Zirsangliana. 3

ZIRSANGLIANA.. (part - 3)

Ziaktu : Toni Râlte

Eli chhungte chuan Eli chu a ruk thei ang berin an hawnpui a. Inru hming pawh puttir duh rih lo vin, nakinah an puitlin hunah kan la sawi rem dawn nia tiin thutlukna ka pa te nen an siam a ni. Chutianga naupang chhia ngawih ngawih chu an ni tawh lo naa, Ka pa te lam pawhin Zirsanga chuan a zirna te zovin, eizawnna te nei ve phawt se an duh a. Eli te lamin chutiang bawkin. An one night stand ve a nih deuh ber chu.. Tukthuan kan ei lai erawh chuan boruak a rit ru hle. Zirsanga chu a tûm bûr a, a ţawng duh miah lo bawk. Ka pa chuan a zilh malh malh a, ţang sauh sauh tur leh nakina an pahnih atana tha tur a ni tihte. 

Kei pawh ka tawng lo, Zirsanga min tawngkhum dan kha ka paidam thei lo. Biak tumna pawh ka nei hek lo. Chaw eikham rualin ka insiam nghal a, dawr lamah ka phei zui daih. Asawmi pawh a rawn lang ve zat. Ka mood a tha vak lo bawk nen, kan inbe tam lo. Ka inthiam lo leh deuh. Rinpuia nen kan inbe zuai a, ani pawh a buai ve thin si. 

Chawhnu lamah eitur kan ei zawh hnu customer awm loh lai takin, "U Kim, saw i nau ex" a ti thut a. Ka hawi nghal vat. Kan ep chiah Nepnawi dawra Nunui leh a thiannu niawm tak lut mek te chu ka va hmu a. He lai daih daihah eng tak rawn ti ang maw? 

"Nunui a nih saw, damdawiinah pawh a rawn kal ve fo kha" ka ti a. Makti deuhin, "I lo hre tawh law.. Mahse, i nau nen an nih lai chu i hre hman lo, i phai awm lai daih" a ti sar sar a. Ka hre thui chak ta tlat mai, "A fel ka ti reuh a, mahse, ti nge an inthen le? " ka ti ta a. 

"Ka hre chiang ve vak lo. Sangsangi sawi ve tho a nia. Ih, Nunui hi U Zirsanga hian a duh ve thei lutuk a, nih pawh an ni rei. Mahse, amah Nunui hian a lo kawp aniang, a hre chhuak ta sia. A ngai dam a, chumi hnuah mipa dang tho a lo kawp leh aniang, chutah chuan a ngaidam thei ta lo a ni" Asawmi chuan a ti mawlh mawlh a. Chuvang a ni maw Nunui kha a lo huat em em ni. Huatawm ve reng pawh a nih chu. Mhase, Nunui khan a la duh hmel tho bawk sia, eng nge maw a awmzia ni ta le.. Hmm.. Ho em mai, ka ngaihtuah buai peih lo. 

"Zirsanga hian Sangsangi hi a duh lo mi? A chhiat loh tehreng nen" ka ti ta daih a. 

"Ka hre bik lo, hman deuh kha chuan a chhaih ve thin a, bialnu tak tak a tan hian a duh lo nge ka hrethiam tawh bik lo" a ti niah niah a. 

Customer kan nei ta hlauh a, kan sawi zawm ta lo. Nidang aiin ka ban hma pui, ka mood chhe lutuk chu mahnia hrikthlak ka chak tawh. Ka bula awm te ho awm ka tinuam lo ve vek niin ka hria. In ka thlen chuan ka nu leh Thari an lo awm a. Min lo be nghal vat vat mai. Ka nuhrawn a ni nain sawiselna tur hi vâng ka ti telh telh mai. Ka pa nen kan inkarah inrawlh a tum ngai miah lo te, ka pa thu a awih leh a lo support vat zel hian nu mawl tak a ni lo tih zawng a tifiah khawp mai. A chanchin hi ka hre thui vak lo va, ngaihven ngai lo nafam chuan. Zirsanga pa hi tu tak ni ve ang maw.. A ngaihsak bik lo chu a ni phawt ang a. Ka thil ngaihtuah atang chuan ka nu ka ngaihtuah kai ta zel a, an thuruk pawh ka la hai chhuak lo. Hun ka neih loh bakah remchang a awm lo va, engtia han ţan tur nge ka hre lo bawk a ni. Ka nau hi tu fa nge tih erawh hriat chhuah ngei ka tum. 

