Zirsangliana... 2

ZIRSANGLIANA (Part - 2)

Ziaktu: Toni Râlte

Zirsanga tlu reng chu melh leh zak zakin khur zawih zawih chungin ka tlan chhuak ta a. Kan thenawmte inah tlan lutin an kawngkhar chu ka chum nghek nghek a, ka rak tuar tuar bawk. Ka thawm a ring bawk a, an rawn hawng rang kher mai. 

"Eng nge ni ta? " pa ber chuan a lo ti a. Ani hi Sangsangi Pa, Pa Muana a ni. 

"Ka.. Ih.. Zirsanga a thi.. " ka ti bah nuaih a. A ngaihna hriat loh hmel taka min melh a, mi dang pawh an lo tho ve nghal. Tin, ka thawm hre phak thenawm dangte pawn thawm an rawn nei. Kan inah chuan kan inzui phei a. Ka khur chu a reh hleithei lo. Ka room-a Zirsanga thisen nena inchiah piah nuaiha let reng chu an va hmu ta. Pa Muana chuan a mar a dek vat a, "A la phu.. Kal vat ang" tiin mi dang chu a melh kual a. Engtin nge chet an lak dan ka hre mumal lo, Damdawiinah an hruai chho tih ka hria. Pa Muana fapa Zirsanga aia nau hlek turin Zirsanga room-a thawmhnaw a va la tur chu a rak tuar a. An va kal hnai nghal. Awiii! Mipa pakhat hi thisen nen bawk a lo tlu ve reng mai. Ani pawh chu thenawm pa vengva deuhte chuan a la dam leh dam loh an en dik vat a. A lung a lo la phu ve det det a niawm e. Ani pawh rang takin an hruai chhuak ve nghal. Ka hamhaihin ka buai lutuk a, engmah ka hre teh nuaih lo. Ka pa te biak nachang pawh ka hre lo, Pa Muana nupuiin min lo biaksak ringawt. Ka pa te pawh a ţhawng ve viau ngei ang. Asawmi'n min buaipui char char, ka khur a reh thei meuh bawk si lo. Thenawmho te pawh haw ta bik lo chuan kan inah chuan khua kan nghak tlaivar ta a. Khawvar hmain police an lo thleng bawk. Room te an han check zung zung a, kha mi pakhat kha rukru chu a nih hmel viau. Ka nu te room a lo chinglet nasa mai a, safe te chu kar hawn tumin hmanrua nen a lo bei a niawm a. Chu chu Zirsanga'n a thawm hriain a va en ang a, an insual ta anih ka ring. Kan in awm dan han sawi hmasa ta lawk ila.. 

Chhawng thum niin a hnuai ber chu hmun hnihah thenin pakhat chu store roomah kan hmang a, lehlam chu an luah thin a, mahse, a luahtu te hi Khawzawla an zin lai tak a ni. A chhawng laiah choka leh sitting room bakah common room a awm a. Choka hnaihah kan nula room a awm. Common room depah mikhual room leh library a awm bawk a. A chung berah kan room theuh a awm. Ka pa te room hi kan room ep thlang lamah a awm a. Kei kawng hnaih ber room ka chang a, Zirsanga hi chhim lam roomah a awm thung. Ka pa te room leh kan room inkarah sitting room kan dah leh bawk. Ka pa te room ho a va fal deuh vangin thawm pawh kha ka hre ve lo a ni maithei. Bakah ka muttui dan em em kha a mak ngawt mai. Zirsanga nen khan an lo inchai fe tawh awm si a, engmah ka hre miah lo chu mi pawn mak an tih hmel hle. Ka rinhlelhawm rum rum alawm. Mahse, ka thlabarzia hretu te erawh chuan ka tihder lohzia an chiang viau thung. Police zawhna te pawh felfai tak chuan ka chhang ve thei tawh a. Sawi tur ka hre tam lo mai pawh a. 

