Zirsanglian 12

ZIRSANGLIANA.. (12)

Ziaktu: Toni Râlte

Rinpuia chu a reh tial tial ka ti mai. A changin a rawn ri leh thut a, a reh leh vang vang a. Amahah feelings ka nei tawh lo bawk a, ngaiah ka nei vel mai mai tawh. Zirsanga te exam an la zo lo deuh a, ka fuih nasa bawk a, thu a awih ve hle. Bakah an sawi hmangin lehkhathiam tak a ni ve hrim hrim bawk a. A pass ve mai ang chu maw. Ka nu te lam pawn Jeni chu rawn hruai an tum ruh hle a, amah Jeni'n duh lo viau mah se: tu ten emaw an lo fuihpawrh nge ka nu te lam chuan thlen thui an inhuam hle. Engvanga tun ataka rawn pâk leh chiam nge maw an nih le.. Hel hul hlawm hian. 

Asawmi pawn bialpa fel deuh a nei ve a, ka lawmpui hle. An khawsak a harsa ve nen, rual a pawl vak lo va, fel erawh a fel teh e. Ni khat kan dawr nghak chu Sangsangi te thianho an lo lut a, kan ri hlut mai. Sangsangi te hi a fel reuh bakah a ţawng duh reuh a. A bula awm a nuam. Zirsanga a star em em tih erawh ka theihnghilh ngai lo. 

"U Kim, U Zirsanga hi a reh e tun lai chu, lehkha a zir nasa ve mi? " a ti a. 

"Umm zir ve e.. A fel ve reuh lutuk" ka lo ti puat a. 

"Chuvang nih chu, kan inbe nasa ve thei sia, khua a har tawp" a ti ta a. Ka nghing dawt! Engtin lêk nge an lo inbiak ang le.. 

"An zo ţèp alawm" nui chungin ka ti ve mai a. Ka chhungril erawh a nui hauh lo. An chhuah hnu thleng chuan ka ngaihtuah zui a, thinrim tih dawna ni chiah si lo, awm nuam lo ang hian ka awm. Mood a inthlak nasa thei teh e. In ka thlen chuan ka pa a lo la haw lo va, in chungah ka chho nghal. Ka intifai a, Zirsanga room ka pan ta nghal a. Games a lo khel. Ninawm. A bulah ka va thu hnawk a, min rawn en zauh, "A zo tep" a ti satliah a. A phone a bih leh nghal. Pubg hi chu ka va ning tak e aw.. 

"Ninawm eee" ka ti hlak a. Ka tum bâr min hmuh chuan a phone a dah hmak. Hei hi lawm ka duh em em thin chu.. Kei aia ngaihpawimawh a nei duh ngai lo hi ka tan chuan a nuam ve èm asin. 

"Sangsangi nen in va inbe nasa thin awm ve" ka ti nghat a. 

"Tu nge sawi? " a ti hû. 

"A man.. " ka ti hmuk. 

"Be nasa lo, ti ila min lo be nasa. Ka reply ve a, a hranin ka be ngai lo" tih pahin a phone chu a khawih a… ka hmaah rawn lekin, "Kha.. En la" a ti a. Ka en duh lo lui vel. Phone kan inkawl thleng lai kha chuan an inbe vak ngai lo. 

"Tumah be tawh suh.. I hria em? " ka ti nghat a. 

"Yes boss,.. " a lo ti duh lek. Thinrim hluai dawn chuan a ho ve deuh bawk si. Inngeihtê chuan kan awm ve leh tak kha.. 

Zanriah ei khamah ka pa te chu Nu Zaui rál turin an kal a. Kei pawh ka inchhut leh ţan. Jeni pawh a roomah a tawm leh tawh. Bialpa a nei ve deuh emaw ni tun lai chu biak a nei zing riau. Thari erawh Savdhan hi a hmuhnawm a tia, TV a thutchilh leh ran tawh. 

Zirsanga chu thingpui ka han pe a, la hma deuh mah se, a bula ka awm châk vang a ni pakhat. Barakhaih thut tumin zawitein ka kal ţhem ţhem a, Tu emaw nen an inbe mek. Min hnungchhawn zawngin a thu a. Tu tak bia ang maw.. 

"Ka hria alawm le aw. Ka fa a ni lo vang. A theih loh, kan chetsual hun leh a rai hun hi chhut chuan a dik thei lo. Ka mawl em em bik lo. Min puh ve ringawt anih kha" a ti bawrh bawrh a. Ka ding chawt. Ka hre sual emaw ka ti hial! Tu nge a sawi le? 

