A tel lovin... 21

A TEL LOVIN… (chapter- 21)

Ziaktu: Toni Râlte

"I û ka nih hi.. " Rinawma chuan a ti ta a. Arini a tawlh hnung deuh. 

"Dawt hmanga min hneh chu tum buai lo mai teh" a ti chang fak a. 

"I pain min hum chhan kha i ngaihtuah ngai em? A chhan chu a fapa ka ni tlat alawm.. Mahni fapate tuin nge mantira tantir thei ang? " Zam vak lo hian a ti leh a. Arini a thaw hap. 

"Ka pa fapa i nih pawhin ka û i ni lo. Mahni naute pawngsual duh khawp û ka nei lo" a ti hniam raih a. 

"Khatih lai khan ka star em che a ni. Bakah khamini khan ka rui ve bawk sia.. Ka nau anga en che kha harsa ka ti bawk. Khawngaihin min ngaidam hram rawh" Khawngaihthlala zet hian a ti mawlh mawlh a. 

"Tu nge i nu? Ka pa fapa chu engtin nge i nih theih? " Chiang zeta rawn melh chung chuan a ti a. 

"I u Nancy kum 1 vel anih khan i pa chu kan khuaah lo zinin, chutih lai chuan minister a la ni lo va, Contractor a ni thin. Kan khuaah hna a rawn thawk a, chuta tang chuan ka nu nen inhriain an chesual a, ka piang ta a ni. A chin chhuakin engmah ka hre lo. Ka len ve deuh tawh hnu khan ka nu chuan ka pa zawng chhuak turin min ti a, a hming leh nihna te a sawi a. Chutih lai chuan Politics-ah zuang lutin MLA te hial in candidate a tum tawh thung. Mahse, ka be ngam ta lo va, ka nu hian vanduaithlak takin cancer a vei miau si a. Zah pawh dawn lovin ka pa hi a rawn be ta a ni. Tichuan, ka nu thih hnuah i pa chuan in inah min la lutin, a thianpa fapa angin min sawi anih kha.. " Rinawma chuan harsa tih hmel zet hian a ti a. Arini pawn a chil a lem khawlh. A pa in Rinawma hum a duhzia a hriat atang khan eng emaw tak a awm a lo ring sa daih tawh a ni. 

"Fiahna kan hmu ang. Mahse, hei hi hria ang che. Min pawngsual vanga hremna chu i hmu dawn tho tih hi. Ka pa ka hmangaih vang ni lovin, i nu thlarau ka zah vang chauhin tunah hian ka hruai haw leh che ang a. Ka pa hnen atanga thudik ka hmuh hunah Police kutah ka hlan ang che.. Ka kut zal ngeia thah che hi ka châk lutuk, mahse, ka unaupa i lo nih takzet chuan, thisen zawmpui laka thisen chhuah chu kei chuan ka duh ve lo mai zawk a ni.. Kal ang" tiin a nawr tho va. Rinawma chu thaw huai hmel a pu. 

"Hello" Ruatfela chuan a ti a. 

"Ruatfel, keimah ka nia, Elim.. Number dang atangin ka lo bia che.. Ih, Sandra khan nau a pai a, mahse, a pa leh Johnson ten an tihtlak luihtir! Tunah hian mi â ang maiin a awm.. Lo chhan chhuak rawh" a rawn ti ta mawlh mawlh mai. Elim thusawi vang chuan a phu chiang ngei mai. 

"Maw.. Engtin? Naute chu ka fa maw? A thi maw? " a ti nghek nghek a. 

"Aw a thi tawh. An tihtlak luihtir alawm" Elim chuan a rawn ti a. 

Khawng zeta dingin hmalam a melh vung vung a, "Naute chu a titla thei a maw? " a ti thawp sat. 

"A duh vang a ni lo ka tih chuuu.. A pa leh Johnson ten an vau nasa em a ni.. "A rawn ti hram hram a. 

"Mahse, nikhaw hre lovin an siam chuang em ni? Hrai ruih pawh a nih loh chuan engtin nge a rila rah chu a thahtir theih? " a ti ta tuar a! 

