Zirsangliana. 4

ZIRSANGLIANA.. (Part- 4)

Ziaktu : Toni Râlte

Ka nauin min lo bia a, buaina bawk. A pahrawn chhungte lam an sual viau a niawm e. Tun hnaiah. Ka nu leh ka nau chu an hmumawh thar ta thut a, a chhan pawh ka nu pasal chuan an veng Middle school-ah Peon hna a hmuh vang a ni. MR mai chu a ni naa, a hlu ve tlat si a. An party behchhan te tihtheih zar a zo a niawm e. Chutia sawrkar zêm a zen ve theih takah chuan ka nu leh ka nau chu an hnawk thar ta riau a nih awm chu! In hrang an chan tawh ahnu engah nge an va tihbuai kher le aw.. A rilru chhiatthlak mang e. Mahse, an buainaah hian inrawlh ka duh vak tawh lo. Ka nu min ţawngkhum dan kha paidam harsa ka ti rih tlat! Ka nau erawh ka la hmangaihin ka la ngaina em em. Hetah ka bulah awm se ka duh lutuk, mahse, ka nu leh pa te ka atanga ka thudawn khan huaisen takin min chettir thei ngang lo a ni. 

Zirsanga pawn a ke a hmang thei ţan a, bai sawih sawih chuan a kal thei. A thin a la ram reng naa ka pehhel zel vangin ka hmu khât angreng. Eli pawh a haw zeuh zeuh, zan erawh a rawn riak thin. Inneih law law mai awm. Innei ang an ni tawh tho mai. 

Rinpuia nen kan inkar a tha a, kan inzawmna a thuk telh telh bawk. Inrinhlelhna kan nei ngai lem lo va, a tluang purh chu a boring lek lek zawk. Vawi 3 lai chu a rawn leng ve ta. Ka hriatthiam loh chu a lo len apianga Zirsanga'n min vil ziah hi! Zan khat phei chu a hawn hnuah ka khak ta nge nge a. 

"Ven ngaiin min hre deuh em ni? Ti nge Rinpuia a lo len hian i lo thut ve ziah? " ka ti chang ta fak a. Ka mitmeng pawh a rûm al al khawp ang. 

A rum nghut a, "Ven ngaiin ka hria che a ni ngei ang" a ti anih chu! Ka va beng chak tak. 

"Nang ang ka ni ve tlat lo. I ngaih ang kha ka ni lo aw" ka ti nghek a. 

"I ni ka ti hleinem. Rinpuia kha mipa tha tak a nih loh vang alawm" a ti dam thlup roh a. 

"Ve a che. Ka bialpaah inrawlh theihna i nei lo ve" ka ti ta piap a. A chechang eih lo. 

"I nuţa ka nih hi" tih chiah a sawi. Ka tawng leh vak ang tih ka hlau a, ka kalsan daih. 

Khata tang phei kha chuan kan boruak hi a alh a ni ber. Tawngkam pangngaia inbiak kan nei zui meuh lo. Pawi ka ti hran lo. Eli lah hi a zam lo ham ham siah, a chawhmeh duhzawngte hi a sawi zat zat a. Ka pa te chuan a la naupang â ve a nih hi an ti thei mai. Kei hmeichhia ve tho hian ka ei hlawl lo a ni ber. Enliam tum pawh hian a harsa thin. Sunday tlai ka thiannu Matluangi te ka tlawh chu duh aiin ka rei ta deuh a, khua a thim ţèp. Ka leng chhuak khât a, ka len ve chhunah âm taka tih ka duh ve bawk a ni. Ani lah titi nuam a ti bawk si. Hmanhmawh ru angreng takin ka inkhalh haw a, ka thlen chuan chaw ei an lo siam mek. Bual pawh inbual lovin ka kil ve nghal a. 

"Awiii U Thari chu i thingtlang bai siam a. A thak mah mah. Khawpuiah chuan hetiangin thak kan ei ngai lo" Eli chuan a rawn ti hlawl mai. Thari bawkbawn bai chu keiin tui ti zetin ka hawp hruih hruih sia. 

Thari chuan, " A va zia lo ve aw" a ti ringawt a. 