Ka pa te pawh an rawn zing hawn nghal. Kei pawh ka ziaawm deuh hnu chuan ka intifai a, thil erawh ka ei thei lo. Dawr pawh hwn chi ni nghal lo chuan. Ka insiam a, Zirsanga awmpui tur chuan a mamawh tur te nen Damdawiin lam panin Asawmi leh Sangsangi te nen kan kal ta a. Ka inthiam vak lo, a unaunu tak ni lo mah ila, a laichin hnai ber awmchhun ka nih laia damdawiina ka han kal pui ve lo kha. Mahse, khatih lai kha chuan ka chiâi em a ni. Pa Muana ten chanchin min rawn hrilh vat tho a, operation theatre-ah an nawr lut nghal a niawm e. Chemtea vihna kha a thuk riau a, a kawchhung lam engtin nge a nghawng ka hre lo. Rukrupa erawh kha chu a lu-ah hliam a lo tuar a, an thuisak nghal a, a nak ruh veilam a tliak bawk. Zirsanga chuan a lo bei nasa hle mai. Ka ngei rukna te pawh kha an bo duak mai. Awm ta lose kei thlengin ka tawrh phah thei tlat! 

Ka pain Doctor te biain cabin a lo book thlap a. Zirsanga pawh an lo dahlut tawh. Pa Muana a fel khawp mai. Engkimah ka pa aiawhin a che vek a, insenso ngai te pawh a lo tifel vek mai. Mahse, ka pain a rul leh mai ang chu. Cabin-a kan va luh chuan a lo la harh lo va. Nurse pakhat hian a lo jection mek. A hmel chu a dâng bai mai. Thisen a hloh hnem bawk a ni. 

A taksa dangah hliam em em a nei lo hlauh, a chal sir a kak a, an thui tawh bawk. A ser ve ngei dawn anih hmel. A harh hun nghakin kan thu thap ringawt. A thaw sâk sâk a, a muttui hmel hle. 

"U Kim, kei chu a thi i rawn tih khan ka nghing dawt. Ka sawi thiam lo, ka za vek mawle", Sangsangi chuan ti hlawl a. 

A star tih ka hre tawh a, mak ka ti hran lo. "A thi angah ka ngai tawp tawh alawm.. " ka lo ti ve mai a. 

Asawmi chuan, "Sangsangi tawngtaina Pathianin a chhang a nih hi" a lo ti fiamthu a, chu chuan kan boruak a rawn tinuam sawt. 

Zirsanga lu chu a che hret hretin ka hria a, ka va hnaih nghal. A rawn meng siar siar a, a mit a khap sek sek bawk. 

"Tui" a ti sup a. Ka intir nghal vat. 

"Ka thi emaw ka tia" ka muttir leh hnu chuan a ti a. 

"Kei pawn ka tia" ka lo ti pek! Asawmi'n puitling takin, "U Kimi hian Pa Muana te a rawn ko vat a, an rawn chhan hman hram che alawm" a rawn ti ta a. Zirsanga chu a tep chap chap a, "Ka lawm e" tiin min rawn melh. Chauh hmel zetin a chhing leh ta diar diar a. Ka khawngaih ta hle. Ţawng thu chhe lo ah thi ta se, vanram a kai awm bik si lo va. 

Nileng deuhthaw chuan kan awm a. Rawn kan an awm ve nual bawk. Asawmi leh Sangsangi chu an tangkai hle. Eng emaw mamawhah an tlan zung zung a, ka tluk lo tak tak a ni. Ka pa te pawh an lo thleng tawh a, an intihfai zawhah an rawn kal ve nghal. Ka nu chuan ngaihtuah hmel zetin a melh vawng vawng a. Ka pa erawh chuan thil thlen dan min zawt leh. Ka sawi ngai bak sawi tur ka hre lo. Ka pa ka hmuh hian min mawlhtu eng emaw a awm zel a, ka nau kha a fa a ni vr lo tak tak em tih zawh tawp ka chak fô! Ka ngam chiah si lo. 