Elim chuan phone a dah daih. Ruatfela'n a call leh chuan a busy bawk si. A rilru a buaiin a ngaihtuahna a bing mup mup mai. Sandra chuan rawn biak pawh a tum eih lo va, ani lahin Sandra thu hmu lo va call lah a hreh ve tho si. A hriat loh karin a fa an thahsak chu a ni a. Sandra pa leh Johnson chu a huat viau rualin, Sandra pawn tel vena a nei tih chu a ngaihdan a ni ta tlat! Hlauhlawpin siam pawh nise, amah rawn biak pawh dan ngaihtuahin amah hruai turin a tithei reng. Mahse, engmah a ti lo. Tunah engkim a pawi tawh hnuah Elimin a rawn hrilh hre ve chauh a! Sandra a duh tluk zetin tunah chuan a haw ta hle mai. Nge a lo hmangaih tak tak lo em ni dawn? Khumah a thu hnawk a. 

"Ka ning, ngaihzawng hi neih leh tawh loh tur a nih hi" a riin a ti hawk a. 

Nancy te nupa leh a nu leh pate hmaah chuan Rinawma chu kut phuar chungin a nawr lut a, a va dintir ta. A pa hrilhhai hmel zet chu melhin, "Thudik ka nghak e. Ani hi i fapa a ni em? " a ti ta a. Pu Thanga a zûm dûi mai. 

Pi Mali zawk chuan, "Eng thu nge maw i sawi le? Ani te chu i pa thianpa fapa alawm" a lo ti a. Hlauthawng hmel erawh a pu. Nancy erawh a ţawng miah lo. 

"Ani hian i fapa a nih thu sawiin ka thah theih lohna chhan niin a sawi asin. " tiin Arini chuan a pa a melh ran a. Pu Thanga chuan a kut a tiche neuh neuh reng mai. Rinawma chu a va melh leh zauh thin bawk. 

"Ni e, ka pa, thudik sawi mai rawh" Rinawma zawk chuan a rawn ti ta hlawl a! Arini tih loh chuan makti zetin pu Thanga an melh! 

"Aw le.. A tha e. Ni e, Rinawma hi ka fapa a ni e. Mama nu, min ngaidam ang che. Contract ka thawh lai khan an khua Lungdaiah hna ka va thawk a, Nancy kum khat vel bawr a ni tawh. Khatah khan vanduaithlak takin Rinawma nu nen intawngin kan chesual ta hlauh a! Keiin ka hawnsan leh ta mai si a. A rai thu pawh ka hre lo. Mahse, a hnu kum fe tawhah Rinawma nu chuan min rawn biaiin, a thih mai tawh tur thute sawiin a fapa chu ka fapa a nih vanga ka enkawl tura a hnutchhiah tur thu a sawi ta a. A tir chuan ka faah i puh a ni ka ti ve tlat! Mahse, a pai hun leh a neih hun thleng chiang taka ka hriat takah chuan ka fa a nih lohna chhan tur reng ka hre ta lo va, ka mawhphurhna chu ka hlen ang tiin Rinawma chu ka va hruai ta a ni. In bulah ka fapa tia sawi kha ka ngam ngang rih lo va, ka thianpa fapa angin ka sawi ta mai a ni. 

Pawi ka ti lutuk. Mahse, kei lo pa dang a nei lova, a nu lah a boral tawh si. Khatia Arini a sual takah kha chuan ka fapa a nih angin ka hum a, Champhaia ka thiante inah ka thawn chho ta nghal a. An ni hi ka sumdawnpui an ni a, Rinawma chu chher hriama nakinah ka sumdawnna kawnga min pui thei tura lo hrilh hre turin ka ti a. Amah Rinawma hi tiang lam hi a chemkalna zawng tak a lo ni bawk nen, reiloteah kan pafa chuan sumdawnna chu a rukin tluang takin kan kalpui thei ta mai a ni. Ka tan a hlu em a, ka fanu pawngsualtu ni mah se; hremna pek kha ka tan a harsa em a ni" A rawn ti ta a. Boruak a reh vawng vawng mai. 

"Ani nunna aiin ka nunna chu a hlu lo zawk a ni maw? " Arini chuan lungchhe aw zet hian a ti a. 

Pi Mali thinrim awrawl an hre ta nghal, "I lo va tenawm ngai ve. I fanu ngawih ngawih nun tichhetu i lo hum a maw? Tunah hian i fanu hi eng nge a nih tak i hria em? "A ti ta tâwn tâwn a. Pu Thanga a ngawi ran ringawt. 

