Zirsangliana 10

ZIRSANGLIANA… (Part- 10)

Ziaktu: Toni Râlte

Ka tho tharh a. Chaw chu ka lem lui thei ngang tawh lo a ni. Ka pa chuan, "I duh ngang loh te chuan kan sawi fel thei tho alawm. Khatia tauh bûr kher a ngai hleinem" zaidam deuhin a lo ti a. 

"Ka tau kher lo. Rinpuia chu a zak lo ka ti, ka hrilh chiang viau si a" ka ti a. Engmah dang sawi tawh lovin ka pindan lam ka pan nghal. Ka lung a phu dut dut mai. Ka thinrim ru ţeuh bawk. Rinpuia chu ka call nghal a, "Ti nge palai rawn tir rih suh ka ti mawlh mawlh a, i rawn tirh luih ţâlh a? I va zak lo ve" ka ti ta bawrh bawrh a. 

A ngawih vang vang hnuah, "Ti nge min neih chu i hreh viau ami? " a rawn ti chang fak a. 

"Aw.. Tunah chuan inneih ka la duh lo. Pasal ka la nei duh lo" ka lo ti chiam. Ka che naupangchhia viau mai. Ka ngei èm a ni. 

"Anih chu, ka tihpalh anih chu. A nih chuan, i duh ang chuan ni rawh se"a rawn ti leh khauh a. 

"Aw le" tiin phone ka dah nghal hmak. A thuhrimin tun ataka a hmanhmawh chung chu ka hrethiam lo. Inneih sawi pawn nakkum emaw kum leh daih kha kan tinzawn thin kha a nia. Chu pawh fiamthuin kan sawi thin. Nula upa tak ka la ni lo va, pasal nei rual chu ka ni ve tawh reng. Mahse, kei aia senior an la tam lutuk tlat. Ka dawr pawh a hlawkna ka tel ve ţan dawn chauh a, chuti maiin ka nulat zalenna hi ka titawp dawn lo. Tin, Zirsanga a la awm cheu bawk. Zirsanga ka ngaihtuah chhuah takah chuan a rilru na hmel a tawngkam te kha ka hre chhuak nghal a. Biak ngei a tulin ka hria. 

Ka insiam sawk sawk a, dawr kal pawh a phurawm loh hle mai. A ngai miau si a. Ka chhuah rual chuan Kawngkapui atanga Zirsanga chhuak chiah chu ka zu hmu hman. Ka tlan thla nghal a, biak hrim hrim ka duh a ni tawp. Insawifiah ka tum a nih ber chu! 

A bike a lo la chhuak mek a, ka va pan nghal, min en duh thak lo lehnghal. 

"Sawi dun ka duh" ka ti nghal tâwng a. 

"Sawi dun tur kan nei lo" a lo ti nghut. 

"Kan nei alawm" mangang zetin ka ti a. 

Chiang zeta min rawn melhin, "Ka u i ni alawm. Engmah sawi suh. Pasal nei la, nupui tha tak ni ang che" a ti fiah kâk a. A bike tinungin ka hamhaih chhungin a kal daih. A thinrim hle anih loh pawhin a û ang chuan min lo en thei tawh a ni ngei ang. Mahse, nizanah kha chuan ka lakah a la luangliam hle si a!  

Chaw ka ei tlem bawk nen, ka pum a ri rawk rawk reng mai. Kan buai ve leh deuh si. Kohhran lamin order an rawn siam nual si a. Computer work lam chu ka thawh zel a ngai si. Computer lam thiam ve deuh hlek lak belh a ngai a ni. Keimah chauh chuan ka indaih lo. 

"U kim, thil i chah mi? " Faki chuan a rawn ti lang lang a. 

"Eng thil maw" thil type mawlh mawlh pah chuan ka lo ti a. 

"Pizza a nia.. " makti deuh hlek hian a rawn ti a. 

"Chah nang " ka lo ti sam êt a. 

"Hei nangma hmingin a lo thleng bawk sia" a rawn ti leh a. Ka va tho chhuak ta nge nge a. Delivery boy chuan, "Min lo chah alawm. Aman erawh a rawn thawn tawh. " a lo ti mai si. A va mak dawn ve ti rilru chung chuan ka la ve mai a. A man pek lawk a ni bawk sia, lak loh ngawt kha ka riltam tho si, ka ui deuh. Kan pathum chuan kan ei ta mial mial a. A tui viau lehnghal. Rinpuia tih a nih ka ring deuh, ka laka that chhuah a tum a ni mahna. 

