Zirsangliana 6

ZIRSANGLIANA.. (Part- 6)

Ziaktu : Toni Râlte

Dawra kal loh mai tur em ni dawn le ka ti ut ut hman. Nimin ai mahin ka mood a chhe zual ta si a. Rinpuia chu ka call law law zawk dawn em ni ang tih ka ngaihtuah bawk. Ka ngaihtuahna a tawi tûk mai. Rinpuia hian min fiam nge a thawhpui te an rawn uang zawk ni ang tih te thlengin a ni ka ngaihtuah. Chaw pawh ka ei tui nek lo ve. Ka lan dan chu a lo nelawm vak lo nge ka chaw ei kham chu Zirsanga chuan, "Khatiang hmel nen chuan dawrah kal suh. An hlau ang che" a lo ti nghut a. Ka nui ringawt. Min lo en chìk viau pawh a ni maithei. 

Ka insiam a, thil dang ngaihtuah hram hram ka tum. Rinpuia biak chu tlwmah ka la ve deuh bawk si, a va hrehawm tak. Ka hmai ka chei laiin a rawn dak zuai a, "Thil dik lo a thleng mi? " a ti a. 

"Thleng lo ve. A tha vek" ka ti liam puat. Ani kher kher hi chu hrilh ka duh lo. Min hmusit ang tih ka hlau. Kha thil kha thudik ni ta se, luahlan mai mai theih ka ni chu ngeiawm takin nakinah min la sawi khum ang tih ka hlau a ni. 

"Ţap mai tur hmel i pu reng a" a ti leh hram a. 

"Mut ka kham loh vang a niang" ka ti ringawt. Ka inchei zo va, bag ka la a, ka chhuak ta nghal. A ding ve reng sia, nuam ka tih loh vangin, "Lo dam rawh aw.. Bye" ka tih ve hram kha. Min en vung vung ringawt. 

Faki a titi leh char char a. Ani hi awm lo se chuan kan khua a har thei ngawt ang. A lo awm atang chiah khan Asawmi nen kan titi hluai khâtzia ka hriat phah. Asawmi hi mi ti zawk zawk lo, nu zêm chi a lo ni ve bawk si. Mahse, vawiin zet chu ka nui hleithei lo a ni ber. Hmeichhia na na na chuan ka awmdan hai hek lo, "Ti nge i mood a va off ve" an ti ta ngei a. 

"Chutia mi? Nizan ka mu tha lo lutuk a, chuvang vel chu" ka lo ti ve mai a. Ka nui lui bawk. 

Faki chuan, "In pa nen in intithiam lo chiang.. A hriat vek alawm" a la ti zui! 

"Awiii.. Awiawm loh ee.. Vawiinah an lo haw dawn lehnghal" min rinhlelh ka hlauh luatah ka la ti duah zui. 

"An lo haw tur i helhhawlh lutuk vang a nih chu" a ti leh a. Kan nui ta dar dar. Kei pawh chutia langsar khawp khawpa ka ngui chu ka inthiam lo. Inthunun ka tum chho va, lunch kan ei zawh atang phei chuan ka tawng char char tawh zawk. Ka phai awm lai te ka sawi kai a, ka lung a leng thar hle. Khang ka Zirpuite ho nen khan kan inhmu leh ta mang lo. Aizawl khua an awm mang lo va, biak erawh kan la inbe zeuh zeuh hlawm. A then chuan hna te pawh an nei tawh a, keimah anga dawr siam te pawh an awm ve tawh. 

Ka phone a ri.. Number hlang ringawt a nia. "Ù, keimah.. Hei ka lo thleng tawh asin. Inah i awm em? " Jeni'n a rawn ti hlawl mai. Karei! Ka va theihnghilh chiang em. A lo chhuk dawn tih kha ka hre tawh lo hrim hrim. Amah pawn min lo be bik bawk si lo nen.. Ka va nikhua lo mai mai tak. 

"Aw.. Dawrah ka awm a, ka lo hruai ang che. Tunah khaw nge i awm? "Ka ti sawk sawk a. 

