A tel lovin 22

A TEL LOVIN… (Chapter- 22)

Ziaktu: Toni Râlte

"Bawihte, i hming chu Lalrinsangi a ni a. Arin tia koh i ni thin. Kan fa naupangber i ni a, u mipa leh hmeichhia i nei.. Ih maw, accident i tawh vangin i hriatna thenkhat i hloh a, zawi zawiin i la hre chhuak dawn a ni. Nangmah khan engkim hriat chhuah tumin hmanhmawh lo la, dawhthei hram hram ang che aw" Pi Mali chuanna fanu kut vuan chung chuan a ti dap dap a. Arini chuan a nu chu a melh vang vang a, a hmel chuan pawi a sawi mawlh lo. 

"Nu" a ti sap a. A nat atanga a nu a koh vawikhatna a ni. 

"Eih ah.. Ka va lawm em.. Bawihte' tiin a mittui a hru zauh a. 

"Khaw nge ka pa te, ka u te chu" tiin a insiam tha deuh a. 

"An rawn thang mek e. Vawiinah damdawiin atangin kan chhuak tawh dawn a. " a nu chuan a lo ti zangkhai vah a. 

A sawi atanga rei vak lo ah Pu Thanga te pawh an rawn thleng ve nghal a. An chhungkua leh a enkawltu Doctor nen engkim an sawiho tawh a. Ruatfela thusawi kha ngaihtuah chian tlak an tih vang a ni. Ni e, an fanu hian a hriatna zawng zawng a neihkir leh kher a ngai hleinem. Khang a nun thim leh rimchhe tak kha theihnghilh se, khawvel tharah mi thar te nen a nun chu hmang ve tawh se.. Chu aia duhthusam tha chu an tan a awm dawn chuang em ni? An duhdan ang takin Doctor pawn, "Ni e, a hrechhuak vek lo thei, a risk a sang a, nawr vak chi a ni lo bawk. A hre chhuak lo hlen thei bawk a, in duh dan a nih chuan a nunhlui hriatchhuah theihna tur sulhnu zawng zawng in thup a, a thiante thleng pawn in hrilh hriat a tha ang" a ti ta a. A thiante pawh be nghalin an ni pawn Arini chu nun thar nei se an lo duhsak ve em em bawk a. Hmeichhia ngei te pawh kawm se an tihpui bawk. An lo hrethiam hlawm khawp mai. 

"Ka nau duat chu i va harh tha ve aw.. Hawn i chak tawh ni maw? " Nancy chuan nui sâng chungin a ti a. 

Arini chuan a melh hû hû ringawt. Chu nu hleitling tak chu hmel tha a tiin pian nalh a ti hle. Mama pawh niminah a rawn thleng ve chauh a, a nau vang liau liauin. 

"Nia, ka naute, i u ka nih hi aw.. I nuta neihchhun" tiin a va pan hnai ve a. 

"Ka lawm e" a lo ti ringawt. A ka atanga 'ka lawm e, ' tih thu hi an hre khat khawp a, chutia a sawi ringawt pawh chu a lawmawm tawh hrim hrim mai. An han insingsa fel a, bill pawh a sang far far hle. Thla chanve aia tam hret an awm kha a nia. A taksa lang thei chinah hliam a nei tawh lo ti ila, a malpui ruh vang khan kal a la harsat dawn thung. Thiamna a sang tawh a, Doctor thiam tak ten an lo zawm sak thlap a. Mahse, a damchhungin a ke chu a bai tawh maithei. Nun thar a neih theihna a nih dawn chuan a pawi lo ve. 

In an thleng ta. A hawi nasa ngang mai. 

" A va pui ve leh" a ma hriat tawk lek chuan a ti sap a. Nancy a lo khi sak. An awmpuite pawn tha takin an lo dawngsawng a. A room pawh a sulhnu hriat chhuah theihna tur awm ang chu an thaibo vek a, hmeichhe room tih hriat ngawih ngawihin an lo singsa a. 

"Hei ka room maw? " a ti hâ a. 

A pa chuan, "Umm, i mu ngam ang tiraw? Nangmahin" a lo ti a. 

A nui a, "Ka dawihzep thin em ni? " a ti a. 

"I huaisen lutuk thin zawk. Mahse, i hriatna hloh vang khan i hlauh ka ring deuh a" a lo ti ve mai a. A pa hi chuan a la be tìm angreng. Arini hian lem a chang mai mai angah te a ngai thul. A fanu a nihnaah a lainat ve bawk si. 

Tichuan, an in ngeiah mi thar ang chuan a khawsa chho ve ta nawk nawk chu a nia. A zakzum em em a, biak loh chuan a tawng ngai mang lo. A zirna chungchang an ngaihtuah nasa, Doctor thurawn angin in lamah zir mai se tiin an titlu ta a. College-ah a che buai palh ang tih an hlau a ni. Tutor thiam tak an rawihsak ta bawk. In a chhuahsan ngai mang lo tihtheih a ni a, hun a kal ve tak deuhah chuan Nancy chu a ngaina thar em em a, an inah a leng ve zeuh zeuh thin. Thian a la nei lo va, phone thar a nei naa kawm tur a hre ve lo. A chhungte hriat loha a ruka a ţah chang a tam ta. 

"Lalpa, i awm anih chuan ka nunhlui hriat ka duh. Heti ringawt chuan ka dam khawchhuak lo vang, ka khua a har em mai" tiin. Ni e, a thiante khan an venthawn em vangin an be tha ngam meuh si lo. A tu amah a hre bawk si lo. Insawi chawp dawn se thil tangkai lo an fawm tel palh ang tih an hlau ve bawk si. A ţap ru lai chu a nuin vawikhat chu a phawk ta nge nge a. A mangang hle mai. A fanu chu a lainat si. Nancy bulah a sawi ta a. Ani pawn tihngaihna a hre bik lo kher mai. 