"Min neih a duh em a, chuvang mai mai alawm.. A rilru ka hrechiang lutuk" a ti leh nghut. Hrehawm ka tih em vangin muangchangin ka let leh ta daih. Sâwn a thlak tihna em ni ang? Ka rilru a buai nuai nuai mai. Tu nge rai ang le? 

Ka reh êm vang nge ni a hnuah min lo call a. Ka pick up ngam lo. A mak lutuk, k sawi thiam lo. Ka hlau tlat! amah ngei chu in hnuaiah rawn chhukin, "Kimi, ka be lawk duh che" a rawn ti ta mai a. Thari a awm ve si, ka mitmei nasa. Engah mah a ngai lo. In chungah kan inzui chho leh ta nge nge a. Ka roomah min nawr lut nghal. 

"Ti nge ka call i lak duh loh? " a ti ta chiah a. 

"Sáwn i thlak alawm" ka lo ti nghal ngawt! A chal a chuar tap a, "Ka fa a ni lo" a ti nghal ringawt. 

"I fa ni lose a puh lo vang che" ka ti ve si. 

"Min neih a duh alawm" a ti leh nghut a. 

"Anih tu nge ni reng reng a? " ka lo ti hâ a. 

"Tei mawle" a ti sup. Tei a rai a nih chu! An inthen daih tawh si a. 

"In inthen tawh sia" ka ti ta chiah a. 

"Then tawh e, tunah thla hnih vel a nia, ka fa a nih theihna chance chu a awm. Mahse, Tei nen sex kan hmanin CD ka hmang ziah" tlang deuhin a ti ta a. 

Sawi ber tur ka hre tawh lo. Ka ngei lutuk bawk si, "I hur man anih kha.. Nei ang che" ka ti ram hmak. Min rawn kuah a tum chu a kut ka lo vaisak a. 

"Thinrima sawi chi a ni lo. Fim takin ngaihtuah ang" mangan hmel deuh hian a ti a. 

"Ka buaina a ni lo ve" ka lo ti hmak. Ka thin chu a rim em em hran lo, mahse, ka nâ.. Tei nen an nih lai khan kan inkarah engmah la awm lo mah se; ka thik lutuk tho. Bakah ka pa ten an hriat chuan nei turin an nawr ngei ang. Chu chu ka hlau a ni ber mai. Chumi zan chuan kan inhnial thinrim nasa khawp mai. Mut pawh ka mu tha lo. Ani pawh a ni ve tho vang. Ka tlawmngai leh na laklawh chuan nei turin ka nawr sek a, ani a thinrim ve tawh bawk si. Mi dang hriatpui si lohin kan va hah dun tehreng em.. 

Hlauhthawn ang ngeiin a tuk zanah Tei ten sawn man an rawn thing ta ngei e. Ka pa te chuan engmah an hre lawk si lo va, an hrilhhai ngei mai. Amah Zirsanga lah chu roomah a tawm daih lehnghal. Ka pa chuan ko turin min tir a, ka han ko va. Ngawi rengin kan inzui thla. 

"Hetiang thil lian tham te chu engah nge i zèp a? Sawi vek tur alawm" tiin ka pa chuan a khak nghal a. 

"Ka fa a ni lo" a lo ti tawp! Palai te pawh an meng phar nasa mai. Ka nu chu nu fing tih takah, "Leh ringawt a che. I fa ni lose mualpho huamin sawn man min rawn thing nang" a lo ti fak a. 

Ka pa chuan, palai te bulah chuan, "Engpawhnise, kan fapain pawi a lo khawih a, min hriatthiam kan ngai hle mai. Chutihrualin kan fa a nih tak tak chuan sawn nihtir kan phal reng reng lo va, tunah chuan sawn man hi ka la pe lo phawt ang che u. Chhungkua kan inrawn ang a, nangmahni lam hian palai hmel te pawh in hmuh a ngai zawk maithei a ni.. " a ti dap dap a. Zirsanga nen kan inmelh zauh zauh. Rilru a hah ru ngei mai. Palai te pawh chu an haw a. Kan thu khawm ta thap mai. 

"Engtin nge ni dawn le.. Mama, nupui nei rual em chu i la niin ka hre lo naa kan fa a fahrah ngawt ai chuan, i neih mai te pawh a ngai dawn a nih hmel.. Zirna te chu pa ni chung pawn a chhunzawm theih a" ka pa chuan a ti ta a. Ka kut ka hum ruh nasa ngei mai. 