"Counterah, ka phone kha a bo daih a, nizanah mi phone ka lo hmang tawp alawm" a rawn ti zui. Chuvang a nih chu min rawn biak loh. Ka va lainat reuh e aw. Asawmi te bulah thil awmzia ka sawi a, ka nau hruai tur chuan ka chhuak ta nghal a. Counterah chuan a lo thu ran mai. Thawmhnaw a nei mang lo nge bag te fel rin ren pakhat chiah a nei. In kan thleng a, a hawi ve nasa ngang mai. An chhuah atang khan a la hmu leh ta miah lo kha a nia. 

"Awii a van mawi em em" a ti a ti ringawt. A vun nalh tak ni thin kha a thu that a, a cher kuam mai bawk si. A hrisel loh chu thuhran, a rilru a chawl ngai meuh lo a niang e. Hetah a awm ang a, a thau leh sawt sawt turah ngai ang. Ka nuin min lo dawngsawng vat a. "Mate, hei ka nu aw" ka ti a. An inchibai lai chuan, kan Jeni pek chuan, "Engtin nge pa hi i duh zawk? I hmel tha sia" a ti ta pek! Ani hi chu a tet lai pawh khan ri phawng phawng chi kha a ni ve hrim hrim. Ka nu pawh a nui ringawt. Zirsanga erawh a roomah a awm a nih hmel. In chungah room ruak a awm tawh si lo va, "Ka room min ţawm ve mai la" ka tih lahin a duh bik si lo, mikhual room atana kan tih chu a luah dawn a ni. Ama puala room neih kha a chak ve hrim hrim a ni mahna. 

A han insingsa fel a, thawmhnaw a ngah lem loh vangin Almiraah pawh a thawl hle. Awm hmun thawmhnaw pawh a ngah chuang lo. Engmah an leisak ngai lo mawni dawn le.. Naktukah bazarpui a ngai dawn anih hi. A inbual fai zawh meuh chuan ka pa pawh a lo haw ta a. Asawmi'n chabi min rawn pe bawk. Mahse, naktukah chhuah tho ka tum avangin kawl rih mai turin ka hrilh ta zawk a. Kan Zirsanga a la rawn tho chhuak hlek lo. Ka nau nen inhmelhriattir ve te pawh ka duh a nia. Zanriah ei dawnah chuan a rawn thawh ve luau kha. Ka pa leh ka nau chu an la inbe rih a, chumi chhungin chaw ei kan lo siam. 

Ka pa te pawh an rawn chhuak ve ta a. Jeni chuan Zirsanga a rawn hmu thut chu a ding det. A lai ve deuh a nih ka ring. Keiin ka lo hrilh lawk bik lo nen. "Zirsanga a nih hi.. I u " tiin ka hrilh a. An inchibai ve hnâp kha. Jeni chu ka bulah a thu a. Ka pain tawngtaina tawite a hman hnuin kan bar nghal. 

"I phone chu engtin nge i tihbo" ka ti a. 

"A mak tawp. Nizan khan ka thawmhnaw kan va la a, putea fapa ka sawm ve a. Ka thawmhnaw vel ka lak khwwm chhung khan thutthleng banah ka dah mai a. Kan hawn dawn khan a lo awm ta miah lo va, kan zawng nasa lutuk. Ka nuin, "Nichina rawn lut te khan an la mawni le" a tia, kan call lahin a inswitch off hmak tawkh bawk sia. Ka uizia chu a" a ti mial mial a. 

"Phone mak tak a nih chu. Amahin a kal thei aniang" Zirsanga'n a lo ti. Ka va melh kâwk a. Ngeiawm thei lutuk. 

"Kan lei dawn nia, mahse, hei tun thla hi side a awm thei vak dawn lo va.. Manto pui pui chu ngen lo la" ka pa chuan a lo ti a. Jeni lawm lutuk chu a nui hawk mai. Ka lawmpui khawp mai. Ka nu pawn a be siam siam reng a, an innel nghal viau. Thari nen pawh chaw eikhamah dawrah an kal dun nghal. A tha dawn viau e. 