Ka inbual sar sar a, ka zia ta deuh e. Ka inthlak lai chuan Zirsanga ţawng lawng lawng ka hria. Phone in tu emaw a bia a ni ngei ang. Eli nen an innei thei ta rih si lo va, a la titau rih nge class a kal awm pawh ka hre lo. 

Ka inthlak zawhah chokaah chhukin tihtur ngai te ka zuk tihpui ve thuak thuak a, ka pa a lo haw ta bawk. 

In chung atangin, Zirsanga'n, "Kimi, i phone a ri" a rawn ti lawng lawng a. Ka phu zawk. A hma zawnga "U" tia min ko, tun ataka Kimi min han ti chu ka run deuh. Mahse, nia, a u tak tak a ni chuang hleinem. Room lam panin ka tlan chho va, khuma ka ph chu lain, Rinpuia nen kan inbe ta a. Zaninah rawn len a tum. Ni e, ka hnial tawh lo. A inthlahrunawm tlat! 

Zanriah kan ei laiin, "Ka thianpa a lo leng dawn a" ka ti a. Ka nu chuan nui chungin, "I bialpa maw? " a lo ti a. 

Ka nui ve mai a, "Umm ni deuh" ka lo ti a. Zirsanga fian inkhak ri bawl avang chuan a lam ka hawi vat. Min en lovin chawhmeh lam a bih ran a, a la tûm reng a nih hi, Tùmliana ni teh se.. 

Ka pa chuan,Rinpuia chungchang tlem a zawng min zawt a. Ka sawi ve zel a. 

"Inleng neih pawn zahawm takin lo dawnsawn tur, tun laiah thenkhat hi chu an room lamah te an hruai ngawt zel a, kei ka remti hlek lo a nia" tiin min zilh pah a. 

"Rooma ka hruai luh ngam te i ring mawni le" ka lo ti hluk. 

"Advocate hi chu an dawthei tlangpui" Zirsanga chuan a rawn ti salh a. 

"An ni vek lo" ka lo ti ve leh hmak. Inhnial ka peih loh vangin ka kham nghal daih. Mi dang khan titau emaw min ti maithei. Ka ngaipawimawh lo. An ngaih ngaihin ngai mai teh se a. 

Inchei vur ni si lo, inchei ve deuh tho siin ka awm. Rinpuia lo len vawikhatna tur a nih miau vangin ka ţang ru ve a ni mai. Roomah ka la tawm rih a, a lo chhuah chiah thu a sawi chuan sitting roomah ka chhuk thla ve. Zirsanga chu a leng a ni maithei, ka hmu lo. Ka nu te pawh an thu ve a, ka duh dan chuan awm lo se ka duh. Ka lai ve tlat. 

Kan kawngkhar chu kik pawh kik hmasa ei lovin a rawn pawt hawng ţhuai mai. Ka va hawi vat a, Rinpuia a lo ni lo. Zirsanga thianpa Danny a lo ni. A hlauhthawn hmel em em lehnghal. 

"Pa Rin, Zirsanga a accident" a rawn ti ta mai! Kan ding rual ţhuau ringawt. A chhuah lai awm ka hre lo va, chutia lo accident hman khawp tur chuan a chhuak hma viau a niang. Rang takin kan tlan chhuak a. Kan in piah lawk ka dawr thlen hma si kawi laiah bike chuan kawngthlangah a lo liam thla a niawm e. Mi pawh an pungkhawm chak kher mai. Ka tha a khur leh vek. Ka nu pawh chuti tho. Tlangval tlawmngai ten an zuk la chhuak a, a bike chu a chhe hneh hle. Ani erawh a lung a la phû an ti! 