An zin chau ve bawk si a, keiman ka riahpui mai loh chuan. Ka hreh lem lo bawk. Ka tihtur a ni ve bawk nen. Sangsangi te pawh ka pa te rual chuan an haw ve a. Khaw thim tawh hnuah ka pa chuan chaw min rawn pe leh. A driver pawh rawn dahtir mai tur a nia. Ka ei tlem khawp mai. Zirsanga lah ei chi a la ni si lo. A rawn harh zauh zauh chauh a, a chau em em rih a ni tawp. Mu nghek rih se la a zia mai ang. Dam lo han buaipui vel hi ka zeihawi vak lo a, engtin emaw buaipui vak a ngai ang tih ka hlau anreng. Thutthleng seiah ka mu ve mai a. Muttui erawh a har a ni. A hma zana ka hlauhna khan min la kiansan tak tak si lo va. Ka bul maiah thi leh dam kara leng Zirsanga a mu bawk si. Nurse te an rawn lut zut lem si lo. Phone te khawihin engtin tin emaw chuan ka lo muhil ve hram a. 

Chutiang chuan kar hnih lai kan awm ta a. Ka nu nen kan riahchhawk a, Zirsanga pawh a zia ve zel. Thari pawh chhiat tawk mah nise, kan buaizia hriain kar khat hnuah a rawn chhuk ve leh mai. Ka pa phei chuan a khak nghe nghe., "I chhungte ngaihdan pawh a ni lo vang. I nu meuh a boral a, i rawn chhuk hma mah mah a ni" tiin. 

Mahse, "A.in buai dawn em asin. U kimi'n dawr a nghak dawn bawk si, ka pi lah damdawiinah awmpui a ngai ang a. In lama che tur an awm si lo va" a ti sam èt a. A dik tak chuan a hnua a sawi leh hmangin a nu bak laichin a nei tawh lo bawk a, a putea te nupa nena khawsakho chu nuam a ti tehchiam lo a ni zawk. Tihian kan bulah khawsain kan in atangin pasal te nei ve se a tha mai. A khawngaihthlak em mai. 

Chhun lamah dawr ka nghak a, zan lamah ka riak ta zawk a. Ka nuin chhun lam chu a han vil thei a, Thari'n a chhawk zeuh zeuh bawk. Zirsanga chu a tha chak khawp mai. Rukrupa kha a dam fel tawh angreng a, mahse, a vanduai khawp mai. A chhuah rualin police kutah a awm dawn si a.mahse, engmah a lak hman loh bakah Zirsanga kut a lo tuar ve hrep bawk si, Ka pa chuan ngaihdam mai pawi a ti ta lo va. Police te nen sawihoin an inrem ta niin ka hria. A hmel pawh ka hre tawh lo, ka hmu duh lo. 

Zirsanga thiante an fel a, an lo riahpui ve zeuh zeuh bawk. Chhunah a hman hmanin an lo awmpui chang a awm bawk. Rawn kal ngun em em hmeichhe pakhat a awm bawk a. A bialnu a nih ka ring ve tawp. Nunui a ni a, a felin a tawng duh a, a hmel pawh a tha khawp mai. Zirsanga te nen an inrual vel khawp ang. A rawn kal tawh chuan rei pawh a awm hmain ka chhuak daih zel. Chance te an neih ve duh takin ka tia. Eitur a rawn kensak ziah a, vawikhat phei chu tshirt var nalh zet a rawn leisak. Ka nu pawn fel a ti khawp mai. Zirsanga erawh chutiangin a hlim vak hmel ngai lo. A zia ve hrim hrim kha a nia. 

