A tel lovin.. 23

A TEL LOVIN… (Chapter- 23) 

(Adds kha aw.. Ka duatte u 😍

Ziaktu : Toni Râlte

"Sandra" a ti chuai raih a. 

Sandra chu a ngawi reng. Ruatfela chu harh chhuak zawkin, chabi a pe a, "Hun nuam tak in hmang dawn nia" tiin Johnson chu a nuih sak a. 

An kal liam hnu chuan ngawi rengin a melh ngai melhin a ding reng mai. Sandra hmel a hmuh khan a che buai deuh naa, thinrimna in a rawn khat leh ta zawk. Khati khawp khan a nun chawk buaiin Arini thlengin natna a thlensak phah a, tunah lem pasal hual neiin a fa hial a tihtlaksak thei a nia. Chuvang chuan a mamawh loh zat aia tamin a mamawh ta bik lo. Tunah chuan a nuna pawimawhte a chân chho ţan ta chu a nia. Mal takin hringnun a chhiar chho ve dawn ta. Mahse, beidawn a tum hauh lo va, a hneh ţèp tawh ang tiin a inhnem a ni. 

"Ù, khu pa Ruatfela i tih teivet khu ka thian a ni thin maw? " Arini chuan meng ling hlar chungin a ti a. 

"Ni thin e. Ti nge? " a lo ti vat. 

"Ka ngaina hrep lo ve" a ti chang fak a. A laizawnnu mize inthlak chho chuan a ngaih a titha lo hle. A sulhnu a hre chhuak ţan tihna em ni zawk le. A fiah nan Arini thian hlui Johny chu a bia a, an ina lo kala Arini rawn hmu turin a ngen ta a. Johny pawh chuan puih inhuam takin a lo pawmsak a. A rawn kal ta nghal. Arini erawh a u te in atangin a chhuak tawh a. Nancy a va hmuh chuan, "E ka rin aiin i lo thleng hma.. Hawh le ka nau chu va hmu lawk ang" tiin Arini te in lamah a hruai phei ta a. Arini chuan chaw ei dawhkanah apple a lo vel mek a, a u leh mipa pakhat lo lut chu makti deuh takin a lo melh a. 

"Mate, hei i thianpa ka rawn hruai a" tiin Johny chu a melh a. 

Johny melh vang vang chung chuan, "U, min tihzah i tum em ni? Ka hriatna ka hloh tih i hre ve reng si a. Thianpa, pawi ka ti lutuk ka hrechhuak thei rih lo che" dam thlap hian a ti ta a. Nancy a thaw huai mai. Johny pawh chuan, "A ho lutuk, zawi zawiin min la hre chhuak mai ang. Ka tan chuan thian tha tak i la ni reng ania aw" tiin a nuih a. 

"Kawm i nuam ngawt ang. Ni e, ka la hrechhuak vek ngei ngei ang" tumruh zetin Arini chuan a ti sap a. Johny leh Nancy chu an inzui chhuak leh nghal. 

Zodinga nen an inbe zeuh zeuh a, Kolasib an thleng tawh a. A chauh deuh vangin a muhil rih dawn niin a sawi. A lo ring ve mai. A rilru leh thinlung zawng zawngin Zodinga chu a ngaina a, a duh hliah hliah a ni. Sex hial a hmanpui kha a nia. Inchhirna a nei miah lo bawk. "Ka hun hmasaah ka virgin tawh lo a niang" a ti rilru rêng a. Fiahna erawh a hmu thei mai lo. 

Rinawma case pawh a ukil ten thiam takin an han sawipui sateh a. A victim ber Arini hriatna hloh thu erawh an sawi lo. Sawrkar ukil lamin hearing neih that leh nise tih an dil bawk a. Chutah chuan Arini pawh a inlan a ngai dawn a ni. Chu tak chuan Pu Thanga rilru a tibuai ru takzet a, a fanu chu a vawi hnih nana hloh leh a duh loh ang bawkin a fapa pawh jail-a a hun tam zawk hmang turin a phal bawk si lo. Arini a rawn inlan chuan a nunhlui chhe tak te kha hre chhuak tura nawr luih a ni ang a, a chet buai dawn bakah hre chhuak ta tak tak se, an chhungkaw mualphona bakah Arini chuan a kawng ngai kha zawh leh ta se…, a ngaihtuah ngam lo. Tichuan, intipachang takin Magistrate chu biak a tum ta tawp mai a ni. 

A fanu chetsual dan leh hriatna hloh thu te, an ni chuan khang a hriatna te kha nei let tawh lo se an duh thu te thlengin a hrilh fai ta leng a. Magistrate pawh a rilru a buai hmel khawp mai. Mahse, amah maia thutlukna siam thei a nih bik loh vangin ngaihtuah that atan tiin an inkaltir thei ta hram a. 

Pu Lawma pawh ziaawm lam aiin tlakhniam lam a pan zel mai. Pi Zuali ten theihtawp chhuahin enkawl mah se; a nghawnga bâwk chuan a ţai darh nasa tawh lutuk a, a thawk te thlengin a khawih buai tawh bakah thil sakhat a ei thei tawh lo. A cherin a dawldang em em a, hmana Pu Lawma sa tha leh fit tak kha chu hmuh tur a awm meuh tawh lo. Amah pawhin a dinhmun a hai bik lo va, A thlarau nun la inpeih lohzia hriain Pastor a kohtir ta tawp a! Pastor nen chuan ni khatah darkar chanve tal an inkawm ta thin a. A taksa chuan rawih lam pan mah se; a rilru lam erawh a kâng hret hret thung. Ruatfela te nufa za pawn, "A thlarau nun chhanhima a awm dawn chuan na tawrh renh ai chuan kal tawh mai rawh se" tiin rilru an siam chho ţan ta a. Thihna hi zawng a tawp chiang lulai em a, thi tura an han dah tak tak erawh chuan na erawh an ti tho mai. 

"Feelings i la nei em? " Johnson chuan a ti sur sur a. He mihring hi a sual ve hrim hrim. Resort leh cottage tam tak a awm laia Ruatfela thawhna hmun kher khera Sandra a hruai hi eng rilru tak pu ang maw. 

Sandr chuan kimki zet hian, "Nei lo" a ti hul hak a. Mahse, a mitmenga tawrhna erawh hai der chi rual a ni lo thung. 

