At tel lovin 18

A TEL LOVIN.., (chapter- 18)

Ziaktu: Toni Râlte

Mikhual pali lai an neih belh a. Chawhmeh lain Tanhril-ah a han chho zuai a. Arini erawh a haw tawh. Mikhual an ngah tak riau avang chuan haw loh mai a tum ta a, a nu te pawh a bia a, harsatna a awm hran lo. An mikhual te chu an pa rual hlawm bawk a, an chaw lak pawh a tha kher mai. An titi lah a phawkphawhraw bawk. Zu pawn an leklam angreng. Ruatfela pawn a khap duh hran lo. Amah tak hi chuan hman zana a ruih vak hnu kha chu a in leh ta rih lo. Zu hi damna a ni lo tih a hrechiang nasa mai si a. Dar 9 velah gate a va en dik leh te te a, an security erawh in lamah buaina a neih vangin a haw zuai a. Chuvanga va endik leh kher pawh a ni. Garrage a kal pelh dawn lai tak chuan zawitea phun sup niawm tak a hre ta a. A beng chhe ri ah ngaiin kal leh mai a tum a, mahse, a hre leh. Mak a ti deuh. Hlauhna erawh a nei lo. Garrage lam pan chuan zawitein a kal a, thawm erawh a reh leh daih. A thim deuh vangin motor bak a va hmu thei lem lo. Garrage piah inthlakna room atang zawk chuan thawm a rawn awm leh ta a! Arini thusawi a hre chhuak ta zawk. Damdawi kha an rawn ngaihven ngei ang tih a sawi kha mawle. Thawm dim zetin pindan lam chu a pan hriau hriau a, pindan thlang lamah chuan an awm ngei tih a chiang ta. Engtia chet lak chi nge niang aw tih a ngaihtuah a, damdawi chu an hmu tawh dawn si lo va, an buai viauin a ring. An chet lak chhung chu ngawi rengin a ding ve ngat ngat a, "A awm lo" pakhat chuan a ti hul hak a. An thaw hawk ri pawh a hre thei. 

Pakhat zawk chuan, "Kan ngaihven har ka ti reng a ni. A tu phiangsenin nge lo la hman ang" a ti pawr hlar a. A aw chu a sin lek lek. 

"I pa alawm, amah kankai a hlauh vangin zuk ngaihven vat a phal lo a nih kha" aw thuma zawk chuan a ti a. 

"Kan be dawn nia. A awmna lai hi kan hre fuh lo pawh a ni maithei a ni" aw sina zawk chuan a ti a. An hnuhma an thup vel mek tih Ruatfela chuan a hria. Damdawi an hmu chuang lo bawk a, va nanchin kha thil tha ber nia a hriat loh vangin kal san mai tumin a inher a. Mahse, Aw sina chuan, "Hei a lo call alawm" tiin a phone chu a bengah a vuah nghal a, "Aw a awm lo. Kan hmu lo" a ti nghal zat a. Lehlam tawng chu speaker on lo mah se, a volume a pe sang deuh nge zan reh hnuaiah chuan a hriat theih vek. 

"A va mak awm ve, a sawi chiang viau si a. A tu chuan nge la ang? " hlauhthawn hmel angreng tak hian a rawn ti a. Chu aw chu Ruatfela chuan a hriat hnu ang a ti hle. 

"Ka hre bik lo. Min chet khalh an awm tihna a ni mai" a ti a. 

"Nakinah kar hmasa atanga vawiin thlenga mikhual thlengte list in en dawn nia.. " a rawn ti a. 

"Kan chân angah ka ngai ta mai. Buaipui zui lo mai ang. " aw sina chuan a ti chang rât a. 

"Kha damdawi hmang khan tun inthlan hi ka chakpui thei tih i hria em? Sum hrawm a na chho mek a, ka mamawh takzet a ni" lehlam ami chuan a rawn ti ta a. Ruatfela a che dawt. Chu a biak pa chu tu dang ni lovin Arini pa ngei a ni tih a hrethiam ta kuarh mai. Phone an dah tak avang chuan hmanhmawh zetin building lam a pan ta a. An ni erawh an sulhnu an la thup rih dawn a nih hmel. 

