Zirsangliana 11

ZIRSANGLIANA.. (Part- 11)

Ziaktu: Toni Râlte

Rinpuia chu kan melh tawn zak zak a, chhan mai ngaihna ka hriat loh laiin, Zirsanga chuan, "Kimi hi a thiante nen an inhmu a, an zuruiin an lo hawnsak vek a, ka va hruai a nih hi" a ti ta a. Kei pawh chuan, "Nia" ka lo ti ve nghek. 

Nui ruh ruh chung hian, "Anih vel ka ring" Rinpuia chuan a ti duh lek a. 

"Eng nge i tih ve zawk a? " ka lo ti. 

"Hei hna ka nei a, He laia thawkte zingah hian biak tur ka nei a" a lo ti ve mai a. 

Zirsanga chuan, "Kal ang. Anih aw.. " tiin Rinpuia chu a buk khum zauh a, min rawn mitmei a, ka zui nghal vat. Rinpuia ber kherin min hmu chu nuam ka ti lo tawp mai. Ka pa te bulah te a sawi reu reu ang tih ka hlau. Zirsanga lah chuan engah teh vak a ngaih hmel si loh. Amah zawk chuan scooty chu a khalh a. Kan inbe vak lo. 

In kan thlen chuan ka roomah chho nghalin ka intifai tha leh. Ţawp riaua ka inhriat vangin. Ka zu in ve ringawt vang khan ka pentawng nge, ka ni nghulh mai a, ka chau ka luak te a chhuak bawk. Tukthuan kan ei zui ta bawk a, Nimbu zai phel phawk phawk hi Zirsanga chuan, "Kha i chawah khan chawm rawh a tui hi", tiin min pe a. Ka chhungte chuan mak an tih hmel deuhin ka hria. 

"Zanah chhuak tawh suh ang che u. Kohhran thil a nih loh chuan" a ti ta chiah a. Ka lo ìp chawih. 

"Aw le" ka lo ti thliam a. Min hauh vak hmain ka kham daih. Min hau ta chuang lo naa ka zah ru tho mai. Dawrah pawh ka awm a nuam lo nileng, ka ni nghulh reng chu tih reh dan ka hre si lo. A tuka hetianga an awm ziah chuan engtin nge zu hi an in ziah duh zawk le tih te ka ngaihtuah ta vel mai mai. Zirsanga'n min lo text zeuh zeuh a, mahse, chutia han lawm viauna tur lam erawh a ni lem lo. Rinpuia then tura min nawrna a ni mai. Ţhen ngawt dan la hre si lo, mahse, khatia Zirsanga nen min hmuh dun vang kha nge ni dawn ni nilengin Rinpuia chu a reh hmiah mawle.. A buai pawh a ni maithei. 

Tlaia in ka thlena tuilum sa ver vawra ka han inbual takah chuan ka zia ta hawk e. Luak chhuak tlem chu la awm mah se.. Zirsanga pawh a rawn haw tawh a. Study leave an nei tawh dawn a, ani ve hi a zir ngai si lo. A pass pawh ka ring nek lo ve. Hla zir a nia, ka peih ta ngang lo. Sawi lawk lem lovin Rinpuia a rawn leng ta bawk si nen. Ka zep lo, Rinpuia hi ka hne thut. Zirsanga mitmei ka veng bawk si. Ka awm dan chu ka va ngei tak. 

"Ka zin leh dawn a, Chawngte lamah daih" a ti a.ka lo lawm ru viau! 

"Hna thil bawk mi? " ka ti satliah a. 

"Ni chiah lo, ka putea'n ram a lei a, chu chu an buai deuh a, zuk enfel ka duh deuh a" a ti a. 

"Anmahni kal ve mai se" ka lo ti vat. Amah ngaia thlahlel angah min ngai maithei. 

"An buai ve deuh a, bakah a ram lei chu a zau a, min sah thlaksak ve dawn a. " a ti leh mai a. 

"Chawngte daih daihah i awm peih chuang ami? " ka lo ti leh hû.. 

"Awm peih chuang lo ve, mahse, nakinah ram ngah tluk hi chu a awm lo" a ti ve a. A dik ve reng mai. Thingpui ka va lum a, in leng ka neih hi chuan Thari ka lumtir ngai lo, khawi lai mi hausa fanu ang maia awmpuite tirh kual reng hi kan mizia a ni ve lo va, Thari pawh hian a chhungte tak tak angin min ngai reng bawk. 