Ka phone a ri a, Rinpuia.. Awii ka theihnghilh chiang lutuk. Ka la vat a, thil awm dan ka sawi zung zung a, a rawn kal ve tur thu a sawi nghal. A lo len vawikhatna tur a ni ve asin mawle. Zirsanga chu an rawn zawn chhuak a, engmah a hre lo. Damdawiin atangin a chhuak hlim hlawt kha a nia. Tunah thi chhawng bawkin. A va mak zozai tak.. Kei chuan en pawh ka en ngam lo. A thi nasa bawk si, Rinpuia ka bulah a awm ve reng a, damdawiinah erawh ka nu leh pa ten an hruai a, keini chu inah kan haw. Rinpuia bakah thenawm khawveng an rawn leng khawmuang ve bawk a. A hma ai kha chuan ka zia deuh, ka chiâi em em tawh lo. Mahse, Zirsanga chu thi mai turah ka ngai deuh tawp. A tlakna kha a san bakah a awih bawk si. Engtin nge a tlan liam theih reng reng ni.. 

Danny chuan, "Ani ang bike khalh hnehsawh lutuk kha engtin nge khalaiah khan a tlan liam theih ka hre bik lo. A tum lui emaw tih tur a ni" a ti chiah reng a. Zu erawh a in thu an sawi. A rui sual em mawni dawn le.. Rinpuia nen pawh hun fal kan nei thei leh ta lo. Ka inthlahrung viau naa, amah zawk chuan pawi a tih loh thu leh hun remchang dang a la tam tur thu a sawi a. Ka thaw huai mai. Ka pa a lo haw a, ka nuin a riahpui dawn niawm tak a ni. Thinthia mutthiilh a har lehpek hle. 

Zirsanga chu a kawng hnuailam a che thei ta lo va, mahse, tihdam theih loh tur erawh a ni lo an ti! A nerve a lo sawh ve hlek a, chu chuan a pawt khawng a, kea kal a la harsat rih tur thu an sawi. A dul dinglamah thingbungin a chhun a, chu pawh an zai nghal. A tuar chhel reng reng, a ril te pawh a rawn lawr an ti. Ka hmu ve lo naa, min râp khawp mai. 

A ngaitein insenso pawh a nasa leh ngawt ang. Ka pa chu ka khawngaih deuh. Ka nu pawh a inthlahrun hmel khawp mai. Mahse, ka pa hi a sual hran lo nge a fa hrawn tan chuan ui a neih loh hmel khawp mai. Engkimah enkawlna tha ber a la tihsak zel mai. A fakawm takzet a ni. Bakah an lo inchenchilh rei ve tawh a, an lo inngainain an inhmangaih ve te pawh a ni mahna. 

Hman ang tho khan chhunah ka nuin a awmpui a, keiin zan lamah. Eli a rawn lang thei ta bawk a. Zan khat bak ka riahpui lo. Aman a riahpui ta vek. A awmchilh a ni ber zawk. Ka nu pawh a awl hneh khawp mai. Mo atan pawh a tha dawn khawp e. Rinpuia pawh a zin a, an zin rei hmel angreng si a, a ngaihawm ve reng mai. Vawikhatmah fawh pawh kan la infawp lo chu a nia. Mahse, kan nghet ve hle chuan ka hria. 

Kar hnih lai Zirsanga chu a awm leh ta. Chhun lamah dawr ka nghah vangin ka kan thei lo va, zanah Thari nen chaw kan han pe thin. Eli hian a chan deuh chawt avangin riah ve pawh a inthlahrunawm. Vawikhatmah Zirsanga chuan min la be lo. Min hua em mawni le ka tih in min huatna chhan tur ka hre bawk si lo. A hmaa kan boruak te kha chu kei chuan ka theihnghilh leh vek tawh. Eli nen chuan kan inbe tha viau naa Nunui ai khan ka nel lo zawk. A lo naupang ve deuh bawk nen. A tawng dan leh chezia chu a over lek lek tih chang ka nei thin. A nuih lahin a za over a, thawm a dim thiam mang si lo. 

Zan khat chaw kan han pe leh chu Eli a inbual lai a lo nia. Zirsanga chu a lo thu mu a, a taksa chunglam chu a dam viau tawh. 

"Ka pa hrilh la, naktukah min la chhuak rawh se, inah inenkawl ka duh" a lo ti ram hmak a. En pawh min en hran lo. 

"Doctor ten an phal loh te chuan kan thu a ni hleinem" ka lo ti a. 

"Ka hne tawh. He lai hmun hi" a ti leh ringawt. 