Arini thusawi kha a lo dik vek a nih awm kha.. Kha ta tu emaw zawk kha Rinawma chu a ni ngei ang le.. Awmhmunah a lo ţang ru ve em em tawp. Tihtheih erawh a nei lem lo. 

A tukah tukthuan an ei laiin Ruatfela chuan a en kual a. Rinawma awm a hmu lem lo. A buaina tur a ni lo tih hriain ngaihven loh a tum ta rih a. Mahse, hei erawh a hre chiang, Drugs-a sumdawnnaah Pu Thanga, MLA -a incandidate ve mek chu a inhnamhnawih tih hi. An ram hmabak hi chu a ropui lo teh e. 

"Mampui, inkhawm i tum na nge? " a nu chuan Mampuii thu ngawi reng chu a melh a. A hmelah ngaihthat lohna a lang bawk. 

"Tum lo" a lo ti nghat a. Ni hnih thum vel liam taa a fanu nungchang danglam ta thut chu a ngaihna a hre lo tawp mai. 

"Engvang ringawtin maw? I inkhawm loh ang? Insiam vat rawh" tlema thupe aw deuh hian a ti a. A naute insiam chuan thawm an nei lang lang bawk. 

"Ka dam lo alawm. Ka peih lo" a lo ti tlat. Puitling anga en an ni ve tawh a, han intirhluih chiam chi ni hek lo, lungawi vak lo chuan inkhawm tur chuan an kalsan ta a. Mampuii chuan kawngka a kalh sauh sauh a, roomah lutin khumah a bawk thlawp. Ţah a tum a, a ţap thei thak bawk si lo. A ippik hluah hluah a ni ber e. Lucy chu a hua a, a hlau bawk si. Engkimah a dang chêp vek bawk si a, mi hmuhah chuan duhsak leh hmangaih ber angin a lang a. Fianrialah a zia a chhuah leh zel bawk si. Tumah a hrilh ngam lo va, a inten a, rapthlak leh bawlhhlawh tak angin a inhre bawk. 

Arini pawh a thiante nen an par leh hle tawh mai. An ri hut hut a, ani hi chuan lam lam hi a ti ve vak lo. An thianho chauh party a ni lo va, mi dang pawh an awm nual. A then chu a hmuh tawh hnu an ni, mahse, a hmelhriat loh an tam zawk mah. 

An party-an hmun hi picnic spot lar tak a ni a, a neitu te phalna thlapa hmang an ni. Luh man leh a chhunga chips leh zu leina man a awm hrang vek bawk a. A organise tu te pawh Arini chuan a hre ve lem lo. A thiante sawi vangin a kal ve ringawt. A lo nuam phian lehnghal. 

"I va mal ve" tlema a kal hrang deuh chu a rawn hmu fuh a ni maithei. A lehhawi vat a, a la hriat ngai loh mipa sang tak a ni. A hmel pawh a chhe lo. 

"Ka mal lo" a lo ti ve mai a, a zu no ken chu a sawi pah hliau hliau a. 

"I mal ka tih awmzia chu, nangmahin hetah i lo awm a" ngeiawm lek lek hian a ti leh a. 

"Mi dang ka mamawh loh vangin ka kalhrang alawm" a lo ti ve sak. An inmil dawn khawp e. Chu pa chuan, "Eric-a ka nia.. He party hi ka organise anih hi" tiin a kut a pe a. 

"Arini" tih bakin a lo chhang lo. Chibai erawh an inchibai ve. 

"Ka hawi kual hian nang aia hmel tha ka hmu miah lo" Erica chuan a ti chhak a. 

Arini chuan ner sak chungin, "Min beisei ve deuh tihna em ni? " a ti khawl mai. A frank mah mah chu Eric chuan a lo lawm riau ni tur a ni, a nui hak hak a. "I lawmawm dawn e.. Beisei ta che ila, ka hlawhchham dawn tihna mi? " a ti ve leh kalh. 

"Hlawhchham piah lamah min beisei hma i ngai ang" a lo ti ve hmak bawk. Zu chu an han in dun leh rih lawi a! 