"I la pal lui mai ang. Chuvang ania hetah ka hruai che" a lo ti leh hmiah. Sandra chuan a chhang tawh lo. A mitthlaah erawh Ruatfela hrilhhai hmel kha a lang tluk tluk mai. A khawngaih a, a khawngaih ngam si lo. 

"Hello, i va la har ve" Arini chuan a ti lâng lâng a. 

"Tu nge aw.. " hmeichhe aw hian a rawn ti puam ţâlh a. 

Arini lungphu a rang ngei mai. 

"Zodinga phone a ni lo mi? Ka be duh a" a ti a. 

"Ni e, hei a chhuak lawk a. A bialnu ka nia" a rawn ti ta mai le.. 

"Eng a?! I va mawl ve.. Ka uang lo a nia. Phone kha pe mai mai teh" a inrin hmain a ti nghek a. 

"Ka uang lo. Tu nge i nih? A bialnu ka nih hi. Ka bialpa hi hmeichhe nazawng biak ka phal hleinem" thutak zetin a rawn ti ve leh a. Arini chu a thinrim tawh takzet, "A bialnu ka nih hi.. Kei lo bialnu a nei lo. Phone chu pe rawh" a ti leh ţhawt. 

"Zodinga hi a lerh ve a maw? A zinnaah hian a kawp lawr ve thin a, chung zing ami chu i lo ni ve anih chu. Mhse, kei chauh hi a bialnu nghet ka ni. A tawpa a tlukluhna chu keimah zel" a rawn ti ta sak sak a. 

Arini chuan phone chu chhuatah a paih darh chuai a. Khumah a bawk nghal thlawp. Lukham chu a sawk tâwn tâwn a. 

"Dawt a ni. Dawt vek. Zodinga'n min bum lo vang. Kha nu khan a ngaizawng zawk aniang" tiin a phun mawlh mawlh a. Mahse, a inhnemna mai mai tih erawh a hre ve kar. A rilru a mang zo va, eng nge a tih ang tih pawh a ngaihtuah thiam lo. 

"Mate, Sir Sapa a lo kal" A nu chuan a kawngka kik pah chuan a rawn ti a. Sir Sapliana chu a tuitor a ni a, pathlawi nelawm leh zaidam zet, mi thiam tak a ni. 

Phur lo zetin a tho va, a chawlh rei deuh tawh vangin tuition chu a kal lo ngam lo. Study room lamah chuan a chhuk thla hnak hnak a. A ke te chu a rit lûkin a hria. A tarmit phen atanga lo en rengtu chuan nuih sâng pahin, "Eheu! Kan sava naute chuan eng emaw a tawng a ni maw? " nelawm zet hian a lo ti var a. 

"Ka sawi peih lo" a ti hmuk. Dawhkan kil chuan an thu dun nghal a. An thil zir chu chhetemahin a rilruah a lut lo. Milim ang maiin a thu tawp mai a ni. 

"A sâwt lo tlat. Vawijn chu rilru dang kan pu tlat a. Awmzia a awm lo. Eng nge puih theihna che ka nei em? " Sir Sapa chuan a ti ta thlawt a. 

"Ka hre lo. Bum ka ni a" a lo ti ringawt. 

"I sawi duh chuan ka ngaithla thei ania" inhawng takin a lo ti nghal. Arini pawh inbunruahna tur dang nei hek lo le.. A ippik bawk si nen, a thil tawn chu a sawi ta mial mial a. 

"A pawi hle mai. Zodinga chu i hmangaih em ni? " a lo ti khauh. 

"Hmangaih lo ila ka mutpui dawn em ni? " a lo ti hlak. A inzep buai peih lo. 

"Sex hi hmangaihna a ni hleinem. A tana i inpumpekna kha i hmangaih vang chu a ni maithei, mahse, ani tan erawh game a ni thei. Sex hi mipa tan game, hmeichhe tan tlakna a ni ve fo asin.. " Sir Sapa chuan a lo ti a. 

"Amah ang hi ka la tawng lo. Amah anga duh hi.. Mahse… " tiin a ngawi dat a. Eng emaw ngaihtuah hmel a pu. 

Sir Sapa chuan, "I hun hmasaah i cheng em ni? " a lo ti leh khauh a. 

A heh liak zauh pahin, "Ih maw.. Ka hre thiam lo. Ka ngaihtuah hian tu emaw hi ka nunah hian a bet reng niin ka hria. Tu nge anih ka hre si lo. Ka mumang lamah te hian fiah lo ruai hian ani nen chuan kan lo awm dun thin. Ka lung a leng veng veng zel" a ti ta mawlh mawlh a. A thawl huai mai. 

Fing zeta rawn melh chungin, "Ka hrethiam e. I hun hmasa lamah tu emaw chu tihtakzetin i lo hmangaih tawh anih kha. Tunah Zodinga a lo lang a, kha i duh em em i hriatchhuah theih si loh angah khan chanin amahah i lunglenna leh khawharna te chu hrikthlak i tum a.. A dik em? " a ti ta kalh kalh a. Arini chu a mur sung sung mai. 

"Ka.. Ih, ka hre lo. A dik ang. Tu emaw hi chu a awm " a ti ringawg a. Sir, Sapliana chuan hrethiam fe hian a lo nuih a, "Tun atan chuan duhtawk ang. Ngaihtuah ngut ngut suh. I hriatna te kha kai tho turin pressure inpe suh. I nat phah ang. A tha em? Tunah chuan khawiah emaw zalen deuha i hawi khawthawn theihna hmun pan rawh" a ti dam thluam a. 

An Sir chhuah hnu chuan ngawi rengin a thu reng a. Zodinga vanga a natna chuan a tur et et bawk a, lehlamah lah tu emaw chu hriat chhuah chaknain a khat bawk. Ti nge maw hetia a hriatna a hloh kher le.. 

A nu bulah, "Nu, Resort-ah ka chhuk leh dawn. Heta ka awm chuan ka buai tlat" a ti a. A nu chuan a fanu melh vang vang chung chuan, "A tha alawm.. Mahse, fimkhur la" a ti hap a. Fimkhur a ngaihna chhan a hrethiam lo. A pa a rawn haw ve chiah a. 