"A ho em mai, Thar, a tui lutuk. I thiam lutuk ania. Khawpui nu inti tan chuan a thak deuh a nih dawn kha. Ei loh mai tur" ka lo ti lehpek. 

"Ka rin dan chiah" Zirsanga'n a ti sup. 

Ni e, Eli inrawlhnaah hian ka inrawlh ve zar zar, ka sual a niang e. A ngeiawm em ani. A nawm amaka kan awmpui a tirh kual te, a sawisel te chu ka hmu thei lo. Kan mo pawh a ni lo. 

Eli chu a kham ta hmak a, kut a sil lai chuan, "Tumah sawisel ngam pawh a ni lo. Hetiang te chuan ka awmpui peih tawh lo che. Zaninah ka haw ang" a ti ta a. Mihring hi kan zah theih loh dan a inchen lo va, zak thei lo deuh bula kan awm chuan kan zak thei lo ve deuh nghal mai thin. He Eli zahtheih lohna leh kan chhungkaw member zah theih lohna zawng zawng hi a inhen tawk velin ka ring. Naupang tê lehnghal. Nunphung a hre miah lo leh sawi tur leh sawi awm loh a hre hauh lo chu a demawm pawh ka ti lo. A nu leh pa te thiam loh a nih ka ring. 

"Haw reng ngai tawh lovin innei daih ru" ka lo ti ve leh hmak. Ka pa chuan min mitmei a, ka hre lo der tlat. Zirsanga pawh a kham ve nghal. Ka pa chuan, "Hetia inkhik khak reng hi ka kham ta hle mai. Eli pawh kan mo i la ni èm lo va, i awmdan hi tlem chuan siamrem deuh la a tha. Kimi, nang pawh engkimah hian inrawlh zen suh" a ti ta a. Na ka ti hran lo. Kei chu a fanu ka nihna angin min hau tur a ni. Eli a khak tel chu ka lo lawm viau mai. Ka pa a han tawng takah phei chuan a titau zui nghal a, a tum bur a, a pen ri sawk sawk mai. Engahmah kan ngai der si lo. A nu te a be lang lang chu ka hria. 

Darkar khat hnu velah Eli chhungte chu an rawn lang ta chiah reng a. Ka nu chuan a lo be nghal bawrh bawrh. Kei erawh dawr bungrua ka chhut laklawh vangin hawi pawh ka hawi chhuak lo. 

"Min lo hruai ru a tia.. Kan lo hruai dawn a"a nu chuan a ti a. Thinrim awrawl a ni lem lo. 

"Ni e, hei chen min awmpui tawh a, amah Mama pawn hma a sawn phah khawp mai. Kan la ui viau naa, mi ngaihah pawh a mawi lo ve thei tlat a. I hruai haw mai aniang chu" Ka nu chuan a lo ti ve ta hmiah a. Ka lawm ru ngei mai. 

Eli chu a thawmhnaw nen a rawn chhuk a. A la tûm bâr mai. 

"U Zirsang, ka rawn kal tawh dawn lo ania aw. I û hian min mil lo em mai. Inneih pawh ka duh leh lo. Ka rawn kal tawh ngai lo vang" a ti bawrh bawrh a. Zirsanga a ngawi tlat. Thinrim hmel a pu miah lo lehnghal. 

A nu chuan, "Ni e, ani hi kan fanu duatlai a ni ve a, hetah tlawmngaiin infapa a rawn enkawl a, in lo duata in lo duhsak der te pawh kan beisei ve a. Mahse, awmpui ang maia in lo chhawr atan chuan kan rawn kaltir lo asin" a rawn ti ta mai. Thari nen kan inmelh hâw ringawt. 

Ka nu chuan, "Ekhai! Chutiang a ni hauh lo asin. Hetia a rawn enkawl hi kan lawm lutuk, a duat pawh kan duat ve viau chuan kan inhria asin. Chutiangin awmpui ang chuan kan chhawr awkawng lo mai" nem tak siin a ti a. 

"Aa.. In lo chhawr deuh a niang, dawt a sawi ka ring lo. A rawn awm hnuah in awmpuinu pawh a leh awl phian tawh a ni lawm ni? Hetiangte chuan engtin nge kan rawn mo tir ngam ang? " a pa chuan a rawn ti ve ta fak. A mak mang e aw.. An fanu chuan eng dawt thu tak lo fah ang maw. 

