A tel lovin... Last chapter

A TEL LOVIN.. (Last chapter) 

(Adds hi min click sak ziah em le? In duhthlanna chu a ni ngei a, mahse, in khawngaihna ka rawn dil leh a ni e 😊

Ziaktu : Toni Râlte

"Mama, i pa hi vawiin chu nangman i va kalpui mai dawn mawni le, Berhpuia te exam lai a ni si a, ka hruai an phût ve tlat mai si a. In buai viau loh chuan" a nu chuan a rawn ti a. A pa incheckup a hun leh tawh a ni. A pa hi chuan ngai a ti tawh miah lo naa, an theih chinah chuan tih zel an tum ve tlat si. Ruatfela pawh chuan, "Aw le, mikhual kan nei dawn lo va a tihzia hlauh a nih chu, chaw ei khamah ka lo chho dawn nia" a ti a. An phai mikhual te an haw ta bawk a, an thaw hawk mai. 

Tukthuan a ei laiin a farnu pasal nei ta khan a rawn call ve hlawl mai. Ani hi a chanchin kan sawi lo deuh a, Pasal a neih atanga kum 3-na velah an pa kha Missionary-ah lak ni vein vai ram chengkerah a kumpui linglet dawn an zu khawsa a ni. Ruatfela hian chanchin chu a zuk hrilh ve zel a, an ni tan rawn haw a buaithlak si a, Ţawngtaina mai lo chu tihtheih an nei bik lo a ni. Chuvanga rawn thai lang tel lo mai kan ni e. A nau chuan thla thara an rawn hawn ve tur thu a rawn sawi a, Ruatfela a lawm ru hle. A chhan pawh a pa hian eng chen chiah nge a daih dawn tih a hre bik lo va, a lo kal ta a nih pawhin chhungkaw kima thlah liam theih kha a duh ve em em a ni. 

Chaw ei khamah a haw ta nal nal a. Ni 3 chhung vel mikhual an nei dawn rih lo bawk a, mitmei a veng vak duh bik lo. Tih tak êmah chuan hnathawk dangte hi an haw zingin an duty an hlen lo nasa zawk ve tho a, aman a kep chang hi a tam zawk awm e. Chuvang chuan zah pawh an zah reng a. A tlan chak bawk a. A thleng hma viau. Hemi ni hian Arini pawh in lama in lama inenkawl chhunzawm turin damdawiin an chhuahsan ve chiah bawk. Ruatfela chuan kan a tum hran lo, natna bak a hlawh chhuak dawn lo tih a hriat bakah Arini chuan a mamawh tawh lo tih a hai lo. 

A pa chu a nu chuan a bual fai a, a inpeih hnuah taxi koin inchek up tur chuan an chhuak leh ta nghal a. Mampuii te pawh class an kal. Bialpa a neih thu te pawh a lo hre ve a, fimkhur tak leh thianghlim taka ke pen turin a fuih ve mawlh mawlh a ni. 

Zodinga pawh an tibuai ve bawk a tiin Pu Thanga te chuan pawisa te an pe hial a! Ani lahin a lo hnar lem lo bawk. Arini te inah chuan chaw ei ve nghal tura an sawm vangin a awm ve ta reng a. A chet dan chu a makpa chet deuh nghal ringawt. Arini lahin Ruatfela ngaihtuah chung zelin a langsar thei ang berin a duatin a pâk hiam bawk si a. A tan chuan a nuam ngawt ta ve ang. Arini chu a inbual sar sar a, a hriatna a neih let leh atanga atana mi pawimawh pahnih Rinawma leh Ruatfela a ngaihtuah chhawk nawk nawk mai. Rinawma chu thla thar ni 4-ah a chungthu ngaihtuah that leh tur kha a ni a. Amah pawh a kal ve dawn a ni. A duh ber leh a mangphan thin hremna chu a pe thei dawn ta niin a hria a, chu chauh chu a hlimna ni mai tawhin a hria. Ruatfela a ngaihtuah chuan a natna bakah thinurna in a rawn luah khat ziah! Ruatfela tana a thil lo tih zawng zawngte a ngaihtuah let a, a rulh let dan lawmawm loh tak te nen. Chuvang chuan, "A nat nan pawh ka hlim lui zel ang" a ti tawp! Mahse, a chang chuan Ruatfela'n a ngaihtuah zia leh amah vanga Zodinga nena an insual hial dante, a ruih chhiat ber laia rawn khai chhuaka zan rei pawh sawi lo va rawn la chhuak thintu a nihzia te pawh a hai chuang lo. Chung thil te chuan a rilru an tibuai lek lek thin. 

A inbual tih a hre lo nge, a room-a Zodinga lo lut chuan phone a hmang a. A tawng ring angreng viau. 

"A mak, ka thianpa ka tih mawlh mawlh kha.. Min ringhlel reng mai. Inthen ang" a ti chhum hmak a. Arini vang chuan a bialnu nghet pawh kalsan a huam ta viau mai. 

Lehlam thusawi erawh a hriat theih loh a. "Ka lo haw tep alawm.. Naktukah lo haw ka tum ang, a la dam tha vak lo va.. Chuvang alawm.. Ka ngai tawh che lawm kei pawn.. Min rinhhlel renh zel a. A ninawm lawm.. Anih ka dah ania, love u.. Muah" a ti zawt zawt a. Phone chu a dah a. Bual in chhunga awm mek Arini chu a khi sak. Inbumna khawvel tak hi chu aw.., Zodinga vang chuan chhetmahin a na lo. A nuih a za hial zawk. Mahse, chimawm chhuah ve hrim hrim a duh a, damchhan vak a nei ta lo bawk nen, Ruatfela chunga phuba la tho siin amah bumtu Zodinga chu chhaih buai a tum ta a ni. Ruatfela a chang ta lo ta sa sa, Zodinga chuan a lo bum ve aiah pawh nei lo thei lo va siam a tum ta hmiah mai. 

Nancy chuan Ruatfela a call a, rei fe hnuah a rawn chhang chauh, a pa damdawiina a kalpui thu a rawn sawi chuan, "I rawn chhuak chho hlauh chu a va tihzia tak.. Arini damdawiin chhuah kan lawm dawn a, chaw eikhawm kan rel a, i rawn tel ve ngei a ngai ang" a ti a. 

Ruatfela chuan a hreh ru hle, "Aa.. Tanhrila chhuk leh mai ka tum asin" a ti khawmawi a. 

Nancy chuan, "Kha lam ngaihtuah a ngai lo. I tel loin an lo ti ve nawk nawk mai ang chu. He lamah i pawimawh tlat! Ka nu pawn khaw nge a ti reng che.. I lo kal ngei tur a ni" a ti tlat mai si. Lehlamah a boss a ni bawk nen, a hnial ngam ta bik lo va. 