"Resort-a thawk kha a fel riauin ka hria, ani nen khan inthian se a tha lawng maw? " Pi Mali chuan a ti hlawl a! 

Nancy chuan, "Ruatfela maw?! Nia, a tha maithei. Mahse, Nu, mateii hian a nunhluiah Ruatfela hi a duh thin asin" a ti ta a. 

Pi Mali chuan mak a ti hle. 

"Amah Ruatfela kha a puitling a, Arini nunthar neih hi a duh ve tak tak niin ka hria a, chuvang chuan inkawmtir pawi ka ti lo. A ngaizawng tawh kher bik nang" a ti ta a. Nancy chuan Ruatfela a lo biak tur thu sawiin a nu pawh a chhuak ve ta nghal a. 

A pa chu a changinna rawn zia a, a hniam leh thut a. Chutiang reng reng chuan hun an hmang ve mek a ni. Arini chanchin pawh a hre ve zel a. A duhdan anga thil a kal chho chu a chhungrilah natna awm mah se; a lawmpui em em mai. Sandra pawh Siaha lamah la awmin MA pawh a rawn zir ta dawn lo a niawm e. Pawi a ti hran lo, Sandra ai chuan Arini a ngaihtuah tam zawk. A rilrua a vei ta tlut hi Pathian hremnaah ngaiin tawrha hmachhawn mai a tum tawh. An hun hmasa lamah na takin Arini thinlung a hliam a; tunah chuan a natna chu chunglamin phuba a rawn laksak ve taah a ngai. Phuba leh saihlum a ngêt thei lo an tih ang khan.. Ni e, a pa pawh hian chunglam khawih a tawk tih a hai lo, a hun laia a nupui fanaute a tihnatzia leh a tihrilhaizia te a ngaihtuah chuan a pa tawrhna pawh hi awm tihna chin a nei ve tlat! A thlarau nun tal an la chhan hman mahna.. 

Nancy'n a rawn biak chuan thil dang daih a nih a ring a. Mahse, Arini chungchang a ni tlat!  

"Kawm hlimtu thian a nei lo va, khawhar hi a tuar thei si lo, a thiante lah khan rawn kawm dawn se, a nunhlui chhe tak a hriatchhuah kan hlau si. Nang chuan i pui thei ngei ang" a rawn ti a. A hamhaih hle. 

"Mahse, aman min kawm duh ve kher dawn em ni? " a ti ta khauh a. 

"Kawm duh ang, Resort-ah te i hruai ve ang a, kumin chhung chu hlim tak leh hahdam taka a khawsak a ngai a ni. " a rawn ti leh mai si. Chhan ngaihna a hre lo hle. Arini chu a hmu chak em em, mahse, a huphurh bawk. Mi thar ang maia inkawm leh thil thar ang hlira thil hlui tharthawh leh chu a nuam vak dawn lo tih a hai lo. 

Mahse, A hnial ngam ta lo. 

Nancy'n resort-ah a rawn hruai a, kekawr dum simple tak hain, kawr par nu zet a ha bawk a. Amah a ang lo tawp. A sam a thlah hniang bawk. A nu zêm mai. Hman leh tun chu danglam vai vai tak a ni. 

"Mate, Hei hi Ruatfela a nia, Resort enkawltu hi a nia, in inkawmngeih ngawt ang. Hetah hian i tan room bik ka dah thlap a, i duh chang apiangin i chhukin i riak thei ang " Nancy chuan a ti malh malh a. Arini pawh a lawm ve hle. Ruatfela nen chuan an inchibai a. 

"Inpeih fel la, ka fanpui dawn che nia, a nuam ania aw" Zangkhai takin Ruatfela chuan a lo ti a. 

"Awii tak tak maw, a nuam ngawt ang" a lo ti ve chul a. A rin aia a phur chu an lawm takzet a ni. 

Nancy hawn hnuah huan te chu a fanpui ta a, Theite rah lai a ni bawk a, theite te chu an lo va, Arini hmel hlim zet chu a nung sar mai. Ruatfela chuan a melh awl lo.. 

"U Ruatfel, enteh, ka hmuh tawh hnu i ang eee" a ti ta thut a. 

"Maw!? Hmu tawh ang, damdawiinah khan ka rawn kal ve alawm" a lo ti bah nak a. 

"Aih, chutiang ni lovin, ih maw, ka hriatna thenkhat ka hloh a, engkim hi mumang ang vekin ka hria.. Nang pawh hi ka hun hmasaah ka hmu tawh che aniang, keimahah hian hriatna a awm" a ti ta a. A chil a lo lem khawlh. Sawi mai tur a van hle. 

"Nia, dik tak chuan maw, Hetah hian i lo kal zing thin a, chuvangin kan inhmu fo alawm. Chuan thian tha deuh kan nia.. " a ti ta ngawt a. 

"Aniang, i fel si, kei chu zep loh chuan Hmeichhia ai chuan mipa kawm ka duh" a lo ti hlut a. Ruatfela a khi sak ringawt. 

Zanriah pawh an pahnihin an ei dun a. Arini chawhmeh duh ber bawngsa an hmeh. An chaw eikham pindan chung lam an pan lai chuan gate a ri rawk a. Mikhual an nei dawn anih hmel. 

"Lawk, nghak lawk ang, hming ziah a ngai sia" tiin counterah chuan an lut dun a. Kar loah mipa pali lai hi an rawn lut ta a. 

