Zirsangliana. 5

ZIRSANGLIANA.. (Part, - 5)

Ziaktu : Toni Râlte

Rinpuia reh ta vang vang chuan ngaih a titha lo tan. A phone a chhia em mawni zawk le.. Nilengin ka mood a dik lo. Zana Zirsanga chet dan lah kha ka ngaihtuah apiangin engtin emawni ka awm ziah lehnghal. Khatia kan inen reng lai khan ka harh chhuak a, "I â mi? " ka ti hrâwk.. Ngawi rengin ka room lam panin ka kal ta daih kha a nia. Min melh dan hi mak ka ti fo reng a ni. He pa hian min ngaizawng em mawni le? Mahse, min ngaizawng nise Eli awm laia ka laka a tawngkam leh chetdan zawng zawng te kha.. Aa ka ngaihtuah peih lo. 

Faki leh Asawmi'n thingpui an in chhungin bungrua ka rem tha a. An titi chu ka ngaithla pah ve reng. 

"Aih, ih maw.. U Zara khan a lo kawp char char zawk a, Melo-i a rai takah khan a bialnu chuan Melo-i bulah 'Zara bialnu ka nia' a rawn ti ta sia. An buai rei alawm. Meloi lah induh ve larh chi, tlawm hreh ve tak a ni sia. U Zara khan ngaihdam chu a dil nasa, mahse, sawn pai a thlang ta zawk a nih kha" Faki chuan a ti mial mial a. 

Kan veng ami Melody leh Zara chungchang an sawi tih ka hre mai. An lar ve hat reng bawk a. Melody a rai chiah tihin Zara bialnu, a thawhpuiin an inkawp thu a lo hrilh ve si. Zara a kawlawk chiang hle. Hetiang mai mai hi a nia inngaihzawnna chu.. 

Ka rilru ka kawm mawlh mawlh lai chuan ka phone a ri ral ral a, muangchangin ka va pan a, Rinpuia! Ka pick up ta vat.. 

"Kan buai lutuk a, ka rawn be hman ngang lo che a ni. Sorry lutuk aw. Hei kan intifel tan a, zanin riak leh ru min ti teh tlat a, naktuk zingah kan rawn chhuak ang" a rawn ti bawrh bawrh a. An buai anih ka ring reng a. Mahse, an buai tur thu tal chu rawn sawi ve tur a nia. 

"Nih chu.. A va zia lo ve" ka ti ringawt. 

"I thinrim mi? " a rawn ti a. Khatiang mai maia thinrim kha ka tlawmla ve si, "Rim lo e" ka ti bul hmuk. Mahse, ka lungawi chiah lo tih chu a hrethiam tho vang. 

"Lo lungawi hram hram rawh. Ka lo haw ang a, ka duat che ang a, i hlim leh mai ang. Ka dah rih ang aw.. Kan chaw eina tur lam kan pan dawn a" a tih lai chuan hmeichhe aw hian, "Towel lo keng lut nghal teh aw" a ti lang lang a. Phone chu a dah nghal hmak bawk. A thawhpuite nena zin an ni a, hmeichhia pawh an tel ve tih ka hre tho, nulat tlangvalna kawngah chuan rinhlelhna ka nei hran lo. An lo haw ang a, ka lungawi ve leh mai ang chu maw.. 

Ni dang aiin kan bang hma. Kan lun lo khawp mai vawiin chu. In ka thlen chuan ka nu leh Thari'n rawng an lo bawl a. Ka pa erawh a lo la haw lo. Ka inbual nghal a, Ka phone ri ral ral chu ka hre reng. Inbual zawhah ka call back tawh mai ang. 

Ka nau a lo ni a. Ka call back nghal. A rawn insût faih faih a, "Û, ka pain min hnawtchhuak a, kalna tur pawh ka nei lo, a putea te inah ka phei a.. Hei ka la awm" a rawn ti! Ka sa zak mai. 

"Engvangin nge a hnawhchhuah ringawt che a? " ka ti vin thak a. 

