ringawt. A mah ka va tham lohna pawh a ni hran lo. Khatiang baka sawi ngaihna kha ka hre lo a ni ber. 

"Ni e, enkawl tha ang. Hna thawk suh tih pawn a thawk lui zel a" a ti ve mai a. Chutih lai tak chuan ka nu leh Jeni inhnial thawm kan hre ta a. 

"Engvangin nge ka pek ngawt ang, hnawk min tia min hmu kham em emtu an nia. An lakah engmah ka ba lo" Jeni chuan a ti hmak hmak a. Ka va kal hnai a, "Ti nge? Eng nge a? " ka ti a. 

"Hei ka nu hian, Ka ni Engi saw i thawmhnaw hlui ho pe ve rawh a tia. Ka pe awm lo em mai" a ti nghat a. Ka pahrawn farnu chu Jeni nen an intiat angreng viau a, upat erawh a upat hmel tawh. Amah ber hi Jeni hmumawhtu nia Jeni'n a sawi kha a ni lehnghal a. Ka nu chu ka ngei ve lek lek. 

"Nia, pek a ngai lo. A ho em mai" ka ti ve hmiah a. 

Ka nu chuan, "In hausa tawh a, retheite in hmusit ta ani maw? Jenifer, khita i awm laia chawmtu che kha tu nge? I pa hi a ni lawm ni? Tunah Aizawlah i awm dek dek a, i inla nghal ringawt a.. " a ti ta mai a. Mak ka ti khawp mai. 

"Ka pahrawn chuan min chawm ngei e, mahse, ka phak ang tawkin hrisel lo chung chung khan hna ka thawk ve nasa tho, rawra nise ka chhu nitin a, mi huanah ka inhlawh thul. Ka rualpuite tih ngai loh ka ti nasa em mai, tun ataka ni Èngi te i duhsak thar vel hi ka ei thlawt lo. An neih ka ei lo bawk a, engmah ka pe lo vang" Jeni chuan a ti ta hmiah hmiah mai. Ka lo ţang ve em em tawp. 

Ka nu tawng leh hma chuan ka pahrawn chu a rawn inrawlh a, "In va zahpuiawm tak, inhnial kha a tul lo. Engi pawh engmah pek a ngai lo. Hei i damdawiin awmna te min peksak a, lawm tawk tawh rawh. Sumo pawh a lo thleng dawn tawh ang, kal dawn tawh ang u" a rawn ti ta a. A tawngkamah chuan pa fel tak anih hmel lawi si. Ka nu pawn engmah a sawi zui tawh lem lo. Ka nu zia chu mak ka ti tawlh tawlh, a pasal laka tlaktlum nan a sawi te pawh a ni mahna. Ni e, a pasal bak neih a nei tawh bawk si lo. 

Zanriah kan ei laiin Zirsanga pawh a rawn haw ve hlawl mai. 

"Ka ei tawh a" a ti sup a. A roomah a chho nghal daih. 

"Kan Zirsanga hi chu aw.. Ngah nge maw hetia a awm tlat ni? Nakinah i pa hian na deuh takin zilh leh se a tha ang" ka nu chuan a ti a. 

Jeni chuan, "U Zirsanga hi kei chu a fel zawk ka ti, a rualpui ho sualzia leh ruihtheihthil duhzia hi.. Ani te chu class te a la kal tha zawk tal a. " a ti hlut a. Ka va melh zawk, engahmah a ngai lo aniang. 

Ka pa chuan "Tlangval an ni ve tawh si a, hauh leh zilh hi a sawt vak tawh lo. Mahni thu duh hun lai a ni si a. Ni e, ka lo zilh hau leh dawn nia" a ti ve a. Kei chu ka ngawi tluan parh. Hetia Zirsanga a awm tlat hi keimah vang mawni le tih chang ka nei. Min duh thu chiang takin a sawi a, keiin ka lo hnawl si. Bialpa ka nei bawk nen, min runluih nan Tei a ngaizawng ang a, a hlim bawk si lo chu tihian a inhrithla ta aniang tihte ka ngaihtuah thin. Ka be hreh bawk si. 

Ka dawr bungraw chah tur ka tihfel mawlh mawlh lain ka room kawngka an lo kik a, lo lut tura ka tih hnuah a rawn lut. 