Chhuah a dil chamchi a, damdawiin chu a ning ve thawkhat tawh bawk a nia. Doctor te pawn chhuak thei mai tawh tura an ngaih laiin vanduaithlak takin a pum an thuina kha a septic pek a! A awm leh rih a ngaih phah. A thinchhe hlur tawh mai. Zan khat ka han riak phei chu mi hrawk reng mai a, kei ka zaidam em rm bik si lo, kan han inhau leh rih. 

"Ti nge Nunui a lo kal hian i chhuah ziah a? " a ti chang rát a. 

"Chance te in duh ka ring "ka lo ti fel ât a. 

A ner nawk. "Ka hne nak alaia, ka nu lah hian be tha hawrh reng zel bawk si. He nu vang pawh hian chhuah ka duh" a ti hluk hluk a. 

"A fel reuh em kha. A ngaihsak tak tak chein ka hria" Apple vel pah chuan ka lo ti a. 

"A fel lo. Mi lem anih kha.. In mawl sia, in hrethiam chuang lo vang" a ti leh zêk!, ka thinrim duh lem lo. A damkawr thinchhia huatthu chhia chu ngaia neih sak mai chi niin ka hria. 

"Khamizan khan ti nge in thawm kha ka hriat miah loh le? " tiin thudang ka sawi ta daih a. A mut dan siam rem pah chuan, "I muhil der aniang. " a ti nghut. Ka nui hawk a. 

"Min lo kaihthawh khan ka harh chiah" ka ti a. Apple chu ka pe a. 

"Tual ka that lo chu a tha hle mai" a ti a. 

"Chu chiah, mahni invenna pawh nise tual that kha i ni ve mai dawn sia" awlsam zetin ka lo ti a. Min ngei hmel fe hian, "Nang hian min ngaihtuah ve miah lo a ni maw? " a ti vin leh ţhak. 

"Ngaihtuah eee.. Pa Muana te pawh ka va kaihthawh kha" ka lo ti ve hlar a. 

A nui sak a, "Dik ve reng. I hlau dawn bawk sia tiraw" a ti dam duai a. 

"Awii ka hlauhzia kha tun thleng hian ka la mut theih loh phah" ka lo ti hliai a. 

"Awm lo la chu kan thi ve ve ang" a lo ti nghet charh a. Min rawn melh kul bawk. 

"Thi kher lo vang" ka lo ti niah niah a. Nurse an lo luh vangin ka thawhsan ta a. Khatia ka riahpui ve zeuh zeuh chhung khan inbiak pangngaiin kan inbe ve ta fo a, misual leh ngeiawm em em erawh a lo ni bik lo tih te ka hriat chhuah phah a. Unau kan nih anga inpawh na te pawh a awm chho ve zel a. Unau pa ang tak taka pawm erawh a harsa deuh rih ang. 

Damdawiin atanga kan lak chhuah zanah chuan a thiante pawh an rawn leng ve hlawm a. A inmet fai vang tawh a, hmuh pawh a nuam ta deuh. Keipawh thingpui te lumin ka buai ve hle. Thari nen a rooma eitur kan dah luh dawn chuan an titi avang chuan kan ding tawp. 

"I û tak tak a ni chuang lo va, min tihpui mai rawh" tih ri avang chuan. Thari nen kan inmelh a, kan nui ringawt. Thawm kan nei hmasa a, kan va lut a. A lo sawitu niawma ka hriat Danny chu a lai khawp mai. Mahse, engmah hre lo ang chiahin ka awm ve tlat. A nuam ve alawm startu neih te chu.. 

"Û, thingpui in chhung chu thu ve ru" Zirsanga'n a ti a. Kan thu ve mai. An titi kal lai kan tihtawp avang erawh chuan Nunui chungchang an sawi ta daih. 