Thingpui ka thlit lai chuan, "Han infawp leh na teh u aw" Zirsanga'n ka beng bulah a rawn ti sur sur. Ka phu chiang bawk si. 

"Mawl suh" ka lo ti ringawt. A nui miah bawk so lo va, nuam ka ti lo. Thingpui chu ka siam kep ve a, "Tha deuhin zir rawh. Kan infawp lo vang" ka ti a. 

"Ka nep ngawt mai" a ti ringawt. Ka pa a rawn lut thut, a inthiar dawn a lo nia! Min ringhlel em lo vang chu maw. 

"I nep lo" ka ti ringawt. 

"Farnu ngaihzawn ching ka nih hi. Bialpa nei lai ngaihzawn zing" a ti nghut a. Biak hman lohin a pindanah a chho daih. 

Rinpuia pawh a leng rei lem lo. Ka va thlah a, min fawh a tum chuan, "Sikhar ka hmuam" ka ti tawp! A ngaihdan a nih hmel viau loh. Sikhar ka ei ngai tawp si lo va. Engtin nge ka then ang aw.. Ka rilru a tibuai ve deuh. A chang chuan ka inhua, ka nuhrawn fapa ka duh ve ringawt chu! Miin hre ta se, min endan tur leh mak an tih dan tur te, chung zawng ai chuan ka pa te ber hi a ni. Ka zak dawn lutuk. Zirsanga hi chuan pawisak a nei vak dawn lo tih ka chiang, min duh bur a, min hauh bur tih ka chiang. Tihnat a awlsam ang chiahin tihlawm pawh a harsa hran lo vang. Kei aiin a naupang bawk nen. Kei tal hian kawng dik nia ka hriat chu ka zawh a ngai a ni. 

Zing dar 2 bawr velah ka nuin min lo kai tho va, phawk zetin ka va tho. "I nu Zaui pasal a boral a nih chu, damdawiin atangin an rawn phur dawn mek, Mama nen va lang ve rawh u. Keini chu naktukah i pa nen kan va kal zawk mai ang" a rawn ti a. Mak ka ti hle. Nu Zaui chu ka pa thawhpui a ni a, a thawhpuite zinga kan ina lo kal awmchhun a la ni maithei. Ka nu nen an lo inkawm ngeih ve lehzel bawk a, nu thau pui, nuih duh zet a ni. A pasal hian zu ngawl a vei ve hlauh mai a! A mah aia kum 10 zeta naupang a ni. Fa pawh pakhat chiah an nei reng a, a pasal chu zu seh vangin a thi ta nge nge a nih dawn chu! Kan veng leh an veng erawh a inhlat deuh. Zirsanga pawn thawm a rawn nei a, a peih ka rin viau loh laiin kei aiin a rawn inpeih hma. Shawl ka bat a, ka ha ka nawt sawk sawk a, make up pawh ka inhnawih lem lo. Kan chhuak ta nghal a. A vawt viau tawh mai. Motor kan keng ta zawk a. 

"In infawp em? " a ngawih vung vung hnuah a rawn ti hlawl! Ka nui hawk. Kan kal chhan leh a tawngkam intuha lo lutuk chu! A vei ngang a nih dawn hi a. 

"Aih, sikhar ka hmuam ka ti tlat a" ka ti ve mai a. A khi suk. A hmel chu ka va thlek a, a sam buk lek lek chu a bek veilamah chuan a nawr khawm deuh a, a hnawk niaih bawk. A hmel tha tawp. A tho phang mah nise, ka hmu hmel tha, a mitmeng nung sar leh uk kharh chu a thuk raih a, kei aia upa ang maiin a lang. 

"Min va melh rei tawh ve"min rawn en chuang miah si lo hian a ti sup a. Ka hawi sawn rang kher mai. 

"Rinpuia ai chuan ka hmel tha zawk tiraw? " a ti leh a. 

"Umm.. Mahse, i lerh" ka lo ti nghat a. 

"Lerh ve thin, i lo lan atang kha chuan nangmah vang zelin ka lerh tawh" a ti duah a. 