Doctor te chuan Pu Lawma chu admit mai an duh laiin amah Pu Lawma chuan, "Eng pawh tawk dawn ila, mahni in lumah nupui fanaute bula hun tawp hman ka duh" a ti fun mai si a. Daihrei hmel zawng a pu tawh mawlh lo. A duhthlanna chu Doctor te pawn an zahsak ve ta aniang. An pafa chuan an haw leh ta hnak hnak a. Ruatfela pawh a inbual fai a, a kalna tur te chu a nute a hrilh bawk a. Zanin chu hetah a riak thei dawn bawk a, an lawm hle. 

Dar 3 pelh deuhah Arini te in lamah chuan a phei ve ta a. A phur fahran lo kher mai. Zodinga a la awm tih a hre ve tho bawk si. Nancy te inah zawk chuan a lut kawi a, a fate nen an lo awm thap mai. 

"Lo kal rawh. Hei naupangho inpeih hun hi ka nghak a, kan phei dawn nia" a lo ti sawk sawk a. A thu ve kur. An inpeih fel hnu chuan Arini te in lamah chuan an phei ta a. Arini thian hlui ti mai ang, Johny te ho pawh an lo kim ta thap mai. An tam lem lo naa Ruatfela chuan kawm tur pawh a nei leh chuang lo. Zodinga a zawng rilru deuh a, a hmu mai bawk si lo. Arini chu in chung atangin a rawn chhuk thla hnalh hnalh a, a hnungah Zodinga a rawn kal ve bawk. Ruatfela chu a thaw hawk. Miin an enchìk ang tih a hlau leh hnuhnawh si. A inthunun hram hram a. Chaw ei hmain Pu Thanga chu rawn dingin a fanu dinhmun leh natna te a sawi zuai zuai a, a dam leh tak avanga an lawmzia te nen. Mahse, ngun taka chìk chuan a fanu hriatna nei kir leh chu a lawm famkim chiah lo tih a lang reng mai. 

Pu Thanga thusawi zawhah chuan chaw ei an siam ta nghal a. An tam lo bawk a, felfai tein an ei thei mai. Ruatfela pawh amahin a ei ve mial mial a, Pi Mali'n a rawn be zuai tih loh chu tu khaw khain an be lem lo. A tu amah chu hriat em em a nei bik lo bawk a, chaw ei kham vata hawn vat mai chu a duh ber a ni. Amah leh amah chu a inkhawngaih lek lek mai. 

"Sir, i lo kal ve thei ni maw? " a kun ngur ngur lai chuan a hnung lam atang hian Arini'n a rawn ti sap a. 

"Aw nia, i u in min rawn sawm a" a lo ti vat. Zodinga chuan a lo nuih sâwng a, chu ringawt pawh chu a tan chuan intham lohna a tling. Arini chuan a hmela engmah lantir lem loin, "Ei ţeuh rawh aw.. E chuan, ka sawi tawh ang khan Zodinga nen kan inneih hunah chef i rawn nih dawn kha aw" a ti leh sar sar a. 

"Ni e, tehreng mai.. " a lo ti nghut. Chaw chu a bar leh mawlh mawlh a, a hrawka hnawhtu chu tihkian a duh takzet. Arini chuan nui chungin, "Hmanhmawh suh, i helh hlauh ange.. " a ti leh a. An kal kiang ta hram. A thlir zui vawng vawng a, "Ka tuar zel ang" a rilrua ti chung chuan chaw chu a bar leh zauh a. An piah lawka thu ve reng, Nancy'n a en reng tih reng a hre lo. Ni e, Nancy hian a nau leh Ruatfela chunga thil thleng hi a pangngai lo tih a hria.. Ruatfela lu hliam chhan te, Arini hriatna hmuh kir leh dan te.. Engkim chu hriat a chak a, mahse, zawh dawt chu thil tih chi berah a ngai lo. Zodinga bula Arini a awm hian Arini chu thinlung taka hlim leh nui niin a hre ngai hauh lo va, Ruatfela a ngaihtuah chhuah phah ziah bawk. A chhan a hre si lo. 

Ruatfela chaw ei kham pawh ngawi rengin hawn tumin a chhuak ta a. Gate bula thutnaah chuan Arini leh a thiante bakah Zodinga te an lo thu a. A zâm angreng. 

"I haw dawn e law? " Arini chuan a rawn ti vat a. 

"Umm.. Ka haw mai ang. Ka puar khawp mai.. " a ti a. A nui lui bawk. 

"Anih chu.. A lawmawm" a lo ti ve mai a. Engmah sawi tawh lovin Ruatfela chu a kal zui nghal a. 

"A ngaihtuah tehreng che nen, ti nge mi hrang ang daih hian in inbiak zel le? " makti fe hian Zodinga chuan a lo ti sup a. 

"Min ngaihtuah tak tak lo. A hma a sial mai mai alawm.. " a lo tih khum hmiah. Mahse, a rilru chhungril erawh a nâ nget nget tho. "Min ngaihtuah chhan chu ka laka ba nei anga a inhriat vang mai mai alawm.. Nau angin min en bawk a" a ti rilru a. Ngaihtuah loh tumin a inthing nawk nawk.

Zan dar 8 bawr velah a pa chu a luak vak a, a chauh phah hle. Drip an khai ta nghal a, vanneih asiamin an thenawm lawkah health worker a lo awm nen, man chawi em em lovin a rawn tihsak a. A lawmawm. A pa veng leh a drip zawh hun nghak pah chuan a meng ta reng a. 

Nancy chuan a nau room kawngka chu a kik dat dat a, a lo hawn veleh a lut nghal vat. A nau chuan, "Eng nge? ' a lo ti hû a. 

Khuma thut pah chuan, "Thil sawipui tur che ka nei a ni" a ti sap a. 

"Sawi la" a lo ti nghat. A û hmel thutak zia a hmuh chuan a zâm lek lek mai. 

"Ruatfela hi i tan eng nge a nih? " a ti ta tâwng a! Arini chuan makti zetin, "Eng atan" a lo ti nghek. 

"Ka hre duh. In pahnih boruak hi a pangngai lo tih ka hmu thiam vek.. Inhuatna in nei nge in lo inngaizawng tawh nge.. Engkim ka hre duh" a ti ta hmiah hmiah a. 

"A ho! Ka sawi peih lo" a lo ti leh tlat! A nau zia ve reng a nia. 

"Ruatfela lu-a i chhut chhan kha eng nge? Engtin nge i hriatna kha i neih kir leh theih? " a ti leh sak sak. 

Arini chuan ngui zet hian, "A lu-a ka chhu kha chu a hnuah ka inthiam lo ve reng. A inrawlh peih lutuk vang a nih kha.. Chuan, ka hriatna hi chu amahin a rawn kir tawp" a lo ti a. Nancy chuan a awih hreh hle. 

"Anih Zodinga hi i hmangaih em? " a nau mita chiang taka en chung chuan a ti ta a. 

Arini chuan a chil a lem khalh a, "Aw" a ti tawi tâk. A û mitah a en ve lo thung. Nancy a lo nui hak.. "Aw le, Ruatfela duhthusam a hlawhtling dawn anih chu.. Hmeichhe tha tak ni turin a duh che a, Zodinga i hmangaihzia hriain Zodinga hian a khalh ngil theih che a beisei thu a sawi a. Chuvang ania Zodinga kha kan koh.. I hriat miah si loh hian Ruatfela hian i tan thil tam tak a ti a ni" a ti ta a. 