Nancy a rawn tawng ve leh, "Ka pa, i dik lo hul hual, ka nau anih vanga a lama tang ka ni lo. Mahse, a hun lai khan kan bulah te sawi ni la doctor te pawh kan panpui ang a, inenkawlna tha tak nen tun ang hi a ni hauh lo vang. Tunah chuan hmana ka nau kha a thi tawh" Rilru na fe hian a ti a. 

"Ni e, ka thiam loh liau liau a ni e. Dan anga hremna chu ka tuar thei e. Mahse, khawngaihin ka nunna hi chu min laksak lo hram rawh" Rinawma chuan inthlahrung tih hriat ngawih ngawih hian a ti a. Arini che chang lo va ding chu a melh kar bawk. 

"Aw le, i nu thlarau ka zah vang leh min hringtu ka pa thisen i kai ve vangin i chungah kut ka thlak lo vang. Mahse, hremna chu i hmu ngei tur a ni ang" Arini sawi chu thutawp a ni tih an hria. Tuman sawi nawi emaw khap emaw an tum lo. Pu Thanga ngei pawhin. 

Police an call ta nghal a. An rawn lang vat. Arini chuan thil nihdan dik tak a sawi malh malh a, a rei ve deuh tawh naa Police te tan ngaihthah ngawt chi a ni hran lo. Zawhna erawh an nei.. "Engtin nge Rinawma hi i zawn chhuah? I lo rubo rèng em ni? " tih chu.. An zawn lai mek a ni si a. 

Chutah chuan Arini pawh chuan engmah zep theih a ni tawh lo tih hriain engkim a bul atanga hrilhin No. 4 nen Rinawma chu a thleng thu a sawi ta a. No. 4 a hmuh dan erawh a sawi lo. Mahse, Police lamin an hre châk si. 

"Tu emaw hnen atangin ka ru chhuak a ni. Tunah hian an la chhuak lo vang, in la man theiin ka ring" tiin a tlip zaih. Chu Tu emaw chu tu tak ni ang maw? Ruatfela rooma an hmuh kha a lem a ni bawk si lo. Khawi atangin nge khatiang No. 4 zozai kha a hmuh tak ang. 

Engpawhnise, Rinawma chu Police kutah a awm ta phawt a. A chungthu erawh court lamin an la relsak ang chu. Rinawma mantu te man ve leh chhawn a ngaih avangin police ho pawn thu an inthawn darh ta nghal a. Vanneih asiamin, Champhai lama chho tur Sumo-ah an mi duh chu a lo chuang vang mai. Aizawl an chhuahsan hman tawh naa an man thei hram chu an lawm hle. Amah ngei hian Suaka pawh kha a thah an ring. An la hre chho zel ang chu.. 

Ruatfela pawn Arini te chungchang chu a lo hre ve a. A duh dan ang taka thil a kal chu a lawm angreng. Tual em that tur chuan Arini chu a phal hlawl lo a ni. Inthlahrung tak chungin a be ta nge nge a, "Ka lo hre ve a. Police kuta i hlan kha ka lo lawm ve tawp. Tual i thah kha ka hlau a" a ti a. 

"I lo lawm vena chhan tur ka hre lo. Tin, tual pawh that ila, i tan a pawina pakhatmah a awm hleinem" a rawn ti chang leh fak. A ze pakhat zawk a phawrh mek tih Ruatfela chuan a hai lo. 

"Arin, min la haw viau a ni maw? " a ti ringawt a. 

"Ka sawi tawh kha. Aw ka hua che. Biak pawh min rawn be tawh suh" a ti nghat a. Amah zawkin phone chu a dah. 

Tu emaw number a hmet chhuak a, "Hello, Zanin chu in farm house-ah ka phuba lakna lawm ang hmiang" a ti sap a. A nui deuh bawk. 

Lehlam ami chuan, "Tehreng mai. Dar 4ah ka rawn lam ang che" a rawn ti ve a. 