"Ka lawm e.. Mahse, a ngai miah lo ania. " ka va ti a. 

"Eng nge i sawi? " a rawn ti hû! 

"Pizza kha i chah lo mi? " ka va ti a. 

"Pizza mai mai chah hman ka ni lo ve" a rawn ti ngût! Ka ngawihsan daih. Zirsanga a ni thei ang em? Hriatchhuah kher chu a tulna awmin ka hre lo. Ka puar a, a lawmawm a ni mai. Ni dang aiin kan bang tlai, laklawh awmtir loh hram kan duh thin si a. Kan haw chuan khua a thim lek lek, ka chhungte pawh chaw min lo eisan mai turin ka hrilh lawk diam tawh a. In ka thlen chuan an lo insengfel mek, "Ei ve nghal la" Thari chuan a lo ti a. 

"Aih, inbual phawt ka duh, ka ril a la ţam em em lo" ka ti a. In chungah ka chho nghal. 

Zirsanga room pawh a eng pap a, a awm a ni ngei ang. Tuilum sa ver vawrin ka inbual a, ka harh huai mai. Ka sam ka chhem ro lai chuan, "Kimi, Rinpuia a lo kal" Ka nuin a rawn ti a. Dryer a ring deuh nen in hnuai atanga min lo auh chu ka lo hre thei lo a ni ngei ang. Ner sak chung chuan ka indah fel a, tun dinhmunah chuan ka hmu chak hlawl lo. Eng nge maw a rawn tih dawn reng reng le.. Room ka chhuahsan chiah tihin Zirsanga leng tur niawm tak a rawn chhuak ve chiah a. 

"Nupui ka rawn ru haw maithei a ni" nui chung hian a ti zauh a. Rum zetin ka lo melh thung. A laka ka rilru luangliam chho mek chu Rinpuia avangin aniin a lo hnawl mek si a. Ka awm dan chu a lai takzet a ni. 

Rilru bet lo zetin Rinpuia chu ka kawm a. Ka pa te pawn nuam an ti vak lo nge min chhohsan daih a. A zia zawk. 

"Inneih chu i duh lo tak tak maw? " a ti leh a. 

"Aw.. Ka sawi zing tawh. Ka ning" ka lo ti hlar a. 

"Anih engtikah nge i inpeih ang? " a ti a. 

"Ka hre lo. I hmanhmawh viau chuan mi dang zawng mai rawh. Intur sek hi ka peih lo, Mizoramah ka rawn haw ve chiah a, pasal neih leh daih te chu" ka ti niah niah a. 

A rum nghut.. "I mak sawt ee, i awm dan hi, min ngaipawimawh lo telh telh" a ti ta a. A sawi dik ang. Zirsanga a awm ve tlat tawh si a. 

"Ka danglam vak pawh ka lo hre hleinem" ka lo ti sam êt a. 

"Hmm.. A tha alawm.. Nang ber i la inpeih loh chuan sawi theih kan nei hleinem. Ka va haw ang e.. " a ti ta daih a. 

Chelh pawh ka chelh duh lo mai. Fawh pawh kan infawp lo, a lungawi vak lo tih ka hria. Pawi ka ti hranpa lo. Min nawr chhen dawn ai chuan inthen mai pawh ka hreh lo. Ka ril a tam deuh tak vang chuan chawhmeh thingte chu ka tilum a, Ka kil dawn chiah tihin ka phone a ri. Danny-a Zirsanga thianpa kha a lo nia! 

"Aw.. " ka ti a

"Zirsanga hian nupui a ru ve ringawt a nia aw" a rawn ti ta mai! Ka chaw ei chakna zawng zawng a bo duak nia! 

"Eng a? Khawiah nge a awm" ka ti nghek a. 

"Hei ka roomah an awm. Ka chhungte min hrilhsak rawh a tia. Ka rawn sawi" a lo ti lehzel a. 

"Amah ka lo bia" ka ti a. Phone chu a pe aniang, Zirsanga chuan, "Kim" a rawn ti vut a. 

"Kal sawn deuh teh, ti nge hetia i awm a? Eng nge a chhan? Kar leh maiah in exam dawn a, nupui ruk hun a ni em ni? Ka pa a sa viau ang" ka ti nghal hlawk hlawk. 