"Inla zei vel suh" ka lo ti leh. 

"Ka inchhiar nasa alawm.. Ka zei telh telh dawn" a ti thuphung a. 

Nu Zaui te in kan thleng, mipui pawh an lo pung khawm nual tawh. Kan va lut ve a, tihfel ngai te kan tifel ve zung zung a. Tihtur vak erawh a lo awm tawh mang lo. Kan thlen atanga rei vak loah ruang pawh a rawn thleng a, Nu zaui a ţap hawm hawm mai. Ka khawngaih khawp mai. Nu Zaui hi nula senior, pasal a nei tawh lo vang an tih tur ang kha a ni thin a, A nu leh pa te boral hnuah a nuta te in atangin a indang ve a. Amah a inchawm thei bawk a, fa te pawh lak ve mai a tum laiin tuna a pasal hian a rawn hel ve tlat mai a! Nu Zaui hian a tirah a duh bik lo an ti. Zu a in bakah kan kum a inthlau si a, min la iai leh vat ang tiin a lo hnar ve a. Mahse, an pa hian a kalsan duh miah si lo va. Tichuan, tlan koh ang lekin an inhruai ve a. Tihian Nu Zaui inah an pa pawh a awm ve ta nghal a niawm e. Zu a in thin tih lohah chuan mi sual a ni hran lo, a phak ang tawkin hna te pawh a thawk ve nasa. Nu Zaui hian fa pakhat bak a nei thei ta lo va, an fanu chu kehthei dawm takmeuhin an dawm ve a. Tun hnaiah an pa chuan zu a in nasa zual tlat mai a. A thin a chhiat tawh bakah a kal lam thlengin a nghawng chho va. A pum chhe bawk nen, a behbawm a tam tawh lutuk a. Damdawiin an lut ta hial kha a nia. Rei pawh a awm hmain tihian a boral ta mai a ni. Zu hi chuan thatna hi a va nei lo tak em… "ka in thiam kei chu" ti nazawng te hi chuan an in thiam loh hun an thleng vat mai zel. Zu hi in thiam chi a ni lo, a tawpah nghawng a nei tho tho. Chhungkaw engzat nge a tihkehdarh tawh ang tih pawh ngaihtuah tham tak a tling a ni. 

Ruang hmu phak rengin thuthmun kan rem ve a, ruang va kil ve em chu kan ngam bik lo. An veng thalai an felin zai pawh a nuam hle. Zirsanga pawh a zai ve sup sup a, hla a hre tlem si, mi dang hriat phak si loh hian a thluk milin a thu a phuah a, a sa ve ul ul zel a. Ka hre pha si, ka zai hleithei lo, ka va sik thin. A nui duh hlek si lo. Ka va ngei tak. Eitur te an rawn sem a, kan ei zawhah, "Zung ve lawk ang. Ka muthlu mai dawn" a tih vangin kan va intiharh ve a. Ka zun lai chuan min lo veng a, hmeichhe pakhat rawn zun tum bulah, "Kan nu a zung lawk a" a tih ri ka hriat chuan ka nui tawp. 

Nu Zaui te in bul lawka dawrteah chuan coffee a lam theih a, thingpui in tho mah ila ril a la tam deuh bakah coffee nge nge chu tiin kan va lam ve a. A kawtah chuan kan in dun a. 

"Sawng thalai zozai zingah sawn nangmah aia hmel tha ka hmu lo renh reng" a rawn ti hlawl. Ka va melh kâwk a, "Over lo mai teh" ka ti hlak a. 

"Tak taka nang aia hmel tha ka hmu ţeuh mai. Kan sir ami phei kha chu a sexy tawp, a hmel kha. Mahse, vanduaithlak takin Kimi a ni ve lo va" a ti leh duah. Ka hlim tho si, a inla zei vel lutuk chu ka ngei bawk si. Ka chhang peih tawh lo. 

"Naktukah dawrah kal suh ang che. Ka nute an chhuak dawn a. Inah inawm nileng ang" a ti leh. Ka thaw hawk ringawt. Dawra kal chu ka tum vak lo sa hrim hrim, tlaivar chiah lo mah ila, a mi nghawng hi a na ve thin a. 