A duh dan ang thlapin thil thleng lo mah se; Pathian remruat te pawh a ni zawk ang tiin a ngaibtuah ve hial! Pathian lam a ngaihtuah khât tehlul nen. A la dam rei deuh dawn a ni mai a. A nunna aia a fapa nunna ngaihlu zawktu a pa runluihna hun a la ngah ting tihna a ni mai. Phur zetin a inbual sar sar a. Ruatfela chu ngaihtuah loh hram hram a tum. A rawn biak kha chuan amahah feelings chu a la neihtir chiang, a la ngaihtuah ve ringawt pawh chu a lawmawm lamah a ngai ta mai. Mahse, khati khawpa Ruatfela tihnatna a tawrh tawh hnua tlawm leh hni hne chu a tum lo bur a ni tawp mai. 

"Mama, i pa hi a chau riau mai. Vawiin chu. Kei ka thlaphang hma si a, zanin chu i rawn riak chho mai dawn mawni le" anu chuan a rawn ti a. A tho nghal zawk. "Aw le, kan insiam nghal ang e" a ti zung zung a. 

A pa chemo khai thin hi a taksa in a zo meuh lo va, zu kha a lo in nasa ve hman nen, a rilru lamah uai rittu a awm bawk nen, a chauh phah thin ngei mai. 

Chak zetin a tlan a, Chawlhhmun a pel fel awrh tihin kawng sirah mi an lo inhawr khawm deuh a, chesual an awm aniang tiin a ding ve dat a. A mah hnaih bertu tlangval pakhat bulah chuan, "Accident an awm em ni? " a va ti a. 

"Aw hei an insu a, an na viau a ni awm e" a rawn ti. Chutih lai tak chuan car atang chuan hmeichhe pakhat an rawn pawm chhuak a, a thi nasa mai. A hmel va hmu chiang thei lo mah se; a sam leh a pian atang chuan an deuh neiin a hria. A va bih chian ve chuan a meng phawk nghal hrû! 

"Arini a nih hi.. Engtiazia nge.. Arin arin" tiin kawngsir deuha an zalh chu a va sawi a. An rawn khap deuh nain amah hretu awm chhun a nih miau vangin an khap na lem lo. Arini leh Eric-a Fawr tur chu chu lai kawng kawiah chuan vai truck nen an insu a lo nia! Vai truck-a chuang te chuan hliam na em em an nei lo nain, Erica te lam erawh an na riau mai. Amah Erica phei chu a thi tawh emaw an ti hman a, mahse, a lung a rawn phut leh takah chuan hmanhmawh takin Arini nen chuan damdawiin hnai berah an tlan chhohpui ta nghal a ni. Ruatfela pawn a zui ve nghal a. A tawngtai mawlh mawlh. Khatia Arini, thi chhawnga a awm tak chiah khan amahah nasa taka nghawng dattu a nei a, a hrethiam lo. Arini thih chu a hlau ngawih ngawih. A nu te pawh engmah a la hrilh lo. A zui ve zel tawp. Doctor ten an lo bawihsawm nghal zar zar a, Ruatfela pawh harh chhuakin Nancy a call nghal a, Pu Thanga number nei hek lo. A nu te pawh thil awmdan a hrilh zui nghal a, Arini chhungte rawn lan hma chuan a awm ve rih a ngai tih a hria. Mi dang anmahni hruaitu te pawh an la thu khawmuang ve bawk. 

Erica chhungte lam erawh a hre si lo va, Erica phone lah an hmu zo bawk si lo. A per bo daih a nih hmel. Nancy leh a nu an rawn lang ta vat a. An hlauhthawn hmel kher mai. Chutih lai chuan ICU-ah an nawrlut mek a, Nancy phei chu a ţap thawthang a ni ringawt. Vanneihthlak takin nurse zingah Erica hretu an lo awm hlauh a, an chhungte pawh an be pawp thei ta hlauh. Erica phei chu rei daih hmel a pu mawlh lo. A lu ruh a khik an ring, a lu a sawh na em mai. Tin, a ban pawh a tliak niin an sawi. A zawng zawng an sawi duh lo naa an tawng hmangah internal bleeding lam te pawh a ni tih a lang. Chuvanv chuan a chhungte an rawn lan vat a ngai. Arini erawh a lu a sawh bakah a malpui ruh a tliak. Chubak a hliam dang an sawi rih lem lo. An vanduai khawp mai. 