"Haha.. Tak taka ka ru lo, kan tihder che a nih kha.. Tun ami te chu flirt mai mai alawm.. Ka rawn hruai haw dawn teuh lo" a ti lung lung a. Khawiah emaw a kal a ni ngei ang, a tawng rin danah. 

"Chupawh nise, khatia awm kha a hun tawh lo, lo haw rawh" ka ti a. Ka thin tawt up up kha chu a thep suai suai tawh. Mahse, hmeichhe bulah a awm tih ka hriatna chuan min la kher ngut ngut tho va. 

"Zanin chu ka riak ang he tah.. Nih aw.. A titau palh ang. Ka naute saw" a ti kher! A dah nghal hmak. Ka phone chu ka vawm lo chauh a ni. Chaw pawh chu ka ei tui thei ta bawk si lo va, ka kham ringawt. Ka ril a la tam ngei mai. Ka muhil mang lo tihtheih a ni. Ka harh tulh tulh a, Zirsanga leh hmeichhe mudun lai tur ka mitthla zut zut lehnghal. Ka va haw tak.. Min runluih nan hetiang hi a ti a ni ngei ang. A hre dawn alawm.. 

Dawra ka kal dawn thlengin a rawn hawng lo. Ka ngaihven lo lui tlat. Ka nu te pawn ngaiah an lo nei deuh tawh bawk a. An sawi an sawi peih tawh lo. Vawiin chu mak takin ka mood a zia hlauh zawk a. Zirsanga runluih ve chakna leh ka runluih dan tur vel suangtuah rauh rauh chungin ni ka vui liam ve leh der mai. Ka hawn chuan sitting roomah a lo thu khur a. Min lo melh kur mai. 

Ka inbual sawk sawk a, chaw kan ei. Ka kham pah chuan, "Ka chhuak lawk dawn ania. Saii a lo haw a, kan lawm lawk dawn. Ka rawn tlai maithei" ka ti zung zung a. Ka pa te hi chuan min ngaihtuah tho mah se, ngaihthat lohna tura ka awm ngai miau loh vang leh nula puitling kan nih ve tawh vangin an phal ve mai zel. 

Roomah chhoin ka inchei a. Saii chu ka be tawh a, chhunah. A thian thenkhat te nen Cottage pakhatah kan intihlim vel mai mai dawn a ni. Vah harh zeuh zeuh te hi a ngai ve thin bawk nen. 

Scooty lak chhuah ka tum mek laiin, "Kimi" a rawn ti vawt raih a. Ka phu chiang kher mai. 

"Min va tiphu nasa tak.. Mawl lutuk" ka ti hlak a. Scooty chu ka start a. A rawn chuang thurh. 

"Hei.. Chhuk rawh" ka ti nghek a. 

"Ka tel lo va nawm chen te i lo tum ve a maw? Ka phal i ring reng reng em ni? " ka hnunglam atangin a rawn ti a. Ka mur sung sung mai. 

"Nuam kan chen dawn leuh. Nang pawh nizanah nuam i chen alawm. Tikhan kan inrul tawk" ka ti a. Ka tlan mai duh bik lo. 

"Chu! Nizan avang khan min thungrulh i tum ve tihna mi? " a ti dam thlup a. 

"Teh nang, engvangin nge ka thungrulh ngawt ang che. Ka nau alawm i nih" ka ti ve ngat. 

A nui huk a, ka kawngah a rawn kuah, ka lo ìp chawih. 

"Tlan ta che.. Kal rawh. " a ti hniam raih a. 

"I lo kal ve dawn chuan ka kal lo mai ang. Tuman an naute an rawn hruai dawn si lo va" ka ti hul hak a. 

"I nau ka ni maw? Mawh.. Han sawi leh teh.. I nau nge ka nih? I ngaihzawng? " tih pah chuan ka hnute a rawn ţham a. 

"Zirsang" ka ti tuar. Kawngkapui a ri rawk, ka nu a rawn dak heu mai le.. 

"In kal daih tawh emaw tia.. Eng nge in la tih? " a rawn ti lang lang a. 

"Nia, hei kan kal dawn chiah, a scooty hi a lo chiang lo deuh a. Kal ang.. " tiin min rawn kheuh zeuh. Thinrim ţûn chung chuan ka inkhalh chhuak ta a. 

Kan in pelh fe ah ka ding a, "Chhuk rawh" ka ti chhum hmak. 