A heh a pet fan fan a, "Engmah tih a nei lo, ka laka ba nei anga a inhriat vang chauh a nih hi. Bum hmang a nia, chu zawng chu. Chuvang chuan a laka that ka chhuah chhan tur a awm lo. Ruatfela chungchang min sawipui chhan pawh hi ka hre hek lo" a ti tân tân a. 

"A chhan vak a awm lo. Ka hmuh dan ka sawi mai a nia. Ka hmuh leh ngaih danah chuan Ruatfela hian i taksa mai ni lo, i thlarau thlengin a hmangaih che niin ka hria.. Mahse, Zodinga i hmangaih miau si a, chuvang chuan na ti chung chungin i tan a tha ber a la duhsak hram hram che a nih hi.. Chuvang chuan, runluih leh dengkhawng zawng chuan awm khum tawh suh. I huaa i hmusit a nih pawhin awmtir ve mai mai rawh" Nancy chuan a ti ta mawlh mawlh a. Arini zawk a hrilhhai hle. 

 A ding phat a, "Ka chunga a thil tih i hre lo anih kha" a ti tuar a. 

"Sawi ta che" a lo ti dam thlap. 

An inngaihzawn atanga an tawp dan,Mampuii vanga in atanga a hnawhchhuah dan engkim chu a sawi fai ta leng a. A thawk hawk nghe nghein a hria. Nancy chuan ngun takin a lo ngaithla a. 

"Tikhan Ruatfela chuan min hmangaih i la ti thei tho em? Zodinga nen te hian kan inneih loh a hlau nhawt ang. A chhan chu atan ka hnawksak tawh dawn lo va" Arini chuan a ti a. 

"Naupang chhia lutuk" Nancy chuan a lo ti sap. 

"Khang thil thleng zawng zawng kha chu engpawh nise, an liam tawh. Tunah i lakah inchhirin hrehawm takin a awm mek reng a, a hmangaihzia che pawh a hre chhuak tawh ngeiin a rinawm. Mahse, nangin i huata i hmuhsit tawh tlat avangin i tana tha ber tur nia a hriat Zodinga kutah a dah ta mai che niin ka hria" A ti ta a. 

"Dawt a nih chu.. Amah hian min hua alawm.. Fing takin a awm a, lemchan thiam ania. Mi dang duh a neih vangin min hnawhbo dan a dap reng a nih hi. Ni e, Ruatfela duh dan ang ngeiin Zodinga hi ka nei ang. Ka nei khawp ang" a ti ta chiam a. A ţap lek lek bawk. Nancy chuan, "Hahdam rawh ka nau, ni e, i ngaihdan chu kalpui la, i hlimna tur anih dawn chuan kal tawp rawh.. Mahse, ka thusawi kha zanin chu i lo ngaihtuah tha hram dawn nia" tiin a chhuahsan ta a. 

Ceiling melhin a mu zangthal a, A û khan eng thu nge maw a sawi ni? Khatiang thu awihawm loh lutuk.. Tiin a ngaihtuah naa a û thusawi kha tak tak nise a duh ngawih ngawih thung si.. Eng nge a tih ang tih a hrethiam lo. Ruatfela laka a chetdan te a ngaihtuah let chuan hrehawm a ti a, Khami zan a lu a chhut zan te khan Ruatfela chuan ama thatna tur a duh vang chauha hruai tum kha a ni a, mahse, Lo hnarin atthlak takin hliam a siamsak ta si.. A tho thut a, a phone a zawng nghal. 

Ruatfela number chu a call ta hmiah mai. 

"Aw Hello" a rawn tih rual rual chuan, "Inhmuh ka duh" a ti nghal tâwng a. Tunah dar 10 rik nan minute tlem a la awm. 

"Maw?! Engvangin" a rawn ti a. 

"A tam mai. Inhmuh ka duh" a ti leh a. 

"Aw khawiah nge niang sawi la" a rawn ti ta.

Inhmuhna hmun tur a sawi a. Phone dahin a inthlak nghal. 

A va thlen chuan Ruatfela chu a lo thu fel ât tawh a. A lo ding nghal vat bawk. 

"Engvangin nge Zodinga hi i koh? " a hmaa a zawhna bawk kha a zawt leh nghal thâwr. 

"Ka sawi tawh kha.. I hmangaih a, ani pawn a hmangaih bawk che a.. " a lo ti ringawt. 

Meng sen râm chung hian, "Sandra kha i la hmangaih reng em ni? " a ti leh a. Dik tak chuan, "Min hmangaih em? " tih tawp chu a duh, a ngam bik ngang lo a ni. 

"Hmangaih lo" a lo ti hmuk. 

"Pasal hual a neih vangin maw? " a lo ti leh vat. 

"Aw a ni ve thei tho ang chu" a lo ti sam et a.. Ruatfela bawk chuan, "Min hmuh i duh chhan chu heng thu sawi tur hian maw.. " a ti lh a. 

"Aw.. Ka hre châk thut a. Hmaichhan ngeia sawi ka duh sia.. Chuan, anih Zodinga hi min duhpui maw? " a ti leh a. 

"Ka duhpui leh duhpui loh che in awmzia a nei hleinem.. Ka lua chhu duh khawpa a thlavang i hauh te chu i tan a hlu hle a nih ka ring a, ani pawn tha taka a enkawl theih che ka ring bawk a ni" a lo ti nghet charh a. Arini chuan sawi tur a bangbo hle. 

"Ka.. Ih, ni e.. A tha ang.. Nang pawh nupui tha tak i nei dawn nia" a ti bah nak a. 

Ruatfela chuan Arini melh chiang chung hian, "I tha em? " a ti hluai. 

"Ka that ka beisei" a lo ti sap a. Mhase, a mittui a luang si. Ruatfela chuan zah pawh dawn lovin a pawm ta chawt a. 

"I tha lo a nih hi.. Eng nge a chhan? " a ti dam thlup a. Khur ngawt ngawt chungin, "Ka.. Ih, misual tak i ni" a ti ţiau a. 

"Nang pawh i chimawm" a lo ti khauh. Thla eng hnuaiah chuan ţap ţeuh chung chuan an han innuih leh rih! 

"Dik tak chuan Zodinga hi i hmangaih emaw ka ti asin" Ruatfela chuan a ti ta hlawl a. Arini chuan inla hrang deuh hian, "Zodinga ka hmangaih pawh chu i va duh awm em em ve" a ti hlar a. 

"Aih, ka duh lo.. Ka duh lo nasa lutuk" a lo ti. 

"Ti nge? I koh si? Keimah min hnar boa i tana ka hnawksak tawh loh nan tiraw? " tiin Arini chuan a thar thawh leh hnuhnawh a. 

"Aih, dik tak chuan, i hriatna i nei let leh tawh sia, kawng tha lo i zawh leh kha ka hlau em a ni" a lo ti a. 

"Ti nge? Kawng tha lo ka zawh leh chu i hlauh? " fiah zet hian a rawn ti khauh! 