"Kan rawn be hmasa lo che u a, pindan awl a la awm mial em? " an zinga palian ber chuan a ti thum chhak a. 

"Aw awm e. Engzat nge in duh ang le? " a lo ti vat a. 

"Pahnih a ni mai. Pahnih ve vein kan awm mai ang" a lo ti leh a. 

An hmingte ziakin an han intifel a. Kolasib atanga lo kal niin, hna thila rawn zin an ni awm e. An pindan chabi a pek hnuah lawmthu te sawiin an kal ta nghal a. 

"Chho ila" Ruatfela chuan a ti a. Arini erawh a chechang lo. 

"Arin" a ti leh dût. Rawn harh chhuak thut niawm takin, "Awii kha pa chhiat lohzia kha.. A man tawp" a rawn ti ta hlawl mai! Ruatfela a nghing dawt! 

"A tu ber kha" namnul thei ang berin a ti a. 

"An boss ber kha.. " a lo ti leh êt a. Aw thum deuh, Zodingliana kha a ni tih a hre nghal. 

"Nia, i duh mi? " step zawh pah chuan a ti a. 

"Umm duh" a lo ti hmiah. Ruatfela tawng leh hmain, "Aa.. Ih, frank deuhin sawi la, ka hun hmasaah ka lerh thin em? " a ti leh hliai a. 

"Lerh lo" a ti hmuk. Arini chuan makti zetin a rawn thlek a, "Aa.. I sawi hmuk danah ka lerh chiang" a ti hram. An pindan ve ve an thleng a, an lut hrang ta a. 

Ruatfela chu khumah a thu hnawk. A lungphu ranzia chu mak tak a ni. Amah leh amah chu a innuihsawh a ni ber. Arini'n mipa chhe lo tih leh duh em em a nei tih a hriatna chuan vaw na tak a ni. 

"Hei hi ka phutawk reng a ni" a ti mawlh mawlh a. 

"Nunthar a neih phahna a nih dawn chuan ka tuar vek ang" a ti bawk. A kawngka chu an rawn kik dat dat a. A va hawn chuan Arini a ni. 

"Hawh, in card den ang.. Mut tawp chu a nuam lo e" a ti sar sar a. Nunhlui a lo hre chhuak zel lo thei si lo. Ruatfela roomah chuan an in card den leh ta tluk tluk mai. A hma ang bawk khan an hlim, Ruatfela a hlim kim lo tih mai loh chu. 

A tukah an mikhual te pawh chu an hna thilah an chhuak a. Ni 3 lai an cham dawn a niawm e. Arini pawh tuition lak ngai mah se; chawlh a la ve hmiah. Resort-a a awm ve rih chu a ngai a ni mahna. Hmana Arini, a duhzawng apiang neih tuma bei ngar ngar thin kha a la ni tlat si a! 

"Mama, Mampuii a lo la haw lo. Ka be tlang thei bawk si lo. " Dar 6 rik dawn tawhah a nuin a rawn ti leh ta. A thaw hawk. Mampuii hian a va tibuai thin ve aw. Amah lah hian pawi a sawi chuang bawk si lo. 

"A thiante number i nei em? Be chhin teh. Biak ka lo tum ve ang e" a ti a. 

"A thiannu ber Zaui pawh a biak tlang theih loh. Ni dangah te chuan a tlai dawn te chuan min rawn hrilh lawk zel sia. Huiham, ka hlauthawng hma ve deuh pawh a ni maithei" a nu chuan a rawn ti a. 

"Eng em a ti lo vang, ka'n ngaichang ang a, dar 7-ah a la reh chuan ka lo haw dawn nia" a ti ta nge nge a. An inbiak chhungin Arini chu a awm ve reng a. Thil awmzia chu a hrilh ve mawlh mawlh a, pawi a tih hmel hle. 

"Tun laiah chuan inrukbo te hi a tam tawh sia, ka lo hlauthawng ve tawp" a ti a. 

Ruatfela chuan Mampuii chu biak a han tum ve a, a tlang thei der lo. Engvang tak ni ang maw? A hmaa an thil lo tawn tawhte avang khan hlauhthawnnain a tuam nghal a. Lucy thiltihte a ni thei mai ang em? A rilru a buai takzet. Dar 7 a rik takah pawh eng an an theih loh vang chuan, "Ka han haw mai ang nge aw.. Ka nu a mangang dawn em mai." a ti ta nge nge a. 

"Naa, a nuam dawn lo e, i hawn chuan" a lo ti niah niah a. 

"Saw.. Peka te ho saw an fel lutuk, be ve bawrh bawrh la, fel deuhin i lo awm dawn nia" tiin a lu-ah a chul zauh a. A insiam nghal. 

In a thlen chuan a nu leh a naute chu a pa mutna bulah an lo thu khawm thap a. A nu mangang hmel chu a hai lo chiang hle. 

"Zaui te in luahna kha i hria em? " a nu chu a zawt nghal a. 

"Tuikualah a ti mai a. Khawi lai tak nge la hre miah lo" a lo ti vat a. 

" Biak theih tal se aw.. Engtia han tih chi nge niang aw" a ti vang vang a. A pa erawh a muhil hlauh a, a harh pawn engmah hrilh lo turin a nu leh a naute chu a hrilh nghal. A arkawh chhuah leh ta ngawt a. Mi dang han pun vak kha mualphothlak a ti ve deuh bawk si. Tuikual lamah chuan a tlan ngawt a. Zawn chhung a rei duh ngawt ang. Zaui chu Cherhlun khua niin an unauin in an luah tih bak engmah a hre lo. Khawpuiah phei chuan thenawm te ngei ngei pawh an inhre pawh vak lo a ni si a. A kual a kual ringawt a, a mi zawh apiangte lah chuan an hriat loh thu hlir an sawi si. A thinte chu a rim lek lek mai. A farnu chuan tlangval a um te hi a ni mai lo maw le.. Tih te thlengin a ngaihtuah hman. Dar 10 thleng dawn a kual hnu chuan a nuin a rawn call a, "Hei a lo haw e" a rawn ti sap a. A dah nghal daih. Chak zetin an in lamah chuan a phei leh ta a. 