"Aih" a ti bur. 

"Eng nge i hriat? Ti nge hetia i awm?" ka ti dat dat a. 

"Ka tel lova mi dang bula i awm ka phal lo" a ti sup. 

"Rinpuia bulah pawh ka awm tho alawm" ka ti a. 

"Ani te chu i duh tak tak lo tih ka hria alawm" a ti lawi si. He pa hi a.. 

Ka tlan leh ta poh a. Saii bulah ka sawi fiah tawh mai ang chu. Thulhsan ngawt kha a nuam bik si lo. Cottage kan thleng a, Saii te chu an lo awm vang tawh. Kan va luh chuan Saii leh a bialpa bakah hmeichhe pahnih leh mipa pakhat an lo awm a. 

"Ehh.. In pa i rawn hruai dawn te chuan sawi lawk ve ta che" Saii chuan a ti a. Kan chhungkaw chungchang hi an la hre vak lo, an rawn kal ngai lo bawk. Kei lahin ka sawi ngai bawk si lo. 

"Ka nau a nih hi" ka inrin hmain ka ti thut. Zirsanga meng râng chu ka hmu nghal. Mahse.. Tihnat ka duh ve hrim hrim. 

Zu an phawrh nghal a, an lo ngah nasa mai. Kei chuan coke ka in thung. Zirsanga pawh a mikhual ta lo hle. Zu te chu a in ve mai a, ka nau angin ka sawi si a. Nuam ka ti vak lo, zu min in khum pap pap si. 

Cottage chu a lian lutuk lo naa, kan tam lem lo bawk a, a nuam tawk viau. Khum pakhat zawkah chuan ka thu a, chhuatah zu in ho chu an thu thap. Rei vak loah an rui tan ta nge an tawng ringin tawng an inchuh ngjal der a. Saii te erawh khum pakhat zawkah an thu dun a, cool deuhin an titi dun. Rinpuia'n a lo call a, Bathroomah ka luhpui. "Ka thiante ka tlawh lawk" tiin dawt var ka sawi a. Eng emaw zawnga a lo ngaih ka hlauh vangin. Ka chhuah leh chuan Saii te pahnih chiah an lo awm. 

"Khaw nge? " ka ti hâ a. 

"An chhuak dial.. An in kawm fal duh hlawm aniang. " Saii chuan a lo ti mai a. Ka sa phat, mahse insum a ngai si. Saii te tan ka hnawk dawnin ka hre bawk, awmngaihna ka hre lo. Mutthilh der ngawt nan a la hma bawk si. Ka chhuak ve ta ringawt a. Kan awmna piah lawkah cottage dang a la awm nual a, tah te chuan an awm mawni dawn le.. Zirsanga zet chuh! 

Kalna tur pawh hre lem lo chuan kawng lo awmah chuan ka phei ve zel a. Ka rin ang ngeiin Zirsanga tawng ri niawm tak ka hre nghal. Kawngka chu a inkhar phui chiah lo va, thawm dim takin ka va bih dek dek a, khum pahnih awmin pakhat zawkah Saii thiannu leh mipa pakhat kha an mu a, khum pakhatah Zirsanga leh hmeichhe pakhat infeng chhing zet kha. Ka za vek.. Sex em chu an hmang lo, mu chungin an inkawm ni maiin ka hria. Mahse, ka chhungril hi a na a ni. Ka khur der der thei hial. Zawi muangin ka let leh a. Saii te pawh an lo la titi tui hle. A bialpa hi tuai lek lek, tawng nuam ti chi a ni ve bawk a. Ka luh chuan, "I tha maw? " an lo ti vat. 

"Tha e, ti nge? " ka ti hû a. 

"I dâng vek a" an ti! Ka thil hmuh khan min khawih na êm a ni. Eng sawi set set lo chuan an zu in bang chu ka thli a, tui pawlh mang hlei lo chuan ka tlak pup. A va tui lo kher em.. Ka luak ţep a ni.

"Ehe.. Ti nge? " Saii'n a tih rual chuan a dang ka thli leh nghal zat. Ka thawkkhat leh piap! Zu ka in lo vang tia ka intiamna chu Zirsanga'n min bawh chhiattir ta.. Zu chu no engzat chiah nge ka in ka hre lo. Ka rui hle tih zawng ka hria. 