"Thla thar ni 4-ah court-ah i inlan a ngai dawn a" a ti nghal tâwng a. 

"Engvang chuan? " a lo ti hû. 

Harsa ti zetin, "Thil hriat sual palh vangin nangmah vangin tu emaw chuan hremna a tuar mek a. Chu pa chu i chhan chhuah a ngai a ni" a ti ta a. Pi Mali erawh a lo ngawi reng. 

"Ka va hrethiam lo" a lo ti leh a. 

"Nakinah ka la hrilhfiah ang che. Tunah chuan i rilru kha hahdamtir phawt rawh" a lo ti a. 

A mah vangin tu emawin a tuar mek a maw?! Hriatna a hloh tih inhre tho mah se; a hun hmasa lamah engtin chiah nge maw a lo awm thin ang le? Chumi hriat chakna chuan a khat a ni ber. A roomah lutin a thawmhnaw thenkhat a khung khawm a, a phone kha a vawm darh vek sia, hman tlak a ni tawh lo. Engtin nge a nute a hrilhfiah ang tih a ngaihtuah laiin a nu a rawn lut hlauh a, "Nu, ih ka phone a chhia a" a ti sap a. 

"Awhaw.. A va zia lo ve. Ngawi rawh.. Kan thenawm nu sawn phone a chahsak thin a, stock a la neih ka ring. Kan nula ka va zawhtir ange" tih leh kal a rual nghal. An tan thil hi chu a awlsam tehzawng a ni e. A hmaa a phone ang chiah kha a lo la kawl hlauh a, an lei leh nghal chu a nia. Mi thenkhatin kum 3 dawn phone ngai char char kan hman laiin mi te hi chuan an thei mawle.. 

Zodinga chu biak a tum hranpa tawh lo. Mahse, fiahan erawh hmuh tho a la tum. Resort thlen thlak phawta ngaibtuah that turin a ti a. A u te driver Pu Thana'n a thlah thei dawn bawk. He pa pui hi patling tak a ni tawh nain a ngaina riau a, a titi suam suam zel te chu ngaihthlak nuam a ti phian zel. Chawhnu dar 4 velah Tanhril lam pan chuan an chhuak ta a. Chawhmeh an phur nual bawk. 

"Ruatfela khu chu a fel ve ngawt mai. A hna hi a tlin si" Pu Thana chuan a ti leh suam suam a. Kuhva a thial leh tawh bawk. 

"Nia" a ti ringawt. Tun dinhmunah chuan Ruatfela chu a haw rih. Hman zana ngampa taka khatia a rawn ti vel kha a ngai thei hlawl lo. Hmuhsit rukna riau a nei bawk. 

"Tikhuan a chhungkua a chawm ve a nia, amah ang hi amah ang rualah chuan an tam lo khawp asin. Ruihhloah lah a fihlim si" a ti leh a. 

"Mahse, a fing vak loin ka hria " a lo ti ve hmiah. 

"Fin leh fin loh chu ka hre lo. Mahse, I U pawh hian a fak hle asin. A sum manage danah pawh sawiselna tur vang khawpin a hria" a lo ti ve leh mai bawk a. 

"A ho em mai… ti daih ila, Pa Than, hman velah khan ka sawi awmzia chu ka hriatna ka hloh hma khan ka sual thin em? " a ti ta tawp a. Pu Thana a inngaihtuah rauh rauh mai. Dawt sawi hreh zet a ni bawk si. 

"Zep loh chuan aw i sual ve thin" a ti ta hmiah mai. 

"Engti zawngin nge ka sual? Zu te ka in thin em? Bialpa te ka nei nasa em? " hriat chak zet hian a ti leh a. 

"Chutiang lam chu ka hre ve lo. I sual ka tih awmzia chu duat sual i nia, i pangchang a, in chhungah i tawrhhlelhawm thin" a lo ti vat a. 

"A va ho leh si" a ti ringawt. Tuman a hriat duh ho hi an hrilh duh lo anih hi. Hre chhuak lo se an duh tih hi a hmuthiam tawh a, chutak chu hriat chhuah a chakna chhan pawh a ni. Engtiang chiahin nge a hun hmasaah chuan a lo tal thin tih a hre chak et et reng mai. 

Resort an thleng a, hnathawk ho ten chawhmeh chu an hlang thla a. Chutih lai tak chuan Ruatfela a rawn chhuak a, Pu Thana a hmuh rual chuan, "Ekhai! I lo kal ka ring lo va, Vala zawk a lo kal dawn maw ka tia. Chaw ei ve rawh aw" a rawn ti sawk sawk a. 

"Chutia pu berin ei rawh i tih te chuan hnar phal chi nang" a lo ti fiamthu hlut a. An bula ding ve reng Arini chu hre awm pawhin an lang lo. Ruatfela phei chuan melh pawh a melh eih lo. Chutak chuan Arini thin a tiur leh ta tlat! Resort neitu nau a ni a, ngaihpawimawh leh ngaihsak a ni tur a ni. 

"Hey" a ti fiak thak a. Ruatfela te chuan an melh rual ţhâwih, "Min va ngaihsak lo ve. Ka roomah hei hi han dah rawh" tiin a bag chu a kawk a. 

"Aw le" tiin bag chu a khai a, Pu Thana nen chuan Building chhungah chuan an inzui lut ta nghal a. Arini a ter at at mai. Han tih leh vak dan a hre si lo. 

"Khanglang che chuan, tu nge ka nih i la hria ang" a ti tân tân a. Ruatfela a haw thar ta em em chu amah pawn a ngaihtuah chian chuan mak a ti ve tho. Tin, a ze danglam thut thut te, a thinchhia leh a tawngkam na tak thin te chu amah atanga chhuak ni lo mai hian a hre thin. 

A room-a a lut tur leh Ruatfela rawn chhuak tur chiah chu an intauh thuak a. 

"Tihpalh" Ruatfela chuan a ti vat. 

"Fimkhur ta che. I bang mai tur asin" a lo ti tuar. Ngawi rengin Ruatfela chu a kal daih. Chungte chu a haw telh telh mai. Khumah chuan thuin chhuat lam a melh run a, "Ti nge hetia ka awm le.. Zodinga vang mawni le.. " a ti chhuak hlawl. 