A va luh chuan, Mampuii chu choka dawhkan bawhin a lo thu a, "Mampui" a ti nghut. 

A rawn hawi chhuah chuan a ţek chhawk! A farnu chu a rui lutuk tlat! Khati khawpa manganga siamtu a nau chu a lo rui mai mai anih chu! A thin a so ta phut. A farnu tukhum sama keh nghek pah chuan, "Eng nge i tih? Min va timangang ve" a ti ta nghek a. A nuin a lo chelh vat. 

"Amahin a lo haw a. Tuin nge lo thlah che ka tih lahin tu nge ka hre lo a ti tlat bawk si.. Khaw nge i kal ka tihin, ka hre lo chu pawh a ti leh zel a. A ngaihna ka hre lo" a nu chuan a ti a. Ruatfela chuan a nau chu bathroom-ah hruaiin tuiin a leih huh a,a bual a ni ber zawk e. Mampuii chu a rum tiah tiah mai. Tlem chuan a harh ta deuh e. 

Dar 12 pelah an nufa thum chuan chokaah an thu ta thap a. 

"Thudik chiah sawi ang che, khaw nge i kal? " Ruatfela chuan a ti a

Mampuii chuan a kut tiche sekin, "Ih, Kan class bang kha Zaui a lo kal si lo va, Rindika ka thianpa ve thoin ka thlah ang che a tia. Mahse, an in luahah min hruai daih a. Chuan, noodles te a chhum a, kan ei leh a, coke te kan in a. Khami hnu kha mumalin ka hre tawh lo. Ka thim mup mupin ka hria" Mampuii chuan a ti ta a. Ruatfela rilru a na kher mai. Mahse, a insum zawh loh a hlauh vangin, "Mu phawt ang. Naktukah rilru fimin kan ngaihtuah tha dawn nia" a ti a. 

Ruatfela kal liam hnu khan khawhar takin a roomah a awm rak rak a. A ruala a haw ve lo kha pawi a ti leh hnuhnawh hle. Chutia a rooma a awm melh melh lai chuan kawngka an lo kik a, a va hawn chuan, Zodinga a lo ni! Arini chu a lai chhe kher mai. 

"I va khawhar awm ve.. Lo kal ve rawh, saw mei kan chhem a" a rawn ti a. 

"Ka.. Ih, aih.. A zahthlak" a lo ti niah niah a. 

"A ho lutuk, mi dang pawh an awm ve alawm.. I khua ahar hmel sia, ka lo ko ve che nih hi" a ti leh ta zel a. Ruatfela awm ta bawk si lo nen, a star ruk em emin a sawm bawk si. Kawrlum a va ha sawk sawk a, a chhuak ve ta a. Pool piah lawka hmun zawl laiah chuan hnathawk ho leh mikhual te chuan mei an lo chhem hluah a. Khua a vawt ve tan tawh bawk nen. Hun dangah chuan zan dar 8 hnu lamah he lai velah hian awm an phal ngai lo. Mahse, Zanin chu Ruatfela a awm loh bakah hnathawk te an lo phur bawk a, Zodinga leh a thiante chuan zu an lo nei kher bawk si.. In tihhlim nan tiin an chhuak khawm ta hlawm a ni. Mikhual zingah hmeichhe pahnih an awm ve bawk a. Arini nen pathum an ni deuh tlawng! Zodinga te chuan Zo Ar an rawn hawn chu an hem pah bawk a, intihhlim dan an hre hle mai. Arini pawh mei lum sirah chuan zum takin a thu ve ran a. Hnathawkho te hi chu Ruatfela'n Arini natna leh hriatna hloh thu a lo hrilh tawh a, hre sa angin an awm duh bik lo. 

"Engtin maw ka koh dawn che" Zodinga chuan a rawn ti sa sa a. 

Lai zetin, "Arin tiin min ko thin a. Nang chu Zodinga tiraw? " a lo ti let ve a. A lo bu nghut. 

"Kha pepsi hi in ve la, i duh ve em? " tiin a rawn pe a, a lo in ve mai. Zodinga thianpa Dampuia chuan zu no a rawn keng phei a, Arini hmaah chuan, "I lem ve sek duh em? " a ti a. A nui sâng bawk. 

"Aih, zu ka in ngai lo" a lo ti nghat. A lu a thing nar nar bawk. Zu rim chuan a luak a tichhuak. 

"Nia, in suh se, a tha lo" Zodinga chuan a lo ti nghal zat a. Arini nen chuan an kal hrang deuh a, mi dang chu an hmu phak vek tho. 

An awmna veng te an inhrilh leh hnuhnawh a., "Eng nge hetah i tih ve? " a ti a. 

Arini chuan, "Ih, Resort hi ka u te ta a nia, ka khawhar changin ka chhuk ve tawp zel a.. " a lo ti bah nak a. 

"Heta thawk kha i bialpa mi? " ngaihven hmel zet hian a ti leh a. Arini a khi sak, "Awihawm loh e, U Ruatfela a nih kha, ù anga ka en ania" a lo ti dam thlap. 

"Anih bialpa i nei em? " aw thuk zet hian a ti ta a. Arini chu a khur der der, a lai chhe lutuk chu.. 