"Bakah in fanu hi a tawrhhlhawm viau a nih hmel a. A awm lai phei chuan tawng pawh ka tawng ngam lo te a tia. Tiang hrim hrim anih chuan inneih lam te pawh kha tih rih loh mai tha kan ti a ni. Kan fanu hi kan inah a nuamsa tawk a, hrehawm tuar tur ringawta mi ina mo tir kan duh lo tlat mai" A nu bawk chuan a ti leh a. Ka pa meuh a tawng ve ta. 

"Ni lo ve.. Chutiang engmah a awm lo. Ka hmuh leh hriat chinah Eli hian kan inah inchhungkhur hna emaw eng hna mah a thawh awm ka hre miah lo. Mama erawh a buaipui a, ka kutah dah ru a tih miau vangin.. Chutianga hrehawm a lo ti tlawk tlawk a nih chuan kan chelh lui reng reng lo a nia" tiin. 

Ţawng ve ka chak hle naa, ka insûm. Puitling an indawr bawk nen. 

"Anih chuan kal ila, bawihte" a nu chuan a fanu chu a melh a. Eli erawh chuan Zirsanga a melh, eng emaw tal sawi turin a duh tih a lang reng mai. 

"Kan kal dawn asin.. Ka lo let tawh dawn lo ka tih kha" Eli chuan a ti leh a. Kan melh ţhap. 

Zirsanga chuan zawi muang hian, "I lo let tawh loh hi ka duhthusam a ni e. Kal vang vang rawh. Nang anga hmeichhe zak thei lo leh nasa hi ka la hre ngai lo ve. Ka hmelhriat pawh i ni tawh lo. Kal rawh" a ti ta. Tupawh min ţhawng. A thusawi chuan. Eli chuan thinrim takin, "Zawnga, min mamawh lai zawngin i tan ka awm a, tunah min hnawtchhuak leh si a maw?i la hre ve viau ang" a ti tuar a. 

"Engtik lai mahin min enkawl turin ka sawm lo che a, ka chhungte pawh an sawm hek lo che. Nang hi awm lo la ka dam daih tawh zawk ang. Nurse an ruai mai ang. I lo awm ve hi i hnawksak zawk" a lo ti leh hmiah. Zirsanga tawngkam chu a na ngawt ang, a dawngsawngtu tan. Eli chu ka khawngaih hran lo. Ti nge a zah loh em em ni.. Mi hausa fanu duatlai pawh ni raw sek sek, khatiang em ema boruak ngam tur a ni lo. Zirsanga takngial pawn a ţan duh tawh lo a nia. 

Eli nu leh amah Eli án hla zawng zawng chu sawi vek lo mai ang. An nasa nufa tawp. Ka nu te erawh an ngawi reng. Eli kha an lo kham ve thawkhat tawh bawk a niang. Thaw huai hmel an pu tlat a ni. Zirsanga erawh Nurse kan rawihsak chu a ngai ngei ang. A pawi lo daih zawk. Eli nui ri leh Zirsanga bula inla no tawng no kual vel ngaihthlak kha ka kham lutuk tawh. 

Mut dawnah Rinpuia nen kan inbia a, Eli velte chu tlem tlem ka hrilh ve a. "Nia, amah te kha a nasa ve ang. Khatia bialpa dam lo a rawn enkawl ngam ngawt danah khan.. " a ti ve tawp. Kei ni ila ka ngam loh nasat dan tur chu. Kan inmang tha hnuah whatsapp groupah ka lut zuai zuai a. Status ka view lawr dan dan bawk. Msg a rawn lut a, private ho chu hawn loh ka tum zet naa, hman zana number hlang atang bawk khan ka dawng leh. 

" I hriatthiam hunah chuan mak i tih loh pawn i la inchhir tal ang" tih ringawt hi. Ka call leh nghal a, a tlang leh chuang lo. Huiham. Tu tak ni ang maw. Dp a dah lo va, a hming lah emoji a hmang bawk si. Hriat a harsa ţek tek e. A ho em mai, hetia rawn tih ve ziah. A peih chen chen ti rawh se. A dawihzep em mai. 