"Ka ruhnâ a chhuak leh a, ka nuin damdawi a chah a, a to ve deuh bawk si. Ka pa lo haw kha a rui sa hrim hrim a, a hautak em mai chuti khati a ti kual a, ka nu nen an inhau hrep a. Chuan, nangmah vang vek a nih hi chhuak rawh min tia. Ka nuin min ţan ngam bawk si lo nen, ka chhuak ta ringawt a ni" a rawn ti a. Ka chhing sawk. Ka nu mai mai chu leh! Fate thlavang pawh hauh ngam lo. 

"Putea te an rethei si, i hrisel si lo, bakah piteii a lal si a, i hrehawm dawn lutuk. Naktukah Aizawlah lo chhuk tawp rawh. Ka lo buaipui ang che" ka ti ta hmiah a. 

"Mahse, a pa khan a phal si lo va" a rawn ti tham ţiak. Ka lainat ngei mai. 

"Keiman ka phal alawm. Keiin ka tih tlat chuan a phal lo bik lo vang. Khatah chuan i rethei dawn lutuk" ka ti a. Chutianga ti tura kan inhrilh hnu chuan phone kan dah ta a. Kei pawh kan inthlak fel hnuah choka lamah ka chhuk ve nghal a. 

Zanriah kan ei laiin ka nau chungchang chu ka sawi ta a. Ka pa a ter leh at, "Ka remti lo ka ti a ni lawm ni? He in chhunga thuneitu emaw inti suh" a ti hmak hmak a. 

"I phal emaw phal lo emaw ka ngaipawimawh lo. Ka indanpui mai ang. Ka nau a ni a, rethei taka a khawsak ka phal lo" ka ti ve tlat. Thari hi chu kan chhungkaw zia engkim hretu a ni bawk a. Engmah kan sawi hreh phah lo. 

Ka nu chuan, "Ni e, a dinhmun a khirh si a, rawn awm rawh se.. Kan khawsak a ziaawm zawk alawm. " a lo ti ve bawk. He nu hi nu mak tak chu a ni ve alawm. 

Ka pa a ngawi kur tawh. A lungawi fahran lo tih ka hre thei. Keipawn ka sawi chhunzawm duh ta lem lo. Chaw ei khamah ka pa chuan, "Library roomah lo kal teh aw" a ti sup a. Ka nu nena an thuruk, an inthen phahna hial kha a sawi dawn a nih ka ring. 

Rinpuia nen kan inbe zuai, an ri nuai nuai a, zai te an play in ka hria. A bengchheng si a, kam inbe rei lo. Ka pa sawi ang khan roomah chuan ka lut ta a. Chair-ah thuin a kut a lo suih tha at bawk. Ka zâm lek lek mai. A hmaah chuan ka thu ve nghal a. 

" Thudik i hre duh tih ka hria. Thil sawi nuam tak a ni lo va, dawnsawn i thiam dawn nia" a ti te te a. Ka lo bu nghat. 

"Kum 3 i nih khan i nu nen kan inkar chu a danglam ţan a. Engtianga rawn khi ţan nge ka hre bik lo. Kei hnaah ka buai a, kan zin chhuak fo bawk nen. Ka zin haw te hi ka ngaih ve tehlul thin nen min lo thinrim khum zawk mah zel a. A ngaihna ka hre lo thei khawp mai. Tiang khan mi hriat pui si lohin kan nupa nun kha a kar a zau ta hlek hlek a, siam that tumin i nu pawh ka be nasa, "Eng nge tihsual ka neih? Insiam tha tawn ang" tiin. Mahse, engmah a sawi duh ngai lo. I pu kha a hrisel lo chho ta a, zanah te menpui a ngai fo a, chung hunah te chuan i nu chuan nangmah chhuanlamin a mutsan daih thin. Ka rilru a na ve thin naa inhauh ai chuan tiin ka ngawi zel mai. 