"Khu lai inte ah khuan chawlh hahdamna nuam zet a awm asin. " Eiric chuan a ti a. 

"I ngampa hma mah mah lo maw. Thiana" Arini lah chu a zam lo nasa. Sawi tawh ang khan mipat hmeichhiatnaah chak lo mah se, a mipa tawn fuh apiang mutpui tawp chi a ni bik tlat lo. A mi hriatchian te ngei lo chu. 

"Tak taka i fel reuh khawp mai. I number min pe thei ang em? " Eric chuan dam zawk hian a rawn ti a. Ni dang chu nise, "Zak phawt rawh" tiin a pe lo leh ngei ang. 

Mahse, Eric chu tu emaw nen an inang riaua hriatna a nei a, a hìp ve tlat. A tawngdan leh a chezia a tawng zawnga a hmui tihchet dan te chuan Ruatfela a hriatchhuahtir a ni. 

A number pawh a pe ve ta mai. 

Eric chu a thian ten eng emaw en fel lawk a ngaih thu an rawn sawi vangin, "Ka lo let leh vat ang' tiin a kal kiang a. Arini chu a hawi kual vak vak.. A thiante ho hi khaw nge maw an awm zawh tak ni. 

Chutia a hawi kual ruai lai chuan a piah lawk thingbuk hlim hnuaiah chuan a hmuh tawh hnu hmeichhia leh a la hmuh ngai loh hmeichhe te lam hi an rawn thu sawp niaih a. An awm danah chuan an kai ve chha chha hle tih a lang. Arini chuan mit chhing chungin pakhat zawk chu a hmuh tawhna a ngaihtuah a, a hre ta. Lucy kha.. Mampuii thiannu, a video thehdarhsaktu ngei kha a ni. He laiah te a rawn kal ve teh daih a. Mak a ti deuh. 

Arini'n a en ru reng tih hre miah lovin Lucy chuan hmeichhia chu a chul kualin a dap lawr vel a, a fawp zeuh zeuh bawk. Pakhati pawh chuan a lo hnar hran lo. 

"Kei chu Lucy, kan awmdan hi tha ka ti lo. Bialpa ka nei reng tho bawk sia, tiang chu" an han inhrawm rei deuh hnu chuan a ti ta hlawl a. A inthiam chiah lo tih a hmelah a lang reng mai. 

"A ho em mai, engmah a hre chuang lo. Kan induh a, kan inngai a, a tawk mai alawm" Lucy chuan a lo ti hmawk hmawk a. Chu lai hmuna awm ve dangte chuan tumah mi dang ngaihsak lem lovin an hna an thawk theuh va, chuvangin Lucy pawn mi mitmei a veng lem lo. 

"Nang pawn bialnu pangngai tak nei zawk la.. Hetia a ruk arala inhmuh reng hi ka ning tawh" Pakhati chuan a ti leh dat dat a. 

"A va mak e aw.. Awm mai mai teh. Ka nei alawm.. Bialnu te chu.. Mahse, a la zakzum rih a, he lai hmuna hruai ve chi a ni rih lo. " Lucy aw chuan ngaihno a bei ta vak lo. Pakhati chuan dawih zawk chan a chang ta a niang e. Ngawi rengin Lucy khawihte chu a lo dawngsawng ta tawp a. 

Erica nen pawh inhmu leh tawh lovin Arini leh a thiante chu mi nawlpui haw hmain an haw ta daih. Amah Arini'n hawn a rawt vang a ni pakhat. Rui chhia an ni lo bawk a, inah pawh confi takin a lut ngam. Tuman an lo be buai lem lo bawk. A inbual a, chaw pawh ei lovin a mu thlawrh. A phone hmet engin, Ruatfela numberah chuan, "Lucy leh i nau kha inkawmtir tawh suh' tih thu hi a thawn ta a. A muhil zui nghal. A chau

 tawngkhawng a ni maithei.

"Hello, Mama, Vawiin chu lo haw mai teh a" a nu aw ah chuan ngaihthat lohna lian tak a awmin a hria. 