"I hria alawm.. " a lo ti ringawt a. 

"Ka hre lo, eng nge a chhan? Engtin pawn awm ila, i tan te chuan engtihnamah a ni ngai hleinem" a lo ti leh vak a. 

Ruatfela chuan pan hnaiin, Arini chu a melh ran a, thutak tih hriat ngawih ngawih mitmeng thuk in a ni a melh ni.. "A chhan chu maw ka hmangaih che a ni" a ti ta a. Hei hi alawm Arini nghah reng, a kar chhuah duh em em chu.. 

"I ti tak tak lo, ka laka ba nei anga i inhriat vangin ka lakah that i chhuah zawk alawm" a lo tih san a. 

"Ni e, ba chu ka nei alawm.. Chuvang ania ka hmangaih che tih pawh ka sawi ngam loh. Min thungrulhna ang ang chu tuar zel turin ka lo intiam ve tawp a.. Tawrh erawh a harsa thin khawp mai" zawi raih hian a ti a…. 

Arini thinlung chu a hneh kher mai. Mahse, chutimaia han inhnuhdawha han tlawm chu a hreh ve si.. 

"Ih,.. Zodinga nen hian innei tak tak dawn pawh ni ila, pawi i ti lo" a ti leh a. Ruatfela a nui hak, "I hlimna a nih chuan ka pawm vek ka tih kha.. Nat chu ka na ang, mahse, hlim tak leh tha taka i awm na tur a nih dawn chuan ka lawmpui thei che" tiin a kuah a. 

"Anih chuan Zodinga hi ka then vat a ngai anih chu" nui sak chung hian Arini chuan a ti a. An tawngkam in man dun lutuk chuan an nuih a tiza. 

Chu lai hmun, mi veivak awm lohna, thla engin a chhun en riai hmunah chuan hman aia thlum leh thuk zawkin an inhmangaihna thu chu an tiam nawn leh ta. An inhriatthiam tawn loh chhung leka hrehawm an tihzia leh an natzia chu an sawi dun sep sep a. An chapona leh induhtawkna avanga pawh hrana an awm reizia te nen.. 

"Hei hi ka ngen duh che a, hmalam hunah eng nge kan tawn ang ka hre lo va. Mahse, khang kan tihsual tawh nunhlui kha chu insawi sak tawn lo hram ang. " Ruatfela chuan a ti a. 

"Umm.. Nia, mahse, Sandra kha chu ka thìk eee" naupangchhia zetin a lo ti a. 

"Zodinga ka thik aia nasain maw? " a lo ti khauh. Arini chuan a chum arh arh a. Zan te a rei lam ta a. Ruatfela lahin a pa a ngaihtuah bawk si, hawn zai an rel ta a. An kal lam ai chuan an phur chu zâng tak a ni. Arini huaisenna chuan an pahnih tan kawng thar a rawn sat êng leh ta chu a nia. He kawngah hian rei tak an kal dun leh thei chiah ang em? 

A tukah Arini chuan Zodinga chu a ko a. An tum dan kha chuan Zanina Resort-a inhual vel kha an tum a. Arini plan a nia! Ruatfela runluih nana zuk inhual vel kha a chak tlat! Mahse, tunah chuan thil a danglam tawh. Zodinga nen a roomah an thu dun ran a. 

"Vawiinah haw mai rawh. Chuan, i bialnu rinawm taka lo nghaktu che kha tha takin zuk kawm la, a tan rinawm reng tawh ang che" Arini chuan a ti ta a. 

Zodinga chuan phâwk hrù hian, "Eng a? Nangmah bak bialnu ka nei hleinem.. Ti nge hetia i awm a? Zaninah kan inhual dawn kha" a ti bawrh bawrh a. 

"Zep a ngai hleinem. Mi mawl ka ni lo. Ka hre vek alawm. Tunah chuan mamawhna che ka nei tawh lo. Chuvang chuan haw la, inhriat zui pawh a ngai lo.. Tihian kan tawp a ni mai" Arini chuan zâm hauh lovin a ti a. 

Zodinga a ding hluai, "I va mak ve a. Tikhawp hian min tibuai a, ka rawn chho nal nal a.. Ka hun leh sum sengin.. Tihian maw kan intih dawn a? " lungawi vak lo hian a ti a. 

Arini chuan Almira a va dap ruk ruk a, Pawisa note clip hi a rawn phawrh a, "Ka pa ten an pe nual tawh bawk che a, hei hi keima mimal pek ve che ni se, bialnu nei reng chungin min kawp a. Tihian kan inrultawnah ngai mai ang aw" tiin Pawisa chu Zodinga kutah a hmehbel a. 

"Neih che ka duh asin" a lo ti nghut. 

"Ex MLA makpa nih i chak vang mai mai anih chu.. I hmangaih miah loh leh nangmah hmangaih miah lotu nena inneihna chuan rei a daih ring suh.. " Inringtawk zetin a lo ti leh hmiah. 

"A mak ka ti e.. I awm dan hi.. Chance min pe rawh. Engkim ka siam tha ang.. Ka bialnu ka then ang a, i tan chauh ka rinawm ang. Khawngaihin" Zodinga chuan a ti mawlh mawlh a. Arini a khi sak, "Mawl takin awm suh. Engtin pawn theihtawp chhuah mah la; Mipa khat chauh la hmangaih a ni. Amah bak chu ka thih ni thlengin tumah ka hmangaih tawh lo vang.. Kal mai rawh.. Inenkawl tha la" tiin Zodinga hawihai zet chu a banah chelhin pindan atang chuan a hruai chhuak a. An kawngkapui thleng a thlah. Zodinga chu a la hamhaih takzet. Mahse, ani pawn a kawp ve tho va, hetia a thungrulhna hi chu a phû ve reng e. A khawngaih hran lo. 

"Zodinga chu ka ching fel e" tiin Ruatfela chu msg a va thawn a. Tunah chuan an pahnih khawvelah chiah a cheng tawh ang. 

Pu Thanga'n Ruatfela nen an chungchang a hriat chuan lungawi lo zetin a iai thu a sawi nghal hmiah. Pi Mali erawh chuan Ruatfela chu mi tha tak niin a hria a, a fanu hlimna a nih dawn chuan pawi tihna a nei lo. 

"Sawtiang i u te hnuaia hnathawk satliah, mi in hnuai luaha khawsa saw lungawi taka ka pawm i ring reng reng mawni le.. " tiin a fanu chu a melh ta khui a. 

A pa melh ran chung chuan, "I pawm ngei theih dan tur ka hria alawm" a lo ti sam êt. 

"Engti kawng zawng pawn ka pawm lo vang. Inneih te kha in lo suangtuah mai mai ang e. A teuh lo lutuk ka thian te leh thenawm khawvengte min hmuhsit dan tur ka ngaihtuah hian, tuithlar mai che pawh ka hreh lo vang" a ti tâwn tâwn a. Ruatfela chu mi tha tak a ni tih a hre ve reng, a fanu a ngaihtuahzia pawh a hria. Mahse, a dinhmun leh nihna te chu a iai a ni ber. A mimal takin a va haw em em pawh a ni lo.