"Nei nang" a ti thei hram. 

"Kei pawh ka single a.. "Awmze nei zet hian Zodinga chuan a ti a. An inmelh ran mai. 

Arini laihzia hriain, "I duhawm reuh ka tia, ka hmuh tirh che khan. I naupanchhiat bakah i inno reuh si.. Ni ila" a ti ta taawp a. Arini a nui ringawt. 

"Bialpa ka nei ngai lo va, ka zak eee" a lo ti ringawt a. 

"Ka enkawl tha ngawt ang che. Ka ti tak tak, ka duhzawng tak i ni. Aizawlah hian kan rawn zin fo dawn tho a, kum thar lamah phei chuan kan rawn awm tawh maithei. " a ti ta duah a. 

"Ka hre lo le.. Ka lo inngaihtuah ang" a ti ve ta ringawt a. A chhungril erawh a lawm hliah hliah mai. Number te an han inpe leh hnuhnawh a. An mut hnu daihah Arini chuan whatsapp atangin a duh ve thu a sawi ngam chauh! Rilru hlim zetin a muhil ta siai siai a. 

Ruatfela te pawh zing kar atangin an buai hle. A pa hriat loha ngaihtuah a ngai bawk si. Ti nge maw Mampuii chuan buaina a tawh fo mai le? Rindika number chu a han dil a, "Ka nei lo" a lo ti! A nau chu a en vang vang a, dawt a sawi nia hriatna a nei tlat! Bakah mak deuh chu Zaui lehzel biak tlang theih lohah a awm kha a ni. Ruatfela chuan thutak zetin, "Mampui, i û ka ni a, thudik tak hriat ka duh. Han sawi teh le. A bul a tangin" a ti ta a. A naute pahnih chu pawn lamah an infiam a, a nu nen chaw ei dawhkan kilin Mampuii chu an thutpui ran mai. 

"Û, dik tak chuan.. Ih.. A hrehawm em a ni" Mampuii chuan harsa ti zet hian a ti ta a. A ţah a chhuah hmel hle bawk. 

"Rindika chungchang i sawi kha dawt a ni em? " a lo ti kalh a. 

"Aw " a ti tawi tâk a. 

"Anih chuan khawiah chiah nge i awm le? Chanchin engmah i rawn sawi bawk si lo" nem deuh zawk hian a ti ta a. 

Mampuii chuan a kut hum ruhin, a heh a pet fan fan a. 

"Aw le, engkim ka sawi ang. Zaui nen hian kan inngaizawng a ni" a ti ta mai le! Ruatfela leh a nu chu an meng phawk kher mai. 

Pi Zuali chuan, "Engtin..? " a lo ti ţhawt a. 

"Zaui hi keima tihkhawloh vek a ni. Bul ka tanpui a, min lo hnar si lo va, Lucy nen kan chet dan ang khan ka che thin. Nimin khan Kan thiannu pakhat Stacy Piancham kan lawm a, Class ban veleh an huan thlamah kan kal nghal a, hmeichhia hlir kan nia. Zu leh sa nen kan che ta a. Kei pawh ka rui khawp mai. An huanah khan signal a awm si lo va, biak ngaihna che u a awm ngang lo a ni. Mahse, ka rilru kil khatah min ngaihtuah dan tur ka hre ve reng si a. Stacy ten min rawn thlah ta a nih kha.. Nu, Ù, ka tihpalh.. Keipawn hrehawm ka ti. Ka zak bawk. Tianga awm hi ka duh lo asin" a ti ta mial mial a. Khawngaihthla a la reuh bawk si, amah hmangaihtu a chhungkaw tan chuan dema diriam vak a rem tlat lo. 

Ruatfela chuan, "Lucy vangin kawng dik lo i zawh phah ta anih chu. A hmasa berah psychiatrist kan pan a ngai ang. I rilru kha i hneh a ngai. Zaui pawn pan ve rawh se.. Ti ringawt chuan in la mualpho bakah in piansualna khua a sei dawn lutuk. Vawiinah ka chhuk pahin appointment siam ka lo tum ang a, naktukah emaw in va hmu dawn nia.. Ka thu chu i awih ang tiraw? " tiin a nau chu a en a. 

"Umm i thu ka awih lo ngai mi? " a lo ti ţiau mai. Lung a va zing thin em.. A pa lah a thi lek lek tawh bawk si. Khawdur hian a kiansan tak tak thei lo a ni ber mai. 

Tanhrila a chhuk thlak lai te chuan Pathian lakah a vui ve a, "Lalpa, mi te pawn kei aiin thil an tisual hnemin tual te hial an that a. Tihsual nei lo chu ka ni bik lo, mahse, ti nge hetiang em ema min tal buaitir bik le? Hmangaihna kawngah ka vanduai a, chhungkua lah ka venghim thei si lo. Ka pa nunna ka chhanhim thei hek lo. Lalpa, ka lakah hian eng nge i duh? " tiin Pathian a chhal ve mawlh mawlh mai. 

Eng chhanna mah a hmu lo emaw a intih laiin a rilruah he thu hi a rawn lang ta tlat mai a, "Buaina te chu ka tan chhelna, tawrhna chu ka chakna, hneh hnua ka lawmna tur te" tih thu hi. Chutih lai boruak chu Ruatfela thlarau thlen san ber lai a ni hial awm e. Resort pawh a lut fel ta a. Mikhual an neih belh lo. Arini chu a haw tawh emaw a ti a, a reh si. Mahse, Peka'n, "Mikhual pa nen khan MZU lamah an leng dawn. An chhuak deuh chiah" a ti a. Sawi nghinin a awm leh ta. Tihtheih erawh a nei lo. A infuih ru mawlh mawlh a. 