"Kimi, chhuak lawk ang.. Min lo chhuahpui lawk teh, keimah chuan ka pa khuan a phal awm si lo" a ti nghal thawr thawr a. Keia inchhut buai lai nen, "Ninawm" ka lo ti hluk. 

Khumah rawn thu vein, "A mak! Hei chu chhutna hun a la awm. Ka hmanhmawh ania" tih leh min phih a rual. 

"Zirsang" ka ti nghek a. A sawt lem lo. Ka chapal chu hlipin sneaker min buntir a, a chet dan chu ka beisei loh lam daih a ni. 

"I a mi? " ka ti leh tuar. 

" lo a lo" a lo ti hmawk hmawk. Almira va hawngin ka kawrlum hring duk a va la chhuak a, "Kha ha la, kal ang.. Hmai chei a ngai lo" a ti leh tawp. Ngei zeta melh rawm rawm chungin ka ha ve mai. Hnial a sawt lo tih ka hria. In hnuaiah kan chhuk a, "Pa, ka u ka chhuahpui lawk. " tih leh chabi lak a rual a, bike a khalh dawn tih ka hriat chuan, "Ka duh lo. Bike chuan" ka ti vat. A thaw hruih a, "Lo kal mai mai teh" tiin min pawt dâwrh. Ka nu ten min rawn hmu pha tawh si lo. Min kai chhuak dat dat. Pawn lam chu a lo vawt ve deuh bawk a, kawrlum ka ha chu ka lawm hle. Vawt hi ka tuar thei hlawl lo. Ani Zirsanga erawh jacket pan angreng tak, a dum simple deuh a ha a, a hnuaiah Tshirt dum, jean kekawr pawl tak zet a ha bawk. 

"Chuang rawh le" a ti nghut a. Min treat dan chu duh lo ru viau mah ila, chutianga hmanhmawhthlak lutuk chu eng nge anih ka hre ve chak bawk si. Ka chuang ta nge nge a. Min accident pui ang tih erawh ka hlau ru hle. Ka tawngtai ru mawlh mawlh. A rui lo chuan ka hria. Kan ving fua a, "Tlan muang vat rawh" ka ti ţhawt a. A tlan muang ve mai. Durtlang lamah min tlanpuiin Sihphir kawng lam kan zawhin ka hria. Ka hlauthawng ţan. 

"Khaw nge kan kal dawn? " ka ti vin thak a. 

"Kan thleng ţêp" a ti sup. 

Kawng zau lai kan thlen chuan kawng sirah a ding a, a piah lawkah chuan thlam aia lian daih si, mahse, dap leh di hmanga sak in a ding a, thawm a ri nuai nuai mai. Mak ka ti tawlh tawlh. Bike pawh a ding tlar tuar mai. Eng emaw tak chu saw inah sawn an ti chiang mai. 

"Engvangin nge hetah hian kan kal? " ka ti chang fak a. 

"Shs, vin vak thin suh. Ka best friend Eddy Birthday a nia. Kan party dawn a, keimaha ka chhuah chuan ka pa te ngaih a tha leh dawn si lo va, chhuanlamah ka hmang che anih kha. Tin, ka bialnu angin ka sawi bawk che" a ti ta mai a! Ben nawk ka va chak tak. Ka phone chu phawrhin ka pa te biak ka tum nghal a, "Ti suh, Kimi, ti miah suh. Zanin chauh chu min khawngaih ve rawh" a rawn ti dam ruih a. Ka phone chu ka hmet tawp leh rih, a tawngki leh tawngkam khan engtin emaw min hneh. 

"I thiante chuan min hre vek alawm. I bialnu anga min sawi kha a ngai lo" ka ti hlak a. 

"Danny a rawn kal ve lo, ani khan a star che a, mase, a zin daih a. Mi dang chuan ka u tak tak i ni lo tih an hre tho" namnul fe hian a ti leh ringawt. 

"I va mawl tak.. Kal teh.. Hetah hian ka lo nghak ang che. " ka ti hlaih hlaih a. 

Ka hnunglam atangin min rawn kuah a, ka phu uih, "Khawngaihin kim, che suh. Tikhan awm tawp rawh. Zanin chauh a ni mai… " a ti sup a. A hmai chu ka samah a phum a, ka lungphu dat dat chu a hriat theih ka ring. Ka ngawi reng. Awmdan tur ka hre lo. 