I pu chu a boral ta nge nge a. Khatih lai te khan ţah pawh a tap pawn ka hre lo. Ka nu leh pate lak atangin dodalna engmah a tawk ngai lo va, chuti taka ka pa a sûn lo leh a namnul chuan min tina ngang mai. Lusun sarhu lai a lo ni bawk nen, zan khat chu kan inhau ta hrep a, ka beng nghe nghe. Chhuak rawh ka tih ni miah lovin a chhuak ta a. Nang pawh a hruai lo che. I pi in a pawm che a, ni li lai a va tlan, an khuaah a haw lo bawk a, keia luhlul laklawh chuan koh ka duh rih ta lo va. A nî te inah a awm tih ka hria. Mahse, kan ina aia nuam a hre lo aniang chu koh pawh ngai lovin a rawn haw ve leh ta mai a. Kan innupa leh chu a ni mai. Inthen ngawt kha nang i fahrah dawn si a, ka ngaingam lo. 

Tiang chuan a changa inrem tak si, a changa inhlat em em lawi siin nupa nun chu kan hmang ve leh zel a. Kan hna avangin Phaiah zin a ngai ta thut a. Training tenau a ni. Thla thum dawn lai ka zuk awm dawn vangin nangni nufa bakah ka nu tar ve tawh lam chauh in awm tur chu ka ngaingam lo deuh a. I nu chuan, "Lungngai mah ta che. Hei in hnuaite an awm ve reng a, a tul hunah chuan kan ko mai dawn alawm" a ti a. Chutih laia kan inhnuai te nen chuan kan inpawhin kan inban tawn em em thin. An tlangval ngat phei chu mikhual an neih chang chuan a rawn riak chawt thin a. Nang phei chu duat tak che a ni. Tichuan, ngaihngam takin ka zinsan ta che u a. 

I nu nen pawh kan inbe fo. Ral khatah chaun kan inhau lem lo. I pi, ka nu nen pawh kan inbe zeuh zeuh. Zan khat chu i pi chuan thil mak deuh min hrilh ta a. "Mama, i tan chuan awih a harsa mai thei. Mahse, keimahah hian rinhlelhna a awm tlat si a. Muani (i nu) leh Valpuia (kan inhnuai tlangval) khawsak dan hian ka mit a tikham riau a ni.. Eng an ti ang chu ka ti lo va, mahse, mi hmuhah pawh a mawi lo lam deuh a ni" a rawn ti ta a. Kei chuan mak ka lo ti em em zawk. Chutiang zawngin i nu kha rin ngaihna ka hre lo hrim hrim. 

I pi sawi dan chuan, "Zanlaia ka va zung tur hi Valpuia riahna room atanga Muani lo chhuak ka hmu a. Amah chuan min hmu lo. Ngaihthat lohna ka la nei lem lo, an inkawmngeih a, an inkawm aniang ka ti mai a. Tin, i zin zan atang khan Valpuia hi a rawn riak zantin tawh hrim hrim. Chuan a tuk zanah mawlhtu ka neih tlat vangin nizana ka thawh hun awm velah ka tho them them a, Valpuia mutna lam chu ka pan ta a. A reh vang vang. Han hawn em ka hreh vangin in nupa roomah ka kal ta zawk a, ka hlauh ang ngeiin Bawihteii chiah a lo mu a… an riak dun ngei niin ka hria a ni" tiin a sawi. 

Kei chu ka sa vek a, ka thinrim bakah ka rilru a na a ni tawp. Mahse, ka nu chuan min beng dai hram hram a. Uire a ni tih fiahna kan la nei lo a ti tlat a. Enthla zel tura inhrilh chungin kan inbiakna kan titawp ta a. Mahse, Vanduaithlak nge vanneihthlak kan ti zawk dawn.. Valpuia pu Khaw danga awm chu lungphu chawlin a boral ta hlauh a. An chhungkuain an kal ta a. I pi chuan a man chhuak ta lo a ni. Kei ka haw ve leh ta bawk si. Mahse, i nu chu rinhlelhna hlirin ka khat tawh a. Zawhna erawh ka nei duh rih lo. Valpuia te pawh an lo haw ta a. Boruak dang engmah a awm rih lo. Ka zin hawn atanga kar hnihnaah i nu ruah loh thu kan hre ta a. Ka zin hawn atangin vawikhatmah nupa nun ka hmanpui lo. Ka thei thlawt lo a ni ber. Ani lahin min ngaihsak bik lem lo bawk nen. A rai tih ka hriat chuan ka fa a nih rin lohna ka nei ta nghal a. Thla thum ka zin a, ka hawn hnu kar hnihna leka a rai thu hriat chuan tu pain nge ringhlel lo vang. 

