Zirsangliana 8

ZIRSANGLIANA… (7)

Ziaktu: Toni Râlte

"Tu nge ka niha tu nge i nih i hria alawm.. Engvanga kha thu kha sawi nge i nih? " ka ti a. Ka aw chu a khur deuh. Min ţhawng ve bawk a ni e. 

Khumah a thu chawt a. "Ka hria asin. Phai atanga i lo hawn hmaa intan daih tawh a ni" a ti zawi raih a. 

"I u ka nih hi, Zirsang" ka ti leh hluai a. 

"Ka hria.. Ka hriat vang alawm ngeiawm tak taka ka chet. Thlah theih che ka duh a, nangin min hua la, ka huatzui ve theih mai che ka lo ring a" a ti leh a. Ngai ka la awh thei lo, ka tha khur nasa lutuk tihreh nan thawk la in ka ding vang vang a. 

"Zanina thil thleng hi tuman kan hre lo. A ngai ang khan awm ang" ka ti hrâwk a. Ka pindanah ka let zui ta nghal a. Mahse, ngaihtuah loh chu harsa tak a ni. Rinpuia lam reng reng ka ngaihtuah thei tawh lo. Engvangin nge ka nuhrawn fapa chuan min lo duh ve ringawt? Chu tak chu mak ka ti a, hriatthiam harsa ka ti a ni. Mahse, a chet tawh dan ngaihtuah chuan min ngaizawng anianga tih rin theihna chu a awm nual bawk si. He thil hian kan chhungkaw boruak thlengin nghawng a nei ang tih ka hlau hle mai. 

A tuka ka dawr kal tur chu kawngka bulah a lo ding a, a tiang rinchhan lo pawn a tei zung zung thei tawh. Chiang zeta min melhin, "Ni e, nizanah khan engmah a thleng lo" a ti sup a. A awah khan lungawi lohna ri tel thanin ka hria. Mahse, ka ngaihtuah zui tur a ni lo. Rinpuia pawh min rawn call zing ngang mai. Ka pick up duh miau loh vangin kawng dang a zawn ngei ka ring. Ka inralring ru ve phan a.. 

Ka rin ang ngeiin lunch ei hun awm velah a rawn lang ta chiah. Kan pahniha sawifel chi a nih vangin ka chhuahpui ta vat a. Lunch chu kan va ei dun. 

"Engmah a awmzia ka hre lo" a ti a. 

"Keiman ka hria alawm" ka lo ti thung. 

"Engvangin nge min rawn then ringawt? A chhan tal ka hre thei ang em? " thutak zet hian a ti a. 

Kei chuan min bum dan zawng zawng chu ka sawi fai ta leng a. Thil pawh ka ei tha meuh lo. Ka sawi zawh chuan a nui hawk a, a nuite chu a lem zo vek hian ka hria. 

"I zeldinna i inhnehtir mah mah a nih chu! Chutianga ka awm lohzia hria la chuan hetia min ti hrep hi i zak maithei. Ka no atanga msg i dawn kha chu ka sawifiah tawh, nimin khan huanah chuan kan kal ngei alawm.. Min lo hmutu chuan min hmuh sual a ni ngei ang. I awih loh chuan ka kalpui ka thianpa pawh i zawt thei ang" a ti ta a. Kei ka lo dang titih. Awih hreh viau mah ila, hmaichhana han inbiak hi chu a fel leh thluam zel si a. A kal dawnah, "Zanah ka lo leng ang, kan inthen lo ania" a ti a. Kei chu ka ngawi reng. Awmdan pawh ka thiam tawh lo ve a. Lehlamah Zirsanga khan kei min hneh theih nan dawt a sawi ve thei tho tih ka hria.. Chuvang chuan keimah ngeiin fiahna chiang kekkawka hmuh ka tum ta a ni. Mahse, Rinpuia laka ka rilru erawh a hma kha pha tawh lo vai vai tak a ni. Inhralh pawh a kal meuh lo, Faki titi kan ngaithla leh a, a hlimawm tho mai. 