Zirsanga chuan, "Pa, Tei nen khan chet chu kan chesual ngei mai. Mahse, ka fa a nih ka ring lo a ni. Ka inveng ziah sia.. Bakah neih ka duh lo. Ka fa pawh nise nupui neih ka la duh lo" a ti ta tawp a. Ani pawh a ţang ru ve hlein ka hria. 

Ka nu chuan, "Ka fa a ni lo vang tih ringawt.. In chesual a nih chuan i fa a ni mai. Sawn paite hian a pa hi an puh sual lo teh ania.. Ni e, i pa sawi ang khan duh aia hmain nupui i nei dawn tihna a ni mai. Pathian thu awih lovin i insum zo lo va, i tuar mai tur a ni" a lo ti ve a. 

Zirsanga a ding hluai. "Ka nei duh lo ka tih chu. Hmangaih ka nei alawm" a ti ta bur mai. Ka lo thaw dèp dêp thung. 

Ka pa te pawn a luhlulzia hriain an nawr lui chung rih lo. Mahse, neih sak mai chu an tum tho ka ring. Lehlamah Zirsanga fa lo ni tak tak se, pa nei loa a awm ringawt tur chu keipawn ka ngaingam lo. Chhungkaw kehdarh atanga seilian ka ni tawh a. Nu leh pate uapna hnuaia awm leh awm loh chu a dan a dang tih ka hria. Mahse, Zirsanga chu ka ui bawk si.. Tei ngei chu lo lawiin kan mo ni ta se, ka tan tawrh a hrehawm dan tur te.. Aa a tam lutuk. 

Zan laiah a rukin kan inhmu leh a. Thil tam tak kan sawi dun. Zep loh chuan a inthiam lo ve tho bawk si, neih chu a duhin a duh hlawl bawk si lo. 

"Min neih luihtir ţâlh an tum chuan ka tlanbo ang" a ti hmiah reng a. A tih duh tak tak pawh ka ring. 

Rinpuia ve chhen lah hi min rawn be ve zauh zauh si a, ka ning tawngkhawng lutuk chuan thenna thu ka sawi ta hmiah a. Engkim ka hriat tawh thu leh a lakah ka rilru ka pek theih tawh loh thu te.. A tirah chuan a ţang na ngang mai. Mahse, ka ngaipawimawh lem lo. Ka block ta bawk a. Rinpuia chu ka chingfel thei taah ka ngai. Mahse, Zirsanga lamah hnawk a awm leh ta si. Keini unau hian Pathian pawi kan sawi a ni mahna le.. 

Hun chu a kal ngaiin a kal ve zel a. Keini erawh kan buai telh telh. Tei te lamin min ngaichang reng bawk si. Ka pa tan pawh han tihngaihna a vang ve viauin a rinawm. Mahse, amah Zirsanga berin neih a duh ngang si lo va, Sawn man chu kan pe ta nge nge a. Ka pa erawh a zilh nasa ngiang mai. Keimah vang ni pakhat mah se; Tei chu neih a duh lo tawp ni bawkin ka hria. Kan boruak chu a dik hleithei lo va, Tei ka thik thar leh si, ka lungawi hleithei lo a ni ber mai. 

Ka nute pawn Jeni chu rawn hruai an tum ta ngei a. Mahse, Jeni ze dik tak ka hmu ka ti mai. Amah ngeiin ka nu chu hmai chhanah va hmuin, "Ka rawn let leh ai chuan, home-a awm ka duh zawk. I fanu chu ka la ni, mahse, i duh duha i kaihkual tur ka ni lo. Puih i ngaih chuan sawi hreh lo la, mahse, in bula chen chu ka duh tawh lo bur' a ti hmiah mai. Ka nu ka khawngaih letling! Mahse, ka nau chu rethei leh tura kaltir ka phal bawk si lo. Ka nu chu a thinrim khawp mai. Jeni hian ka nute thuruk hi engmah a hre ve lo, a chin chhuakin jeni bulah chuan ka nu chuan a swi ta vek mai le! Jeni hmel landan a dan em vanga kan ngaihtha loin kan dawp chhuah a ni a… 

"A pa hi ka pa a ni ve lo va" a ti ngui raih a. Ka nu kamtam lutuk chuan ka thin a tirim takzet a ni. 