"Ngati maw? " a ti vat. Kar laklawh a ni si a. 

"Aa.. I nau awmdan hi ka hrethiam lo a ni. Lo chho la, hmaichhanah ka hrilh ang che" a nu chuan a ti ringawt a. 

"E.. Aw a nih chu mawle, chawhnuah lo chhoh ka tum dawn nia" a ti ta thluam a. A nau chungchang chu eng tak ni ang maw? Arini msg lah kha, "Lucy nen inkawmtir tawh suh" tih kha a nia. A zawh chian lahin a rawn chhang duh tawh si lo. A nau vang chuan a awm a nuam ta vak lo. A thawhpuite bulah sawiin zan riaka haw zuai a ngaih thu a sawi a. Mikhual an ngah lo bawk a, engmah an sawi buai hran lo. 

In a thlen chuan a nu chuan rawng a lo bawl a. A naute pahnihin panhnah an lo phuah a, "E..! I lo thleng tawh maw? Va inbual fai la, chaw kan ei dawn nia" a nu chuan a lo ti sawk sawk a. Ruatfela chuan a nau chu a zawng ru deuh. 

"Ka inbual tawh alawm.. Khaw nge Mampuii chu" a ti ta a. 

A nu chuan, "Kha.. Lucy in a thiannu birthday lawmnaa tel turin a rawn sawm a, a harhvang si lo va, ka lo remti mai a. An kal ta a nih kha" a ti a. Ruatfela chuan, "Aw engah nge maw i lo kaltir kher kher le.. " a ti chuai raih a. A nu lah chuan engmah a hre thiam si lo. Amah Ruatfela tak pawn eng ber nge an buaina a hre chuang lo. 

Chaw chu an ei a. Eikhamah a nu chuan Mampuii awmdan chu a sawi ta a. 

"Zirtawpni atang khan nge ka chiang tawh lo. A ngui em em a. Chaw lah a ei tlem si. Biak loh chuan min biak a tum renh reng lo bawk a, Lucy hian a rawn kawm harh zel zawk a. Ka sawi thiam lo, ka ngaih a tha lo a ni tawp mai. A chhan sawi fak tur ka hre bawk si lo" a ti ta a. 

" A va mak dawn ve aw.. Lo haw phawt se, keiman ka be dawn nia" Ruatfela chuan a ti a. Dar 8 a rik pawh chuan a lo la haw si lo. A call ta nge nge a. A bengchheng ngei mai. 

"Lo haw tawh la" Ruatfela chuan a ti a. 

"Maw… i sawi ka hre thei lo" a rawn ti lawng lawng a. Phone a thi ta daih. Khawi hmunah emaw chuan an awm tih a chiang. Ruatfela ngaih a tha ta zan lo kher mai. 

Chutia tih ber tur hre lo va a awm mual mual lai chuan, Arini'n a rawn call hlawl mai..! 

"Aw" a ti nghut a. 

"I nau ka rawn hruai haw dawn.. " a rawn ti a. Thawm chu awm tho mah se; tlem chuan a fiah ta deuh e. 

"Ngati nge? Khaw nge in awm? " a ti vat a. 

"Nakinah chu chu" tih pahin phone a dah nghal daih. Ruatfela chu a hrilhhai angreng kher mai. 

Dar 10 a ri ta. An nufa chuan an vei an vei a. An mangang tih hai rual a ni lo. Tumah an call tlang thei miah lo lehnghal. An kawngka chu an rawn kik dawt dawt a, Pi zuali chuan rang zetin a va hawng a. A tawlhhnung dawrh mai. Arini chuan Mampuii, harhfim lo tih hriat tak chu a lo kuah a, a tlu lek lek mai. In chhungah an rawn lut a. Thutthleng seiah chuan Mampuii chu an muttir a. 

"Eng nge a awmzia? Khaw nge Lucy? " Ruatfela chuan a ti chang fal a. 

"Ka hrilh che kha. Lucy kawm tir tawh suh ka tih kha" Arini chuan a ti a. Pi Zuali tawng a tum lai takin Lucy a rawn lut hlawl mai. 