"I thu vek alawm, pu" ka ti zauh a. 

"Kim-ek" a ti hluk. 

"Zir-dul" ka lo ti thung. Kan nui char char. Coffee in zawhah kan lut leh a. Khawvar thleng kan thu ve ta reng a. Kan muthlu êm lo ve. 

Zingah phak chuapin in kan thleng a, ka nu te pawh an lo tho tawh. 

"Dawrah ka kal lo mai ang. Chaw pawh min eisan mai ru, ka mu lawk dawn" ka ti a. An rinsa tho a ni bawk a, engmah an sawi lem lo. 

Ka mutui ngei mai. Ka phone riin min tiharh a, Zirsanga a lo ni. 

"Ka ril a tam ania, chaw ei tawh ang" a rawn ti a. Ka tho ve mai. Ka inphih fai a, chokaah ka chhuk a. Thari pawh a lo chhuak ve daih! 

Chawhmeh ka tilum a, ani pawh a rawn chhuk ve nghal. Half pant dum a ha a, bata silipar a bun thlep thlep bawk. A inhmeh zêk. 

"Zawngtah kha ziah belh ang, kan bawl dawn nia" ka ti a. 

"Tul lo" a ti hmuk. Ka va melh a, "Eng nge" ka ti hliai a. 

"A rimchhia" a ti leh nghut. Ka nui hawk, "I va zak lo tak.. zirsanga.. Dula" ka ti chiam a. 

"I ngai dâm em mai a.. " a lo ti thung. A nui ve tho. Chaw ei chu ka siam a, chaw a lo khawrh thung. 

"Chaw te hi khawpui inla miliam ho lah hian tlem tete hian an khawrh a, thingtlang mikhual an neihin a hrehawm thin, chaw an heh a, chaw lam reng te a hrehawm tih an hrethiam lo aniang. Mikhual neih te chuan lian zet zeta khawrh thin tur" tiin lian fe hian a khawrh a. 

"Mikhual kan nei mi? " ka lo ti el a. 

"Nei lo. Mahse, ka ei nghek dawn" a lo ti a. Chawhmeh tam lo mah se, kan ei tam dun ve viau mai. 

"Nupa kan ang e, a nuam" a ti leh thâwr a. 

"Ei mai mai teh" ka lo ti hmuk. 

"I lai a nih kha, a ho lutuk, tumah an awm loh hi" a la ti zui. Ka lai chiang alawm. 

"Thleng hi sil la, ka sengfel ang" ka ti a. A bu nghut mai. A thleng sil lai chu a rukin thla ka laksak! A inhmeh durh durh tawp. A zai pah rût rût bawk sia. Nupa chu kan ang ve viau tak e. Chaw ei khamah sitting roomah kan thu khawmuang a, sikret a zu pah. 

"Eheee! Enteh, Eli a ni em? Hei hi" tih pahin ka phone ka entir a. 

"Nih hi.. A va tlahniam sawt ve" a ti duh lek a! Kan Eli chu a bialpa thawn tur niawm tak saruaka a inenglo kualna video chu a bialpa in a tihdarhsak nge, keini thlengin kan lo hmu ve ta hial mai. A hmel that reuh nen, a â hle mai. A bialpa reng reng pawh han tih-leak out sak kher! A rilru chhiatthlak mang e. 

"I rilru a na awm" ka tih khum a. 

"A ho ee, khatiang ka dawng zing lutuk" a ti sam èt a. 

"Khawi min entir ve rawh. Tei hian a thawn ve tawh che em? Mawh.. " tiin ka ter at at a. Va hur vang lam ai mahin mizo an nihnaah en chakna hi a awm ve thin a. 

"I ho e a. Ka sawi awm lo em mai. Awm mai mai teh" a ti hluk a. 

"Anih Ti nge Eli awm lai khan min tihduhdah em em a" ka ti ta a. A sikret paih pah chuan, "Sual hek che. Eli kha thik la ka duh a, i thik duh lo anih kha" a ti a. 

"Khang laite chuan min la duh loh kha" ka lo ti a. 

"Ka sawi tawh kha.. Phai atanga i rawn haw hma atang khan ka duh tawh che, in chhungkaw thlalak te hi ka en nasa thei lutuk" a ti ta mawlh mawlh a. Mak ka lo ti nasa. 