Ka tawt up up a. I nu chu chhuahtir mai ka duh tawh. I pi hian min la khap hram hram. Ka fa a nih theih dan a la zawng hram hram a ni ber e. A inentirnaah chuan a fa pai chu thla hnih a lo ni tawh. A chiang thawkhat ta viau mai. Ka fa a ni lo tih chu.. 

Tichuan, i nu chu roomah ko lutin engkim ka hriat tawh thu leh min chhuahsan turin ka ti ta a. Mahse, a mak a ni tawp. I nu chuan ţap chungin ka fa a nihzia leh chutianga a awm lohzia Pathian hmingin a sawi ta mial mial a. Ka awih duh si lo. Mahse, kha chen hmangaih taka ka lo dawma ka lo chenpui a ni a. A ţap lai hmuh chuan min den dan a dang ve reng. 

A chhuak duh ta miah lo va! Chumi hnu kar khat lekah Valpuia chuan nupui a ru ta mai a! Chutah chuan i nu chuan, Valpuia leh a nupui chu ka zin hlana heta an riah thin thu a sawi leh ta zui. Valpuia lah chuan ka ringhlel tih hre miah lo angin min be tha suah suah hle, nang lah a la duat reng bawk si che a. I nu nu a boral leh ta zel si! I nu chuan belh tur a nei dawn si lo. Amah ka hmangaihna avang khan khawngaihna ka la nei a ni mahna.. Ka ina a chen chu ka la phalsak ta a ni. 

Nupa ang erawh chuan kan awm ta lo. Mi ngaihah chuan nupa kan ni. Kan tum dan chuan i nau ti mai ang, i nu naupai chu piang se, kum thum a nih thlengin hetah awm se, inthen kan titlu ta a ni. I pi pawhin min hriatpui. I nu te dinhmun chhiatzia a hriat ve vangin i pi mi fel tak khan i nu chu a chhuahtir duh ta bik lo a ni. I nau a piang a, Valpuia te pawh in hrang an chang tawh a. Kan inhmu ngai tawh lo. I nau a pian hnu atang khan i nu chuan min hneh leh tum takin nasa takin a bei a. Ka rilru hneh let leh tumin.. Kei pawh chenpui reng na na na chu ka lo nem ve leh ta deuh a. Ka tum aia rei kan inhrawn leh ta kha a nia. I nau pawh nangmah ang em chuan lawmin duat lo mah ila, ka hmuh tak rengah chuan hmangaihna chin ka lo nei lo thei lo va, ka duat ve ta fu mai. I pi hlei hlei khan a duat. A mak ka ti asin aw. I nu lah nu tha ber ang chiah a ni tawh, ka lung tihawi loh chu thih hrehin a hreh a ni ber. Min tilawm thiam bawk a.. Ka nupui angin ka pawm leh ta a ni ber e. 

Nang i lo lian zel a. Kha thuruk kha ka theihnghilh mai dawn emaw ka tih laiin Valpuia leh i nu inbiakna ka man chhuak ta tlat mai! Ka natzia chu e sawiin a siak lo vang. Tun hnu thleng khan a rukin an lo la inhmu fo tih ka hre ta a ni. I nu lah i nau a neih khan a insiam ta hmiah bawk si. Engtin chiah nge an lo chet thin ka hre lo. Ka hriat chhun chu Valpuia'n, "Kan fanu kha tha takin lo enkawl la, kan nu hian ka hmingin a ro engkim hi a dah veleh ka rawn hruai ang che u. Chumi hma chu lo nghak hram hram rawh" a tih kha a ni. Chu chu inthen chhan a tling tawk viau mai. I nu pawn sawi tur a nei ta lo. Tin, i pi pawhin a vawikhat nan, "Min chhuahsan ula, chu chu kan duhtawk e" a ti ve ta thlawt mai. 