"Zawngi, nangmah vanga ka buaizia hi i hria em? Nu Zual, he mihring hian Mampuii chungah eng nge a tih in hria em? A hrai rui mawle.. Kei pawh min hrai rui a, mahse, ka harh hma ta hlauh a. Ka rawn umzui a nih hi. Engtin nge Mampuii kha i tih sawi rawh" tiin Arini chu a va hnaih nghal ruak a. Arini chu a tawlh hnung deuh a, a hrilhhai hmel kher mai. Lucy chuan Mampuii chu zuk bawhin a ko nghek nghek a. 

Ruatfela chuan, "Thil awmzia chiang takin sawi rawh u" nelawm loh zet hian a ti ta a. 

Lucy chu rawn ding chhuak lehin, "Birthday lawmnaah hemi te hi an lo awm ve a. Ka thianpa nau a nia tiin a hruai hrang a, ka umzui dawnin a thian mipa ten min dang tlat si a. Ka va hmuh leh chuan ruak vekin Mampuii hi khumah a lo mu a, a lo rui em em bawk.. A bak chu tun hi a ni mai" a ti ta piap piap a. Arini chuan, "Maw?! Enge nge i sawi? Ti nge dawt vek i sawi a? " a ti tuar a. 

Ruatfela chuan a melh tawn sek, chutih lai tak chuan Mampuii chu a rawn rum tiah tiah a. A meng ta a. 

"Mampui, thudik i hria tiraw? He nu hian tiraw hrai rui che a, saruaka awm tir che… i hria tiraw" Lucy chuan a ti zawt zawt a. Mampuii chu a rawn thu chhuak a, awm ve te chu melh kual dan dan. Lucy a va melh chuan a tawp chat. 

"Thudik chu a hria alawm.. Nawr sek suh. "Arini chuan a lo ti zawi sap a. 

Ruatfela chuan Mampuii chu sawi nawk nawk chungin, "Engkim han sawi teh. Tu zawkin nge hrai rui che.. " a ti a. Mampuii chu a ngawi vang vang a. Lucy leh Arini chu a melh tawn sek a, a heh te chu a liak leh hlap thin. A tawp a tawpah chuan, "Arini hian min hrai rui" a ti ta a. 

Arini chu a per dawrh mai. "Eng nge i sawi? " a ti hrâwk a. 

"Thudik chu ka'n sawi ange.. Partynaah khan… " a ti hman chiah tihin a darah Ruatfela'n a rawn vuan chat a. Mitmeng azawnga mitmeng nelawm loh bera melh chung hian, "Tu nge i nih? Ti nge kan chhungkua hi min tihbuai chhen? I eng pawi nge kan sawi? Mawh? Ti nge min awmtir ve mai mai loh? " a ti vawt ta raih a. A aw chu a lungchhe aw lek lek bawk. 

Arini chu a hamhaih takzet. "Sir, ka sawifiah thei. I hriat ang kha a ni lo" a ti a. 

"Engmah ka ngaithla duh tawh lo. Nang hian buaina bak min thlen ngai lo. Kei min huaa ka laka phuba lak i duh chuan keimah min bei rawh. Ka farnu chu ni lul lo ve" a ti fiah kâk a. Rilru nat hmel zetin chunglam a melh nghal daih. Arini pawh a ţap lek lek mai. Lucy chu va hnaihin, "Tenawmnu, nangmah vang vek a nih hi.. Eng nge i tih hi i hria em? " a ti hriam hraih a. Lucy chu a lo nui hak a. Arini chuan a tuar thei ngang lo aniang, a hmaiah a beng ta a. 

Ruatfela a rawn inrawlh vat. Arini chu chiang kek kawka melhin, "Chhuak rawh" a ti nghut a. 

"Min ngaithla ve ta che" a ti zawi raih a. A mitmeng chu tawrhna hlirin a khat. 