Ruatfela chuan Nancy callin, "I nau hian a hriatna a hmu let leh tawh em ni? " a ti ta tawp. Arini awmdan leh nih dan chu enliam harsa a ti tawh a ni mahna. 

"Kei pawn emaw ka ti a, tukinah a thianpa ka ko va, mahse, Johny takngial pawh a hre chuang lo. Kei pawn a awmdan kha mak ka ti alawm" a lo ti ve hlut a. 

"A awmdan hi sawiin Doctor rawn teh. Ka ngaih a tha tlat lo" Ruatfela chuan a ti ta a. Nancy pawn a lo pawm. 

Zanriah atan Dil Sangha an fry a, bai leh eng emaw neuh neuh a awm bawk. Sandra te pawh chuan ngawi rengin an rawn kil ve a. Ruatfela erawh mikhual ho ei zawhah Pu Thana nen an ei ve ang chu. Sandra te pahnih chaw kilna ep chiaha Arini pawh chuan a ei ve mek a. A hawi chhuak lem lo. Sandra chuan a va melh zauh zauh a, Arini chu a danglam riau hian a hria. Rawn hmu ve ta se a chungah a la thinrim reng ang em tih te a ngaihtuah a. Chutia a ngaihtuah lai tak chuan Arini hawi chhuak chuan a rawn melh ve chiah, a mit a la sawn vat a. Mahse, Arini chaw ei leh mial mial a hmuh vang chuan a thaw huai mai. 

"Naktukah hawn ka duh" Johnson bulah chuan a ti sap a. 

"Hna a laklawh alawm. Hmanhmawh suh. Kan haw em em ang. Ruatfela hmuh reng chu a hrehawm hle tawh em ni! " a lo ti chat a. 

"Aw a na tuar hmel hmuh fo ka duh lo" a lo ti ve ngat. 

Johnson chuan nui hukin, "Ka ngaihdanah chuan ani aiin nang hian na tuar hmel i pu reng zawkin ka hria. Ani saw chuan a kalpah mai mai zawk tawh che a ang" a lo ti a. Sandra thinlung chu a na zawk. 

Ni e, Chhunah pawh Ruatfela nen loh theih loha an inhmuh leh hmachhawn thut chang a awm a. Engmah a hmelah hmuh tur a awm tawh lo. A hmelhriat satliah ang baka ngaihna a hmu tawh lo, chu tak chuan a tina ngawih ngawih a. He lai hmun hi chhuahsan vat a duh ta reng a ni. Ruatfela chu a tan beisei chi a ni tawh lo tih a pawm a ngai bawk. 

Corridor an zawh dun lai chuan Arini a rawn kal ve a, a rawn lehpelh dawn lai tak chuan, "Arin" a lo ti sap a.. 

"Eih, min hria law" a rawn ti hâw. 

"Hria e. I dam maw? " Sandra chuan a ti a. Arini awmdan chu mak a ti deuh. 

"Aw dam e, ka hre ve chiah lo che a" inthlahrun hmel deuh hian a ti a. 

"Min theihnghilh tawh pawh a ni maithei. Hei hi ka pasal hual Johnson a nia., kei hi Sandra ka ni" a ti a. A nui sâng bawk. A ngaihdan chuan Arini chuan a la haw reng a, chuvanga hre lo der a ni tiin. Chuvang ania pasal hual a nei tih a sawi tel kher. 

"A va lawmawm ve in inhmeh hle mai" a lo ti a. A nui ve sâng bawk. Anmahni tawk zawngin Ruatfela leh Pu Thana an rawn phei mek, Arini leh Sandra inbe lai chu hlauthawng zetin a lo thlir reng tawh a. 

"In ei tui maw? " boruak tihzangkhai tum takin an bul a thlen chuan a ti a. 

Johnson chuan, "Tui khawp mai. Chawhmeh siam in thiam hle a ni" a lo ti vat. 

"A lawmawm anih chu" tiin an kalpel a. 

Arini'n, "He pa ve ziah lah hi a" a tih zui hlak chu a hre hman. A hmu mawh takzet tih a hre mai. A pawi lo ve, a hlimna a nih dawn chu a tha vek e.. Tiin a inhnem a. 

Nancy chuan Doctor Zoliana chu a be mek a, "A awmdan a danglam hret hret a, a hmaa a zia thenkhat kha a rawn lang tan a ni" tiin a awmdan mak deuh deuhte chu a sawi zung zung a. 

Dr. Zoa chuan, "Ka rindan vel a ni. A hriatna thazâm an inzar pharh leh ţan leh anih chu. A risk a sang ka tih rêng kha.. Tunah tak khan a tun hma nun hre chhuak turin a hriatna thazam leh thluak te an inbung mek a, an inpeih fel ţêp in ka ring. Tin, amah lamah a rilru a insual buai nasa a, a tun hma nun hriatchhuah chakin a hun a hmang mek a ni. Thil eng emaw a hun hmasa lama amah ţhawng dawt thei thil ang chiah kha a hmachhawn leh anih chuan, dan rual lohin a hrechhuak vek ang. Chuvang chuan enkawlna a mamawh, a taksain a zo lo maithei" a rawn ti ta dap dap a. Nancy a hmanhmawh kher mai. 

Ruatfela call nghalin, "Khata a awm kha a remchang lo, Pu Thana khan rawn hruai let leh rawh se" a zuk ti a. 

"Keiman ka tih chuan min hnial leh dawn chiang, nangmah khan be zawk teh" Ruatfela chuan a ti ta tawp. An boruak a hre chhuak ang tih erawh a hlau. 

"Aw le, ka'n bia ange" a ti a. 

A nau chu a call ta nghal. 

"Naute, thil pawimawh lutuk a awm a. Pu Thana rual khan lo chho leh mai ta che. " nem takin a ti a. 

"Ka thleng ve chiah a, ka peih lo. Hetah hian ka hlim alawm" a lo ti tlat! Tlang rawnga hrilh kha remin a hre si lo, a mangang hle. 

"I tana tha tur alawm" a'n ti ngawt a. 

"U, ka tha alawm. Naktukah ka lo haw dawn nia. " a rawn ti fiah kâk a. A nau nawr luih sawt lohzia a hria, zaninah chuan eng em em a thleng bik nang tiin, "Aw le.. Lo chho ngei ngei rawh aw" a ti a. phone a dah ta nghal a. 