"Ka hmel vangin maw? "

"A niang, ka hre si se lo. A ninawm" a ti leh bawk si. Hmmm, a va dawhthei lo tak. 

"In chungah chho ang" tih pah chuan min rawn ban a. 

Pangchan ka chak tlat! "Ka ke a nâ" tiin ka ner kual a. 

"I pangchan ve dan chu leh " tih leh min pawm a rual nghal. Ka rit lem lo bawk a, min zo nelh nelh hle. A roomah zawk min pawm lut a, a khumah min nghat. Ka hawi kual a, a room hi ka lut ngai vak lo va, ka rin aiin a fel fai. 

"A va fel fai zawk ve" ka ti a. 

"Thari ka tihtir alawm" a lo ti sam èt. 

Woofer a va on a, Mizo hla lungkuai deuh deuh a select a, a play nghal bawk. Parda chhak lam chu a va phelh a, room eng lutuk chu a tilang thim ta deuh. AC a on nghal bawk. Ka bulah a rawn thu a, "Eng nge kan tih ang? " a ti thawp sut a. 

"Ka hre nang" ka lo ti ringawt. 

"Infawp ila" a ti a. A nui duh miah lo lehnghal. 

"Infawh pawn a bak kal loh tur" ka lo ti ve sak. 

"Tehreng" a tih rual chuan min rawn hnaih nghal ruak a. Ka tukkhum lama tham pah chuan min fawp nghal dek dek. Kei pawh chuan ka lo chhang let ve nghal. 

Hmui phawi miah lo chuan kan inhne ngat ngat mai, khumah chuan min bawh thlu a, ka inveng ran tho. Ka awm bawr te chu a rawn chul kual a, ka lo phal ve mai. A sehhmeh a ni ve a! Hehe.. Ka kawng hnuai lam erawh a khawih bik lo. 

. "ka thaw a chham dawn" a ti chhuak hlawl. A thaw hlawi hlawi a. Kei pawh ka bang bik lo. 

"Fawh nuam nu" a ti zawi sup a. 

"Nang fee" ka lo ti ve a. Mu pah chuan kan titi ta mai mai a. 

"Tihian kan ni nghet zel ang a, ka pa ten an hriat hun hunah an awm dan a zirin kan tlan bo ang. Pawisa pawh ka khawl nual tawh" a ti zung zung a. 

"Ringawt a che. Khaw nge kan tlanbo ang a" ka lo ti a. 

"Ka nu u, ka pute khua Khuanglengah kan kal daih dawn nia. Min rawn zawng peih lo vang" a ti leh puat a. 

"Ka nu te hi an zak dawn eee.. I ngaibtuah ve ngai lo mi? " ka ti a. 

"Nang aia nasain ka ngaihtuah tawh. Min ngai naupangchhia vak suh. I rin aiin ka ngaihtuah thui ang. Mahse, Kim, hmangaihna hi chuan unau pianghmun lo karah chuan thil a lo tithei em a nih hi. Ka hmangaih che alawm" a ti hniam raih a. Min rawn melh ran bawk. Chutih laia a hmel thutakzia leh thatzia chu ka sawi thiam lo zawk. 

Ka inrin hmain, "Kei pawhin " ka lo ti sap a. Min rawn fawp leh chat. 

"Rinpuia hi chingfel phawt rawh" a ti leh a. Nuam lo tihnain ka khat leh tawh. Rinpuia awm ve tlat hian keimahah nuam tih lohna a thlen, bialpa nei reng chunga naute ngaizawng duh hmeichhe khaw lo tak ka ang em a ni. Ka ni reng bawk a ti mai ang. Zirsanga hian ka nunphung a tikhaihlak vek tawh a ni. 

"U Kim" Thari aw ka hriat rual chuan ka tho vat. Ani pawh a tho ve nghal a. Zirsanga room atang chuan ka chhuak a, "Eih"ka ti lauh lauh. 

"Ee.. In la muhil emaw ka tia, Enteh, thil hrilh tur che ka nei a" a ti a. In hnuaiah ka chhuk nghal. 