"Ehe! Zirsang, in va tlai ve.. Rawn lut ula" a rawn ti lang lang a. Ka tal chhuak ta vat. A phun hluk a, eng nge a sawi chu ka hre lo. Eddy chu ka la hre chiang vak lo naa hmuh erawh ka hmu tawh. In chhunga kan luh chuan a kawp te tein an lo thu far mai a. A then chu ka hmuh ngai loh an ni. In chhung chu a zau bakah bungrua a awm vak lo va, hmun awl a tam. A kil lam sirah kan va thu ve a. Zu rim leh ganja rim a nam nasa, ka uak lo chauh. Music an play a, an tho sanh sang a, an lam nghawng nghawng mai. Birthday cake a awm lo va, a aiah whisky leh a sehhmeh sa chu a ni mai. Zu chu a hmei apain an in vek. Mak ka ti hran lo. Kei erawh tui ka tih loh bakah a thatna sawi tur ka hre lo bawk a, ka hnar thei mai. Coke erawh ka in ve. 

"Zirsang, in tam suh aw. Bike i khalh dawn kha" ka ti sek a. A nin hmel khawp mai. Ka hlauthawng vek tawh a tin ni. Dar 10 bawr velah chuan a kawpte te chuan an thu leh far a, a then an chhuak zauh zauh bawk. Ka kawngah a rawn kuah a, "Chhuak ve ang hmiang" a rawn ti sur sur. 

In chhung rim chu ka tih hleihtheih loh vangin ka bu nghat a. Kan chhuak ta nghal. 

"A tlai tawh sia, haw tawh mai ang" tlawn titih hian ka ti a. Nuam tihna reng reng ka nei ve bawk si lo. Tumah hmelhriat tak tak ka nei azeng lah a ni lo. 

"Lawk, Eddy ka va hrilh lawk ange" tih leh kal a rual nghal a. Ka lo lawm hle. Ka pa ten min lo la biak loh danah ka nau nen kan chhuak chu ngaih that lohna an nei lo tih a lang reng mai. Rei vak loah a rawn phei a, "Kal ila" a ti a. Lungawi vak lo hmel a pu deuh. A helmet a khum lai chuan, "Zirsang, kumte chu number mai mai alawm tiraw" kan sir atang hian hmeichhe tleirawl hian a rawn ti lang lang a. Kan hawi phei nghal, a bialpa niawm tak nen an rawn inkai phei a. A bialpa pawh chu a la upat hmel vak loh.,Zirsanga te nen an inrual vel ang. 

"Ni mai e" Zirsanga chuan a lo ti mai a. An sawi awmzia chu a tirah ka bo deuh, mahse, a hnuah kei min sawi chhanna a ni tih ka hrethiam. 

"Tleirawl lamah i tla na vak lo tih a lang reng mai, nang aia upa zawk i kawp ziah danah" Mipa chuan a lo ti ve leh khauh a. A nui hak hak bawk. An rui tih ka hria, mahse, chutia ngeiawm taka ti turin thuneihna an nei lo. 

"I bialnu 10 ai pawn Kimi chanve ka thlang" Zirsanga chuan a ti hmuk. Ka awm a nuam lo ţan. 

"Naaa.. Sarah te chu duh mah la, ka ta chauh a nih hi. In nu nen kha chuan lei leh van ang vel an ni" mipa chuan a ti leh hram. Ka lo ngei ve khawp mai. 

"Huh.. Bruhh.. Sarah easy zia i hria alawm.. Tunah pawh khan ka kai hrang nghal thei ang" Zirsanga chhan dan pawh chu a raw mah mah deuh a ni. Hlauthawng takin ka ding reng ringawt. Mi panga vel hi an rawn kal hnai bawk. 

"Nangni pahnih chu in lo inhnial leh tawh law. Ui leh kel thlunpawlh ang mai, inbauh reng" Hruaia chuan a ti lawng lawng a. 