A chhungten an ngaihtuah tih a hai lo. An ngaihtuah mah mah chu nin chang a nei thin. 

Zodinga'n a lo call. Inngaihtuah buai miah lovin a la nghal a. 

"Arin" a rawn ti thum chhak a. 

"Tu hmeichhia nge a.. Chhun ami kha" a ti bul hmuk. 

"Ka nau anih kha, a uang peih lutuk a, mawl lutuk, ka hauh hrep kha.. Eng nge i an? " a rawn ti zawt zawt a

"Ka tha, Resort-ah ka awm a. I nau chu a mawl hle mai. Amah vangin ka na asin" pangchang lek lek hian a ti a. 

"Nia, ngaidam hram hram.. I fel kha. Chuan maw, kan puin kar lehah Aizawlah ama mimal hna thawk turin min rawn tir dawn a. Kan inhmu leh ţèp" a rawn ti phur sarh a. 

Arini a hlim kher mai. "Tak tak maw.. Resort-ah i thleng leh ang em" a ti vat a. 

"Ka pu te inah ka thlen hmel, an hna thawh a ngai sia, mahse, zan lamah ka hman ang" a rawn ti a. 

"A tha tho alawm. Kan inhmu thei tho vang" a ti a. 

"Hei zanin chu kan meeting dawn a. Kan tlai maithei, i duh leh i lo mu dawn nia" a rawn ti leh a. 

"Aw le.. " lungawi vak lo hian a ti a. Mahse, a thinrim tak tak hran lo. 

An inbiak zawh chuan tihtur vang a ti si. Room atang chuan a chhuak a, Zodinga nen an sulhnute chu a fang leh mai mai. A lung a leng leh veng veng mai. Zodinga vang em ema lungleng niin a inhre hauh lo. Tu emaw vang kha ni zawk mahin a hria. Thla chu a eng viau mai. Arsi pawh a pe un mai. Khua a thiang bawk a. 

Ruatfela a lo haw tawh tingtang bawk sia, han intihhlim dan tur a vân hle. Phone khawih ngawt ngawt lah a ning si. Ruatfela'n laptop a kawl tak ang movie ka'n en teh ang tiin a room lam a pan a. A lo inkalh thap. Tun ang hunah khawiah nge maw a kal ang le.. Tia a hawi kual lai chuan, Peka a lo kal a, "Khaw nge Ruatfela hi" a ti a. 

"In chung zawlah a chhoin ka hria" a lo ti ve mai a. Room pakhatah a thil lei te nen chuan a lut zui nghal. Mut nan a la hma si, Zodinga biak theih bawk si loh tia ngaihtuahin Ruatfela hmu tur chuan in chung lam chu a pan a. A room kal pelh chiah kawngka chu a inhawng huai a, tum em em pawh ni loin a va thlek zuai. Johnson kha tui zetin a lo muhil bawrh bawrh a, an room ani maw tiin a ngaihtuah a. In chung lam chu a pan leh nghal a. 

Solar plate an dah nual a, tuizem pathum lai a awm bawk. Mahse, a building a lian hrim a, a chung zawl pawh a awl lai chu a la zau viau tho mai. Thil a rawn thaw nghal vûk a, a vawt lek lek. A hawi nghal ruai a. Thlang lam a va hawi chuan, Mi pahnih amah hnungchhawn zawnga ding a va hmu ta a. Auh mai a tum naa amah a lo nih loh palh takin tiin a va pan ta chhet chhet a. 

"Sandra, hetia inhmuh hi a dik lo. Johnsonan hria se engtin nge a ngaih ang. I hriat tura ka duh chuan, i laka ka rilru zawng zawngte kha an bo zo tawh. Ka tan chuan hmelhriat satliah chauh i ni tawh a ni. Khawngahin chhuk rawh" Ruatfela chuan a ti sup sup a. 

"Naute kha ka duh vanga titla ka ni lo asin. Ka dinhmun kha a khirh em a ni" Sandra chuan a ti dat. 

"Khatiang lam engmah sawi a ngai tawh lo. Hlim takin awm la, rilru dam takin pasal nei rawh. Chu chu ka duh ber" Ruatfela chuan a ti leh a. 

An hnung lama aw thian kharh avang chuan phawk zetin an hawi let vat a. Arini chu light chuan chiang takin a chhun, a ding ngil at a. Thlifim chuan a sam chu a chhem leng her her bawk. 

Ruatfela te pahnih makti zeta an rawn hawi let rual chuan a nghing dawt mai! A hriatthiam dan chuan a taksa chhungah chuan taksa dang an rawn lut ni maiin a hria. Chutah an pahnih hmel entawn sek chung chuan mangang takin a tawlh hnung a, he hun hi a tawng tawh. Engtikah emaw khan.. A lu a hai muai muai a, a luak te a chhuak ut ut.. A kun deuh a, chutah a mah uap rengtu, chhuah chaka za et et reng, a hriatna hloh tawhte chu fiah takin an rawn inlar ta zut zut mai. Leiah chuan a thingthi hnawk a, hriat theih si loh hian a phun mawlh mawlh. Ruatfela ngaihtha lo lutuk chu a va tlan phei a, "I tha em? " tiin a zuk kuah a. 

A mita mittui tling khat vek chung hian a rawn melh a, "Sir" a ti sap. A mittui chu a tla ta a. Ruatfela chuan engkim a hre chhuak tih a hre nghal. Pawiti zetin a awmah a pawm bet a, amah pawn insum harsa ti zetin a heh a pet fan fan ringawt. 

"Arin, engkim a tha.. Keimah ka ni.. A tha vek aw" tiin a lu chu a chulsak a. Sandra erawh angaihna hre lo zetin a ding ngil ut ringawt. Arini chungchang engmah a hre ve si lo va. 