"In ah pawh nurse rawih tho a ngai ang. Wheelchair hman a ngai dawn sia" ka ti a. Rum zeta min melhin, "Min enkawl i va hlau awm ve" a ti chang leh fak. Thari nen kan inmelh zauh a, "Ka hlau a ni lo. Bakah hetia min tawngkhum tur hi i ni loin ka hria" ka ti ve ta sak a. Eli inbual zo a rawn lut hlauh a, thudang kan sawi thei hram. 

"U kim, hawn a chak tawh a, a sawi reng mai. In hawn pawn ka rawn awm ve rih mai ang, tihtur ka nei chuang lo" a ti sar sar a. Ka ngawi reng. Zirsanga chuan, "A biak che chu chhang ta che" a lo ti leh hrâwk. Ka va melh râw a, "Vak vak che chuan.. A thu thu a ni mai alawm. Tunah pawh damdawiina riak tur hian kan ti hleinem, ama thuin a riak a, kan inah pawh ama thu bawkin a rawn awm leh mai ang chu" ka ti ve ta ngat a. 

"Chu! Eli chu i va hmu mawh awm ve a" a ti leh. 

Thari ang zuau chu mitmeia khapin, "Ka hmuhmawh lohzia chu amah hian a sawi thei ang" ka ti a. Eli ka melh bawk. 

"Aa.. A ho em mai, inhnial suu.. U Kimi pawh i nau dik tak a ni lo tih i tilang mah mah" Eli chuan a ti ta a. Ka ding hman ţhelh, "A lo nih mai mai chu.. Ani hian a û dik tak angin min treat se ka nau a ni mai tur" ka ti nghek a. Ka tho ta nge nge a, "Thar, kal ang. Chaw pawh driverin a rawn pe tawh ang che u. In hmel ka hmu peih tawh lo" ka ti hmak hmak a. Ka thin a rim hle ringawt. Upa ber ka ni a, insum ber tur ka nih laiin Zirsanga leh a bialnu min tawngkhum dan fek fek kha ka paidam thei lo. An laka that chhuah reng tura min ngai anih chuan an tisual ang. Ve mai mai a. Ka pa fanu ka nih hi. 

Ka hlauhthawn ang ngeiin a tuk tlaiah an rawn haw. Mi dang tana hriatthiam theih si lohin an lakah chuan ka tau tlat a. Ka be duh thak lo. Eli nen an inenkawl ang a, an hlim khawp ang chu. Wheelchair-ah a thu ta ngei a. A ke leh kawng te chu zutsaka damdawi hnawih te, jection te a ngai. Jection hi chu ka nu hian a ti thei mai zel a. A zia hlauh e. Inrawlh ka tum lo bur. Kan room a inhnaih mah mah te hi ka lawm lo. 

Inrinni tlai a ni a, dawr pawh ka khar hma. Chawhmeh ka lei haw pah duh bawk nen. In ka thlen chuan Eli nen bathlarah an lo thu dun a. Ka ui Huntera'n min lo bawh leh cheng cheng a, a eitur ka hawnsak chu ka pe a, ka chul thuak thuak lai chuan, "Uicho ho lah hi a.. Ninawm lutuk" Zirsanga chuan a ti hluk a. 

Ka ngeng a chhun kher mai. Ui chungchangah kher kher chuan. 

"Uicho a! Uicho a ni lo aw.. Hre rawh" ka ti a. Cho zetin ka va melh. Eli zawk chuan, "I thinchhe thei lutuk" tiin Zirsanga chu a melh a. Mahse, Zirsanga chuan min melh ran thung. A mitmeng chu ka hrethiam lo ve a. 

Zanriah pawh kan ruala ei lovin kan ei kham hnuah an ei a. An eina chu sengfel eih lovin an kalsan. Ka zuk hmu leh si a. Ka ter leh at. Eli hian direct takin ka pawisawi lo mah se; ka ngei ching cheng tlat! Ka pa a biak dan cheng chawng te hi. 

Thari'n tihfai a tum mek lai chuan, "Thar, chhuak lawk ang. Tihtur ka nei, min kalpui rawh" ka ti sawk sawk a. Mak tih hmel deuhin min en hâ mai. Kan chhuah dawn chuan, "Eli, khu in chaw eina khu zuk tifai teh aw. " ka ti lang lang a. Kan chhuak zui daih. 