"I phone a rik chu.. Ti nge roomah i dah ziah a? " Zirsanga'n ka hmun phiah lai chuan a lo ti nghek a. 

"Ka laklawh, ka call back mai ang" ka lo ti ve mai. 

"Pa, kei pawh karleh atang chuan class kal ka duh aw. Motor ka ken theih chuan a harsa chuang lo. Min zirsan tam tawh em mai" Zirsanga bawk chuan a ti leh a. 

"Dam tha lo chung chungte hian i lo tum ţâlh te hi a nia nge. Khutah i zuk mualpho ange" Ka pa chuan a ti dam thlup. 

"Mualpho lovang, thiante an awm alawm. Ka ning hrim hrim, tawm reng hi. Chhunah in chhuak vek zel bawk si" naupangchhia zet hian a ti a. 

"Ni ve reng mai. Tun hnuah chuan fimkhur tawh ang che. Aa.. Bike saw chu khalh tawh lo hrim hrim rih teh" ka pa bawk chuan a ti leh chuar chuar a. Zirsanga ner nâwng chu ka va hmu reng, bike a lawm si a, khalh tura awm reng, khalh theih loh chu hrehawm a ti ngawt ang. A bike pawh a chhiat tirh kha chuan ka pa khan siamtir tawh lo law law mai ang a ti hman a. Mahse, amah hian han teivah hi a ching si a, chhuahna apianga motor ken ziah chu a buaithlakna a awm ang tiin bike chhia chu tlawmtein workshop-ah a hralh a, bullet a la ta a. Zirsanga duh ber chi a la ni zui! A thiante sawi ka hriat ania. 

Roomah ka chho va, ka phone chu ka en vat. Rinpuia misscall 6 a lo awm! An thleng tawh ani maithei. Ka call back ve ta nge nge a. 

"Aw phone i va la thei lo ve" engmah tisual lo ang takin a rawn ti thluam a. 

"In hnuaiah ka awm daih a" ka ti ringawt. Sawi zel tur ka hria, mahse, ka sawi hreh. 

"Dar 4 velah khan kan lo thleng a, chaw kan eikham chiah. Kan buai deuh vangin ka rawn hrilh ta lo law law che anih kha.. Zanin chu ka chau ve deuh sia, ka lo leng phei lo mai ang" a ti a. 

"Aw nia" ka ti leh tawp. 

"Ti nge hmuk hmuk a? " a rawn ti ta chiah a. Sawi vek law law ka duh ta a. Ka msg dawn te chu ka sawi ta mial mial a. A lo chek tlak tlak.. 

"Lalhmingsangi a nih ngei dawn chu, nizan khan zep loh chuan zu kan in ve a. Ka kai deuh angreng a. Ka phone a hmang a, kan chanchin a hre vek tawh hrim hrim a. A rawn uang aniang. Ka phoneah chuan a rawn thawnna che engmah a awm lo" a rawn ti ta a. Ka chhing vang vang, awih tur leh awih loh tur ka hre thiam lo. 

"A va mawl ve" ka ti hmiah a. A lo ni tak tak anih chuan mawl ka ti. Mi nilengin kan awm a nawm loh phah a. Ani zurui mai maiin uan nana min hmang chu ka duh hlek lo. 

"Uang reng chi hi a ni ve a, ka l hau dawn nia, a mawl tak tak a ni" a rawn ti ve mai a. 

"A thuhrimin, in zin atang khan i danglam alawm. Min rawn be khat bawk si.. Eng emaw chu a awm aniang" ka ti leh hram a. Ka sawi dik lo hran lo. 

"Awihawm loh ee, nia ka rawn be khat che tih chu ka hre tho va, mahse, ka buai ve em a ni. Ka chhungte takngial pawh ka be ngai lo. Kan chawl lo a ni ber" a rawn ti ngial a. Ka lung a awi tawh loh sa vangin chuti mai chuan ka lungawi ngawt thei lo. 