Ka mu vir lehnghal.. Ka uak nghek nghek bawk a. Saii chuan ka awm dan teh thut chu mak a lo ti deuh nge, Zirsanga a va ko a. An ri hak chu ka mang hriat ruai.. Tu in emaw hla tak atangin min ko vak vak a, tuiah te ka tlain ka hria. A buai nuaih mai. Ka harh chuan, khumah ka lo mu a. Ka huh chuap mai. Pindan chhung erawh a eng ut thung. 

Thawh ka tum a, rum nghut ka hre zui. 

"Hrep tak che hian, engvanga taksa zawh loh thleng rawk khawpa zu in nge i nih le? " Zirsanga aw ngei chuan a rawn ti ta a. Ka harh kâwkin ka hria. 

Min rawn kai tho va, a hmel rum zet chu ngei hmel takin ka melh a. 

"Khaw nge kan awm? "Ka ti ta daih a. 

"A hmaa i awmna hmunah khan" a lo ti nghut. 

"Khaw nge mi dang? " ka ti leh a. 

"An haw tawh. " a ti leh hmuk. 

"Chuti haw ve ang" tih leh din ka rual a, ka luhai chu ka pai nghal awt awt. Min rawn chelh vat a. Mitmeng hriam zet hian, "Tikha chuan ka pa te i hmachhawn thei lo vang.. Riak mai ang" a ti ta a. 

"Aih, a chi loh" ka lo ti tlat. 

"Ka pa te chu ka be tawh alawm.. I thiannu accident damdawiina i riahpui tur thu" a lo ti a. Huiham

. 

Ka mu leh thlawp. Ka mut erawh a chhuak tawh lo. 

"Ti nge ka ruih a? " ka ti sap a. 

"Zawk zamah che chuan.. I hre zawk ang chu.. Min tihzah ziah kha i hria em? Ka hmeichhe kawp te kha i cho va, mo atan pawh ka duh lo che.. I hur hmel si te i tia.. Ka zak khawp mai" a ti a. Ka ìp chawih. 

"Ka ti maw? Ka ti lo vang" ka ti ve tlat a. 

"Ti e.. I hnawtchhuak thul.. An hawnpui ta ringawt a nih kha.. " a ti a. 

"Nangmah vang vek a ni e. Ni e, nangmah vanga zu in ka ni.. Zirsang" tih leh thawh ka rual nghal a. Ka thin chu a rim leh ut ut mai. 

"Eng nge keimah vang a nihna chu? Engtin nge ka tih che? " kei aia pawr mah hian a rawn ti a. 

"Kha.. Kha nu nen khan in mu dun anih kha.. Engtin nge i tihtheih? Ka awm ve reng laiin.. " ka ţap dawn ta mai a. Ka rui a la reh fel chiah lo nen.. 

Min rawn kuah vat, "Chuvang chuan maw i lo ruih? Tak tak em? " a ti dam thlup a. 

"Thil dang vang nise i ti mi? Min hre chang lo lekin kha nu nen khan nuam in chen a.. Zawnga, i hre viau ang" tih pahin ka chum nghek nghek a. Ka kut chu lain a lamah min pawt hnai a, duat zet hian min chul a. 

"Ka tihpalh.. Ka nau min tih vang khan ka na êm a. Tikhan ka che ta mai anih kha.. A thleng leh tawh lo vang.. " a ti a. 

Ka ziaawm deuh hnu chuan min rawn fawp ta a. Kei lah rui lungpuam nen, ka lo duhthawh phian a! Khumah chuan min rawn bawh ta ut mai. 

"Rui lo la chuan, ka mutpui ang che" a ti sup a. 

"A teuh lo" ka lo ti thung. A hmaa kan inhauhna leh inhnialna hrechang lo lek chuan kan inchhaih ta ar ar a. Sex lam a lang miah lo! Mamawh zawng kan inmamawh ngei a, mahse, Ka nau, Oh, Zirsanga hi a pa ve tlat! 

Tui tak chuan kan muhil a. A tuk zing tawkah kan tho va, ka rimchhe kher mai. Ka inluak khum lo chauh a ni. Vawt ti chung chungin ka inbual a. Hetianga ka pa te hmachhawn chu ka zuam lo. Reception-ah pawisa kan pek lai mek chuan, hnunglam atang hian, "Nangni unau chu ti nge room khatah in mut dun a? " Ka aw hriat ţhan tak hian a rawn ti ta a. Kan hawi let rang ngei mai.. 

(Tawk rih)