"Nang hian eng thil tha mah min thlen ngai lo ve. Ka farnu chungah hian engmah i tih ka remti lo. Min chhuahsan la, zanin atang hian nang leh kei chu inhmelhriat pawh kan ni tawh lo tih hria anh che" a ti ta a. Boruak chu a reh ngawih ngawih mai. Zawi muangin Arini chuan kawngkhar lam a pan a. A bianga mittui luang chungin, "Inchhir suh ang che" a ti sap a. Nui lui sak chungin a chhuak ta a. 

Chumi zan atang chuan Arini khawvel chu a thim zual ta a. A rinber leh a hmangaih ve awmchhun chuan a vawi hnih nan na takin a hliam leh ta. A tawk tawh e. A tawk lutuk e. Ruatfela chu a phumbo hmiah tawh tur a ni. Tunah chuan peng kawi tawh lovin a hmabak hlen tur a hlen ang a. Tichuan, kumkhua atan a chawl hlen tawh ang. 

Ruatfela pawh a inngaihtuah nasa. Mahse, Arini huatna hlirin a khat rih tlat. Sandra lam pawh a ngaihtuah thei meuh lo. A farnu hrai rui duha saruaka awm tir duhtu chu a ngaidam thei lo vang. A hna a chân phah emaw eng pawh ni rawh se, a farnu zahawmna atan chuan engpawh a ti ang. Mampuii erawh a mizia a la ngai reng. A hma aiin a ngui zual a. Amah chauha awm a duh fô a. Zan khat phei chu a ţap ri a nuin a hria a, a va kal chuan, "Ka pa ka ngai a" a lo ti! A pa hming sawi ri ngai lo khan tuna taka a ngaih a rinawm loh. Ruatfela lah a hna vangin a chhuk leh tawh bawk si. Mampuii awmdan chu a danglam chho zel bawk si. A nu tan chuan enkawl a harsa viau ngei ang. 

Arini leh mipa pakhat sang leh lian tha tak rawn kal phei chu a hmu reng. Nuam an rawn chen leh dawn a ni ngei ang. An rawn kal pel a, Arini hian room bik a neih tawh vangin book ve hranpa a ngai tawh lo. Zanah Arini roomah chuan an ri bur bur a, woofer an lo keng lut emaw ni an hla play lah a bawraw mah mah deuh a ni. An mikhual pahnih chuan an rawn complain ta chiah a. Ruatfela chuan Arini room kawngka chu a kik vak vak a. Rei fe hnuah an rawn hawng chauh. Arini chuan tawnzau dum a ha a, a hnuaiah kekawrte chiah a ha! Mipa lah boxer nen chauh! 

"In thawm a ring deuh a, complain kan dawng a" zaidam takin a ti a. 

"A ho.. Kan thu thu" a lo ti hlar a. 

"Tlemin in thawm tizawi ve deuh ula.. " a ti leh a. 

"Aw le" Arini chuan chiang zeta rawn melh chungin a ti sap a. A chhuak zui nghal. 

A mu chiah tihin Elim call a dawng a. 

"Sandra te chu karlehah an lo phei dawn e" a rawn ti! Johnson nen an nih chuan awmzia a awm chuang lo. Amah Sandra lah hian a rawn be duh malek a. 

"Aman engmah min hrih duh chuang lo va, biak tlakah min ngai tawh lo a nih ka ring.. Chuvang chuan biak zuia hmuh zui ka lo tum tawh hleinem" inti pa takin a lo ti hmak. Elim pawn tihngaihna vak a hre lo. A mutui tehchiam lo kher lehnghal. 

Tukthuan an kil laiin a nu call a lo kal a, "Aw nu" a tih rual rualin, "Mama, Mampuii hi.. " a ti ringawt a. A tho nghal uaih. 

"Eng nge Mampuii chu" a ti tuar. 

"Kan kaitho zo lo" thlabar tih hriat zet hian a rawn ti ta a. A phone a thlauh lo chauh. 

Rang takin a roomah a chho a, a insiam nghal sawk sawk. 

"Lalpa, thihtir lul suh" tiin a phun mawlh mawlh a.. 

(Tui an sem a. Zirsanga pawh ka ziak hman ta lo. Min hrethiam teh u. In buai ang tho khan ka buai ve sia e. Ka hmangaih tho che u a nia aw. 😒😍