Sarah bialpa chuan rum fe hian Zirsanga chu a rawn melh a, "Sarah, a sawi chu a dik em? A hruai hrang thei nghal dawn che mi? " a ti pawr huar a. Sarah chuan zam map lo hian, "A teuhin a hnaisai lo nasa lutuk, Zirsanga te ang duh ila, inbual ka ngai nang. Saw nu senior deuh nen sawn an inhmeh tawk chiah" a ti fiak thak a. Ka sa deuh zawk. Mahse, Zirsanga'n min tawng khalh, "Khaih! Sarah, sava duhawmte, ngawih hi i tan chuan a tha zawk ang. Ka duh loh thleng min sawitir suh u. Chuan, Kimi hi nula senior a ni lo, nula chal deuh pawh ni ta tehreng se ka duh tho. Khwvel hmeichhia zawng zawng aiin" a ti dam thlup thlup a….. 

"Eng nge Sarah ngawihna chhan tur chu han sawi teh le.. I puh chhe bawk a, FIR thehluh ka hreh miah lo ania" Mipa bawk khan a rawn ti leh. Kan piaha ding zinga pakhat chuan zawi supin, "Kan FIR-a lah hi a.. Mawl siah, " a lo ti! 

"Ni e eng nge ka ngawih chhan tur? " Sarah chuan rawn kal hnai pahin a ti sak. 

Hruaia bawk khan, "Sarah, ngawi mai mai teh u. Hetah hian intibuai tura kal kan ni lo. Zirsanga hian in pawi eng nge a sawi a? In kher reng le? " a lo ti ve a. Zirsanga nen an inzui nasa bawk a, ani chu kan lam tang tur sa. 

Mipa khan, "Aih, Sarah ngawih chhan tur kha sawi phawt rawh se.. Sarah hi i lo ngaizawng ve thin tih ka hria.. A hnawl che vangin tihian kei thlengin min huat phah a. A dik em? " Tiin Zirsanga chu a rawn melh a. 

A nui hawk! A va pan hnai deuh bawk a. 

"Sawma, kei hian ka haw ngai che maw? Nang zawk hian englai pawn min kherin ka chet chhiatna i chang ran thin zawk alawm. A chhan pawh Sarah virgin killer ka ni tih i hriat thawi vangin. Fiahna i duh maw? Aw ka ning thawkhat tawh. Sawi chhuah kher hi tul ti lo mah ila, in cho bawk a, Kimi thlenga in hmer tel vangin ka sawi ang. Sarah hian englai pawhin min duh thin. Nizan thleng pawn min lo la bia, a chhan chu a sex hmanpui hmasak ber ka nia. Mahse vanduaitjlak takin ani hi ka duh zawng a ni lo tlat! Nangin i lo duh huam huam hi a lawmawm.. Chuan, i khawih hmaa ka lo khawih vang erawh chuan ngaidam ka dil e.. " Zirsanga chuan a ti ve ta sak sak a. 

Thawm chu a reh dûk mai. A hnuah, Sawma a tih chuan Sarah chu a melh a, "Thudik a ni em? " a ti tuar. Sarah chuan Sawma mitah pawh en ngam lo chuan, "Min pawngsual alawm" a ti ta a. 

Kan thaw suau ni berin ka hria. Sawma chuan khur dawt dawt chungin, "I pawngsual vang khan kei aia thiltithei zawkah i lo inngai a ni maw? Zawnga, kuttum hmangin kan sawifel ang, I bialnu kha ka khawihsak ve che i duh loh chuan" a rawn ti ta mai. Dik tak chuan mawl ka ti lo, ka khawngaih zawk. A bialnuin a bum hneh lutuk chu. Ka inrin hmain Sawma chuan ka kut a rawn vuan ta mai a, awm ve dangte chu an lo ê dual. 

"Thlah rawh" A rawn ti vawt raih a. Min thlah duh chuang lo. Min chelh nghet si a, ka thingthla mai thei bik si lo. 

"Sawma, a tawk. Thlah rawh. I zak na nge hetia awm hi? I bialnu hur herh vang lehnghal. Nge i rui sual zawk mawni.. Haw ru.. Sarah, va hruai rawh. Haw nal nal ru" Eddy chuan a rawn ti ve ta thak a. Mahse, Sawma chu Zirsanga'n a rawn dinchilh der tawh. 