"Ka ngei lutuk a, chuvang anih kha. Kan ruala ei ve mai tur a nia, chutah an eina pawh sengfel tum si lo" ka ti hmiah hmiah a. Thari pawh chuan, "Awii enteh, Ukim, zep loh chuan keipawh mil a har ka ti, U Zirsanga hi a tikhaw lo vek tawhin ka hria. " a ti ve ta mai a. Kalna tur em em ka hre hran lo, Dawrah eng emaw nepnawi kan va lei ringawt. Kan nui bawk bawk mai. "Kan sual e tiraw? " kan inti dun a. Rei tawk fang kan chhuah hnuin kan haw ta a. In kan thlen chuan Eli chuan thleng a lo sil mek a, Zirsanga pawh chaw ei dawhkan bulah a lo thu ran mai. 

"Thari, he tah lo kal teh" Zirsanga chuan a ti bul hmuk a. Thari chuan inthlahrun hmel takin a va pan a. 

"He inah hian eng nge i nih i inhria em? " a lo ti leh khawl. 

"Aw hria e" a ti ve mai a. A dawih aw kher mai. 

"Anih chuan i tihtur i va hlen lo ve, awmpui i nih chuan awmpui angin awm ta che" a ti chang leh fak a. 

Keia insum thei tawh lo chuan, "Zirsang, a tawk aw. Thari hi keiman ka hruai chhuak, min kalpui tura ka duh vangin. In pahniha in chaw eina tal kha chu in nu hian a sengfelin a tifai thei lo em ni? A va thatchhe awm em em ve" ka ti ve ta hrep a. Ka nu te an rawn lang ve nghal. Thil awmzia min zawt a, ka lo sawi. Eli chuan thleg dah rik chawrh pahin, "Duat, innei pawh ni ila, i u nen hian kan inmil chuang lo vang. Kei pawh naktukah ka haw mai ang" a ti nia! 

"Huh.. Duat… a za lutukkk.. Duat. Huhuiii.. Haw daih rawh. Nurse an tam mai" tih pahin ka room ka pan chho a. Ka nui lui nghek nghek bawk. 

"Zothankim" ka ding chawt. Zirsanga awki nelawm loh zet vang ni lovin ka hming puma min kohna vang chuan ka ding khawng lah. 

"Ka nupui tur a nih hi hre rawh. Zah ve deuh hlek ta che" a ti ngam nia mawle.. Ka nu a inrawlh ta vat, "Roomah chho ru, nangni pawh in dik chuang lo, i û hi khatia be tur pawh i ni lo. Zahpuiawm lutuk" a ti sawk sawk a. Ka pa thung chuan, "Kimi nang pawh i nau hi enhranna i nei deuh em ni? Eng nge maw hlekah in inkhik khak reng ringawt mai. Insiam tha ve ve ang che u" a lo ti. Nu leh pa, fa bik nei ve ve te chuan an tihtur an hai lo dun e. Keini an fate ve ve hi kan inrem hlawl lo a ni zawk. 

Thari chu ka text a, engahmah ngai lo turin ka hrilh. Kan inah a awm rei tawh a, kei aiin Zirsanga mizia pawh a hre chiang daih zawk. Mahse, kan innel nghal em em a, ka khawngaih bawk nen, in chhungah chuan kan inkawm chawt a ni ber mai. Zirsanga'n Eli thlavang hauh a duh vanga a nawm amaka a kaih kual ka remti lo hrim hrim. Tin, hei hi ka hre ve kar bawk. He in neitu leh roreltu ber fanu ka ni tih hi. 

A tukah Eli chu a haw ta chuang lo. Zirsanga a duh hleuh hleuh em a, a haw ngam teuh lo. A chhungte reng reng pawh hi an mak! Innei tur tih vanga inchenchilh reng mai. Ngah nge keipawh chu ka lo buai ve chiam le.. Eli ka hmumawh tlat te chu eng vang nge? A mizia vang nge Zirsanga laka ka thik vang? Thik a?! Ni lo, chutiangte ka ngaihtuah tak. A zah pawh a zahthlak. 

Rinpuia a lo haw. Ka mood a tha ta deuh. Zanah a rawn leng ta. A thil min lo hawnsak te chu lawm takin ka lo dawngsawng a, a fel tak tak a ni. Chutia kan rik hlut lai chuan Zirsangate chu an rawn innawr thla boh boh a, roomah hian an tawm thei lo ve khawp mai. 