Ka hawn hmain ka pain min lo bia a, "Hei Serchhip atangin call ka dawng a, i nu leipui kal a lum a niawm e. Serchhip damdawiinah an dah lut nghal a. Ka rawn hrilh ve hrim hrim che. Va be ve reng reng la" a rawn ti a. Boruak dang bawk maw.. Ka va hne tawh tak em. Mahse, ka nu chu ka nu neihchhun a ni miau si a. Ka pa lakah tiang khawp khan awm tawh mah se; amah lo nu dang ka nei tawh dawn si lo. A pasal te chhung lah an sual bawk si.. Kei talin ka ngaihsak loh chuan tiin ka nu chu ka call ta a. Ka pahrawnin min lo chhang, "Eng a la ang thei lo. A lu a sawh a, hei a lu hliam chu an thui tawh a, a nak a zuk sawh ve kher bawk nen, thawk harsa a tia" a rawn ti ta a. Engtia tih chi nge mawni dawn le.. 

"Aw le, naktukah rawn kal ka tum dawn nia.. A tul anih leh he lamah chhukpui kan tum ang a" ka ti ta ngawt. Ka pa pawn a remti mai chuan ka ring. 

Zanriah kan ei laiin ka sawi chhuak ta a. "A tha alawm.. Mahse, nangmah han chho kher lovin he lamah rawn phur thla zawk se la, heta tangin kan inbuaipui thei zawk ang a" ka pa chuan a ti a. Ka pawmpui hle. 

"Ni e, zaninah te hian rawn chhukpui dan ngaihtuah thei se la, Aizawl hi zawng Aizawl nge nge a nia, Doctor te pawh kan nei tha zawk a.. " ka nu pawh chuan a lo ti ve a. He nu hi mi mak tak zawng a ni ngei e. Jeni erawh a ngui bur reng mai. Ka nu nen kha chen lo inngheng an ni bawk a, nu te an han that loh meuh chuan ensan chu a harsa ve bawk a ni. Chaw ei chhung zawng kan Zirsanga chu a ţawng lo thung. En pawh kan inen lo. Ka melh lo lui ve tlat! 

Chaw eikhamah ka pahrawn chu ka be leh a, an ni lam pawh rawn chhuk tumin ruahmanna an lo siam mek a lo nia! Ka nu chuan eng a ang thei lo a ni ngei ang. Serchhip a hla lem lo bawk a, kan lo hmuah tur thu te sawiin kan inbiakna ka titawp ta a. 

"Mama, kei hna ka hawn sia, nangin i u te i han hruai mai loh chuan," ka pa chuan Zirsanga bulah a ti a. 

"A tha alawm" a lo ti ve mai. Jeni nen ka nute hmuak tur chuan kan insiam a, Thari pawh chuan lo kal ve a tum. A fel thin ania. 

Dar 8 velah kan chhuak a, shawl ka bat hlun mai. Ka nu chu aw eng em em ti lo se ka duh hle mai. Damdawiin kawtah kan nghak ren rawn a, Zirsanga'n, "Tikhan lo nghak ula, in hawn dawnah min lo call mai ru, ka bialnu ka va rim ve ange" tiin min kalsan a. A kal liam tur chu lunghnur ru deuhin ka thlir liam. A mak tawp! Ka lung a awi lo ringawt. Tei ka va thik vang ni pawn ka hre lo. Nge ka lo thik ru reng zawk ka hre thiam lo ve a. 

Ka nute chu dar 10 dawnah an lo thleng a, kawng a chhiat bakah an ding zeuh zeuh ani ngei ang. Casualty-ah kan lut nghal a, min admit ta bawk. Ka pahrawn chu ka hmuh vawikhatna a ni a, pa bumro tak niin ka hria. A inzuah buk angreng si a. Kei chu a u zawk ka ni bawk a, min be chhe lem lo. Jeni nen erawh an la inbe miah lo. Ka nu chuan nikhua a hre zeuh zeuh ringawt. A nâk na vang khan a thawk a sak zel a, oxygen te pawh an vuahsak nghal a. Tlem chuan a nuam deuh ang. Tlaivar ringawtin awmzia nei hek lo, a pasal farnu leh a pasal chiah a chhungte lam atangin an lo kal si a, an hah ve awm bawk si. 

"Zanin chu tihian ka riahpui mai ang. Chhun lamah in awmpui ang a" ka ti a. Jeni te pawh Zirsanga ka biaksak a, a rawn lam a, mutbu vel kan kensak sa avangin kei erawh ka awm tlang ta nghal. Kumin zet chu damdawiinah ka riak ngun ta hle mai. Ka nu pasal te chu an chhungte inah an innghat a, a tir khan ka nu a rawn harh khan min hre mai lo. Thangkhat lian zet kan inhmu tawh lo a ni bawk a, jeni'n ka u a nih hi a tih takah khan min hre chauh. Kei tak pawn ka hai thelh, ka hriat theih hnuhnung berah kha chuan nu thau lam, ngo veh vuah, hmel tha tak kha a ni a. Tunah erawh a dam loh chu thuhran, a hma a pha tawh lo tih hriat takin a fip tawp. A thu bawk si. Ka nu a ni bawk a, a hmaa ka lo ngei rukna te kha a kiam duak mai. 