"Aw nia, a tha alawm.. Dah rawh.. Hei ka buai dawn a. " ka ti ta a. 

"I thinrim chuan ka dah lo vang" a ti leh tlat. 

"A rim lo" ka ti tak naa a rim! 

"Aw anih chuan, kei pawh ka mu hma ang, ka thianpa a lo leng dawn a. Anih kan dah ang e.. Bye aw..mut dawnah ka lo hrilh ang che" a ti a. Kan inbiakna kan titawp. Ka ding reng a, ka rilru a insual nasa viau. Rinpuia aia hmel tha hi ka hmu ve reng, mahse, Rinpuia hi fel ka tih bakah a hna te hi ka ngaihsanna lam a nia. Chhungkaw pangngai tak an ni bawk. Tin, min hrethiamin min dawhthei a, ka mamawh chu min tihsak zel pawh a tum thin. Chungte vang chuan ka lo ngaina ve em em tawh a. Ka hmangaih em tih erawh ka hre lo. Kan la inzui rei bawk si lo nen.. Han inthen leh tawp pawh chu a mumal loh thlak ka tia.. Chhungte pawh an zahawm dawnin ka hria. 

Jeni rawn awm ta chu kan hlimpui hle. A pahrawn sualzia a sawi chang phei chuan fiamthu a thawh a ni ringawt. Chutiang pa sual thiam leh ngeiawm a hrawn reng peih chu a fakawm rualin ka lainat thin. Ka pa pawn a tette atanga a lo duat ve tho tawh anih vangin leh amah Jeni'n a zir reuh em a, a duat leh ta viau mai. Phone pawh a awh ber chi a leisak a, keiin a thawmhnaw thenkhat man ka tumsak bawk. Kum a laklawh rih avangin kumin chu a tal ve naw naw ang a, nakkum lamah zirna te pawh a tan chho ve ang chu. Zirsanga nen erawh an innel tak tak thei lo aniang, an inbe khat khawp mai. Jeni chuan, "A sual hmel sia, ka hlau" tiin ka bulah a sawi. Zirsanga erawh Jeni chungchang min sawipui ngai lo. Ani pawh a sawi tawh ang khan class a kal leh tawh a. Lehkha thiam tak niin an sawi a, a pass ve leh thei mai ang chu maw.. Rinpuia nen pawh kan boruak chuan a hma pha rih lo mah se; kan la inzui ve zel e. 

Nikhat ka dawrah Eli te thianho an lo lut hlawl mai. Ka lo lai lek lek! 

"Print kan duh a" tiin a hriat ngai loh ang deuhin pendrive min pe a. Ka lo print sak a. An thianho chu pathum niin a rualpui te vek an nih hmel. An titi nasa mai a. Tu emaw chanchin an sawi niin ka hria. Ngaihven loh hram ka tum. Faki thingpui va la rawn kir leh chu a inchhuih palh a, Eli kekawrah tak thingpui chu a baw ta a! Buaina a intan leh ta. 

"Awii ka tihpalh lutuk.. A va zia lo tak" Faki chuan a ti nghal chul a. 

"I va mawl ve a. Hmeli". Pawr zeta tih pahin a ding hluai a. A thinrimthlak ve viau ang. Mahse, tihluih ni hek lo le.. 

Bathroom ka kawhhmuh a, "Va tihuh vat rawh. A val hmain" ka ti a. A lut ve mai. A thiannu sam tawi chuan, rum zeta Faki melhin, "Tun hnuah chuan fimkhur tawh ang che. I hmel en renh reng khan i mawl tih a hriat' a ti ta kher a. Faki chu a inthiam loh em vangin a ngawi reng. Inrawlh ka hreh deuh si, "A lo fimkhur tawh dawn nia, ngaidam rawh u" ka ti a. Ka aw erawh a chang lek lek. Eli chu a rawn chhuak a, a kekawr chu a dum ani bawk a, chuti lutukin a lang hran lo. 