"Ehe! Kha i lo tha zel maw?"Rinpuia chuan a lo ti vat a. Rinpuia melh run run pah chuan, "Umm hei ka tha a ni mai. Ka kal thei lo va" a ti a. Ngeiawm ka ti leh hle. 

"I tha vat mai ang, a enkawltuin a zir bawk a" tiin Eli a melh zauh. A hrethiam ve vek tawh, a chhan chu a bulah ka inhrithla thin a. 

"Eli hi ka bialnu a ni tih hrilhtu che an awm a ni maw? Heheh.. Mi kamtam ho tak hi chu" ner nâwng chungin a ti a. 

"Hrilh lo ve, ka hmuh che u khan ka hre thiam vek alawm" Rinpuia chuan zaidam deuhin a ti a. An buai thui zel ang tih hlauin, thudang ka sawipui ta daih a. Rinpuia len chhung zawng Zirsanga chu zuk thu ve a! Eli chuan, "Chho tawh ila" a ti sek. A duh tlat lo. Ka ngeia ka ngeizia chu. Rinpuia hi a polite em zawk a. A hawn dawnah ka thlah a, "Hun fal hi kan nei lo ve thei ngawt mai tiraw? " nui chungin a ti a. 

"Nia, a hrehawm. " ka lo ti ve tawp. 

"A pawi lo. Hun dang a awm leh mai ang. " tiin a lamah min pawt hnai a, a vawi khat nan min rawn fawp a. Kei pawn ka chhang let ve. Mahse, infawh reng thu awm hek lo. Kan inmang tha ta a. In chhunga ka luh leh chuan an lo innawr chho mek, ka ner sawk. Rinpuia laka min veng ang hrima khatia a awm ve tlat kha ka hua. Mahse, inhauh ziah chu ka nin tawh vangin ngawi rengin ka roomah ka lut a, ka intifai a. Ka mu daih. 

Ni 3 vel a liam leh tawh tihin Zirsanga chuan a ke a tiche thei ţan a, an rikpui hlut mai. Kei erawh ka ngawi tlat. 

Doctor Ramthanpuia'n a rawn check up zeuh zeuh bawk a. Hma a sawn zel thu a sawi bawk. Tlai khat ka dawr ka khar tlai a, khaw thimah in ka thleng. Kei nu chu ka hrilh lawk tho va. 

Chaw an lo ei mek a, ka kil ve nghal. 

Ka pa chuan, "Rinpuia kha a fel hmel kha le.. A naupangchhe zawk zawk tawh lo bawk a" meinei deuh hian a ti a. Ka nui tawp. 

"Ni ngawt mai. Nghet deuhin ni ru" ka nu chuan a lo ti bawk a. 

Zirsanga chuan, "Nia, a chawm hneh viau ang. A zei pawh a zei hmel khawp kha" a lo ti a. Tielna tawngkam a ni tih ka hai lo. 

Eli chuan, "Mahse, a hmel kha a chhe ve ee" a lo ti hlawl! Ve a! 

"Hmel tha ka lo ti viau asin" zaidam zet hian ka lo ti! Ka runluih a ni reng sia. 

"Kimi te chuan a duhtui vak ring lo la, amah pawh hi en la.. Duhtui thei. anih loh hi" Zirsanga tawngkam kher kher chu. Ka pa te chu an nui hak a, fiamthu emaw an ti. Ka tan erawh meiling ang a ni. Min hmuhsitzia a tilang chu ţêk den tlukin a na. Chaw ka bar lui nghek nghek a, engmah ka sawi lo. 

Zana ka mu tur ka phone ka en chu, msg maksak zet ka dawng ta a. 

"Zahpuiawm khawp leh thinram vek khawpa hmangaihtu che hi i hrethiam thei ngai dawn lo a nih hi. Mi mawlnu" tih thu chu! Number lawng chauh atangin a ni. 

Ka call a, a ring ral ţhak. Ka call leh, a ring ral leh. Rinpuia'n min lo call vangin ka ngaihven zui ta lo. 

A tu phiangsen tak ni ang maw?! 

(Duhtawk leh phawts ❤