"Eng.. Engkim ka hria.. Ka hre vek" Arini chuan a ti chuai raih a. A luhai muai muai vang leh a chauh lutuk vang chuan a chhing ta diar diar a. Ruatfela chuan hmanhmawh zetin a pawm a, in hnuai lamah a chhuk thlakpui ta a. A roomah luhpuiin, hnathawk zinga a rin ber Hruaia a ko nghal. Arini chu tui vawta depin, a thawmhnaw te chu an phelh thawlsak a. A lungphut dan a pangngai lo tih an hriat chuan hmanhmawh takin Damdawiin lam an panpui ta a. Kal kawngah Ruatfela chuan Nancy a be nghal a, Nancy chuan a nu te a be ve nghal bawk. An hlauhthawn anga thil thleng chuan a nghawng lutuk a, chet dan tur pawh an hrethiam lo. 

Doctor ten an lo enfel nghal vat vat a, Ward-ah an nawr lut nghal. Damdawiin chu damdawiin nge nge a lo ni. Jection leh dam dawi eng emaw neuh neuh te avangin a thaw pawh a pangngai tan a. Nancy te pawh rin aia hmain an lo thleng. Hlauthawng takin Arini mu bal chu an thlir thap mai. 

"A rilru ţhawng dawttu thil a tawn vangin a taksa sawn a zo lo va, a chauhpui rih a nih saw.. Kan han enkawl ang a, a zia vat mai ang" Doctorin a tih chuan an thaw huai a. 

Pu Thanga chuan Ruatfela chu kai hrangin, "Engkim a hre vek tawh maw? " a ti a. A aw chu a khawngaihthlak takzet. 

"Ka hre lo. Mahse, amah chuan engkim ka hria a tia" a lo ti a. 

"A va pawi tak em.. Ka fanu ka hloh leh dawn ta a nih hi" tiin a chal a dawm vung vung a. 

Ruatfela chuan intipachang takin, "Ka pu, intipachang rawh. A hriatna nei let leh mah se, a hma ang khan a tal duh kher tawh lo maithei.. Ka beisei a ni" a ti a. 

"Engtin? Engvangin? " a lo ti thawt thawt. 

"Bialpa duh em em a nei a. Ani khan a nun a khalh ngilsak thei maithei asin" harsa ti zetin a lo ti a. A khur der der mai. 

"Tu nge chu pa chu.. Aizawlah a awm em? " a lo ti leh nghal. 

"Aih, Kolasib khua a nia. Mi tha tak niin ka hria. Keiman chanchin ka lo hrilh ang a, Arini nun hi chhanchhuah theih a la ni ang" a lo ti nghet charh a. Chumi thu sawi tura a inhumruh nasatzia Pu Thanga'n a hre lo. 

Chumi zan chuan an tlaivar ta ringawt a. Dinhmun hlauhawm takah chuan ding lo mah se, han hawnsan ngawt kha dikin a hre chiah lo a ni. A tukah Tanhril an panna kawngah Zodinga chu a call ta a. 

Phak chuap hian a rawn chhang a, "Ruatfela, Resort enkawltu kha ka nia. Tunah hian Arini dinhmun a tha vak lo va, Aizawla i lo chhoh theih chuan a lawmawm ngawt ang" a dam thei ang berin a ti a. 

Hruaia'n a lo melh zuk zuk. 

"Ee.. A ni maw? A va zia lo ve. Chuan, Arini vengtu i la ni zel a ni maw? I ngaihtuah danah kei meuh te min lo biak phah a" ngeiawm lek lek hian a rawn ti a. 

"Aw.. A hlimna tur atan chuan engpawh ka ti ang. Lo chho hram la, amah i tlawh hmain thil pawimawh tak sawipui che ka duh a. Resort-ah i lo tlang thei ang tiraw? " inngaitlawm takin a ti leh a. 

Zodinga pawh chuan, "Ka chhungte ka lo rawn ve ang e. Ka lo hrilh leh dawn che nia" a rawn ti ve a. An inbiakna an titawp ta. 

Hruaia chuan, "Ti nge Arini hi i ngaihtuah em em le? I chunga a sual tehlul nen" a lo ti a. 

"A sual hleinem. A fel lutuk thin a, keiman ka tikhaw lo vek zawk alawm" a lo ti mai a. Hruaia chuan a hriatthiam vak hmel loh kher mai. 

Mampuii leh Zaui te pawn an doctor thurawn anga awma pangngai taka nun hman an tum chho mek a, thian dun inhmangaih tak an nih vang erawh chuan a harsa fo. Mi dang hriat an hlau ve bawk si. Mahse, "Hmeichhe dik tak kan ni a. Mipa kan ngaizawng tur a ni" tih chu an infuihna a ni a. Mampuii chu Rindika khan a lo star ve bawk nen, mahni infiah nan hrim hrim pawh ngaihzawn mai pawi a ti ta lo va, Zaui nen an sawi dun hnuin Rindika sawmna chu a pawmsak ta a ni. Tunah chuan bialpa a nei ve ta. Eng tak ang ang maw.. 

Zodinga chu Arini chhungte lamin a petrol man bakah a ei leh in man zawng zawngte an tumsak vek dawn bawk a. Chuti khawpa mamawhtu na nâ na chu tiin hnial a hreh ve si. A bialnu bulah erawh, "Ka thianpa ngawih ngawih tunah hian thichhawngin a let reng a, a dam lai hmel tal hmu turin min rawn ko a ni" a ti ve zân. A bialnu pawh hi a mawl nge a mawl der, a lo awihsak ve leh thliam a. Hmannia lo betu avang khan an inhau hrep a, Zodinga'n, "Amah khan min atchilh thawthang a, engtinmah ka ti lo. Nau angin ka en" tia a insawifiahna chu hmin lo chungin a awihsak leh mai. Chân a hlauh luatah a bialpa hi a chân hlen zawk maithei a ni. Mahni tawkah induhtawkna leh inrintawkna tlem tal chu neih ve tur hi a ni ngai a, Hmangaihna vang pawh nise, hmeichhe chak tak zawng a ni lo tih a chiang viau mai. 

Ruatfela chah ang khan amah Ruatfela nen chuan an inhmu hmasa ta phawt a. A chin chhuakin engkim a lo hrilh ta vek a. A ţhawng ve hle. Arini mizia kha mak a ti reng a. Pawisawi lo niawm taka lang si, a rothap ru leh viau te, virgin anga a ngaih sex an han hmana a zei lutuk lrh a lo thianghlim tawh si lo te kha. Engkim chu a ngaihbel thiam ve ta zung zung mai. 