"A tha alawm.. I thu vek.. Chuan ni 4-kha Rinawma thiam loh kan chantir ni tur a ni tak tiraw? Ka han inbuatsaih teh ang" tih leh Arini chu a pindan lama chhoh a rual nghal a. Pu Thanga a hrilhhai kher mai. 

"Hre rawh. Rinawma sawn hremna a hmu tur a ni lo.. " tiin a au zui hram a. A fanu chuan hre awm pawhin a lang lo. 

"I tithinrim leh ta si a, a thinlung hneh chu a harsa tawh ang. Rilru fim takin i dawr thei thlawt lo a nih hi" Pi Mali chuan a lo ti khauh a. 

"Tharum nen kan indawr tawh ang a a ni mai lawm" a lo ti sup. 

"A rawn harh chhuah hmasak bera Rinawma a rawn sawi danah khan hremna a pek loh chu ring duh suh. Bakah Ruatfela vangin i tina lehnghal a. Nangmah vang hrim hrim pawn hremna pek a tum dawn khawp" Pi Mali'n a lo ti thung. Pu Thanga a ngawi vung vung mai. 

Thla pwh a lo thar ta a. Ruatfela leh Arini chu khami zan atang khan a falin an la inhmu leh rih lo. Phone ah erawh an inbe nasa ngang mai. An inring tawn tawh bawk a, nunhlui an khel chiam tawh ngai lo bawk. Ruatfela farnu te chhungkua pawh an rawn thleng ta a. An in zau em em lovah chuan an inhnawh ve a, an inhmuh lohna a rei ta bawk nen, Sawi tur an ngah hle hlawm mai. Ruatfela farnu hi Ropuii a ni a, Mampuii aiin a te zawk. Mahse, a tawng duhin mi ngainat a hlawh hma em em a, a nui duh bawk. An pa erawh ngawi chawi leh fimkhur tak mai a ni thung. 

Ni 3 zanah chuan Pu Thanga chu a fanu room kawngka kikin a ding ran a. Biak a ngai tlat si a. A rawn hawn rual chuan, "Inbe lawk ang" a ti a. A lut nghal. 

"Naktuk vang em ni? " Arini chuan a lo ti sap a. 

"Aw.. Magistrate bulah i hriatna hloh thu te ka lo sawi tingtang tawh a. Rinawma tan zalenna ka dilsak bawk. Tunah i hriatna a lo let leh ta si a, dawt sawi te pawh ka ang dawn hle a ni. Chuvang chuan i hriatna hloh anga i awm zui zel a tha ber ang. " Chhungrila nuam lo ti deuh chung chuan a ti a. 

"Lem ka chang ang maw? " a lo ti a. A nui hak bawk. 

"Kan chhungkaw tan i tih a ngai. Ngaihtuah rawh. Rinawma hremna kan pek chuan media ten an rawn ngaihven leh dawn a, engkim a bul atanga sawi a ngai ang. Chutah chuan kei i pa bakah kan chhungkua hi kan hmingchhe dawn asin" rilru hah hmel zet hian a ti a. 

"Mualpho i hlauh vang nge i fapa a nih vang zawk? " a lo tih san a. 

"A ni ve ve thei ang chu" a lo ti ve mai. 

"Lem chu chang duh ta lo ila" a ti zawi raih a. 

"Rinawma'n jail a tang ang a, ka damchhungin mi ten min hmusit bawk ang. Nang thlengin" Phuahchawp zet hian a ti a. 

"Chutiang chu ka ngaihven ve lo. Kan chhungkaw hi chhe rup dawn pawh ni ila, ka nun tichhiaa hrehawm taka min nuntirtuin hremna a hmuh dawn phawt chuan ka tuar vek thei ang" a ti ta sap a. 

A fanu rilru khauhzia a hria.. Engtia dawr chi nge ni ang tih a ngaihtuah thiam lo. Mahse, a fanu chak lohna a hre tawh a, chu chu a hman tangkai ve mai a ngai dawn a ni. 

"Rinawma hi i chhuah zalen chuan Ruatfela nen in nunah engmah buaina ka thlen lo vang.. " a ti ta nge nge a. 

Arini a lo thaw hawk. "Ruatfela chu rawn tawktarh reng reng suh. A hming sawi pawh kha zak rawh. Rinawma mi bawlhhlawh nena sawi kawp atan ka phal awzawng lo" a lo ti chang fak. A fanu chu hneh mai mai theih a ni dawn lo tih a hai ta lo. Kawng dang a dap mai a ngai ang. Vau deuh te pawh a ngai hial mahna le.. 

A hnuaia thawk thenkhat te hi mi tawrawt leh rorum ve tak tak an ni hlawm a. Lang chhuak miah lo va, Rinawma zalen theih nana hna thawhsak turin a chhawr tawh mai ang chu. A fanu nuna pawimawh ber Ruatfela chunga kut a thlak loh chuan, A fapa a chhanhim zo dawn lo. Engvanga Rinawma chu chhan chhuah duh viau nge a nih zawt ta ila, a fapa a nih thu bak sawi tur a hriat loh laiin thil dang a awm vang a ni. Tunah hian khi lama an sumdawnpui ten an rawn nawr chhen tawh a, amah han kala han dawr tur chuan security a tha tawk lo tih a hria. Tin, police lam hian a rukin an vilin an thlithlai ru reng tih a hai lo va, Rinawma chu a mamawh tawh a ni. An inthlan boruak avang khan sum tam tak a faihthiah tawh a, tunah a sum bawm a ruak thaw thang tawh. Hnawh khat vat a ngai a ni. 

A thuihhruai te chu biain a rang thei ang bera chet la turin a ti ta hlawm a. Mi pahnih te chu Resort lam panin an tlan ta nghal. Chuti ang zan rei tawh lama mikhual han neih chu thawktu te tan pawh a ninawmna chin a awm ve thin. Mahse, phunnawi miah lovin Ruatfela chuan a zuk dawngsawng a.. An room lam pana an kal hnuah muangchangin a room lamah a kal zui ve nghal a. 

Zing dar 3 bawr vel a ni maithei. A room kawngka chu an rawn kik dat dat a. Phak chuapin a va hawng, "Eng nge ni ta? " tiin nichin maia an mikhual te pahnih chu a melh a. 

Eng sawi set set lovin an rawn lut a. "Kan mamawh che" tiin pawnchhia niawm tak hian a ka chu an rawn hupsak ta mai a! A meng phawk kher mai. Mahse, kar lo vah a zawi hnuang a, khumah chuan an muttir a. A thla chu an laksak a. 

Zing tin rawn call harh ziahtu Ruatfela'n a rawn be lo chu mak ti ru deuhin a phone chu a en vat a. A msg thar pawh a awm chuang lo. Makti deuh taka a awm lai chuan msg a dawng a, number hlang atang ringawt hian.. Ruatfela khuma a mu lai thlalak chu a rawn thawn a. 