Ka dawr pawh a muk chho ve zel a, thawktu dang pakhat ka lak belh bawk. Kan veng chhung ami tho, Ka thiannu nau Faki a ni. Engmah tih loh ai chuan tiin min rawn dil a, mi biangbiak a thiam bakah a chhe hot ve a. A confi bawk si, a zuan a zang lehzel bawk a. Ka la fuh khawpin ka hria. Faki chu chhe hot ka tih chhan chu an unauah amah chiah hi a hang bik a, a cher lam deuh niin a ha hi tlem a kuh bawk. Inchei erawh a thiam zèk a, a phu loh pui pui bialpa a nei thei phian. A phu loh kan han ti tak naa phutawk bak kan inngaizawng meuh lo. Amah hi uang ve leh ho ve thei deuh a nia, Fak chhe hoti ka nia tih a ching a. A hmel leh mizia zawng zawng nen a lo inhmeh kher bawk si, chhe hot an tih phah ta a ni. A haw hran lo, a nuihpui vel mai mai. 

Rinpuia'n min lo call a, Chhiahtlanga an zin lawk tur thu a rawn sawi a. Hmuh pawh kan inhmu hman ta lo. 

"U Kim, i nau saw min lo tihpui la.. " Lalfaki chuan nui hawr hawr chungin a ti a. 

"Nia, ka lo sawi ang. A duh chhe thei tawp, a duh hrim hrim ang che" ka lo ti fiamthu ve hlut a. Kan nuih báwk bâwk hnuah, "Tak taka Kei chu ka khawngaih, U zirsanga hi.. u Judy khan thihsan lo se chuan tiang hian a sual miah lo vang" a ti ta hlawl mai. Ka hre ve leh miah lo. Asawmi pawn a lo hre bik lo. Faki chuan, "U Judy chu kan pastor fanu a nia, hmel tha deuh mai. Awii a tha a ni tawp mai. Chuan, U Zirsanga te nen hian Sande School an kaiho thin a, ta tanga in duh an nia. Chung lai chu i pa leh a nu saw an la innei lo. Mahse, i pa sawn a rawn hel ve ţan lai a nia. U Judy nen chuan an ni ta a, mahse, hei i hrethiam ang a, khanglai te chuan chance tih vel an nei ngam lo hrim hrim. Lehkha an inthawn thin. Phone pawh an la nei lo ve ve a, u judy pa phone atangin an inbe zeuh zeuh. Kum khat vel an nih hnuah U Judy kha motor khan a su hlum ta sia. U Zirsanga hi a thlanah te a riak thin an ti.. " a ti ta a. Asawmi nen kan ngaithla tui ngang mai. 

"Engtin nge chung chu i hriat? " ka ti a. 

"U Judy nau Remremi te nen kan inkawm nasa a, a sawi vek zel alawm. An induh ve lutuk, Inrinni zan atanga sunday zan inkhawm thleng hi an inhmuh ve theihna chance a nia. U zirsanga pawn inkhawm a thulh ngai lo. " a ti lehzel a. Zirsanga hmel ka mitthla a, ka hawn hnuah a inkhawm ka la hre miah lo. 

"Judy chu engtin nge motor chuan a sut theih? " ka ti leh a. 

"Ih, an school bang an inpenga a chhuk thla tur kha a rawn tlan thut a. A su thal tawp an ti. A bul stepah tlain a lu a zuk tauh zui bawk sia. Ka hmu ve lo va, ka sawi thiam lo. Damdawiin an thlen chuan a thi tawh an ti" a lo ti leh a. Kan ngawi thap mai. 

Mahse, "Judy vangin a sual kher lo vang. Mihringte chu kan mizia a inthlak ve reng alawm" ka ti hram a. 

"Aih a ni lo, U Judy thih atang khan a hlim hmel an hmu ngai tawh lo an tia, chuan i pa leh a nu kha an innei a. U zirsanga pawh hostelah a lut ta daih a. A rawn chhuah leh chuan zu vel engkim a rui vek tawh. Khawm pawh a inkhawm ngai hleinem" a lo ti leh siam siam a. Hm… Zirsanga chu a vanduai hle mai. Ka khawngaih ve ta deuh. 