"Hlim rawh se, hlim mawlh rawh se" a ti mial mial mai. 

Arini te pahnih pawh an hlim dun kher mai. Zodinga chu Ruatfela te nen inrual khat tlang an ni a, Kolasib-ah pawh a khawsa thei pawl an ni. Amah hi a nula mi ve a, a zei riau mai. Arini lawm zawng sawi leh han chet vel te chu thiam tak a ni. Anihna takah chuan bialnu nghet a nei reng, kum 2 lai a lo inzuipui tawh a ni nghe nghe a. Mahse, a bialnu hian a duh hneh bawk a, a lo chet pelh ve deuh chang pawn a ngaidam zel mai. Chu a chak lohna tak chu Zodinga hian hmang tangkaiin a zin kualna velah chuan mal taka awm a tum ngai lo bur mai a ni. Khatia Resort an thlen tirha Arini a hmuh phat khan a hual lawk sa diam tawh. Amah Arini'n a melh dan kha hai bik hek lo le.. 

"Arin, ka ngai dawn che ee.. Kan rawn zin leh veleh Resort-ah lo chhuk leh rawh aw" Zodinga chuan a ti mawlh mawlh a. 

"Umm.. Tehreng mai" a lo ti ve mai. Han sawi duah tur a hre ve lem lo anih hmel. Tuna an awmna hi helipad a ni a, car kawngkhar te chu an hawng dar vek a, ni tla tur sen no riai chuan boruak thlenginna tinuam. 

A rawn kuah a, Arini a lo ìp chawih. A vawi khat nan a hmuiah a rawn fawp ta a. A lo dawh tawp. Fawh let ve dan tur a hre lo. Mahse, Zodinga'n thiam taka a han fawh tak zelah chuan a thiam dan danin a lo chhang let ve ta a. Zodinga kut chu hlei zelin Arini awmbawr te chu a tuai puat puat a, a lo inveng ve hram hram. A dul thuarte chu ţhamsakin a nghawng leh ir vel te chu a thawk khum ham ham a. Arinina sahal tlat. Awm dan tur pawh a hrethiam lo. A kekawr dapa a kap zawn a khawih dawn lai tak chuan, "Aih" a ti thut a. A tal chhuak nghal. 

"Ngati maw? Ngah nge? " a lo ti sur sur a. 

Aw khur deuh hian, "Ka duh lo. Haw ang" a ti tham chhal a. 

"I la virgin mi? " a ti ta. 

Arini chuan ngaihtuah chiang hlei lo hian a haw duh lutuk chuan, "Ka hre lo" a ti ringawt a. Zodinga chuan makti zetin, "I hre lo a maw? I virgin leh gin loh? " a ti ta hû a. 

"Ka.. Ih.. Engmah ka hre lo. Haw ka duh. Haw ang.. " a lo ti kawkalh nuaih a. A vawikhatna chauh alawm tiin Zodinga pawh chuan a hawnpui ve ta mai. Chungte chu Arini thinlung hnehtu a ni ta zel zawk a. Zodinga khawih vanga a taksa danglam nasatzia kha a ngaihtuah rauh rauh mai. 

Resort an thlen meuh chuan zanriah an lo ei mek hlawm a. An ni pawh chuan intifai lem lo in an zuk ei ve nghal. 

"Ehe, i lo haw tawh law.. " Ruatfela a hmuh rual chuan Arini chuan a ti hliai a. 

"Umm.. I lo tha em? " polite deuh hian a ti a. 

"Tha mah mah, thil hrilh tur che pawh ka nei" a ti sar sar a. A thusawi tur chu hriain a inhria. 

Chaw ei khamah Arini chu a inbual nghal a, a inbual zawhah Ruatfela roomah a lut nghal. Zodinga vel chu a hrilh ta mawlh mawlh a, a lo ngaithla ve mai. Zawhna a nei lo. A duh a, an ni a ni mai a, sawi ve tur engmah a hre lo. 

"E chuan maw, Vawiin tlai khan min fawp a, ih, min khawih vel a. A mak tawp, ka danglam vek a. Ka sawi thiam lo. " a ti leh hlawl. Ruatfela chuan a va thlek vat, "Chuan, engtin zel" a ti vat a. 

"Ka duh lo va, in englo kha.. Haw ang ka tia, kan rawn haw daih. A fel ka ti tawp. Ka thu a awih sia" a ti leh thliam a. Lang lo lama Ruatfela chal chuar nâng chuan awmzia a nei mahna. 

"Arin, bialpa te chu neih tur a nia. Mahse, sex hman miah loh tur aw. Hre reng ang che. " a ti ta zawk a. 

"Anih, ka hun hmasaah khan ka virgin em? " a rawn ti ta sap a. Ruatfela che chu a buai dat. 

Mahse, "Aw virgin e.. Chuvang alawm mipa inkhawihtir suh ka tih" a ti ta hmiah a. Chu thu chuan a tilawm tih hriat takin Arini chu a khi sek a, "Zodinga khan min zawt a, ka hre lo ka ti ringawt a.. " a ti a. 

"Confi takin ka virgin alawm i ti zel tawh dawn nia" Ruatfela chuan inhumruh chungin a lo ti a. Arini a bu nghat. 