A hnuaiah, "Rinawma zalen theih nana chet i lak loh chuan i bialpa nunna hian a tuar ang" tih a lo awm! A phu chiang ngei mai. Hmanhmawh zetin a pa te room a pan nghal a. Kawngka a chum bur bur mai. A pa chu a rawn chhuak a, "chhuah vat rawh. Engvangin a chungah khatiang kha i tih a? I lo va rapthlak ve" a ti tuar tuar a. An awmpui te leh a nu te chuan in hnuai atangin an rawn thlir thap. 

A pa chuan roomah a nawr lut a, "Eng thil maw? " a ti nghut. Thlalak chu a hmuhtir a, "Nangmah i ni tiraw? A dik em? Engkim hi i tihtir a ni tiraw? " a ti hriam hraih a. A mitmeng chu a ling hlar mai. 

"Aw.. Ni e, kawng dang ka nei lo a ni. Vawiina i awm dan leh tawngkam azirin ani pawh hi a thiin a dam ang" a lo ti ta hmiah mai. Inpafa awm tak zawng an ni e. 

"Pa ropui pa, khawvel pa zawng zawnga pa maksak ber pa, a tha e.. I duh ang chuan ni rawh se.. I lawm em? " tiin nui lui pah chuan a ti nghat nghat a. 

"A zalen rualin Ruatfela a zalen ang a, in dam chhungin in kawng ka dal ngai lo vang" Pu Thanga chuan a lo ti nghut. 

Arini tan dunthlanna harsa tak chhawp chhuah a ni ta si a. Awlsam taka thutlukna a siam ta mai erawh a pa chu a ngaihtha lo lek lek zawk. "Ruatfela hi a lo hmangaih hle a nih dawn hi" a ti ta hial a. 

Court chhungah chuan Arini pawh fel takin a thu khar a. Rinawma pawh hlauthawng takin a thu ve kar bawk. Mi an tam lem lo. 

"He pa Lalrinawma hian a pawngsual ngei che em? A chet dan engkim min han hrilh teh? " Judge-in a tih chuan, Arini chuan, "I sawi awmzia pakhatmah ka hre lo. He pa hi ka hre ngai hek lo. " a lo ti hmiah. An han tawng nak nak a, Arini hriatna hloh thu an lo hre tawh bawk a. Mak an ti hran lo. An thurel pawh a zuzi lo thei dawn ta lo. Rinawma ukil lahin a check hneh si. Arini ber lahin engmah sawi tur a hre si lo. An thubuai chu thu tling lo a ni ta a ni ber e. Court- pawh chuan thutlukna siam nghalin, "Lalrinawma hi pawisawi lo a nih avangin chhuah zalen a ni" tiin. An thutlukna an puan laia Arini inhumruh nasatzia chu a hah vek thei. A mittui hnâm tiam tiam chu a khap let hram hram a. Hun khirh tak zawng a ni e. A nun tichhetu chu zalen takin a leng tawh dawn chu a ni a. Khang kum a hloh tam tak, mi ang loa siamtu, zan tam thinthia muttir thei lotu kha hremna a pe thei ta si lo. Chu pawh a pa leh a hmangaih Ruatfela avang chauhin… 

Chumi zan chuan Resort-ah a chhuk nghal. Ruatfela chu a roomah a lo awm a. A va pawm nghal chawt. Ani lah a la rui deuh emawni a lo hawi â ruai mai. Arini chuan eitur te siamsakin a ei tir a, a bual bawk. Ruatfela pawh a rawn harh ţan ta bawk. Thil awmzia Arini chuan a hrilh ta vek a. A pa thiltih vek a ni tih pawh a zep hek lo. 

"Chu pawh nise, engvangi nge i kaltlang pui loh? Kha chen i nun hremhmuna chantirtu kha i kaltir mai a maw? " Ruatfela chuan a ti hluai a. 

"Chân leh che ka duh lo alawm.. Ka thei lo" a lo ti a. Lungchim takin an han inkuah leh rih. Ruatfela pawn a hrethiam, mahse, Arini chu a khawngaih. Dinhmun khirh taka dintir tu chu a ma pa ngei a ni bawk si. Engtin nge a fanu chungah hetiang hi a tihtheih?! 

Chumi zan chuan an riak dun a, sex erawh an hmang lo. An intiam ve thlap, inneih hma chu kan hmang lo vang tiin. Arini rilru lak pen nan tiin Ruatfela chuan tihhlim dan kawng a dap hram hram a. Mahse, Chumi zan chuan thinlung takin an nui dun hleithei lo a ni ber. 

A tukah Arini chu a han haw leh phawt a. Ni eng emaw zat Resort lama awm ve turin a thawmhnaw te a siam fel a, a nu leh a u a hrilh bawk. Zirna lam chu a ngaipawimawh tawh lo. A hlim ve theih laia Ruatfela bula hun a tam thei ang bera hman chu a duh ber a ni. Chawhnu lamah Pu Thana nen an chhuk leh a. Ruatfela pawn a lo lawm hle.. 

"Rinawma chu theihnghilh a har ang, mahse, kan pahnih hmalam hun ngaihtuah ila, a tha leh thianghlim thei ang bera kan hun hman dan tur ngaihtuah zawk ang" tiin a hnem a. Arini pawn a tum ve khawp mai. Nupa ang thawthangin an khawsa a, an mudun lo chu nupa an nih lohna a ni mai. Arini zawk chuan insum harsa a ti fô!, mahse, chutiang hunah chuan Ruatfela chu sangha ang maiin a vawt thin. Chu chu an tan a pawimawh si a. 

Huan te fangin hna te an thawk dun a, an hlimzia chu hnathawk ve dang ten an hre thei ang. Hmuhnawm ti deuhin an lo thlir thin. 

"I ţap elo"? Ruatfela chuan Arini melh chung chuan a ti a. An movie en mek lai chu movie upa tawh tak, chuai thei lo, "A walk to remember' ngei kha a ni. Arini hian a lo la en ve ngai reng reng lo a lo nia. An han en dun takah chuan a ţap pur mai. 

"An khawngaihthlak em alawm" a lo ti ţiau a. 

'Nang chuan tiang khian min kalsan ve miah suh aw" a lo ti sup. 

"Nang pawn aw" a lo ti a. An han infawp leh rih. Zan lamah card an den loh chuan movie an en a. Chhun lamah an hun awlah lem an inziahsiak thul, huanah kalin thei an zu lo bawk a. Pool-ah an cheng dun fo bawk. An tan hun chuan awmzia a nei lo emaw tih mai tur a ni. Ruatfela pawh in lamah a pa chu a farnu leh a nu te an awm bawk a tiin an inhnem ve deuh bawk a. Bakah vanneih asiamin a pa chu a rawn kâng chho ve bawk a ni. 

"I chhungte kha pangngai takin ka hmu ve chak" Arini chuan a ti a. 

"Kei pawn ka lo ngaihtuah mek a. Engtin nge niang aw.. Kan inah chhoin chaw kan han ei lawk dawn em ni ang? " tiin a rawn a. 