"Khawngaihin theihtawp chhuah hram ang che. A duh chein a vei em em che a, nang chuan a tha lam kawngah i khalh thei em em ang. " tiin a chah mawlh mawlh a. A hma lawka insual hrep tawh an ang lo ngei mai. Arini vang chauhin tha takin an inbe mek chu a ni si a. Zodinga pawn theihtawp a chhuah tur thu sawiin a insiam a, Damdawiin lamah Arini hmu tur chuan a kal ta a. 

Amahin in chung zawlah chuan a tei rak rak a, Sandra te kha an haw ta thut bawk si. Johnson khan an inhmuh kha a hria ang a, an chhuak thut a nih a ring. Khami zan khan Sandra in a rawn bia a, "A pawimawh tawpkhawk" a tih miau vangin a han hmu lo thei ta lo va. Mahse, Sandra insawithiamna chauh a han ngaithla. Khatah khan a tana Sandra engmah a nih tawh lohzia a hre chiang chiah. Tap chung pawn ngen mah se; a mihring mirhinna chuan a khawngaih pawh a ni thei. Mhase, buaina dang hmachhawna mi dang tina leh tura kir leh chu a tum ta lo bur a nih kha.. Sandra nen khan inhmu ta lo se, Arini khan a hriatna te kha a nei let leh kher ang em? A mah leh amah chu a inkek nawk nawk a. 

"Buaina i nih hi. Buaina. Engkim i tibuai thin. Dam ve reng tlak pawh i ni lo" tiin a inbia a. A chhungkua ngaihtuah lo chu nise, dam reng chu tul a ti kher lo maithei a ni. 

"Lalpa, ani kha veng la.. Hmeichhe tha tak nihtir tawh rawh aw. Khawngahin a nun hmasaah kha chuan lettir tawh lo hram rawh" tiin a phun sep sep a. Chunglama arse de sep sep te chuan an rawn thlir niin a hria. A lungngaihna leh a inthiam lohna chu nasa tak a ni. 

Arini pawh a rawn harh tawh a. A la chauh em vangin chet erawh a ka che peih lo. A nu leh a u ten an lo thutpui a, "U, engtin nge Rinawma kha an hrem tak? " zawite hian a ti sap a. A harh chhuah ruala a thusawi chuan a nu leh a u a thawng hle. Arini kha a ni leh tawh tlat. 

"Aa.. Thla lehah thutlukna an siam dawn a. Mate, khalam kha chu ngaihtuah rih suh. I la chau em mai" Nancy chuan a lo ti vat a. 

"Ruatfela leh Sandra kha an innei ta em le? " ama hriat tawk lekin a ti leh sep a. Mahse, a sawi rual chuan engkim thlen chhoh dan a rawn lang leh zut zut. Zodinga nen an mut dun lai a ngaihtuah chuan a ner sak… Zodinga leh Ruatfela insual dan te, Ruatfela lu-a brick-a a chhut dan a ngaihtuah takah phei chuan a thu tho zawk! A nu chuan rang takin a rawn buaipui nghal a. 

"Ruatfela kha ka chhu a, a thi em? " a ti leh he haw. 

A rilru a la buai em em tih an hriat vangin Doctor an hrilh vat a, an rawn chiu mu leh ta a. Nancy chuan Ruatfela lu tuam bur kha a hre chhuak nghal. Arini chhutna lek a ni tih a hrethiam nghal a. A chhan tha tak a awm ngei bawk ang. 

Zodinga lo thlen lai chuan Arini chu a la muhil a. Nancy chuan a lo be bawrh bawrh mai. Zodinga lah tlangval hawiharh leh fing ve tak a ni bawk a, an inkawm thei hle. Pi Mali pawn a ngaina viau mai. 

"Hawnsan ru, tihian ka lo awmpui ang e. Lo ngaihtuah suh u" a ti a. Nakinah Arini rawn harh hunah an pahniha thil sawi dun te pawh a la ngai ang tiin Pi Mali te pawn ngaihtha takin an hawnsan a. Tlaiah erawh chaw an rawn dah ang. Zodinga chuan a harh hun a nghak ngat ngat a, phone a khawih thei a, a zia tho e. Arini te hausakzia leh a pa nihna te a hre ta bawk a, rilru nei taka awm a tum a ni. A tul anih chuan Arini chu neih mai pawh a hnial lo. A bialnu chu na dawn viau mah se; Ex MLA makpa nih chu a tan leh a chhungte tan pawh chhenfakawm tak tur a ni tlat. 

Arini rawn rum tiah tiah chu va hnaih vatin, "Arin" a ti su su a. 

"Tui" a rawn ti tham chhel e. Tui a lo pe vat. Zodinga a hmuh chuan mak a tih hmel hle. 

"Nang maw? ' a ti dat a. 

"Umm ka ngaihtuah lutuk che a, ka rawn chho vang vang a nih hi.. I ril a tam em? " a lo ti sawk sawk a. 

A hawi kual ruai a, "Khaw nge ka nute" a ti niah niah a. Khua a thim lek lek tawh. 

"An haw lawk a, an rawn lang ţep ang. I zun a chhuak em? " dimdawih takin a lo ti leh a. 

"Ti nge nangman min awmpui dawn ami? " a lo ti daih. 

"Aw.. Pawi i tih loh chuan ka awmpui ang che " a ti a. 

A ngawi ta reng mai. A lungawi vak lo nge a hrethiam lo. Zodinga ber kher chu a beisei miah lo asin. Dik tak chuan a hriatna a neih let leh hnu phei hi chuan Zodinga nen an chetdan kha chu a hun hmasa lamah mipa thenkhat a chetpui ang maiah a ngai. A rawn ngaihven zui a ring miah lo. Rei vak loah Pi Mali a rawn lang ta a, chaw a rawn kensak bawk. 

"Ruatfela hi khawiah nge? " a nu a hmuh rual chuan a ti hlawl. A vei ngang a niang e. 

"Resort a enkawl a ngai alawm.. A la rawn kan leh em em ang che" a lo ti dam thlap a. Zodinga nen chuan chaw chu an ei dun a, a ril a tam bawk a, an rin aia tam a ei ve. 