Tikhan i hriat angin kan inthen ta kha a nia. Thudik hrilh tur che khan i la naupang si a, i nun a chhe vek ang tih ka hlauh vangin ka zep ta ngar ngar a ni… tikhan engkim i hre tawh a, min la dem reng em? " Ka pa thusawi chhung zawng khan ka chil ka lem leh lem loh pawh ka hre lo… ka insangruh hle tih erawh ka hre thei. 

"Chuan, ka nu leh Valpuia chu an innei ta chuang si lo va" ka lo ti daih. 

"Ni e, tikhan serchhipah an nufain an chho a, Valpuia kha an nghak a niang chu.. Mahse, Pathian hian ro a relsak nge ka hre lo. Kan inthen atanga thla hnihna lekah Valpuia kha Heart attack vangin a boral ta thut a ni. " a ti a. Ka lo maimichhing tawp. 

Ka nu chu ka hua. Ka pa ka huatna kha ka nu lamah an bet ta vek a ni ber. Ka pa chu ka ngaisang leh hnuhnawh. Chutiang uirenu a lo tuamhlawm reng mai chu.. Sawi tur ber pawh ka hre lo. Mahse, ka nau hmel ka mitthlaah a lo lang a, a tetlaia ruhseh vanga kan buai thinzia leh injection na a tihtheihzia te kha.. Tunah lehkha a zir tawh lo va, a thawmhnaw design a lem ziah te hi min lo thawn fo thin. A thiamzia leh a tuizia ka hria. Ka nu tihsual vanga a hma hun chhe vek tur chu ka ngaingam si lo a ni. 

"Mahse, Pa, i fa ni lo mah se, Jeni chu i fa ang tho va i lo enkawl ve thin a nia. A dinhmun i hria a. Khawngaihin awmpui mai ang u.. Keimah vang tal pawn.. Ani chuan engmah a tisual lo asin. I fa a ni lo tih pawh a inhre kher lo vang" ka ti ta tawp a. 

A ngawi vang vang, a rilru a insual nasa hle tih ka hre thei.

"Aw le, ni e, ka fanu i nihna angin i duhna chu ka zahsak ang che. I nau chu kan enkawl dawn nia. Mahse, hei hi hre ve se ka duh. A nu hian a rawn ngaihven tawh lo law law tur a ni. Chu chu i nu pawh i lo hrilh dawn nia" a ti ta a. Ka pa chu ka kuah chak tawp, ka ngam chiah si lo. 

Ka nu chu ka call ta nghal a, a la lawk thei lo zui. A hnuah a rawn la ta hram a,. 

"Nu, Jeni a rawn chhuk dawn a. Kan bulah a awm tawh dawn. Mahse, i hriat tur thil sawi ka duh a " ka ti tlang ta tawp a. 

"Sawi la" a lo ti a. 

"Jeni hi ka pa fa a ni lo tih ka hre tawh a. Mahse, ka pa ka ngen a, a dinhmun chhiatzia te a hriat hnuah he ta lo chhuka enkawl chu a remti thei a. Mahse, i rawn ngaihven a phal tawh lo. A rawn chhuk anih chuan in inkar a tawp ang a ni mai.. " ka ti ta mawlh mawlh a. A sarhu lai a ni bawk a, ka nu rilru tur lam ka ngaihtuah pha lo. A ngawih vang vang hnuah, "Ani bak hi neih ka nei lo asin" a ti chuai raih a. 

"A thlavang takngial pawh i hauh ngam hleinem. I pasal sual tak leh a chhungte khan a chungah eng nge an la tih zel dawn hriat a ni lo. I hmangaih anih chuan kan bulah a him tih hi pawm rawh" ka ti ta miah miah a. 