"Min lo hruai ve ru a ti reng a, i thinrim leh dawn sia, kan hruai ta lo" Hruaia chuan a ti a. A nui hak hak bawk. Zirsanga chuan a hmui a tipawrh a, "Rawn lang fo lo se ka mood a dik a ni mai" a ti nghut a. Ti nge maw a fel tehlul nen a huat tlat ni. Kan la chengho rei lo va, a love line engmah ka hre lo. Ka ngaihven lo bawk nen. An in zawhah kan seng fel a, kan chhuahsan ta a. 

Zirna lamah an zirsan thui tawh vangin na eng emaw la nei mah se, class a kal lo thei lo va. Bike erawh a khalh ngam rih lo. Danny khan a rawn lam mai thin. An thianho hi pali an ni a, an changkangin an sual lem lo. Ka lakah ania ka tih. Kei pawh dawr lamah rilru ka pe leh thei ţan a. Ka pa pawh hna lamah a bur ve leh thei tawh bawk. Scholarship dil hun lai a ni bawk a, xerox leh passport photy tih vel rawn tihtir an indawt zut a. Kan buai ve angreng. Asawmi a fel èm zawk a. Hlawk falua lo mah se, mahni puala eizawnna ka nei chu ka lawm ve hrim hrim. 

"Vawiin chu lunch ka treat ang che. Ka rawn phei ang a, in dawr bulah khan ei mai ila" Rinpuia msg ka hmuh chuan ka khi sak. Ani hi damdawiin kan awm chhung khan a felin a tha em em a, vawi 3 lai chu a rawn lang ve. Zirsanga erawh chuan a hmu ve lo, a muhil daih zel a. Kan inpawh tawhin inngaizawng ang chu kan ni tawh mai. Amah a naupang chhe tawh bik lo va, kei nula puitling ka lo ni bawk nen, buaina kan nei vak lo hle. 

A rawn phei ta reng a, Asawmi nen chuan an inhre sa tawh a, an ri leh hlut mai. Ka dawr piah lawka Restaurant lam chu kan pan ta a. Asawmi pawh kan sawm naa a order ta mai. 

"I nau chu a tha zel maw? " a ti a. 

"Umm class te pawh a kal tawh alawm" ka ti a. Kan inah vawi khatmah a lo la leng lo, lo len a tum apiangin keima lamah buaina a awm ziah. Chhuanlam ka siam zel. A chhan ka hre bik lo. 

"Karlehah kan zin dawn a. Mumbai-ah, zin hmain rawn len ka duh ania" a ti a. Eitur an rawn dah a, "Umm i lo leng tawh dawn nia.. "Ka ti ringawt. Eitur chu ka ei nghal mawlh mawlh. A ţâm tawh bawk a ni. Engti turin nge an zin dawn tih pawh ka zawt lem lo. 

Kan ei zo va, bill a pe a. Ka dawrah kan phei. Zirsanga te an lo awm kûk mai. Kan luh hma atangin ka va hmu thei, min rawn en chìk ngang mai. 

"Kha.. I va tha tawh ve.. " Rinpuia zawk chuan a ti ta hlauh a. Zirsanga buai nak chu ka va hmu thei, mahse, pangngai takin, "Umm hei ka tha ve zel e" a lo ti a. 

"Rinpuia a nih hi. A lo kan thin che a, i muhil zel a.. " ka ti ve zat a. An inchibai laia Zirsanga mitmenga eng emaw lo lang zawk kha eng nge. anih ka hre lo. Mahse, eng emaw chu a awm. Rinpuia chuan, "Ka phei nghal mai ang, hnain min hmuak sia" tiin min rawn en a. Ka lo bu nghat nghat, ka va thlah a. Ka luh rual rual chuan, "Makpa tur chu'! A va smart ve " Zirsanga'n a lo ti nghal. Ka nui ve ringawt. 

"Tak taka a fel hmel kha.. " a ti leh a. 

"Fel e, a puitling tawh alawm" ka lo ti mai a. Document an lo xerox leh a lo nia. Danny erawh a tel ve lo. 