"In lo lang ta bawk a, ka va haw ve phawt ang aw. Ka pa a chau ve bawk si a, chanchin min lo hrilh ve dawn nia. Ka rawn kal vat ang.. " Ruatfela chuan a ti a. 

Nancy pawh chuan, "Eng han tihtheih a awm chuan loh hi, va haw rawh. Eng emaw a awm chuan ka rawn hrilh vat ang che" a ti sawk sawk a. Pi Mali'n lawmthu a lo hrilh kawkalh. Engmah a ti tawp si lo. 

A pa chu khumah a lo mu bal a, a nu leh a naute bakah an in chung nu leh pa ten an thutpui ve bawk. 

"Thil a ei em? " a ti nghal a. 

"A luak chhuak zel a.. Thil tuiril lam chu kan pe zeuh zeuh" a nu chuan a lo ti var a. A pa nghawng chu a rawn puar lian tawh khawp mai. Thawk a harsat hmel hle bawk. A bawk chu paih an tum naa a taksa a fit hlawl si lo va, a taidarh hma ngeia paih an duh si. A pa lah a chau telh telh si, rilru a buai duh khawp ang le.. 

Mampuii chuan, "Û, Arini chu engtin nge a awm? " a lo ti vat a. A chanchin chu a sawi a. 

"Awii a thi ang tih ka van hlau tak, hmaichhana ngaihdam dil ka la duh asin" Mampuii bawk chuan a ti leh a. An in chungnu chuan a hrethiam lo va, a chhan a zawt nghal. Mahse, a ngawi ta reng a. 

An veng chhung chuan Lucy hremna leh a thiltih chu an hre ru fur a, a langin an sawipui ngam lo mai pawh a. An in chungte pawn an hai bik lo, sawi chhuah kha thil nuam a ni si lo va. Mahse, chumi zan chuan an sawi chhuak ta nge nge a, an insawn chuk chuk te kha mak an tih lem loh thu te thlengin. An sawi pawp ta sa sa a, Pi Zuali chuan Mampuii thil tawn chu a chin chhuakin a hrilh ta vek a. 

In chungnu chuan, "Aa.. A mak hleinem, Lucy te chu a la fel ngawt zawk ka ti asin. Engtin nge sawtiang sawn a rawn thanlen theih kan ti fur zawk alawm. A tet lai hun hre ve ula chuan in demna kha a ziaawm maithei, mahse, hetia ka sawi vanv hian a thiltih kha a dik ka tihna a ni lo ania" a lo ti ta a. Ruatfela chuan tihtur a awm lo bawk a, rilru lakpen nan tiin Lucy chanchin a zawt ta a. 

An in chungnu chuan tiang hian a sawi ta a. 

"Tuna a pa saw a pa tak a ni lo va, a nu fabik saw a nia. Kum 2 lek anih laia innei an nia. Lucy pahrawn Zova saw mi tawrawt leh rorum zet a ni a, Lucy chu bang den nan te a hmang thin. Kut a thlak nasa em em a, a nu lahin a chhan ngam si lo. Ganja an han zuar chho va, an inlengte awm lai pawn a dim chuang lo. Thawk khat lai phei kha chuan a nu khan hnuchham ina dah te a rilruk hman a. Mahse, a pa sawn a phal leh roh si lo. Kum 10 a tling chho va, chutiang a nih thleng pawn kut a la thlak, a nau te a pa fa te pahnih lahin an hmusitin engahmah an ngai si lo. A nun kha a hrehawm ve hle a ni. School te a kal ve a, lehkha a thiam thei em em te kha a pa chuan a thik nge a fail loh chuan a hlap tur thute zuk sawi a! Lucy chuan a la hlau si a, a fail lui ta ngei a. Mahse, a nu saw inti paukhauhin Lucy chu hostelah a dah ta a. A pa chuan va lak chhuah a tum leh naa an warden ten an lo hum ve tlat si a. Rei tak Hostelah a awm ta nghe nghe. Christmas chawlhah pawh a rawn haw ngai lo. An sawi danin an warden bulah a awm ve mai thin niawm a ni. 