"A dik alawm ni e, ka nep em a ni. Ka dinhmun a chhe si a, i piteii a sual si. Belh tur dang ka nei si lo va, ka pasal hi ka then ngawt thei lo a ni. Ni e, Jeni chu rawn chhuk rawh se.. Ka rawn ngaihven zui lo vang e" a ti ta a. A tawngdanah a na ve hle tih chu ka hre thei mai. Khawngaih ru tho mah ila, Jeni tan zawk a nih vangin ka inbengdai hram hram. 

Roomah ka awm a, ka bungraw chah ho ngaihvenin vaiho ka call kual a. Ka biak laklawh laiin ka room kawngka chu an lo kik. Ka va hawn chuan Zirsanga a lo ding a, a tiang rinchhanin. 

"Ka nu meetingin a chhuak sia, min zût a ngai dawn a" inthlahrun hmel deuh hian a ti a. Phone chu ka dah nghal. 

"A tha alawm.. Tui ka zuk lum ang e.. I roomah lo awm la" ka ti a. Nurse a haw tawh bawk si a, ka kutah a tla tlat. Ka tih ve reng tur a nihna chen pawh a awm ve bawk alawm. Rinpuia'n min raawn be leh tawh lo. Mahse, a whatsapp status chuan ka mit a la viau.. 

Thla eng thla la in, hmeichhe kut tih hriat takin thla a ban mek lai hi a hmang a. A captionah, "Moon+love" tih a hmang. Ka hmu dawn tih hre reng chunga chutiang thil hmuh nuam lo tak a hmang chu mak ka ti angreng hle. A hman mai ngam danah rinhlelhawm a ni lo zawk nge mawni dawn ni. Tui a so va, ka chawi chho ta a. 

Khumah chuan a bawkkhup a, boxer a ha. A boxer chu ka tawm chhohsak a, a malpui atanga a kerek thlengin tuilum chuan ka zut chhuak ta a. 

"A sa mah mah" a ti a. Ka chhem dai leh rih. 

"Ù, i nau a lo awm dawn mi? " a ti a. 

"Umm i lo duat loh vaih" ka ti lawk sa a. 

"A hmel tha em? " a ti sup a. A hnunglam atanga melh rum pahin, "Tha e.. Ngatan nge i tih? " ka ti hluk. 

"Unau hmeltha deuh neih hi a nuam ve alawm" a ti ringawt a. Ka nui tawp. 

"Kei ka hmel tha mi? " ka ti fiamthu a. A nui huk ri chu ka hre thei, "Rinpuia tan chuan tha ang" a ti zui! Ka va ngei tak. 

Ka zut zawha a zangthal zawnga a rawn mut takah chuan, "Tak taka i tha ka ti.. That belh tawh suh. A buaithlak" a ti ringawt a. Ka hamhaih deuh. 

"E taka! Sangsangi sawn a star che sia, a hmeltha sia, ni ta che u" ka ti a. Ka zahzel kual vel ve bawk a ni. 

"A la naupang em mai" a ti ve khanglang. Amah pawh a la upa tawp si lo. 

"Ve che, i la naupan em kha" ka ti hlar a. 

"Kei chu maw.. Kei aia upa ngaihzawng neih ka duh. " thutak fe hian a ti ta a. Min rawn melh chiang ngang mai bawk. 

"I â tawh anih chu.. Mahni aia naupang neih ngei ngei tur" ka ti hluai a. 

"Nia ka â tawh" a ti ringawt. Ka lai leh ringawt. Ka laih chhan ka hre miah lo. Ka ph a ri a, chhuanlamah hmangin ka chhuahsan ta a. 

Mut dawnah msg dangdai tak ka dawng leh ta pek.. Huiham.. 

"Tu emawin a tihnat hun che nghak kher lo hian, ka bulah i him tih hria la aw.. " tih ringawt hi. Ka call buai peih tawh lo. A tlang leh dawn chuang lo. Reply lovin ka mutsan leh ta daih. 

Zingkara ka thil hmuh erawh chuan min ţhawng hle.. 

"Rinpuia hi lo be tawh suh. Kan innei ţèp" tih thu hi.. Mak ta zawk erawh chu chu msg chu Rinpuia number atanga ka dawn a ni tlat! 

(Hmm.. Kut a kham leh ta 😆