Zanah ka pa te chu Falkawnah an kal a. Ka rooma ka chho tur leh Zirsanga rawn chhuk mek nen kan intawk a. 

"Khaw nge i kal dawn.? Test in neih dawn kha, zir ve la" inla û takin ka ti a. 

A ding det, chiang zeta min rawn melhin, "I nau angin min en tawh tak tak em ni? " a ti ta a. 

"En lo che mah ila, ka nau chu i ni tho alawm" ka ti sam êt a. 

"Huh.. Ni rawh se.. Kei pawn û ang tak takin ka en che alawm.. Ka chhuak lawk dawn" tih leh kal a rual nghal. Engmah thil dik lo awmin ka hre lem lo. Nula a rim ve dawn te pawh a niang e. 

Ka pa te lo hawn lai pawh ka hre leh pek lo. Tun lai mut ka duh dan em em hi. Ka harh chuan kan room lrh ka pa te room inkara thutkhawmna ah chuan an ţawng lawng lawngin ka hria. Ka pa tawng ri niawm tak te pawh ka hria.. Ka tho va, kawngka ka hawng a. 

Zirsanga leh hmeichhe pakhat sam sen thar mai, ngo zet hi thutthleng seiah an lo thu kun lup a. Ka nu leh pa te chu an ep chiahah an thu bawk. Ka va chhuak phei ta law law a. 

"Hei i nau hian nupui a rawn ru ringawt a nih hi. A nihin a ni lo lutuk. " ka pa chuan a lo ti ngjal bawrh bawrh a. Zirsanga te lam chu ka va hawi a, min lo en chiah. A ruih hmel, hmeichhia pawh a ruih hmel tho. 

Sawi tur ka hre lo. Ka nau tak tak a ni lo va, ka inrawlhna turah ka ngai hran lo. 

Ka pa bawk chuan, "Zirlai ve ve in la nia, in la naupang bawk nen, Eli pawh va haw leh phawt rawh. Ka va thlah ang che. I chhungtr pawh an thinrim ngawt ang. Mama pawh MA tal chhuah phawt a tha. Nakinah inneihna nikhua a la tlai hleinem" a ti dap dap a. A patling hlr mai. Ka nu pawh chuan, "Ni e, ngaih loh lamah ngai suh u. In la innei dawn chiang lutuk.. Tunah chuan a rem rih lo" a lo ti ve a. Kei chuan Zirsanga te zawk chu ka lo khawngaih. An zah ve hmel si a. 

"Ka neih tur a nia. A ho.. Anih loh chuan ka chhuak mai ang" tih pahin a tho thurh a. Kei chuan rang zetin, "Nia pa, zanin te chu riak ve mai se, a tlai tawh sia.. Hawtir leh pawh chu" ka ti vat. Zirsanga chuan min rawn melh râw pahin, "Engmah lo sawi ve suh" a ti chang fak a. Ka nghing lawih. Ka nu a inrawlh ta vat a. Ka thintertek a chhuah hmain ka kalsan ta daih. An awm awmin awm ang hmiang, ka ţan ve em em a, khatiangtea min tih khanglan ni. 

Zinga in hnuaia ka chhuk chu Eli chhungte niawm tak leh ka pe te chu an lo thu khawm a. Zirsanga te erawh ka hmu lo. Thari ka pui zung zung a, roomah ka phone ka dah vangin la turin ka chho leh, ka room luh dawn lai chuan Zirsanga a lo chhuak ve chiah a, kawr a ha lo. Boxer erawh a ha ve. 

"Nangmah vang vek a nih hi" a rawn ti hriam hraih a. Ka ding chawt. Min rawn melh tur ngang mai. Eli a rawn chhuah ve chiah vangin ngawi rengin roomah ka lut ta daih a. 

Eng nge a awmzia le? Kha Zirsangliana khan engvangin nge min hnuhluh ve hram a tum tlat le.. Mai mai a.. 

(Tawk rih. 😂