Faki melh chung chuan, "Ţhing reuh lutuk mai. Dawra inhlawhfa awm reng pawh i ni.. Hmelchhe ropui si" a ti hlawih hlawih a. An ankhum nasa tawk tawhin ka hria, ka dawra thawk a nih angin thupha ka chawisak tawh a, a thlavang pawh ka hauhsak ve turah ka ngai. 

"Duhtawk tawh rawh u. A inthiam loh em kha, a tihluih a ni bik hleinem" ka ti a. Eli chuan min rawn en vat. "I tihtir a ni lo maw? Min huat vangin" a rawn ti khanglang. 

"I â anih chu" ka lo ti hmuk. 

"Nangmah vangin i nau nen pawh kan inthen phah a nia. Mi tha hi chu i ni lo hrim hrim. Rilru chhe ropui si" a ti leh a. Ka kham viau mai. 

"Kha.. Hei ka zo. Tikhan la u la, kal vang vang ru. Pawisa pawh a ngai lo. Ka lo tanpui ang che u. In hmel atang khan thawhchhuah nei hmel in pu mang si lo va" ngeiawm zet hian ka ti ve a. Eli chuan lehkha rawn lak pah chuan, "I damchhunga i neih zawh loh tur hi kei chuan ni khatah ka nei thei ang. I awm chhung chuan mo pawh in nei thei lo vang. I sual em mai" a ti ve leh a. Ka lo nui lui sak, "Mo kan neih hunah chuan nangmah aang an ni dawn lo va, an awm thei ang. Ka duat ngawt ang" ka ti ve leh sak. 

Pawisa min pek a tum chuan ka lo hnar a, "i pawisa kan mamawh lo ve" ka ti hmak. Ka duhnaah hi chuan ka sual thiam ve reng. Mahse, buaina cho chhuaktu zawk nih erawh ka duh ngai lo.. 

"I dawr te takte tanpui nan" tiin cheng 200 tlang hi ka dawhkanah a nem bei a, an kal nghal nal nal. Ka thin thawk a chhuak thut, pawisa chu lain, ka va umzui a. 

A kutah hmehbelin, "Kutdawh hnenah min lo peksak dawn nia" ka ti a. Ka kal ve nghal nal nal. Kan chet dan chu a naupangchhia viauin ka hria. Ka thin erawh a rim er teh thung. 

Asawmi leh Faki pawh chuan an ei lohzia bak sawi tur an hre lo. Zirsanga nen an inzui tawh tih chu an hria a, a rawn chenchilh vel tak erawh an hre lo. Ka sawi duh ta bik lo bawk. A kamtam thlak mai mai. In ka thlen chuan Jeni chauh a lo awm a. 

" pa te chu apatea te an lo hawng sia, an va kal ve a. Chaw pawh an ei nghal ang" a lo ti vat a. Patea nupui hi a kal thlak ngai a ni a, thla nga dawn Vellore-ah an zuk awm a, a fapain a kal chu a pe thei a. Mahse, amah pui kha a BP a lo sang ve deuh a, bakah Nuteii pawh a la fit tawk loh vangin an inenkawl leh phawt a ni. Kar hnih kalta khan an inpe thei ta hram a. Vawiinah an rawn hawng a niawm e. Ka pa te hi ka patea nen an ni tlawng a, nì pawh kan nei lo. Chuvang chuan an inhmangaihin engkimah an indawmkang khawp mai. 

"Zirsanga a lo haw haw lo mi? " ka ti a. 

Zawitê hian, "A bialnu nen roomah an awm a" a ti a. Thari a lo nui var var bawk. A lerh sia kan naua lah hi. Keipawh intifai turin roomah ka chho ta a. Zirsanga room atanga hmeichhe nui har har chu ka hre thei. An hlim awm hle mai. Ka inbual a, ka inthlak fel hnuah pui turin ka zu chhuk ve a. Ka chhuk hnu rei vak loah an rawn chhuk ve a, "Tei hian chaw a ei dawn aw.. Lo chhum kep ru" a ti a. Tei chu nula lian tak, khal zet a ni a. Zirsanga aiin a upa maithei. A hmel pawh a chhe lo, a pian nalhna chuan a chawi hle bawkin ka hria. 