"I thu vek" a lo ti hnâp. Arini chala fawp zauhin, "Ka nu te ka lo be dawn nia. Chawhmeh kan lei haw ang a. E.. Behlawi rep kha bai leh ang che" a ti a. 

"Yesii… ka u" a lo ti a. An awm dun tawh chuan mi dang an awm lo anih phawt chuan insi lo leh in khawih neuh neuh loin an awm thei lo a ni ber mai. Mi dang erawh an vengthawng a, mi dang awm lai chuan fel takin an awm ve mai. 

Ruatfela nu te pawn an lo dawngsawng tha hle. Chawhmeh an lei haw nual a, an ri le lu mai. Arini chu Ruatfela bialnu a lo ni ta daih a, mak ti tho mah se, an haw hran lo. Mampuii phei chuan a zah ru hle zawk. Arini chu Ropuii nen an inkawm thei leh phian mai. An ţawng bawrh bawrh a, Ruatfela pawh a lawm hle. Zanriah ei khamah Pu Lawma chu Arini chuan a va hmu ve a. 

"I va hmel tha ve aw. Ka dam lai ngei hian innei thei ula ka va duh em" a lo ti tham chhal a. Arini a lawm hle. Pu Lawma chu a lainat takzet bawk. 

"Pu,.. Oh,.. Pa, lo dam vat rawh. Ka hmuh tum dan ai chein ka hmu hmel tha daih zawk che. " a ti ve siam siam a. Pu Lawma pawn Arini chu a vawikhat hmuhna mah nise, a ngaina nghal hle. 

Zan riah chu an in a chêp si a, tihmgaihna awm hek lo, an chhuk leh dawn a. An chhuah hmain Arini chuan Mampuii bulah, "Hei ka card ania, code chu 7389 a nia, mamawh in neiha i pa enkawlna tur emaw thawmhnaw awh zawng emaw i nei anih chuan i lo hmang dawn nia. I naute i nute pawh i lo leisak ve dawn nia. Resort-ah chuan ka hmang tangkai lo" a ti ta mai a. Mampuii a phawk kher mai. Pi Zuali chuan, "Awiii Arin, a ngai awkawng lo, kan mamawh tawk chu kan nei ve alawm.. Kan lawm lutuk.. a ngai lo reng reng" a lo ti chul a. 

"Ngai e. In tan bank dawr reng te a harsa alawm. Hei Ruatfela'n min rul leh mai dawn alawm" a lo ti mai si. Ruatfela chuan, "A ngai lo. Mampui, la suh.. Amak.. Arini chuh" a lo ti vat a

"Ka tan a tangkai lo, hman sen loh ka ac -ah a awm alawm. I nau te hian an hmang zo awkawng lo vang. Thil dangah inpuih dan ka hre ve si lo va. Kawl rih rawh se.. In lak loh chuan ka rilru a nuam lo ngwt ang" a ti ta tlat. 

Berhpuia a rawn tlan vut a, Arini chhoh en hâ pah chuan, "Au Arin, A û bulah Truck ka ngen nasa tawh lutuk, min lei duh lo va, min leisak rawh aw" a rawn ti ta mai. Mampuii a ka a hup vat, mahse, a sawi zo vek tawh. Arini chuan nui chungin, "A û chu a va sual ve. Kha.. Au Mampuii hnenah khan card ka dah a maw, Puipuia nen in duh duh in lo lei dawn nia.. A tha em? " a ti a. Berhpuia lah chuan, "Yesss… Au Arini a hmel tha ber" a ti chul a. Mampuii tan card chu lak loh theih pawh a ni tawh lo. Ruatfela erawh a lungawi vak lo hle. 

Tanhril an pan chhung zawng a tawng duh miah lo va, "I va thinrim awm" Arni chuan a ti a. Chu pawh a chhang chuang lo. 

"A mak, Ruatfellll" tiin a beng bulah a va au a. 

"Rinsang" a lo ti tuar. A hnung lam atang chuan a rawn kuah a, a kawngte chu zutin a kap te chu a rawn dap rak rak a. 

"Chimawm suh aw" a ti nghut. 

Nui heuh heuh chungin, "Ka hmangaihber te chhungkua ka pui ve thei hi ka va hlim tak. Mahse, mi mawl tak pakhat chuan ka hlimna min tawmpui ve duh lo" tih pah chuan Ruatfela nakah chuan a dèk ta a. Ani dèk a haw nasa si, an kawi ta zawk zawk mai. 

"Rini.. A tawk.. " a ti chul a. 

An tlan that hnuah, "Ka tan a tlawmthlak alawm. Mipa ka nia, ka rilru tur i hrethiam lo anih kha" tiin tha takin a hrilhfiah ta a. Arini pawh chuan awm a ti viau. 

"Mahse, ka pe tawh bawk sia, tikhan hmang phawt rawh se.. Ka hlim daih zawk" a ti hram. Ruatfela pawn Arini thiltih chu inhmuhsit vang ni loin induhsakna vang tih a hre tho va. Engmah a sawi zui ta bik lo. Mi hausa fanu ngaihzawn chu tiang thil kha a thleng fo ang. 

Kar hnih dawn an pahnih khawvela hlim taka an nuih dun hnuah Arini chuan, "Naktuk chu ka han haw ve tawh ang e. Tihtur ka nei a.. " tiin Ruatfela banbul chu a zut kual a. 

"Umm nia.. I nu te pawn an ngai tawh ang che. Mahse, ka ngai dawn che e" a lo ti a. 

"Aa.. Ka rawn kal leh fo dawn alawm.. " a lo ti thuai a. 

"Chupawhnise, ka sawi thiam lo, keimahah hian min mawlh tlattu a awm. Ka bula i awm reng chung pawn ka ngai ngawih ngawih che" a ti mawlh mawlh a. Arini chuan, "Ka van lawm.. Ka rawn kal leh vat ang" a ti a. 

"Ka thuchah che kha aw.. Hre reng ang che.,zu far khat pawh i in tawh tur a ni lo va, Zanah ka tel lo chuan i chhuak tawh hek lo vang" a ti leh salh a. 

"Yes boss, ka vawng reng ang" naupang tha tak angin a lo ti a. A haw tawh dawn vang nge chumi zan chuan an han infawp vel chu an insum zo dawn lo ta mai.. 

"kan hneh thei.. Umm.. Kan hneh ang" Ruatfela chuan a ti khur dat dat a. Amah zawk chu inla hrangin tui te a va in khawlh khawlh a. Arini chuan, "Natna tha lo ka vei i rin vang te hian min mutpui duh lo a ni lo maw? " a ti ta hlawl mai. Ruatfela'n a tui hmuam lai a phuh ţhawt. 

"Han sawi leh teh" a ti ram hmak. 

"A mak em alawm.. Ka virgin tawh lo tih i hre vek a.. " a lo ti chuai raih. 

Ruatfela chuan a rawn bawh rawk a, a thiam ang tawkin Arini chu a sawngbawl ve a. Arini lah lo insum thei bik hek suh. A tawp an thleng dun ta nge nge a. An zawh fel chuan, "Tikhan i ngaihdan kha i la ring em? " Ruatfela chuan a ti sup a. 