Ka pa chuan, "Ka fanu i ni alawm. Eng ang pawn sawi mah se; ka fanu i ni" a rawn ti ta dap dap a. Mahse, uire fa anga a inhriatna chuan reitak chhung a mizia a hlohtir a ni. A inla hrang a, a inthlahrung em em bawk. Ka nute bula let leh chu hreh hle mah se; let lo thei lo anga inngaiin let leh te a tum uai uai fo. Kei hian ka dang thei hram zel a.. Ka nau chu ka va lainat e aw.. Ka nu pawh ka be ta nghe nghe a, kan inhau hrep.  

 Jeni chu a kal chhuah kan phal ta lo bur! Ka pa thutlukna a ni. 

Zirsanga te pawh an exam zo ve ta hram e. Kan boruak a chuti lua lo naa, inthen angin kan awm lem lo. An zawh zanah chuan, "Inah engmah a sawi tak tak theih loh" tiin chhuah a rawt a. Ka pa bulah chhuanlam siamin kan chhuak thei hram. Wbr lamah kalin, hmun reh laiah kan thu dun a. 

"Ka pa te bulah hian engkim sawi vek mai ka duh tawh.. A hrehawm ka ning" a ti a. 

"I mark chhiat sa nak a laia chutiangte i sawi" ka lo ti hluk. 

"A nih tur ang hi ni vek tawh se ka duh" a ti leh nghut a. 

"An duh dan a ni miah dawn lo ania" ka tih mek laiin mipa pathum hi kan awmnaah chuan an rawn kal ve a. Ka hriat ngai an ni lo. 

"Hei lai hi kan spot a nia, in lo awm ve ringawt a" pakhat chuan a ti lar lar a. 

"Kan tihpalh" tih pahin ka tho va. Zirsanga'n min lo pawt ding. 

"He lai chu i pa ta tihna ni maw?" a ti a. Ka lo kheuh vat. 

"Ni lo e.. Mahse, zantin kan awmna hmun ania in lo awm ve ngawt kha a rem lo" pakhat chuan a ti a. 

 Zirsanga chu ka kai lui a, kan kal mek laiin pakhat chuan, "In nu chu a khal zek lehnghal a, kan lo kawl ve zuai dawn mi! " a rawn ti leh kher. Zirsanga rilru ippik sa, thinur hlur chu a sa phut a niang chu.. Chelh hman rual lohin a va let leh a, chupa chu a va hnek let tawp. A thianten an rawn pui vat. Kei ka mangang ka rak chul a. Kan chhehvela awm ve thenkhat chu an rawn lang nghal zat. Zirsanga chu pathumin an sual rawn a ni bawk a, a bet ran mai. Ka khawngaih bawk si.. Mahse, mi pathum te pawh chuan a kut an tuar ve tho mai. 

An va thelh dai thei hram.. Ka va kai hrang vat a, a mitko leh hnar thi chu ka shawl ken chuan ka hru sawk sawk. Engmah kan sawi lo. 

. "Ehe! Zirsanga leh U Kimi teh daih chu" a rawn ti nghek. A aw atang chuan tu nge a nih ka hai lul lo. Eli ngei a ni. 

"Ehem… ka hrethiam e.. Unau ve si.. Awiii in va tenawm tak" a ti leh hluai a. Ka chhan hmain, Zirsanga chuan, "Rak tam lo mai teh" a lo ti hmuk. Min kai a, motorah lutin kan tlan chhuak nghal. Biak ngam pawh a ni lo, a rum ûl mai. Ka ngawi dâk ringawt. 

In kan thleng a, ka pa te an lo mu tawh hlauh. Zirsanga hliam te chu a rukin ka silfaisak a, damdawite ka hnawihsak. Ka kal tur chu min rawn pawm a.. 

"Lo riak rawh" a ti tham chhal a. A pangchang kher mai. 

"I â anih chu" tih leh chhuah ka rual nghal. Min rawn umzui a, ka room thlen hma chuan ka hnung atangin min kuah ding thawk.., " i va â tak.. Kal teh" ka ti hlak hlak a. 

"Ka ngai che.. Ka exam zawh zan a nih hi.. Ka lo riak ang aw" a ti a.. 

"Eng nge a awmzia? " aw lo chhuahna lam chu kan hawi rual ţhawih! Ka nu chuan makti em emin kan pahnih chuan min melh tawn ta sek a… 

(Ka ziak tam hman ngang lo. Buai tak ka ni.. Buai tak..