Tichuan, High school a zo ta a. A rawn chhuak ve ta a. A nungchang erawh a dang ta daih. A hma anga dawihzep leh thlabar reng reng ang kha a ni tawh lo a niawm e. A pain kutthak hnawih nana hman a tum te chuan a lo dang ngamin chemte nen a lo vau let ngam tawh a niang. Zan khat phei chu a pa hrawkah zai tumin chemte a lo tin ran mai an tia! Lucy chu mi naran ani lo tij leh pawisak engmah a nei lo tih an hriat talah chian tuman an tiduhdah ngam ta miah lo va. A naute pawh a kutthak hnawihna an lo ni ta zawk a. An dinhmun a letling thawk a ni ber. Police call-a an vau lahin an ganja thuhrukna a sawi tur thu leh an lakna thin thlenga a puanzar tur thu a sawi ve tlat si a! An ngam ta lo a ni. Tichuan, sawtiang dinhmun saw a rawn thleng ta a ni. A naute chu naupangtein ram dangah an awm ta daih! Tisawn amah chiah fa an nei emaw tih turin an mal khalh ta a. Amah pawh a chhungte lakah a sual ta vak lo aniang. A pa nen pawh an inbe thei ve ta viau a niawm e. An sawi zel dan ka hriat chuan, hetia hmeichhia a kawp thin chhan chu high school a kal laia an warden khan a khawih thin niin an sawi. An cheng dun tam si a, kha nu khan a khawih piangsual ta a ni maithei. A vanduai ve ngawt asin" tiin

Mampuii pawh chuan Lucy chanchin dik tak a hriat takah chuan hriatthiamna chin a nei a, mahse, a la haw reng tho. A huat bakah a ten tel tlat hi a buaithlak a ni. Ruatfela chuan Lucy chanchin an ngaihthlak chhung zawng khan Arini nen a lo hmehbel zar zar. Arini leh Lucy chu vanduai a ti a, a khawngaih. Mahse, an khawvel leh a khawvel a inan loh em vang erawh chuan an awmdan zawng zawng a feel pui thei lo. 

A pa pawh a muhil thei ta bawk a. In chungte pawh an haw chho ve ta a. An ni pawh mu turin an insingsa tan. Dar 12 a la ri lo deuh. 

Nancy call a dawng ta a, a la hreh mang e. Hlauhthawnna hlirin a khat. 

"Aw a tha em? " a ti nghal tâwng a. 

"Arini chu a la ngai. Mahse, Erica zawk kha a kal chiah.. " a rawn ti a. Ruatfela a thaw huai. Erica thi chu a lawm pawh a ni lo, Arini thih thu a hriat loh vang chuan a lawm a ni. Thinthi mang lovin a muhil ve thei ta hram. A pa pawh a rawn harh leh ta lo va, a tihzia mang e. 

"Mama, chemo hi khai tawh lo mai ang u. Anih tur ang hi nihtir tawp a tha.. Ka dam rei tawh dawn chuang lo. Ka hrawk bawk hian a tai darh vek tawh" tukthuan ei hmain a pa chuan Ruatfela bulah a ti a. 

Sawi tur a van hle. Ni e, zep loh chuan Chemo khai hmaa paihtir kha an tum dan a ni a. Doctor ber kha a zin leh ta si a! A pa bawk lah a thang chak si. Doctor rawn haw khan, "A bâwk paih hma hian vawi hnih vawi thum vel khai ila, a fit veleh kan paih ang a, chemo chu vawi khat vel bak khai a ngai tawh lo vang" a ti kha a nia. Mahse, an beisei aiin a chauhpui ta si. A tira bawk relh relh chauh kha a rawn thang zawt a ni ber. Duhthlan tur a vang ta hle. 

"Aaa ka pa, Doctor te berin beiseina an la neih chuan keini chuan an thu kan zawm mai a tha. Sum lamah i lo pháng te a nia nge.. Kan la nei ve aw" a ti ta tawp a. A pa erawh a ngawi vang vang mai. 

A pa a ziaawm ta deuh bawk a, Arini chanchin ngaihven turin a va inkhalh phei leh ta a. ICU atangin an nawr chhuak tawh a. Zan khat chiah ICU-ah a riak anih chu! A dam chhuah ngei a rinawm ta. Cabin-ah an dah lut tawh a. A va lut ve ta tawp. Arini nu leh an nula awmpui niawm tak hian an lo awmpui a. Pu Thanga a la hmu ve miah lo chuan a tilunghnur. A sawi ve phak a awm chuang lo va. 