"Putea te khan kan buai sia, tlem azawng min lo thawn thei hram lawm ni? An tih vangin thawn turin ka kal a. Bank-kawta ka awm laiin U Rinpuia leh hmeichhe pakhat hi an rawn inzui phei a, min hmu ve lo. Hmeichhia chuan bank a dawr ve dawn aniang, an awm ve ta reng a. Chuan Bank chhungah ka hma chiahah an thu bawk. Chuan, a hnuah a hmeichhe hruai thiannu aniang a lo kal a. 

"Veni chu, kha kha mi inpa chu" a tia. Veni a tih chuan, "Umm, kan inhmeh em? " a ti vel a. U Rinpuia lah khan a khap bawk si lo va, ka lo thinrim ve tawp a" tiin Thari chuan a sawi ta mawlh mawlh a. Nâ engmah ka nei lo ni miah lovin ka thaw hawk zawk mai. A mak tak tak a ni. 

Mahse, Rinpuia'n min bum leh ta chu eng emaw zawng chuan ka na, min ngainep lutuk nia ka hriat vang a niang. Chuan, thenna tur chhan tha tak ka hmuh tak avang erawh chuan ka lawm tho. A hnuah Zirsanga pawh ka hrilh ve ta a. Kei aiin a lawm! Mawla hi. 

Mahse, Chuti thut thuta Rinpuia va then nghal chu amah zawk chuan a remti lo. Chiang tawka manchhuah hun a la awm ang a ti tlat. Leh lawi si a! 

A sawi ang chuan ka ngawi ta rih a. Zanah Rinpuia chu a rawn leng lo. "Kan meeting dawn" a ti! Zirsanga chu ka nawr nasat vangin lehkha a zir ve a. Keiin ka thawmhnaw vel ka chingfel a. Ka pa a lo lut hlawl. 

"I nuin min lo bia a, Jeni rawn hruai a tum a" a ti a. Ka sa zak mai. 

"A va zak lo ve" ka lo ti hmak. 

"Lehlamah ka thisen a ni lo va, a fanu a nihna angin hauh theihna chu a la nei alawm" a ti mai a. 

"Chu pawh nise, an duh lo va an hnawt chhuak tawh a, tun ataka rawn lak leh tum vel kha ka ngaihdan a ni lo. " ka ti hmarh hmarh a. 

"Jeni phei hi chuan a duh miah dawn lo va, Court hial kal te a sawi a, i nu chuan. Court hial thleng ta se, kan mualpho dawnin ka hria a ni. A buaithlak khawp mai" a ti a. Ka pa rilru tur chu ka hrethiam khawp mai. 

"Keiman ka nu chu ka lo be ve dawn nia. Chutia tih ringawt" ka ti ta a. 

Ka pa chhuah hnu chuan ka nu ka call ta nghal. 

"Jeni rawn hruai leh i tum niawmin ka lo hria a. Eng nge a chhan? " ka ti nghal tâwng. 

"Ka fanu a ni a, ka ta a lawm.. " a rawn ti ve chat. 

"I fanu a ni a, in duh lo va, i pasalin a hnawtchhuak tawh a, tun ataka rawn hruai leh intum hi ka ngaihdan a ni hlek lo a nia" ka ti ve thak a. Ka nu mah nise, ka zah pah duh vak bik lo. 

"I hriat angin i pa nen fa kan nei lo va, nakinah kan la tar dawn a, min enkawl tur kan mamawh alawm. I pa pawh a inchhir tawh, khatianga awm kha a tum tawh lo" a rawn ti a. 

"A nih chuan Jeni chu rawn haw ta se, eng nge a tih ang? A chak ber hi in tihsak thei ang maw?" ka ti ve ngat. 

"I nu hi min va hmusit ve aw.. Jeni chuan a thil duh chu a la zir em em ang. Nakin zel atan hlawh a neih chu a la ngai alawm" a rawn ti a. 

"Ka hmusit awzawng lo che. In chet dan hi ka lawm lo em a ni. Aw le, engpawhnise, amah Jeni duhthlanna a ni tawh mai" ka ti ve ta a. Inhnial vak a sawt dawn lo tih ka hria, Jeni hian hawn a duh dawn lo tih ka chiang bawk. An duh ang ngawt chuan an awm lo khawp ang. Ka mood a ti chhe ta vek. 