"Thiante u, lo inrawlh su.. A cho ang ngeiin kuttum hmangin kan inchingfel ang" a ti ta a. Sawma pawn min thlah nghal. Kei chuan Zirsanga chu ka va chelh vat a, hlauthawng zetin, "Insual suh" ka ti a. 

A nui suk,.. "Min en ngam loh chuan inah sawn lo va awm rawh. Engmah a thleng lo vang" a ti dam thlup a. A inhum sek nghal. Ka en lo thei bik si lo. A thiante lah chuan thelh an tum tawh der lo thung. An han inpawmchilh a, Zirsanga chuan hneh zetin a tham a, a hmaiah a hnek bur. A thal nghal hawl hawl a, a thawh hun a lo nghak. A rawn thawh leh chuan fair takin an inbei leh nghal a, ka hmuh dan chuan boxer ni ve ve ta se, Zirsanga chuan pe dâk deuh reng se chutiang chu a ni. Sawma chuan hneh loh chai chai tak a ni. Mahse, A tluk vawi thumnaah chuan Sarah chuan chemte hi Sawma hmaah thehthlain, "Vit rawh" a ti a. Ka inrin hmain Sarah chu ka va hnaih nghal, eng sawi set set lovin ka va chhuih chawrh a, a ngal a dawm vung vung.. A rawn dak chhuak leh chiah chu a samah kekin leiah hneh zetin ka paih thlu ta a. Zirsanga'n min lo pawm vat. 

"A tawk e, Kim, a tawk.. A tha vek e" a ti sup sup a. Engvanga thinrim ve chiam nge ka nih ka inhrethiam lo. Min en thup lehnghal. 

"Haw ang" ka ti hmuk a. 

Engmah sawi lovin a bike a tinung a, kan tlan haw vang vang. Kalkawngah kam khat mahin kan inbe lo bawk. A mit ko chu a kak ve hlek a, Sawma khan a vai fuh ve a niang. In kan thlenin ka roomah ka kai lut a, an lo mu vek tawh bawk a. Tumah ka vengthawng hran lo. Khumah thuttirin, First aid bawm ka va hai a. Pem damdawi chu hnawihsakin ka bel sak bawk a. A ngawi reng. 

"Tumah sual tawh suh aw" ka ti a. Ka aw chu a khur lek lek. 

"Umm" a ti ringawt. Ka lai lutuk chu ka sa vekin ka hria. A rawn hawi chhuak a, "Ka lawm e aw" a ti sup a. 

"Keimah vangin i insual sia, ka mawhphurhna a nia lawm" ka lo ti ve mai a. 

"Va mu tawh rawh" ka ti zawm zat. A ding a, kan inhmachhawn ran mai. 

"Kimi" a ti thawp sup a. 

"Umm" 

"Min duh ve tiraw? " a ti ta a. Ka melh vak ringwt. 

"Ka hre lo" ka ti ta tawp. 

"Zanina i awmdan atang khan min duh tih ka chiang. Min duh hi i duh lo va, i inlahrang lui mai mai a ni.. Rinpuia hi then ang che" inringtawk zetin a ti ta hmiah hmiah a. 

"I â tawh nih kha. Then ngawt na chhan tur a awm lo.. Chuan ka duh lo che" ka ti chang rât a. A lamah min pawt hnai dâwrh, ka inrin hmain ka bek tawn tawnah a chelh a, min kuai dak, ka hmui chu a rawn fawp ta mai a! Zu rim a nam hiam a, mahse, Ganja a zu ve lo nge a nam miah lo. Min fawp ta mial mial a, ka awmdan ka theihnghilh ta nge, ka hriat loh karin ka lo chhang let ve tlat! Ka hriat chhuah meuh chuan ka tlai tawh. Ka kawng dawmin ka mawng pawh a lo chul fe hman a, kei pawh ka lung a phu rang hle tawh. 

Ka hnungtawlh vat a, "A dik lo" ka ti ţiau a. Min rawn hnaih leh vat, mahse, min fawh a tum tawh lo. Ka mitah tak melh chungin, "Tikhan ka bialnu i ni tawh. Chhungkaw inlaichinna chu theihnghilh rawh. Ka chingfel ang. Ka ta chauh i ni tawh" a ti ta a. Thawchham lek lekin ka lo melh ngawt ngawt… 

(Duhtawk leh mai ang aw.. 😍