Arini erawh a mu chiah chiah mai. A dâng bai a, a heh te chu a duk tlen mai. Thutpui chawrh chawrh bak tihtheih a awm vak lo. Ruatfela pawh chawhnu lamah a haw ve leh ta mai. Pi Mali nen khan an titi nasa a, nu fel tak niin a hria. A fanu chu a hmangaih a, mahse, a awmdan zawng zawng a hre vek lo tih erawh a hriat. Ruatfela pawn engkim a hrilh duh bik lo, a tul ber lo bawk a. 

A pa pawn thil a ei lui ve thei ta zel a, zan khat a riahpui leh hnuah Tanhrilhah a liam thla leh ta phawt. Rilru bet lo zetin hna a thawk a ni ber. Ni 5 a liam leh meuh chuan, Arini pawh a harh tawh thu a hre ta a. Awmhmunah a lo lawm ve em em tawp. Inrinni chawhnuah tlawh ngei a tum. Hna a laklawh deuh si a, Mikhual an nei deuh reng a, Aizawl khaw chhung atanga honeymoon rawn hmang an awm kal deuh reng. Mi nupa hlim tak a hmuh chang chuan Sandra leh Arini a mitthla chhawk thin. Nupui te hi a la nei ve ngei awm si a! 

Cabin No. 09 kawngka bulah chuan a ding vang vang a. Arini nen an inhmachhawn leh dawn ta chu a nia. A lo la haw viau ang em le.. Inngaihtuah buai tak chungin kawngka chu a hawng dek dek a, "Lo kal rawh" Pi Mali aw in a rawn ti a. Room chhungah a lut ta. 

Thu mu deuhin fel takin a lo awm a. A rawn melh nghal kal bawk. 

"I van tha tawh ve.. Ka beisei ai daihin ka hmu tha che" tiin eitur a leisak te chu a dawhkanah chuan a dah a. Chumi hnuah khum bulah chuan a va thu ve a. 

"Nia, hei a zia tak tak.. A lawmawm em mai" Pi Mali chuan a ti a. 

Mi dang tumah dang an awm ve lo. 

Arini chuan thawk la halh hian, "Tu nge i nih? " a ti ta sap a. Ruatfela chuan a melh kâwk, "Min hre lo a maw? Nge min hre lo der? " Pi Mali pawh zah zo lo chuan a ti a. 

"Ka hre ngai lo che. Tu nge ka nih pawh ka hre hek lo" a ti ta mai. 

Pi Mali'n a rawn kai a, a chhuahpui ta vut. 

"Ka hrilh hmasa lo che a, min ngaidam teh. Mateii hian a hriatna a hloh nual a, zawi zawia a neih leh tur chu a ni a, nawr vak an la remti lo va, tu nge anih pawh a inhre lo. Inenkawl a la ngai lutuk… " lungchhiat hmel takin a ti ta mawlh mawlh a. 

Ral hla tak melh chung chuan, "A nunhlui zawng zawng kha hriatchhuahtir kher a ngai hleinem. A hming a hriata a chhungte a hriat che u chuan a tawk mai alawm. Tichuan, nun tharin bul a tan thei ang" Ruatfela chuan a ti ta daih. Pi Mali chuan a melh vawng vawng ringawt. 

"Va lut rawh. A hrilhhai ang. Kei chu ka haw leh phawt ang. Tu nge ka nih a zawh che chuan ka hming hrilh la, a u te resort-a ka thawh vanga inhria kan nih thu i hrilh dawn nia. A nunhlui kha phumbo sak hram rawh u aw" Ngenngawl zetin a ti leh a. Hawi let miah lovin a kal nghal. Hrilhhai hmel zetin Pi Mali chuan a melh vawng vawng a. 

A bike tinungin an in lam a pan ta nghal a. A rilru erawh chuan thu a sawi mawlh mawlh. 

"Ka tel lovin a khawvel tharah chuan hlim ngei rawh se.. Ka lawmpui che, Arin, mahse, ka ngai ngawt ang che" tiin. 

(Tawi ti lo hram aw.. In pi hi ka bawrhsawm rih si a. Muah vek u. 😍