Mut dawnah Zirsanga'n, "Min mang tha pawh i tum na nge" tiin a rawn text a. Inbunruahna ka mamawh si a. 

"Lo phei teh" ka ti ta tawp. Ka nute an mu tawh a, an rawn hmu dawn chuang lo bawk. A rawn lut a, ka khumah chuan inkuah rialin kan mu a. Jeni chungchang chu ka hrilh ve ta a. A hrethiam lo, "Ka pa fa a ni ve tho va, chutia i nuin a hauh bik theihna ka hre lo" a ti. A chin chhuaka hrilh a ngai tih ka hria. Ka ring ngam bawk a, ka hrilh ta vek a. Mak a tih ve hmel hle. 

"Anih chuan ka pa hi pa tha tak zawng a ni chiang khawp mai. Mahse, Jeni hian hawn a duh dawn lo sa. A duh loh miau chuan an rawn la ngawt thei lo" a ti a. Min hnem tuma sawi mah nise, ka lawm hle. A bana ka lu nghat chungin saisirin ka mu a, a awmah ka va kuah a, "Ka pa hi a hma chuan i nu a neih vang leh ka nu a hnawhchhuah vang hian ka haw thin. Mahse, thudik ka hriat takah chuan ka ngaisangin ka zah tawh khawp mai. Tin, i nu pawh hi ka lo hawn tirh kha chuan ngeih lo sa ran tumin ka lo haw. Mahse, ka nu tak zawk ang maiin min hmangaih a, a lakah hian sual ka chhuah thei miah lo" ka ti ta mial mial a. Chhungkaw chungchang kan sawi ngai lo. 

"Ka hrethiam che alawm. Kei pawh i pa nen an inneih tirh khan rei tak chhung ka hel a, ka pa pawh ka ti duh ngai lo. Mahse, ka pa hian fapa tak tak angin min en a, ka sual pawn a fa a zilhna ang chiahin min zilh a, a fahrawn ka nih vanga min tlawn emaw min tihlawm loh hlau angin a awm ngai lo. A rei a, min hneh tial tial tawh. Tunah phei chuan ka nu ai mahin ka hnaih tawh zawkin ka hria" a ti ve a. Kan inpawhna chu a tha sawtin ka hria. 

"Mahse, kan pahnih inkar bik hi a pawi a ni tiraw? " ka ti hnual raih a. Min rawn melh a, "A pawina ka hre lo. Kan inhmangaih ve a ni mai a. Ka thianpa u te pawh a hmeichhia kha an nì fanu a nia, an innei tho. Keini te chu thisenah inzawmna kan nei chuang hleinem" a ti dam thlup a. 

Kan titi tui bawk aniang, Dar 12 a ri ta der mai. 

"Phei tawh rawh" ka ti a. 

"Ka riak dawn.. Zingah ka phei mai ang" a ti tlat. Nawr luih a sawt dawn lo tih ka hria. A riak ve ta ngawt. Mahse, a insum nasa lutuk a, a hah ngawt ang. 

A ni tela kan inthlahlelhna zual zel chuan mi dang mitmei pawh min ventir hleithei tawh lo. Pawn lama kan chhuah chuan inngaizawng kan nihzia kan lantir mai a. In chhungah erawh inthup a ngai si. Rinpuia pawh a zin ta a. A zin dawn zanah a rawn leng lo! Pawi ka ti lo nasa. Kan intext zeuh zeuh a, inneih ka duh tak loh atang khan ani pawn min ngaisak ta vak lo. Ka lawm daih zawk. Min hmangahin min neih tum er teh se, ka buai dan tur zawk chu.. 

Ka nu ten rawn hruai an tum tih Jeni'n a hriat chuan a sa teh e. A âng nghal bawrh bawrh mai. 

"An va zak lo tak, ka nu ang pawn ka en tawh lo vang. A pasalin min hnawh chhuah lai te khan ka thlavang vawikhat pawh a hauh ngam tawp si lo. Ka haw ai chuan, home-ah pawh min dah zawk mai ru" a ti hmiah mai. Ka pa te pawn chuti khawpa duh lo na nâ na chu a tawp thlenga an ţan tur thu an sawi ta nge nge a, a thlamuanthlak e. 