"Nih khitah in chung zawlah kan inhmu dawn a. Ka kal dawn.. " tih leh chhuah a rual nghal. A phurzia te, a hlimzia te a hmuh chuan Ruatfela chuan na ti mah se; a lawmpui lo thei lo. Mahse, tihnatin a awm ang tih erawh a hlau a, Zodinga chanchin pawh a ruk deuha chhui a tum. A hun hmasaah na taka a lo hliam tawh vanga Arini tana a tihsak ve theih awmchhun angah a ngaih vangin.. Ni e, tunah chuan Arini tan chuan Û leh thian chauh a ni tawh. Hei hi a ni lawm ni Sandra rawn lan hnua Arini rilru put dan tura a duh kha. Mahse, tunah chuan a natpui leh ta si! Nun tak hi chu aw.. A va hoin a va kual si thin em.. Hmangaihna pawh hriatthiam a lo har fat fat em mai. 

Rinawma kha court lamin a chungthu an ngaihtuah chho dawn ta a. Pu Thanga rilru chu a buai hle. A nupui leh Nancy bulah muk takin a sawi a. Tunah Arini hian engmah khatiang kha a hre tawh chuang lo bawk a, court-in thiam loh a chantir hma hian kawng dapsak a duh thu a sawi ta a. A tirah chuan a nupui leh Nancy chu an thinrim. Mhase, Pu Thanga chuan, "Ka fapa a ni ve tlat si a. Nupui pawh a nei ve asin" tih chu a ţanchhan run si. Rilru hmin zan lo chuan an pawmpui lo thei ta lo va, pu Thanga chuan ukil rawihsakin Rinawma chu chhuah zalen a nih ngei theih nana hmalak an tum ruh ta hle a ni. Damdawi an mansak kha chu kum 3 chhung lung in tang tur leh pawisa chawi tura hrem a ni. Mi a ruk bo vang khan a tan hun an pawhsei sak leh ta bawk nen.. A vanduai ve khawp mai. 

Zodinga te pawh an hna thawk zoin, a tukah an haw tawh dawn ta chu a nia. Arini lah anmahni vang in a la cham ve ta reng lehnghal. An hawn dawn zanah chuan Zodinga te room-ah inthlahna angreng an nei a, an bengchheng hle. Hmeichhe pahnih te kha chu an haw tawh a, Arini chiah hmeichhia a awm. Ruatfela chuan ngaihtuah ru hle mah se, inrawlh a hreh si a. Mipa rual zinga han chetla tur chu a ngaihtuahawm deuh a ni. Zu an la in zui! 

Dar 10 vel a ri tawh ang tihin Arini chu a call ta nge nge a. An rooma va luh chilh em chu a hreh si. A la la thei lo zui.. Call leh a tum lai mekin Zodinga te room kawngkhar chu a ri dawt dawt mai. Rang lutukin a tho va, a va tlan chhuak nghal. Zodinga te room kawngka chu a kik ta dat dat a. An thawm a reh hmak. A kik mai pawh ni lovin a chumin a chum a. A tawp a tawpah an rawn hawng ta hram. 

Arini chu khum pahnih inkar chhuatah khum pakhat zawk nghengin a lo thu a. A lo thle nguai mai! A kawr hak lah chu a tawngchham mai si. 

"Eng nge ni ta? " Zodinga chuan a lo ti a. 

"Arini hi ka rawn hruai dawn a. A chhung ten an ngaihtuah deuh tawh aniang. An be tlang thei si lo va" tiin dawt var a sawi ta ringawt. 

"Hei kan la inthlah ve rih alawm.. A chhungte bulah chuan min lo thup sak ve rih mai rawh.. " Zodinga bawk chuan a ti leh a. 

"Arin, tho rwwh.. Zu i in ve law? " tiin Arini lam a melh daih!. 

"Naa.. Ka in ve chak alawm.. Nge i lo tih dawn. Ka la awm duh hetah.. Ka bialpa nen kan inthlah ve dawn" sehchilh lek lek hian a ti a. 

"Aih, a tha lo. I rui bawk si. Zingah in inthlah dawn nia, i chhung ten an ngaihtuah che" tiin kaih thawh a tum a. 

"A mak.. Nang chu ti lo teh. Khawi maw min thlah teh.. Hetah ka awm duh ka tih chuu" a ti pawr hlar a. 

"Kha.. amah pawn a duh ve tho kha. Awmtir mai rawh. Lo buai ve vak lo mai rawh.. Thianpa" Zodinga chuan a ti a. A thiante erawh zu an in a, an ngawi reng thung. 

"I lo kal dawn khawp mai. Tho vat rawh. Nangmah enkawl tura thupek ka ni a, ka zawm a ngai. Ka awmtir dawn lo che. " tiin Arini chu a phih tho lawp mai. 

Chutah le.. Arini chuan a rawn beng ta thuai mai. Mitmeng sen rûm hian, "Tu nge i nih? Hetianga min ti tur hian thuneihna i nei lo. Kan resort-a hnathawk ve satliah i nih kha. Engmah i lo sawi ve tur a awm lo. Ka duh duh danin ka awm ang. Lo inrawlh suh. Chhuak rawh" a ti chang ta fak fak mai. Hmana Arini zia kha a rawn chhuak ta mauh mai le.. Ruatfela zak bawk thinrim bawk si chu a ding lui ve tlat, "Mipa bula zu ina hetia awm tur hian hetah an rawn dah lo che. Ka mawhphurhna i nia, ka kal dawn lo" a ti ve tlat! 

Zodinga zawk chu a lo thinrim tawh viau mai a. Ruatfela hmaah dingin, "Thianpa, tharuma kan sawifel a va ngaih hmel ve. A ninawm tlat! Amah pawn kal a duh lo va, hruai i tum tlat le? " a rawn ti ta a. 

"A bialpa i nih chuan zu pawh inpui lo tur i nia sin" a lo ti sup a. 

Arini zawk chuan, "Awwi, Zodinga min intir a ni lo. Keiman ka duh a ka in anih kha. Kal teh, ka hmu hne che.. " a lo ti hlak hlak a. 