In ka thlen chuan Zirsanga enkawltu nurse chu a haw ve dawn chiah a. Kan inbe lem lo. Nula senior ve lam a ni a, han biakna tur kha a vang ve deuh bawk si. 

Ka tih ngai loh deuhin Zirsanga roomah chuan ka va lut a. Khumah zangthal zawngin a lo mu a. 

"Eng nge i an? " ka ti satliah a. Min rawn en vut, "Ka tha a ni mai" a lo ti ve thluam. 

"I lung a leng em? " chimawm ka chhuah chak tlat! 

"Leng tehreng mai.. Mahse, Eli ka ngai lo" a lo ti ve mai a. Judy hming ka sawi chak ngei mai. Mahse, ka ngawi leh ta zawk a. 

"I tha vat mai ang.. " tiin ka room lam ka pan nghal. 

Rinpuia'n min la rawn be miah lo. A buai deuh a nih ka ring. Ka be duh ta lem lo. Chaw kan ei a, Eli awm lo chu a reh viau. Mahse, kan zangkhai phah tho. 

"Nurse hi rawih kher ngai pawh ka ti lo. Zingah Ukimi hian min walk pui se ka zia chho mai ang. Tuiluma zût kha chu ka nuin a tithei tho a" Zirsanga chuan a ti a. 

Kan inseng hnem tawh sia, a inthlahrung ve deuh a ni maithei. 

"Ngai e, Nurse nge nge chuan tihdan an thiam zawk alawm. I dam vat hi a tha ber" ka pa chuan a lo ti vat a. Ka nu erawh a ngawi reng. He nu findan hi chu aw.. 

"Û, i chhoh pahin min lo pui mai aw" Chaw eina vel kan sengfel zawh chuan a lo ti a. Reilote kan thut hnuah "Chho ila" ka ti a. A tiang chu ka pe a, lehlamah ka kuah bawk. A roomah ka luhpui a, ka muttir a. 

"Buaina i neih chuan min lo ko la aw" ka ti a. 

Ka kal tur chu ka kutah a rawn vuan chut a. Ka lehhawi vat, "Û,. Ih.. Englo.. " a ti nuah nuah a. 

"Hmm sawi la" nelawm takin ka lo ti a. 

"Aa.. A ngai leh lo. Tui deuhin muhil rawh" a ti a. A inlet thawk. Ka nuih a za deuh. Eng tak sawi tum ang maw. 

Ka mut hnu thleng pawn Rinpuia a reh. Mak ka ti ta deuh a, ka call ta a. A ring ral thak. An thleng chau ve a nih dawn hi tiin whatsappah ka wish a, ka mu ta daih. 

Zing dar 3 bawr velah ka phone a ri a. Hetiang huna ph call lo kal hian min râp thin. Zualko an nih ka hlauh vang hian. Mahse, Zirsanga a lo ni. Ka la vata, "Û, zun ka cheh a" a rawn ti. A ke na a zual ang a, toilet pan thei si lo chu zun a cheh a nih ka ring. Ka tho vat a, ka va kal nghal. A lo hing rum rum mai. A inthlahrung hmel chuan ka nuih a tiza. 

Ka kuah tho va, a bed sheet chu ka thlaksak thuak thuak. A awngphah hi pho tho a ngai dawn anih hi. 

"Eli awm lo chu kan va tuar ve" ka ti fiamthu a. 

"A awm lai pawn keimah hlir in alawm ka zun.. Zanin chu ka ke vang pawh a ni lo, ka mumangah ka lo zung a" a ti ta mai a. 

"Zirsang leh! " tiin ka nuih ta chiam a. Ka ban bul ding lamah rawn chelhin a lamah min pawt hnai dâwrh a. 

Ka mitah tak en ran chungin, "Ka û i ni tih ka theihnghilh loh nan hian min pui fo teh" a ti thawp sup a. Ka nui tawp chiang kher mai.. 

(Tawi mah se, lungawi mai ang u aw.. Ni khata pahnih hi chu a har ve em a ni 😍😍