Zanah pawh harsatna tawk em em lovin kan muhil thei ta hram a. A tuka Doctorin ward a fan hmain ka pahrawnin min rawn chhawk ta a. A inpe zo ve reng mai. Kei chuan pawisa tlem a zawng hnutchhiahin ka hawnsan leh rih phawt. Zanin chu Jeni pawh a riak ve thei tawh ang chu.. Dawr kal hram ka duh vangin ka thlen veleh ka inbual nghal a, chaw pawh tihtham ka ei lo.

Nileng deuhthawin Rinpuia nen kan intext, kan boruak chuan a hma pha tawh lo mah se; a pangngai ti mai ang. Status ka en lawr dan dan a, Zirsanga statusah ka tawp chat. "Rem ngai lo tur ai chuan, rem thlap tur hi a tha mai" tih dawtah Tei nen nizan vela an thlalak a nih hmel, an nuih dunna hi a rawn dah tel a. Engtin emawni ka awm! Ka sawi thiam lo. Ka ni dûk mai. Ka tuai liam ta vat a. Ni e, ani leh kei chu unau kan ni tlat! 

Ka nu pawn hma a sawn hlek tih thu ka hria a. Ka lawm angreng. Zanah Jeni chuan riahpui a tum ta chiah a, Zirsanga'n a han thlah. Rinpuia pawh a rawn lang ve leh hlawl. Ka pa nen an titi dun a, Zirsanga a rawn haw a, Rinpuia a hmuh rual chuan a ner sak. Ka hmu reng sia! Kan bulah a rawn thu leh reng dawn emaw ka tih laiin a roomah a tawm ta ngat ngat a. Ka pa te mut hnuah Rinpuia chuan, "I nau chuan a veng peih tawh lo che ni maw" a ti fiamthu nghe nghe. Ka nui ve tawp. Ka rilru erawh nawm loh rukna a awm. Rilru bet vak lovin kan inkawm a, a haw har phian. Zan hmasa kan menrei deuh vangin ka mut a chhuak lek lek.. Min kheuh neuh neuh reng a, eng emaw a tum ve ni.. 

"Ka va haw dawn tawh ange" a ti ta hram. Ka lo thaw huai mai. A hawn hmain sofaah chuan min kuah betin min fawp ta nawk nawk a, ka lo inring meuh si lo. Mahse, tha tak chuan ka lo chhang let ve a. Khuh kharh thawm kan hriat rualin kan inthlah hmak. Choka leh sitting room inkarah Zirsanga a lo ding reng mai. Bottle a keng bawk a, kan va en phei takah chuan, "Hei ka rawn la a. Engmah ka hmu lo" a ti nghut a. Rinpuia chu a nui a, kei erawh ka nui lo. 

Rinpuia ka thlah a, in chhung ka luh rual chuan, "Lo kal lo ila chuan, in mudun hrim hrim ang" a lo ti sup a. Ka ding chawt. 

"Thawm rawn neih hmasak kha a har em ni? Chuan i rin anga easy ka ni lo ania" ka ti khur dat a. Zirsanga ber kherin kan infawp lai a hmu chu nuam ka ti hlawl lo. 

"Stepa ka pen ri pawh hre lo khawpin nuam i ti tihna a ni mai" a lo ti leh hmiah. 

"Min enthla zawk anih kha" ka lo ti vat a. Stepah ka chho nghal. Min rawn umzui a, ka banah chelhin, "A ho em mai. Inti pawh ni ula, ka tan awmzia a nei lo. Ka farnu tak tak i ni lo bawk a" a ti chang fak a. Ka chhang tawh lo. Ka thin a rim em em ringawt. A farnu tak tak ka ni lo tih hi vawi engzat nge maw sawi a tum ni… 

Ka nu chu an x-ray a, a nâk ruh a lo pelh a lo nia! A tuar a chhel khawp mai. Mahse, a dam leh vat em ang chu maw.. Dawrah kal lovin Jeni nen kan va awmpui a, ani pawh thu mu chungin a tho harh ve peih a. Kan titi ve luam mai. Mahse, zep thu a cheng lo, kha chen kan inhmuh tawh loh bakah kan innufana chu a dal riaua hriatna ka nei thin. Mahse, that chhuah hram hram erawh ka tum. Ka nuhrawn a fakawm leh hle. Ka nu kan nan tiin pawisa a rawn thehchhuak reng a, ka pa pawn sawiselna a nei lo. Chungte chu ka nu bulah pawh ka sawi ve a. 