"A zak lo e, ei rawh a ti ve ringawt.. A zahthlak" a lo ti vat a. A aw chu a puam nalh hle. Kei chuan intinelawm takin, "Ei ve rawh. Ka nute an ei chhuak dawn sia, kan tlem dawn em mai. " ka lo ti ve vat a. 

"Anih chuan ka nute kan hrilh ve ange" tiin a phone a phawrh nghal a, bathlar thlang lamah phone chu a chhuahpui nghal. 

"A chhe lo em? A fel ania aw. Zirtirtu ngat a nih kha" Zirsanga chuan a ti sur sur a. 

"Nia, eli ai thlawt chuan fel pawh a fel hmel zawk" ka lo ti hmanhmawh. A nui ruh ruh a, "Eli hi chu i tei thei lo ve ngawt mai tiraw" a ti a. Ka lo nui ve ringawt. 

Anni pawh chu an thu ta reng a. Tei chuan ka maian bai tur chu, "Khawi ka lo bai ang, maian na nâ na hi chu ka thiam ve tawp" tiin a rawn la a. 

"Aiwi bai tak teh, ka bai khawng vek zel a. Thari lah hian a bai duk vek zel bawk si, kan tlaw tawp" ka lo ti ve hlut a. Ka mil zawng tak a ni dawn mai. Zak thei lo ni si lovin a zak lo thiam riau a, a polite bawk si. 

"E taka Rinpuia nen kan inhmu a, vawiinah" Zirsanga'n a rawn ti hluai! 

"Khawiah" ka lo ti ve mai a. 

"Vanapa Hall kawtah sawn, a nula hruai lah khan a nek nasa khawp mai" min tiel lek lek hian a ti a. 

"A thawhpui aniang" ka lo ti ringawt. Ani pawn a sawi zawm tawh lem lo. Rinpuia hi ka ring bur thei tawh lo naa han then tawp kha ka la ui niin ka hria. Vawiin pawh min bum tih ka hria. Zingah khan, "Vawiin chu ka pu te huanah kan kal dawn a. Chawlh ka la bawk a, ka zuk pui ve ang e" a ti kha a nia! A huan kalna chu a hnai awm hle mai. 

Chaw ei kan peih a, ril a tam tawh bawk nen, kan siam zui nghal. Jeni a che chhe lehpek, a bawngsa suah chu a sa deuh nge dawhkan a thlenpui hmain a thlauh a, chhuatah a darh vek. 

"Mo thar che chhia ang deuh a ni maw? Zirsanga'n a lo ti suk a. 

Kan han tifai leh rih. A inthlahrun hmel kher mai. Chaw pawh a ei puar ngam ta lovin ka hria.. Ka khawngaih reuh. Tei nen chuan kan titi char char, Schoolah a thawk a, Bawngkawnah an awm. A kham dawn chuan, "Riak mai la" Zirsanga'n a lo ti zauh. A hawi let ha a, "Ziawm teh" a ti hmak. Zirsanga ke ka va tlawh a, mitmeiin ka khap. A â thin roh lutuk a. Mi dang ang turah a ngai a niang. 

Tei chu a va thlah a, a rawn let chuan ka nute pawh an lo haw tawh. Jeni nen hian an inngaina zual a, la chengdun rei lo viau e ti lo chuan an innek deuh reng mai. Kei ka lo lawm thung. Rinpuia'n min lo bia a, kan inbe rei lo. 

"In huan kal chu i chau em? " ka ti a. 

"Umm chau ve reng. Chuvang ania ka lo len loh.. Ka rawl thum mai" a ti a! 

"Dar engzatah nge in lo hawn? " ka ti leh a. 

"Hei kan thleng ve deuh chiah" a la ti zui! Ka uak lo chauh. A va dawthei kher em.. Nge Zirsanga hian a hmuhsual ve zawk nge mawni dawn ni.. Ka be tui nek tawh lo. Roomah ka chho a, Zirsanga roomah ka lut kawi zuai. 