Zirsanga pawh ka fuih nasa bawk a, lehkha a zir ve nasa mai. Ka nu pawn mak a tih thu a sawi a sawi mai. A rukin ka lo nui thin. Zanah thingpui lumsakin rei vak lo te ka thutpui a, a roomah hian tumah an lut zen zen lo bawk a. Tuma chimbuai lem lohin kan inkawm thei thin. Ka rin aia nasain Zirsanga chu ka duhin ka thlahlel tawh. Rinpuia chu ka be ngai lo tluk a ni. Ka lakah Zirsanga a strict thar vel a, phone te kan inkawl thleng thul. A luck ve viau aniang, betu a haihchham meuh lo. Sawi hmaih loh tur chu Dinpuia khan min ngaizawng ve nasa a, thik tham êm ni lo mah se, amah a rawn luanliam theih em vanv hian Zirsanga hian min fiam nan tak a hmang ve thin. Kei pawh ka thikthu chhe tan tak a ni. Aman be ve lo mah se, hmeichhe pathum ngawt ka block sak tawh. Kan naupangchhia a, a nuam tho bawk si. 

An exam ni hmasa berah chuan duhsakna ka hlan zauh a. Ka tawngtaipui ve bawk. Dawrah kan buai nileng a, Rinpuia call pawh ka lo hmu lo. Miscall pali lai ka hmu. Nuam ka tih chiah loh vangin ka call back a, "I va la thei lo em em ve.. Ka lo haw a. Zaninah ka rawn leng ang. Thil ka lo hawn che a" a rawn ti! Ka hnual rawih mai. Min kawp reng tho bawk si. He pa pawh hi a.. 

Zanah ka rin aia hmain a lo leng! Zirsanga pawh a roomah a tawm leh tawh a. Chakma puan cheimawi buaih hi min lo hawn a. A zuk hlawhtlin thu te a sawi mual mual mai. Ka e aw liam tawp. A phone a ri deuh reng a, ka mitsira ka va melh chuan, "Duati" tih a ni. A la duh hauh lo. Mahse, a haw ta vat. Ka va thlah a, lemchan reng chu harsa ka ti tawh. Mahse, chiang taka ka man loh chuan a insawi thiam leh dawn si a. Ka la nghak hram hram. Min fawh tumin a rawn kun hniam a, ka lo nam sawn a. 

"Ti nge? Eng nge i hriat tun lai hi" a ti hmuk a. 

"Ka hre lo. Nih phawt, muttui" ka ti sap a. Ka lut daih. 

. 

Ka inphih fai a, Zirsanga pawh a mu tawh aniang, a room a thim. A mu hma hle mai. A chau ve a niang. Ka mu deuh chiah tihin kawngka a rawn kik karh karh a, ka nu te emaw ka ti zawk. Ka va hawn chuan a lo ding run mai. Rang zetin a rawn lut zauh a. 

. "ka ngai tawh che" tih leh min pawm a rual nghal. 

"I va â tak. Ka pa te an la mu lo" ka ti sar sar a. 

"Ka hria lawm.. An rawn lut dawn chuang lo" tih pahin kawngka a kalh nghal a. Khumah kan thu mu a, Utube video kan en mai mai. 

Ka pa ţawng lawng lawng kan hria. Ka room kawngka a ri nghal. Kan inmelh zawk, "Bathroomah lut rawh" ka ti nghal a. A lut vat. Ka va hawn chuan, "I nau hi khaw nge maw a kal le, a mu tawh maw ka tia a chhuak leh daih nih hi.. A hrilh che em? " a ti a. 

Ka heh liak zauh pahin, "Hrilh lo reng reng..khawiah emaw a kal lawk dawn niang, gaihtuah suh u" ka ti a. 

"Ngawi reng hian a chhuak vut zel a" ti chung chuan a kal kiang a. Kawngka ka kalh sawk sawk. Zirsanga pawh a rawn chhuak nghal. 

"Min va man chhuak teuh ve" ka ti hawk a. Ka lung phu a rang ngei mai. 

. "Thil sual ti niawm takin awm teh suh. Engmah kan tisual lo" a ti thum chhak a. Thla engin parda a rawn chhun tlang karah chuan duhthawh zetin kan inpawm vang vang a. 

(Sei deuh chu ka tlin tawh lo..)