"Aih.. Mahse, ka ngaihdan kha a mak hran lo" a lo ti ve a. Ani ve reng, Ruatfela pawh chuan a ngaihtuah chian chuan Arini ngaihdan chu awm a tihpui ve deuh. A hmangaih vang a ni tih erawh a la hre tho ang. Chumi zan chuan inthlahlel takin tui takin an muhil ta a. 

Arini pawh an in lamah a chho ve ta chu a nia. Tihtur a nei si a. A pa nen erawh an inbe hleithei meuh lo. A roomah tawmin tu emaw a be deuh reng mai a. Ruatfela chiah biak a nei lo tlat mai. Tu tak ni ang maw.. 

Arini an ina a chhoh atanga ni 3-na Zirtawpni zingah chuan Zoram khawvelin thu thar duhawm lo tak an hre ta a ni. 

RINAWMA RUANG HMUH A NI! 

A thin hnunah chemte zum taka vih niin chemte pawh a la bur vû a, A hrawkah zai a ni bawk. Thisen nen inchiahpiah nuaiin Side drain-ah hmuh a ni. A hmutu hi truck driver a ni nghe nghe. Rinawma hi kar kalta khan a zin char char a, ni 2 kalta khan a lo haw ve chauh a niawm e. Tunah a ruang hmuh a ni leh ta si a. Tu in nge that ang? 

Ruatfela'n news a lo hriat ve chuan a mangang hle. Arini a call nghal a, a la thei miah lo. A khur dawt dawt thei mawle.. Police lamin an han endik a, a thattu niawma an rinhlelh zingah Arini a tel lo thei lo. Thil chu a thleng chho mawlh mawlh a ni ber. Pu Thanga lah che buai bawk, Arini an rawn hruai lai chuan Pi Mali a lo ţap zawih zawih mai. A chhan chu khami zan khan a fanu hi thi hnuangin a rawn haw tih a hmu tlat a ni. A fanu a chân leh ta. Ngawi rengin Arini chuan Police te chu a zui a. Dâwp vak pawh a ngai lo.. Rinawma chu ama thah ngei a nih thu a sawi nghal hmiah mai. A thah chhan chu eng dang a ni lo. PHUBA a ni tawp! 

Central jail-lamah court-in a chungthu an ngaihtuah hma chu an thawn thla ta a. Ruatfela pawn a va thlah hman lo. Awmhmunah a lo buai ve em em tawp. A nu te lamin chanchin an lo zawt ve sek bawk si. A â ruai a ni ber mai. Engtin nge he thil hi a tih theih? Rilru dam takin a awm tawh emaw a lo ti asin le.. A insum thei ngang lo. A inkhalh chho va, Arini te in lam a pan nghal. An lo awm nual a, zah pawh a dawn thei lo. Pu Thanga chu ţham thovin, "Nangmah vang a nih hi i hria em? Nang phiangsen hian ka hmangaih chu tualthat lo thei loin i siam a ni.. Hre tawh.. I fanu hi i la chhuak vat lo a nih chuan, eng nge ka tih ang ka hre lo.. " tiin aw khur dawt dawtin a vau ta hmiah mai. Pu Thanga chuan a chal a dawm a, a kun tlawk tlawk ringawt. 

"Ni e, ka hma ka sial luatah ka lo tisual a ni. Tunah chuan ka fapa leh ka fanu ka chân ta.. A va pawi tak em" a ti vawng vawng a. Ruatfela tan pawh han nawr leh vak ngaihna a awm tawh lo. Pu Thanga chu a inchhir tih a lang reng mai si. 

Arini chu Jail-ah hun a hmang chho a, Court lamin an rel thei lawk bawk si lo. Ukil thiam tak pawh ruai se, amah a inpuang vek tawh bawk si. A beidawnthlak takzet a ni. Ruatfela leh Nancy ten an zuk kan ni chuan an ţap lo chauh, A cherin a dawldang em em a, mi â ang maiin a lo awm. A balin a ţawp bawk si. Nancy chuan tha takin intifaia pangngai taka awm turin a fuih a. Chumi hnuah Ruatfela nrn chuan an inthutchilh ran a. 

"Ti lo mah la, i hlim tawk tawh asin mawle.. Mahse, ka hmangaih che a.. I lamah ka ţang tlat a nia aw" a ti a. Arini chuan, "Min theihnghilhna chance ka siamsak che a nih hi. Kei aia hmeichhe tha hi i phu a ni" a lo ti sak. 

"Chutiang ka ngaithla peih lo.. Ka lo nghak ang che.. Ka ta chauh i nih kha" A ti mawlh mawlh a. Arini mitmeng leh lan danah a rilru hriatthiam a harsa hle. 

Court lamin a chungthu an relsak ta a. A dinhmun leh a tawhsual tawh dan zawng zawngte ngaihtuahin, hremna nep thei ang ber chu Ukil lamin an phût a. Engpawhnise, eng vang pawh nise, tual a that miah si a. Nunna hi a hlu bawk si. Chuvang chuan, Arini chu, Kum 10 chhung tang tura relsak annih bakah Cheng nuai 4 chawi tura tih a ni ta a ni. Kum 10 chu hremna nep tak a ni zawk. Mahse, Ruatfela tan erawh a va rei duh dawn tehlul em.. 

Jail-a an chhuk pui leh dawn chuan, a kut chu a va vawnsak a. 

"Kum 10 chhung hian thil mak a thleng thei.. I dam reng a ngai aw. A chhan chu i lo chhuah veleh kan innei dawn si a" a ti sup a. Mittui kar atangin Arini'n a rawn melh a. 

"Min hmangaih tawh suh.. Kal rawh.. Kal mai rawh" a ti hlawp hlawp a. 

"Ni lo ve.. Vawi khat ka tisual tawh a. Ka tisual nawn tawh lo vang.. Ka hmangaih che" a ti thuk ruih a. Arini chuan khur dar dar chungin, "Ka thisen chhuah vanga i tawrh ve zel ka remti lo. Ka duhthlanna ti ka ni a. Chuvang chuan ka ngenna che hi min pawmsak rawh. Hmeichhe dang nei rawh"... A ti a. 

Kal a hun tawh si, an pawh then dawn chuan Ruatfela pawn a mittui a khap per ve sak mai. Mi rothap tak tak awmna hmuna Arini a han khawsa tur chu a ngaihtuah zawng pawn a hah hluah hluah… mittui tling pam chungin Arini te tlan liam lai chu a thlir zui vawng vawng a. 

Zanah in chung zawlah bawk chho lehin.. Arsi pe un chu a thlir leh a. "A ril a tam ang em? A muhil thei ang em" tiin a phun sep sep a.. A rilru tawt lutuk tihziaawm nan inbunruah a tum ta a.. 

A roomah chhukin a laptop chu a on a,. 

A TEL LOVIN.. tih thu hi hawrawppuia chhu lutin, Arini nena an thawnthu chu hmaih nei lova chhuikir lehin a ziak ţan ta a… 

(A tawp ta. 😍