"Vawiin khan Rinpuia te chu i hmu tak tak ami? " ka ti a. A headphone chu la thlain, "Min va ringhlel awm ve" a ti duh lek a. 

"Chutiang lam a ni lo.. Ka zawt mai mai che" ka ti a. 

"Hmu e.. Rinpuia hian phirpui a nei anih loh chuan amah ngei a ni. A tawk em? " lungawi hmel vak loh hian a ti a. 

"Nge i thinrim ringawt a. " ka lo ti. 

"Min ring lo anih kha.. Ih maw, I bialpa saw mi rinawm lo anih saw.. Hrilh che ka duh thin a, i nat ka hlauh vangin ka sawi duh ta lo mai a ni. Ka chhui vek tawh.. Tunah pawh a kawp che" a ti ta hmiah hmiah a. Ka hrilhhai kher mai. 

"I chhui a maw? Tuin nge chhui rawh che ti a" ka lo ti nghek. 

"Tuman.. Mahse, ka chhui duh a ni mai. A chhan chu ka.. " a ti a. A tawp daih. 

"Eng nge a chhan" ka ti nawn leh kher. Min melh nghek pahin, "Ka farnu i nia" a ti ringawt a. 

"Engpawhnise.. Keipawn Rinpuia chu ka hre chhuak tawh alawm.. Ka then ang" ka ti chhum hmak a. 

"Kha chu i thu thu aw.. Mahse.. I nat ka duh lo va" a ti a. 

"Ka tha ang". Ka ti a, ka kal nghal. Ka lungphu chu a rang viau. Rinpuia mai mai chu.. Tenawm lutuk. 

Whatsappah chuan msg ka thawn ta a. "Ka hre chhuak vek tawh che. I landan ang i lo ni lo nasa tih ka hre twh. Tun atangin kan inkar a tawp aw" tih thu hi. A seen rih lo. 

Phone chu ka dah a. Tum burin ka mu. Ka phone msg tone a lo ri tlawng a, amah anih ringin ka en vat. Mahse, kha number kha a lo ni. 

"Tunah i single ta bawk a; neih tum chein ka theihtawp ka chhuah tawh ang.. Ka tiam a che" tih hi. Ka phone ka paih lo chauh! Ka lungphu chu a hma aia rangin a rawn phu dup dup. Ka tho va, ka mutkawr nen ka room ka chhuahsan. 

"Lo hawng vat teh" tiin kawngka ka chum a. A rawn hawn rual rual chuan, "Hmela, eng mihring nge i nih? I chhaih kual theih tur i uite ka ni lo. Engvangin nge min chhaih kual reng a" ka ti nghal tâwn tâwn. Amah bakin ka single tih tuman an la hre lo. 

Zawi muangin, "Ka fiam lo che ka chhaih lo bawk che. " a ti thawp sup a. 

"Anih eng vang nge? Mawh.. Engvang nge" tiin a kawr awm ka va tham sak a. Ka kut pahnih chu nghet zeta vuan chungin hnai takah min rawn melh a, "A chhan chu ka u i ni lo alawm… Kimi, ka u i ni lo. " a ti hrâwk. 

"I u tak tak ka nih loh vang chuan tianga min hmusita min elsen theihna i nei lo" ka ti a. Ka hnuk a ulh tlat lehnghal. 

"Ka û tak tak ni la, khatiang khan ka ti lo vang. I hrethiam lo em ni? I mawl em ni? Kimi, ka duhzia che hi i hmuthiam thlawt lo em ni? " a ti ta tuar a. Boruak reh dûk karah chuan ngawi rengin kan inmelh ta ngat ngat a. 

(Vwiin chu vawihnih lai ka luak. Tih hrilhhai che u ka hreh si a, ka rawn ziak hram ani e. Ka pum lam chiangkuan loh bakah nizanah balhhla zu ka in a. Aizee.. Hrehawm tak a ni. Ka chau ngawih ngawih. 😢