"Zoding, zanin chu ka lo riahpui ang e. Va haw la, va mu hahdam rawh" Pi Mali chuan a ti a. Hnial tung kha a hreh ve bawk si, Arini lahin a chelh bawk si lo. A haw ta nge nge a. 

"Zodinga kha in ko em ni? " a ti ta chat a. 

"Ko lo, i chanchin a hria a, a rawn kal ve tawp. A fel khawp mai, ka ngainat zawng tak a ni" A nu chuan a lo ti duah a. 

Arini a ngawi ran mai. A duh loh leh beisei loh lamin thil a kal dawnin a hria. Zodinga chu a duh ngei tak naa, a lawmna a kim lo. A sawi thiam chiah lo, ruak a la awm a thinlungah. 

Ruatfela pawh phai lam mikhual an nei ta bawk nen, a buai cher cher ngei mai. Hnam dangho hi chu an phunchiar bakah mamawh an ngah thei si a. Mizo anga namnul leh han inhmehbel chawt chawt theih an ni lo bawk nen, a thinlung pik nen a ning ru hle. A hna a ni miau si a. A nute pawh a be reng a, a pa chu a la ngai reng. Mahse, a thlarau nun erawh a chak tha tawh khawp niin a nuin a sawi a. A lo lawm ve khawp mai. A taksa chang lo mah se; a thlarauin van a thlen theih phawt chu a lawm tawk ta mai. 

A tukah Arini pawh a dinhmun a zia ve leh ta deuh a. Na engmah a nei lo naa, Doctor ten enkawl rih an la ti tlat si. A nu chu Zodinga'n a rawn thlak a. 

"Tuin nge ka na tih rawn hrilh che a? " a ti a. 

"Ruatfela khan min lo hrilh a. He pa hian nau ang tak takin a en che niin ka hria, a fel ka ti khawp mai" a der tel miah lo hian Zodinga chuan a ti ta a. Arini a chhing sawk. Ruatfela leh bawk maw? Eng nge maw a rilruah awm ang le? Ti nge Zodinga te chu a zuk koh? 

"Chuan i bialnu khan a hre lo mi? " a ti ta daih a. Zodinga a lo hamhaih. 

"Bialnu ka nei lo nangmah bak.. Kan sawifel vek tawh kha" a ti vat a. 

"Ni dawn tak. I nau nghal zet vang khan ka then tawh che kha a nia" a lo ti sap a. 

"Inthen nan chuan a ho lutuk. Khatiang. I dam vat ang a. Fel takin kan awm dun ang a. Pathian zarah hna nghet te ka hmuh veleh kan innei dawn nia" a ti ta mai a. Arini beisei loh lam daih a ni. 

"Pasal nei tur chuan ka la nau mah mah" a lo ti ve a. 

"Ka hria lawm. Mahse, mi dangin an lo ngaizawng ve ang che tih ka hlau alawm. Ka tan i rinawm reng ang tiraw? " a ti sup a. Arini chuan a melh vang vang ringawt. A rilrua thil awm chu a dang daih. Ruatfela'n Zodinga a koh chhan tur awm a ngaihtuah a, ni e, A lak atanga kal hrantira ngaihzawng dang neihtir hi a duh em em a ni. Chuvang chuan Ruatfela duh dan ang ngeiin Zodinga hi a pawm tur a ni. 

"Tehreng mai. I tan ka rinawm reng ang" Chhungrilna tel reng reng lo hian a ti ve sap a. Zodinga erawh a lawm hmel vur vur viau. 

Nileng chuan an inkawm ti ila, Arini a muhil zauh zauh bawk a. Zodinga chuan chu lai hmuna awm chu ning deuh mah se, Arini chan loh a hlauhna chuan a tichhel ti mai ang. A awm thei viau mai. 

Zanah Pi Mali bawk a rawn lang leh a. Zodinga riahpui chu a phal loh vang ni lovin innei em pawh an la ni lo va, chutia inawmpui ngawt chu tha a ti lo a ni. Nu fingfel tak a ni ve bawk nen. Zodinga pawh a haw leh ta phawt. A nu mutthilh hnuah zawitein a tho tham tham a, Toilet lam a pan a, Ruatfela number chu hmetin a call ta a. A chhungrilah turtu a awm tlat. 

"Hello" a rawn ti a. A aw chu a mut a chhuah hmel angreng. 

"Zodinga i lo ko va, ka lawm e aw..," a ti nghal sak a. 

"Lawmthu sawi a ngai hleinem. Ka tih ve theih tawk anih kha.. " a rawn ti a. 

Khur der der chung hian, "Ka dam veleh inneih kan tum a. Hetiang mipa tha leh fel tak ka pasal a ni tur hi ka lawm lutuk a, ka hrilh lo thei lo che a ni. Nang pawh kan inneih hunah chuan chef-ah i rawn ţang ang chu tiraw" sehchilh nawk nawk hian a ti a. 

Ruatfela chu a thu chhuak a, "A that nasat chu.. Ni e, ani khan tha takin a enkawl thei em em ang che. Nupa hlim tak in ni dawn nia" chhungril na vawng vawng chung chuan a ti ta a. A taksa chu a insangmar nasa hle. 

Arini pawh chuan a bianga mittui luang chung hian, "Ni e, khawvela mi hlim berah min siam a nih hi.. Ka hlim takzet a ni" a ti sap sap a.phone chu dahin, bangah chuan a bet thlawp a, a ţap khur ta ngawt ngawt mai. Ruatfela khan duhsakna a la hlanin a rawn lawmpui thei anih kha. He pa tan hian engmah a ni ve miah lo tih a chiang tawh. A beiseina them leh la chambangte pawh an bo zo ta. 

Ruatfela pawh a mutchhuak zawng zawng a reh vek. In chung zawl a pan leh ta ringawt. Van lam hawi vang vang pah chuan, "Ni e, ka laka i phuba hi hlen vat vat rawh. Tawrh chhuah ka duh tawh a ni. Na tuar chunga ka lawmpui che a ngai si a.. " a ti sup a. Tuizem bula thutna an siamah chuan thu hnawkin, a chal dawm a, a kun tlawk tlawk mai. 

Hmangaihtu leh hmangaihte inhriatthiam tawn lohna khawvel hi hremhmun aiin a hrehawm nep bik dawn em ni? 

(Next-ah ngei ngeiin a tawp tawh ang 😒😄