"I chhuak dawn nge kan insual dawn? " Zodinga'n a lo ti bawk. 

Arini piansual rukna leh mipa pali bula zu a in mek dan hretu Ruatfela chuan, a hmangaihna sang ber leh thuk tak avang zawkin, "Arini ka hruai chhuak dawn lo anih chuan thih thlengin insual ila a ni mai lawm" a ti ta hem mai. Zodinga thiante zawk chu an lo chek hluk. Inrawlh an tum miah lo chu an pa angreng khawp mai. Zodinga chu a inhum sek ta nghal a, 

"He lai zawng a zim.. Bathlarah le" Ruatfela'n a ti nghut a. An inzui chhuak ta. 

Pakhat rui lo hai lo, tlangval fit zek zawk a ni bawk a. Zodinga lah a lo khulh nual tawh si. A hneh ta vak lo. An thawmah hnathawk dangte pawh an rawn chho ve ta hlawm a, thelh an tum chuan Zodinga thiante lamin an phal si lo. Zodinga bawhbet chungin, "Tikhan i tlawm tawh em? Arini chu ka hruai ang" tiin a kuttum a tin ta khap a. 

Zodinga'n, "A tha alawm" a tih zawh rualin, Ruatfela tukhum a ri bur mai. A let nghal hawl hawl a. A bing mup mup. Tuman an dan hman hmain Arini chuan bathlar sira brick chuang bang an rem tlar zinga pakhat chuan Ruatfela tukhumah a rawn chhu ta a ni. A na ngawt ang le.. 

Hnathawktute chu an au chel chul a, Ruatfela tukhum pawp thi chhuak chu dan tumin an theih ang angin an che a. Zodinga pawh a hamhaih angreng hle. Arini chu rawn kal hnaiin, "Mahni kuang lo nawr chu khatiang kha an chantawk. Ka nunah hian lo inrawlh leh tawh ngai suh ang che.. Kan hlawhfa mai mai i nih kha" a rawn ti khur dat dat a. Ruatfela chuan a tukhum dawm chungin thei leh thei lovin Arini chu a han melh a. 

"Aw le, i duh dan chu ni rawh se" a ti zawi raih a. A thianten hmanhmawh takin an kalpui ta nghal a. 

Chumi zan chuan Arini roomah Zodinga pawh a riak ve ta bawk. 

Zodinga te hawn hnu lawkah Arini pawh chuan a u biain an driver rawn tir turin a ti a. 

"Ruatfela kha rawn inthlahtir la.. Ani pawh hmuh duhna ka nei asin" a rawn tih chuan a ner sawk. 

Ruatfela room bulah a ding ran a, a tûm bûr mai. Kawngka chu a kik dat dat a, a lu tuam bur chungin a rawn hawng a. 

"Ka u in a hmu duh che a, chuan min thlah a ngai bawk" a ti nghal hmawk hmawk a. Darkar rei lote chhunga Arini mize danglam chak dan chu mak a ti a ni. 

"Aw le" a lo ti nghut a. 

"Mahse, i lu tuam chhan kha a zawh che chuan engmah sawi suh ang che" a lo ti leh hrâwk. 

"A tha alawm" a ti ve mai a. A inthlak a, tukthuan an ei tawh bawk a. An kal nghal mai. Kawng tluanin an inbe lo.. Ti ila, Arini chuan a chhuk dawnah, "Hetiang bike te la neih, a chuan pawh ka zak" a ti hram. A hma zan lawka engkim sawi duna Zodinga chungchang pawh hrilh sar sar tu nungchang chu a danglam chiang ta hle a ni. Arini tak tak kha a lo let leh tawh pawh a ni mahna. 

Engmah a sawi ve lo. Nancy chu a va hmu a. A lu tuam chhan a zawt ta ngei mai. "Ka tawlhthlu pek a, ka sawh a nih hi" a ti sam êt a. 

A lo awih ve mai aniang chu maw. Karleh lamah phai atanga mikhual an neih tur thu leh ei leh in vel pawh danglam deuh siam a ngaih tur thu te a sawipui a. Tin, a nau chungchang pawh. 

"A tha reng. Tisawn a zia zel mai ang. " a ti ringawt. Sawi thui tur a hre lem lo. Nancy pawn a zawt lui bik lem lo. 

Nancy nen an inbiak zawhah an in va tlawh hram a duh ta a. A inkhalh phei a, nimin khan Mampuii te chuan Doctor Sangkima an va hmu a. Chung result vel pawh hriat a duh ve bawk a ni. Mahse, Mampuii chuan class a lo kal daih a, a nu nen an inkawm ta mai mai. A pa erawh a zia rih. A muhil mek. Resort lamah chinfel tur neuh neuh a awm vangin awm rei lo chuan a chhuk ve leh ta mai a. 

A thleng a, counterah lut nghalin tihfel ngai a ti zung zung a. Nachhawknaa a injection vangin a na pawh a la chhuak rih lem lo. 

"Room a book theih em? " mipa hian mizo ţawng pai lek lek hian a rawn ti a. A hawi chhuak a, "Aw theih tehreng mai" a ti a. 

"Ka nupui hual nen rawn riah kan duh a. Pakhat kan lo hauh ang aw.. " tiin a wallet a phawrh a. 

"Aw le.. Hming leh ID a ngai a" a lo ti a. 

"Johnson Lawbei.. Siaha" 

Ruatfela pen hum lai a chawl det. Muangchangin a hawi chhuak a. Johnson bula hmeichhe lo ding chu a melh ta tlawk tlawk a! 

(Next-ah tawp teh se 😢