"Ee.. Nu tha tak in nei anih chu.. In nu ve hi zawng ka laktlak loh em a nih hi" a ti ve thliam mai. Mahse, Jeni bulah, "I u rilru pawh an hneh vek tawh anih hi.. Nang pawn engtikah emaw chuan min theihngjhilh ang" a lo ti tho. Ka hriatthiampui tho mai. 

Sunday chawhnu ka nu kan han tlawh kan haw chu Thari chiah a lo awm a. Jeni chu a thiante nen an lo leng chhuak ve a lo nia. A pawi lo. 

"U Zirsanga te an awm ania.. Roomah" a ti sar sar a. Rinpuia'n min zui haw vangin thingpui ka va lum nghal. Reivak loah an rawn lang ve nghal a. Tei nen bawk a ni. He nu hi a fel hmel nen, ti nge a bialpa roomah a len luh fo ni? Tih rilru ka pu. A hma chuan tiang rilru ka pu ngai miah si lo va. Thingpui ka siam kep ve pah a, "Innei tawh mai ru.. Ka nupui neihna tur in dal? " Zirsanga chuan a ti lung lung a. Kan pahnih inkar hre ve miah lote chuan an lo nuihpui hawk hawk. Kei erawh ka lungphu a rang sawt. A hma ang chiah khan lungawi lohnain min tuam. 

"Nakkum lam kan tinzawn alawm.. Lo ngjak hram hram rawh" Rinpuia chuan a lo ti ve vat a. 

"Tihdan ka hria, a rualin innei mai ang u" Uang zetin Zirsanga'n a rawn ti leh. Ka va melh râw a. 

"Tak taka innei vat ru.. Inzui reng chu a tha lo" a ti leh hnuhnawh a. Rinpuia te nen an titi ho va, an sirah ngawi rengin ka thu ve hle hle. An titi mawlh mawlh chung chuan Tei chuan a thingpui a in tur chu a pial palh nge? Ka kekawr khupah tak a rawn thlauh ta a. A so hlim deuhthaw kha a ni si, ka tho vat a, ani a rak hlut bawk. Englaiin nge a chet hman ka hre lo, Tei biang chu a ri thlawp! Makti zeta ka va hawi phei chuan, Zirsanga chuan hmai sen vek hian, "Fimkhur ta che. I tih kan kha" a ti tuar a. Keimah vangin a bialnu kut a thlak a maw? Chu pawh a tihluih a la ni lo zui! Mawla hi a. 

Ka va intifai ta vat a. Bathroom kawngka bulah a lo ding a, "A kang hman em? Khawi maw" a lo ti vut a. 

"I mawl ami? A tha vek" ka lo ti hlar. 

Tei tum bâr chu hmuh hrehawm ka ti takzet. Rinpuia pawh rei awm lovin a haw ta nghal a. Tei chu a hawn dawnah, "Hrethiam rawh aw. A hlauhthawn vang a nih kha.. Thinrim. Lo hram rawh" ka ti mial mial a. 

Nui chung hian, "Ka hrethiam alawm.. " a ti tak naa, a lungawi lohzia ka hmu thiam vek si. A hawn rualin Zirsanga chu roomah ka kai chho va, Thari mitmei pawh ka veng zo tawh lo. 

"Mawla, enhvangin nge i ben kher a? I kut a va ram ve. I lo va rapthlak ve" ka ti nghal tâwn tâwn mai. A hamhaih deuh nge a ngawi reng a. 

"Tun hnuah vawikhatmah keimah vangin kut thlak tawh suh ang che. I hria em? " ka ti leh a. 

"Aw ka lo hre tawh ang. I nat ka hlau em a ni. " a ti hniam raih a. Ngawi rengin a pindan lamah a lut ta daih. Khumah ka thu hnawk a, he pa hian boruak eng emaw zawng a la rawn siam leh dawn khawp tiin ka ngaihtuah a… 

(Tawk aw. Ka venflon vuahna hi a tang lo thei si lo va. A kham tawh lutuk 😊😍